ក្នុងរយៈពេល៨ខែនៃទំនាក់ទំនងរបស់តារាចម្រៀងល្បីឈ្មោះ Taylor Swift និង Travis Kelce អ្នកជំនាញប៉ាន់ប្រមាណថា តារាបាល់ទាត់អាម៉េរិករូបនេះបានចំណាយប្រាក់យ៉ាងតិច ៨.២ លានដុល្លារទៅលើទំនាក់ទំនងស្នេហារបស់លោកជាមួយនឹង Taylor Swift ដោយគ្របដណ្តប់លើការចំណាយដូចជាការហោះហើរយន្តហោះឯកជន និងអំណោយដ៏មានតម្លៃជាដើម។

របាយការណ៍ពី New York Post គូសបញ្ជាក់ថា ការចំណាយរបស់អ្នកទាំងពីរមានលំនៅដ្ឋានចំនួន ៦លានដុល្លារអាម៉េរិកដែលមានទីតាំងនៅ Leawood រដ្ឋ Kansas ក្នុងគោលបំណងបង្កើនភាពឯកជនរបស់ពួកគេ។ វិមាននេះមានទំហំធំទូលាយក្នុងតំបន់ដ៏សម្បូរបែបបំផុតរបស់ប្រទេសនេះ ដែលបានបំពាក់ដោយគ្រឿងបរិក្ខារប្រណីតៗដូចជា អាងហែលទឹកធំទូលាយ ទីលានវាយកូនបាល់ និងទីលានវាយកូនហ្គោលខ្នាតតូច។

កីឡាកររូបនេះក៏បានបែងចែកប្រាក់ជាង ១.២ លានដុល្លារសម្រាប់ការធ្វើដំណើរតាមយន្តហោះឯកជនទៅកាន់ប្រទេសអាហ្សង់ទីន អូស្ត្រាលី និងសិង្ហបុរី ដើម្បីអមដំណើរ Taylor Swift ក្នុងអំឡុងពេលប្រគំតន្រ្តី «The Eras Tour» ។ ការធ្វើដំណើររបស់លោកទៅកាន់ទីក្រុងស៊ីដនីសម្រាប់ការសម្តែងរបស់ Taylor Swift នៅចុងខែកុម្ភៈ ត្រូវបានគេរាយការណ៍ថាបានចំណាយប្រហែល ៣៤ម៉ឺនដុល្លារអាម៉េរិក ខណៈការធ្វើដំណើររបស់លោកទៅកាន់ប្រទេសសិង្ហបុរីដើម្បីជួបជាមួយ Taylor Swift នៅដើមខែមីនានេះ ត្រូវបានគេប៉ាន់ស្មានថាចំណាយជិត ៥៧ម៉ឺនដុល្លារ។

Travis Kelce បានចំណាយបន្ថែម ១ លានដុល្លារសម្រាប់ការចំណាយទៅលើមិត្តស្រី និងគ្រួសារ រង្វង់មិត្តភក្តិ និងសមាជិកគ្រួសាររបស់លោកសម្រាប់ឱកាស Super Bowl ក្នុងខែកុម្ភៈ។

លើសពីនេះ អំណោយដ៏ថ្លៃថ្លារបស់ Kelce ដល់ Taylor Swift រួមមានការប្រារព្ធទិវានៃក្តីស្រឡាញ់ដ៏ធំ ជាមួយនឹងការរៀបចំផ្កាកុលាបដ៏ស្រស់ស្អាត និងរូបចម្លាក់ផ្កាឈូក។អំណោយផ្សេងទៀតរបស់លោកដល់គូស្នេហ៍មានរបស់ជាច្រើនទៀតសុទ្ធតែប្រណីតនិងមានតម្លៃថ្លៃ។

Taylor Swift និង Travis Kelce បានចាប់ផ្តើមមានទំនាក់ទំនងនៅពេលដែល Travis Kelce ទាក់ទាញចំណាប់អារម្មណ៍របស់នាងនៅឯការប្រគំតន្ត្រី Eras Tour ក្នុងខែកក្កដា ឆ្នាំ២០២៣ នៅនៅសហរដ្ឋអាម៉េរិក។ អ្នកទាំងពីរបានរក្សាទំនាក់ទំនងជាលក្ខណៈឯកជន ដើម្បីស្វែងយល់ចិត្តគ្នាទៅវិញទៅមក។ ពីរខែក្រោយមក Taylor Swift និងមិត្តប្រុស បានប្រកាសទំនាក់ទំនងពួកគេជាសាធារណៈ ហើយចាប់តាំងពីពេលនោះមក តារាចម្រៀងរូបនេះតែងតែមានវត្តមាននៅក្នុងការប្រកួតមិត្តប្រុសរបស់នាង។

Travis Kelce មានអាយុ៣៥ឆ្នាំ បានលេចចេញជាបុគ្គលិកលក្ខណៈគួរឱ្យកត់សម្គាល់សម្រាប់ Kansas City Chiefs ដោយបំបែកកំណត់ត្រា NFL ជាច្រើននៅក្នុងអាជីពរបស់លោក។ មុនពេលមានទំនាក់ទំនងស្នេហាជាមួយ Taylor Swift លោកមានទំនាក់ទំនងរយៈពេល៥ឆ្នាំជាមួយតារាម៉ូដែល Kayla Nicole ដែលបានបញ្ចប់នៅក្នុងខែឧសភា ឆ្នាំ២០២២។

Taylor Swift មានអាយុ ៣៥ឆ្នាំ។ ទស្សនាវដ្ដី Forbes ប៉ាន់ប្រមាណថាទ្រព្យសម្បត្តិរបស់នាងមានចំនួន ១.១ ពាន់លានដុល្លារអាម៉េរិក ដែលជាតួលេខមួយដែលត្រូវបានជំរុញយ៉ាងខ្លាំងដោយជោគជ័យនៃការប្រគំតន្រ្តី «The Eras Tour»របស់នាង៕

ប្រទេសជប៉ុន៖ Mori JP Tower គឺជាអាគារថ្មីខ្ពស់ជាងគេបំផុតក្នុងប្រទេសជប៉ុន ដែលមានកម្ពស់ ៣២៥ ម៉ែត្រ ត្រូវបានបំពាក់ដោយប្រព័ន្ធបច្ចេកវិទ្យាទំនើបជាច្រើន ដើម្បីជួយកាត់បន្ថយការរញ្ជួយខ្លាំង ក៏ដូចជាអាចទប់ទល់នឹងការរញ្ជួយដីរហូតដល់ ៩ ដឺក្រេឯណោះ។ អគារនេះត្រូវបានរចនាឡើងដើម្បីកាត់បន្ថយការប្រើប្រាស់ថាមពលពីបណ្តាញអគ្គិសនី ជាមួយនឹងលក្ខណៈពិសេសជាច្រើនដែលមាននិរន្តរភាព និងធន់នឹងការរញ្ជួយដី។
Mori JP Tower គឺជាគម្រោងដែលរចនាឡើងដោយ Pelli Clarke & Partners ហើយមានទីតាំងនៅ Azabudai Hills ដែលជាសង្កាត់ថ្មីមានកន្លែងបៃតងជាច្រើនរួមទាំងអគារ Heatherwick Studio និងអគារខ្ពស់ៗពីរផ្សេងទៀត នេះបើតាម New Atlas ដែលបានរាយការណ៍កាលពីថ្ងៃទី ២៥ ខែមីនា ឆ្នាំ២០២៤។

អគារខ្ពស់កប់ពពកថ្មីនេះ មានកញ្ចក់មុខរាងដូចផ្កាឈូក ដែលមានលក្ខណៈស៊ីមេទ្រី និងផ្ទៃកញ្ចក់កោងចំនួនបួន ហើយផ្នែកខាងក្រៅនៃអគារត្រូវបានបំភ្លឺដោយបន្ទះពន្លឺរួមបញ្ចូលគ្នា ដែលជួយឱ្យអគារមានពន្លឺចុះសម្រុងគ្នានៅពេលយប់។ នៅខាងក្នុងអគារនេះមាន ៦៤ ជាន់ដែលរួមបញ្ចូលគ្នានូវអាផាតមិន និងការិយាល័យ។ Mori JP Tower គឺជាអគារខ្ពស់កប់ពពកនៅក្នុងប្រទេសជប៉ុន ប៉ុន្តែមិនមែនជាអគារខ្ពស់ជាងគេនៅលើពិភពលោកនោះទេ។ អគារនេះជាប់ចំណាត់ថ្នាក់ទី ១៣៤ ប៉ុណ្ណោះក្នុងពិភពលោកទាក់ទងនឹងកម្ពស់ ប៉ុន្តែទោះជាយ៉ាងណា អាគារ Mori JP Tower គឺជាគម្រោងពិសេសមួយដែលមានសមត្ថភាព ការពារអាគារពីការរញ្ជួយដី កាត់បន្ថយការរញ្ជួយខ្លាំង ក៏ដូចជាអាចទប់ទល់នឹងការរញ្ជួយដីរហូតដល់ ៩ ដឺក្រេផងដែរ។

នាយកប្រតិបត្តិ Mori បាននិយាយថា ដើម្បីធានាថាអគារខ្ពស់មានស្ថេរភាព គំនរបំពង់ដែកត្រូវបានបំពេញដោយបេតុងដែលមានកម្លាំងខ្ពស់ ហើយប្រព័ន្ធការពារសើមជាច្រើនត្រូវបានដំឡើងដើម្បីកាត់បន្ថយការរអិល។ ឧបករណ៍សើមក៏ជួយកម្រិតការយោលនៅលើកំពូលអគារក្នុងពេលមានខ្យល់បក់ខ្លាំងផងដែរ។ លើសពីនេះ អគារនេះក៏មានជម្រកសង្គ្រោះបន្ទាន់ ដែលមានសមត្ថភាពផ្ទុកមនុស្សបានចំនួន ៣៦០០ នាក់ និងកន្លែងទុកដាក់សម្ភារៈចាំបាច់នានា ក្នុងករណីមានគ្រោះធម្មជាតិទៀតផង។ រីឯដែកថែប និងបេតុងដែលមានកម្លាំងខ្ពស់ត្រូវបានប្រើដើម្បីរក្សារចនាសម្ព័ន្ធឱ្យមានតុល្យភាព។

បន្ទាប់មកយើងក៏ដាក់ឧបករណ៍បញ្ជារំញ័រនៅក្នុងតំបន់សំខាន់ៗផងដែរ ដែលកាត់បន្ថយការរំញ័រអំឡុងពេលរញ្ជួយដីយ៉ាងមានប្រសិទ្ធភាព ដែលនាំឱ្យមានភាពធន់កាន់តែខ្លាំង។ នាយកប្រតិបត្តិ Mori បានបន្តទៀតថា អគ្គិសនីទាំងអស់សម្រាប់អគារបានមកពីប្រភពថាមពលកកើតឡើងវិញជាមួយនឹងកំដៅដែលស្រង់ចេញពីប្រព័ន្ធលូ។ ដូច្នេះអគារនេះក៏រក្សាទុក និងព្យាបាលទឹកភ្លៀងសម្រាប់ស្រោចស្រពដើមឈើ ចំណែកទឹកសំណល់ពីគ្រួសារលំនៅដ្ឋានត្រូវបានប្រមូល និងប្រើប្រាស់ក្នុងបន្ទប់ទឹកនៃជាន់ការិយាល័យ៕

ប្រទេសវៀតណាម ៖ នៅខែមីនា ឆ្នាំ២០២៤ តម្លៃទុរេនមូសាំងឃីង (Musang King) បានកើនឡើងខ្ពស់នៅប្រទេសវៀតណាម គឺតម្លៃស្មើប្រមាណ១៥ដុល្លារអាមេរិកក្នុង១គីឡូក្រាម ក្នុងអំឡុងពេលចាប់ផ្តើមការប្រមូលផលនៅតំបន់ដីសណ្តទន្លេមេគង្គ ។ ជាទូទៅ ទុរេនមានគុណភាពល្អ គឺមានតម្លៃចាប់ពី១៥ដុល្លារ ដល់១៧ដុល្លារអាមេរិក ។

តម្លៃទុរេនវៀតណាមបានកើនឡើងខ្ពស់នៅខែមីនានេះ ក្រោយពីតម្លៃទុរេនបានធ្លាក់ចុះយ៉ាងខ្លាំង កាលពីខែតុលា ឆ្នាំ២០២៣ ។ បើតាមអាជីវករលក់ទុរេនវៀតណាមម្នាក់និយាយថា ការប្រមូលផលទុរេននៅវៀតណាមនាពេលបច្ចុប្បន្នមានកំណត់ ខណៈតម្រូវការនាំចេញទុរេនទៅក្រៅប្រទេសច្រើន ។ ផ្លែទុរេនមានគុណភាពខ្ពស់នឹងចាប់ផ្តើមទុំនៅចុងខែមីនា ហើយមានអតិថិជនជាច្រើននាក់រង់ចាំទិញ ។

ចំណែកអាជីវករលក់ទុរេនម្នាក់ទៀតនិយាយថា ខ្លួនបានផ្តោតទៅលើការចាប់អារម្មណ៍ទិញទុរេនពីក្រៅប្រទេសសម្រាប់ទុរេនមូសាំងឃីងរបស់វៀតណាម ។ រីឯតម្រូវការទិញទុរេនពីទីផ្សារក្រៅប្រទេស មានដូចជា ៖ ប្រទេសរុស្ស៊ី, សហរដ្ឋអាមេរិក, អាល្លឺម៉ង់ និងឌូបៃ ។ រីឯទិន្នផលទុរេនធ្លាក់ចុះនៅវៀតណាម គឺបណ្តាលមកពីកសិករមួយចំនួនឈប់ដាំដុះ ពីព្រោះទុរេនជាដំណាំពិបាកថែទាំ និងមិនងាយទទួលបានផលនោះទេ ព្រមទាំងអាកាសធាតុមិនអំណោយផលផងដែរ ។

អាកាសធាតុក្តៅអូសបន្លាយជាច្រើនខែបានធ្វើឱ្យតំបន់ឧស្សាហកម្ម និងដើមឈើហូបផ្លែដែលដាំដុះនៅលើផ្ទៃដីជាច្រើនកន្លែង ជាពិសេស ទុរេន គឺជាផ្លែឈើមានតម្លៃខ្ពស់ផ្នែកសេដ្ឋកិច្ច ដែលកសិករវៀតណាមដាំដុះនៅតំបន់អាគ្នេយ៍ និងតំបន់កណ្តាល ខ្វះខាតទឹកយ៉ាងខ្លាំង ។ ហេតុនេះ វាបណ្តាលឱ្យដំណាំទុរេនប្រឈមនឹងទិន្នផលធ្លាក់ចុះ ដោយសារគ្រោះរាំងស្ងួត ។

បើតាមអ្នកជំនាញវៀតណាមនិយាយថា ការស្រោចទឹកដើមទុរេនឱ្យបានគ្រប់គ្រាន់ ជាពិសេស ការស្រោចទឹកនៅរដូវក្តៅ គឺមានសារៈសំខាន់ខ្លាំងណាស់ ។ អ្នកជំនាញបញ្ជាក់ថា កសិករគួរតែស្រោចទឹកដើមទុរេន នៅពេលព្រឹកព្រលឹម ឬពេលល្ងាច គឺជាពេលល្អបំផុត ៕

ប្រទេសចិន ៖ កាលពីថ្ងៃទី២៦ ខែមីនា ឆ្នាំ២០២៤ សារព័ត៌មានបរទេសរាយការណ៍ថា តុលាការនៅប្រទេសចិនបានកាត់ក្តីឱ្យអតីតប្រធានសមាគមបាល់ទាត់ចិនជាប់ ពន្ធ.នា.គារ អស់មួយជីវិត ក្រោយពីតុលាការរកឃើញថា អតីតប្រធានសមាគមបាល់ទាត់រូបនេះបានទទួលប្រាក់ សំ.ណូក ស្មើជាង៨១លានយាន់ ក្នុងអំឡុងពេលកាន់តំណែង ។

សារព័ត៌មានស៊ិនហួរបានរាយការណ៍ពីទីក្រុង Wuhan ប្រទេសចិន កាលពីថ្ងៃទី២៦ ខែមីនា ថា តុលាការប្រជាជននៅខេត្ត Hubei ស្ថិតនៅតំបន់កណ្តាលប្រទេសចិន បានកាត់ក្តីឱ្យលោក Chen Xuyuan គឺជាអតីតប្រធានសមាគមបាល់ទាត់ចិន ជាប់ពន្ធនាគារអស់មួយជីវិត ដោយសារលោកទទួលសំណូក ។

តុលាការបញ្ជាក់ថា លោក Chen Xuyuan បានទទួលផលប្រយោជន៍ក្នុងអំឡុងពេលលោកកាន់តំណែង គឺចាប់ពីឆ្នាំ២០១០ រហូតដល់ឆ្នាំ២០២៣ រួមទាំងទទួលសំណូកពាក់ព័ន្ធនឹងសមាគមបាល់ទាត់ផងដែរ ដើម្បីចុះកិច្ចសន្យាគម្រោង និងដំណើរការវិនិយោគជាមួយបុគ្គលផ្សេង ។ លោក Chen Xuyuan បានទទួលប្រាក់ស្មើជាង៨១លានយាន់ ពីបុគ្គលផ្សេងដើម្បីជាការដឹងគុណ ។

សាលក្រមរបស់តុលាការបញ្ជាក់ដែរថា លោក Chen Xuyuan បានបំពានច្បាប់នៃការប្រកួតប្រជែងដោយយុត្តិធម៌ក្នុងវិស័យបាល់ទាត់យ៉ាងធ្ងន់ធ្ងរ ហើយលោកបានធ្វើឱ្យប៉ះពាល់ដល់មុខមាត់វិស័យកីឡាបាល់ទាត់របស់ប្រទេសចិនទៀតផង ៕

ប្រទេសជប៉ុន៖ រដ្ឋាភិបាលទីក្រុងតូក្យូ ប្រទេសជប៉ុន បានចេញសេចក្តីប្រកាសអំពីសុខភាព ខណៈដែលករណីនៃការឆ្លងមេរោគបាក់តេរីប្រភេទថ្មីដ៏កម្រមួយបានឆ្លងរាលដាលក្នុងល្បឿនលឿនបំផុត ចាប់តាំងពីដើមឆ្នាំនេះមកដែលមានលើសពី ៥០% នៃចំនួនករណីសរុបក្នុងឆ្នាំ ២០២៣ នេះបើយោងតាម Japan Times ដែលបានចុះផ្សាយនៅថ្ងៃទី២៦ ខែមីនា ឆ្នាំ២០២៤។

បច្ចុប្បន្នរដ្ឋាភិបាលកំពុងព្រួយបារម្ភអំពីការរីករាលដាលនៃជម្ងឺ streptococcal toxic shock syndrome (STSS) ដែលកំពុងកើនឡើងខ្លាំងនៅក្នុងប្រទេសជប៉ុន។ ជំងឺនេះបង្កឡើងដោយបាក់តេរី streptococcus ក្រុម A ដែលបណ្តាលឱ្យមានរោគសញ្ញាពិបាកដកដង្ហើមស្រួចស្រាវ និងការខូចខាតថ្លើម ហើយទំនងជាបណ្តាលឱ្យក្តៅខ្លួនខ្លាំងទៀតផង ដោយជាលទ្ធផលជំងឺនេះគឺមានអាត្រាស្លាប់ខ្ពស់រហូតដល់ ៣០% ។

ដូច្នេះបើគិតចាប់ពីដើមខែមករា ដល់ពាក់កណ្តាលខែមីនា ឆ្នាំ២០២៤ ចំនួនករណីនេះបានកើនឡើងដល់ ៨៨ ករណីនៅក្នុងទីក្រុងតូក្យូ ខណៈដែលប្រទេសទាំងមូលមាន ៥១៧ ករណី ដែលចំនួនករណីរយៈពេល ៣ ខែនេះបានលើសពី ៥០% នៃចំនួនករណីសរុបក្នុងឆ្នាំ ២០២៣។ ការកើនឡើងនៃករណី STSS ត្រូវបានគេជឿថាបានផ្សារភ្ជាប់ទៅនឹងវ៉ារ្យ៉ង់ M1UK ។

បើយោងតាមវិទ្យាស្ថានជាតិរបស់ប្រទេសជប៉ុន ក៏បានឱ្យដឹងដែរថា ជាធម្មតាប្រហែល ៩០% នៃជំងឺឆ្លង STSS ត្រូវបានកើតឡើងចំពោះមនុស្សដែលមានអាយុចាប់ពី ៤០ ឆ្នាំឡើងទៅ ដោយបច្ចុប្បន្នចំនួនករណីក្នុងវ័យ ៤០ ឆ្នាំបានកើនឡើងយ៉ាងខ្លាំងក្នុងរយៈពេលប៉ុន្មានខែមកនេះ។ ទោះជាយ៉ាងណា មន្ត្រីជប៉ុនបានស្នើឱ្យប្រជាជនស្វែងរកការណែនាំពីគ្រូពេទ្យជាបន្ទាន់ ប្រសិនបើពួកគេមានរោគសញ្ញាដូចជា ឈឺចាប់ ហើមអវយវៈ ឬក្តៅខ្លួន ដែលជាសញ្ញានៃការឆ្លងមេរោគនេះ។

គួរបញ្ជាក់ដែរថា ជំងឺ streptococcus ក្រុម A អាចឆ្លងតាមរយៈដំណក់ទឹកផ្លូវដង្ហើម និងការប៉ះពាល់ផ្ទាល់ ប៉ុន្តែការឆ្លងក៏អាចកើតមានតាមរយៈមុខរបួសនៅលើដៃ ឬជើងផងដែរ។ ហេតុនេះហើយ បច្ចុប្បន្នអាជ្ញាធរសុខាភិបាលបានកំពុងណែនាំប្រជាជនឱ្យអនុវត្តការប្រុងប្រយ័ត្នជាមូលដ្ឋាន ដូចជាការលាងដៃញឹកញាប់ និងការថែទាំរបួសឱ្យបានត្រឹមត្រូវ៕

ប្រទេសថៃ ៖ កាលពីថ្ងៃទី២៦ ខែមីនា ឆ្នាំ២០២៤ សារព័ត៌មានថៃរាយការណ៍ថា ក្នុងកិច្ចប្រជុំគណៈរដ្ឋមន្ត្រីបានអនុម័តលើសំណើរបស់ក្រសួងវប្បធម៌ ដោយស្នើសុំចុះបញ្ជីសម្លៀកបំពាក់ប្រពៃណីថៃ និង Muay Thai ជាបេតិកភណ្ឌវប្បធម៌ជាមួយអង្គការយូណេស្កូ នាពេលឆាប់ៗនេះ ។

លោក Sermsak Phongpanich រដ្ឋមន្ត្រីក្រសួងវប្បធម៌បានលើកឡើងក្រោយពីកិច្ចប្រជុំគណៈរដ្ឋមន្ត្រីថា គណៈរដ្ឋមន្ត្រីបានអនុម័តលើសំណើរបស់ក្រសួងវប្បធម៌ ក្នុងការស្នើសុំចុះបញ្ជីបេតិកភណ្ឌវប្បធម៌របស់ប្រទេសថៃ ចំនួន២ គឺសម្លៀកបំពាក់ប្រពៃណី និង Muay Thai ដោយឱ្យនាយកដ្ឋានផ្សព្វផ្សាយវប្បធម៌រៀបចំឯកសារបញ្ជូនទៅកាន់លេខាធិការដ្ឋាននៃគណៈកម្មការជាតិ ។

ចំណែកក្រសួងអប់រំនឹងបញ្ជូនឯកសារទៅឱ្យអង្គការយូណេស្កូ ឱ្យបានមុនថ្ងៃទី៣១ ខែមីនា ឆ្នាំ២០២៤ នេះ ដើម្បីឱ្យអង្គការយូណេស្កូពិចារណាចុះក្នុងបញ្ជី បន្ទាប់ពីការចុះបញ្ជីសម្លតុំយ៉ាំបង្គា និង Kebaya (គឺជាបេតិកភណ្ឌវប្បធម៌រួមគ្នារបស់ប្រទេស៥ រួមមាន ៖ ថៃ, ម៉ាឡេស៊ី, ព្រុយណេ, សិង្ហបុរី និងឥណ្ឌូណេស៊ី) ។ រីឯក្រមាវិញ ក្រសួងវប្បធម៌ថៃបានបញ្ជូនឯកសារសុំចុះឈ្មោះជាមួយអង្គការយូណេស្កូរួចហើយ កាលពីខែមីនា ឆ្នាំ២០២៣ ។

លោក Sermsak Phongpanich រដ្ឋមន្ត្រីក្រសួងវប្បធម៌បន្តថា សារៈសំខាន់របស់បេតិកភណ្ឌវប្បធម៌ថៃ គឺសម្លៀកបំពាក់ប្រពៃណីបានតំណាងឱ្យអត្តសញ្ញាណជាតិ ដែលថៃបានកែលម្អអស់រយៈពេលយូរមកហើយ ។ ប្រទេសថៃមានភស្តុតាងបញ្ជាក់ច្បាស់លាស់ ដោយសារជនជាតិថៃបានស្លៀកពាក់សម្លៀកបំពាក់ប្រពៃណី អស់ជាង១.៤០០ឆ្នាំ គឺចាប់តាំងពីសម័យថាវ៉ារ៉ាវៈឌី, អយុធ្យា រហូតដល់ដើមសម័យរតនៈកូស៊ីន ។ ហេតុនេះ ការស្លៀកពាក់ គឺជាភស្តុតាងដ៏សំខាន់សម្រាប់បញ្ជាក់ទៅកាន់ក្មេងជំនាន់ក្រោយឱ្យបានដឹង និងទទួលយកមរតកនេះ ។

លោករដ្ឋមន្ត្រីក្រសួងវប្បធម៌បន្ថែមថា ពលរដ្ឋថៃរស់នៅគ្រប់តំបន់បានស្លៀកពាក់ឈុតប្រពៃណីក្នុងពិធីសំខាន់ផ្សេងៗ ដូចជាពិធីផ្នែកសាសនា និងចូលរួមក្នុងពិធីសង្គមផងដែរ ។ សម្លៀកបំពាក់ប្រពៃណីទាំងនេះសុទ្ធតែកើតចេញពីស្នាដៃជនជាតិថៃទាំងអស់ ដូចជា ៖ ការតម្បាញ, ដេរប៉ាក់ និងការតុបតែងលម្អសម្លៀកបំពាក់ ។

លោករដ្ឋមន្ត្រីក្រសួងវប្បធម៌បន្ថែមថា ចំណែក Muay Thai គឺជាក្បាច់គុនរបស់ប្រទេសថៃ និងជាបេតិកភណ្ឌវប្បធម៌ ដែលបានបន្សល់ទុកពីបុព្វបុរសអស់រយៈពេលជាង៣០០ឆ្នាំ ។ រីឯភស្តុតាងវិញ បើតាមការកត់ត្រារបស់ Simon de la Loubère បញ្ជាក់ថា Muay Thai គឺជាក្បាច់គុនការពារខ្លួនដោយប្រើប្រាស់ដៃទទេ ហើយក្បាច់គុននេះមានដើមកំណើតមកពីចំណេះដឹងរបស់ជនជាតិថៃ ដែលបានតស៊ូជាមួយគ្រោះធម្មជាតិ, សត្វព្រៃ, មនុស្ស និងគ្រោះថ្នាក់ដោយសារសង្គ្រាម ។

ការហ្វឹកហាត់ក្បាច់គុន Muay Thai គឺបានហ្វឹកហាត់ចាប់ពីគ្រួសារ, សហគមន៍ រហូតដល់ស្ថាប័នព្រះមហាក្សត្រ ដើម្បីប្រើប្រាស់អវៈយវៈផ្សេងៗរបស់រាងកាយសម្រាប់ការពារខ្លួន ហើយគ្រូបង្ហាត់បានបង្ហាត់ដោយយកគំរូតាមសត្វ, ការសង្កេតធម្មជាតិ និងរឿងក្នុងអក្សរសិល្ប៍ថៃ ។ ក្រៅពីនេះ ក៏មានការបង្ហាញពីការដឹងគុណគ្រូបង្ហាត់ និងអ្នកមានគុណផងដែរ ដែលគេបានឃើញការរាំថ្វាយបង្គំគ្រូ មុនពេលឡើងប្រដាល់នៅលើសង្វៀន ។

បច្ចុប្បន្ន Muay Thai គឺជាកីឡាតំណាងឱ្យប្រទេសថៃ និងជាកីឡាអាជីព ហើយមានការបង្ហាត់បង្រៀន Muay Thai ដល់សិស្សនៅតាមស្ថាប័នអប់រំជាច្រើនកន្លែង ។ គេចាត់ទុកថា Muay Thai គឺជាសម្បត្តិវប្បធម៌របស់ជាតិ ដែលបានបន្តពីជំនាន់មួយទៅជំនាន់មួយទៀត រហូតដល់ពេលបច្ចុប្បន្ន ។ នេះបើតាមការលើកឡើងរបស់លោក Sermsak Phongpanich រដ្ឋមន្ត្រីក្រសួងវប្បធម៌ថៃ ៕