ក្តៅៗ Dispatch ទម្លាយថា Karina និងតារាសម្តែង Lee Jae Wook មានទំនាក់ទំនងស្នេហា

នៅថ្ងៃទី ២៧ ខែកុម្ភៈ ប្រព័ន្ធផ្សព្វផ្សាយ Dispatch បានលាតត្រដាងថាតារាសម្តែង Lee Jae Wook និង Karina សមាជិកក្រុម Aespa ថាមានទំនាក់ទំនងស្នេហា។ ខណៈពេលនេះខាងតំណាងក្រុមហ៊ុនទាំងសងខាងកំពុងស្ថិតក្នុងដំណើរការបញ្ជាក់ថាតើនេះជាការពិតឬអត់។

ប្រព័ន្ធផ្សព្វផ្សាយខាងលើនេះរាយការណ៍ទៀតថា តារាទាំងពីរកាន់តែមានភាពស្និទ្ធស្នាលនឹងស្នេហា បន្ទាប់ពីបានចូលរួមក្នុងកម្មវិធីបង្ហាញម៉ូតម៉ាកយីហោជាមួយគ្នានៅទីក្រុង Milan កាលពីថ្ងៃទី១៤ មករា ហើយទំនាក់ទំនងរបស់ពួកគេបានបន្តនៅក្នុងទីក្រុងសេអ៊ូល។

ព័ត៌មានបានលើកឡើងទៀតថាទោះបីជា Karina បច្ចុប្បន្នកំពុងរស់នៅក្នុង dorm របស់ Aespa ក៏ដោយ ក៏អ្នកទាំងពីរអាចរីករាយនឹងការណាត់ជួបជាមួយគ្នាគ្រប់ពេលដែលពួកគេអាចឆ្លៀតបាន។ Dispatch លើកឡើងថា Karina នឹងជួបជាមួយ Lee Jae Wook នៅម្ដុំក្បែរកន្លែងដែលតារាសម្តែង Lee Jae Wook រស់នៅ ហើយគេបានប្រទះឃើញ Karina នៅជិតផ្ទះរបស់តារាសម្តែងប្រុសរូបនេះនៅពេលយប់។

ជាការឆ្លើយតបទៅនឹងរបាយការណ៍របស់តារាសម្តែង Lee Jae Wook និង Karina សមាជិកក្រុម Aespa ទីភ្នាក់ងាររបស់ពួកគេនៅតែប្រុងប្រយ័ត្នដោយនិយាយថា «យើងកំពុងស្ថិតក្នុងដំណើរការបញ្ជាក់ថាតើនេះជាការពិតឬអត់»។ អ្នកតំណាងមកពីទីភ្នាក់ងាររបស់ Lee Jae Wook គឺ C-JeS Studio បាននិយាយថា «យើងទើបតែបានឆ្លងកាត់អត្ថបទ។ យើងនឹងត្រូវការផ្ទៀងផ្ទាត់ព័ត៌មាននេះ»។

គួរបញ្ជាក់ថា Lee Jae Wook បានបង្ហាញខ្លួនជាលើកដំបូងក្នុងឆ្នាំ ២០១៨ ជាមួយនឹងរឿង ‘Memories of the Alhambra’ របស់ទូរទស្សន៍ tvN ហើយចាប់តាំងពីពេលនោះមកលោកបានបង្ហាញខ្លួននៅក្នុងរឿងជាច្រើន។ តារាចម្រៀង Karina បានបង្ហាញខ្លួនជាលើកដំបូងជាសមាជិកក្រុមចម្រៀងនារី Aespa ក្នុងឆ្នាំ២០២០ ក្នុងនាមជាមេក្រុម។ ក្រុមចម្រៀងរបស់ផលិតកម្ម SM នេះទទួលបានភាពជោគជ័យគួរឱ្យកត់សម្គាល់ជាមួយនឹងបទចម្រៀងល្បីៗដូចជា «Black Mamba», «Next Level», «Savage», «Girls», «Spicy»និង «Drama» ៕