ថ្មីៗនេះតារាសម្តែងជើងចាស់លោក ទេព រិនដារ៉ូ បានធ្វើឱ្យវិស័យភាពយន្តរំជួលចិត្តនិងពេញចិត្តចំពោះខ្សែភាពយន្តខ្មែរមានចំណងជើងថា «ចាស់កំព្រា» ដែលបង្កប់អត្ថន័យយ៉ាងជ្រាលជ្រៅ។ ស្របពេលភាពយន្តនេះកំពុងទទួលបានការចាប់អារម្មណ៍លោក ទេព រិនដារ៉ូ ក៏បានលេចមុខក្នុងកិច្ចសម្ភាសន៍របស់ ខេ ខណៈលោកបានទម្លាយការពិតមួយដែលអ្នកមួយចំនួនអាចនឹងចង់ដឹង។

នៅក្នុងកិច្ចសម្ភាសន៍លោក ទេព រិនដារ៉ូ បានឆ្លើយតបនឹងសំណួររបស់ខេថា មូលហេតុដែលលោកឧស្សាហ៍ថតរូបដោះអាវបង្ហោះនៅលើបណ្តាញសង្គមដោយសារតែការបង្ហោះបែបនេះទាក់ទាញទស្សនិកជនឱ្យចុច Like បានច្រើន។ តារាសម្តែងជើងចាស់ដ៏មានប្រជាប្រិយភាពរូបនេះបន្តទៀតថានៅពេលពាក់អាវត្រឹមត្រូវនៅពេលបង្ហោះទៅមិនសូវមានអ្នកមើលនោះទេ។ លោកក៏បានបន្ថែមដែរថា មិនមែនលោកចូលចិត្តមើលរូបខ្លួនឯងដោះអាវនោះទេប៉ុន្តែការធ្វើបែបនេះគឺដើម្បីផ្គាប់ចិត្តរបស់អ្នកទស្សនា។

ចំពោះការសម្តែងវិញលោក ទេព រិនដារ៉ូ បានបញ្ជាក់ថាលោកចូលចិត្តកុនតាំងពីវ័យក្មេងហើយចំពោះអាយដលនៅក្នុងដួងចិត្តវិញគឺមានដូចជាអ្នកស្រី ឌី សាវ៉េត លោក គង់ សំអឿន និងសិល្បករ សិល្បការិនី ជាច្រើនរូប។ ចំពោះតារាសម្តែងស្រករក្រោយដែលលោក ទេព រិនដារ៉ូ មានការពេញចិត្តចំពោះការសម្តែងនោះគឺ ប្រុសខួច។

លោក ទេព រិនដារ៉ូ បានបញ្ជាក់ថាការសម្តែងរបស់ ប្រុសខួច គឺមានភាពស៊ីសង្វាក់គ្នា ដាក់អារម្មណ៍ជាមួយគ្នាសម្តែងបានល្អ។ ក្រៅពីប្រុសខួច សិល្បករជំនាន់ក្រោយដែលលោកលើកយកមកនិយាយផ្សេងទៀតមានដូចជា ខាត់ វៃហាំង សេង មង្គល ជាដើម។ ចំពោះសិល្បការិនីវិញលោក ទេព រិនដារ៉ូ បានលើកយកឈ្មោះ ជេស៊ីកា។

គួរបញ្ជាក់ផងដែរថា ក្រៅពីការងារសិល្បៈទាក់ទិននឹងជីវិតឯកជនពេលនេះលោក ទេព រិនដារ៉ូ ពុំមានភរិយានោះទេ ប៉ុន្តែលោកគឺមានគូស្នេហ៍នៅឯក្រៅប្រទេស៕

បន្ទាប់ពីពួតដៃគ្នាបង្ហាញពីតំបន់ទេសចរណ៍និងវប្បធម៌ខ្មែរពេលនេះបវរកញ្ញា ប៊ី សុធារី ពេជ្រ វត្តីសារ៉ាវឌ្ឍី ចន សុទីម៉ា ហុក សារិតុលា រួមទាំង សុខ ស្រីណា បានធ្វើឱ្យអ្នកគាំទ្រសម្តែងការកោតសរសើរនៅពេលពួកគេបានបំផុសគំនិតនាំគ្នាលេងល្បែងប្រជាប្រិយខ្មែរ បោះអង្គញ់ ស្វាដណ្តើមស្លឹកឈើ ក្នុងសំលៀកបំពាក់ប្រពៃណីខ្មែរ។

តាមប្រសាសន៍របស់ថ្នាក់ដឹកនាំពិធីបុណ្យចូលឆ្នាំថ្មីឆ្នាំនេះមិនឱ្យលេងបាញ់ទឹកនិងប៉ាតម្សៅ ដូចឆ្នាំមុនៗឡើយ ប៉ុន្តែត្រូវធ្វើក្នុងអត្ថន័យលើកកម្ពស់តម្លៃវប្បធម៌ ប្រពៃណីជាតិ តាមរយៈល្បែងរបាំប្រជាប្រិយ និងពិធីសាសនា ផ្សារភ្ជាប់ជាមួយការរម្លឹកគុណវីរយុទ្ធជនជួរមុខ និងការចុះសួរសុខទុក្ខជនភៀសសឹក ដោយថវិកាមួយផ្នែកនឹងត្រូវចែកជូនដល់ពួកគាត់។

ស្របពេលក្នុងឆ្នាំនេះពុំមានការលេងបាញ់ទឹកនិងបាតម្សៅ គេបានឃើញបវរកញ្ញាខ្មែរ៥រូបបានបំផុសគំនិតលេងល្បែងប្រជាប្រិយខ្មែរលើកស្ទួយពិធីបុណ្យចូលឆ្នាំខ្មែរនេះបានធ្វើឱ្យមានមតិកោតសរសើរជាច្រើន។ ប៊ី សុធារី ពេជ្រ វត្តីសារ៉ាវឌ្ឍី ចន សុទីម៉ា ហុក សារិតុលា រួមទាំង សុខ ស្រីណា បាននាំគ្នាស្លៀកពាក់បែបប្រពៃណីខ្មែរយ៉ាងសមសួនបង្កបរិយាកាសសប្បាយរីករាយក្នុងការលេងល្បែងប្រជាប្រិយខ្មែរ បោះអង្គញ់ និងស្វាដណ្តើមស្លឹកឈើ។

វីដេអូនេះបានជំរុញឱ្យមានមតិសរសើរជាច្រើនមកកាន់ពួកគេហើយការបង្ហាញនេះនឹងជះឥទ្ធិពលបន្ថែមក្នុងការឱ្យយុវជន យុវនារី ខ្មែរងាកមកលេងល្បែងកម្សាន្តបែបនេះនាឱកាសពិធីបុណ្យចូលឆ្នាំខ្មែរនាពេលខាងមុខនេះ។
គួរបញ្ជាក់ថា ល្បែងប្រជាប្រិយខ្មែរមានយ៉ាងច្រើនសន្ធឹកសន្ធាប់ ដែលកូនខ្មែរគ្រប់រូបមិនត្រូវបំភ្លេចចោលជាដាច់ខាតដូចជា ល្បែងព្រ័ត្រ លាក់កន្សែង លោតអន្ទាក់ បោះអង្គញ់ ពង្រត់កូនក្រមុំ វាយក្អម ស្តេចចង់ ចោលឈូង រុញអង្រែ ល្បែងគ្របមាន់ រាំដណ្តើមកៅអី ល្បែងរាវបង្កង ល្បែងបិតពួន ចាប់កូនខ្លែងប្រឡែងកូនមាន់ជាល្បែងប្រជាប្រិយខ្មែរផ្សេងទៀត៕

តារាចម្រៀង ពេជ្រ សោភា បានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងបន្ទាប់ពីសម្តែងបទចម្រៀង «មកុដស្រ្តី» អមមកជាមួយនឹងទស្សនីយភាពបង្ហាញពីវប្បធម៌ខ្មែរនៃរបាំអប្សរា និង ល្ខោនខោល ជាមួយនឹងសិល្បករ សិល្បការិនីបុរាណចំនួន៥០នាក់។

នៅយប់ថ្ងៃទី១៤ ខែមីនា កម្មវិធី The Amazing Star រដូវកាលទី១នាំមកជូនជាពិសេសដោយ ស្រាបៀរ GANZBERG-IDOL Strawberry Drink តែទឹកឃ្មុំ FRESHY បានឈានចូលដល់វគ្គផ្តាច់ព្រ័ត្រដោយម្ចាស់ជ័យលាភី គឺបានទៅលើ នួន ស្រីនាង អតីតលំដាប់រងទី៣ Miss Cambodia 2024។ ជាមួយនឹងការបង្ហាញរបស់បេក្ខនារីដែលចូលរួមប្រកួតក្នុងកម្មវិធីនេះក៏មានតារាកិត្តិយសអ្នកនាង ឱក សុគន្ធកញ្ញា អ្នកនាង ពេជ្រ សោភា និង កញ្ញា សុខ សីឡាលីន បានចូលរួមបង្កើនបរិយាកាសកាន់តែរំភើប។

ការសម្តែងរបស់តារាចម្រៀង ពេជ្រ សោភា ដែលមានចំណងជើងថា «មកុដស្រ្តី» បូករួមជាមួយនឹងផ្ទាំងទស្សនិយភាពធ្វើឱ្យទស្សនិកជនមានការចាប់អារម្មណ៍យ៉ាងខ្លាំង។ សិល្បករ សិល្បការិនីចំនួន៥០នាក់បានសម្តែងរបាំអប្សរា និងល្ខោនខោលដោយមានស្វាទាំង១៩ពណ៌និងម៉ូតសក់អប្សរាគ្រប់ម៉ូតនៅលើឆាក។ ទស្សនីយភាពដ៏ពិសេសនេះបានធ្វើឱ្យទស្សនិកជនបញ្ចេញមតិសរសើរជាច្រើនហើយអ្នកដែលស្រលាញ់វប្បធម៌ពិតជាយល់ច្បាស់នៃការសម្តែងដ៏ត្រជាក់ភ្នែកនេះឆ្លុះបញ្ចាំងពីវប្បធម៌ដ៏ផូរផង់របស់ខ្មែរ។

ក្រៅពីចំណេញខាងវប្បធម៌បង្ហាញទៅកាន់អ្នកជំនាន់ក្រោយ សិល្បករ សិល្បការិនីផ្នែកបុរាណក៏នឹងទទួលបានប្រាក់កម្រៃពីការសម្តែងដែលបច្ចុប្បន្នពុំសូវទូលំទូលាយដូចសិល្បៈសម័យផងដែរ៕

ការលើកយកប្រធានបទអំពីសារៈសំខាន់នៃអង្ករនិងតម្លៃស្រូវរបស់ JAYX បានក្លាយជាប្រធានបទពិភាក្សាយ៉ាងច្រើនសូម្បីតែឯកឧត្តម ហ៊ុន ម៉ានី ក៏ចាប់អារម្មណ៍និងកោតសរសើរយុវជននេះដូចគ្នា។ ទោះជាយ៉ាងណា ប្រូលីន ដែលគេស្គាល់ថាជាអ្នកធ្វើ Reaction មួយរូបបានចោទប្រកាន់ JAYX Diss Track ក្រសួងរហូតដល់ វីតូ ដែលជា Captain បានចេញឆ្លើយតបភ្លាមៗ។

Vito ដែលជាសិល្បករនិងជាអផលិតករនៅពីក្រោយបទល្បីៗរបស់ វណ្ណដា និងសិល្បករជាច្រើនទៀតបានបង្ហោះឆ្លើយតបទៅកាន់ Bro Lin Reaction ថា «នេះជាអ្វីដែលខ្ញុំតបទៅគាត់ :បងនិយាយមានបានប្រើខួរក្បាល 10 20% ដែរឬអត់? មួយបទដែលខ្ញុំជាគ្រូបានដាក់ប្រធានបទទៅឱ្យ JAYX នេះគឺមានគោលបំណងចង់លើកស្ទួយអោយតម្លៃស្រែស្រូវនិងកសិករ ហើយនិងចង់ដាស់ស្មារតីប្រជាជនជុំវិញពិភពលោកឱ្យបានយល់ពីតម្លៃស្រែស្រូវនិងកសិករដូចគ្នា»។

វីតូ ឆ្លើយតបទៅកាន់អ្នក Reaction រូបនេះទៀតថា «បងស្តាប់ទៅមួយបទនេះបើបងចេះស្តាប់ភាសាខ្មែរស្គាល់ឧបករណ៍តន្ត្រីខ្មែរប្រហែលបងមិនប្រើពាក្យ Diss to kasoung អញ្ចឹងទេ។ ហើយឈ្មោះ Bro Lin ហ្នឹងល្មមប្តូរចេញទៅចាស់ហើយកុំឱ្យក្មេងហៅ Bro ច្រើនពេកណាមួយពាក្យខ្មែរអត់មានពាក្យ Bro ហ្នឹងទេអរគុណ។ហើយអ្វីដែលខ្ញុំទទួលបានមកវិញគឺ : គេថាគេហើយណុងហ ហាហាមនុស្សចាស់អាចនិយាយពាក្យហ្នឹងមកបានដែរ ? បើបងនិយាយល្អបងមិនលុបខំមិនចោលទេ»។

ក្រោយពី វីតូ បានចេញមកប្រតិកម្មចំពោះសំណេររបស់ ប្រូលីន ដែលចោទប្រកាន់ JAYX Diss Track ក្រសួងនេះហើយបានធ្វើឱ្យអ្នកបណ្តាញសង្គមពិភាក្សាយ៉ាងច្រើន។

ងាកទៅកាន់ JAYX វិញបានបញ្ជាក់ទៅកាន់អ្នកធ្វើ Reaction រូបនេះថា «ខ្ញុំសរសេរចម្រៀងលើប្រធានបទស្រែស្រូវចង់លើកស្ទួយនិងឱ្យតម្លៃ កសិករ និង Story ខ្លះៗរបស់ខ្ញុំ ខ្ញុំអត់បាន Diss ក្រសួងទេបង បងស្ដាប់ហើយគិតពីអត្ថន័យបទនេះម្ដងទៀតណាបង»៕