ថ្មីៗនេះ រីដេអូចែកចាយពីបណ្តាញសង្គម គឺបានបង្ហាញឲ្យឃើញថា ពិធីបុណ្យឆេងម៉េងទំនងជារបស់ខ្សែស្រឡាយកំពូលអភិជនចិន បានប្រារព្ធឡើងយ៉ាងគគ្រឹកគគ្រេង ហើយក៏បានក្លាយជាប្រធានបទគួរជាទីចាប់អារម្មណ៍ក្នុងចំណោមមហាជនគ្រប់ៗរូប។

ពិធីបុណ្យឆេងម៉េង ជារៀងរាល់ឆ្នាំត្រូវបានគេប្រារព្ធឡើងធំរយៈពេលមួយថ្ងៃ អាចត្រូវនឹងថ្ងៃទី ៤,៥,៦ ខែមេសា ឬពេលខ្លះអាចធ្វើឡើងមុនថ្ងៃទាំងនេះបន្តិចបន្តួច តាមទំនៀមទម្លាប់របស់គ្រួសារខ្សែស្រឡាយចិននីមួយៗ។ នៅអំឡុងថ្ងៃឆេងម៉េង គ្រួសារចិននឹងទៅលេងផ្នូររបស់បុព្វបុរសពួកគេ ដើម្បីធ្វើការសម្អាតផ្នូរនិងគោរពបូជាផ្សេងៗ។ ជាមួយគ្នានោះ ដើម្បីប្រារព្ធកិច្ចពិធី គេក៏ត្រូវមានដង្វាយជាម្ហូបអាហារ មាន់ស្ងោរ ជ្រូកខ្វៃ ផ្លែឈើ នំចំណីផ្សេងៗទៅតាមលទ្ធភាពរៀងៗខ្លួន អមជាមួយនឹងក្រដាសអុជសែនដូនតាក្នុងរូបរាងជាលុយ ផ្ទះ មាស ប្រាក់កែវកងជាដើម ដោយគេជឿថា ការដុតសម្ភារៈទាំងនេះ ដើម្បីធានាថាវិញ្ញាណរបស់អ្នកស្លាប់អាចចាប់ជាតិថ្មីជាមួយនឹងជីវិតដ៏ល្អប្រពៃនិងសប្បាយហូរហ៊ា។

យ៉ាងណាមិញ វីដេអូនៅក្នុងប្រព័ន្ធផ្សព្វផ្សាយ គឺបានបង្ហាញឲ្យឃើញថា គ្រួសារខ្សែស្រឡាយចិនព្រមទាំងជាកំពូលអភិជន (មិនបានបញ្ជាក់ទីតាំង) គឺបានប្រារព្ធបុណ្យឆេងម៉េងនេះយ៉ាងមហាឡារិកបំផុតស្ទើរតែមិនធ្លាប់មាននៅក្នុងប្រវត្តិសាស្រ្ត ដែលបានធ្វើឲ្យមនុស្សគ្រប់ៗគ្នាស្ញប់ស្ញែងមិនដាច់ពីមាត់។ ព្រោះថា ក្រៅតែពីមានការសែនព្រេននូវម្ហូបអាហារនំចំណីដ៏ច្រើនពោរពាសហើយ អ្វីដែលគួរជាទីចាប់អារម្មណ៍ខ្លាំងបំផុត គឺឃើញថាមានក្រដាសដុតសែនកុងម៉ាយ៉ាងច្រើនសន្ធឹកសន្ធាប់ ក្នុងរូបរាងជាសម្ភារៈស្ទើរតែគ្រប់មុខ និងស្ទើរតែបង្កើតបានជាភូមិមួយរួមមានទាំង រថក្រោះ សំពៅ ឡាន ម៉ូតូ ពូក កៅអី សាឡុង ម៉ាស៊ីនត្រជាក់ ផ្ទះ យន្តហោះជាដើម នៅក្នុងទំហំធំៗ ហើយបើសរុបរបស់របរទាំងអស់នេះវិញ ប្រហែលអាចមានរហូតដល់ទៅរាប់ពាន់គ្រឿងឯណ្ណោះ ដើម្បីដុតសែនថ្វាយបុព្វបុរសរបស់ពួកគេ។

គួរបញ្ជាក់ថា ពិធីបុណ្យឆេងម៉េង ឬភាសាចិន ហៅថា QingMing ដែលត្រូវបានគេស្គាល់ថាជាទិវាបញ្ចុះសព និងជាទិវាឧទ្ទិសកុសលដល់ដូនតា របស់ខ្សែស្រឡាយកាត់ចិន។ បុណ្យឆេងម៉េង គឺជាប្រពៃណីរបស់ប្រទេសចិន ហើយគេសង្កេតឃើញថា បានមានការប្រារព្ធពិធីនេះឡើងពីសំណាក់ជនជាតិចិនដីគោក ហុងកុង ម៉ាកាវ តៃវ៉ាន់ រួមទាំងប្រទេសអាស៊ីផ្សេងទៀត ដូចជា កម្ពុជា ថៃ ហ្វីលីពីន វៀតណាម ម៉ាឡេស៊ី សិង្ហបុរី ឥណ្ឌូណេស៊ីជាដើម៕

បរទេស៖ កាលពីពេលថ្មីៗនេះ បើយោងតាម Techinasia ដែលបានរាយការណ៍នៅថ្ងៃទី១ ខែមេសា ឆ្នាំ២០២៤ ថានាយកប្រតិបត្តិក្រុមហ៊ុន Apple លោក Tim Cook គ្រោងនឹងសាងសង់រោងចក្រនៅក្នុងប្រទេសឥណ្ឌូនេស៊ី ដែលនេះជាលើកដំបូងហើយ ដែលក្រុមហ៊ុន Apple មានគម្រោងចង់សាងសង់រោងចក្រនៅអាស៊ីអាគ្នេយ៍។
លោក Tim Cook បាននិយាយថា គាត់គ្រោងនឹងទៅទស្សនកិច្ចក្នុងប្រទេសឥណ្ឌូនេស៊ីនៅថ្ងៃទី ២០ ខែមេសាខាងមុខនេះ ក្នុងគោលបំណងពាក់ព័ន្ធនឹងផែនការវិនិយោគរបស់ក្រុមហ៊ុន Apple នៅក្នុងប្រទេសឥណ្ឌូនេស៊ី រួមទាំងលទ្ធភាពដែលក្រុមហ៊ុននឹងសាងសង់រោងចក្រថ្មីដំបូងនៅក្នុងប្រទេសនេះ ទោះជាយ៉ាងណាក៏ដោយ ផែនការទាំងនេះនៅតែមិនទាន់ប្រាកដប្រជានៅឡើយទេ។

ក្នុងឆ្នាំ ២០១៧ Apple បានបណ្តាក់ទុនចំនួន ៤៤ លានដុល្លារនៅឥណ្ឌូនេស៊ី នៅពេលនោះ ការវិនិយោគនេះត្រូវបានធ្វើឡើងតាមរយៈការសាងសង់សាលា Apple Academy ដែលមានទីតាំងនៅ BSD City ក្នុងខេត្ត Banten ។ យោងតាមទិន្នន័យ StatCounter គិតត្រឹមខែកុម្ភៈ ឆ្នាំ ២០២៤ ចំណែកទីផ្សារ iOS នៅក្នុងប្រទេសឥណ្ឌូនេស៊ីបានឈានដល់ ១០% ដែលចំនួននេះនៅតែទាបជាងចំណែកទីផ្សារ Android របស់ Google ច្រើន។ បើយោងតាមរបាយការណ៍ពី IDC ការលក់ស្មាតហ្វូននៅក្នុងប្រទេសឥណ្ឌូនេស៊ីកាលពីឆ្នាំមុនក៏ត្រូវបានគ្រប់គ្រងដោយក្រុមហ៊ុនផ្សេងទៀតដូចជា Samsung, Oppo និង Vivo ផងដែរ។

ទោះជាយ៉ាងណាក៏ដោយ IDC ក៏បានកត់សម្គាល់ផងដែរថា ការលក់ស្មាតហ្វូនតម្លៃខ្ពស់ ដែលគ្រប់គ្រងជាចម្បងដោយ Apple និង Samsung គឺជាក្រុមហ៊ុនតែមួយគត់ដែលកើនឡើងកាលពីឆ្នាំមុន ដោយសម្រេចបាននូវការកើនឡើង ៧៨% ពីមួយឆ្នាំទៅមួយឆ្នាំ។ កាលពីដើមខែនេះ Apple ក៏បានសម្រេចចិត្តបើកមជ្ឈមណ្ឌលអភិវឌ្ឍន៍ដំបូងរបស់ខ្លួនសម្រាប់តំបន់ក្នុងប្រទេសសិង្ហបុរី ដោយផ្តល់នូវការចូលប្រើប្រាស់កាន់តែប្រសើរឡើងទៅកាន់អ្នកជំនាញ សេវាកម្មគាំទ្រ បច្ចេកវិទ្យា និងធនធានចុងក្រោយបំផុតពី Apple ។

មជ្ឈមណ្ឌលនេះមានទីតាំងនៅអគារមួយនៅលើផ្លូវ Fusionopolis Walk ភាគខាងជើងនៃប្រទេសសិង្ហបុរី។ នេះជាកន្លែងមួយក្នុងចំណោមគ្រឿងបរិក្ខារសាកលទាំងបួនរបស់ Apple រួមជាមួយ Cupertino រដ្ឋ California (សហរដ្ឋអាមេរិក) Bengaluru (ឥណ្ឌា) និង Shanghai (ចិន)។ Susan Prescott អនុប្រធានផ្នែកទំនាក់ទំនងអ្នកអភិវឌ្ឍន៍ទូទាំងពិភពលោករបស់ក្រុមហ៊ុន Apple បាននិយាយថា មជ្ឈមណ្ឌលនេះនឹងក្លាយជាធនធានដ៏អស្ចារ្យសម្រាប់អ្នកអភិវឌ្ឍន៍មកពីប្រទេសសិង្ហបុរី និងប្រទេសជិតខាង៕

តើបាក់តេរី ស៊ីសា.ច់ មនុស្ស ឬជំងឺស្អុយសាច់ គឺជាអ្វី? តើវាអាច ស៊ីសា.ច់ របស់មនុស្សបានពិតមែនទេ? បើតាមការស្រាវជ្រាវរបស់គ្រូពេទ្យជប៉ុនឱ្យដឹងថា បើជំងឺប្រភេទនេះកើតឡើងចំពោះអ្នកណាម្នាក់ គឺអ្នកនោះនឹងប្រឈមជាមួយការ ស្លា.ប់ រហូតដល់៣០% ។

នៅខែមីនា ឆ្នាំ២០២៤ សារព័ត៌មានបរទេសជាច្រើនបានចុះផ្សាយអំពីជំងឺឆ្លងរាតត្បាតមួយប្រភេទឈ្មោះ «ជំងឺបាក់តេរីស៊ីសាច់មនុស្ស» ហើយបច្ចុប្បន្ន ជំងឺនេះបានឆ្លងរាតត្បាតខ្លាំងនៅប្រទេសជប៉ុន ។ អ្វីគួរឱ្យភ័យខ្លាចបំផុតនោះ គឺជំងឺបាក់តេរីស៊ីសាច់មនុស្ស ឬជំងឺស្អុយសាច់ បានស៊ីស្បែកមនុស្សគ្រប់ស្រទាប់ទាំងអស់ តាំងពីស្រទាប់ស្បែកខាងលើ រហូតដល់ស្រទាប់ស្បែកខាងក្រោម ។

ហេតុនេះ នៅត្រង់ចំណុចឆ្លងជំងឺនេះនឹងមានសភាពរលួយស្បែក ហើយវានឹងឆ្លងរាលដាលទៅផ្នែកផ្សេងទៀតរបស់រាងកាយ ។ ប្រសិនបើបុគ្គលណាមានសុខភាពល្អ និងមានប្រព័ន្ធការពាររាងកាយល្អ គឺពួកគេពុំប្រឈមនឹងជំងឺនេះទេ ព្រោះជំងឺនេះមិនឆ្លងទៅអ្នកមានសុខភាពល្អ ឬមិនឆ្លងទៅស្ត្រីទេ ហើយភាគច្រើន គេបានឃើញបុរសកើតជំងឺនេះច្រើនជាងស្ត្រី ។

ជាទូទៅ អ្នកមានជំងឺទឹកនោមផ្អែម, ជំងឺមហារីក ឬអ្នកមានរាងកាយធាត់ នឹងប្រឈមជាមួយការឆ្លងជំងឺបាក់តេរីស៊ីសាច់មនុស្សច្រើនជាងគេ ។ ក្រៅពីនេះ អ្នកមានដំបៅនៅលើដងខ្លួន ដូចជា ៖ ដំបៅដោយសារស្នាមវះកាត់ ឬដំបៅដោយសារមុតកាំបិត ក៏ប្រឈមនឹងការកើតជំងឺបាក់តេរីស៊ីសាច់មនុស្សដូចគ្នាដែរ ។

នៅពេលបុគ្គលណាម្នាក់ឆ្លងជំងឺនេះ តើពួកគេមានអាការៈដូចម្តេចខ្លះ?
ពេលឆ្លងដំណាក់កាលដំបូង យើងស្ទើរតែពុំដឹងខ្លួនទេ ពីព្រោះអាការៈរបស់វាពុំសូវច្បាស់លាស់ ហើយបរិវេណស្បែកដែលឆ្លងជំងឺនេះ អាចមើលទៅខុសធម្មតាតែបន្តិចបន្តួចប៉ុណ្ណោះ ។ ប៉ុន្តែនៅពេលអ្នកជំងឺកម្រើកដៃ-ជើងនៅបរិវេណឆ្លងជំងឺ គឺអ្នកជំងឺអាចមានអារម្មណ៍ថា កម្រើកដៃ-ជើងពុំសូវរួច ។

នៅពេលជំងឺនេះចាប់ផ្តើមឆ្លងកាន់តែខ្លាំង វាធ្វើឱ្យអ្នកជំងឺឈឺចាប់ខ្លាំង ហើយនៅត្រង់ស្បែកដែលឆ្លងជំងឺ នឹងមានសភាពហើម និងក្តៅ ។ ហេតុនេះ ការឈឺចាប់នឹងកាន់តែធ្ងន់ទៅៗ ។ រីឯអ្នកជំងឺខ្លះទៀតមានដំបៅតូចៗនៅលើជើង ប៉ុន្តែជើងទាំងមូលបែរជាឈឺចាប់ខ្លាំង ហើយបើជំងឺនេះកាន់តែធ្ងន់ធ្ងរ គឺពេលដំបូង ដំបៅមានពណ៌ក្រហម វានឹងប្រែទៅជាពណ៌ស្វាយ និងមានចំណុចខ្មៅ ។

បើដំបៅប្រែពណ៌បែបនេះ បានន័យថា សាច់របស់អ្នកជំងឺចាប់ផ្តើមស្អុយរលួយ ពេលនោះ សរសៃដែលចិញ្ចឹមស្បែកនៅក្បែរដំបៅ ក៏ត្រូវបំផ្លាញផងដែរ ។ បើជំងឺនេះកើតនៅលើដៃ ឬជើង វាធ្វើឱ្យអ្នកជំងឺមានអារម្មណ៍ថា មិនស្គាល់ដៃ-ជើងរបស់ខ្លួន ។ អ្វីគួរឱ្យខ្លាចបំផុត គឺអ្នកជំងឺខ្លះអាចឆ្លងជំងឺនេះក្នុងឈាមទៀតផង ហើយនៅទីបំផុត អ្នកជំងឺនឹងបាត់បង់ជីវិតតែម្តង ។

នៅឆ្នាំ២០២៤ នៅទីក្រុងតូក្យូ ប្រទេសជប៉ុន មានអ្នកឆ្លងជំងឺបាក់តេរីស៊ីសាច់មនុស្សកើនឡើងខ្លាំង និងខ្ពស់ជាងឆ្នាំ២០២៣ រហូតដល់ទៅ៣ដងឯណោះ ។ ហេតុនេះ ប្រសិនបើយើងមានគម្រោងទៅប្រទេសជប៉ុននៅឆ្នាំនេះ គឺត្រូវប្រុងប្រយ័ត្នខ្លួនកុំឱ្យកើតគ្រោះថ្នាក់ ឬមានស្នាមដំបៅនៅលើស្បែក ។ ករណីមានស្នាមដំបៅនៅលើស្បែក គឺត្រូវលាងសម្អាតដំបៅឱ្យបានល្អ និងប្រើប្រាស់ថ្នាំសម្លាប់មេរោគ ។

ចំណុចសំខាន់ គួរតែពិនិត្យសុខភាពផងដែរ ដូចជា ៖ បើក្តៅខ្លួន ឬមានអាការៈហើម និងក្តៅនៅត្រង់ដំបៅ ត្រូវតែប្រញាប់ទៅជួបគ្រូពេទ្យជាបន្ទាន់ ដើម្បីព្យាបាលឱ្យបានទាន់ពេលវេលា ៕

បរទេស៖ Santa Cruz del Islote គឺជាកោះដែលតូចចង្អៀតជាងគេបំផុតនៅលើពិភពលោក ជាមួយផ្ទៃដីត្រឹមតែ ៩,៧០០ ម៉ែត្រការ៉េប៉ុណ្ណោះ ដោយមានប្រជាជនរស់នៅជាង ៨០០ នាក់ ក្លាយជាកោះតូចតែមានប្រជាជនរស់នៅច្រើនជាងគបំផុតលើលោក។
យោងតាមផលិតករភាពយន្ត Ruhi Cenet ដែលបានទៅលេងកោះនេះកាលពីដើមខែមីនា បានឱ្យដឹងថា ទីក្រុង Santa Cruz del Islote គឺជាកន្លែងដែលមានផ្ទះនៅជាប់ៗគ្នាបំផុត មិនមានប្រព័ន្ធលូ ហើយគ្រួសារជាច្រើនដែលមានសមាជិក ១០ នាក់តែងដេករួមគ្នាក្នុងបន្ទប់តែមួយ ដោយទំហំផ្ទះនីមួយៗមានត្រឹមតែ ១២ ម៉ែត្រការ៉េប៉ុណ្ណោះ។ លោក Ruhi បានបន្តទៀតថា នៅពេលដើរលេងជុំវិញកោះ គាត់បានឃើញមនុស្សយ៉ាងច្រើនកុះករចេញពីគ្រប់ជ្រុងទាំងអស់ មានអារម្មណ៍ហាក់ដូចជាទីក្រុងនេះស្ទះរាល់ថ្ងៃ និងមានសំឡេងអូអរខ្លាំង។

នៅជុំវិញកោះមានផ្លូវចំនួន ៤ ប៉ុណ្ណោះដែលសាងសង់ពីបេតុង ហើយនៅលើកោះនេះមិនមានរថយន្ត ឬម៉ូតូទេ ព្រោះមានមនុស្សកកកុញពេក។ អ្នកស្រុកនិយាយថា ចំនួនប្រជាជននៅតែបន្តកើនឡើង ដោយសារតែស្ត្រីភាគច្រើនផ្តល់កំណើតកូនដំបូងនៅអាយុ ១៦ ឆ្នាំ ហើយជាទូទៅគ្រួសារជាច្រើនមានកូន ៥ នាក់ឡើង។ ទាក់ទងនឹងលំនៅឋាន ប្រជាជននៅលើកោះតែងតែសាងសង់ផ្ទះ ដោយបន្ថែមជាន់ទៅអគារដែលមានស្រាប់ ដោយសារពួកគេមិនមានដីគ្រប់គ្រាន់ដើម្បីពង្រីកទំហំ។ ដូច្នេះអគារគឺមានការជាប់គ្នាខ្លាំងណាស់ ដែលមនុស្សត្រូវដើរកាត់ផ្ទះគ្នាទៅវិញទៅមកពីផ្ទះមួយទៅផ្ទះមួយ។ ដើម្បីពណ៌នាថាតើកោះនេះតូចប៉ុនណា លោក Ruhi បាននិយាយថា ការដើរពីចុងម្ខាងនៃកោះមួយទៅម្ខាងទៀត គាត់ចំណាយពេលត្រឹមតែពីរនាទីប៉ុណ្ណោះដើម្បីបញ្ចប់។

ទោះបីជាកោះនេះតូចខ្លាំងប៉ុណ្ណាក៏ដោយ ក៏ Santa Cruz del Islote មានបរិក្ខារជាច្រើនរួមមាន សាលារៀន ព្រះវិហារ គ្លីនិក សណ្ឋាគារ ហាងស្រាតូចៗ និងទីផ្សារចំនួនបីសម្រាប់បម្រើអ្នកស្រុក និងអ្នកទេសចរ។ ទោះជាយ៉ាងណា កន្លែងនេះមិនមានទីបញ្ចុះសពនៅលើកោះទេ នៅពេលមនុស្សស្លាប់ គេនឹងដឹកសពទៅបញ្ចុះនៅដីគោក ។ កោះនេះក៏គ្មានកន្លែងសម្រាប់ដាំដំណាំដែរ ដូច្នេះការផ្គត់ផ្គង់ភាគច្រើន រួមទាំងទឹកផឹក ត្រូវបានផ្តល់ដោយកងទ័ពជើងទឹកកូឡុំប៊ីរៀងរាល់ពីរបីសប្តាហ៍ម្តង។ ប្រជាជននៅលើកោះក៏ព្យាយាមប្រមូលទឹកភ្លៀងដែរ ប៉ុន្តែនៅទីនេះមានភ្លៀងរៀងរាល់ ៧-៨ ខែម្តងប៉ុណ្ណោះ។ ផ្ទះជាច្រើនត្រូវបានបំពាក់ដោយបន្ទះស្រូបពន្លឺព្រះអាទិត្យ និងប្រព័ន្ធម៉ាស៊ីនភ្លើង។ ប៉ុន្តែប្រជាពលរដ្ឋនិយាយថា ចរន្តអគ្គិសនីមិនស្ថិតស្ថេរ ច្រើនតែបាត់អស់ជាច្រើនខែក្នុងមួយឆ្នាំ។

ដោយសារតែកោះនេះតូចណាស់ ហើយគ្រប់គ្នាស្គាល់គ្នា មិនមានឧក្រិដ្ឋកម្ម ឬចោរកម្មទេ ហើយក៏គ្មានប៉ូលីសដែរ។ កោះនេះស្ថិតនៅលើថ្មប៉ប្រះទឹកផ្កាថ្មធំជាងគេទីពីរនៅលើពិភពលោក ដែលជាកន្លែងអ្នកទេសចរមកទស្សនាច្រើនបំផុត ប្រជាជនកោះនេះភាគច្រើនរកប្រាក់បានពីភ្ញៀវទេសចរណ៍ ដែលជាជម្រើសប្រកបដោយនិរន្តរភាព។ ភ្ញៀវទេសចរត្រូវបានទាក់ទាញមិនត្រឹមតែដោយសារតែវាមានដង់ស៊ីតេប្រជាជនខ្ពស់បំផុតប៉ុណ្ណោះទេ ប៉ុន្តែក៏ដោយសារតែជីវិតដ៏រស់រវើករបស់ប្រជាជន និងទឹកស្អាតជុំវិញផងដែរ។ អ្នកស្រុកបានសម្របខ្លួនយ៉ាងឆាប់រហ័សចំពោះអ្នកមកលេងញឹកញាប់ ដោយផ្តល់កន្លែងស្នាក់នៅ ការណែនាំដំណើរកម្សាន្ត និងលក់សិប្បកម្មជាវត្ថុអនុស្សាវរីយ៍៕

យោងតាមប្រភពសារព័ត៌មាន The Straits Times បានឲ្យដឹងថា កាលពីថ្ងៃទី ៣០ ខែមីនានេះ បានកើតមាននូវហេតុកាណ៍បាក់ដីនៅលើកំណាត់ផ្លូវហាយវេដ៏មមាលញឹកមួយ ក្នុងកាលីហ្វ័រញ៉ា សហរដ្ឋអាមេរិក និងបណ្តាលឲ្យអ្នកបើកបររថយន្តប្រមាណនឹង ២,០០០នាក់ ត្រូវបានជាប់គាំងទៅណាមិនរួចពេញមួយយប់។

មួយផ្នែកនៃផ្លូវហាយវេ 1 មួយខ្សែស្ថិតនៅតំបន់ Big Sur រដ្ឋកាលីហ្វ័រញ៉ា សហរដ្ឋអាមេរិក ត្រូវបាក់ បើតាមប្រភពប្រព័ន្ធផ្សព្វផ្សាយបានឲ្យដឹងថា នេះទំនងជាមកពីខ្យល់ព្យុះបោកបក់ខ្លាំង ទើបបណ្តាលឲ្យចំណុចកើតហេតុខាងលើត្រូវខូចខាតជាទម្ងន់បណ្តាលអ្នកដំណើររាប់ពាន់នាក់កក់ស្ទះទៅមុខមិនរួច ថយក្រោយក៏ពុំរួចបែបនេះ។

យោងតាមប្រភពដដែលបានឲ្យដឹងថា ភាគច្រើននៃអ្នកដែលជាប់គាំងគឺជាអ្នកទេសចរដែលកំពុងធ្វើដំណើរឆ្លងកាត់តំបន់នោះក្នុងឱកាសបុណ្យអ៊ីស្ទើរ ហើយដោយសារតែហេតុការណ៍នេះ ទើបពួកគេត្រូវស្នាក់នៅលើរថយន្តជាបណ្តោះអាសន្នពេញមួយយប់ ខណៈអ្នកខ្លះទៀតក៏បានបោះតង់សម្រាកនៅក្បែរៗនោះ។ ទោះជាយ៉ាងណា តាមរយៈហេតុការណ៍គឺមិនមានអ្នកស្លាប់ឬអ្នករងរបួសនោះទេ។

គួរបញ្ជាក់ថា បើយោងតាមឧតុនិយមសហរដ្ឋអាមេរិកបានឲ្យដឹងថា ប្រព័ន្ធខ្យល់ព្យុះដ៏ខ្លាំងក្លាដែលនឹងមានឥទ្ធិពល ជាពិសេសគឺនឹងកាត់ឆ្នេរសមុទ្រប៉ាស៊ីហ្វិកភាគនិរតីកាលពីចុងខែមីនានេះ ជាហេតុបណ្តាលឲ្យមានភ្លៀង ទឹកជំនន់ភ្លាមៗ និងព្រិលដល់ផ្នែកខ្លះនៃរដ្ឋកាលីហ្វ័រញ៉ា និងកន្លែងផ្សេងទៀតផងដែរ៕