សហរដ្ឋអាមេរិក ៖ វាបានធ្វើឱ្យអ្នកដំណើរជិះយន្តហោះទាំងអស់ងឿងឆ្ងល់ និងស្រឡាំងកាំងគ្រប់ៗគ្នាថា ហេតុអ្វីបានជាស្ត្រីម្នាក់ធ្វើខុសគេខុសឯងបែបនេះ? ឬក៏ជាមនុស្សមានសតិមិនគ្រប់? កៅអីក្នុងយន្តហោះក៏មានឱ្យអង្គុយយ៉ាងស្រួល ប៉ុន្តែមិនអង្គុយទេ បែរជាធ្វើចឹង មិនដឹងនិយាយថាម៉េច ។ រីឯក្រុមហ៊ុនអាកាសចរណ៍និយាយថា នឹងស្វែងរកមូលហេតុពិតប្រាកដ ។

បើតាមវីដេអូមួយដែលត្រូវបានគេចែកចាយក្នុងបណ្តាញសង្គមអាមេរិកបង្ហាញថា ស្ត្រីអ្នកដំណើរម្នាក់បានឡើងទៅដេកលើកន្លែងដាក់សម្ភារៈផ្នែកខាងលើកៅអីអង្គុយ ហើយអ្នកលេងបណ្តាញសង្គមសួរថា តើអាចឡើងទៅកាន់ផ្នែកខាងលើដោយរបៀបណា? ហេតុអ្វីខាងបុគ្គលិកបម្រើការលើយន្តហោះមិនព្រមហាមឃាត់?

កាលពីថ្ងៃទី១១ ខែឧសភា ឆ្នាំ២០២៤ សារព័ត៌មានអាមេរិករាយការណ៍ថា ស្ត្រីអ្នកដំណើរម្នាក់ឈ្មោះ Monica Guzmann បានមើលឃើញភាពខុសប្រក្រតីក្នុងយន្តហោះរបស់ក្រុមហ៊ុនអាកាសចរណ៍ Southwest Airlines គឺនាងបានឃើញស្ត្រីម្នាក់កំពុងតែដេកលើកន្លែងដាក់សម្ភារៈផ្នែកខាងលើយ៉ាងសប្បាយចិត្ត និងពុំខ្វល់ពីក្រសែភ្នែកអ្នកដទៃ ។

អ្នកថតវីដេអូរៀបរាប់ថា នាងបានឃើញស្ត្រីម្នាក់ឡើងទៅដេកលើកន្លែងដាក់សម្ភារៈ ខណៈ Air Hostess កំពុងស្វាគមន៍អ្នកដំណើរផ្សេងទៀត ប៉ុន្តែមិនយូរប៉ុន្មាន ស្ត្រីនេះត្រូវបានគេប្រាប់ឱ្យចុះពីកន្លែងដាក់សម្ភារៈ ។ ទោះយ៉ាងណា គ្មានការបញ្ជាក់ថា ហេតុអ្វីបានជាស្ត្រីខាងលើឡើងទៅដេកនៅខាងលើបែបនេះ ហើយដេកបែបនេះយូរប៉ុនណាទេ?

ក្រុមហ៊ុនអាកាសចរណ៍ Southwest Airlines និយាយថា ហេតុការណ៍នេះបានកើតឡើងកាលពីថ្ងៃទី៦ ខែឧសភា ឆ្នាំ២០២៤ នៅលើយន្តហោះចាកចេញពីទីក្រុង Albuquerque រដ្ឋ New Mexico ទៅកាន់ទីក្រុង Phoenix រដ្ឋ Arizona ហើយក្រុមហ៊ុនអាកាសចរណ៍នឹងស្វែងរកមូលហេតុពិតប្រាកដបន្តទៀត ។

នេះមិនមែនជាហេតុការណ៍លើកដំបូងទេ កាលពីឆ្នាំ២០១៩ អ្នកដំណើររបស់ក្រុមហ៊ុនអាកាសចរណ៍ Southwest Airlines ដែលធ្វើដំណើរចាកចេញពីទីក្រុង Nashville រដ្ឋ Tennessee ទៅកាន់ទីក្រុង Philadelphia រដ្ឋ Pennsylvania សហរដ្ឋអាមេរិក ក៏បានភ្ញាក់ផ្អើលដែរ ដោយសារបុគ្គលិកបម្រើការលើយន្តហោះម្នាក់ចូលក្នុងធុងសំរាមពេលអ្នកដំណើរឡើងជិះយន្តហោះ ហើយ១០នាទីក្រោយមក ក៏លោតចុះមកវិញ និងធ្វើការធម្មតា ។ ក្រុមហ៊ុនអាកាសចរណ៍នេះប្រាប់ថា ទង្វើប្លែកៗ គឺជារឿងកំប្លែង និងចង់ឱ្យអ្នកដំណើររីករាយប៉ុណ្ណោះ ៕

បរទេស៖ ជឿថាប្រិយមិត្តមួយចំនួនប្រាកដជាបានស្គាល់នៅម៉ូដែលទូរស័ព្ទ Nokia 3210 ដែលធ្លាប់បានបង្ហាញខ្លួនកាលពី ២៥ ឆ្នាំមុនគឺជាម៉ូដែលទូរស័ព្ទដែលទទួលបានជោគជ័យបំផុតរបស់ក្រុមហ៊ុនហ្វាំងឡង់ជាមួយនឹងការលក់បាន ១៦០ លានគ្រឿង។ ទោះជាយ៉ាងណាទូរស័ព្ទនេះក៏បានបាត់ខ្លួនទៅវិញ បន្ទាប់ពីមានផលិតផលស្មាតហ្វូនទំនើបៗជាច្រើនផ្ទុះឡើង។
Nokia 3210 ត្រូវបានផលិតឡើងដំបូងនៅឆ្នាំ ១៩៩៩ ប៉ុន្តែដោយសារកំណើននៃផលិតផលថ្មីៗលេចឡើងនិងមានភាពលេចធ្លោរជាង Nokia 3210 ក៏បានបាត់ខ្លួន។ បន្ទាប់ពីបាត់មុខអស់រយៈពេល ២៥ ឆ្នាំកន្លងមក ម៉ូដែលចំណាស់នេះក៏បានលេចមុខសារជាថ្មីម្តងទៀតជាមួយបច្ចេកវិទ្យាដ៏ទំនើបនិងទាន់សម័យបំផុត ដែលក្រុមហ៊ុន HMD Global ទើបតែបានប្រកាសកាលពីពេលថ្មីៗនេះ។

យោងតាមក្រុមហ៊ុន Nokia 3210 ឆ្នាំ ២០២៤ គឺមានការរចនាស្ដើងជាងមុន ជាមួយនឹងប្រព័ន្ធគន្លឹះរុករកត្រូវបានជំនួសដោយប៊ូតុងជាច្រើន ដែលឧបករណ៍នេះក៏មានកាមេរ៉ាខាងក្រោយទំហំ ២ មេហ្គាភិចសែល និងប្រើប្រាស់រន្ធ USB-C ផងដែរ។ បើនិយាយពីការកំណត់រចនាសម្ព័ន្ធវិញ Nokia 3210 ថ្មីនេះក៏ត្រូវបានបំពាក់ដោយអេក្រង់ LCD ទំហំ 2.4 អ៊ីង ជាមួយនឹងកម្រិតភាពច្បាស់ QVGA ដំណើរការបន្ទះឈីប Unisoc T107, RAM 64 MB, អង្គចងចាំខាងក្នុង 128 MB ដែលអាចពង្រីកបានរហូតដល់ 32 GB តាមរយៈរន្ធដោតកាត microSD ។ ទូរស័ព្ទនេះគាំទ្រប៊្លូធូស 5.0 វិទ្យុ FM រន្ធដោតកាស 3.5 មីលីម៉ែត្រ និងថាមពលថ្ម 1,450 mAh ដែលអាចដកចេញបាន។ ទោះជាយ៉ាងណាសម្រាប់រូបរាងវិញគឺ Nokia 3210 ស្រដៀងគ្នានឹងកំណែមុន។

ផលិតផលនេះត្រូវបានចេញលក់ដំបូងដោយក្រុមហ៊ុន HMD Global នៅក្នុងទីផ្សារអឺរ៉ុបជាមួយតម្លៃ ៩០ ដុល្លារអាមេរិក។ បន្ទាប់មកកាលពីថ្ងៃទី ៨ ខែឧសភា កន្លងទៅ ផលិតផលនេះក៏បាននាំចូលមកទីផ្សារចិន ក្នុងតម្លៃ ៣៤៩ យន់ (ប្រហែល ៤៨ ដុល្លារអាមេរិក) ហើយកំពុងមានការចាប់អារម្មណ៍យ៉ាងខ្លាំង ដោយអ្នកប្រើប្រាស់ចិនជាច្រើនបានកំពុងស្វែងរកទិញ Nokia 3210 (2024)។ យោងតាម Drive China នៅលើគេហទំព័រ Weibo របស់ Nokia Mobile Phone ក្រុមហ៊ុនបានប្រកាសថាផលិតផលនេះ អស់ស្តុកហើយបន្ទាប់ពីចេញលក់បានពីរថ្ងៃ ដោយអ្នកប្រើប្រាស់ចិនមានការពេញចិត្តយ៉ាងខ្លាំងជាមួយនឹងភាពទាក់ទាញដ៏អស្ចារ្យបែបនេះ។

ក្រុមហ៊ុន HMD Global បាននិយាយថា ខ្លួននឹងបន្ថែមការផ្គត់ផ្គង់សម្រាប់ទីផ្សារនេះ ដើម្បីបំពេញតម្រូវការភ្លាមៗពីអ្នកប្រើប្រាស់ចិន ដូច្នេះអ្នកប្រើប្រាស់អាចបន្តទិញឧបករណ៍នេះបន្ទាប់ពីថ្ងៃទី ៣១ ឧសភា។ យោងតាម LaiTimes Nokia 3210 (2024) បានឆ្លុះបញ្ចាំងពីអារម្មណ៍នឹករលឹកចំពោះផលិតផលបុរាណ និងតម្រូវការសម្រាប់ឧបករណ៍ទំនាក់ទំនងតិចតួចបំផុតនៅក្នុងប្រទេសចិន។ គេហទំព័រនេះបានអត្ថាធិប្បាយថា “ទោះបីជាមានការអភិវឌ្ឍន៍យ៉ាងឆាប់រហ័សនៃផលិតផលបច្ចេកវិទ្យាឆ្លាតវៃក៏ដោយ ក៏ឧបករណ៍សាមញ្ញទាំងនេះ នៅតែជាតម្រូវការយ៉ាងពិសេសសម្រាប់អ្នកប្រើប្រាស់ចិន ព្រោះវាអាចប្រើបានយូរអង្វែងនិងនៅតែមានទីតាំងនៅក្នុងទីផ្សារចិន”៕

យោងតាមរបាយការណ៍ទីក្រុងដែលមានទ្រព្យសម្បត្តិច្រើនជាងគេបំផុតនៅលើពិភពលោកឆ្នាំ ២០២៤ ដោយអ្នកឯកទេសផ្នែកចំណាកស្រុកទ្រព្យសម្បត្តិអន្តរជាតិ Henley & Partners បានលើកឡើងថា បច្ចុប្បន្ននេះនៅក្នុងប្រទេសសិង្ហបុរី មានចំនួនមហាសេដ្ឋីរហូតដល់ទៅ ២៤៤,៨០០នាក់ឯណ្ណោះ។

ប្រជាជនសឹង្ហបុរីមានត្រឹមតែជាង ៦ លាននាក់ប៉ុណ្ណោះ។ នេះមានន័យថាមនុស្សប្រហែល ៤ នាក់ក្នុងចំណោម ១០០ នាក់ដែលរស់នៅក្នុងប្រទេសសិង្ហបុរីគឺជាមហាសេដ្ឋី – ដោយនេះគឺមិនគិតពីចំនួនកំពូលមហាសេដ្ឋី (អ្នកដែលមានទ្រព្យសម្បត្តិសុទ្ធយ៉ាងហោចណាស់ ១០០ លានដុល្លារ) នៅក្នុងប្រទេសនេះនោះទេ។

យោងតាមលោក Henley & Partners បានឱ្យដឹងថា “ទីក្រុងសិង្ហបុរីបានជាប់ចំណាត់ថ្នាក់លេខ ៤ នៅលើពិភពលោក បន្ទាប់ពីការកើនឡើងដ៏គួរឱ្យកត់សម្គាល់ប្រមាណ ៦៤ ភាគរយនៃចំនួនមហាសេដ្ឋី ត្រឹមរយៈពេល ១០ ឆ្នាំចុងក្រោយនេះ។

លោកបន្តទៀតថា “សិង្ហបុរីគឺជាគោលដៅកំពូលមួយលើពិភពលោកសម្រាប់ការធ្វើចំណាកស្រុករបស់មហាសេដ្ឋី។ ម៉្យាងវិញទៀត វាក៏ត្រូវបានចាត់ទុក ថាជាទីក្រុងដែលងាយស្រួលប្រកបអាជីវកម្មបំផុតនៅលើផែនដីនេះទៀតផង។ សេដ្ឋីប្រហែល ៣,៤០០ នាក់គឺបានផ្លាស់ប្តូរទៅរស់នៅទីក្រុងនេះកាលពីឆ្នាំ២០២៣ ដែលធ្វើឲ្យសិង្ហបុរីបច្ចុប្បន្ន ប្រមូលផ្តុំទៅដោយសេដ្ឋីស្នាក់នៅប្រមាណ ២៤៤,៨០០ នាក់, សេដ្ឋីប្រាក់រយលានមានប្រមាណ ៣៣៦នាក់, និងសេដ្ឋីប្រាក់ពាន់លានប្រមាណ ៣០នាក់។”

របាយការណ៍នេះបានចុះបញ្ជីទីក្រុងញូវយ៉ក សហរដ្ឋអាមេរិក គឺជាទីក្រុងជាប់លេខ១ ទូទាំងពិភពលោក ដែលមានមហាសេដ្ឋីច្រើនជាងគេបំផុតចំនួន ៣៤៩,៥០០នាក់, មហាសេដ្ឋីប្រាក់រយលាន ៧៤៤នាក់ ,និងមហាសេដ្ឋី ប្រាក់ពាន់លាន ៦០នាក់ ។

ចំណែកចំណាត់ថ្នាក់ទី ២ បានទៅ The Bay Area សាន់ហ្រ្វាន់ស៊ីស្កូ សហរដ្ឋអាមេរិក មានមហាសេដ្ឋីចំនួន ៣០៥,៧០០នាក់ ,មហាសេដ្ឋីប្រាក់រយលាន ៦៧៥នាក់ និងមហាសេដ្ឋីប្រាក់ពាន់លាន ៦៨ នាក់។ ទីក្រុងតូក្យូប្រទេសជប៉ុនជាប់ចំណាត់ថ្នាក់លេខ៣ មានមហាសេដ្ឋីរស់នៅ ២៩៨,៣០០នាក់ ,មហាសេដ្ឋីប្រាក់រយលាន២៦៧នាក់ និងមហាសេដ្ឋីប្រាក់ពាន់លាន១៤ នាក់) ផងដែរ៕

ប្រទេសអង់គ្លេស ៖ វាមិនចម្លែកទេ ដែលយន្តហោះមួយចំនួនប្រកាសពន្យារពេលការហោះហើរដោយសារអាកាសធាតុ និងមានបញ្ហាបច្ចេកទេស ។ ប៉ុន្តែករណីនេះខុសគេ និងធ្វើឱ្យមហាជនរិះគន់អាកាសយានិកម្នាក់យ៉ាងខ្លាំង ហើយសួរថា តើអាកាសយានិកអាចធ្វើបែបនេះបាន មែនទេ? ការហោះហើរត្រូវបានពន្យារពេលអស់ជាង១ម៉ោង ដោយសារអាកាសយានិកធ្វើបែបនេះ ។ វាធ្វើឱ្យប៉ះពាល់ដល់អ្នកដំណើរទាំងអស់ ហើយតើខាងក្រុមហ៊ុនអាកាសចរណ៍បានគិតពីអារម្មណ៍អ្នកដំណើរដែរឬទេ?

ហេតុការណ៍នេះបានកើតឡើងនៅប្រទេសអង់គ្លេស គឺដោយសារអាកាសយានិករូបនេះពុំព្រមចេញដំណើរតាមកាលវិភាគហោះហើរ ព្រោះរវល់ទៅតម្រង់ជួរទិញភីហ្សាឱ្យបុគ្គលិកបម្រើការក្នុងយន្តហោះ ។ អាកាសយានិកនិយាយថា មិនចង់ឱ្យបុគ្គលិកបរិភោគសានវេចត្រជាក់ ទើបខាងយន្តហោះប្រកាសពន្យារពេលធ្វើដំណើរ និងសុំឱ្យអ្នកដំណើរយោគយល់ ។

ក្រុមហ៊ុនអាកាសចរណ៍អង់គ្លេស EasyJet បានកំណត់ការហោះហើរចេញពីទីក្រុង Lisbon ប្រទេសព័រទុយហ្គាល់ ទៅកាន់ទីក្រុង Manchester ប្រទេសអង់គ្លេស ដោយត្រូវចំណាយពេលធ្វើដំណើរជិត៣ម៉ោង ។ ប៉ុន្តែយន្តហោះនេះបានពន្យារពេលធ្វើដំណើរអស់ជាង១ម៉ោង ដោយសារក្នុងយន្តហោះគ្មានអាហារក្តៅៗឱ្យបុគ្គលិកបរិភោគ ទើបអាកាសយានិកទៅតម្រង់ជួរទិញភីហ្សាយកមកឱ្យបុគ្គលិក ។

អ្នកដំណើរទាំងអស់បានរង់ចាំរហូតដល់អាកាសយានិកត្រឡប់មកពីហាងភីហ្សាវិញ ហើយអាកាសយានិកក៏បាននិយាយប្រាប់អ្នកដំណើរតាម Intercom ថា លោកសម្រេចចិត្តពន្យារពេលហោះហើរ ព្រោះត្រូវដោះស្រាយរឿងអាហារឱ្យបុគ្គលិក ។ ហេតុនេះ លោកចុះពីយន្តហោះ និងឆ្លងកាត់កន្លែងត្រួតពិនិត្យលិខិតឆ្លងដែនដើម្បីទិញភីហ្សា ។

អាកាសយានិកនិយាយថា ៖ «ខ្ញុំពុំអាចឱ្យបុគ្គលិកបម្រើការក្នុងយន្តហោះបរិភោគសានវេចត្រជាក់២ដុំបានទេ ហើយខ្ញុំបានសួរអ្នកដំណើរថា តើពួកគេអាចរង់ចាំបានអត់ ព្រោះខ្ញុំចង់ទិញភីហ្សាឱ្យបុគ្គលិក ដោយពុំចាំបាច់ឈរតម្រង់ជួរទិញតាមលេខរៀង ។ ប៉ុន្តែអ្នកដំណើរឆ្លើយថា អត់បានទេ ទើបខ្ញុំរត់ទៅតម្រង់ជួរទិញភីហ្សា ដែលមានអតិថិជនឈរមុខខ្ញុំចំនួន១០០នាក់ ។ ខ្ញុំសូមអរគុណ សម្រាប់ការអត់ធ្មត់របស់អ្នកដំណើរទាំងអស់» ។

អ្នកដំណើរខឹងយ៉ាងខ្លាំងចំពោះឥរិយាបថ និងការបកស្រាយគ្មានប្រយោជន៍របស់អាកាសយានិក ក្នុងនោះអ្នកដំណើរម្នាក់និយាយថា ៖ «យន្តហោះពន្យារពេលហោះហើរធ្វើឱ្យមានភាពរញ៉េរញ៉ៃនៅអាកាសយានដ្ឋាន Lisbon ហើយបញ្ហានឹងមិនបញ្ចប់ត្រឹមនេះទេ ។ អ្នកដំណើរបានអង្គុយរង់ចាំអស់ជាង១ម៉ោង ហើយសំខាន់ យើងពុំអាចប្រើប្រាស់បន្ទប់ទឹកលើយន្តហោះបាន ហើយគ្មានភេសជ្ជៈចែកឱ្យផឹកទេ» ។

ចំណែកអ្នកនាំពាក្យរបស់ក្រុមហ៊ុនអាកាសចរណ៍ EasyJet និយាយថា មានអារម្មណ៍សោកស្តាយយ៉ាងខ្លាំងចំពោះហេតុការណ៍នេះ ដែលបណ្តាលឱ្យប៉ះពាល់ដល់អ្នកដំណើរទាំងអស់ ដោយសារក្រុមហ៊ុនពុំបានត្រៀមអាហារគ្រប់គ្រាន់សម្រាប់បុគ្គលិក និងអាកាសយានិក ៕

ប្រទេសជប៉ុន ៖ សារព័ត៌មានបរទេសរាយការណ៍ថា នៅខែឧសភា ឆ្នាំ២០២៤ ផ្លូវថ្មី១ខ្សែនៅប្រទេសជប៉ុនបានក្លាយជាប្រធានបទមួយក្តៅគគុក ដោយសារមហាជនរិះគ.ន់ ថា ផ្លូវនេះពុំអាចឱ្យពលរដ្ឋធ្វើដំណើរឆ្លងកាត់បាន បើទោះជាធ្វើរួចរាល់ក្តី ។ គេពុំទាន់ដឹងថា តើអាជ្ញាធរជប៉ុនមានវិធានការដោះស្រាយបែបណាទេ ដើម្បីឱ្យផ្លូវនេះអាចបើកដំណើរការជាសាធារណៈ ។

ផ្លូវថ្មីនេះពុំអាចដំណើរការបាន ដោយសារនៅចំណុចមួយត្រង់ពាក់កណ្តាលផ្លូវមានម៉ុងខ្មោចប្រមាណ២០០ ហើយបញ្ហានេះធ្វើឱ្យមហាជនរិះគន់ថា អាជ្ញាធរពុំបានរៀបចំគម្រោងមុនពេលធ្វើផ្លូវ និងចាត់វិធានការដកហូតដីរបស់រដ្ឋាភិបាល ។

ប្រព័ន្ធផ្សព្វផ្សាយ Nippon TV រាយការណ៍ថា មូលហេតុដែលផ្លូវពុំអាចឱ្យពលរដ្ឋធ្វើដំណើរឆ្លងកាត់បាន ដោយសារគ្មានការរុះរើម៉ុងខ្មោចចេញពីផ្លូវ ។ ផ្លូវខាងលើមានប្រវែងប្រមាណ២គីឡូម៉ែត្រ ដែលតភ្ជាប់រវាងទីក្រុងតូក្យូ និងទីក្រុងសាយ៉ាម៉ា ហើយម៉ុងខ្មោចស្ថិតនៅកណ្តាលផ្លូវនេះជារបស់វត្ត Zengyo-in ដែលមានអាយុកាល៥០០ឆ្នាំ ។

ព្រះចៅអធិការវត្តនេះបានផ្តល់សម្ភាសន៍ជាមួយ Nippon TV អំពីមូលហេតុដែលគ្មានការរុះរើម៉ុងខ្មោចចេញពីផ្លូវថា ខាងវត្តយល់ព្រមឱ្យអាជ្ញាធររើម៉ុងខ្មោចចេញ ប៉ុន្តែបែរជាមានឧបសគ្គជាច្រើនទៀត ។ រដ្ឋាភិបាលបានសុំរើម៉ុងខ្មោចនៅត្រង់ចំណុចផ្លូវតែប៉ុណ្ណោះ មានន័យថា មានម៉ុងខ្មោចប្រមាណ៧០ នឹងពុំរើចេញ និងត្រូវកាត់ផ្តាច់ចេញពីបរិវេណវត្ត ។ ក្រៅពីនេះ រដ្ឋាភិបាលនឹងផ្តល់ប្រាក់សំណងសម្រាប់បរិវេណធ្វើផ្លូវប៉ុណ្ណោះ ហើយម៉ុងខ្មោចនៅសេសសល់នឹងពុំទទួលបានប្រាក់សំណងទេ ។

ពលរដ្ឋទទួលផលប៉ះពាល់ដោយសារការធ្វើផ្លូវប្រាប់ថា ការដកហូតដីចាប់ផ្តើមតាំងពី១៨ឆ្នាំមុន ហើយមានពលរដ្ឋជាង២០០គ្រួសារ ត្រូវផ្លាស់ទីលំនៅចេញពីទីនេះ ។ បុរសម្នាក់ត្រូវបានអាជ្ញាធរដកហូតដីកាលពី១៧ឆ្នាំមុន រៀបរាប់ថា លោកបានបោះបង់ផ្ទះដែលធ្លាប់រស់នៅ ហើយលោករីករាយណាស់ បើផ្លូវនេះដំណើរការដោយជោគជ័យដើម្បីជាប្រយោជន៍ដល់សាធារណជន ។ ប៉ុន្តែបែរជាមានបញ្ហាម៉ុងខ្មោច ហើយលោកសួរខ្លួនឯងថា តើលោកយល់ព្រមផ្លាស់ទីលំនៅដើម្បីអ្វី?

មហាជនបានស្នើឱ្យអាជ្ញាធររុះរើម៉ុងខ្មោចទាំងនេះទៅកន្លែងផ្សេង ប៉ុន្តែពុំមានកន្លែងណាមានផ្ទៃដីធំទូលាយសម្រាប់ធ្វើម៉ុងខ្មោចទេ ហើយមហាជនរិះគន់ថា រដ្ឋាភិបាលបរាជ័យក្នុងការចរចាជាមួយវត្ត ។ រីឯអាជ្ញាធរបញ្ជាក់ថា ជំហានដំបូង អាជ្ញាធរមានគម្រោងឱ្យពលរដ្ឋប្រើប្រាស់ផ្នែកខ្លះនៃផ្លូវនេះ ចំណែកការបើកឱ្យប្រើប្រាស់ផ្លូវទាំងមូល ពុំអាចធ្វើបាននាពេលឆាប់ៗទេ ៕