បរទេស៖ ដាវយក្សប្រវែង ២.៣៧ ម៉ែត្រ និងទទឹង ៦ សង់ទីម៉ែត្រ ដែលជាដាវចំណាស់ជាងគេបំផុតនៅក្នុងប្រទេសជប៉ុន ហើយក៏ជាដាវដែកដ៏ធំបំផុតដែលត្រូវបានគេរកឃើញនៅកន្លែងបញ្ចុះសព Tomiomaruyama Kofun កាលពីសម័យកូហ្វុនប្រហែលសតវត្សទី ៣ ដល់ទី ៧ បានធ្វើឱ្យអ្នកបុរាណវិទូចាប់អារម្មណ៍យ៉ាងខ្លាំងជាមួយនឹងប្រវែង និងការរចនាដែលមិនធ្លាប់មានពីមុនមក ដោយរួមបញ្ចូលគ្នានូវលក្ខណៈពិសេសទាំងសងខាងរបស់ katana ម្ខាង និងដាវមុខពីរ។

នៅថ្ងៃទី៧ ខែមេសា ឆ្នាំ២០២៤ បើយោងតាមសារព័ត៌មាន Mainichi បានឱ្យដឹងថា វិទ្យាស្ថានបុរាណវិទ្យា Kashihara ខេត្ត Nara និងក្រុមប្រឹក្សាអប់រំទីក្រុង Nara បានប្រកាសឈ្មោះជាផ្លូវការនូវដាវដែក “dako” ដ៏ធំដែលជីកចេញពីកន្លែងបញ្ចុះសពបុរាណរបស់ប្រទេសជប៉ុននៅក្នុងទីក្រុង Nara ។ វត្ថុរចនាដាវមុខពីរដែលមិនធ្លាប់មានពីមុនមកនេះ ត្រូវបានគេនិយាយថាជាប្រភពដើមនៃ blades ដែលជាពិធីត្រូវបានបង្កើតឡើងក្រោមការគ្រប់គ្រងរបស់រាជាធិបតេយ្យ Yamato ។

ដាវដាកូនេះ ត្រូវបានគេរកឃើញនៅក្នុងខែធ្នូ ឆ្នាំ ២០២២ រួមជាមួយនឹងកញ្ចក់លង្ហិនរាងជាខែលពីកន្លែងបញ្ចុះសពដែលមិនត្រូវបានជីកនៅផ្នូរ Tomiomaruyama Kofun ដែលមានតាំងពីចុងសតវត្សទី ៤ និងមានអង្កត់ផ្ចិត ១០៩ ម៉ែត្រ។ វិទ្យាស្ថានបុរាណវត្ថុវិទ្យាបានយកភាពកខ្វក់ចេញពីផ្ទៃដាវកំឡុងពេលរក្សាទុក និងពិនិត្យវត្ថុបុរាណយ៉ាងប្រុងប្រយ័ត្ន ដោយសារតែវានៅក្រោមដីតាំងពីចុងសតវត្សទី ៤ អស់រយៈពេលជាង ១,៦០០ ឆ្នាំមកហើយ។

គេបានរកឃើញថា ដាវកូនកាត់នេះត្រូវបានពត់ចំនួន ៦ ដង ហើយវាមានប្រវែងសរុបមានប្រមាណ ២,៨៥ ម៉ែត្រ ដោយមានស្នៀត និងកន្ត្រៃជាប់ដែលកន្ត្រៃមានប្រវែង ២,៤៨ ម៉ែត្រធ្វើពីឈើម៉ាណូលីស្លឹកធំរបស់ជប៉ុន។ លោក Masaki Kanekata ប្រធានវិទ្យាស្ថានបុរាណវិទ្យា បាននិយាយថា ការរកឃើញនាពេលថ្មីៗនេះ ពិតជាគួរឱ្យភ្ញាក់ផ្អើល និងជាប្រភពនៃព័ត៌មានដ៏សំខាន់ ដើម្បីបញ្ជាក់អំពីដំណើរការនៅពីក្រោយការប្រើប្រាស់ដាវក្នុងព្រះរាជពិធី យ៉ាម៉ាតូ។

លោក Naohiro Toyoshima សាស្ត្រាចារ្យបុរាណវិទ្យានៅសកលវិទ្យាល័យ Nara ដែលមានចំណេះដឹងអំពីដាវបុរាណបាននិយាយថា “វាអាចទៅរួចដែលការរចនាប្រកបដោយភាពច្នៃប្រឌិតនៃដាវដែកត្រូវបានពិសោធន៍ដោយចាប់ផ្តើមពីដាវក្នុងសតវត្សទី ៤ នេះ” ដូច្នេះរាងដាវមុខតែមួយ និងមុខពីរចាប់ផ្ដើមត្រូវបានរចនាខុសៗគ្នា»។ ដោយហេតុផលនោះ លោក Kosaku Okabayashi នាយករងនៃវិទ្យាស្ថានបុរាណវិទ្យា Kashihara ខេត្ត Nara បាននិយាយថា ការរកឃើញខាងលើបង្ហាញថា បច្ចេកវិទ្យានៃសម័យ Kofun ហួសពីការស្មាន ហើយដាវនិងកញ្ចក់សំរិទ្ធដែលទើបរកឃើញថ្មីៗនេះគឺជាស្នាដៃលោហធាតុដ៏អស្ចារ្យបំផុតពីសម័យនោះ៕

ប្រទេសជប៉ុន ៖ កាលពីថ្ងៃទី៦ ខែមេសា ឆ្នាំ២០២៤ សារព័ត៌មានបរទេសឈ្មោះ TNN World រាយការណ៍ថា បន្ទប់ទឹកនៅតំបន់ Shibuya ស្ថិតក្នុងទីក្រុងតូក្យូ ប្រទេសជប៉ុន បានក្លាយជាតំបន់ទេសចរណ៍ថ្មីទាក់ទាញចំណាប់អារម្មណ៍ភ្ញៀវទេសចរជាតិ និងអន្តរជាតិយ៉ាងខ្លាំង ដោយសារបន្ទប់ទឹកទាំងនេះមានលក្ខណៈពិសេស និងខុសប្លែកពីបន្ទប់ទឹកនានានៅលើពិភពលោក ។

គេសង្កេតឃើញថា មានភ្ញៀវទេសចរជាតិ និងអន្តរជាតិជាច្រើននាក់បាននាំគ្នាមកទស្សនាបន្ទប់ទឹកសាធារណៈនៅតំបន់ Shibuya ស្ថិតក្នុងទីក្រុងតូក្យូ ។ បន្ទប់ទឹកសរុបមានចំនួន១៧កន្លែង ដែលទទួលបានការកែលម្អជាថ្មី ដើម្បីទាក់ទាញចំណាប់អារម្មណ៍ភ្ញៀវទេសចរឱ្យមកកម្សាន្ត កាលពីឆ្នាំ២០២០ ។

ស្ថាបនិកល្បីឈ្មោះ និងជាអ្នករចនាម៉ូដពហុកីឡដ្ឋានអូឡាំពិកតូក្យូ គឺជាអ្នកកែលម្អបន្ទប់ទឹកសាធារណៈទាំងនេះធ្វើជាតំបន់ទេសចរណ៍ថ្មី ។ វាមិនត្រឹមតែធ្វើឱ្យភ្ញៀវទេសចរអន្តរជាតិចាប់អារម្មណ៍យ៉ាងខ្លាំងប៉ុណ្ណោះទេ សូម្បីតែជនជាតិជប៉ុនគ្នាឯង ក៏កោតសរសើរថា បន្ទប់ទឹកទាំងនេះថ្មីប្លែក និងមិនដូចបន្ទប់ទឹកផ្សេងទៀតនៅប្រទេសជប៉ុនទេ ។

លោក ថាខាអុ ខារិណុ ជាភ្ញៀវទេសចរមកពីទីក្រុងអូសាកា និយាយថា ៖ «គ្មានបន្ទប់ទឹកណានៅប្រទេសជប៉ុន មានលក្ខណៈដូចបន្ទប់ទឹកនៅទីនេះទេ ហើយយើងមិនអាចស្វែងរកបន្ទប់ទឹកបែបនេះដោយងាយៗទេ ។ វាមានលក្ខណៈផ្ទាល់ខ្លួន និងពិតជាពិសេសខ្លាំងណាស់» ។

រីឯអ្នកស្រី ហ្វេណេឡូប៉េ ប៉ែងសុក ជាភ្ញៀវទេសចរជនជាតិបារាំងនិយាយថា ៖ «នៅទីក្រុងតូក្យូ អ្នកនឹងមានសេចក្តីសុខយ៉ាងខ្លាំង បើអ្នកបានចូលបន្ទប់ទឹក ពីព្រោះបន្ទប់ទឹកនៅជប៉ុនមានអនាម័យខ្លាំងណាស់ និងមានសុវត្ថិភាពបំផុត ។ លើសពីនេះ បន្ទប់ទឹកនៅតាមទីកន្លែងនីមួយៗមិនដូចគ្នាទេ ហើយខ្ញុំមានអារម្មណ៍ថា ខ្ញុំបានរកឃើញអ្វីថ្មី គ្រប់ពេលដែលខ្ញុំបានចូលបន្ទប់ទឹក» ។

បន្ទប់ទឹកទាំង១៧កន្លែងនេះ គឺជាផ្នែកមួយស្ថិតក្នុងគម្រោងបន្ទប់ទឹកនៅទីក្រុងតូក្យូ (Tokyo Toilet Project) ដែលបានចាប់ផ្តើមដំណើរការដោយមូលនិធិ Nippon (ឬ Nippon Foundation) កាលពីឆ្នាំ២០២០ ។ មូលនិធិនេះបានជួលអ្នករចនាម៉ូដមកកែលម្អបន្ទប់ទឹកសាធារណៈជាថ្មីនៅតំបន់ Shibuya ស្ថិតក្នុងទីក្រុងតូក្យូ ដើម្បីឱ្យសាធារណជនងាយស្រួលប្រើប្រាស់បន្ទប់ទឹក ដែលពោរពេញទៅដោយការតុបតែងបែបសិល្បៈយ៉ាងស្រស់ស្អាត ។

កន្លងមក បន្ទប់ទឹកសាធារណៈនៅប្រទេសជប៉ុន តែងតែមានស្នាមប្រឡាក់, កខ្វក់, ក្លិនស្អុយ, ងងឹត និងគួរឱ្យភ័យខ្លាច ។ ហេតុនេះហើយ ទើបបន្ទប់ទឹកទាំងនេះមិនទាក់ទាញចំណាប់អារម្មណ៍ភ្ញៀវទេសចរទេ ។ ប៉ុន្តែកាលពីខែមីនា ឆ្នាំ២០២៤ អាជ្ញាធរប្រចាំតំបន់ Shibuya ក៏បានបង្កើតគម្រោងទេសចរណ៍បន្ទប់ទឹកនេះឡើង ស្របពេលវិស័យទេសចរណ៍ជប៉ុនងើបឡើងវិញ ក្រោយការឆ្លងរាតត្បាតនៃជំងឺកូវីដ-១៩ ៕

បរទេស៖ ទំនប់ទឹកនៅទីក្រុង Orsk ក្នុងតំបន់ Orenburg ប្រទេសរុស្ស៊ី បានផ្ទុះឡើងកាលពីល្ងាចថ្ងៃសុក្រទី៥ ខែមេសា ឆ្នាំ២០២៤ បន្ទាប់ពីមានភ្លៀងធ្លាក់ខ្លាំង ដែលបណ្តាលឱ្យប៉ះពាល់ដល់តំបន់ Urals ភាគខាងលិចស៊ីបេរី និងប្រទេសជិតខាងកាហ្សាក់ស្ថាន ជាកន្លែងដែលទឹកជំនន់ត្រូវបានពិពណ៌នាថាជាគ្រោះមហន្តរាយធម្មជាតិដ៏អាក្រក់បំផុតក្នុងរយៈពេល ៨០ ឆ្នាំ។ ទន្លេ Ural ជាធម្មតាជន់លិចនៅនិទាឃរដូវ ប៉ុន្តែដោយសារភ្លៀងធ្លាក់ខ្លាំង និងការកើនឡើងយ៉ាងខ្លាំងនៃសីតុណ្ហភាពនាំឱ្យទឹកកករលាយ ដែលបណ្តាលឱ្យកម្រិតទឹកទន្លេនៅជិតទីក្រុង Orsk ខ្ពស់ជាងធម្មតាជិត ១ ម៉ែត្រ។

ដូច្នេះហើយការបាក់ទំនប់ទឹកនេះបានកំពុងឈានទៅរកស្ថានភាពកាន់តែអាក្រក់ទៅៗ។ នេះបើយោងតាមទីភ្នាក់ងារព័ត៌មានសហព័ន្ធ Interfax ដែលបានរាយការណ៍នៅថ្ងៃទី៨ ខែមេសា ឆ្នាំ២០២៤ ថាស្ថានភាពនៃភាពអាសន្នបច្ចុប្បន្នចំនួនផ្ទះដែលត្រូវបានជន់លិចនៅក្នុងតំបន់នេះបានកើនឡើងពី ៤,៤០០ កាលពីថ្ងៃសៅរ៍ដល់ ៦,៦០០ នៅថ្ងៃអាទិត្យ ខណៈដែលកម្រិតទឹកនៃទន្លេ Ural បានបន្តកើនឡើងខ្លាំងនៅទូទាំងតំបន់ ដោយអ្នកស្រុកប្រហែល ៤,០០០ នាក់ត្រូវបានជម្លៀសចេញពីផ្ទះរបស់ពួកគេ។

វិមានក្រឹមឡាំងបានប្រកាសថា “ប្រធានាធិបតីរុស្ស៊ី វ្ល៉ាឌីមៀ ពូទីន បានបញ្ជូនរដ្ឋមន្ត្រីស្ថានការណ៍គ្រាអាសន្ន Alexander Kurenkov ទៅកាន់ទីក្រុង Orsk កាលពីថ្ងៃអាទិត្យ ចំពេលស្ថានភាពកាន់តែអាក្រក់ទៅៗ”។ រដ្ឋមន្ត្រី Kurenkov បានពណ៌នាថាស្ថានភាពនេះគឺ “ធ្ងន់ធ្ងរណាស់” ។ Orsk គឺជាទីក្រុងទីពីរនៃតំបន់ Orenburg និងមានប្រជាជនប្រហែល ២០០,០០០ នាក់។ ទីភ្នាក់ងារព័ត៌មាន TASS បានរាយការណ៍ថា បច្ចុប្បន្នទីក្រុងនេះនៅស្ថិតក្រោមទឹកទាំងស្រុង ហើយអាចទៅដល់បានដោយទូកប៉ុណ្ណោះ។ ទូរទស្សន៍ Telegram លេខ ១១២ បាននិយាយថា រហូតមកដល់ពេលនេះ មនុស្ស ៤ នាក់បានស្លាប់ និង ៦៦ នាក់ផ្សេងទៀតបានរងរបួសនៅក្នុងទឹកជំនន់។

ហេតុនេះហើយ បច្ចុប្បន្នអាជ្ញាធរមូលដ្ឋានបានប្រកាសឱ្យប្រជាជនប្រមូល និងវេចខ្ចប់ឯកសារសំខាន់ៗ របស់របរចាំបាច់ និងសត្វចិញ្ចឹម ហើយជម្លៀសទៅកាន់ទីជម្រកដែលមានសុវត្ថិភាពបណ្តោះអាសន្ន។ ដូច្នេះនៅថ្ងៃនេះមនុស្សប្រហែល ២៣០ នាក់ រួមទាំងកុមារ ៧៣ នាក់ត្រូវបានជម្លៀសចេញពីទីក្រុង Orsk ដោយប្រជាជនចំនួន ១៩០,០០០ នាក់ផ្សេងទៀតបានទៅកាន់ទីជម្រកបណ្តោះអាសន្នហើយ ខណៈដែលទឹកទន្លេនៅតែបន្តកើនឡើង។

គួរបញ្ជាក់ដែរថា គណៈកម្មាធិការស៊ើបអង្កេតនៃតំបន់ Orenburg កណ្តាលនៃប្រទេសរុស្ស៊ី បានបើកការស៊ើបអង្កេតឧក្រិដ្ឋកម្ម បន្ទាប់ពីទំនប់ទឹកបានបាក់ ដែលបណ្តាលឱ្យមានទឹកជំនន់នៅក្នុងទីក្រុង Orsk ។ មន្ត្រីប្រចាំតំបន់ Orenburg ជឿជាក់ថា គ្រោះមហន្តរាយទំនប់ទឹកខាងលើ ដែលបានសម្លាប់មនុស្សយ៉ាងហោចណាស់ ៤ នាក់គឺជាលទ្ធផលនៃការថែទាំទំនប់មិនគាប់ចិត្ត។ អាជ្ញាធរមូលដ្ឋានបាននិយាយថា ពួកគេកំពុងស៊ើបអង្កេតបុគ្គលដែលទទួលខុសត្រូវចំពោះការសាងសង់ ការថែទាំ និងការប្រើប្រាស់ប្រឡាយដែលខូច៕

តាមជំនឿរបស់ចាស់ៗបុរាណ នៅពេលថ្ងៃដែលកើត«សូរ្យគ្រាសឬចន្ទគ្រាស» គឺគេហាមមិនស្រ្តីដែលមានផ្ទៃពោះចេញទៅមើលទេ ព្រោះថាអាចបណ្តាលឲ្យកូនកើត«គ្រាសកន្លង»។

បើយោងតាមវចនានុក្រមរបស់សម្តេចព្រះសង្ឃរាជជួនណាត «មនុស្សគ្រាសកន្លង»មានន័យថា ជាមនុស្សដែលល្មេញល្មើពីកំណើត តាំងពីនៅក្នុងផ្ទៃម្តាយ ជួនពេលដែលសូរ្យគ្រាសឬចន្ទគ្រាសកើតឡើង។

ទាក់ទងទៅនឹងជំនឿ ដែលហាមមិនឲ្យស្រ្តីមានផ្ទៃពោះចេញទៅមើលសូរ្យគ្រាសដោយផ្ទាល់នេះដែរ បើយោងតាមផេក «Hello គ្រូពេទ្យ» បានពន្យល់ថា ទាំងនេះគ្រាន់តែជាការជឿតៗគ្នា និងជាការបោកបញ្ឆោតរបស់ចាស់ៗកាលពីជំនាន់មុនប៉ុណ្ណោះ ព្រោះមិនចង់ឲ្យស្រ្តីមានផ្ទៃពោះនៅទ្រាំចាំមើលបាតុភូតទាំងនោះ រយៈពេលយូរម៉ោង ឬដល់យប់ជ្រៅពេកជាដើម។

ប្រភពដដែលក៏បានបន្ថែមទៀតថា ស្ត្រីមានផ្ទៃពោះរមែងមានសុខភាពខ្សោយស្រាប់ កាលណាដែលអត់ងងុយ ឬប្រឹងមើលសូរ្យគ្រាសដោយភ្នែកទទេ ពុំមានពាក់អ្វីការពារ អាចធ្វើឲ្យធេងធោង វិលមុខ ទៅជាឈឺឬដួល នេះហើយជាអ្វីដែលចាស់ៗបារម្ភ។ ចំណែកឯ«គ្រាសកន្លង»នេះវិញ ចាស់ពីដើមប្រហែលចង់សំដៅលើជំងឺបម្រុងក្រឡាភ្លើង ឬក្រឡាភ្លើងលើស្ត្រីមានផ្ទៃពោះ ដែលធ្វើឲ្យឡើងឈាម ទៅជាប្រកាច់។

តែតាមក្បូនពេទ្យ ជំងឺបម្រុងក្រឡាភ្លើង បណ្តាលមកលើសសម្ពាធឈាម និងរោគសញ្ញាផ្សេងទៀតដោយសារខូចខាតសរីរាង្គផ្សេងៗ ដូចជា តម្រងនោម ជាដើម។ ស្រីៗមានផ្ទៃពោះ និងមានសម្ពាធឈាមធម្មតា ក៏អាចមានជំងឺនេះបានដែល ភាគច្រើនកើតនៅសប្តាហ៍ទី ២០ នៃការពពោះ និងអាចកើតលើស្រីៗមានសម្ពាធឈាមលើសតិចតួច ប៉ុន្តែមិនបានព្យាបាលត្រឹមត្រូវ។ ជំងឺបម្រុងក្រឡាភ្លើង អាចបង្កផលវិបាកធ្ងន់ធ្ងរប៉ះពាល់ដល់ជីវិតទាំងម៉ាក់ៗ និងគភ៌។

ទោះជាយ៉ាងណា ទាក់ទងនឹងស្ត្រីមានផ្ទៃពោះនិងបាតុភូត«គ្រាស»នេះ គ្រាន់តែជាជំនឿដែលនិយមជឿតៗគ្នាមក ហើយសូម្បីតែនៅប្រទេសឥណ្ឌាក៏គេជឿបែបនេះតាំងពីយូរណាស់មកហើយ។ ដូច្នេះហើយនៅកម្ពុជាយើង កាលពីអតីតកាលក៏បានទទួលយកវប្បធម៌អរិយធម៌ពីឥណ្ឌា ទើបជំនឿមួយនេះបានចងចាំនៅក្នុងដួងចិត្តរបស់ប្រជាជនខ្មែរស្ទើរគ្រប់ៗរូប។

ជាមួយគ្នានេះ សម្រាប់សូរ្យគ្រាសឆ្នាំ២០២៤ ដែលត្រូវនឹងថ្ងៃទី ៨ ខែមេសានេះ នៅក្នុងប្រទេសកម្ពុជា ក៏ដូចជាប្រទេសអាស៊ីផ្សេងទៀត មិនអាចមើលឃើញបាតុភូតសូរ្យគ្រាសនេះទេ។ ដូច្នេះហើយកាលដែលបារម្ភថា ស្រ្តីមានផ្ទៃពោះមិនអាចចេញក្រៅនៅក្នុងថ្ងៃនេះ ឬត្រូវតែសង្ងំនៅតែក្នុងផ្ទះរហូតដល់ផុតថ្ងៃសូរ្យគ្រាស គឺគ្រាន់តែជារឿងយល់ច្រឡំប៉ុណ្ណោះ៕

ប្រទេសវៀតណាម ៖ យោងតាមទិន្នន័យរបស់នាយកដ្ឋានគយបង្ហាញថា កាលពីខែកុម្ភៈ ឆ្នាំ២០២៤ កន្លងមក វៀតណាមនៅតែជាប់ចំណាត់ថ្នាក់ទី២ គឺជាប្រទេសនាំចេញស្បែកជើងច្រើនជាងគេលើពិភពលោក បន្ទាប់ពីប្រទេសចិន ដោយតម្លៃការជួញដូរស្មើនឹង១.១៧០លានដុល្លារអាមេរិក ។ នេះបើតាមការចេញផ្សាយរបស់សារព័ត៌មានបរទេសឈ្មោះ AEC Connect កាលពីថ្ងៃទី៦ ខែមេសា ឆ្នាំ២០២៤ ។

ផលិតផលស្បែកជើងរបស់ប្រទេសវៀតណាមបាននាំចេញទៅកាន់ប្រទេសស្មើជាង១៥០ នៅទូទាំងពិភពលោក ក្នុងនោះការនាំចេញស្បែកជើងវៀតណាម ស្មើនឹង១០% នៃផលិតផលស្បែកជើងនៅលើទីផ្សារពិភពលោក ។ ប៉ុន្តែការនាំចេញស្បែកជើងរបស់វៀតណាមនៅខែកុម្ភៈ បានធ្លាក់ចុះ៤០,៣% បើធៀបនឹងខែមករា ឆ្នាំ២០២៤ ។ ហេតុនេះ ក្នុងរយៈពេល២ខែដំបូងនៃឆ្នាំ២០២៤ ការនាំចេញស្បែកជើងរបស់វៀតណាម មានតម្លៃសរុបស្មើនឹង៣.១០០លានដុល្លារអាមេរិក ។

ចំណែកទីផ្សារសំខាន់ៗ រួមទាំងសហរដ្ឋអាមេរិក, សហភាពអឺរ៉ុប និងប្រទេសអង់គ្លេស ដែលការនាំចេញស្បែកជើង មានអត្រាកំណើនខ្លាំងស្មើរហូតដល់ជាង១០% ជាពិសេស សហរដ្ឋអាមេរិក ដែលមានតម្លៃជួញដូរស្មើរហូតដល់១.១០០លានដុល្លារអាមេរិក កើនឡើង២៥% បើធៀបពីមួយឆ្នាំទៅមួយឆ្នាំ ឬស្មើនឹង១ ក្នុងចំណោម៣ នៃការនាំចេញស្បែកជើងសរុបរបស់ប្រទេសវៀតណាម ។

រីឯចិន គឺជាប្រទេសនាំចូលស្បែកជើងពីវៀតណាម ស្ថិតក្នុងលំដាប់ទី២ ស្មើទឹកប្រាក់ជាង៣១៨លានដុល្លារអាមេរិក កើនឡើង១១,៤% បើធៀបពីមួយឆ្នាំទៅមួយឆ្នាំ ។ បន្ទាប់មក គឺប្រទេសបែលហ្ស៊ិក បាននាំចូលស្បែកជើងវៀតណាម ស្មើទឹកប្រាក់១៩១លានដុល្លារអាមេរិក កើនឡើង១០% បើប្រៀបធៀបប្រចាំឆ្នាំ ។

យោងតាមយុទ្ធសាស្ត្រអភិវឌ្ឍន៍ឧស្សាហកម្មវាយនភ័ណ្ឌ, ស្បែក និងស្បែកជើងរបស់វៀតណាម នៅឆ្នាំ២០៣០ ព្រមទាំងចក្ខុវិស័យឆ្នាំ២០៣៥ បញ្ជាក់ថា ប្រទេសវៀតណាមបានប្តេជ្ញាចិត្តថា នឹងនាំចេញស្បែកជើងទៅក្រៅប្រទេស ឱ្យស្មើទឹកប្រាក់ចាប់ពី២ម៉ឺន៧ពាន់លានដុល្លារអាមេរិក រហូតដល់២ម៉ឺន៨ពាន់លានដុល្លារអាមេរិក នៅឆ្នាំ២០២៥ ។

លើសពីនេះ នៅឆ្នាំ២០៣០ ប្រទេសវៀតណាមនឹងនាំចេញស្បែកជើងទៅក្រៅប្រទេស ស្មើទឹកប្រាក់ចាប់ពី៣ម៉ឺន៨ពាន់លានដុល្លារអាមេរិក រហូតដល់៣ម៉ឺន៩ពាន់លានដុល្លារអាមេរិក ។ វៀតណាមសង្ឃឹមថា ក្នុងអំឡុងចាប់ពីឆ្នាំ២០២២ ដល់ឆ្នាំ២០២៦ ឧស្សាហកម្មស្បែកជើងវៀតណាម បានកើនឡើងចាប់ពី១០% ទៅ១២% ក្នុង១ឆ្នាំ ៕

បរទេស៖ ក្រុមហ៊ុន Tesla របស់សហរដ្ឋអាមេរិក បានលុបចោលគម្រោងផលិតរថយន្តអគ្គិសនីតម្លៃថោក ដោយចាប់យកគម្រោងថ្មីវិញគឺការអភិវឌ្ឍ robotaxis បើកបរដោយខ្លួនឯង នេះយោងតាម Reuters ដែលបានចេញផ្សាយកាលពីថ្ងៃទី៧ ខែមេសា ឆ្នាំ២០២៤។

ការសម្រេចចិត្តបោះបង់ចោលនូវគោលដៅដែលបានគ្រោងទុកជាយូរមកហើយនោះ គឺដោយសារក្រុមហ៊ុនចង់ផ្តោតលើការផលិតម៉ូដែលប្រណីតជាមុនសិន បន្ទាប់មកប្រើប្រាស់ប្រាក់ចំណេញដើម្បីផ្តល់មូលនិធិសម្រាប់ការផលិតរថយន្តអគ្គិសនីតម្លៃថោកនៅពេលក្រោយ។ ដូច្នេះគម្រោងផលិតរថយន្តអគ្គិសនីតម្លៃថោក នៅតែមានដោយនាយកប្រតិបត្តិ Elon Musk សន្យាថានឹងចាប់ផ្តើមផលិតម៉ូដែលរថយន្តអគ្គិសនីដែលមានតម្លៃសមរម្យនៅរោងចក្ររបស់ខ្លួនក្នុងរដ្ឋតិចសាស់ សហរដ្ឋអាមេរិក ក្នុងឆមាសទីពីរនៃឆ្នាំ ២០២៥។

ម៉ូដែលរថយន្តថោកបំផុតរបស់ Tesla នាពេលបច្ចុប្បន្ននេះគឺ Model 3 sedan ដែលមានតម្លៃលក់រាយត្រឹមតែ ៣៩,៩០០ដុល្លារប៉ុណ្ណោះនៅសហរដ្ឋអាមេរិក។ ហើយម៉ូដែលបន្ទាប់ដែលនឹងត្រូវផលិតនៅឆ្នាំ ២០២៥ ត្រូវបានគេរំពឹងថានឹងចាប់ផ្តើមនៅតម្លៃប្រហែល ២៥,០០០ ដុល្លារអាមេរិកប៉ុណ្ណោះ។ ទោះជាយ៉ាងណា បន្ទាប់ពីរបាយការណ៍របស់ Reuters ត្រូវបានចុះផ្សាយ តម្លៃភាគហ៊ុនរបស់ Tesla បានធ្លាក់ចុះជាង ៦% ។ ប៉ុន្តែបានងើបឡើងវិញបន្តិចបន្ទាប់ពីការប្រកាសរបស់ Musk កាលពីពេលថ្មីៗនេះថា “មនុស្សយន្តរបស់ក្រុមហ៊ុន Tesla នឹងត្រូវបានបង្ហាញខ្លួនជាផ្លូវការនៅថ្ងៃទី ៨ ខែសីហាខាងមុខនេះ” ដែលជួយឱ្យតម្លៃភាគហ៊ុនកើនឡើងបន្ទាប់ពីការជួញដូរពីរបីម៉ោង។

គួរបញ្ជាក់ដែរថា ការសម្រេចចិត្តខាងលើត្រូវបានធ្វើឡើងនៅពេលដែលក្រុមហ៊ុន Tesla ប្រឈមមុខនឹងការប្រកួតប្រជែងជាសាកលពីក្រុមហ៊ុនរថយន្តអគ្គិសនីរបស់ចិន ជាមួយនឹងម៉ូដែលរថយន្តស៊េរីជាច្រើនដែលមានតម្លៃចាប់ពី ១០,០០០ ដុល្លារប៉ុណ្ណោះ ខណៈសម្ពាធក្នុងការរកប្រាក់ចំណេញពីម៉ូដែលរថយន្តតម្លៃទាបគឺជាបញ្ហាប្រឈមសម្រាប់ក្រុមហ៊ុនរថយន្ត Tesla។ កន្លងទៅលោក Musk ធ្លាប់បាននិយាយថា គឺផលិតរថយន្តតម្លៃថោកគឺមានការលំបាកជាងមុន ដោយសារតែឥឡូវនេះ Tesla កំពុងប្រឈមមុខនឹងការប្រកួតប្រជែងកាន់តែខ្លាំងនៅក្នុងផ្នែកនេះ ដោយបច្ចុប្បន្នក្រុមហ៊ុន Tesla បានកំពុងចំណាយពេលជាច្រើនឆ្នាំក្នុងការអភិវឌ្ឍរថយន្ត Cybertruck ដែលជារថយន្តភីកអាប់អគ្គិសនីមានតម្លៃថ្លៃ៕

ប្រទេសថៃ ៖ កាលពីថ្ងៃទី៣ ខែមេសា ឆ្នាំ២០២៤ សារព័ត៌មានថៃរាយការណ៍ថា ម្ហូបរបស់ប្រទេសថៃមួយមុខឈ្មោះ «គែងតៃប្លា» ដែលពលរដ្ឋថៃចាត់ទុកថា គឺជាម្ហូបដ៏ឆ្ងាញ់បំផុតប្រចាំខេត្តភាគខាងត្បូង ត្រូវបានគេហទំព័រដ៏ល្បីឈ្មោះ TasteAtlas ចាត់ចំណាត់ថ្នាក់ថា ជាម្ហូបអន់បំផុតនៅលើពិភពលោក ក្នុងចំណោមម្ហូបចំនួន១០០មុខ ។

វាបានក្លាយជាប្រធានបទមួយធ្វើឱ្យអ្នកលេងបណ្តាញសង្គមនៅប្រទេសថៃលើកឡើងយ៉ាងច្រើន នាដើមខែមេសានេះ នៅពេលគេហទំព័រដ៏ល្បីមួយឈ្មោះ TasteAtlas បានចាត់ចំណាត់ថ្នាក់ម្ហូបអាហារចំនួន១០០មុខ គឺជាអាហារអន់បំផុតនៅលើពិភពលោក ។ គេហទំព័រនេះបង្ហាញថា សម្លថៃឈ្មោះ «គែងតៃប្លា» បានជាប់ចំណាត់ថ្នាក់ទី១ ជាសម្លអន់បំផុតនៅលើពិភពលោក ។

ពលរដ្ឋថៃនៅទូទាំងប្រទេសបានបង្ហាញនូវមតិរិះគន់ថា មិនគួរសម្រេចចិត្តវិនិច្ឆ័យអាហាររបស់ប្រទេសណាមួយផ្អែកតាមទស្សនៈសកលទេ ដោយសារវប្បធម៌ប្រទេសនីមួយៗខុសៗគ្នា ។ រីឯពលរដ្ឋថៃរស់នៅខេត្តភាគខាងត្បូងបញ្ជាក់ថា «គែងតៃប្លា» គឺជាមុខម្ហូបដ៏ឆ្ងាញ់ក្នុងចំណោមមុខម្ហូបផ្សេងទៀត ដែលបង្ហាញពីអត្តសញ្ញាណក្នុងតំបន់ ។

ពលរដ្ឋថៃមិនយល់ស្របនឹងការចាត់ចំណាត់ថ្នាក់នេះទេ ពីព្រោះសម្លថៃឈ្មោះ «គែងតៃប្លា» គឺជាមុខម្ហូបមានរសជាតិឆ្ងាញ់ពិសេសសម្រាប់ពួកគេ ហើយសូម្បីតែ YouTuber ជនជាតិកូរ៉េខាងត្បូងដ៏ល្បី ឈ្មោះ ខាឡែន ក៏ចូលចិត្តបរិភោគម្ហូបនេះដែរ ក្នុងចំណោមម្ហូបផ្សេងទៀតរបស់ប្រទេសថៃ ។ អ្នកខ្លះទៀតនិយាយថា វាជាម្ហូបអន់នៅលើពិភពលោក ប៉ុន្តែវាជាម្ហូបពិសេសរបស់ខ្លួន ។

ចំណែកស្ត្រីជាម្ចាស់ហាងលក់ម្ហូប និយាយថា «គែងតៃប្លា» គឺជាម្ហូបដ៏ឆ្ងាញ់បំផុតសម្រាប់អតិថិជន ហើយតាំងពីគេហទំព័រ TasteAtlas បានចាត់ចំណាត់ថ្នាក់ថា «គែងតៃប្លា» គឺជាម្ហូបអន់បំផុតនៅលើពិភពលោក ឃើញថា គាត់លក់ម្ហូបនេះដាច់ខ្លាំងណាស់ ។ ជារៀងរាល់ថ្ងៃ អតិថិជនបាននាំគ្នាមកទិញម្ហូបនេះនៅហាងរបស់គាត់ជាហូរហែ ។

សារព័ត៌មានថៃបានសម្ភាសន៍លោក Srettha Thavisin នាយករដ្ឋមន្ត្រីថៃ ពាក់ព័ន្ធនឹងការចាត់ចំណាត់ថ្នាក់របស់គេហទំព័រ TasteAtlas នេះ ហើយលោក Srettha Thavisin លើកឡើងថា ចំពោះការចាត់ចំណាត់ថ្នាក់ថា អាហារថៃ «គែងតៃប្លា» ជាអាហារអន់បំផុត គឺវាស្ថិតនៅលើអណ្តាតរបស់មនុស្សម្នាក់ៗ ប៉ុន្តែសម្រាប់ខ្លួនលោកវិញ លោកចូលចិត្តបរិភោគម្ហូបនេះខ្លាំងណាស់ ។

លោកនាយករដ្ឋមន្ត្រីបន្តថា បើទោះជាជនបរទេសមិនចូលចិត្តបរិភោគអាហារថៃ «កែងតៃប្លា» ក្តី ប៉ុន្តែនៅមានអាហារថៃជាច្រើនមុខទៀតបានជាប់ចំណាត់ថ្នាក់ជាអាហារឆ្ងាញ់នៅលើពិភពលោក ។ ហេតុនេះ ពលរដ្ឋថៃត្រូវតែយល់ព្រមទទួលស្គាល់ការចាត់ចំណាត់ថ្នាក់នេះ ពីព្រោះវាជាសិទ្ធិរបស់ពួកគេ ។ លោកបញ្ជាក់ថា បើម្ហូប «គែងតៃប្លា» គ្មានរសជាតិហឹរទេនោះ គឺពុំហៅថា «គែងតៃប្លា» ទេ ។

ទោះយ៉ាងណា ពលរដ្ឋថៃខ្លះទៀតនិយាយថា ដោយសារតែសម្លនេះមានរសជាតិឌិតខ្លាំង, ហឹរខ្លាំង និងខាប់ ថែមទាំងមានក្លិនប្លែកខុសពីមុខម្ហូបផ្សេងៗ ទើបធ្វើឱ្យ «គែងតៃប្លា» មិនត្រូវមាត់ជនបរទេស សូម្បីតែជនជាតិថៃគ្នាឯង ក៏មិនចូលចិត្តម្ហូបនេះដែរ ៕