អ្នកឧកញ៉ា គួច ម៉េងលី បានចេញមុខទាមទារឱ្យមានការស៊ើបអង្កេតលើក្រុមហ៊ុន CIC Plc ដែលរងការចោទប្រកាន់ថា ក្លែងបន្លំប្រាក់វិនិយោគរួមគ្នារាប់សិបលានដុល្លារនៅពេលកន្លងមកនេះ។

អ្នកឧកញ៉ា បានចំណាយទុនជិត៣០ម៉ឺនដុល្លារ វិនិយោគក្នុងក្រុមហ៊ុន ស៊ីអាយស៊ី ភីអិលស៊ី (CIC Plc) ដោយលើកឡើងថា អ្នករងគ្រោះគ្រប់គ្នា ត្រូវបន្តតស៊ូឱ្យអស់ពីលទ្ធភាព ដើម្បីតម្លាភាពនិងយុត្តិធម៌។

អ្នកឧកញ៉ាថា បានសង្កត់ធ្ងន់ថា៖”ករណីនេះ មិនគួរមើលរំលងដាច់ខាត ហើយត្រូវតែធ្វើអ្វីមួយ ព្រោះសំណុំរឿងនេះ ជារឿងព្រហ្មទណ្ឌ ដែលគួរតែត្រូវចាប់ផ្ដើមស៊ើបអង្កេត និងដោយបើកចំហរ ហើយជនល្មើសត្រូវតែទទួលខុសត្រូវយកមកកាត់ទោសតាមផ្លូវច្បាប់ និងទទួលទោសព្រហ្មទណ្ឌ”។

ជុំវិញករណីនេះ អ្នកឧកញ៉ា គួច ម៉េងលី បានស្នើឱ្យមានការស៊ើបអង្កេតលើក្រុមហ៊ុន CIC ដោយលោកលើកឡើងថា៖”ប្រសិនបើរឿងនេះ នៅតែបន្តកើតមាន ហើយឧក្រិដ្ឋជនមិនត្រូវបាននាំមកកាត់ទោសតាមផ្លូវច្បាប់ទេ នោះវានឹងបង្កឱ្យកាន់តែមានភាពច្របូកច្របល់នៅ ក្នុងសង្គម ដែលនាំទៅរកការបំផ្លិចបំផ្លាញនូវសក្ដានុពល ផ្នែកមីក្រូនិង ប្រព័ន្ធម៉ាក្រូសេដ្ឋកិច្ចរបស់ប្រទេសកម្ពុជាទាំងមូល”៕

នៅក្នុងរយៈពេលប៉ុន្មានឆ្នាំចុងក្រោយនេះ ដោយសង្កេតឃើញថា ពិធីលាងជើង ដែលជាពិធីមួយនៃពិធីរៀបអាពាហ៍ពិពាហ៍ខ្មែរ ត្រូវបានបំបាត់ចោល ដែលបច្ចុប្បន្នស្ទើរតែលែងមានទៀតហើយ ដោយសារតែកត្តាមួយចំនួនដូចជា អ្នកខ្លះយល់ឃើញគ្មានពេលវេលាគ្រប់គ្រាន់ដើម្បីប្រារព្ធ ឬថាជាពិធីមិនសូវចាំបាច់ ឬជាការបង្អាប់ដល់កិត្តិយសស្រ្តីជាដើម។

បើយោងតាមតម្រានាសម័យអាណាចក្រភ្នំ ឬសម័យនគរគោកធ្លក (ហ្វូណន) ដែលកាលពីសម័យនោះស្រ្តីគឺជាអ្នកគ្រប់គ្រងប្រទេស ដូច្នេះកាលនោះស្រ្តីគឺជាអ្នកចូលស្តីដណ្តឹងបុរសមុន ហើយក្នុងពិធីមង្គលការ បុរសគឺជាអ្នកលាងជើងឲ្យស្រ្តី។ ក្រោយមកទៀត ក្រោយពី ព្រះនាងសោមា ជាម្ចាស់អាណាចក្រភ្នំកាលសម័យនោះ បានរៀបអភិសេកជាមួយព្រះបាទហ៊ុនទាន ដែលយាងមកពីប្រទេសឥណ្ឌា ក៏បានទទួលឥទ្ធិពលព្រាហ្មណ៍សាសនាទូទាំងប្រទេស ទើបខ្មែរបានផ្លាស់ប្តូរទម្លាប់នេះតាមឥណ្ឌាឲ្យស្រ្តីជាអ្នកលាងជើងឲ្យបុរសវិញ។ នេះយោងតាមសំណេររបស់លោកស្រី កែវ ច័ន្ទបូរណ៍ ដែលបានសរសេររៀបរាប់អំពីពិធីមង្គលការខ្មែរ។

ម៉្យាងវិញទៀត នៅជំនាន់ដើម ពិធីលាងជើងនេះ ច្រើនធ្វើនៅតំបន់ជនបទស្រុកស្រែប៉ុណ្ណោះ ដោយហេតុថា ខាងបុរសធ្វើដំណើរផ្លូវឆ្ងាយដោយជើងទទេរ មកផ្ទះខាងស្រី និងជាការបង្ហាញអំពីសុជីវធម៌ ទើបខាងស្រីហុចទឹកលាងជើងទៅបុរស ដើម្បីលាងជើងកុំឲ្យប្រឡាក់ផ្ទះ។

ជាមួយគ្នានោះ បើប្រៀបជាមួយន័យធៀប ការលាងជើងគឺមានន័យថា ជាការលាងជម្រះរឿងរ៉ាវអាក្រក់ពីអតីតកាល ប្រសិនបើបុរសនោះធ្លាប់ខូចខិលពីមុនមក នោះនឹងជួយលាងជម្រះឲ្យស្អាតល្អ សបញ្ជាក់ពីភាពបរិសុទ្ធជាមួយគូរស្រករ មុននឹងកសាងគ្រួសារជាមួយគ្នា។ លើសពីនេះ ពិធីនេះក៏ជាការបង្ហាញអំពីសេចក្តីស្រលាញ់ស្មោះស្ម័គ្រជាមួយគ្នា ដែលបញ្ជាក់ថា ជាការស្រលាញ់តាំងពីចុងក្បាលដល់ចុងជើងជាដើម។

យ៉ាងណាមិញ បច្ចុប្បន្ននេះ យោងតាមក្រសួងវប្បធម៌និងវិចិត្រសិល្បៈក៏បានប្ដូរបរិបទទៅតាម ក្បួន ដែលមានចែងស្រាប់គឺ ក្បួនទម្រង់ការព្រះជ័យចេស្ដា អនុញ្ញាតឱ្យប្អូនរបស់កូនក្រមុំ ឬ ក្មួយបង្កើតរបស់កូនក្រមុំ ហ្នឹងទៅលាងជើងជំនួស មិនមែនកូនក្រមុំទៅលាងដូចមុនដោយផ្ទាល់នោះទេ៕

កម្មវិធីប្រកួតស្ត្រីជាសាកល Universal Women 2024 ដែលប្រទេសកម្ពុជាធ្វើជាម្ចាស់ផ្ទះបានរកឃើញម្ចាស់ជ័យលាភីហើយគឺបានទៅលើបេក្ខភាពមកពីប្រទេសហ្វីលីពីន អ្នកនាង Maria Gigante ខណៈកម្ពុជា ដែលមានអ្នកនាង Brianna Mai ជាបេក្ខភាពទទួលបានចំណាត់ថ្នាក់លំដាប់រងទី៣។

កាលពីរាត្រីថ្ងៃទី២២ ខែមីនា នេះកម្មវិធីប្រកួត Universal Women 2024 បានឈានដល់វគ្គផ្តាច់ព្រ័ត្រដោយបេក្ខភាពចូលរួមមានចំនួនជាង៥០ប្រទេសមកពីជុំវិញពិភពលោក ។ បេក្ខភាពតំណងប្រទេស ហ្វីលីពីន គឺម្ចាស់ជ័យលាភីក្នុងការប្រកួតលើកទី២នេះ លំដាប់រងទី១ បានទៅលើ វេណេស៊ុយអេឡា ចំណែកឯ បារាំង បានជាប់លំដាប់រងទី២ កម្ពុជា ជាប់លំដាប់រងទី៣ ខណៈ សាធារណរដ្ឋដូមីនីកែន(Dominican Republic) ជាប់លំដាប់រងទី៤។ ងាកទៅកាន់ប្រទេសក្នុងតំបន់អាស៊ានដែលបានចូលរួមប្រកួតផ្សេងទៀតមានដូចជា ថៃ វៀតណាម ម៉ាឡេស៊ី បានជាប់ក្នុងបញ្ជីTOP24។

ក្នុងរយៈពេលពីរឆ្នាំនៃកម្មវិធីប្រកួត Universal Women ឃើញថាប្រទេសកម្ពុជាទទួលបានលទ្ធផលសុទ្ធតែល្អចូលដល់កំពូល៥នាក់ចុងក្រោយទាំងអស់។ កាលពីឆ្នាំ២០២៣ បេក្ខភាពតំណាងកម្ពុជាអ្នកនាង ប្រាសាទ ដាវីន ទទួលបានចំណាត់ថ្នាក់លំដាប់រងទី៤ នៅលើទឹកដីឌូបៃ។ ក្នុងឆ្នាំនេះកូនខ្មែរកាត់អាម៉េរិក អ្នកនាង Brianna Mai បានជាប់លំដាប់រងទី៣ ការប្រកួត Universal Women 2024។
យោងតាមគេហទំព័រផ្លូវការ Universal Woman គឺជា «ជាវេទិកាមួយដើម្បីអភិវឌ្ឍ និងលើកកម្ពស់ភាពស្រស់ស្អាតខាងក្នុង និងវប្បធម៌ចម្រុះរបស់ស្រ្តីទូទាំងពិភពលោក។ ការប្រកួតនេះអនុញ្ញាតឱ្យស្ត្រីមានអាយុពី២៥ដល់៤៥ឆ្នាំចូលរួមការប្រកួតដោយគ្មានការរឹតបន្តឹងលើកម្ពស់ ទម្ងន់ និងស្ថានភាពអាពាហ៍ពិពាហ៍ឡើយ»។

ការរៀបចំនៅលើទឹកកម្ពុជានេះគឺក្រោមការគ្រប់គ្រងរបស់អ្នកនាង ប្រាសាទ ដាវីន ដោយការរៀបចំនេះបាននាំបេក្ខភាពបានទៅទស្សនៈកិច្ចនៅខេត្តសៀមរាប និង ខេត្តព្រះសីហនុ។ កម្មវីធីស្រ្តីជាសាកល២០២៤ នេះទទួលបានចាប់អារម្មណ៍ពីសាធារណជនគួរឱ្យកត់សម្គាល់ ជាពិសេសទទួលបានកិត្តិយសខ្ពង់ខ្ពស់នៅលើបណ្តាញសង្គមរបស់នាយករដ្ឋមន្រ្តីក៏បានចូលរួមផ្សព្វផ្សាយផងដែរជាហេតុធ្វើឱ្យអ្នកនាង ប្រាសាទ ដាវីន រំភើបចិត្តយ៉ាងខ្លាំង៕

ទន្ទឹមនឹងរៀបការយ៉ាងអធិកអធមកាលពីដើមខែធ្នូ ឆ្នាំ២០២៣ ពេលនេះជីវិតគូរបស់ថៅកែពេជ្រ ទ្រី ដាណា និងស្វាមីក្មេងលោក រស់ រជ្ជសាល ប្រឈមនឹងការចែកផ្លូវគ្នាបន្ទាប់ពីខាងស្រីប្រលយពាក្យចង់ប្រើជីវិតនៅលីវដូចមុន។ បន្ថែមពីលើនេះ លោកស្រី ទ្រី ដាណា បានទម្លាយហេតុផលខ្លះៗនាំឱ្យជីវិតប្តីប្រពន្ធដែលធ្លាប់តែល្អូកល្អិនប្រែមកប្រេះឆាបែបនេះ។

តាមការបញ្ជាក់របស់លោកស្រី ទ្រី ដាណា នៅលើបណ្តាញសង្គមបានឱ្យដឹងថា លោកស្រីជាមនុស្សម្នាក់គិតដល់អ្នកជុំវិញខ្លួនណាស់ តែពេលខ្លះគិតរហូតដល់គេលែងឱ្យតម្លៃ ។ បន្ទាប់ពីខ្លួនសម្រេចចិត្តរៀបការរួច លោកស្រីបានគិតដល់រឿងជាច្រើន គិតថាធ្វើយ៉ាងណា ដើម្បីជីវិតគ្រួសារដើរទៅមុខរលូន(ឱ្យលុយប្តីទាំងម៉ឺនដើម្បីយកទៅជួយសម្រួលបន្ទុកគ្រួសារគាត់) គិតដល់បងប្អូនគេ គិតដល់ម៉ាក់ក្មេក ទៅលេងផ្ទះគាត់ ហើយជួយជាថវិកាម្ដង 1000$ 2000$ មិនដែលដាច់ឱ្យតែជួប ថែមទាំងជូនប្រាក់ខែគាត់ប្រចាំយ៉ាងទៀតទាត់។ សម្រាប់ប្អូនប្តី លោកស្រីក៏បានផ្ដល់ការងារតម្លៃខ្លួនខ្ទង់ម៉ឺនដុល្លារ»។

ថៅកែពេជ្រអភ័ព្វស្នេហ៍រូបនេះបានបន្ថែមទៀតថា «អ្វីដែលខ្លួនធ្វើទាំងអស់នេះ នៅតែមិនអាចបំពេញតាមចិត្ត និងការចង់បាន។ យូរៗខ្លួនក៏ក្លាយជាមនុស្សម្នាក់ ដែលអាក្រក់នៅក្នុងភ្នែកអ្នកដទៃ នៅពេលគេឃើញវីដេអូម្ដាយក្មេកហូបបាយជាមួយទឹកត្រី ទាំងលោកស្រីបានផ្ដល់ប្រាក់ខែជូនម្តាយក្មេកហើយ មិនមានការខ្វះខាត។ តើឱ្យ លោកស្រីជួយយ៉ាងណាទៀត ត្រូវផ្ដល់អ្វីខ្លះទៀត បើគ្រឿងអលង្ការក៏ជូន ប្រាក់ខែក៏ជូន ពេលទៅលេងក៏ជូន»។លោកស្រី ទ្រី ដាណា ថាខ្លួនក៏អាណិតប្ដី ដែលស្រលាញ់លោកស្រី តែប្តីខ្លួននៅជាប់ចំណងជាមួយគ្រួសារខ្លាំងពេក។ លោកស្រីមិនដឹងថាហេតុអ្វីប្តីរបស់ខ្លួនត្រូវគិតគ្រប់ពេល ទាំងដែលបានបែកផ្ទះទៅហើយ។ ជីវិតគ្រួសារពិបាកបំផុត នៅពេលបងប្អូនមើលឃើញយើង ដូចជាធនាគារមួយ ទាំងយើងខំប្រឹងញើសស្រក់ហូររាល់ថ្ងៃ។ ពេលខ្លះ ខ្លួនឆ្ងល់ថា តើត្រូវធ្វើអ្វីខ្លះទៀត តើខ្លួនជំពាក់ពួកគាត់មែនទេ។ សំពាធបែបនេះ លោកស្រីមិនអាចទទួលបានទៀតទេ ហើយខ្ញុំនឹងគិតឡើងវិញ»។

លោកស្រី ទ្រី ដាណា ថាមនុស្សដូចជាលោកស្រីអ្នកណាមិនផ្តល់តំលៃឱ្យខ្លួនក៏គិតសាឡើងវិញដូចគ្នា។ ថៅកែពេជ្រ ទ្រី ដាណា ថា ខ្លួនលោកស្រីនឹងត្រឡប់មកវិញជាមួយនិងភាពស៊ីងហ្គលម្តងទៀតឆាប់ៗនេះ កន្លែងណាមិនផ្តល់តំលៃខ្លួន លោកស្រីមិននៅយូរទេ។

គួរបញ្ជាក់ថា លោកស្រី ទ្រី ដាណា និងលោក រស់ រាជ្ជសាល សម្រេចចិត្តភ្ជាប់ពាក្យជាមួយគ្នាកាលពីថ្ងៃទី៩ ខែវិច្ឆិកា ឆ្នាំ២០២៣ និងចូលរោងការយ៉ាងអធិកអធមកាលពីថ្ងៃទី៣ ខែធ្នូ ឆ្នាំ២០២៣។ បន្ទាប់ពីរៀបការរួចគូស្វាមីភរិយាមួយគូនេះបង្ហាញភាពផ្អែមល្អែមជាមួយគ្នាញឹកញយបង្អួតហ្វេនៗមិនដែលដាច់។ ទោះយ៉ាងណាគួរឱ្យសោកស្តាយនូវចំណងស្នេហាមួយនេះដែលអាចឈានដល់ការចែកផ្លូវគ្នា៕

ឧកញ៉ា ខេមរៈ សិរីមន្ត ជាតារាចម្រៀងដែលមានឈ្មោះបោះសំឡេងមួយរូបចាប់ផ្តើមសកម្មភាពសិល្បៈរបស់ខ្លួនសហការជាមួយតារាចម្រៀងបរទេសដែលកន្លងមកថ្មីៗនេះលោកបានសហការចាប់ដៃគូជាមួយតារាចម្រៀងថៃ។ ទន្ទឹមនឹងការចាប់ដៃគូជាមួយតារាចម្រៀងបរទេស ឧកញ៉ា ខេមរៈ សិរីមន្ត បានលើកឡើងនៅក្នុងកិច្ចសម្ភាសជាមួយអ្នកសារព័ត៌មានថាលោកនឹងចាប់ដៃគូជាមួយតារាបរទេសផ្សេងទៀត។ តារាចម្រៀងមានងារជាឧកញ៉ារូបនេះថា ការប្រឹងប្រែងរបស់លោកសហការនានាគឺដើម្បីពង្រីកទីផ្សារសិល្បៈខ្មែរបង្ហាញទៅកាន់ពិភពលោក។

នៅលើបណ្តាញសង្គមរបស់ឧកញ៉ា ខេមរៈ សិរីមន្ត នាថ្ងៃទី២១ ខែមីនា ឆ្នាំ២០២៤ លោកបានរៀបរាប់យ៉ាងដូច្នេះថា «គ្រប់យ៉ាងដែលខ្ញុំបានប្រឹងប្រែងធ្វើនៅពេលនេះគឺដើម្បីប្រទេសជាទីស្រលាញ់របស់ខ្ញុំ គ្រប់កិច្ចសហការ ជាមួយប្រទេសនានាទាំងអស់គឺដើម្បីពង្រីកទីផ្សារសិល្បៈខ្មែរ»។ ឧកញ៉ា រូបនេះបន្តទៀតថា «ទោះពេលនេះមានបងប្អូនខ្លះមិនទាន់យល់ចិត្ត តែការពិតនឹងបង្ហាញនៅពេលលទ្ធផលពិតមកដល់»។

ឧកញ៉ា ខេមរៈ សិរីមន្ត សង្កត់ធ្ងន់ថា «ទោះលោកមិនមែនជាអ្នកធំតែលោកសុំធ្វើកិច្ចការធំខ្លះជូនជាតិរបស់លោកតាមរយៈវិជ្ជាជីវៈសិល្បៈដែលលោកមានបង្ហាញទៅពិភពលោក»។

គួរបញ្ជាក់ថា តារាចម្រៀងមានដើមកំណើតនៅខេត្តកំពង់ចាមរូបនេះបានសហការជាមួយតារាចម្រៀងថៃ ចេញបទ«អូនរាំអែន» ហើយលោកក៏បានច្រៀងលាយភាសាថៃ ។ ការចេញបទចម្រៀងនេះក៏មានអ្នកមួយចំនួនបញ្ចេញមតិរិះគន់លោកដូចគ្នា។ ទោះជាយ៉ាងណាឧកញ៉ា ខេមរៈ សិរីមន្ត ធ្លាប់បានឆ្លើយតបដែរថាបើបទ អូនរាំអែន ល្បីនៅថៃគឺល្បី ដល់ឡាវនិងភូមា ហើយភាសាខ្មែរ និង អក្សរខ្មែរក៏ត្រូវបានបង្ហាញនៅទីនោះដែលជា មោទនភាពមួយ។ ម្យ៉ាងទៀតក៏អាចស្រូបទាញភ្ញៀវទេសចរពីប្រទេសទាំងនោះបានមួយផ្នែកតូចផងដែរ៕

ដោយមើលឃើញថា បច្ចុប្បន្ននេះ ប្រជាកសិករខ្មែរជាច្រើនបានជួបនូវទុក្ខលំបាកទៅលើវិស័យកសិកម្ម បើទោះបីជាដំណាំរបស់ពួកគេដាំដុះបានយ៉ាងអំណោយផលល្អយ៉ាងណាក៏ដោយ ក៏វិបត្តិតម្លៃនៅលើទីផ្សារហាក់មិនសមស្រប ដោយបានលើកឡើងអំពីការក្រឡុកទីផ្សារឬទទួលបានការបន្ទាបតម្លៃពីឈ្មួញកណ្តាល។

ប៉ុន្តែ បើក្រឡេកមកមើលអំពីរបៀបដែល ប្រជាកសិករខ្មែរមួយចំនួនធ្វើកសិកម្មវិញ បើទោះបីជាមានផ្ទៃដីដាំដុះរាប់ហិចតាយ៉ាងណាក៏ដោយ ក៏ពួកគេនៅតែបន្តធ្វើកសិកម្មបែបគ្រួសារ ពោលគឺធ្វើកសិកម្មបែបបុរាណដែលចេះតៗគ្នាមក គ្មានវិជ្ជាជីវៈត្រឹមត្រូវ និងមិនស្របតាមការអភិវឌ្ឍរបស់សង្គមមនុស្សបច្ចុប្បន្ន ដែលត្រូវជាសម័យបច្ចេកវិទ្យា AI។ ម៉្យាងវិញទៀត ប្រជាកសិករខ្លះនៅតែមិនទាន់យល់ដឹងអំពីយុទ្ធសាស្រ្តធ្វើទីផ្សារនៅឡើយទេ ជាពិសេសគឺទីផ្សារឌីជីថល។

«សម្រាប់សហគមន៍កសិកម្មទំនើប អ្វីៗត្រូវ ផ្អែកលើផែនការអាជីវកម្មច្បាស់លាស់ ជាពិសេស ផែនការផលិតកម្ម។ (លក់បានហើយទើបផលិត) មិនមែនដាំបានហើយទើបដើររកអ្នកទិញនោះទេ ចំណុច នោះហើយដែលជាភាពខ្លាំងនៃការធ្វើកសិកម្មជាទម្រង់ សហគមន៍កសិកម្មទំនើប ដែលកសិករធ្វើតូចៗជាលក្ខណៈ គ្រួសារអាចពិបាកនឹងធ្វើបាន។ សហគមន៍ប្រភេទនេះអាច តភ្ជាប់ទៅកាន់ទីផ្សារទុកជាមុន តាមរយៈការធ្វើផលិតកម្ម កសិកម្មតាមកិច្ចសន្យា ដែលជាកិច្ចសន្យាមានទម្ងន់ អាច ចាប់បង្ខំឱ្យទាំងអ្នកលក់និងអ្នកទិញត្រូវតែអនុវត្តបាន» ដែលទាំងនេះគឺជាការលើកឡើងរបស់លោកឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់និងនេសាទ។

លោកបានបន្តទៀតថា «មនុស្សមួយចំនួនអាចនឹងយល់ច្រឡំរវាង សហគមន៍កសិកម្មបច្ចុប្បន្ន និងសហគមន៍កសិកម្មទំនើប ។ សហគមន៍កសិកម្មបច្ចុប្បន្ន គឺសំដៅលើសហគមន៍តូចៗ សមាជិកផលិតរៀងៗខ្លួន ថ្លៃដើមផលិតខ្ពស់ បច្ចេកទេសច្រើន។ ចំណែកឯសហគមន៍កសិកម្មទំនើប គឺជាសហគមន៍ធំ មានសមាហរណកម្ម្ខខ្ពស់ មានសេដ្ឋកិច្ចមាត្រដ្ឋាន សមាជិកទាំងអស់មានផែនការផលិតកម្មរួម និងស្តង់ដាបច្ចេកទេសតែមួយ»។

ដូច្នេះហើយ ជាចុងក្រោយក៏សូមសំណូមពរដល់ប្រជាកសិករខ្មែរគ្រប់រូប ត្រូវចូលរួមសិក្សានិងបណ្តុះបណ្តាលបន្ថែមទៀតទាក់ទងនឹងវិស័យកសិកម្មនេះ តាមរយៈការជជែកពិភាក្សាជាមួយមន្រ្តីជំនាញពាក់ព័ន្ធ។ ម៉្យាងវិញទៀត ប្រជាកសិករក៏ត្រូវតែចេះស្វែងរកប្រភពព័ត៌មានឲ្យបានច្រើន ដើម្បីបានដៃគូរសហការតាមបណ្តាក្រុមហ៊ុនផលិតនិងកែច្នៃនានាក្នុងស្រុក។ ជាក់ស្តែងដូចជាក្រុមហ៊ុនមេរបស់អ៊ីស្រាអែល Floresta ដែលទើបតែប្រកាសទិញស្វាយចន្ទីដើម្បីកែច្នៃនិងនាំចេញទៅកាន់ទីផ្សារអន្តរជាតិដំណាក់កាលដំបូងប្រមាណ១០០តោន និងក្រុមហ៊ុនជាច្រើនទៀតផងដែរ៕