ប្រទេសកម្ពុជា ៖ បើតាមសារព័ត៌មានថៃផ្សព្វផ្សាយថា ប្រទេសជិតខាងថៃមួយចំនួនបានបើកកាស៊ីណូ ដើម្បីទាក់ទាញភ្ញៀវទេសចរបរទេសមកលេង ល្បែ.ង នៅកាស៊ីណូ ក្នុងនោះមានដូចជា ៖ ប្រទេសកម្ពុជា, ឡាវ, មីយ៉ាន់ម៉ា, វៀតណាម, ម៉ាឡេស៊ី, និងសិង្ហបុរី ខណៈប្រទេសថៃ ក៏មានគម្រោងបើកកាស៊ីណូស្របច្បាប់ផងដែរ ។
សារព័ត៌មានថៃបន្តថា ប្រទេសកម្ពុជាមានចំនួនកាស៊ីណូច្រើនជាងគេនៅតំបន់អាស៊ាន ដែលជាទីពេញនិយមរបស់ភ្ញៀវទេសចរចូលចិត្តលេងល្បែង ។ ប្រទេសកម្ពុជាល្បីល្បាញរឿងមានកាស៊ីណូស្របច្បាប់សម្រាប់ជនបរទេស ខណៈបច្ចុប្បន្ន កម្ពុជាមានកាស៊ីណូប្រមាណ១៥០កន្លែង ។ កាស៊ីណូភាគច្រើនរបស់កម្ពុជា គឺមានទីតាំងនៅប៉ោយប៉ែត ស្រុកអូរជ្រៅ ខេត្តបន្ទាយមានជ័យ ។
សារព័ត៌មានថៃបន្ថែមថា កាស៊ីណូល្អៗរបស់កម្ពុជាមានទីតាំងនៅចំណុចកណ្តាលនៃទីក្រុងផ្សេងៗ ដូចជា ៖ ប៉ោយប៉ែត និងបាវិត ហើយកាស៊ីណូជាច្រើនកន្លែងទៀតស្ថិតនៅជិតព្រំដែនប្រទេសថៃ និងកម្ពុជា រួមទាំងនៅព្រំដែនវៀតណាមផងដែរ ។
បច្ចុប្បន្ន Naga World គឺជាកាស៊ីណូដ៏ធំបំផុតនៅប្រទេសកម្ពុជា និងមានឧបករណ៍លេងល្បែងប្រមាណ១.០០០គ្រឿង និងមានតុល្បែង ស្មើជាង២០០តុ ។ រីឯកាស៊ីណូមួយចំនួនទៀតបានបើកសេវាកម្មក្នុងតំបន់ និងមានភ្ញៀវទេសចរស្នាក់នៅជាច្រើននាក់ ដូចជា ៖ Queenco មានទីតាំងនៅខេត្តព្រះសីហនុ គឺជាកាស៊ីណូថ្មី និងមានទំហំធំ ។
ខាងក្រោមនេះ គឺជាឈ្មោះកាស៊ីណូដែលជនជាតិថៃនិយមទៅលេងល្បែង រួមមាន ៖
-GRAND DIAMOND CITY
-HOLIDAY PALACE
-POIPET CASINO RESORT
-STAR VEGAS CASINO
-PRINCESS CROWN CASINO
-GENTING CASINO និង
-TROPICANA RESORT AND CASINO
សារព័ត៌មានថៃបញ្ជាក់ថា សម្រាប់ជនជាតិថៃបានទទួលសិទ្ធិពិសេសឱ្យឆ្លងព្រំដែនចូលប្រទេសកម្ពុជាដើម្បីលេងល្បែង ដោយពុំចាំបាច់ឆ្លងកាត់ការត្រួតពិនិត្យរបស់ប៉ូលិសអន្តោប្រវេសន៍ទេ ប៉ុន្តែនឹងមានការថែរក្សាសុវត្ថិភាពបន្ថែមទៀត នៅពេលជនជាតិថៃធ្វើដំណើរមកដល់ប្រទេសកម្ពុជា ។
ចំណែកសារព័ត៌មានថៃមួយទៀតឈ្មោះ TNN News បានចុះផ្សាយថា ប្រទេសកម្ពុជាបានជាប់ចំណាត់ថ្នាក់ទី១ នៅតំបន់អាស៊ាន ដែលមានចំនួនកាស៊ីណូច្រើនជាងគេ ។ ខាងក្រោមនេះ គឺជាចំនួនកាស៊ីណូនៅក្នុងប្រទេសនីមួយៗ ៖
-កម្ពុជា មានកាស៊ីណូ ចំនួន ១៥០កន្លែង
-ហ្វីលីពីន មានកាស៊ីណូ ជាង ២០កន្លែង
-វៀតណាម មានកាស៊ីណូ ចំនួន ៧កន្លែង
-ឡាវ មានកាស៊ីណូ ចំនួន ៤កន្លែង
-សិង្ហបុរី មានកាស៊ីណូ ចំនួន ២កន្លែង និង
-ម៉ាឡេស៊ី មានកាស៊ីណូ ចំនួន ១កន្លែង ៕
