តាមជំនឿរបស់ចាស់ៗបុរាណ នៅពេលថ្ងៃដែលកើត«សូរ្យគ្រាសឬចន្ទគ្រាស» គឺគេហាមមិនស្រ្តីដែលមានផ្ទៃពោះចេញទៅមើលទេ ព្រោះថាអាចបណ្តាលឲ្យកូនកើត«គ្រាសកន្លង»។

បើយោងតាមវចនានុក្រមរបស់សម្តេចព្រះសង្ឃរាជជួនណាត «មនុស្សគ្រាសកន្លង»មានន័យថា ជាមនុស្សដែលល្មេញល្មើពីកំណើត តាំងពីនៅក្នុងផ្ទៃម្តាយ ជួនពេលដែលសូរ្យគ្រាសឬចន្ទគ្រាសកើតឡើង។

ទាក់ទងទៅនឹងជំនឿ ដែលហាមមិនឲ្យស្រ្តីមានផ្ទៃពោះចេញទៅមើលសូរ្យគ្រាសដោយផ្ទាល់នេះដែរ បើយោងតាមផេក «Hello គ្រូពេទ្យ» បានពន្យល់ថា ទាំងនេះគ្រាន់តែជាការជឿតៗគ្នា និងជាការបោកបញ្ឆោតរបស់ចាស់ៗកាលពីជំនាន់មុនប៉ុណ្ណោះ ព្រោះមិនចង់ឲ្យស្រ្តីមានផ្ទៃពោះនៅទ្រាំចាំមើលបាតុភូតទាំងនោះ រយៈពេលយូរម៉ោង ឬដល់យប់ជ្រៅពេកជាដើម។

ប្រភពដដែលក៏បានបន្ថែមទៀតថា ស្ត្រីមានផ្ទៃពោះរមែងមានសុខភាពខ្សោយស្រាប់ កាលណាដែលអត់ងងុយ ឬប្រឹងមើលសូរ្យគ្រាសដោយភ្នែកទទេ ពុំមានពាក់អ្វីការពារ អាចធ្វើឲ្យធេងធោង វិលមុខ ទៅជាឈឺឬដួល នេះហើយជាអ្វីដែលចាស់ៗបារម្ភ។ ចំណែកឯ«គ្រាសកន្លង»នេះវិញ ចាស់ពីដើមប្រហែលចង់សំដៅលើជំងឺបម្រុងក្រឡាភ្លើង ឬក្រឡាភ្លើងលើស្ត្រីមានផ្ទៃពោះ ដែលធ្វើឲ្យឡើងឈាម ទៅជាប្រកាច់។

តែតាមក្បូនពេទ្យ ជំងឺបម្រុងក្រឡាភ្លើង បណ្តាលមកលើសសម្ពាធឈាម និងរោគសញ្ញាផ្សេងទៀតដោយសារខូចខាតសរីរាង្គផ្សេងៗ ដូចជា តម្រងនោម ជាដើម។ ស្រីៗមានផ្ទៃពោះ និងមានសម្ពាធឈាមធម្មតា ក៏អាចមានជំងឺនេះបានដែល ភាគច្រើនកើតនៅសប្តាហ៍ទី ២០ នៃការពពោះ និងអាចកើតលើស្រីៗមានសម្ពាធឈាមលើសតិចតួច ប៉ុន្តែមិនបានព្យាបាលត្រឹមត្រូវ។ ជំងឺបម្រុងក្រឡាភ្លើង អាចបង្កផលវិបាកធ្ងន់ធ្ងរប៉ះពាល់ដល់ជីវិតទាំងម៉ាក់ៗ និងគភ៌។

ទោះជាយ៉ាងណា ទាក់ទងនឹងស្ត្រីមានផ្ទៃពោះនិងបាតុភូត«គ្រាស»នេះ គ្រាន់តែជាជំនឿដែលនិយមជឿតៗគ្នាមក ហើយសូម្បីតែនៅប្រទេសឥណ្ឌាក៏គេជឿបែបនេះតាំងពីយូរណាស់មកហើយ។ ដូច្នេះហើយនៅកម្ពុជាយើង កាលពីអតីតកាលក៏បានទទួលយកវប្បធម៌អរិយធម៌ពីឥណ្ឌា ទើបជំនឿមួយនេះបានចងចាំនៅក្នុងដួងចិត្តរបស់ប្រជាជនខ្មែរស្ទើរគ្រប់ៗរូប។

ជាមួយគ្នានេះ សម្រាប់សូរ្យគ្រាសឆ្នាំ២០២៤ ដែលត្រូវនឹងថ្ងៃទី ៨ ខែមេសានេះ នៅក្នុងប្រទេសកម្ពុជា ក៏ដូចជាប្រទេសអាស៊ីផ្សេងទៀត មិនអាចមើលឃើញបាតុភូតសូរ្យគ្រាសនេះទេ។ ដូច្នេះហើយកាលដែលបារម្ភថា ស្រ្តីមានផ្ទៃពោះមិនអាចចេញក្រៅនៅក្នុងថ្ងៃនេះ ឬត្រូវតែសង្ងំនៅតែក្នុងផ្ទះរហូតដល់ផុតថ្ងៃសូរ្យគ្រាស គឺគ្រាន់តែជារឿងយល់ច្រឡំប៉ុណ្ណោះ៕

ប្រទេសវៀតណាម ៖ យោងតាមទិន្នន័យរបស់នាយកដ្ឋានគយបង្ហាញថា កាលពីខែកុម្ភៈ ឆ្នាំ២០២៤ កន្លងមក វៀតណាមនៅតែជាប់ចំណាត់ថ្នាក់ទី២ គឺជាប្រទេសនាំចេញស្បែកជើងច្រើនជាងគេលើពិភពលោក បន្ទាប់ពីប្រទេសចិន ដោយតម្លៃការជួញដូរស្មើនឹង១.១៧០លានដុល្លារអាមេរិក ។ នេះបើតាមការចេញផ្សាយរបស់សារព័ត៌មានបរទេសឈ្មោះ AEC Connect កាលពីថ្ងៃទី៦ ខែមេសា ឆ្នាំ២០២៤ ។

ផលិតផលស្បែកជើងរបស់ប្រទេសវៀតណាមបាននាំចេញទៅកាន់ប្រទេសស្មើជាង១៥០ នៅទូទាំងពិភពលោក ក្នុងនោះការនាំចេញស្បែកជើងវៀតណាម ស្មើនឹង១០% នៃផលិតផលស្បែកជើងនៅលើទីផ្សារពិភពលោក ។ ប៉ុន្តែការនាំចេញស្បែកជើងរបស់វៀតណាមនៅខែកុម្ភៈ បានធ្លាក់ចុះ៤០,៣% បើធៀបនឹងខែមករា ឆ្នាំ២០២៤ ។ ហេតុនេះ ក្នុងរយៈពេល២ខែដំបូងនៃឆ្នាំ២០២៤ ការនាំចេញស្បែកជើងរបស់វៀតណាម មានតម្លៃសរុបស្មើនឹង៣.១០០លានដុល្លារអាមេរិក ។

ចំណែកទីផ្សារសំខាន់ៗ រួមទាំងសហរដ្ឋអាមេរិក, សហភាពអឺរ៉ុប និងប្រទេសអង់គ្លេស ដែលការនាំចេញស្បែកជើង មានអត្រាកំណើនខ្លាំងស្មើរហូតដល់ជាង១០% ជាពិសេស សហរដ្ឋអាមេរិក ដែលមានតម្លៃជួញដូរស្មើរហូតដល់១.១០០លានដុល្លារអាមេរិក កើនឡើង២៥% បើធៀបពីមួយឆ្នាំទៅមួយឆ្នាំ ឬស្មើនឹង១ ក្នុងចំណោម៣ នៃការនាំចេញស្បែកជើងសរុបរបស់ប្រទេសវៀតណាម ។

រីឯចិន គឺជាប្រទេសនាំចូលស្បែកជើងពីវៀតណាម ស្ថិតក្នុងលំដាប់ទី២ ស្មើទឹកប្រាក់ជាង៣១៨លានដុល្លារអាមេរិក កើនឡើង១១,៤% បើធៀបពីមួយឆ្នាំទៅមួយឆ្នាំ ។ បន្ទាប់មក គឺប្រទេសបែលហ្ស៊ិក បាននាំចូលស្បែកជើងវៀតណាម ស្មើទឹកប្រាក់១៩១លានដុល្លារអាមេរិក កើនឡើង១០% បើប្រៀបធៀបប្រចាំឆ្នាំ ។

យោងតាមយុទ្ធសាស្ត្រអភិវឌ្ឍន៍ឧស្សាហកម្មវាយនភ័ណ្ឌ, ស្បែក និងស្បែកជើងរបស់វៀតណាម នៅឆ្នាំ២០៣០ ព្រមទាំងចក្ខុវិស័យឆ្នាំ២០៣៥ បញ្ជាក់ថា ប្រទេសវៀតណាមបានប្តេជ្ញាចិត្តថា នឹងនាំចេញស្បែកជើងទៅក្រៅប្រទេស ឱ្យស្មើទឹកប្រាក់ចាប់ពី២ម៉ឺន៧ពាន់លានដុល្លារអាមេរិក រហូតដល់២ម៉ឺន៨ពាន់លានដុល្លារអាមេរិក នៅឆ្នាំ២០២៥ ។

លើសពីនេះ នៅឆ្នាំ២០៣០ ប្រទេសវៀតណាមនឹងនាំចេញស្បែកជើងទៅក្រៅប្រទេស ស្មើទឹកប្រាក់ចាប់ពី៣ម៉ឺន៨ពាន់លានដុល្លារអាមេរិក រហូតដល់៣ម៉ឺន៩ពាន់លានដុល្លារអាមេរិក ។ វៀតណាមសង្ឃឹមថា ក្នុងអំឡុងចាប់ពីឆ្នាំ២០២២ ដល់ឆ្នាំ២០២៦ ឧស្សាហកម្មស្បែកជើងវៀតណាម បានកើនឡើងចាប់ពី១០% ទៅ១២% ក្នុង១ឆ្នាំ ៕

បរទេស៖ ក្រុមហ៊ុន Tesla របស់សហរដ្ឋអាមេរិក បានលុបចោលគម្រោងផលិតរថយន្តអគ្គិសនីតម្លៃថោក ដោយចាប់យកគម្រោងថ្មីវិញគឺការអភិវឌ្ឍ robotaxis បើកបរដោយខ្លួនឯង នេះយោងតាម Reuters ដែលបានចេញផ្សាយកាលពីថ្ងៃទី៧ ខែមេសា ឆ្នាំ២០២៤។

ការសម្រេចចិត្តបោះបង់ចោលនូវគោលដៅដែលបានគ្រោងទុកជាយូរមកហើយនោះ គឺដោយសារក្រុមហ៊ុនចង់ផ្តោតលើការផលិតម៉ូដែលប្រណីតជាមុនសិន បន្ទាប់មកប្រើប្រាស់ប្រាក់ចំណេញដើម្បីផ្តល់មូលនិធិសម្រាប់ការផលិតរថយន្តអគ្គិសនីតម្លៃថោកនៅពេលក្រោយ។ ដូច្នេះគម្រោងផលិតរថយន្តអគ្គិសនីតម្លៃថោក នៅតែមានដោយនាយកប្រតិបត្តិ Elon Musk សន្យាថានឹងចាប់ផ្តើមផលិតម៉ូដែលរថយន្តអគ្គិសនីដែលមានតម្លៃសមរម្យនៅរោងចក្ររបស់ខ្លួនក្នុងរដ្ឋតិចសាស់ សហរដ្ឋអាមេរិក ក្នុងឆមាសទីពីរនៃឆ្នាំ ២០២៥។

ម៉ូដែលរថយន្តថោកបំផុតរបស់ Tesla នាពេលបច្ចុប្បន្ននេះគឺ Model 3 sedan ដែលមានតម្លៃលក់រាយត្រឹមតែ ៣៩,៩០០ដុល្លារប៉ុណ្ណោះនៅសហរដ្ឋអាមេរិក។ ហើយម៉ូដែលបន្ទាប់ដែលនឹងត្រូវផលិតនៅឆ្នាំ ២០២៥ ត្រូវបានគេរំពឹងថានឹងចាប់ផ្តើមនៅតម្លៃប្រហែល ២៥,០០០ ដុល្លារអាមេរិកប៉ុណ្ណោះ។ ទោះជាយ៉ាងណា បន្ទាប់ពីរបាយការណ៍របស់ Reuters ត្រូវបានចុះផ្សាយ តម្លៃភាគហ៊ុនរបស់ Tesla បានធ្លាក់ចុះជាង ៦% ។ ប៉ុន្តែបានងើបឡើងវិញបន្តិចបន្ទាប់ពីការប្រកាសរបស់ Musk កាលពីពេលថ្មីៗនេះថា “មនុស្សយន្តរបស់ក្រុមហ៊ុន Tesla នឹងត្រូវបានបង្ហាញខ្លួនជាផ្លូវការនៅថ្ងៃទី ៨ ខែសីហាខាងមុខនេះ” ដែលជួយឱ្យតម្លៃភាគហ៊ុនកើនឡើងបន្ទាប់ពីការជួញដូរពីរបីម៉ោង។

គួរបញ្ជាក់ដែរថា ការសម្រេចចិត្តខាងលើត្រូវបានធ្វើឡើងនៅពេលដែលក្រុមហ៊ុន Tesla ប្រឈមមុខនឹងការប្រកួតប្រជែងជាសាកលពីក្រុមហ៊ុនរថយន្តអគ្គិសនីរបស់ចិន ជាមួយនឹងម៉ូដែលរថយន្តស៊េរីជាច្រើនដែលមានតម្លៃចាប់ពី ១០,០០០ ដុល្លារប៉ុណ្ណោះ ខណៈសម្ពាធក្នុងការរកប្រាក់ចំណេញពីម៉ូដែលរថយន្តតម្លៃទាបគឺជាបញ្ហាប្រឈមសម្រាប់ក្រុមហ៊ុនរថយន្ត Tesla។ កន្លងទៅលោក Musk ធ្លាប់បាននិយាយថា គឺផលិតរថយន្តតម្លៃថោកគឺមានការលំបាកជាងមុន ដោយសារតែឥឡូវនេះ Tesla កំពុងប្រឈមមុខនឹងការប្រកួតប្រជែងកាន់តែខ្លាំងនៅក្នុងផ្នែកនេះ ដោយបច្ចុប្បន្នក្រុមហ៊ុន Tesla បានកំពុងចំណាយពេលជាច្រើនឆ្នាំក្នុងការអភិវឌ្ឍរថយន្ត Cybertruck ដែលជារថយន្តភីកអាប់អគ្គិសនីមានតម្លៃថ្លៃ៕

ប្រទេសថៃ ៖ កាលពីថ្ងៃទី៣ ខែមេសា ឆ្នាំ២០២៤ សារព័ត៌មានថៃរាយការណ៍ថា ម្ហូបរបស់ប្រទេសថៃមួយមុខឈ្មោះ «គែងតៃប្លា» ដែលពលរដ្ឋថៃចាត់ទុកថា គឺជាម្ហូបដ៏ឆ្ងាញ់បំផុតប្រចាំខេត្តភាគខាងត្បូង ត្រូវបានគេហទំព័រដ៏ល្បីឈ្មោះ TasteAtlas ចាត់ចំណាត់ថ្នាក់ថា ជាម្ហូបអន់បំផុតនៅលើពិភពលោក ក្នុងចំណោមម្ហូបចំនួន១០០មុខ ។

វាបានក្លាយជាប្រធានបទមួយធ្វើឱ្យអ្នកលេងបណ្តាញសង្គមនៅប្រទេសថៃលើកឡើងយ៉ាងច្រើន នាដើមខែមេសានេះ នៅពេលគេហទំព័រដ៏ល្បីមួយឈ្មោះ TasteAtlas បានចាត់ចំណាត់ថ្នាក់ម្ហូបអាហារចំនួន១០០មុខ គឺជាអាហារអន់បំផុតនៅលើពិភពលោក ។ គេហទំព័រនេះបង្ហាញថា សម្លថៃឈ្មោះ «គែងតៃប្លា» បានជាប់ចំណាត់ថ្នាក់ទី១ ជាសម្លអន់បំផុតនៅលើពិភពលោក ។

ពលរដ្ឋថៃនៅទូទាំងប្រទេសបានបង្ហាញនូវមតិរិះគន់ថា មិនគួរសម្រេចចិត្តវិនិច្ឆ័យអាហាររបស់ប្រទេសណាមួយផ្អែកតាមទស្សនៈសកលទេ ដោយសារវប្បធម៌ប្រទេសនីមួយៗខុសៗគ្នា ។ រីឯពលរដ្ឋថៃរស់នៅខេត្តភាគខាងត្បូងបញ្ជាក់ថា «គែងតៃប្លា» គឺជាមុខម្ហូបដ៏ឆ្ងាញ់ក្នុងចំណោមមុខម្ហូបផ្សេងទៀត ដែលបង្ហាញពីអត្តសញ្ញាណក្នុងតំបន់ ។

ពលរដ្ឋថៃមិនយល់ស្របនឹងការចាត់ចំណាត់ថ្នាក់នេះទេ ពីព្រោះសម្លថៃឈ្មោះ «គែងតៃប្លា» គឺជាមុខម្ហូបមានរសជាតិឆ្ងាញ់ពិសេសសម្រាប់ពួកគេ ហើយសូម្បីតែ YouTuber ជនជាតិកូរ៉េខាងត្បូងដ៏ល្បី ឈ្មោះ ខាឡែន ក៏ចូលចិត្តបរិភោគម្ហូបនេះដែរ ក្នុងចំណោមម្ហូបផ្សេងទៀតរបស់ប្រទេសថៃ ។ អ្នកខ្លះទៀតនិយាយថា វាជាម្ហូបអន់នៅលើពិភពលោក ប៉ុន្តែវាជាម្ហូបពិសេសរបស់ខ្លួន ។

ចំណែកស្ត្រីជាម្ចាស់ហាងលក់ម្ហូប និយាយថា «គែងតៃប្លា» គឺជាម្ហូបដ៏ឆ្ងាញ់បំផុតសម្រាប់អតិថិជន ហើយតាំងពីគេហទំព័រ TasteAtlas បានចាត់ចំណាត់ថ្នាក់ថា «គែងតៃប្លា» គឺជាម្ហូបអន់បំផុតនៅលើពិភពលោក ឃើញថា គាត់លក់ម្ហូបនេះដាច់ខ្លាំងណាស់ ។ ជារៀងរាល់ថ្ងៃ អតិថិជនបាននាំគ្នាមកទិញម្ហូបនេះនៅហាងរបស់គាត់ជាហូរហែ ។

សារព័ត៌មានថៃបានសម្ភាសន៍លោក Srettha Thavisin នាយករដ្ឋមន្ត្រីថៃ ពាក់ព័ន្ធនឹងការចាត់ចំណាត់ថ្នាក់របស់គេហទំព័រ TasteAtlas នេះ ហើយលោក Srettha Thavisin លើកឡើងថា ចំពោះការចាត់ចំណាត់ថ្នាក់ថា អាហារថៃ «គែងតៃប្លា» ជាអាហារអន់បំផុត គឺវាស្ថិតនៅលើអណ្តាតរបស់មនុស្សម្នាក់ៗ ប៉ុន្តែសម្រាប់ខ្លួនលោកវិញ លោកចូលចិត្តបរិភោគម្ហូបនេះខ្លាំងណាស់ ។

លោកនាយករដ្ឋមន្ត្រីបន្តថា បើទោះជាជនបរទេសមិនចូលចិត្តបរិភោគអាហារថៃ «កែងតៃប្លា» ក្តី ប៉ុន្តែនៅមានអាហារថៃជាច្រើនមុខទៀតបានជាប់ចំណាត់ថ្នាក់ជាអាហារឆ្ងាញ់នៅលើពិភពលោក ។ ហេតុនេះ ពលរដ្ឋថៃត្រូវតែយល់ព្រមទទួលស្គាល់ការចាត់ចំណាត់ថ្នាក់នេះ ពីព្រោះវាជាសិទ្ធិរបស់ពួកគេ ។ លោកបញ្ជាក់ថា បើម្ហូប «គែងតៃប្លា» គ្មានរសជាតិហឹរទេនោះ គឺពុំហៅថា «គែងតៃប្លា» ទេ ។

ទោះយ៉ាងណា ពលរដ្ឋថៃខ្លះទៀតនិយាយថា ដោយសារតែសម្លនេះមានរសជាតិឌិតខ្លាំង, ហឹរខ្លាំង និងខាប់ ថែមទាំងមានក្លិនប្លែកខុសពីមុខម្ហូបផ្សេងៗ ទើបធ្វើឱ្យ «គែងតៃប្លា» មិនត្រូវមាត់ជនបរទេស សូម្បីតែជនជាតិថៃគ្នាឯង ក៏មិនចូលចិត្តម្ហូបនេះដែរ ៕

យោងតាមសារព័ត៌មាន People កាលពីថ្ងៃទី ៤ ខែមេសា ក្រុមមេធាវីរបស់ Angelina Jolie បានដាក់ញត្តិទាក់ទងនឹងការប្តឹងផ្តល់អចលនទ្រព្យ ដោយបង្ហាញពីអតីតកាលនៃការបំពានរបស់លោក Brad Pitt ជាអតីតស្វាមីតារាស្រីរូបនេះ ។ មេធាវីបាននិយាយថា Brad Pitt បានបំពានលើរូបរាងកាយរបស់ Angelina Jolie មុនឆ្នាំ២០១៦។ ការប្រើអំពើហិង្សា នៅលើយន្តហោះក្នុងឆ្នាំនោះមិនមែនជាលើកទីមួយទេដែលតារាសម្តែងប្រុសរូបនេះបានធ្វើបាបកូនរបស់ខ្លួនដែលបណ្តាលឱ្យនាងសម្រេចចិត្តបញ្ចប់ចំណងអាពាហ៍ពិពាហ៍។

ក្នុងឆ្នាំ ២០១៦ Angelina Jolie បានដាក់ពាក្យសុំលែងលះ ដោយចោទប្រកាន់ Brad Pitt ថាស្រវឹង ឆ្កួត និងធ្វើបាបប្រើអំពើហិង្សាលើកូន។ តារាសម្តែងរូបនេះត្រូវបានស៊ើបអង្កេតដោយភ្នាក់ងារពីរគឺ FBI និងនាយកដ្ឋានសេវាកម្មគ្រួសារ និងកុមារ Los Angeles ពីបទហិង្សាលើកុមារ។ ទីបំផុត អាជ្ញាធរមិនបានកាត់ទោស Brad Pitt ទេ ព្រោះមិនបានរកឃើញសញ្ញានៃបទល្មើសក្នុងពេលស៊ើបអង្កេត។

ភាគីរបស់ Angelina Jolie បានចេញផ្សាយឯកសារថ្មីដើម្បីបញ្ជាក់ថា Brad Pitt ធ្លាប់បានស្នើឱ្យនាងចុះហត្ថលេខាលើកិច្ចព្រមព្រៀងឯកជនភាព ប្រសិនបើចង់ឱ្យគេទិញភាគហ៊ុនរបស់នាងត្រឡប់មកវិញនៅក្នុងដីចម្ការទំពាំងបាយជូរ។ អ្នកតំណាងរបស់ Angelina Jolie បាននិយាយថា តារាស្រីរូបនេះមានការព្រួយបារម្ភថា ឯកសារបិទជិតដែលនាងផ្តល់សម្រាប់ការតវ៉ាគ្នាអាចនឹងត្រូវបែកធ្លាយ ប្រសិនបើមិនមានឯកសារចង។ «ឯកសារបិទជិតរបស់ Angelina រួមមានអ៊ីមែល សេចក្តីសង្ខេបនៃសេចក្តីថ្លែងការណ៍របស់សមាជិកគ្រួសារ និងព័ស្តុតាងផ្សេងទៀត។ Brad Pitt ខ្លាចព័ត៌មាននេះនឹងត្រូវបានផ្សព្វផ្សាយជាសាធារណៈ»។ មេធាវីបាននិយាយថា Brad Pitt t ចង់បង្ខំអតីតប្រពន្ធរបស់ខ្លួនឱ្យនៅស្ងៀមអំពី «កំហុសរបស់គេ» ថាតើទាក់ទងនឹងចម្ការទំពាំងបាយជូរឬអត់។
មេធាវីរបស់ Angelina Jolie បាននិយាយកាលពីថ្ងៃទី ៤ ខែមេសាថា «ដោយការបដិសេធមិនទិញភាគហ៊ុន ប៉ុន្តែប្តឹងអតីតប្រពន្ធរបស់ខ្លួន Brad Pitt លើកឡើងដោយផ្ទាល់អំពីមូលហេតុដែលកិច្ចព្រមព្រៀងសម្ងាត់មានសារៈសំខាន់ចំពោះគេ និងអ្វីដែល Brad Pitt ចង់លាក់បាំងអំពើហិង្សាក្នុងគ្រួសារ។ បន្ទាប់ពីពន្យារពេល៨ខែ ញត្តិនេះសុំឱ្យតុលាការបង្ខំលោក Brad Pitt ឱ្យប្រគល់ព័ស្តុតាងដែលពាក់ព័ន្ធ»។

ប្រភពមួយទៀតបានប្រាប់ People ថា Angelina Jolie មិនចង់ប្រាប់ការពិតអំពីការរំលោភបំពានពីមុនរបស់នាងទេ។ ឥឡូវនេះនាងត្រូវធ្វើបែបនេះដើម្បីការពារខ្លួនពីការចោទប្រកាន់របស់អតីតស្វាមី។ ប្រភពស្និទ្ធនឹង Brad Pitt ដែលមានបទពិសោធន៍ធ្វើការក្នុងវិស័យវិវាទបានបដិសេធការចោទប្រកាន់របស់ Angelina ដោយអត្ថាធិប្បាយថាការផ្លាស់ប្តូររបស់នាងគឺជាអាកប្បកិរិយាធម្មតារបស់បុគ្គលប្រសិនបើប្រឈមមុខនឹងការវិនិច្ឆ័យមិនអំណោយផល។ បុគ្គលម្នាក់នេះបានប្រាប់ People ថា ៖ «នៅពេលនោះ ពួកគេនឹងបន្តផ្តល់ព័ត៌មានមិនពិត មិនត្រឹមត្រូវ ឬមិនពាក់ព័ន្ធដើម្បីរំខាន»។

ជម្លោះអចលនទ្រព្យបានចាប់ផ្តើមនៅពាក់កណ្តាលឆ្នាំ ២០១៦ នៅពេលដែល Angelina Jolie ចង់លក់អចលទ្រព្យដើម្បីផ្លាស់ទៅប្រទេសអង់គ្លេសដើម្បីបន្តសកម្មភាពនយោបាយ ប៉ុន្តែត្រូវប្រឈមមុខនឹងការប្រឆាំងពី Brad Pitt ។ គូស្នេហ៍តារាមួយគូនេះបានជួលអចលនទ្រព្យនៅប្រទេសបារាំងក្នុងឆ្នាំ ២០០៨ មុនពេលទិញអចលនទ្រព្យក្នុងឆ្នាំ ២០១១។ ដំបូងឡើយ Brad Pitt កាន់កាប់ភាគហ៊ុន ៦០% ហើយ Angelina Jolie កាន់កាប់ ៤០% ។ បន្ទាប់ពីរៀបការរួច តារាប្រុសរូបនេះបានផ្ទេរភាគហ៊ុន ១០% ទៅឱ្យប្រពន្ធរបស់ខ្លួនជាកាដូអាពាហ៍ពិពាហ៍ ដោយបានកំណត់អត្រាកម្មសិទ្ធិអចលនទ្រព្យរបស់ពួកគេទាំងពីរ។

បន្ទាប់ពីការលែងលះ Angelina Jolie ត្រូវបានអនុញ្ញាតឱ្យលក់ភាគហ៊ុនដោយសម្ងាត់ទៅឱ្យដៃគូរុស្ស៊ីរបស់នាង។ Brad Pitt ជឿជាក់ថា Angelina មិនមានឋានៈស្របច្បាប់ទេ ព្រោះលោកនៅតែរក្សាបាន ៦០% ជាកម្មសិទ្ធិ ការព្រមព្រៀងផ្ទេរ ១០% ទៅអតីតភរិយាកាលពីឆ្នាំ ២០១៤ គឺមិនផ្លូវការ ដូច្នេះហើយទើបលោកចង់យកទ្រព្យសម្បត្តិមកវិញ និងរក្សាការគ្រប់គ្រង។ តុលាការលុចសំបួរបានទទួលយកទស្សនៈនេះ ហើយសម្រេចថា Brad Pitt អាចរក្សាភាគហ៊ុន ៦០% សម្រាប់រយៈពេលមួយឆ្នាំ ឬលើសពីនេះ រហូតដល់បណ្តឹងនេះត្រូវបានបញ្ចប់ទាំងស្រុង។ អចលនទ្រព្យដីចម្ការទំពាំងបាយជូរនេះមានតម្លៃ៥០០លានដុល្លារ៕

អ្នកគាំទ្រវិស័យបវរកញ្ញាកម្ពុជាបានសម្តែងការមិនពេញចិត្តទៅកាន់ Anntonia Porsild បវរកញ្ញាចក្រវាលថៃឆ្នាំ២០២៣ ដែលបានយកទម្រង់មកុដអប្សរាខ្មែរគ្រងយ៉ាងរំភើយនៅក្នុងកម្មវិធីជាតិរបស់ខ្លួន។ ជាមួយគ្នានេះ អ្នកគាំទ្រមួយចំនួនមានបំណងចង់ឱ្យក្រសួងពាក់ព័ន្ធមានចំណាត់ការណាមួយព្រោះទម្រង់មកុដអប្សរានេះជារបស់ខ្មែរ។

កាលពីថ្ងៃទី៣ មេសា ផេក Miss Universe Thailand បានបង្ហោះរូបភាពរបស់ Anntonia Porsild Miss Universe Thailand 2023 និងជា លំដាប់រងទី១ Miss Universe លើកទី៧២ រួមជាមួយបវរកញ្ញាផ្សេងទៀតបានចូលរួមក្នុងពិធីបើកព្រឹត្តិការណ៍ «ចំណាយប្រាក់ចំនួន៣០បាត អាចព្យាបាលជំងឺបានគ្រប់ទីកន្លែង ដោយប្រើប្រាស់តែអត្តសញ្ញាប័ណ្ណមួយ»ដែលរៀបចំនៅខេត្តនគររាជសីមា។ ក្នុងកម្មវិធីនេះ Anntonia និងបវរកញ្ញាផ្សេងទៀតបានគ្រងឈុតអប្សរា ដោយបានបំពាក់មកុដទម្រង់អប្សរាជារបស់ខ្មែរ។

ការតែងខ្លួនរបស់បវរកញ្ញាចក្រវាលថៃរូបនេះបានធ្វើឱ្យអ្នកលេងបណ្តាញសង្គមកម្ពុជាចូលទៅខម្មិនអរគុណបវរកញ្ញាថៃដែលបានជួយផ្សព្វផ្សាយមកុដអប្សរាខ្មែរ រហូតដល់ផេក Miss Universe Thailand កំណត់មិនអាចឱ្យចូលទៅខម្មិនបាន។

ចំពោះបញ្ហានេះ អ្នកលេងបណ្តាញសង្គមមួយចំនួនដែលជាអ្នកស្នេហាវិស័យបវរកញ្ញា បានបង្ហាញអារម្មណ៍មិនសប្បាយចិត្តទៅលើ Anntonia ដែលបំពានយកទម្រង់មកុដអប្សរាខ្មែរទៅធ្វើជារបស់ខ្លួនទៅវិញ។ អ្នកមួយចំនួនរំពឹងចង់ឱ្យក្រសួងចាត់វិធានការនិងលើកពីបញ្ហានេះមកនិយាយបកស្រាយជូនសាធារណជន ខណៈអ្នកមួយចំនួនមានបំណងដាក់ញត្តិចង់ប្តឹងបវរកញ្ញារូបនេះវិញដូចគ្នា ដោយកាលពីកន្លងទៅខាងថៃបានប្តឹងមកខ្មែរថាបានយកភ្លេងអប្សរាថៃយកមករៀបចំនៅកម្មវិធីប្រកួតដោយគ្មានការអនុញ្ញាត។

គេចាំបានថា កាលពីខែមករា Anntonia Porsild ធ្លាប់មកប្រទេសកម្ពុជាធ្វើជាពិធីការិនីក្នុងកម្មវិធី Miss Global 2023 ដែលប្រទេសកម្ពុជាមានសិទ្ធិពាក់កណ្តាលរៀបចំជាមួយប្រទេសវៀតណាម៕

ប្រទេសថៃ ៖ នៅថ្ងៃទី៥ ខែមេសា ឆ្នាំ២០២៤ សារព័ត៌មានថៃរាយការណ៍ថា បរិយាកាសកខ្វ.ក់ និងធូលីពុលចាប់ផ្តើមប៉ះពាល់ដល់វិស័យទេសចរណ៍នៅខេត្តឈៀងម៉ៃ ហើយភ្ញៀវទេសចរបរទេស ក៏ចាប់ផ្តើមចាកចេញពីខេត្តឈៀងម៉ៃបណ្តើរៗដែរ ដើម្បីគេចពីធូលីពុល ។ រីឯចំនួនការកក់បន្ទប់សណ្ឋាគារនានានៅខេត្តនេះ ក្នុងអំឡុងពេលចូលឆ្នាំថ្មីឃើញថា ធ្លាក់ចុះទាបជាងគោលដៅ ។

ស្ថានការណ៍ធូលីពុលនៅខេត្តឈៀងម៉ៃ នៅតែមានសភាពធ្ងន់ធ្ងរជាបន្តបន្ទាប់ ហើយផ្សែងចេញពីភ្លើងឆេះព្រៃ មិនត្រឹមតែធ្វើឱ្យប៉ះពាល់ដល់សុខភាពពលរដ្ឋប៉ុណ្ណោះទេ ប៉ុន្តែវាចាប់ផ្តើមធ្វើឱ្យប៉ះពាល់ដល់វិស័យទេសចរណ៍ផងដែរ ។ នៅដើមខែមេសា ឆ្នាំ២០២៤ នៅអគារអ្នកដំណើរចាកចេញពីប្រទេសថៃ របស់អាកាសយានដ្ឋានឈៀងម៉ៃ គេសង្កេតឃើញថា មានភ្ញៀវទេសចរបរទេសជាច្រើននាក់ឈរតម្រង់ជួរ Check in ដើម្បីធ្វើដំណើរចាកចេញពីខេត្តឈៀងម៉ៃ ។

បើទោះជាការធ្វើដំណើរចាកចេញពីខេត្តឈៀងម៉ៃតាមកម្មវិធីទេសចរណ៍ក្តី ប៉ុន្តែភ្ញៀវទេសចរខ្លះបានធ្វើដំណើរចាកចេញមុនពេលកំណត់ ។ ពួកគេនិយាយថា ចង់គេចពីបរិយាកាសកខ្វក់ ហើយទៅកន្លែងណាដែលមានបរិយាកាសល្អជាងនេះ ដូចជា ៖ ទីក្រុងបាងកក និងខេត្តនៅភាគខាងត្បូង ជាពិសេស ខេត្តភូកេត ។

លោក Paisan Sukcharoen នាយកសមាគមសណ្ឋាគារថៃប្រចាំភាគខាងជើង ទទួលស្គាល់ថា បរិយាកាសកខ្វក់ពិតជាប៉ះពាល់ដល់វិស័យទេសចរណ៍ ហើយភ្ញៀវទេសចរបរទេសមួយចំនួនបានធ្វើដំណើរចាកចេញពីខេត្តឈៀងម៉ៃ ដើម្បីគេចពីធូលីពុល ។ ប៉ុន្តែវាជាចំនួនតិចតួច ពីព្រោះភ្ញៀវទេសចរភាគច្រើនយល់ពីស្ថានការណ៍ គឺពួកគេមិនលុបចោលការធ្វើដំណើរទេ ហើយពួកគេនៅតែធ្វើដំណើរ និងស្នាក់នៅតាមសណ្ឋាគារដែលបានកក់ទុកជាមុន ។

ហេតុនេះ លោកយល់ឃើញថា ការធ្វើដំណើររបស់ភ្ញៀវទេសចរបរទេស គឺជារឿងធម្មតា ។ ប៉ុន្តែស្ថានការណ៍ធូលីនៅតែពុំទាន់ធូរស្រាល បានធ្វើឱ្យចំនួនការកក់បន្ទប់ស្នាក់នៅក្នុងអំឡុងពេលចូលឆ្នាំថ្មី គិតចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៤ បានកើនឡើងតិចតួច ។ ជាក់ស្តែង សណ្ឋាគារផ្កាយ៣ ទទួលបានភ្ញៀវទេសចរថៃច្រើនជាងគេ គឺការកក់បន្ទប់ស្មើនឹង៦០% ដែលធ្លាក់ចុះពីគោលដៅ ស្មើនឹង៨០% ។ រីឯសណ្ឋាគារផ្កាយ៤ និងផ្កាយ៥ ដែលមានអតិជនជាជនបរទេស គឺមិនគួរឱ្យបារម្ភទេ ដោយចំនួនការកក់បន្ទប់ ស្មើនឹង៧០% ។

លោកបន្ថែមថា យើងត្រូវរង់ចាំតាមដានស្ថានការណ៍បរិយាកាសកខ្វក់បន្តទៀត ហើយប្រសិនបើវាពុំធូរស្រាលមុនពេលចូលឆ្នាំថ្មីទេនោះ នឹងធ្វើឱ្យភ្ញៀវទេសចរថៃធ្លាក់ចុះក្នុងអំឡុងពេលចូលឆ្នាំថ្មីមិនខាន ។

ចំណែកអភិបាលខេត្តឈៀងម៉ៃ លោក Nirat Phongsitthaworn បានលើកឡើងពីការចាត់ចំណាត់ថ្នាក់ទីក្រុងមានបរិយាកាសកខ្វក់របស់គេហទំព័រ IQair.com ថា ខេត្តឈៀងម៉ៃ បានជាប់ចំណាត់ថ្នាក់ទី១ នៅលើពិភពលោក ជាបន្តបន្ទាប់ ។ វាជាការវាស់វែងសម្រាប់តែទីក្រុងធំៗប៉ុណ្ណោះ ប៉ុន្តែបើត្រួតពិនិត្យគ្រប់ខេត្តរបស់ប្រទេសថៃ គឺខេត្តឈៀងម៉ៃ មានកម្រិតខ្យល់ PM 2.5 ទាបជាងខេត្តមួយចំនួន ៕