ប្រទេសហ្វាំងឡង់ ៖ ហ្វាំងឡង់ គឺជាប្រទេសមួយក្នុងចំណោមប្រទេសដែលមានប្រព័ន្ធអប់រំល្អបំផុតនៅលើពិភពលោក ហើយការគ្រប់គ្រងរបស់ហ្វាំងឡង់ គឺកំណត់ឱ្យកុមារស្ថិតនៅចំណុចកណ្តាល ។ ហ្វាំងឡង់បានផ្តោតសំខាន់ទៅលើកូនសិស្សមានគុណភាពជីវិត និងមានសិទ្ធិស្មើៗគ្នានៅតាមសាលារៀន, គេហដ្ឋាន និងពេលវេលាផ្ទាល់ខ្លួន រួមទាំងស្មើភាពគ្នាផ្នែកការសិក្សាផងដែរ ។ ហេតុនេះ វាធ្វើឱ្យកូនសិស្សអាចរៀនសូត្រដើម្បីជំរុញចំណេះដឹងមូលដ្ឋាន និងការគិតដ៏ល្អចំពោះសង្គម ។

កូនសិស្សគ្រប់រូបនៅប្រទេសហ្វាំងឡង់ មានសិទ្ធិទទួលបានការសិក្សាមិនគិតថ្លៃនៅតាមសាលារៀនមានគុណភាពល្អនៅទូទាំងប្រទេស ដើម្បីឱ្យកូនសិស្សអាចរៀនសូត្រតាមរយៈការលេង ពីព្រោះហ្វាំងឡង់ផ្តល់ភាពសំខាន់ចំពោះការសិក្សា ជាពិសេស ក្នុងកម្រិតមុនអាយុចូលរៀនរបស់សិស្ស ។ ការលេងជាមួយមិត្តភក្តិនឹងធ្វើឱ្យកុមារអាចអភិវឌ្ឍន៍ខ្លួន និងរីកចម្រើនគ្រប់ផ្នែកយ៉ាងមានគុណភាព ។

ចំណែកការរៀនសូត្រលក្ខណៈផ្ទាល់ខ្លួនវិញ ប្រព័ន្ធអប់រំហ្វាំងឡង់គ្មានការពិនិត្យដើម្បីវាស់ស្ទង់ចំណេះដឹង ឬការប្រកួតប្រជែងទាំងកម្រិតគ្រឹះស្ថានអប់រំ និងកម្រិតបុគ្គល ។ ការរៀបចំឱ្យមានស្តង់ដារការសិក្សាស្មើភាពគ្នា គឺដើម្បីឱ្យកូនសិស្សគ្រប់រូបអាចសម្រេចនូវគោលដៅរបស់ខ្លួនតាមការចាប់អារម្មណ៍ និងភាពស្ទាត់ជំនាញរបស់បុគ្គលម្នាក់ៗ ដោយគ្មានការកំណត់ផ្នែកការអប់រំទេ ។

ចំពោះម៉ោងសម្រាប់សិក្សា គឺកូនសិស្សត្រូវសិក្សាចំនួន៥ម៉ោងក្នុង១ថ្ងៃ ហើយក្នុង១មុខវិជ្ជា មានរយៈពេល៤៥នាទី ។ ការកំណត់បែបនេះ ដើម្បីឱ្យកូនសិស្សមានពេលវេលាផ្ទាល់ខ្លួនសម្រាប់រៀនសូត្រនូវអ្វីដែលពួកគេចាប់អារម្មណ៍ផ្សេងទៀត ។
នៅប្រទេសហ្វាំងឡង់មានត្រឹមតែការប្រឡងថ្នាក់ជាតិ (National Matriculation Exam) ប៉ុណ្ណោះ ក្រោយពីកូនសិស្សបានបញ្ចប់ការសិក្សា ។ រីឯការវាស់ស្ទង់កម្រិតការសិក្សា ពួកគេធ្វើឱ្យត្រឹមការវាស់ស្ទង់ផ្នែកគុណភាពផ្សេងៗ ដើម្បីអភិវឌ្ឍន៍ការរៀនសូត្រជំនាញផ្លូវអារម្មណ៍ និងសង្គមរបស់កុមារជាចម្បង ។ ចំណុចគួរឱ្យកត់សម្គាល់នោះ គឺគ្រូពុំសូវដាក់លំហាត់ ឬកិច្ចការផ្ទះឱ្យកូនសិស្សធ្វើទេ ។

ប្រទេសហ្វាំងឡង់បានកំណត់ឱ្យកុមារចូលរៀនចាប់ពីអាយុ៧ឆ្នាំ ឡើងទៅ ហើយពួកគេរៀនរយៈពេលខ្លីក្នុងសាលារៀន, លំហាត់តិច ដើម្បីឱ្យកុមារមានពេលវេលារៀនសូត្រនៅក្រៅថ្នាក់រៀន និងឈ្វេងយល់ពីពិភពលោកខាងក្រៅដោយខ្លួនឯង ។ កុមារទាំងឡាយអាចលេង និងធ្វើការងារអ្វីមួយដែលពួកគេស្ទាត់ជំនាញ និងចាប់អារម្មណ៍ ដើម្បីជំរុញការយល់ដឹងជាមូលដ្ឋានសម្រាប់ការចម្រើនវ័យរបស់ពួកគេ ។

លើសពីនេះ កុមារគ្រប់រូបមានសិទ្ធិបរិភោគអាហារមិនគិតថ្លៃនៅតាមសាលារៀន រហូតដល់ពួកគេបញ្ចប់ការសិក្សា ។ សាលារៀនបានផ្តល់អាហារថ្ងៃត្រង់ឱ្យកូនសិស្សទាំងអស់ តាំងពីឆ្នាំ១៩៤៣ មកម្ល៉េះ ហើយហ្វាំងឡង់បានបណ្តុះបណ្តាលគ្រូឱ្យមានគុណភាពដើម្បីជំរុញកម្រិតការអប់រំផងដែរ ។ រីឯគុណសម្បត្តិសម្រាប់ការក្លាយជាគ្រូបង្រៀន គឺខ្ពស់ណាស់ ហើយមានបេក្ខជនត្រឹមតែ១០% ប៉ុណ្ណោះ ក្នុងចំណោមបេក្ខជនដាក់ពាក្យទាំងអស់ ដែលត្រូវបានគេជ្រើសរើសឱ្យធ្វើជាគ្រូបង្រៀន ។

គ្រូបង្រៀននៅប្រទេសហ្វាំងឡង់ គឺពួកគេសិក្សាឱ្យចប់ថ្នាក់អនុបណ្ឌិតឡើងទៅ មិនថាពួកគេបង្រៀនសិស្សនៅកម្រិតណាទេ ។ គ្រូទាំងឡាយមានសេរីភាព និងទទួលបាននូវការគាំទ្រក្នុងការអភិវឌ្ឍវិធីសាស្ត្របង្រៀន ដើម្បីជំរុញឱ្យគ្រូអាចអភិវឌ្ឍន៍សមត្ថភាពរបស់ខ្លួន ។

បើទោះជាហ្វាំងឡង់មានឈ្មោះថា មានប្រព័ន្ធអប់រំល្អបំផុតនៅលើពិភពលោកក្តី ប៉ុន្តែបុគ្គលិកផ្នែកអប់រំរបស់រដ្ឋ និងឯកជន នៅតែព្យាយាមស្វែងរកវិធីសាស្ត្រថ្មីៗជានិច្ច ដើម្បីឱ្យប្រព័ន្ធអប់រំកាន់តែអភិវឌ្ឍន៍ជឿនលឿនថែមទៀត ៕

វៀតណាម៖ តម្លៃកាហ្វេនៅក្នុងប្រទេសវៀតណាមបានបង្កើតកំណត់ត្រាខ្ពស់បំផុតមិនធ្លាប់មានក្នុងរយៈពេល ៣០ ឆ្នាំ ដែលឈានដល់ជិត ១ ពាន់លានដុល្លារអាមេរិកត្រឹមរយៈពេល ៤៥ ថ្ងៃប៉ុណ្ណោះនៃការនាំចេញកាហ្វេ ដែលនេះនឹងជួយដល់ឧស្សាហកម្មកាហ្វេរីកចម្រើនខ្លាំងនាពេលអនាគត។
យោងតាមអគ្គនាយកដ្ឋានគយ គិតត្រឹមឆមាសទីមួយនៃខែកុម្ភៈ ឆ្នាំ២០២៤ ប្រទេសនេះបាននាំចេញកាហ្វេជិត ៥៧.០០០តោន ជាមួយនឹងចំណូលសរុប ១៨៤.៤ លានដុល្លារអាមេរិក។ សរុបមក ចាប់ពីដើមឆ្នាំរហូតដល់ថ្ងៃទី១៥ ខែកុម្ភៈ បរិមាណនៃការនាំចេញកាហ្វេសម្រេចបានជិត ២៩៥.០០០តោន គិតជាទឹកប្រាក់ ៩១១ លានដុល្លារអាមេរិក។

បើប្រៀបធៀបទៅនឹងរយៈពេលដូចគ្នាកាលពីឆ្នាំមុន បរិមាណនៃការនាំចេញកាហ្វេកើនឡើងត្រឹមតែ ១៦.៧% ប៉ុណ្ណោះ ប៉ុន្តែចំណូលវិញគឺកើនឡើងរហូតដល់ ៦៦.៨%។ រីឯតម្លៃកាហ្វេនាំចេញជាមធ្យមឈានដល់ជិត ៣,១០០ ដុល្លារ/តោន កើនឡើងជិត ៤៣% បើធៀបនឹងរយៈពេលដូចគ្នាកាលពីឆ្នាំមុន។ ទីផ្សារនាំចេញកាហ្វេសំខាន់ៗរបស់វៀតណាមគឺអឺរ៉ុប អាមេរិក ចិន រុស្សី ឥណ្ឌូនេស៊ី… ក្នុងនោះអឺរ៉ុបគឺជាទីផ្សារនាំចូលកាហ្វេវៀតណាមធំជាងគេដែលមានចំនួន ៨៧,៧០០ តោន ចំណូលកើនឡើងដល់ជាង ២៦៣ លានដុល្លារអាមេរិក។

យោងតាមកំណត់ត្រា បន្ទាប់ពីបុណ្យចូលឆ្នាំថ្មី តម្លៃកាហ្វេបៃតងនៅសួនច្បារក្នុងខេត្តខ្ពង់រាបភាគកណ្តាលបានបន្តកើនឡើងយ៉ាងខ្លាំង ហើយនេះក៏ជាលើកដំបូងដែលបានឈានដល់កំណត់ត្រា ៨០,០០០ ដុង/គីឡូក្រាម។ បច្ចុប្បន្ន តម្លៃកាហ្វេក្នុងទីផ្សារក្នុងស្រុកបានឈានដល់កម្រិតកំពូលជាប្រវត្តិសាស្ត្រក្នុងរយៈពេល ៣០ ឆ្នាំចុងក្រោយនេះ ដែលលើសពីសញ្ញាណ ៨៣.០០០ ដុង/គីឡូក្រាម កើនឡើង ៧០% ធៀបនឹងរយៈពេលដូចគ្នាកាលពីឆ្នាំមុន។

គួរបញ្ជាក់ដែរថា សមាគមកាហ្វេ និងកាកាវវៀតណាម (VICOFA) បានព្យាករណ៍ថាជាមួយនឹងស្ថានភាពនេះនៅឆ្នាំ ២០២៤ ការនាំចេញកាហ្វេអាចឈានដល់ ៤.៥ – ៥ ពាន់លានដុល្លារអាមេរិក ដែលនេះនឹងក្លាយជាឆ្នាំកំណត់ត្រាថ្មីសម្រាប់ការនាំចេញកាហ្វេរបស់វៀតណាម។ ពីមុនក្នុងឆ្នាំ ២០២៣ ប្រទេសវៀតណាមបាននាំចេញកាហ្វេជាង ១.៦២ លានតោន ជាមួយនឹងចំណូលជាង ៤.២៤ ពាន់លានដុល្លារអាមេរិក បើទោះបីជាបរិមាណធ្លាក់ចុះ ៨.៧% ប៉ុន្តែកើនឡើង ៤.៦% នៅក្នុងចំណូលធៀបនឹងឆ្នាំ ២០២២៕

ប្រទេសឥណ្ឌា ៖ នាយករដ្ឋមន្ត្រីប្រទេសឥណ្ឌា លោក Narendra Modi បានជ្រមុជទឹកទៅធ្វើពិធីគោរពសាសនាក្នុងវត្ត និងទីក្រុងបុរាណនៅក្រោមទឹក ឈ្មោះ «ថាវ៉ារ៉ាកា» ដែលស្ថិតនៅបរិវេណខាងក្រៅឆ្នេរសមុទ្រអារ៉ាប់ រដ្ឋឃូឆារ៉ាត កាលពីថ្ងៃទី២៥ ខែកុម្ភៈ ឆ្នាំ២០២៤ ។ លោកបានអង្គុយសមាធិ និងសូត្រធម៌នៅក្រោមទឹក ហើយលោកបានយកកន្ទុយក្ងោកទៅថ្វាយវត្ថុស័ក្តសិទ្ធផងដែរ ។

ចំណែកអ្នកមានជំនាញជ្រមុជទឹកជាច្រើននាក់ទៀតបានជួយការពារលោកនាយករដ្ឋមន្ត្រី និងមិនទៅឆ្ងាយពីលោកទេ ។ មេដឹកនាំឥណ្ឌា អាយុ៧៣ឆ្នាំ រូបនេះ បានចុះទៅក្រោមទឹកនៅបរិវេណដែលគេជឿថា គឺជាទីក្រុងបុរាណ ដោយលោកស្លៀកពាក់ឈុតប្រពៃណីឥណ្ឌា និងពាក់តែមួកប្រភេទ Diving Helmet ប៉ុណ្ណោះ ។

នាយករដ្ឋមន្ត្រីឥណ្ឌា លោក Narendra Modi បានធ្វើពិធីសូត្រធម៌ ដែលមានកន្ទុយសត្វក្ងោកសម្រាប់គោរពបូជាក្នុងវត្តហិណ្ឌូស័ក្តសិទ្ធស្ថិតនៅក្រោមទឹក ។ ជនជាតិឥណ្ឌាដែលគោរពសាសនាហិណ្ឌូជឿថា វាគឺជាផ្នែកមួយរបស់ថាវ៉ារ៉ាកា ឬទីក្រុងបុរាណនៅក្រោមទឹក ដែលត្រូវបានគេដាក់ឈ្មោះថា «ទីក្រុងអាឡែនទីសរបស់ឥណ្ឌា» ។

លោកនាយករដ្ឋមន្ត្រីឥណ្ឌាបានបង្ហោះសារក្នុងបណ្តាញសង្គម X ឬ Twitter ថា ៖ «នៅពេលខ្ញុំបានជ្រមុជទឹកដើម្បីសូត្រធម៌ និងគោរពបូជានៅទីក្រុងបុរាណថូវ៉ារ៉ាកា គឺជាបទពិសោធន៍ដ៏ល្អមួយ និងមានភាពស័ក្តសិទ្ធយ៉ាងខ្លាំង ។ ខ្ញុំមានអារម្មណ៍ថា ខ្ញុំកំពុងទំនាក់ទំនងជាមួយវត្ថុស័ក្តសិទ្ធនៅសម័យបុរាណ ហើយខ្ញុំសូមឱ្យព្រះប្រទានពរដល់អ្នកគ្រប់គ្នាផងដែរ» ។

ថាវ៉ារ៉ាកា គឺជាទីក្រុងបុរាណស្ថិតនៅបរិវេណខាងក្រៅឆ្នេរសមុទ្រនៃរដ្ឋឃូឆារ៉ាត និងជាប់សមុទ្រអារ៉ាប់ ។ ទីក្រុងនេះ គឺជាទីក្រុងស័ក្តសិទ្ធមួយក្នុងចំណោមទីកន្លែងស័ក្តសិទ្ធចំនួន៧ សម្រាប់អ្នកធ្វើបុណ្យសាសនាហិណ្ឌូគោរពប្រតិបត្តិជារៀងរាល់ឆ្នាំ ។ ទីក្រុងថាវ៉ារ៉ាកា បានបង្ហាញពីមហាទេពក្នុងសាសនាហិណ្ឌូ ឬមហាភារៈតៈ ថា គឺជារាជធានីរបស់ព្រះគីសាណៈ និងបានសាងសង់ឡើងនៅទន្លេ កុមទិ ។ ប៉ុន្តែទីក្រុងនេះបានធ្លាក់ទៅក្នុងទឹក ក្រោយពីការសោយទីវង្គតរបស់ព្រះគីសាណៈ ។

អ្នកបុរាណវិទ្យាបានប្រទះឃើញភស្តុតាងផ្សេងៗនៅក្រោមទឹក ហើយចាប់តាំងពីពេលនោះមក គេជឿថា បរិវេណនេះជាទីតាំងរបស់ទីក្រុងបុរាណថាវ៉ារ៉ាកា ។ ហេតុនេះ គេបានដាក់ឈ្មោះទីក្រុងនេះថា ទីក្រុងអាឡែនទីស របស់ប្រទេសឥណ្ឌា ។ អាឡែនទីស គឺជារឿងរ៉ាវរបស់ឋានសួគ៌នៅសម័យបុរាណ ដែលបានបាត់បង់នៅក្រោមសមុទ្រ ៕