យោងតាម Space អ្នកវិទ្យាសាស្ត្របានរកឃើញភពចំនួន៥ ដែលមានលក្ខណៈស្រដៀងនឹងផែនដីបំផុត ហើយភពទាំងនោះក៏មានសមត្ថភាពទ្រទ្រង់ជីវិតរបស់មនុស្សបានផងដែរ។ មុននឹងរកឃើញភពទាំងនេះ អ្នកវិទ្យាសាស្ត្របានប្រើកែវយឺតអវកាស Kepler របស់អង្គការ NASA ដែលបានបាញ់បង្ហោះក្នុងឆ្នាំ ២០០៩ ជាមួយនឹងបេសកកម្មស្វែងរកភពដូចផែនដីនៅទូទាំងកាឡាក់ស៊ី Milky Way ដែលការរកឃើញនេះគឺជាក្តីសុបិន្តដ៏ធំបំផុតរបស់អ្នកតារាវិទូ។ ដូច្នេះខាងក្រោមនេះគឺជាភពទាំង ៥ ដែលមានលក្ខណៈស្រដៀងនឹងផែនដីបំផុតក៏ដូចជាមានសមត្ថភាពទ្រទ្រង់ជីវិតមនុស្សបានផងដែរ៖

១. KEPLER-69C៖ Kepler-69C ស្ថិតនៅចម្ងាយប្រហែល ២,៧០០ ឆ្នាំពន្លឺ ដែលមានទំហំធំជាងផែនដីប្រហែល ៧០% ។ ភពនេះបំពេញគន្លងរបស់វារៀងរាល់ ២៤២ ថ្ងៃម្តង ដែលធ្វើឱ្យទីតាំងរបស់វាស្រដៀងទៅនឹងភពសុក្រនៅក្នុងប្រព័ន្ធព្រះអាទិត្យរបស់យើង។ ទោះជាយ៉ាងណាក៏ដោយ ភព Kepler-69C មានពន្លឺភ្លឺជាងព្រះអាទិត្យប្រហែល ៨០% ដូច្នេះភពនេះហាក់ដូចជាស្ថិតនៅក្នុងតំបន់សមរម្យសម្រាប់ការអភិវឌ្ឍន៍ជីវិត។

២. KEPLER-22B៖ Kepler-22B ស្ថិតនៅចម្ងាយ ៦០០ ឆ្នាំពន្លឺពីផែនដី។ Kepler ត្រូវបានគេរកឃើញជាលើកដំបូងនៅក្នុងតំបន់ដែលអាចរស់នៅបាននៃផ្កាយមេរបស់វា ប៉ុន្តែភពនេះមានទំហំធំជាងផែនដីយ៉ាងខ្លាំងប្រហែល ២.៤ ដងនៃទំហំភពផែនដីរបស់យើង។ ទោះជាយ៉ាងណាក៏ដោយ គន្លងគោចររយៈពេល ២៩០ ថ្ងៃរបស់ Kepler-22B គឺស្រដៀងទៅនឹងគន្លងរយៈពេល ៣៦៥ ថ្ងៃរបស់ផែនដី ហើយជាភពដែលវិលជុំវិញផ្កាយដូចព្រះអាទិត្យរបស់យើង ប៉ុន្តែមានទំហំតូចជាង នេះធ្វើឱ្យ Kepler-22B ត្រជាក់ជាងផែនដី។

៣. KEPLER-186F៖ Kepler-186F គឺជាភពដែលមានទំហំធំជាងផែនដីប្រហែល ១០% ហើយវាក៏ហាក់ដូចជាស្ថិតនៅក្នុងតំបន់ដែលអាចរស់នៅបានផងដែរ បើទោះបីជាស្ថិតនៅលើគែមខាងក្រៅនៃតំបន់នៃក្រុមផ្កាយរបស់វាក៏ដោយ ក៏Kepler-186F ទទួលបានថាមពលត្រឹមតែមួយភាគបីប៉ុណ្ណោះពីផ្កាយរបស់វា។ ផ្កាយមេរបស់ Kepler-186F គឺជាមនុស្សតឿក្រហម ដូច្នេះភពនេះមិនដូចផែនដីទេ ហើយវាស្ថិតនៅចម្ងាយប្រហែល ៥០០ ឆ្នាំពន្លឺពីផែនដី។

៤. KEPLER-62F៖ យោងតាម NASA ភពនេះមានទំហំធំជាងផែនដីប្រហែល ៤០% ហើយគន្លងរយៈពេល ២៦៧ ថ្ងៃរបស់វាបានស្ថិតក្នុងតំបន់ដែលអាចរស់នៅបាន។ លើសពីនេះ Kepler-62F ធ្វើដំណើរទៅជិតផ្កាយមនុស្សតឿក្រហមរបស់វា ជាងផែនដីទៅព្រះអាទិត្យ ហើយផ្កាយបង្កើតពន្លឺតិចជាង។ Kepler-62F ស្ថិតនៅចម្ងាយប្រហែល ១.២០០ ឆ្នាំនៃពន្លឺ ដូច្នេះដោយសារតែទំហំធំរបស់វា វាស្ថិតនៅក្នុងជួរនៃភពថ្មដែលអាចផ្ទុកមហាសមុទ្របាន។

៥.GLIESE 667CC៖ នៅក្នុងខែកុម្ភៈ ឆ្នាំ២០១២ ក្រុមអ្នកវិទ្យាសាស្ត្រអន្តរជាតិបានរាយការណ៍ពីលទ្ធផលនៃការស្រាវជ្រាវរបស់ពួកគេដែលផ្តោតលើភព GJ 667C ដោយពួកវាស្ថិតនៅចម្ងាយប្រហែល ២២ ឆ្នាំពន្លឺពីផែនដី។ បន្ទាប់មក 667CC ដែលជា super-Earth មានគន្លងគោចររយៈពេល ២៨ ថ្ងៃ ដែលវាទទួលបាន ៩០% នៃពន្លឺដែលផែនដីទទួលបានពីព្រះអាទិត្យ។ ចំណុចសំខាន់គឺថាភព GJ 667CC អាចមានទឹករាវ ទោះជាយ៉ាងណា បើយោងតាមការសង្កេតនៅពេលក្រោយបានរកឃើញថា ភព GJ 667CC គឺក្តៅខ្លាំង ដូច្នេះហើយទំនងជាមិនអាចទ្រទ្រង់ជីវិតបានទេ៕

យើងបានជ្រាបថា ការស្តាប់ភ្លេងខ្លាំងៗ ឬស្ថិតនៅកន្លែងប្រគំតន្ត្រី នឹងមានផលប៉ះពាល់ដល់ការស្តាប់ឮរបស់ត្រចៀក ។ ប៉ុន្តែតើដឹងឬទេថា ការស្តាប់ភ្លេងខ្លាំងនឹងផ្តល់ផលប៉ះពាល់ច្រើនជាងនេះទៅទៀត ពីព្រោះវាអាចធ្វើឱ្យយើងមានជំងឺប្រេះសួត ឬសួតខូចទ្រង់ទ្រាយបាន ។

ក្រុមអ្នកជំនាញបានសរសេររបាយការណ៍មួយឈ្មោះ «Thorax» ដែលបានលើកឡើងពីករណីអ្នកមានជំងឺសួតចំនួន៤នាក់ ដោយសារពួកគេចូលចិត្តស្តាប់ភ្លេងខ្លាំងៗ ។ រោគសញ្ញាខ្សោយសួតបានកើតឡើងដោយសារការស្តាប់ភ្លេង ឬស្តាប់តន្ត្រីសំឡេងខ្លាំងនេះ ខាងផ្នែកវេជ្ជសាស្ត្រហៅថា «Numothorax» ។

របាយការណ៍នេះបានលើកឡើងពីបុរសម្នាក់កើតរោគសញ្ញា Numothorax នៅពេលគាត់កំពុងបើកបររថយន្ត ហើយនៅសុខៗ ស្រាប់តែគាត់ពិបាកដកដង្ហើម និងចុកដើមទ្រូងដោយមិនដឹងមូលហេតុ ។ គ្រូពេទ្យបញ្ជាក់ថា អាការៈជំងឺរបស់គាត់ពាក់ព័ន្ធនឹងឧបករណ៍បំពងសំឡេងដែលបានដំឡើងក្នុងរថយន្ត ដើម្បីឱ្យសំឡេងក្នុងរថយន្តកាន់តែឮខ្លាំងជាងមុន ។

គ្រូពេទ្យបញ្ជាក់ថា រោគសញ្ញានេះកើតឡើងនៅពេលអ្នកជំងឺបានស្តាប់ភ្លេងខ្លាំងៗ ។ វាជាមូលហេតុធ្វើឱ្យកើតការប្រេះស្រាំក្នុងសួត ដោយសារខ្យល់ និងជាលិកាក្នុងសួតនឹងឆ្លើយតបខុសគ្នាទៅនឹងប្រតិកម្មសំឡេង ។ ជាធម្មតា ហានិភ័យដែលបណ្តាលឱ្យកើតជំងឺសួត តែងកើតឡើងដោយសារការជក់បារី ឬការឈឺចាប់ដែលធ្វើឱ្យអ្នកជំងឺចុះខ្សោយ ។ ជំងឺទាក់ទងនឹងសួត រួមមាន ៖ ការប្រើប្រាស់សារធាតុមានឥទ្ធិពលប្រឆាំងរាងកាយ ឬការប្រើប្រាស់ថ្នាំមួយចំនួន ដូចជា ៖ ថ្នាំគេងលក់, ថ្នាំស្ពឹក និងគ្រឿងស្រវឹង ។

បើទោះជាជំងឺសួតបានកើតឡើងដោយសារការស្តាប់ភ្លេងខ្លាំងៗ គឺជាករណីពុំសូវកើតឡើងក្តី ប៉ុន្តែរោគសញ្ញានេះនឹងអាចធ្វើឱ្យអវៈយវៈផ្សេងៗក្នុងរាងកាយទទួលបានអុកស៊ីសែនមិនគ្រប់គ្រាន់ ហើយអ្នកជំងឺអាចប្រឈមនឹងការស្លាប់ទៀតផង ។

លោកវេជ្ជបណ្ឌិត John Harvey មកពីមន្ទីរពេទ្យ Southmead ក្នុងទីក្រុង Bristol បានសរសេររបាយការណ៍មួយឈ្មោះ «Thorax» ជាមួយក្រុមអ្នកជំនាញនៅប្រទេសបែលហ្ស៊ិក បាននិយាយមកកាន់សារព័ត៌មាន BBC ថា គ្មានអ្វីអាចរារាំងមនុស្សកុំឱ្យទៅលេងនៅក្លិប ឬទៅកាន់កន្លែងមានសំឡេងភ្លេងខ្លាំងបានទេ ប៉ុន្តែយើងអាចណែនាំពួកគេកុំឱ្យឈរជិតកន្លែងមានសំឡេងខ្លាំង ឬអ្នកនិយាយខ្លាំងៗ ។ លើសពីនេះ ពុំគួរបង្កើនសំឡេងក្នុងរថយន្ត ឬក្នុងបន្ទប់ខ្លាំងពេកទេ ។

លោកវេជ្ជបណ្ឌិតនិយាយថា ៖ «រោគសញ្ញាខ្សោយសួតបានកើតឡើងដោយសារការស្តាប់ភ្លេងខ្លាំងនេះ ភាគច្រើនវាកើតឡើងជាមួយមនុស្សប្រុសច្រើនជាងមនុស្សស្រី រហូតដល់៣ដងឯណោះ ។ ការឈឺចាប់របស់រោគសញ្ញា Numothorax បានកើតឡើងក្នុងអំឡុងពេលពួកគេស្ថិតនៅក្នុងក្លិប ឬនៅជិតមេក្រូ ពេលពួកគេឈរមើលការប្រគំតន្ត្រី» ។

លោកវេជ្ជបណ្ឌិតសង្កត់ធ្ងន់ថា ស្នាមប្រេះនៅក្នុងសួតមិនបានធ្វើឱ្យសួតផ្ទុះនោះទេ ប៉ុន្តែសួតនឹងមានស្នាមដាច់រហែក ហើយធ្វើឱ្យអ្នកជំងឺពិបាកដកដង្ហើម ។ ចុងក្រោយ សួតនឹងចាប់ផ្តើមខូចទ្រង់ទ្រាយ ហើយអ្នកជំងឺដកដង្ហើមលែងកើតតែម្តង ៕

បរទេស៖ កាលពីថ្ងៃទី១ ខែមីនា ឆ្នាំ២០២៤ យោងតាមទីភ្នាក់ងារសុខភាពសាធារណៈជាតិរបស់សហរដ្ឋអាមេរិក (CDC) បានឱ្យដឹងថា មេរោគថ្មី Norovirus កំពុងមានការរីករាលដាលខ្លាំងចំពោះកុមារនៅទីក្រុងញូវយ៉កនិងរដ្ឋមួយចំនួននៃប្រទេសនេះ ដោយបច្ចុប្បន្នរដ្ឋាភិបាលកំពុងចាត់វិធានការគ្រប់គ្រងជំងឺនេះយ៉ាងឆាប់រហ័សបំផុត។

មេរោគថ្មី Norovirus ត្រូវបានគេស្គាល់ថាជា មេរោគពោះវៀន ដែលភាគច្រើនកើតឡើងនៅចន្លោះខែវិច្ឆិកា ដល់ខែមេសា ហើយលទ្ធផលអ្នកឆ្លងជំងឺនេះជាមធ្យមគឺ ១៩ ទៅ ២១ លាននាក់ក្នុងមួយឆ្នាំ។ ទោះជាយ៉ាងណា ជំងឺនេះមិនបណ្តាលឱ្យបាត់បង់ជីវិតនោះទេ គ្រាន់តែអ្នកជំងឺអាចធ្លាក់ខ្លួនឈឺជាច្រើនដងក្នុងមួយឆ្នាំ ដោយភាគច្រើនមានអាការៈដូចជាក្អួត ចង្អោ ចុកពោះ និងរាគញឹកញាប់ជាដើម។

ប្រធានផ្នែកវេជ្ជសាស្រ្តនៅ WebMD លោកវេជ្ជបណ្ឌិត John Whyte បាននិយាយថា ការរីករាលដាលគឺទូលំទូលាយណាស់នៅក្នុងផ្នែកខ្លះនៃតំបន់របស់យើង ដែលវាបានធ្វើឱ្យជីវិតប្រចាំថ្ងៃរបស់មនុស្សមួយចំនួនត្រូវផ្អាក។ កាលពីដើមខែកុម្ភៈឆ្នាំ ២០២៤ សាលាបឋមសិក្សា Irving នៅ Highland Park រដ្ឋ New Jersey បានបិទដោយសារការផ្ទុះជំងឺក្រពះពោះវៀន Norovirus។ បន្ទាប់ពីបិទបានមួយរយៈ សាលាក៏បានធ្វើការសម្អាតយ៉ាងយកចិត្តទុកដាក់ ដើម្បីបើកថ្នាក់រៀនឡើងវិញ។

លោកវេជ្ជបណ្ឌិតបានបន្តទៀតថា បច្ចុប្បន្នភាគឦសានគឺមានអត្រាវិជ្ជមានខ្ពស់បំផុតសម្រាប់មេរោគ norovirus។ បើយោងតាម CDC ក៏បានឱ្យដឹងដែរថា មេរោគ norovirus ជាទូទៅឆ្លងតាមរយៈការប៉ះពាល់ដោយផ្ទាល់ ឬការប៉ះផ្ទៃដែលមានមេរោគ ហើយប្រសិនបើតំបន់ណាដែលមានមនុស្សរស់នៅច្រើន ច្បាស់ណាស់វានឹងឆ្លងពីមនុស្សម្នាក់ទៅមនុស្សម្នាក់ទៀត ហើយភាគច្រើនកុមារគឺជាជនរងគ្រោះដោយសារប្រព័ន្ធការពារកុមារខ្សោយ។

វេជ្ជបណ្ឌិត John Whyte បានបន្ថែមទៀតថា ដើម្បីការពារកុំឱ្យជំងឺនេះរីករាលដាលខ្លាំង យើងត្រូវលាងដៃជាមួយសាប៊ូឱ្យបានញឹកញាប់ ឧស្សាហ៍ងូតទឹកក្តៅដើម្បីកំចាត់មេរោគ សម្អាតឧបករណ៍ផ្សេងៗ និងប្រដាប់ប្រដាប្រើប្រាស់មួយចំនួនជាមួយទឹកក្តៅ និងសាប៊ូ ក៏ដូចជាបោកខោអាវជាមួយទឹកក្តៅ និងសាប៊ូ លាងបន្លែ ផ្លែឈើជាមួយទឹកក្តៅ ២-៣ ដងមុនពេលចម្អិនអាហារ ដែលវិធីទាំងនេះសុទ្ធតែអាចការពារការឆ្លងមេរោគ norovirus បានយ៉ាងមានប្រសិទ្ធភាព៕

ប្រទេសចិន៖ កាលពីពេលថ្មីៗនេះ ប្រជាជនចិនជាច្រើននាក់បានតម្រង់ជួរជាបន្តបន្ទាប់ដើម្បីជួលវ៉ែនតា Vision Pro ក្នុងតម្លៃ ៩៨ យន់ (ប្រមាណជាង ១៣ ដុល្លារអាមេរិក) ក្នុងមួយម៉ោង ដើម្បីធ្វើការសាកល្បង ខណៈដែលផលិតផលរបស់ Apple នេះមិនទាន់មានលក់ជាផ្លូវការនៅក្នុងប្រទេសចិន។

យោងតាម South China Morning Post ដែលបានចុះផ្សាយកាលពីដើមខែមីនា បានឱ្យដឹងថា វ៉ែនតាចម្រុះ Vision Pro របស់ក្រុមហ៊ុន Apple ត្រូវបានដាក់លក់ជាលើកដំបូងនៅសហរដ្ឋអាមេរិក ហើយបានបង្កើតការចាប់អារម្មណ៍យ៉ាងខ្លាំងនៅក្នុងប្រទេសចិន ទោះបីជាទីផ្សារនេះមិនទាន់មានកាលបរិច្ឆេទបើកដំណើរការក៏ដោយ។ នៅលើបណ្តាញសង្គម Weibo ប្រធានបទ Apple Vision Pro មានអ្នកចូលមើលច្រើនជាង ៦០ លានដង ហើយពាក្យគន្លឹះ Vision Pro មាន ១២ លាន views។

នេះបើយោងតាមប្រភពដដែលបានឱ្យដឹងទៀតថា Vision Pro ទំនងនឹងត្រូវបានដាក់លក់ក្នុងទីផ្សារប្រទេសចិននៅដើមខែមេសា ឆ្នាំ២០២៤ បន្ទាប់ពីក្រុមហ៊ុន Apple បានបញ្ចប់ដំណើរការចុះឈ្មោះជាមួយក្រសួងឧស្សាហកម្ម និងបច្ចេកវិទ្យាព័ត៌មានចិន។ យោងតាម SCMP ការយល់ដឹងពីតម្រូវការដ៏អស្ចារ្យរបស់អ្នកប្រើប្រាស់ ពាណិជ្ជករចិនបានបញ្ជាទិញ ក៏ដូចជានាំយកវ៉ែនតាមួយចំនួនមកប្រទេសដើម្បីបើកសេវាកម្មជួល។ ហេតុនេះសេវាកម្មជួលវែនតាកំពុងរីកដុះដាលខ្លាំងនៅក្នុងតំបន់មួយចំនួនរួមមាន៖ សៀងហៃ ស៊ីអាន ណានជីង និងជាំងស៊ូ។

តម្លៃជួលមានចាប់ពីប្រហែល ៩៨ យន់ (ប្រមាណ ១៣.៦២ ដុល្លារអាមេរិក) ក្នុងមួយម៉ោង និង ១៥០០ យន់ (ប្រហែល ២០៨ ដុល្លារអាមេរិក) ក្នុងមួយថ្ងៃ ក៏ដូចជាផ្តល់ឱ្យអ្នកប្រើប្រាស់នូវជម្រើសក្នុងការទិញឧបករណ៍នេះបន្ទាប់ពីទទួលបានបទពិសោធន៍។ នាយកប្រតិបត្តិ Song Lei បាននិយាយថា ហាងជួលវែនតាដ៏ធំបំផុតរបស់ពួកគេគឺនៅក្នុងផ្សារទំនើប Hopson One ភាគខាងកើតទីក្រុងប៉េកាំង និងស្វាគមន៍អតិថិជនជាង ១០,០០០ នាក់ចាប់ពីថ្ងៃទី ៤ ខែកុម្ភៈនេះតទៅ ដូច្នេះអតិថិជនត្រូវតែតម្រង់ជួរដើម្បីជួលឧបករណ៍នេះ។

ទោះជាយ៉ាងណាក៏ដោយ ផលិតផល Apple Vision Pro នៅសហរដ្ឋអាមេរិកអ្នកប្រើប្រាស់កំពុងធ្វើការរិះគន់ដោយសារតម្លៃខ្ពស់ពេក និងសំពីងសំពោង មិនស្រួលពាក់ ឈឺក្បាល ឈឺត្រចៀកជាដើម។ ខណៈដែលនៅក្នុងប្រទេសចិនវិញ អតិថិជនមានការពេញចិត្តយ៉ាងខ្លាំងចំពោះសេវាកម្មជួលក្នុងតម្លៃសមរម្យ ក៏ដូចជាឧបករណ៍មានភាពទាន់សម័យ និងបំពេញតាមតម្រូវការរបស់ប្រើប្រាស់៕

បរទេស៖ កាលពីពេលថ្មីៗនេះ បើយោងតាម South China Morning Post បានឱ្យដឹងថា ក្រុមហ៊ុនផលិតទូរស័ព្ទ Transsion ដែលមានមូលដ្ឋាននៅទីក្រុង Shenzhen ប្រទេសចិន បានផ្តួល Apple និង Samsung នៅក្នុងទីផ្សារអាហ្វ្រិកដោយជោគជ័យ។ ដោយសារតែស្មាតហ្វូនចិនដូចជា Tecno, Infinix និង iTel លក់ដាច់បំផុតនៅទ្វីបអាហ្រ្វិក ត្រូវបានបង្ហាញនៅមុខហាងនានាក្នុងសង្កាត់ផ្សារទំនើបនៃប្រទេសកេនយ៉ា។ ក្រុមហ៊ុននេះ បានទទួលជោគជ័យយ៉ាងខ្លាំងនៅក្នុងយុទ្ធសាស្ត្រអាជីវកម្មរបស់ខ្លួន បន្ទាប់ពីនាំចេញស្មានហ្វូនទៅទ្វីបអាហ្រ្វិកជាលើកដំបូង ហើយម៉ាកទូរស័ព្ទទាំងបីនេះ ក៏កំពុងពង្រីកទៅកាន់ទីផ្សារផ្សេងទៀតដូចជា អាមេរិកឡាទីន ឥណ្ឌា អឺរ៉ុបខាងកើត និងអាស៊ីអាគ្នេយ៍ផងដែរ។

នៅឆ្នាំ ២០២៣ យីហោ Tecno របស់ក្រុមហ៊ុននេះបានផ្តួល Apple និង Samsung នៅមជ្ឈិមបូព៌ា និងអាហ្វ្រិក ក្លាយជាក្រុមហ៊ុនដែលលក់ស្មាតហ្វូនបានច្រើនជាងគេបំផុតក្នុងតំបន់នេះ។ ដូច្នេះចាប់តាំងពីពេលនោះមក វាបានទាក់ទាញក្រុមហ៊ុនបច្ចេកវិទ្យាចិនកាន់តែច្រើនឡើងទៅកាន់ទ្វីបអាហ្វ្រិក និងមជ្ឈិមបូព៌ា។ លោក Yang Wang អ្នកវិភាគជាន់ខ្ពស់នៅ Counterpoint Research បាននិយាយថា ការលក់ស្មាតហ្វូន Tecno បានកើនឡើង ៧៧% ពីមួយឆ្នាំទៅមួយឆ្នាំនៅក្នុងត្រីមាសទី ៤ ឆ្នាំមុន វ៉ាដាច់ Samsung ដើម្បីនាំមុខគេជាលើកដំបូងនៅមជ្ឈិមបូព៌ា និងតំបន់អាហ្វ្រិក។

ក្នុងអំឡុងពេលដូចគ្នានេះ ចំណែកទីផ្សារនៃការដឹកជញ្ជូនស្មាតហ្វូនរបស់ក្រុមហ៊ុន Tecno បានកើនឡើងដល់ ២០% ពី ១៥% ក្នុងឆ្នាំ ២០២២។ ទន្ទឹមនឹងនោះ ចំណែកទីផ្សាររបស់ក្រុមហ៊ុន Samsung បានធ្លាក់ចុះពី ២៤% ក្នុងឆ្នាំ ២០២២ មកត្រឹម ១៨%។ យោងតាម Counterpoint កំណើនរបស់ Tecno ត្រូវបានជំរុញដោយទូរស័ព្ទចល័តក្នុងតម្លៃ ១៥០ ដុល្លារអាមេរិក ហើយម៉ូដែលដូចជា Tecno Pop 7 និង Camon 20 Pro គឺមានការពេញនិយមពីអ្នកប្រើប្រាស់ជាងគេ។ លោក Wang បានបន្តទៀតថា នេះមានឥទ្ធិពលយ៉ាងសំខាន់ក្នុងការជំរុញទំនុកចិត្តអ្នកប្រើប្រាស់ ជាពិសេសក្នុងចំណោមអ្នកដែលមានប្រាក់ចំណូលទាប ហើយផលិតផលនៅក្នុងផ្នែកដែលមានតម្លៃសមរម្យគឺជាផ្នែកសំខាន់នៃភាពជោគជ័យរបស់ក្រុមហ៊ុនចិន។

ដោយក្រឡេកមើលតែការលក់នៅទ្វីបអាហ្រ្វិក Tecno បានវ៉ាដាច់ Samsung និង Apple តាំងពីឆ្នាំ២០២០ រហូតមកដល់បច្ចុប្បន្នដោយសារតែការចេញលក់ម៉ូដែលទទួលបានជោគជ័យក្នុងផ្នែកតម្លៃទាប។ ទោះជាយ៉ាងណាក៏ដោយ មិនមែនក្រុមហ៊ុនស្មាតហ្វូនចិនទាំងអស់សុទ្ធតែមានរឿងជោគជ័យបែបនេះនៅក្នុងទ្វីបអាហ្រ្វិកនោះទេ។ កាលពីឆ្នាំ ២០១៩ ក្រុមហ៊ុន Huawei Technologies បានឃើញចំណែកទីផ្សាររបស់ខ្លួននៅក្នុងទ្វីបអាហ្រ្វិកធ្លាក់ចុះពី ១០% មកនៅប្រហែល ១% ក្នុងប៉ុន្មានឆ្នាំថ្មីៗនេះ ដោយសារការដាក់ទណ្ឌកម្មរបស់សហរដ្ឋអាមេរិកបានរារាំងក្រុមហ៊ុនពីការចូលទៅកាន់សេវាកម្ម Google Mobile Services និងបន្ទះឈីប ដែលធ្វើឱ្យក្រុមហ៊ុននេះបរាជ័យក្នុងការលក់ទូរស័ព្ទនូវទ្វីបអាហ្វ្រិក៕