ប្រទេសតួកគី ៖ Mamamatiks គឺជាទូរសម្រាប់ឱ្យពលរដ្ឋរស់នៅទីក្រុងអ៊ីស្តង់ប៊ុល ប្រទេសតួកគី ទម្លាក់ដបផ្លាស្ទិកដែលពួកគេលែងប្រើប្រាស់ ដើម្បីទទួលបានអាហារ និងទឹកសម្រាប់ឆ្កែ និងឆ្មាអនាថារស់នៅក្នុងទីក្រុង ។ លើសពីនេះ ការដាក់ទូរ Mamamatiks នៅតាមទីសាធារណៈ គឺជាការជំរុញឱ្យពលរដ្ឋតួកគីបោះចោលសម្ភារៈផ្លាស្ទិកបានត្រឹមត្រូវដើម្បីយកទៅកែច្នៃប្រើប្រាស់ឡើងវិញ និងជួយសម្អាតបរិស្ថានផងដែរ ។

សត្វឆ្កែ និងឆ្មាគ្មានម្ចាស់ ឬសត្វអនាថា គឺជាបញ្ហាមួយកើតឡើងនៅតាមបណ្តាទីក្រុងធំៗលើពិភពលោក ហើយទីក្រុងអ៊ីស្តង់ប៊ុល ប្រទេសតួកគី ក៏បានប្រឈមនឹងបញ្ហានេះដែរ ។ ទីក្រុងអ៊ីស្តង់ប៊ុល មានឆ្កែ និងឆ្មាអនាថា រហូតដល់ជាង១៥ម៉ឺនក្បាលឯណោះរស់នៅតាមដងផ្លូវនានា ហើយពួកវាត្រូវស្វែងរកចំណីអាហារស៊ីដោយខ្លួនឯង ។

នៅពេលមើលឃើញបញ្ហានេះ ក្រុមហ៊ុន Pugedon ក៏បានបង្កើតឧបករណ៍ដ៏ទំនើបមួយ ហើយឧបករណ៍នេះមិនត្រឹមតែជួយឱ្យឆ្កែ និងឆ្មាអនាថាទាំងអស់មានអាហារ និងទឹកផឹកគ្រប់គ្រាន់ប៉ុណ្ណោះទេ ប៉ុន្តែឧបករណ៍នេះក៏អាចជួយប្រមូលសម្ភារៈផ្លាស្ទិកមកកែច្នៃឡើងវិញ ព្រមទាំងបណ្តុះគំនិតឱ្យពលរដ្ឋតួកគីមានចិត្តអាណិតសត្វផងដែរ ។

ក្រុមហ៊ុន Pugedon បានផលិតទូរឈ្មោះថា Mamamatiks មានន័យថា ទូរសម្រាប់ចុចយកអាហារឱ្យសត្វ ។ រីឯចំណុចពិសេស គឺគេអាចទម្លាក់ដបផ្លាស្ទិកចូលទៅក្នុងទូរជំនួសកាក់ បន្ទាប់មក ចំណីអាហារសត្វ និងទឹកនឹងធ្លាក់ចូលក្នុងចាននៅផ្នែកខាងក្រោម ។ វាជាវិធីមួយជួយឱ្យសត្វឆ្កែ និងឆ្មាអនាថាក្នុងទីក្រុងនេះបានស៊ីឆ្អែត ហើយក៏ជាការប្រមូលសំរាមសម្រាប់កែច្នៃឡើងវិញ ។

Mehmet Akay ជានាយកក្រុមហ៊ុន Pugedon និយាយថា ការបិទប្រទេសក្នុងអំឡុងពេលជំងឺកូវីដ-១៩ ឆ្លងរាតត្បាត បានធ្វើឱ្យសត្វអនាថាពិបាករកអាហារស៊ី ជាពិសេស កូនៗរបស់ពួកវាតែងតែឈឺ ព្រោះមិនអាចរកទឹក និងអាហារគ្រប់គ្រាន់ ។ ហេតុនេះ ទើបក្រុមហ៊ុនបង្កើតទូរផ្តល់អាហារដោយស្វ័យប្រវត្តិ ដើម្បីដោះស្រាយបញ្ហាខាងលើ ហើយក្រុមហ៊ុនបានសម្លឹងឃើញវែងឆ្ងាយ គឺចង់ឱ្យពលរដ្ឋយល់ដឹងពីបញ្ហាសំរាមផ្លាស្ទិកដែលប្រទេសនានាលើពិភពលោកកំពុងប្រឈម ។

នាយកក្រុមហ៊ុន Pugedon បន្តថា ៖ «គម្រោងនេះមានគោលបំណងផ្តល់អាហារដល់សត្វអនាថានៅតាមផ្លូវ ហើងយើងចង់បណ្តុះគំនិតឱ្យពលរដ្ឋចេះស្រឡាញ់បរិស្ថាន និងសត្វ ជាពិសេស ក្រុមយុវវ័យ ។ យើងជឿថា ទូរ Mamamatiks ជាភស្តុតាបញ្ជាក់ថា យើងធ្វើបានជោគជ័យ» ។

លោកបន្ថែមថា បច្ចុប្បន្ន ក្រុមហ៊ុនបានដាក់ទូរ Mamamatiks សរុបចំនួន៥៥ទូរ នៅទីក្រុងអ៊ីស្តង់ប៊ុល និងដាក់២០ទូរទៀតនៅតាមទីក្រុងផ្សេងៗ ។ សត្វអនាថាទាំងឡាយចាប់ផ្តើមស្គាល់ទូរនេះហើយ ហើយពួកវាដឹងថា តើត្រូវទៅកន្លែងណាពេលពួកវាឃ្លានបាយ ឬស្រេកទឹក ។ ក្រៅពីនេះ នាយកក្រុមហ៊ុនក៏បានសង្កត់ធ្ងន់លើការកាត់បន្ថយសំរាមផងដែរ ។

លោកបញ្ជាក់ថា ៖ «យើងត្រូវចំណាយពេលរាប់រយឆ្នាំ ទើបដបផ្លាស្ទិកអាចរលាយតាមធម្មជាតិ ខណៈវាបង្កជាតិពុលដល់បរិស្ថានយ៉ាងខ្លាំង ។ ដូច្នេះ យើងអាចប្រមូលដបផ្លាស្ទិកទាំងនេះដាក់ក្នុងទូរ និងឱ្យឆ្កែ-ឆ្មាបានស៊ីឆ្កែត ល្អជាងបោះចោលសំរាមផ្លាស្ទិកពាសពេញទីក្រុង» ។

គំនិតល្អជួយដល់សង្គមរបស់ក្រុមហ៊ុន Pugedon ដែលចង់ទទួលបានប្រយោជន៍ពីទូរផ្តល់អាហារដល់សត្វ គឺមិនត្រឹមតែអាចជួយសង្គ្រោះសត្វអនាថាប៉ុណ្ណោះទេ ប៉ុន្តែវាក៏អាចកាត់បន្ថយសំរាមផ្លាស្ទិកដែលជាបញ្ហាធំក្នុងតំបន់ជាច្រើនលើពិភពលោក ៕

កូរ៉េខាងត្បូង៖ បន្ទាប់ពី Aespa បានចេញបទចម្រៀងថ្មីដែលមានចំណងជើងថា “Supernova” កាលពីថ្ងៃទី១៣ ខែឧសភាកន្លងទៅ បានធ្វើឱ្យអ្នកគាំទ្រជុំវិញពិភពលោកចាប់អារម្មណ៍យ៉ាងខ្លាំងនៅ MV ដ៏អស្ចារ្យប្លែករបស់ពួកគេ ខណៈបទចម្រៀងនេះទើបតែចេញបានមួយសប្តាហ៍ប៉ុណ្ណោះគឺមានការជោគជ័យខ្លាំង រហូតនាំក្រុមទទួលបានតំណែងកំពូល RAK (Realtime all-kill) នៅលើតារាងតន្ត្រីកូរ៉េទៀតផង។

នេះបង្ហាញថាប្រជាប្រិយភាពរបស់ aespa ក្នុងរយៈពេលថ្មីៗនេះបានកើនឡើងគួរឱ្យកត់សម្គាល់ ខណៈពេលដែលបទចម្រៀងនេះមានរសនិយម ស័ក្តសមស្តាប់គ្រប់វ័យ ធ្វើឱ្យមនុស្សជាច្រើនជក់ចិត្តនឹងបទនេះ ស្តាប់ហើយមានអារម្មណ៍រីករាយនិងមានថាមពល។ ជាពិសេសនៅពេល “Supernova” ចេញមកភ្លាម គ្រប់គ្នាពិតជាភ្ញាក់ផ្អើលសម្រាប់អ្វីគ្រប់យ៉ាងដែលដាក់បញ្ចូលក្នុងបទនេះ មិនថាអ្នកគាំទ្រទូទៅទេ សូម្បី NASA ក៏ទប់ចិត្តមិនបានដែរ។

ជាក់ស្ដែងកាលពីថ្ងៃទី ១៨ ខែឧសភា ឆ្នាំ២០២៤ គណនី Twitter របស់ NASA Webb Telescope បានបង្ហោះរូបភាព Cassiopeia A ដែលជាកំទេចសំណល់របស់ Supernova ស្ថិតនៅក្នុងក្រុមតារានិករ Cassiopeia ដែល supernova នោះបានកើតឡើងប្រហែល ១១,០០០ ឆ្នាំមកហើយ។ រួមជាមួយនឹងរូបភាពដែលបានបង្ហោះនោះ និងមានការពន្យល់ខ្លីៗពីលើ ដោយគណនី NASA ក៏បានបន្ថែម Caption ថា”Su-su-su-su-su-supernova” ដែលជាឃ្លាចេញពីបទចម្រៀងរបស់ aespa ដែលធ្វើឱ្យ Tweet រីករាលដាលយ៉ាងឆាប់រហ័សជាមួយនឹងការទស្សនាជិត ៥ លានដង និង ២៥,០០០ Tweet។

គួរបញ្ជាក់ដែរថា “Supernova” គឺជាបទចម្រៀងថ្មីស្ថិតក្នុងអាល់ប៊ុមធំ “Armageddon” ដែលត្រៀមនឹងចេញបទចម្រៀងបន្តបន្ទាប់នៅថ្ងៃទី ២៧ ខែឧសភាខាងមុខនេះ។ Aespa គឺក្រុមចម្រៀងស្រីដ៏មានឥទ្ធិពលបំផុតនាពេលបច្ចុប្បន្ននេះដែលសព្វថ្ងៃស្ថិតនៅក្នុងផលិតកម្ម SM ជាមួយសមាជិក ៤ នាក់៕

យោងតាមការស្រាវជ្រាវថ្មីមួយបញ្ជាក់ថា ការស្តាប់ចម្រៀង ឬការលេងតន្ត្រីពេញមួយជីវិតមានទំនាក់ទំនងល្អជាមួយសុខភាពខួរក្បាល ជាពិសេស នៅពេលមានវ័យកាន់តែចាស់ ។ អ្នកស្រាវជ្រាវមកពីសាកលវិទ្យាល័យ Exeter ក្នុងទីក្រុង Exeter ប្រទេសអង់គ្លេស បានស្រាវជ្រាវតាមអនឡាញលើក្រុមមនុស្សអាយុចាប់ពី៤០ឆ្នាំឡើងទៅ គឺឱ្យពួកគេឆ្លើយសំណួរពីការលេងតន្ត្រី ឬការច្រៀងចម្រៀង ដើម្បីរកចម្លើយថា តើសកម្មភាពពាក់ព័ន្ធនឹងសំឡេងភ្លេងបានប៉ះពាល់ដល់សុខភាពខួរក្បាលយ៉ាងណាខ្លះ?

ការស្រាវជ្រាវនេះមានឈ្មោះថា «Protect» ដែលមានអ្នកចូលរួមស្មើជាង២៥.០០០នាក់ ។ អ្នកស្រាវជ្រាវបានចំណាយពេលរហូតដល់ជាង១០ឆ្នាំ ដើម្បីស្រាវជ្រាវអំពីការលេងតន្ត្រីពេញមួយជីវិត ព្រមទាំងធ្វើតេស្តខួរក្បាលអ្នកចូលរួមផងដែរ ។

រីឯលទ្ធផលការស្រាវជ្រាវបង្ហាញថា ការលេងតន្ត្រី ជាពិសេស ព្យ៉ាណូ គឺធ្វើឱ្យប្រព័ន្ធចងចាំល្អប្រសើរ ហើយវាពាក់ព័ន្ធនឹងសមត្ថភាពដោះស្រាយបញ្ហាលំបាកៗផងដែរ ដែលជាជំនាញសំខាន់សម្រាប់ភាពជោគជ័យក្នុងការសិក្សា, ការធ្វើការ, ការធ្វើការជាក្រុម, ភាពច្នៃប្រឌិត និងការដោះស្រាយបញ្ហាទាំងអស់ពេញមួយជីវិត ។ ក្រៅពីនេះ ការច្រៀងចម្រៀងក៏អាចជួយឱ្យសុខភាពខួរក្បាលល្អផងដែរ ។

Anne Corbett ជាសាស្ត្រាចារ្យផ្នែកស្រាវជ្រាវខួរក្បាលនៅសាកលវិទ្យាល័យ Exeter និយាយថា ការស្រាវជ្រាវមួយចំនួនបានស្រាវជ្រាវពីផលប្រយោជន៍របស់តន្ត្រីចំពោះសុខភាពខួរក្បាល ប៉ុន្តែការស្រាវជ្រាវ «Protect» បានបើកឱកាសឱ្យអ្នកស្រាវជ្រាវសិក្សាពីទំនាក់ទំនងរវាងប្រសិទ្ធភាពខួរក្បាល និងតន្ត្រីក្នុងក្រុមមនុស្សចាស់ ។ យើងគិតថា ការលេងតន្ត្រី ឬការច្រៀងចម្រៀង គឺជាវិធីមួយជួយដល់ដំណើរការខួរក្បាល, ជួយបង្កើនភាពបត់បែនរបស់ខួរក្បាល និងជួយពន្យារពេលខូចខួរក្បាល ។

សាស្ត្រាចារ្យ Anne Corbett និយាយថា ៖ «បើទោះជាត្រូវស្រាវជ្រាវបន្ថែមទៀតក្តី ប៉ុន្តែលទ្ធផលការស្រាវជ្រាវរបស់យើងបង្ហាញថា ការជំរុញឱ្យសិក្សាផ្នែកតន្ត្រីនឹងក្លាយជាផ្នែកដ៏សំខាន់ ដើម្បីធ្វើឱ្យសុខភាពខួរក្បាលដំណើរការល្អ ។ យើងគួរតែលើកទឹកចិត្តឱ្យមនុស្សចាស់លេងតន្ត្រីឡើងវិញ ពីព្រោះតន្ត្រីមានប្រយោជន៍សម្រាប់អ្នកជំងឺខួរក្បាល» ។

លោក Stewart Douglas ជាអ្នកលេងតន្ត្រីមានវ័យ៧៨ឆ្នាំ និយាយថា លោកបានរៀនលេងតន្ត្រីតាំងពីនៅក្មេងមកម៉្លេះ ។ លោកបានហ្វឹកហាត់លេងតន្ត្រីរហូតមក ហើយបើទោះជាមានការងារធ្វើក្តី ក៏លោកពុំបោះបង់តន្ត្រីដែរ ។ លោកនិយាយថា ៖ «ពេលមកចូលរួមជាមួយក្រុមតន្ត្រី និងទៅលេងតន្ត្រីនៅតាមទីកន្លែងផ្សេងៗ វាធ្វើឱ្យខ្ញុំមើលឃើញថា តន្ត្រីមានថាមពលខ្លាំងសម្រាប់អ្នកបាត់បង់ការចងចាំ ។ តន្ត្រីករអាយុច្រើនដូចខ្ញុំ គឺខ្ញុំយល់ថា ការលេងតន្ត្រីពិតជាមានចំណែកសំខាន់ជួយឱ្យខួរក្បាលរឹងមាំ» ៕

បរទេស៖ ហ្គេម Netflix ជាង ៩០ ដែលធ្លាប់បង្ហាញខ្លួននៅលើ App Store ក្នុងប្រទេសវៀតណាម ឥឡូវនេះត្រូវបានក្រុមហ៊ុនលុបហ្គេមទាំងអស់ចេញពីប្រទេសនេះ។
យោងតាម Vnexpress ហ្គេមទាំងនេះត្រូវបានចេញផ្សាយដោយក្រុមហ៊ុន Netflix នៅលើកម្មវិធីរបស់ខ្លួន និងតាមរយៈ Apple App Store និង Google Play Store ដើម្បីឱ្យអ្នកប្រើប្រាស់អាចទាញយកវាដោយសេរីពីហាងកម្មវិធីផ្សេងៗ ឬពីក្នុងកម្មវិធី Netflix ផ្ទាល់ក៏បាន។

ទោះជាយ៉ាងណាថ្មីៗនេះអ្នកប្រើប្រាស់ Netflix ក្នុងប្រទេសវៀតណាមមានការភ្ញាក់ផ្អើលនៅពេលចូលប្រើកម្មវិធីទូរស័ព្ទ ពួកគេស្រាប់តែលែងឃើញផ្នែកហ្គេមចំនួន ៩០ របស់ Netflix នៅក្នុងទូរស័ព្ទដូចពីមុនទៀតហើយ។ យោងតាមនាយកដ្ឋានផ្សព្វផ្សាយ ទូរទស្សន៍ និងព័ត៌មានអេឡិចត្រូនិក បានឱ្យដឹងថា មូលហេតុដែលក្រុមហ៊ុនលុបហ្គេមទាំងអស់ចេញពីប្រទេសវៀតណាម គឺដោយសារនាយកដ្ឋានបានរកឃើញថាក្រុមហ៊ុននេះកំពុងផ្សាយពាណិជ្ជកម្មហ្គេមអេឡិចត្រូនិចដែលគ្មានអាជ្ញាប័ណ្ណនៅលើកម្មវិធី Netflix សម្រាប់អ្នកប្រើប្រាស់វៀតណាម និងផ្តល់ហ្គេមអេឡិចត្រូនិចជាច្រើននៅលើ Vietnam App Store និង Google Play Store ដោយមិនទទួលបានការអនុញ្ញាតចាំបាច់នៅក្នុងប្រទេសវៀតណាម។

នេះបំពានលើមាត្រា 31 នៃក្រឹត្យលេខ 72/2013/ND-CP របស់រដ្ឋាភិបាលស្តីពីការគ្រប់គ្រង ការផ្តល់ និងការប្រើប្រាស់សេវាអ៊ីនធឺណិត និងព័ត៌មានអនឡាញ។ ដូច្នេះនាយកដ្ឋានផ្សព្វផ្សាយ ទូរទស្សន៍ និងព័ត៌មានអេឡិចត្រូនិក បានចេញលិខិតផ្លូវការមួយទៅកាន់ក្រុមហ៊ុន Netflix ដោយស្នើសុំឱ្យបញ្ឈប់ការផ្សាយពាណិជ្ជកម្ម និងការបញ្ចេញហ្គេមអេឡិចត្រូនិកនៅលើកម្មវិធី Netflix និងហាងកម្មវិធីត្រឹមថ្ងៃទី ២៥ ខែមេសា ឆ្នាំ ២០២៤។ ប្រសិនបើក្រុមហ៊ុនមិនអនុវត្តតាមក្រសួងព័ត៌មានទេ និងទំនាក់ទំនងសម្របសម្រួលជាមួយរដ្ឋពាក់ព័ន្ធទេ នោះស្ថាប័នគ្រប់គ្រងនឹងដោះស្រាយស្ថានការណ៍នេះតាមច្បាប់វៀតណាម។

យោងតាមប្រភពពី VietNamNet នៅពេលទទួលបានលិខិតផ្លូវការ Netflix បានទាក់ទងភ្នាក់ងារត្រួតពិនិត្យភ្លាមៗ ដើម្បីស្វែងយល់ពីលក្ខខណ្ឌច្បាប់សម្រាប់ការចេញផ្សាយហ្គេមអេឡិចត្រូនិកនៅក្នុងប្រទេសវៀតណាម។ ជាលទ្ធផលក្រុមហ៊ុន Netflix បានសម្រេចចិត្តបញ្ឈប់ការផ្សាយពាណិជ្ជកម្ម និងលុបហ្គេមអេឡិចត្រូនិចទាំងអស់ចេញពីកម្មវិធីរបស់ខ្លួន រួមទាំង Apple App Store និង Google Play Store ផងដែរ។ ក្រុមហ៊ុនក៏បានបង្ហាញពីបំណងរបស់ខ្លួនក្នុងការបន្តទទួលបានការណែនាំ និងការគាំទ្រពីភ្នាក់ងារនិយតកម្មក្នុងអំឡុងពេលប្រតិបត្តិការរបស់ខ្លួននៅក្នុងប្រទេសវៀតណាម។ យោងតាមការសង្កេត អ្នកប្រើប្រាស់ Netflix ជាច្រើននៅក្នុងប្រទេសវៀតណាមនឹងមិនអាចលេងហ្គេមនៅលើវេទិកានេះបានទៀតទេ៕

ប្រទេសថៃ ៖ យន្តហោះដឹកអ្នកដំណើរ១គ្រឿងប្រភេទ Boeing 777-300ER របស់ក្រុមហ៊ុនអាកាសចរណ៍ Singapore Airlines ជើងហោះហើរ SQ321 ដែលចាកចេញពីទីក្រុងឡុងដ៍ (ប្រទេសអង់គ្លេស) ទៅកាន់ប្រទេសសិង្ហបុរី បានប្រកាសអាសន្ន និងសុំចុះចតជាបន្ទាន់នៅអាកាសយានដ្ឋានសុវណ្ណភូមិ ទីក្រុងបាងកក ប្រទេសថៃ ដោយសារតែអាកាសធាតុប្រែប្រួលបណ្តាលឱ្យសម្ពាធខ្យល់បុកខ្លាំង ។

កាលពីថ្ងៃទី២១ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា យន្តហោះដឹកអ្នកដំណើរប្រភេទ Boeing 777-300ER របស់ក្រុមហ៊ុនអាកាសចរណ៍ Singapore Airlines បានចុះចតនៅអាកាសយានដ្ឋានសុវណ្ណភូមិ ប្រទេសថៃ ដោយសុវត្ថិភាព ។ យន្តហោះនេះបានដឹកអ្នកដំណើរចំនួន២១១នាក់ ព្រមទាំងបុគ្គលិកបម្រើការក្នុងយន្តហោះ ចំនួន១៨នាក់ ។ ហេតុការណ៍នេះបណ្តាលឱ្យអ្នកដំណើរស្លា.ប់ ម្នាក់ និងរងរបួសជាង៣០នាក់ទៀត ត្រូវបានអាជ្ញាធរថៃបញ្ជូនទៅមន្ទីរពេទ្យ ។

លោក Keerati Kitmanawat អគ្គនាយកក្រុមហ៊ុនអាកាសយានដ្ឋានថៃនិយាយថា ខាងអាកាសយានដ្ឋានសុវណ្ណភូមិបានបញ្ជូនអ្នករងរបួសទាំងអស់របស់ក្រុមហ៊ុនអាកាសចរណ៍ Singapore Airlines ទៅកាន់មន្ទីរពេទ្យនៅក្បែរអាកាសយានដ្ឋានរួចរាល់ហើយ ក្រោយពីយន្តហោះនេះសុំចុះចតបន្ទាន់នៅអាកាសយានដ្ឋានសុវណ្ណភូមិ កាលពីវេលាម៉ោង៣និង៣៤នាទីល្ងាច ។

លោកនិយាយថា ៖ «យើងបានចាត់ការគ្រប់យ៉ាងរួចអស់ហើយ រីឯមូលហេតុដំបូង គេសន្និដ្ឋានថា ដោយសារសម្ពាធបុកខ្យល់ខ្លាំងពេក ទើបបណ្តាលឱ្យយន្តហោះធ្លាក់ពីលើអាកាស ។ បើតាមច្បាប់របស់យន្តហោះ គឺយន្តហោះត្រូវតែជូនដំណឹងទៅអ្នកដំណើរទាំងអស់ក្នុងករណីមានហេតុការណ៍គ្រោះថ្នាក់» ។

បើតាមវីដេអូដែលផ្សព្វផ្សាយក្នុងបណ្តាញសង្គមបង្ហាញថា សម្ភារៈជាច្រើនក្នុងយន្តហោះបានធ្លាក់ខ្ចាត់ខ្ចាយពេញទាំងអស់ ហើយសម្ភារៈខ្លះទៀតបានធ្លាក់ពីផ្នែកខាងលើចុះមកក្រោម ។ ក្រៅពីនេះ នៅលើដំបូលមានស្នាមប្រឡាក់ពណ៌ក្រហមជាច្រើនចំណុចស្រដៀងនឹងឈាម ។ បើតាមសេចក្តីរាយការណ៍ចុងក្រោយបញ្ជាក់ថា អ្នកស្លាប់ក្នុងហេតុការណ៍នេះ គឺជាបុរសជនជាតិអង់គ្លេសឈ្មោះ Geoffrey Ralph Kitchen អាយុ៧៣ឆ្នាំ ។

ចុងក្រោយ ទំព័រហ្វេសប៊ុករបស់ក្រុមហ៊ុនអាកាសចរណ៍ Singapore Airlines បានចេញសេចក្តីថ្លែងការណ៍មួយបញ្ជាក់ថា យន្តហោះដឹកដំណើរ ជើងហោះហើរ SQ321 ដែលធ្វើដំណើរពីទីក្រុងឡុងដ៍ ទៅប្រទេសសិង្ហបុរី មានបញ្ហាសម្ពាធខ្យល់បុកខ្លាំងក្នុងអំឡុងពេលហោះហើរ ទើបបណ្តាលឱ្យយន្តហោះបង្ខំចិត្តចុះចតបន្ទាន់នៅទីក្រុងបាងកក កាលពីថ្ងៃទី២១ ខែឧសភា ឆ្នាំ២០២៤ ។ ក្រុមហ៊ុនសោកស្តាយយ៉ាងខ្លាំងចំពោះហេតុការណ៍នេះ និងសូមចូលរួមរំលែកទុក្ខជាមួយគ្រួសារអ្នកស្លាប់ផងដែរ ។

ជំហានដំបូង ក្រុមហ៊ុនអាកាសចរណ៍នឹងជួយដល់អ្នកដំណើរទាំងអស់ ព្រមទាំងបុគ្គលិកបម្រើការក្នុងយន្តហោះទៅតាមលទ្ធភាព ។ ក្រុមហ៊ុនបានសហការជាមួយមន្ត្រីអាកាសចរណ៍របស់ប្រទេសថៃ ដើម្បីផ្តល់ជំនួយចាំបាច់ផ្នែកពេទ្យសម្រាប់អ្នកដំណើររងរបួស និងបញ្ជូនក្រុមការងារទៅទីក្រុងបាងកក ៕