ប្រទេសថៃ ៖ ចាប់តាំងពីក្បាលរហូតដល់ចុងជើងរបស់ស្ត្រីម្នាក់ឈ្មោះ Jiranan Chinmat គឺពោរពេញទៅដោយស្នាមសាក់យ័ន្តទាំងអស់ សូម្បីតែម្រាមដៃ ដោយសារស្រឡាញ់ខ្លាំងពេក ដោយសាក់អក្សរ និងរូបរាងសត្វផ្សេងៗ ដូចជា ៖ ខ្លា, តោ, ជីងចក់, គង្គក់ និងសត្វផ្សេងទៀត ។ អ្នកស្រី Jiranan ប្រាប់ថា ពេលណាទំនេរ ខ្លួនបានទៅសាក់យ័ន្តនៅលើខ្លួនប្រាណជារៀងរាល់ខែ អស់រយៈពេល១៤ឆ្នាំហើយ រហូតដល់មានស្នាមសាក់ពេញទាំងអស់ ។

អ្នកស្រី Jiranan Chinmat បន្តថា មនុស្សគ្រប់គ្នាបានសួរគាត់ជាញឹកញាប់ថា ហេតុអ្វីបានជាសាក់លើខ្លួនប្រាណគ្មានសល់ចន្លោះបែបនេះ? ហើយឪពុក-ម្តាយមិនខ្មាសគេទេឬ? អ្នកស្រីក៏ឆ្លើយតបទៅវិញថា តើចាំបាច់មកឈឺក្បាលជំនួសខ្ញុំធ្វើអ្វី? បើឪពុក-ម្តាយខ្ញុំ មិនខ្មាសគេផងហ្នឹង ។ អ្នកស្រីថា «ខ្ញុំធ្វើការឱ្យខ្លួនឯង និងពុំបានទៅស៊ីឈ្នួលអ្នកណាទេ ។ កាលពីពេលសាក់ដំបូង អតិថិជនឃើញខ្ញុំខ្លាច ប៉ុន្តែក្រោយមក ពួកគេក៏ព្រមទទួលស្គាល់» ។

អ្នកស្រីបន្តថា ចំណែកអ្នកនៅជុំវិញខ្លួនវិញ អ្នកខ្លះមិនរើសអើងទេ ប៉ុន្តែអ្នកខ្លះទៀតរើសអើងខ្លាំង ហើយសួរថា ហេតុអ្វីចាំបាច់សាក់យ័ន្តច្រើនពេញខ្លួនបែបនេះ? ប៉ុន្តែអ្នកស្រីមិនខ្វល់នឹងពាក្យសម្តីទាំងនេះទេ ដោយសារគាត់ជាមនុស្សមានទឹកចិត្តចេះជួយអ្នកជិតខាង ទើបពួកគេព្រមទទួលស្គាល់គាត់ ។

ចំណែកអ្នកស្រី Pimnipa Weerawan គឺជាស្ត្រីម្នាក់ទៀតដែលបានសាក់យ័ន្តពេញខ្លួនប្រាណដូចគ្នាដែរ ហើយដោយសារខ្លួនប្រាណរបស់ស្ត្រីរូបនេះមានសម្បុរស ទើបធ្វើឱ្យគេកាន់តែមើលឃើញស្នាមសាក់យ៉ាងច្បាស់ ។ អ្នកស្រីប្រាប់ថា គាត់បានសាក់បែបនេះអស់រយៈពេល៨ឆ្នាំហើយ ទម្រាំតែបានយ័ន្តពេញខ្លួនប្រាណ ។

អ្នកស្រី Pimnipa Weerawan និយាយមកកាន់សារព័ត៌មាន BBC ថា ៖ «បើជ្រុលជាសាក់យ័ន្តលើខ្លួនហើយ គឺត្រូវតែសាក់ឱ្យពេញទាំងអស់ ។ អ្នកខ្លះសួរខ្ញុំថា ខ្ញុំមានស្បែកសបែបនេះ ទៅសាក់ធ្វើអីទៅ ហើយមិនខ្មាសអៀនកូនទេឬ? ខ្ញុំក៏សួរទៅវិញថា ហេតុអ្វី? វាជាស្បែករបស់ខ្ញុំ ហើយប្រាក់ ក៏ខ្ញុំចំណាយ ។ រីឯកូនៗវិញ គ្មានអ្នកណាម្នាក់ថាអ្វីទេ រួចចុះអ្នកមកឈឺឆ្អាលអ្វីជាមួយខ្ញុំដែរ» ។

អ្នកស្រីបន្តទៀតថា មនុស្សខ្លះបានបញ្ឈប់ការសាក់យ័ន្ត ដោយសារតែឈឺចុកចាប់នៅលើខ្លួនប្រាណពេក ។ ប៉ុន្តែសម្រាប់គាត់វិញ គាត់ប្តេជ្ញាចិត្តថា ត្រូវតែសាក់ឱ្យពេញខ្លួនទាំងអស់ ដោយសារគាត់ស្រឡាញ់ខ្លាំង ទើបធ្វើតម្រូវចិត្តខ្លួនឯង ៕

សហរដ្ឋអាមេរិក៖ ក្នុងរយៈពេល ៦ ខែកន្លងទៅនេះ គិតត្រឹមថ្ងៃទី២៣ ខែមីនា ឆ្នាំ២០២៤ រថយន្តជិត ១៤,០០០ គ្រឿងត្រូវបានគេបោះបង់ចោលនៅតាមផ្លូវនៃទីក្រុង Oakland រដ្ឋកាលីហ្វ័រញ៉ាដែលបណ្តាលឱ្យអាជ្ញាធរឈឺក្បាលខ្លាំងក្នុងការស្វែងរកដំណោះស្រាយ។
យោងតាមសារព័ត៌មានបរទេសមួយបានឱ្យដឹងថា រថយន្តទាំងនេះត្រូវបានចោ.រលួចគាស់យកតែគ្រឿងបន្លាស់ថ្លៃៗ ហើយបន្សល់ទុកនូវតួរថយន្ត បង្អួចដែលខូចខាត ទ្វារខ្លះបាត់ ធ្វើឱ្យអ្នកស្រុកត្អូញត្អែរថា រថយន្តបានបិទផ្លូវចូលផ្ទះរបស់ពួកគេ ក៏ដូចជាកន្លែងអាជីវកម្ម ផ្លូវចូលសាលារៀន ខណៈរថយន្តខូចខាតទាំងនេះត្រូវបានចោ.ររាយប៉ាយនៅតាមផ្លូវក្នុងតំបន់ដែលមានមនុស្សកកកុញជិតផ្លូវរថភ្លើង។

បើតាមរបាយការណ៍ថ្មីមួយពីនាយកដ្ឋានដឹកជញ្ជូន Oakland ក៏បានឱ្យដឹងទៀតថា ក្នុងរយៈពេលប្រាំមួយខែកន្លងមកនេះ រថយន្តដែលត្រូវបានចោ.រលួច ហើយទុកចោលតាមផ្លូវមានចំនួនសរុប ១៣,៨៥៦ គ្រឿង។ លោក Noel Gallo សមាជិកក្រុមប្រឹក្សាក្រុងបាននិយាយថា “យើងមិនមានកន្លែងគ្រប់គ្រាន់សម្រាប់ទុករថយន្តខូចខាតទាំងនេះទេ” ហើយកន្លែងសម្រាប់ទុករថយន្តបែបនេះគឺមានកំណត់ និងថ្លៃផងដែរ ព្រោះវាត្រូវជួល ដោយទីក្រុងត្រូវចំណាយប្រាក់ជិតមួយលានដុល្លារក្នុងមួយឆ្នាំ ដើម្បីរក្សាទុករថយន្តទាំងនេះ។

ដូច្នេះហើយ នៅថ្ងៃទី២៤ ខែមីនា ក្រុមប្រឹក្សាក្រុងបានបោះឆ្នោតជាឯកច្ឆ័ន្ទដើម្បីអនុម័តវិធានការមួយដើម្បីដោះស្រាយបញ្ហា និងការបង្កើតមូលនិធិសម្រាប់ទីក្រុងដើម្បីជួលក្រុមហ៊ុនសណ្តោងក៏ដូចជាការប្រើប្រាស់ដីទំនេរដើម្បីទុករថយន្ត។ បច្ចុប្បន្នអង្គភាពទទួលខុសត្រូវកំពុងជួលអ្នកបច្ចេកទេសត្រួតពិនិត្យបន្ថែមចំនួន ១៥ នាក់ ដើម្បីផ្តោតលើការឆ្លើយតបទៅនឹងរបាយការណ៍នៃរថយន្តដែលត្រូវបានលួច និងបោះបង់ចោល។ ក្រុមនេះកំពុងត្រូវបានបណ្តុះបណ្តាល ហើយត្រូវបានគេរំពឹងថានឹងចាប់ផ្តើមប្រតិបត្តិការនៅប៉ុន្មានខែខាងមុខនេះ។

ទោះជាយ៉ាងណាក៏ដោយ អ្នកស្រុកនៅតែមានអារម្មណ៍មិនសប្បាយចិត្ត ដោយអាជីវករម្នាក់បាននិយាយថា៖ សព្វថ្ងៃគាត់មិនអាចចេញពីផ្ទះបានទេ ដោយសាររថយន្តចតពេញមុខផ្ទះគាត់។ បើទោះជាអ្នករាយការណ៍ទៅអាជ្ញាធរ និងទទួលបានការឆ្លើយតបក៏ដោយ ក៏រឿងនេះនូវមិនអាចដោះស្រាយបានភ្លាមៗនោះទេ ហេតុនេះការស្ទះចរាចរណ៍នៅក្នុងទីក្រុងកំពុងជួបការលំបាកខ្លាំង ខណៈអាជ្ញាធរកំពុងដោះស្រាយ និងប្រកាសឱ្យប្រជាពលរដ្ឋមានភាពអត់ធ្មត់៕

ប្រទេសរុស្ស៊ី ៖ ប្រធានាធិបតីរុស្ស៊ី លោក វ្លាឌីមៀ ពូទីន បានចេញសេចក្តីថ្លែងការណ៍មួយថ្កោលទោសចំពោះហេតុការណ៍ បា.ញ់.រះ នៅកន្លែងប្រគំតន្ត្រីមួយឈ្មោះ (Crocus City Hall) ស្ថិតនៅទីក្រុងមូស្គូ កាលពីល្ងាចថ្ងៃទី២២ ខែមីនា ឆ្នាំ២០២៤ ។ រុស្ស៊ីសន្និដ្ឋានថា ប្រទេសអ៊ុយក្រែនពាក់ព័ន្ធនឹងការ បា.ញ់.រះ លើកនេះ ។

នៅទីបំផុត ប៉ូលិសរុស្ស៊ីបានចាប់ខ្លួនខ្មាន់កាំភ្លើងដែលបាញ់រះនៅកន្លែងប្រគំតន្ត្រី ចំនួន៤នាក់ ក្នុងអំឡុងពេលពួកគេបម្រុងរត់គេចខ្លួនទៅប្រទេសអ៊ុយក្រែន ខណៈពេលមុននេះ ប៉ូលិសបានចាប់ខ្លួនជនសង្ស័យពាក់ព័ន្ធនឹងហេតុការណ៍នេះ ចំនួន១១នាក់ ។ វាជាហេតុការណ៍ធ្ងន់ធ្ងរបំផុតក្នុងរយៈពេលជិត២០ឆ្នាំ កន្លងមក ដែលមានអ្នកស្លាប់ច្រើនបំផុតនៅប្រទេសរុស្ស៊ី រហូតដល់១៤៣នាក់ និងរងរបួសជាង១៤០នាក់ទៀត ។

ក្រោយកើតហេតុការណ៍នេះ ក្រុមភេរវករ (ISIS) បានចេញសេចក្តីថ្លែងការណ៍មួយ ព្រមទាំងបង្ហាញភស្តុតាងថា ពួកគេជាអ្នកនៅពីក្រោយខ្នងហេតុការណ៍បាញ់រះនៅកន្លែងប្រគំតន្ត្រី ។ រីឯភ្នាក់ងារស៊ើបការណ៍សម្ងាត់អាមេរិក (CIA) និយាយថា បានស៊ើបអង្កេតរួចរាល់ហើយ គឺក្រុមភេរវករ (ISIS) ជាអ្នកបញ្ជាឱ្យបាញ់ ។

ទន្ទឹមនឹងនេះ មេដឹកនាំប្រទេសរុស្ស៊ីបញ្ជាក់ថា រុស្ស៊ីនឹងចាត់វិធានការឆ្លើយតបវិញជាមួយអ្នកពាក់ព័ន្ធនឹងហេតុការណ៍នេះទាំងអស់ ។ រីឯខ្មាន់កាំភ្លើងដែលប៉ូលិសរុស្ស៊ីចាប់បានទាំងអស់ ពួកគេនឹងទទួលទោសតាមច្បាប់ ដោយសារតែទង្វើរបស់ខ្លួន ។

បើតាមព័ត៌មានរបស់នាយកដ្ឋានសន្តិសុខឱ្យដឹងថា ខ្មាន់កាំភ្លើងបានព្យាយាមរត់គេចទៅប្រទេសអ៊ុយក្រែននោះធ្វើឱ្យគេសន្និដ្ឋានថា អ៊ុយក្រែនមានចំណែកពាក់ព័ន្ធជាមួយហេតុការណ៍បាញ់រះនៅរុស្ស៊ីលើកនេះ ។

ចំណែកប្រទេសអ៊ុយក្រែនបានចេញមកបដិសេធការចោទប្រកាន់ភ្លាមៗ ដោយប្រធានាធិបតីអ៊ុយក្រែន លោក Volodymyr Zelensky បានឆ្លើយតបទៅមេដឹកនាំរុស្ស៊ីថា វាគួរឱ្យអស់សំណើចណាស់ ដែលរុស្ស៊ីព្យាយាមចោទប្រកាន់អ៊ុយក្រែនថា ពាក់ព័ន្ធនឹងហេតុការណ៍បាញ់រះ ។ លោកប្រធានាធិបតី Volodymyr Zelensky បញ្ជាក់ថា អ៊ុយក្រែនមិនបានជាប់ពាក់ព័ន្ធ ឬជាអ្នកបង្កហេតុឡើយ ៕

ប្រទេសចិន៖ រថភ្លើងក្នុងទីក្រុងដំបូងគេរបស់ប្រទេសចិនដែលប្រើប្រាស់ថាមពលអ៊ីដ្រូសែនបានបញ្ចប់ការសាកល្បងដោយជោគជ័យក្នុងល្បឿន ១៦០ គីឡូម៉ែត្រក្នុងមួយម៉ោង ក្លាយជារថភ្លើងអ៊ីដ្រូសែនដំបូងបង្អស់របស់ពិភពលោកដែលបានសាកល្បងមុនគេ។
យោងតាមសារព័ត៌មាន China News កាលពីថ្ងៃទី ២៣ ខែមីនា ឆ្នាំ២០២៤ បានឱ្យដឹងថា រថភ្លើងនេះត្រូវបានរចនាឡើងដើម្បីដំណើរការរវាងផ្នែកដែលមិនមានអគ្គិសនីនៃផ្លូវរថភ្លើងក្នុងទីក្រុង ជាមួយនឹងល្បឿនជិះអតិបរមា ១,០០០ គីឡូម៉ែត្រ និងល្បឿនអតិបរមា ១៦០ គីឡូម៉ែត្រក្នុងមួយម៉ោង ដែលស្រដៀងទៅនឹងរថភ្លើង H2 ដែលផលិតនៅអឺរ៉ុប។

រថភ្លើងអ៊ីដ្រូសែនមានទូរថភ្លើងចំនួន ៤ ដែលលក្ខណៈពិសេសរបស់វាអាចផ្តល់នូវប្រភពថាមពលដ៏រឹងមាំ និងប្រើប្រាស់បានយូរ មិនដូចរថភ្លើងប្រពៃណីដែលពឹងផ្អែកលើឥន្ធនៈហ្វូស៊ីល ឬខ្សែអគ្គិសនីសម្រាប់ថាមពលនោះទេ។ ក្នុងអំឡុងពេលធ្វើតេស្ត ការប្រើប្រាស់ថាមពលជាមធ្យមរបស់រថភ្លើងគឺ 5 kWh/km ដែលស្មើនឹងល្បឿនរថភ្លើងថាមពលស្អាតឈានមុខគេរបស់ពិភពលោក។ ការធ្វើតេស្តនេះបានផ្ទៀងផ្ទាត់ថារថភ្លើងអាចដំណើរការនៅសីតុណ្ហភាពពី -25 អង្សាសេទៅ 35 អង្សាសេ បំពេញតាមតម្រូវការនៃការរចនា និងបំពេញតាមស្តង់ដារអន្តរជាតិកំពូល។

ការបញ្ចប់ការសាកល្បងរថភ្លើងក្នុងទីក្រុងដែលដើរដោយថាមពលអ៊ីដ្រូសែន គឺជារបកគំហើញរបស់ប្រទេសចិនក្នុងការអនុវត្តថាមពលអ៊ីដ្រូសែនទៅក្នុងវិស័យដឹកជញ្ជូនផ្លូវដែក។ ប្រទេសចិនមានផែនការប្រកបដោយមហិច្ឆតាក្នុងការលើកកម្ពស់ការអភិវឌ្ឍឧស្សាហកម្មថាមពលអ៊ីដ្រូសែន។ នៅឆ្នាំ ២០២៥ ប្រទេសនេះរំពឹងថានឹងមានរថភ្លើងប្រហែល ៥០,០០០ គ្រឿងនឹងដំណើរការលើកោសិកាឥន្ធនៈអ៊ីដ្រូសែន ហើយការផលិតអ៊ីដ្រូសែនប្រចាំឆ្នាំពីថាមពលកកើតឡើងវិញត្រូវបានកំណត់គោលដៅពី ១០០,០០០ ទៅ ២០០,០០០ តោន។

គួរបញ្ជាក់ដែរថា នៅប្រទេសអាល្លឺម៉ង់ក៏មានរថភ្លើងអ៊ីដ្រូសែនល្បឿនអតិបរមា ១៦០ គីឡូម៉ែត្រក្នុងមួយម៉ោងផងដែរ ហើយនៅប្រទេសស្វីសក៏មានរថភ្លើងអ៊ីដ្រូសែនចម្ងាយអតិបរមា ៤៦០ គីឡូម៉ែត្រ និងល្បឿនអតិបរមា ១២៧ គីឡូម៉ែត្រក្នុងមួយម៉ោងផងដែរ។ ទោះជាយ៉ាងណា រថភ្លើងអ៊ីដ្រូសែនរបស់ចិននេះ គឺជារថភ្លើងអ៊ីដ្រូសែនដំបូងបង្អស់របស់ពិភពលោកដែលបានសាកល្បងដោយជោគជ័យមុនគេ ដោយសាររថភ្លើងនេះមានមុខងារបើកបរដោយស្វ័យប្រវត្តិ ខណៈរថភ្លើងទាំងពីរខាងលើមិនមានមុខងារបើកបរដោយស្វ័យប្រវត្តិឡើយ៕

ប្រទេសប្រេស៊ីល ៖ លោកយាយម្នាក់ឈ្មោះ Daniela Almeida Vera អាយុ៨១ឆ្នាំ រស់នៅប្រទេសប្រេស៊ីល បាន ស្លា.ប់ ក្រោយពីក្រុមគ្រូពេទ្យធ្វើការវះកាត់ ដើម្បីយកទារកចេញពីផ្ទៃរបស់គាត់ កាលពីថ្ងៃទី១៥ ខែមីនា ឆ្នាំ២០២៤ ។ លោកយាយពុំបានដឹងថា មានទារកក្នុងផ្ទៃនោះទេ ហើយគាត់ចេះតែនិយាយថា ឈឺពោះជាញឹកញាប់ ។

លោកយាយ Daniela មានកូនចំនួន៧នាក់ និងមានចៅសរុប៤០នាក់ ហើយលោកយាយរស់នៅតំបន់ជនបទ ដែលជាសហគមន៍ជនជាតិដើមភាគតិច ។ លោកយាយរូបនេះភ័យខ្លាចនៅពេលទៅជួបគ្រូពេទ្យម្តងៗ ព្រមទាំងខ្លាចឧបករណ៍វះកាត់របស់គ្រូពេទ្យទៀតផង ។ ហេតុនេះ គាត់ក៏សម្រេចចិត្តព្យាបាលជំងឺរបស់ខ្លួន ដោយប្រើប្រាស់ឱសថបុរាណ ច្រើនជាងទៅមន្ទីរពេទ្យ ។ នេះបើតាមការរៀបរាប់របស់កូនស្រីគាត់ ដែលមានអាយុ២១ឆ្នាំ ។

ក្នុងរយៈពេលជាច្រើនឆ្នាំកន្លងមកនេះ លោកយាយតែងតែនិយាយប្រាប់កូនចៅថា គាត់ឈឺពោះជាញឹកញាប់ ។ រីឯស្វាមីរបស់គាត់ធ្លាប់និយាយថា លោកយាយឈឺពោះបែបនេះ តាំងពីមានផ្ទៃពោះជាលើកដំបូងមកម៉្លេះកាលពីគាត់នៅក្មេង (គឺលោកយាយមានផ្ទៃពោះជាមួយស្វាមីមុន) ។

លោកយាយនិយាយថា ដូចមានទារកកម្រើកនៅក្នុងពោះ ហើយពេលខ្លះទៀត វាបានធ្វើឱ្យលោកយាយពុំស្រួលខ្លួនខ្លាំងទៀតផង ។ រីឯកូនស្រីនិយាយថា នាងចាំពុំបានថា នៅពេលនោះ ម្តាយមានអាយុប៉ុន្មានឆ្នាំទេ ។

កាលពីថ្ងៃទី១៤ ខែមីនា ឆ្នាំ២០២៤ ក្រុមគ្រួសារក៏បានបញ្ជូនលោកយាយទៅព្យាបាលជំងឺនៅមន្ទីរពេទ្យមួយកន្លែងក្នុងតំបន់ ដោយសារតែមានរោគសញ្ញាឆ្លងមេរោគក្នុងតម្រង់នោម ប៉ុន្តែនៅពេលគ្រូពេទ្យឆ្លុះ X-ray រកឃើញថា មានទារកនៅក្នុងផ្ទៃរបស់គាត់ ។ ទារកនេះមានសភាពរឹងខ្លាំងដូចថ្ម ហើយគ្រូពេទ្យបញ្ជាក់ថា គាត់មានផ្ទៃពោះនៅក្រៅស្បូន កាលពីប្រមាណ៥៦ឆ្នាំមុន ។

ក្រោយពីរកឃើញទារកនៅក្នុងផ្ទៃអស់រយៈពេល៥៦ឆ្នាំ ក្រុមគ្រូពេទ្យក៏បានវះកាត់យកទារកចេញពីក្នុងផ្ទៃ បន្ទាប់មក គ្រូពេទ្យក៏បញ្ជូនគាត់ទៅកាន់បន្ទប់សង្គ្រោះបន្ទាន់ (ICU) ប៉ុន្តែគាត់បានស្លាប់នៅថ្ងៃបន្ទាប់ គឺថ្ងៃទី១៥ ខែមីនា ឆ្នាំ២០២៤ ។ ចំណែកអ្នកជំនាញលើកឡើងថា វាជាករណីដំបូងគេ និងកម្រមានស្ត្រីណាម្នាក់ជួបហេតុការណ៍បែបនេះណាស់ ៕

រថយន្តបើកបរដោយស្វ័យប្រវត្តិរបស់ក្រុមហ៊ុន Amazon ដែលមានឈ្មោះថា Zoox បានពង្រីកការសាកល្បងបើកបរនៅរដ្ឋ California និង Nevada សហរដ្ឋអាមេរិក ដើម្បីពង្រីកតំបន់បើកបរឱ្យកាន់តែទូលំទូលាយ, មានល្បឿនលឿនជាងមុន និងការបើកបរនៅពេលយប់ ។ ក្រុមហ៊ុននេះបញ្ជាក់ថា នឹងសាកល្បងផ្តល់សេវាកម្មដឹកដំណើរនៅតាមបណ្តាទីក្រុងផ្សេងៗរបស់សហរដ្ឋអាមេរិក ដូចជា ៖ Seattle, Las Vegas, San Francisco និង Foster City រដ្ឋ California ។

ចំណែករូបរាងរបស់រថយន្ត Zoox គឺជាការយករថយន្ត Toyota Highlander មកកែច្នៃផ្នែកមួយចំនួនរបស់រថយន្ត ហើយនឹងមានការបង្កើនកន្លែងទំនេរសម្រាប់យានជំនិះ ដែលបានរចនាយ៉ាងពិសេសមួយនេះ ។ រថយន្ត Zoox នឹងអាចបើកបរដោយស្វ័យប្រវត្តិក្នុងល្បឿនរហូតដល់៧២គីឡូម៉ែត្រក្នុង១ម៉ោង និងធ្វើដំណើរបានក្នុងចម្ងាយផ្លូវ៨គីឡូម៉ែត្រ ខណៈកាលពីមុន វាអាចធ្វើដំណើរបានត្រឹមតែ១,៦គីឡូម៉ែត្រប៉ុណ្ណោះ ។

សារព័ត៌មានរ៉យទ័ររាយការណ៍ថា រថយន្ត Zoox មានប្រព័ន្ធបើកបរទំនើបជាងរថយន្តរបស់ក្រុមហ៊ុន Waymo របស់ Google ។ នៅចុងខែមីនា ឆ្នាំ២០២៤នេះ ក្រុមហ៊ុន Waymo បានប្រកាសអំពីគម្រោងផ្តល់សេវាកម្មរថយន្តតាក់ស៊ីនៅទីក្រុង Los Angeles បន្ទាប់ពីក្រុមហ៊ុននេះបានផ្តល់សេវាកម្មនៅទីក្រុង San Francisco និង Phoenix ។

កាលពីឆ្នាំ២០២៣ តាក់ស៊ីរបស់ក្រុមហ៊ុន General Motors (ឬ GM) មានឈ្មោះថា Cruise បានបញ្ឈប់ការសាកល្បងរបស់ខ្លួន ក្រោយពីភ្នាក់ងារត្រួតពិនិត្យចោទប្រកាន់ថា នាយកគ្រប់គ្រងក្រុមហ៊ុនព្យាយាមបិទបាំងព័ត៌មានគ្រោះថ្នាក់ចរាចរណ៍ ដែលបានកើតឡើងនៅទីក្រុង San Francisco ។ គ្រោះថ្នាក់ចរាចរណ៍ពេលនោះ គឺរថយន្ត Cruise បានបុក និងអូសស្ត្រីម្នាក់នៅលើដី ប្រមាណជាង៦ម៉ែត្រ ។

គួរបញ្ជាក់ថា ក្រុមហ៊ុន Amazon បានទិញក្រុមហ៊ុន Zoox កាលពីឆ្នាំ២០២០ ក្នុងតម្លៃជាង១ពាន់លានដុល្លារអាមេរិក ហើយក្រុមហ៊ុនសង្ឃឹមថា នឹងប្រើប្រាស់រថយន្តនេះសម្រាប់ការដឹកជញ្ជូនទំនិញផ្សេងៗ ។ ទោះយ៉ាងណា ក្រុមហ៊ុន Zoox ពុំទាន់បានប្រកាសអ្វីទេពាក់ព័ន្ធនឹងការលើកឡើងនេះ ៕