ភ្លើងកម្តៅនៅលើបណ្តាញសង្គមកាន់តែឆេះសន្ធោសន្ធៅនៅពេលខ្សែភាពយន្តខ្មែរដ៏ល្បីល្បាញមានចំណងជើងថា«ម៉ែក្រឡាភ្លើង» ត្រូវបានយុវជនថៃពហិកាមិនចូលរួមទស្សនាដែលធ្វើឱ្យខ្សែភាពយន្តនេះបរាជ័យចាប់តាំងពីថ្ងៃចាក់បញ្ចាំងដំបូងនៅប្រទេសថៃកាលពីថ្ងៃទី២៩ កុម្ភៈ។ លោកស្រី ប៊ុន ចាន់និមល អគ្គនាយិកាផលិតកម្មសាស្រ្តាហ្វៀមបានទទួលស្គាល់ថាពិតជាដូច្នេះមែនហើយលោកស្រីទទួលបានអារម្មណ៍ដែលមិនស្មើភាពគ្នានូវទង្វើដែលប្រទេសមួយនេះធ្វើមកដាក់កម្ពុជានៃជាតិនិយមរបស់គេ។

ការតបស្នងរបស់ប្រជាជនថៃមួយក្តារនេះមកលើកម្ពុជា បានធ្វើឱ្យកំហឹងយុវជនយ៉ាងច្រើននៅលើបណ្តាញសង្គមចូលរួមពហិកាមិនទស្សនាខ្សែភាពយន្តថៃវិញដូចគ្នា បន្ទាប់ពីពួកគេទទួលអារម្មណ៍ភាគីថៃមិនបានឱ្យតម្លៃខ្សែភាពយន្តខ្មែរ។ ការចូលរួមពហិកាបានសម្រេចរបស់ប្រជាជនថៃមិនចូលរួមទស្សនា «ម៉ែក្រឡាភ្លើង» ឬ «ម៉ែនុន» ដែលជាចំណងជើងនៅប្រទេសថៃ ពួកគេបានចោទមកលើភាពយន្តខ្មែរថាបានលួចចម្លងរបស់ប្រទេសខ្លួនដោយសារតែឃើញសំលៀកបំពាក់ស្រដៀងគ្នាតែមួយជ្រុងទាំងដែលពួកគេមិនទាន់ទស្សនាសាច់រឿងទាំងមូល។

នៅតាមបណ្តាផេករោងកុននៅក្នុងប្រទេសកម្ពុជា អ្នកលេងបណ្តាញសង្គមខ្មែរចាប់ផ្តើមចូលរួមពហិការឿងថៃវិញយ៉ាងផុសផុលតបស្នងនូវអំពើដែលប្រជាជនក្បែរខាងនេះធ្វើមកលើកម្ពុជា។ តើរឿងនេះអាចធ្វើឱ្យប្រវត្តិសាស្រ្តកាលពី២០ឆ្នាំមុនកើតឡើងម្តងទៀតដែរឬទេ?

កាលពីជាង២០ឆ្នាំមុនពោលគឺក្នុងឆ្នាំ២០០៣ ប្រជាជនខ្មែរកើតក្តីខឹងសម្បារយ៉ាងខ្លាំងបន្ទាប់ពីតារាថៃនាង ផ្កាយព្រឹក ដែលមានឈ្មោះពិតថា Kob Suvanant Kongying បាននិយាយថាប្រាសាទអង្គរវត្តជារបស់ប្រទេសថៃបើចង់ឱ្យនាងមកសម្ដែងនៅកម្ពុជា ត្រូវប្រគល់ប្រាសាទអង្គរវត្តមកឱ្យថៃវិញដែលជាការចុះផ្សាយរបស់ស្ថានីយវិទ្យុ FM-105 របស់ថៃបានដកស្រង់សម្តីរបស់នាងយកមកចុះផ្សាយ។រឿងរ៉ាវនេះជំរុញឱ្យនិស្សិតខ្មែរជាច្រើនមានការខឹងសម្បារជាខ្លាំងរហូតមានបងប្អូនមួយចំនួននាំគ្នាធ្វើបាតុកម្ម នៅមុខស្ថានទូតថៃ ដើម្បីឱ្យតួសម្ដែងរូបនេះសូមទោសជាសាធារណៈ។ មិនត្រឹមតែប៉ុណ្ណោះបញ្ហានេះបានឈានដល់ដំណាក់កាលដុតស្ថានទូតថៃនៅភ្នំពេញ ដុតទង់ជាតិថៃ ដុតព្រះឆាយាល័ក្ខណ៍ស្ដេចជាទីគោរពសក្ការៈបំផុតរបស់ថៃ និងបំផ្លាញទ្រព្យសម្បត្តិថៃ មានហាងលក់ទំនិញ និងសណ្ឋាគារជាដើម។ រីឯពាណិជ្ជការ/ករថៃជាង ៦០០ នាក់ត្រូវបានជម្លៀសចេញពីកម្ពុជា ដែលធ្វើឱ្យប៉ះពាល់យ៉ាងខ្លាំងដល់ទំនាក់ទំនងមិត្តភាពកម្ពុជា-ថៃ។ក្នុងការធ្វើបាតុកម្មនេះខាងភាគីថៃខាតបង់ ៥៦លានដុល្លារអាម៉េរិក ដោយឡែកខាងភាគីកម្ពុជាសងថ្លៃខូចខាត ៦លានដុល្លារអាម៉េរិក ចំពោះការដុតបំផ្លាញស្ថានទូតថៃប៉ុណ្ណោះ ហើយគ្រានោះព្រំដែន កម្ពុជា-ថៃបានបិទរយៈពេល៣ខែ។ បន្ទាប់មកកម្ពុជាប្រកាសដាក់បំរាមបិទរឿងភាគថៃទាំងអស់មិនឱ្យមាននៅកម្ពុជា រយៈពេល ១០ឆ្នាំ។

ទោះយ៉ាងណា ស្របពេលបញ្ហាដែលកំពុងក្តៅគគុកនៅលើបណ្តាញសង្គមពហិកាទៅវិញទៅមករវាងកម្ពុជានិងថៃនេះ លោក ប៉ុក បូរក្ស ប្រធាននាយកដ្ឋានភាពយន្តបានបង្ហោះសំណេរមួយនៅលើបណ្តាញសង្គមនារសៀលថ្ងៃទី៣ មីនា ថា «អាកាសធាតុខែប្រាំងក្តៅខ្លាំង តែប្រធានបទក្នុងបណ្តាញសង្គមនាពេលនេះ រឹតតែក្តៅ … សង្ឃឹមថាទាំងអស់គ្នា នឹងគិតពីផលប្រយោជន៍ជាតិជាធំ ហើយចៀសវាងភាពច្រំដែលនៃប្រវត្តិសាស្ត្រ»៕

កាលពីថ្ងៃទី២ ខែមីនា ឆ្នាំ២០២៤ ផលិតករភាពយន្តដ៏ល្បីឈ្មោះរបស់ផលិតកម្ម SASTRA FILM លោកស្រី ប៊ុន ចាន់និមល បានលើកឡើងក្នុងហ្វេសប៊ុកថា ភាពយន្តខ្មែររឿង «ម៉ែក្រឡាភ្លើង» ដែលចាក់បញ្ចាំងនៅប្រទេសថៃ គឺទទួលបានលទ្ធផលបរាជ័យ ឬជាការបរាជ័យមួយហៅថា «ចាញ់មុនឡើងសង្វៀនប្រកួត» ដោយសារតែពលរដ្ឋថៃធ្វើពហិការមិនទស្សនាភាពយន្តខ្មែរ ពីព្រោះគេចោទថា ភាពយន្តខ្មែរចម្លងពីគេ ។

កាលពីថ្ងៃទី២៩ ខែកុម្ភៈ ឆ្នាំ២០២៤ ខាងផលិតកម្ម SASTRA FILM បានចាក់បញ្ចាំងភាពយន្តរឿង «ម៉ែក្រឡាភ្លើង» ជាផ្លូវការនៅប្រទេសថៃ ប៉ុន្តែការចាក់បញ្ចាំងភាពយន្តនេះបានទទួលបរាជ័យ ហើយទទួលប្រាក់ចំណូលនៅថ្ងៃបញ្ចាំងដំបូង បានត្រឹមតែ៣ម៉ឺន១ពាន់បាតប៉ុណ្ណោះ ។ ការបរាជ័យនេះ ដោយសារមានការអំពាវនាវពីទំព័រហ្វេសប៊ុកថៃ និងសារព័ត៌មានថៃមួយចំនួនហាមពលរដ្ឋថៃទៅមើលរឿងខ្មែរ ព្រោះបើគេមើលរឿងខ្មែរ ហាក់ដូចជាទទួលស្គាល់ថា ខ្មែរជាម្ចាស់ដើម ។

បច្ចុប្បន្ន ពលរដ្ឋថៃកំពុងតែអបអរសាទរយ៉ាងខ្លាំង បន្ទាប់ពីពួកគេ Ban មិនចូលរួមទស្សនាខ្សែភាពយន្តខ្មែររឿង «ម៉ែក្រឡាភ្លើង» ទទួលបានជោគជ័យ ។ ការអំពាវនាវ Ban មកលើភាពយន្តខ្មែរនេះ គឺពលរដ្ឋថៃបានអំពាវនាវនៅក្នុងបណ្តាញសង្គមថៃនានាដើម្បីបញ្ជាក់ថា ប្រទេសថៃមិនទទួលស្គាល់ភាពយន្តនេះទេ ដោយពួកគេអះអាងថា ខ្មែរបានចម្លងពីភាពយន្តរបស់ថៃ គឺរឿង «Mae Nak Phra Khanong» ។

ផ្ទុយទៅវិញ គេសង្កេតឃើញយុវវ័យខ្មែរមួយចំនួននាំគ្នាទិញសំបុត្រចូលមើលរឿងថៃនៅតាមរោងភាពយន្តផ្សេងៗ និងជួយផ្សព្វផ្សាយឱ្យគេទៀតផង ។ យុវវ័យខ្មែរទាំងនេះចាត់ទុកតារាសម្តែង ឬអ្នកចម្រៀងថៃ គឺជាអាយដលរបស់ពួកគេផ្គាប់មុខ បើទោះពលរដ្ឋថៃមិនឱ្យតម្លៃភាពយន្តខ្មែរក្តី ។ កន្លងមក នៅពេលមានតារាសម្តែងថៃណាម្នាក់មកប្រទេសកម្ពុជា គេឃើញយុវវ័យខ្មែរខ្លះប្រជ្រៀតគ្នាទៅទទួលគេដល់ព្រលានយន្តហោះ ហើយអ្នកខ្លះសុំថតរូបជាមួយតារាថៃ ឬសុំហត្ថលេខាទៀតផង ។

ភាពយន្តរឿងខ្មោចដ៏រន្ធត់របស់ថៃ គឺរឿង «PEE NAK 4» ឬឈ្មោះជាភាសាខ្មែរថា «លោកបងណាក់ ៣» បានចាក់បញ្ចាំងនៅតាមបណ្តារោងភាពយន្តនៅប្រទេសកម្ពុជា និងទទួលបានការគាំទ្រយ៉ាងច្រើនពីអ្នកទស្សនាជាយុវវ័យខ្មែរ ។ យុវវ័យខ្មែរជាច្រើននាក់ដែលជាអ្នកនិយមចូលចិត្តវិស័យភាពយន្តបានបង្ហាញនូវអារម្មណ៍រំភើប និងសប្បាយរីករាយនៅពេលពួកគេបានចូលរួមទស្សនារឿងមួយនេះ ក្នុងថ្ងៃសម្ពោធចាក់បញ្ចាំងជាផ្លូវការនៅរោងភាពយន្ត ។

ចំណែកអ្នកតំណាងផ្នែកទីផ្សាររបស់រោងភាពយន្ត Major Cineplex Cambodia និយាយនាពេ

លកន្លងមកថា រឿង «លោកបងណាក់ ៣» ពិតជាមានតម្រូវការខ្ពស់ពីយុវវ័យប្រាកដមែន ហើយពួកគេបានជជីកសួរពីការចាក់បញ្ចាំងរឿងនេះជារឿយៗ ។

ផ្ទុយទៅវិញ យុវវ័យថៃមានទស្សនៈផ្ទុយពីយុវវ័យខ្មែរ កុំថាឡើយទៅទទួលតារាខ្មែរដល់ព្រលានយន្តហោះថៃ សូម្បីតែការយកភាពយន្តខ្មែរ ដែលប្រទេសនានានៅលើពិភពលោកទទួលស្គាល់ ក៏ពួកគេមិនទៅទស្សនាផង ។ គំនិតជាតិនិយមរបស់យុវវ័យថៃបានកើតឡើងតាមរយៈការបណ្តុះគំនិតរបស់បណ្តាញសង្គមថៃ និងសារព័ត៌មានថៃខ្លះ ដែលពួកគេព្យាយាមផ្សព្វផ្សាយ និងនិយាយបំផ្លើស ដើម្បីធ្វើឱ្យជនជាតិរបស់ខ្លួនប្រកាន់វណ្ណៈ ប្រកាន់ជាតិសាសន៍ និងលើកតម្កើងជាតិនិយមជ្រុល ។ ប៉ុន្តែការប្រកាន់ជាតិសាសន៍នេះ ពលរដ្ឋថៃប្រកាន់តែប្រទេសជិតខាងគ្នាប៉ុណ្ណោះ ប៉ុន្តែពួកគេបែរជាចូលចិត្ត និងឱ្យតម្លៃលើខ្សែភាពយន្តបរទេសផ្សេងទៀត ។

ដោយឡែក ពលរដ្ឋខ្មែរម្នាក់បាននិយាយក្នុងបណ្តាញសង្គមថា ៖ «ពួកថៃបាននាំគ្នាសើចចំអកឱ្យយើង ស្របពេលខ្មែរយើងកំពុងសប្បាយអរតាមដានរឿងភាគថៃ ហើយបើមិនបានមើលរឿងភាគថៃ លេបបាយមិនចូលទេ ។ គេខោកក្បាលប៉ុណ្ណឹងហើយ នៅញញឹម អត់ចេះឈឺទេខ្មែរ ។ តែបើឈឺវិញ គឺឈឺជ្រុល ដូចកាលពីឆ្នាំ២០០៣ ខ្មែរបាតុកម្មដុតទូតថៃ ដោយសារនាងផ្កាយព្រឹក និយាយថា ខ្មែរជាចោរលួចប្រាសាទអង្គរវត្តពីប្រទេសថៃ ។ ដោយសារកំហឹងនេះ ខ្មែរត្រូវសងលុយធ្វើទូតឱ្យថៃ ខាតអស់រាប់លានដុល្លារ ។ តែជាផលវិជ្ជមាន គឺគ្រប់ស្ថានីយទូរទស្សន៍ឈប់ផ្សាយរឿងថៃ ហើយធ្វើឱ្យកុនខ្មែរមានទីផ្សារឡើងវិញ ។ បានតែមួយខ្យល់ ដោយសារតែរឿងភាគថៃនិយម ខ្មែរទ្រាំមិនមើល មិនបាន គេក៏យកមកបញ្ចាំងឡើងវិញ» ។

ពលរដ្ឋខ្មែររូបនេះបន្តថា ៖ «ចុះឥឡូវ ល្មមឈប់ល្ងង់ស្រឡាញ់គេតែម្នាក់ឯងហើយនៅ? ថៃគេមិនស្រឡាញ់យើងទេ ហើយខ្មែរគិតថា គេស្រឡាញ់យើងមែន? គេមើលងាយយើងប៉ុណ្ណឹងហើយ នៅថោកគាំទ្ររឿងថៃទៀតមែន? ឃើញមានអ្នកចេញមកពហិការខ្លះហើយ តែអ្នករឿងភាគថៃនិយមវិញបែរជាប្រតិកម្ម ហើយខាងរោងកុនបន្ថែមម៉ោងបញ្ចាំងកុនថៃ ព្រោះខ្លាចខាត…» ។

ចុងក្រោយ ពលរដ្ឋខ្មែរដដែលបញ្ជាក់ថា គាត់សូមប្រកាសពហិការមិនគាំទ្រផលិតផល និងសេវាកម្មថៃគ្រប់ប្រភេទ តាមលទ្ធភាពដែលអាចធ្វើទៅបាន ៕

ផលិតករភាពយន្តដ៏ល្បីឈ្មោះរបស់ផលិតកម្ម SASTRA FILM លោកស្រី ប៊ុន ចាន់និមល បានលើកឡើងក្នុងហ្វេសប៊ុក កាលពីថ្ងៃទី២ ខែមីនា ឆ្នាំ២០២៤ ថា ក្នុងរយៈពេលពី២ ទៅ៣ថ្ងៃ ដែលភាពយន្តខ្មែររឿង «ម៉ែក្រឡាភ្លើង» ចាក់បញ្ចាំងនៅប្រទេសថៃ គឺមិនទទួលបានលទ្ធផលល្អទេ ហើយវាជាការបរាជ័យមួយហៅថា «ចាញ់មុនឡើងសង្វៀនប្រកួត» ។ ប្រទេសថៃមិនបានផ្តល់ម៉ោងឱ្យបញ្ចាំងភាពយន្តខ្មែរទៅតាមអ្វីដែលលោកស្រីរំពឹងទុកទេ ។

លោកស្រី ប៊ុន ចាន់និមល លើកឡើងថា ៖ «យើងក៏បានមើលឃើញថា វាមិនយុត្តិធម៌រវាងប្រទេសយើង ដែលជាប្រទេសសហប្រតិបត្តិការ ហើយជាប្រទេសភូមិផងរបងជាមួយគ្នា ។ នៅប្រទេសកម្ពុជាយើងមានទីផ្សារសេរី ហើយភាពយន្តបរទេសដែលចូលមកក្នុងប្រទេសយើង ទោះជាយ៉ាងណាក៏ដោយ យើងផ្តល់ការចាក់បញ្ចាំង និងផ្តល់ម៉ោងចាក់បញ្ចាំងគ្រប់ទីតាំង ។ ដោយឡែក ភាពយន្តមួយនេះមានភាពចម្រូងចម្រាស់ ហើយជាច្រើនឆ្នាំហើយដែលយើងខានបានចាក់បញ្ចាំងភាពយន្តខ្មែរនៅប្រទេសថៃ ។ នេះអាចហៅថា វាជាការបើកទំព័រឡើងវិញ ។ ភាពយន្តនេះផលិតឡើងដើម្បីបង្ហាញពីរបៀបការរស់នៅ និងបង្ហាញពីអត្តសញ្ញាណរបស់ខ្មែរយើង អីចឹងគេគិតថា យើងចម្លងគេ» ។

លោកស្រីបន្តថា លោកស្រីបានឃើញពីអត្ថបទរបស់អ្នកសិក្សាមួយចំនួន ដែលមានចំណេះដឹងខ្ពង់ខ្ពស់នៅប្រទេសថៃ ក៏បានចេញមកគាំទ្ររឿងខ្មែរដែរ ។ ជាក់ស្តែង សារព័ត៌មានមួយឈ្មោះថា The People បានសរសេរពន្យល់អ្នកដែលមានមតិប្រឆាំងនៅលើបណ្តាញសង្គមថៃឱ្យយល់ថា ប្រទេសយើងមានប្រវត្តិសាស្ត្រ និងវប្បធម៌ ដែលគួរតែសិក្សាឈ្វេងយល់ជាមួយគ្នាច្រើន ។ ហេតុនេះ យើងមិនអាចចោទថា ប្រទេសណាមួយយកវប្បធម៌គ្នាបានទេ ។ សារព័ត៌មាននេះបញ្ជាក់ថា ខ្មោចមិនមានការចុះកម្មសិទ្ធិបញ្ញាទេ ហើយខ្មោចក៏គ្មានសញ្ជាតិដែរ ។

សារព័ត៌មាន The People បានសរសេរបែបនេះ ដើម្បីកុំឱ្យពលដ្ឋថៃប្រកាន់ថា ស្អីក៏ជារបស់ខ្លួនឯង សូម្បីតែខ្មោច ក៏ជារបស់ខ្លួន ។ ការលើកឡើងរបស់សារព័ត៌មាននេះ គឺក្នុងគោលបំណងវិជ្ជមាន ហើយចង់ឱ្យអ្នកបញ្ចេញមតិក្នុងបណ្តាញសង្គមថៃចេះឈ្វេងយល់ពីប្រវត្តិសាស្ត្រ និងឈ្វេងយល់ពីទំនៀមទម្លាប់ប្រពៃណី ឬការរស់នៅរបស់ប្រទេសជិតខាង ។ លើសពីនេះ ត្រូវទទួលស្គាល់វប្បធម៌របស់ប្រទេសរៀងៗខ្លួន កុំឱ្យតែឃើញស្រដៀងគ្នា ក៏ដណ្តើមយក ហើយប្រាប់ថា អ្វីគ្រប់យ៉ាងជារបស់ខ្លួនទាំងអស់ ដោយសារពលរដ្ឋថៃមួយចំនួនព្យាយាមបញ្ចេញមតិនៅលើបណ្តាញសង្គមបែបហិង្សា, រើសអើង និងជេរប្រមាថ ។ ប៉ុន្តែពលរដ្ឋថៃទាំងនេះពុំព្រមឈ្វេងយល់ទេ ។

លោកស្រី ប៊ុន ចាន់និមល បញ្ជាក់ថា លោកស្រីមានអារម្មណ៍ថា វាមិនយុត្តិធម៌ទេ ព្រោះក្នុងនាមជាប្រទេសដែលគេហៅថា ទីផ្សារសេរី ជាប្រទេសភូមិផងរបង និងមានសហប្រតិបត្តិការជាមួយគ្នា ហើយអ្នកធ្វើអាជីវកម្មរោងភាពយន្តថៃមិនគួរបំបិទរឿងរបស់ខ្មែរ មុនពេលការចាក់បញ្ចាំងទេ ។ លោកស្រីសង្កត់ធ្ងន់ថា ការផ្តល់កន្លែងឱ្យចាក់បញ្ចាំងរឿងខ្មែរ គឺផ្តល់ឱ្យតិចមែនទែន ដោយសាររោងភាពយន្តនៅប្រទេសថៃ មានរហូតដល់ជាង២០០ទីតាំង ប៉ុន្តែគេឱ្យយើងចាក់បញ្ចាំងរឿងខ្មែរប្រហែល២០ទីតាំងប៉ុណ្ណោះ ហើយនៅតំបន់ដែលជាទីមិនពេញនិយមច្រើនសម្រាប់អ្នកមើលភាពយន្ត ។

លោកស្រីបន្តថា មិនតែប៉ុណ្ណោះ មានអ្នកព្យាយាមបញ្ចេញមតិវាយប្រហារ និងបញ្ចេញមតិគំរាមមិនឱ្យទៅទស្សនាភាពយន្តខ្មែរផងដែរ ។ ហេតុនេះ វាមិនយុត្តិធម៌ក្នុងនាមជាប្រទេសសេរីក្នុងការធ្វើអាជីវកម្ម ។ ម្យ៉ាងទៀត មុនពេលការចាក់បញ្ចាំងរឿងនេះ គឺមានការគាំទ្រពីដៃគូចែកចាយ ដែលគាត់ជាក្រុមហ៊ុនថៃ និងជាជនជាតិថៃ ។

លោកស្រីសង្កត់ធ្ងន់ថា ទីតាំងដែលសម្ពោធខ្សែភាពយន្តរឿង «ម៉ែក្រឡាភ្លើង» មិនបានចាក់បញ្ចាំងរឿងនេះទេ ហើយទីតាំងផ្សារទំនើបធំៗ ក៏អត់បញ្ចាំងរឿងនេះដែរ ទើបធ្វើឱ្យលោកស្រីមានអារម្មណ៍ថា វាខុសប្រក្រតី ។ ហេតុនេះ យើងគួរធ្វើឱ្យភាពយន្តខ្មែរបើកចំហទីផ្សារ ក្នុងនាមទម្រង់ជាខ្មែរដើម្បីបន្តដំណើរទៅមុខទៀត ហើយលោកស្រីមិនបាក់ទឹកចិត្តទេ ព្រោះវាមិនមែនជាលើកទី១ ទេ ដែលលោកស្រីបរាជ័យ ។

ចំណែកប្រទេសផ្សេងៗវិញ យើងគ្មានសម្ពាធទេ សូម្បីតែម៉ាឡេស៊ី, ឥណ្ឌូណេស៊ី, ឡាវ និងហ្វីលីពីន ដោយសារបច្ចុប្បន្ន រឿងខ្មែរមិនត្រឹមតែមានស្តង់ដារប៉ុណ្ណោះទេ ប៉ុន្តែគេបានគោរពលក្ខខណ្ឌរបស់យើងក្នុងការធ្វើទីផ្សារភាពយន្ត ដូចជា ៖ គេបានបង់ប្រាក់កម្រៃជើងសារឱ្យយើង មុនពេលគេយករឿងយើងទៅចាក់បញ្ចាំង ។ ហេតុនេះ រឿង «ម៉ែក្រឡាភ្លើង» មានការពេញចិត្តច្រើនពីបណ្តាប្រទេសផ្សេងៗ ។ ប៉ុន្តែហេតុអ្វីបានជារោងភាពយន្តនៅប្រទេសថៃធ្វើអាជីវកម្មបែប Unfair ។

ដោយឡែក ដៃគូចែកចាយរបស់លោកស្រី ប៊ុន ចាន់និមល ដែលជាក្រុមហ៊ុនចែកចាយរឿងនៅប្រទេសថៃ ដែលពេញចិត្តរឿង «ម៉ែក្រឡាភ្លើង» គឺពួកគេមានគំនិតវិជ្ជមាន ពីព្រោះយល់ឃើញថា រឿងវាមិនដូចគ្នាទេ ហើយប្រទេសនៅជិតខាងគ្នា គឺវប្បធម៌ និងការរស់នៅ តែងតែស្រដៀងគ្នា ។

លោកស្រីលើកឡើងថា ៖ «រឿងគេគ្រប់ប្រទេសដែលយកមកបញ្ចាំងនៅស្រុកយើង គឺរោងកុនរបស់យើងស្វាគមន៍ ហើយអនុញ្ញាតឱ្យគេចាក់បញ្ចាំងគ្រប់ទីកន្លែងទាំងអស់ ដូចជា ៖ នៅទីប្រជុំជន និងផ្សារទំនើប ហើយហេតុអ្វីបានជារឿងយើងទៅស្រុកគេ គឺប្រទេសផ្សេង ខ្ញុំសូមអត់និយាយ ខ្ញុំសូមនិយាយតែករណីរឿង «ម៉ែក្រឡាភ្លើង» នៅប្រទេសថៃមួយ ហេតុអ្វីមិនផ្តល់ទីតាំងឱ្យយើងបញ្ចាំង? មានអ្នកមើល ឬអត់អ្នកមើល ចាំគិតតាមក្រោយ ។ ហេតុអ្វីមិនឱ្យយើងបញ្ចាំងរឿងម៉ែក្រឡាភ្លើងនៅកន្លែងមានមនុស្សមើល?

ចុងក្រោយ លោកស្រីចង់ឱ្យអ្នកធ្វើ Business ផ្នែកភាពយន្តនៅប្រទេសថៃពិចារណាឡើងវិញ ពីព្រោះវា Not fair ។ ហេតុអ្វីប្រទេសកម្ពុជាស្វាគមន៍ភាពយន្តរបស់ថៃរៀងរាល់សប្តាហ៍? គឺក្នុង១សប្តាហ៍ ភាពយន្តថៃចូលក្នុងប្រទេសកម្ពុជា យ៉ាងតិចណាស់ ក៏៣ចំណងជើងដែរ ។ យើងគាំទ្រគ្រប់បែបយ៉ាង ទាំងការផ្សព្វផ្សាយពីរោងកុន ហើយហេតុអ្វីភាពយន្តរបស់យើងក្នុងទម្រង់ជាខ្មែរ ដូចជា ៖ ការរស់នៅ និងផ្ទៃសាច់រឿង ដែលបង្ហាញអំពីជំនឿ និងវប្បធម៌ខ្មែរ ហេតុអ្វីមិនចាក់បញ្ចាំងភាពយន្តយើងឱ្យទូលំទូលាយ ដូចដែលយើងស្វាគមន៍ភាពយន្តរបស់ថៃ?