ប្រទេសថៃ ៖ កាលពីថ្ងៃទី១០ ខែមេសា ឆ្នាំ២០២៤ លោក Chatchart Sitthiphan អភិបាលក្រុងបាងកក ព្រមទាំងមន្ត្រីពាក់ព័ន្ធបានចុះត្រួតពិនិត្យក្នុងតំបន់ ក្រោយពីអាជ្ញាធររកឃើញសារធាតុគីមីប្រភេទ Cadmium ក្នុងក្រុមហ៊ុនផលិតលោហៈ ព្រមទាំងប្រកាសពីតំបន់ គ្រោះថ្នា.ក់ ជាសាធារណៈ ។ បើតាមអាជ្ញាធរបញ្ជាក់ថា សារធាតុគីមី Cadmium គឺជាប្រភេទរ៉ែលោហៈធ្ងន់ ហើយត្រូវបានគេប្រើប្រាស់ក្នុងឧស្សាហកម្មផ្សេងៗ ។

ជំហានដំបូង ក្រុមមន្ត្រីបានរកឃើញសារធាតុគីមីនេះចំនួន១៩០ការ៉ុង មានទម្ងន់ប្រមាណ៣០០តោន ។ ហេតុនេះ ការិយាល័យស្រុកបាងសឿ បានចេញសេចក្តីប្រកាសមួយ ហាមពលរដ្ឋចូលទៅកាន់បរិវេណ ឬប្រកបអាជីវកម្មក្នុងតំបន់ដែលអាជ្ញាធរកំណត់ ក្រោយពីអាជ្ញាធររកឃើញថា មានសារធាតុគីមី Cadmium នៅក្នុងបរិវេណក្រុមហ៊ុនផលិតលោហៈ ដែលមានទីតាំងនៅផ្លូវប្រាឆារ៉ាត់ ១, តំបន់បាងសឿ ទីក្រុងបាងកក ។ វាសារធាតុគីមីបង្កផលប៉ះពាល់យ៉ាងធ្ងន់ធ្ងរដល់សុខភាព និងគ្រោះថ្នាក់ដល់អាយុជីវិត ។

លោក Chatchart Sitthiphan អភិបាលក្រុងបាងកកបានអរគុណដល់ក្រសួងឧស្សាហកម្ម ដែលប្រជុំពិភាក្សាគ្នាកាលពីថ្ងៃទី៦ ដល់ថ្ងៃទី៧ ខែមេសា ឆ្នាំ២០២៤ ដោយសារព្រួយបារម្ភពីការរកឃើញសារធាតុគីមី Cadmium នៅខេត្តណាខនប៉ាធុម នាពេលកន្លងមក ។ លោកអភិបាលក្រុងបាងកក បានជជែកជាមួយមន្ត្រីក្រសួងឧស្សាហកម្ម និងរោងចក្រ ហើយពួកគេផ្តល់ទិន្នន័យថា បានរកឃើញសារធាតុគីមីគ្រោះថ្នាក់នេះនៅរោងចក្រចំនួន២៥២កន្លែង ។

ហេតុនេះ លោកអភិបាលក្រុងបាងកកបានចេញបញ្ជាឱ្យអាជ្ញាធរចុះត្រួតពិនិត្យនៅតាមរោងចក្រទាំងអស់ ដើម្បីរកឱ្យឃើញសារធាតុគីមីគ្រោះថ្នាក់នេះ ហើយលោកក៏បានអរគុណដល់សមត្ថកិច្ចផងដែរ ដែលបានស៊ើបអង្កេតរកឃើញសារធាតុគីមីគ្រោះថ្នាក់ខ្លាំង បើទោះជាពិបាកស្វែងរកក្តី ពីព្រោះអាចមានការលាក់បាំង ។ ជំហានបន្ទាប់ គឺការប្រកាសពីតំបន់គ្រោះថ្នាក់ជាសាធារណៈ ព្រមទាំងពិនិត្យសុខភាពពលរដ្ឋរស់នៅក្នុងតំបន់ទាំងអស់ ។

គួរបញ្ជាក់ថា សារធាតុគីមី Cadmium គឺជាកាកសំណល់ឧស្សាហកម្ម និងបង្កគ្រោះថ្នាក់យ៉ាងខ្លាំងដល់ជីវិតមនុស្សដែលបាននៅជិត ឬប៉ះពាល់វា ដូចជា ៖ បណ្តាលឱ្យកើតជំងឺមហារីក និងបំផ្លាញឆ្អឹង ។ នៅពេលសារធាតុគីមីនេះជ្រាបចូលក្នុងរាងកាយ វានឹងទៅប្រមូលផ្តុំក្នុងតម្រងនោម ហើយធ្វើឱ្យតម្រងនោមខូចដំណើរការ ឬបណ្តាលឱ្យខ្សោយតម្រងនោមរ៉ាំរ៉ៃ ។

រោគសញ្ញាចុងក្រោយ អ្នកបានប៉ះពាល់សារធាតុគីមី Cadmium នឹងធុញម្ហូបអាហារ និងស្រកទម្ងន់ ហើយអ្នកប៉ះពាល់សារធាតុគីមីនេះភាគច្រើននឹងស្លាប់ដោយសារជំងឺតម្រងនោម ៕

បរទេស៖ យោងតាមក្រសួងផែនការ និងវិនិយោគបាននិយាយថា ប្រទេសវៀតណាមមានបំណងចង់សាងសង់ផ្លូវរថភ្លើងល្បឿនលឿនចំនួនពីរតភ្ជាប់ពីរដ្ឋធានីហាណូយរបស់ខ្លួនទៅកាន់ប្រទេសចិនមុនឆ្នាំ ២០៣០ ដែលជាសញ្ញាមួយនៃការបង្កើនទំនាក់ទំនងរវាងប្រទេសជិតខាងដែលគ្រប់គ្រងដោយកុម្មុយនិស្តទាំងពីរ។

ប្រទេសចិនគឺជាដៃគូពាណិជ្ជកម្មដ៏ធំបំផុតរបស់វៀតណាម និងជាប្រភពសំខាន់នៃការនាំចូលសម្រាប់វិស័យផលិតកម្មរបស់ខ្លួន។ ប្រទេសទាំងពីរបានតភ្ជាប់រួចជាស្រេចតាមរយៈប្រព័ន្ធផ្លូវល្បឿនលឿន និងផ្លូវរថភ្លើងចំនួនពីរប៉ុន្តែចាស់ ហើយត្រូវការកែលម្អនៅខាងវៀតណាម។

ក្រសួងវៀតណាមបាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពីយប់ថ្ងៃទី១០ ខែមេសាថា ខ្សែរថភ្លើងល្បឿនលឿនមួយដែលបានគ្រោងទុកនឹងរត់ចេញពីទីក្រុងកំពង់ផែ Haiphong ទៅ Quang Ninh របស់វៀតណាមឆ្លងកាត់ទីក្រុងហាណូយទៅកាន់ខេត្ត Lao Cai ដែលមានព្រំប្រទល់ជាប់ខេត្ត Yunnan របស់ប្រទេសចិន។ រីឯរថភ្លើងមួយទៀតនឹងរត់ពីទីក្រុងហាណូយទៅកាន់ខេត្ត Lang Son ដែលមានព្រំប្រទល់ជាប់តំបន់ Guangxi របស់ប្រទេសចិន ដោយឆ្លងកាត់តំបន់ដែលមានប្រជាជនរស់នៅយ៉ាងក្រាស់ក្រែលជាមួយនឹងរោងចក្រផលិតសកល រួមទាំងមួយចំនួនទៀតកាន់កាប់ដោយអ្នកវិនិយោគចិនផងដែរ។

កាលពីដើមខែនេះ វៀតណាមបាននិយាយថា ខ្លួនកំពុងស្វែងរកការរៀនសូត្រពីប្រទេសចិន ដើម្បីអភិវឌ្ឍបណ្តាញផ្លូវរថភ្លើងល្បឿនលឿនដំបូងរបស់ខ្លួន ហើយបានបញ្ជូនមន្ត្រីរបស់ខ្លួនទៅធ្វើការជាមួយក្រុមហ៊ុនផ្លូវដែកចិន។ ខ្សែរថភ្លើងល្បឿនលឿនដ៏ធំដែលតភ្ជាប់រដ្ឋធានីហាណូយជាមួយមជ្ឈមណ្ឌលពាណិជ្ជកម្មទីក្រុងហូជីមិញក៏កំពុងត្រូវបានគ្រោងទុកនៅក្នុងប្រទេសផងដែរ។ ប្រធានរដ្ឋសភាវៀតណាមលោក Vuong Dinh Hue បានជួបជាមួយនាយកប្រតិបត្តិនៃក្រុមហ៊ុនផ្លូវដែកចិនកាលពីថ្ងៃច័ន្ទក្នុងអំឡុងពេលដំណើរទស្សនកិច្ចបន្តរបស់លោកទៅកាន់ទីក្រុងប៉េកាំង ជាកន្លែងដែលលោកធ្វើជាម្ចាស់ផ្ទះដោយលោក Xi Jinping ។

របាយការណ៍គ្រោងនេះបានកើតឡើងបន្ទាប់ពីវៀតណាម និងចិនបានចុះហត្ថលេខាលើកិច្ចព្រមព្រៀងសហប្រតិបត្តិការរាប់សិប រួមទាំងផ្លូវដែក ក្នុងអំឡុងពេលដំណើរទស្សនកិច្ចទៅកាន់ទីក្រុងហាណូយរបស់ប្រធានាធិបតីចិន Xi Jinping កាលពីខែធ្នូ។ ពាណិជ្ជកម្មរវាងវៀតណាម និងចិនក្នុងត្រីមាសទីមួយនៃឆ្នាំនេះបានកើនឡើង ២២% ពីឆ្នាំមុនដល់ ៤៣.៦ ពាន់លានដុល្លារ នេះបើយោងតាមទិន្នន័យរបស់រដ្ឋាភិបាលវៀតណាម។ ទោះជាយ៉ាងណាប្រទេសទាំងពីរនៅតែជាប់គាំងនៅក្នុងជម្លោះដែនសមុទ្រដ៏យូរឆ្នាំនៅសមុទ្រចិនខាងត្បូង ទោះបីជាភាពតានតឹងនេះហាក់ដូចជាបានស្ងប់ស្ងាត់ក៏ដោយ៕

ជាការពិតណាស់ យើងគ្រប់គ្នាប្រាកដជាស្គាល់ហើយកំពូលមហាសេដ្ឋីរបស់ពិភពលោកដូចជា Bernard Arnault, Elon Musk, និង Jeff Bezos ជាដើមដែលពួកគាត់សុទ្ធតែជាមហាសេដ្ឋីវ័យចំណាស់ ទោះជាយ៉ាងណាក្នុងអត្ថបទនេះយើងនឹងនាំប្រិយមិត្តមកស្គាល់មហាសេដ្ឋីវ័យក្មេងបំផុតចំនួន ៥ នៅលើពិភពលោកដែលមានអាយុក្រោម ៣០ ឆ្នាំ នេះបើយោងតាមទស្សនាវដ្តី Forbes ដែលបានចុះផ្សាយកាលពីដើមខែមេសា ឆ្នាំ២០២៤។ ដូច្នេះខាងក្រោមនេះគឺជាកំពូលមហាសេដ្ឋីវ័យក្មេងបំផុតរបស់ពិភពលោក ដែលទ្រពសម្បត្តិរបស់ពួកគេភាគច្រើនបានមកពីការស្នងមរតកពីគ្រួសាររបស់ពួកគេ។

១. Luca Del Vecchio៖ Luca គឺជាប្អូនស្រីបង្កើតរបស់តារាសម្តែងពិភពលោក Leonardo ដោយទ្រព្យសម្បត្តិរបស់នាងកើតចេញពីកម្មសិទ្ធិរបស់នាង ១២.៥% នៃក្រុមហ៊ុន Delfin និងក្រុមហ៊ុនធានារ៉ាប់រង Generali អ្នកអភិវឌ្ឍន៍អចលនទ្រព្យ Covivio និងធនាគារ Mediobanca – UniCredit។ មិនដូចបងប្រុសរបស់នាង Leonardo Luca មិនមានតួនាទីនៅក្នុង EssilorLuxottica ទេ។ ហេតុនេះហើយ Luca Del Vecchio ដែលមានអាយុទើបតែ ២២ ឆ្នាំរូបនេះមានទ្រព្យសម្បត្តិសុទ្ធ ៤,៧ពាន់លានដុល្លារអាមេរិក។

២. Leonardo Maria Del Vecchio៖ លោក Leonardo គឺជាប្រធានផ្នែកយុទ្ធសាស្រ្តរបស់ក្រុមហ៊ុន EssilorLuxottica ដែលជាក្រុមហ៊ុនវ៉ែនតាដ៏ធំបំផុតរបស់ពិភពលោក ជាម្ចាស់ម៉ាក RayBan។ Leonardo និងម្តាយរបស់គាត់ជាមួយបងប្អូនបង្កើតប្រាំមួយនាក់បានទទួលមរតកភាគហ៊ុន ១២.៥% នៅក្នុងក្រុមហ៊ុន Delfin ដែលជាក្រុមហ៊ុនដែលកាន់កាប់ជិតមួយភាគបីនៃ EssilorLuxottica។ ដូច្នេះបច្ចុប្បន្នមហាសេដ្ឋីវ័យ ២៨ ឆ្នាំរូបនេះមានទ្រព្យសម្បត្តិ ៤.៧ ពាន់លានដុល្លារអាមេរិក។

៣.Kevin David Lehmann៖ មហាសេដ្ឋីវ័យ ២១ ឆ្នាំដែលជាជនជាតិអាល្លឺម៉ង មានទ្រពសម្បត្តិប្រមាណ ៣.៣ ពាន់លានដុល្លារអាមេរិក ក្លាយជាមហាសេដ្ឋីវ័យក្មេងបំផុតរបស់ពិភពលោកឈរនៅលំដាប់លេខ ៣។ Kevin បានទទួលមរតកពីឪពុក ៥០% នៃភាគហ៊ុននៅក្នុងខ្សែសង្វាក់ឱសថស្ថាន DM-drogerie markt តាំងពីពេលគាត់មានអាយុ ១៤ ឆ្នាំមកម្លេះ។ សង្វាក់ឱសថស្ថាននេះមានហាងជាង ៤ ពាន់កន្លែងនៅទូទាំងទ្វីបអឺរ៉ុប និងបានកត់ត្រាប្រាក់ចំណូលប្រហែល ១៧ ពាន់លានដុល្លារក្នុងមួយឆ្នាំ។

៤.Sophie Luise Fieldmann៖ Sophie Luise គឺជាមហាសេដ្ឋីវ័យក្មេងលំដាប់ទី ៤ របស់ពិភពលោកជាមួយទ្រពសម្បត្តិប្រមាណ ២.៧ ពាន់លានដុល្លារអាមេរិក ដែលបច្ចុប្បន្នគាត់មានអាយុត្រឹមតែ ២៩ ឆ្នាំប៉ុណ្ណោះ។ Sophie គឺជាកូនស្រីបង្កើតរបស់ Günther Fielmann ដែលជាពាណិជ្ជករដ៏ល្បីល្បាញ និងជាអ្នកបង្កើតម៉ាកវ៉ែនតាតម្លៃទាបនៅប្រទេសអាឡឺម៉ង់ ប៉ុន្តែគាត់បានទទួលមរណភាពក្នុងខែមករានៅអាយុ ៨៤ ឆ្នាំដោយបន្សល់ទុកទ្រព្យសម្បត្តិរបស់គាត់ទៅឱ្យកូនពីរនាក់របស់គាត់គឺ Sophie និង Marc។ Marc អាយុ ៣៤ ឆ្នាំបានដំណើរការក្រុមហ៊ុន Fieldmann តាំងពីឆ្នាំ ២០១៩ ខណៈដែល Sophie មិនចូលរួម ទោះបីជានាងកាន់កាប់ភាគហ៊ុនប្រហែលមួយភាគបីនៃក្រុមហ៊ុនវ៉ែនតានេះក៏ដោយ។

៥. Remi Dassault៖ មហាសេដ្ឋីវ័យក្មេងចុងក្រោយរបស់ពិភពលោកគឺ Remi Dassault បានទទួលមរតកទ្រព្យសម្បត្តិរបស់គាត់នៅពេលដែលឪពុករបស់គាត់បានស្លាប់នៅក្នុងការធ្លាក់ឧទ្ធម្ភាគចក្រនៅឆ្នាំ ២០២១ នៅអាយុ ៦៩ ឆ្នាំ។ ទ្រព្យសម្បត្តិរបស់គាត់ភាគច្រើនបានមកពីភាគហ៊ុន ២.៥% នៅក្នុងក្រុមហ៊ុនកម្មវិធីបារាំង Dassault Systèmes និង ៤.១% នៃក្រុមហ៊ុន Dassault Aviation ។ Remi Dassault បច្ចុប្បន្នមានអាយុទើបតែ ២២ ឆ្នាំទេ ប៉ុន្តែគាត់មានទ្រព្យសម្បត្តិរហូតដល់ ២,៥ ពាន់លានដុល្លារអាមេរិកឯណោះ៕

ប្រទេសថៃ៖ ការប្រយុទ្ធគ្នាបានផ្ទុះឡើងរយៈពេល ២ ថ្ងៃមកហើយកាលពីថ្ងៃទី៩ និងទី១០ ខែមេសា រវាងកងទ័ពមីយ៉ាន់ម៉ា និងក្រុមប្រដាប់អាវុធនៅតាមតំបន់ព្រំដែនថៃ ដែលធ្វើឱ្យកងទ័ពថៃត្រូវដាក់ការប្រុងប្រយ័ត្ន។
នៅថ្ងៃទី១១ ខែមេសា ឆ្នាំ២០២៤ បើយោងតាម CTV News បានឱ្យដឹងថា ការប្រយុទ្ធគ្នាបានចាប់ផ្ដើមនៅជុំវិញក្រុង Myawaddy កាលពីថ្ងៃទី៩ ខែមេសា បណ្ដាលឱ្យមនុស្សភៀសខ្លួនឆ្លងកាត់ព្រំដែន។ អ្នកស្រុកបាននិយាយថា “ការប្រយុទ្ធបានកើតឡើងរយៈពេល ២ ថ្ងៃហើយគឺថ្ងៃទី៩ និងថ្ងៃទី១០ ដោយពួកគេបានឮកាំភ្លើងធំ និងការផ្ទុះ ហើយសូម្បីតែយន្តហោះក៏លេចចេញមកដែរ”។

មូលហេតុគឺដោយសារប្រជាពលរដ្ឋមីយ៉ាន់ម៉ាជាច្រើននាក់បានភៀសខ្លួនទៅកាន់ប្រទេសថៃដោយស្ងាត់ៗ ដែលធ្វើឱ្យព្រំដែនរបស់ប្រទេសទាំងពីរមានភាពតានតឹងជាខ្លាំង ខណៈដែលប្រទេសទាំងពីរក៏កំពុងមានបញ្ហាព្រំដែនជាយូរមកហើយ។ នៅលើទឹកដីថៃ កងទ័ពត្រូវតែប្រុងប្រយ័ត្នឱ្យបានខ្ពស់ ដោយប្រជាពលរដ្ឋម្នាក់បាននិយាយថា គាត់បានឃើញរថយន្តរបស់កងទ័ពថៃចំនួន ៨ គ្រឿង ធ្វើដំណើរឆ្ពោះទៅព្រំដែន ដោយដើរល្បាតតាមដងផ្លូវនៃទីក្រុងមេសត។

ពលរដ្ឋមីយ៉ាន់ម៉ាម្នាក់ដែលលាក់ខ្លួននៅក្នុងទីក្រុង Mae Sot បាននិយាយថា “សន្តិសុខនៅក្នុងទីក្រុងមានភាពតឹងតែងជាងមុន ហើយអ្នកជិតខាងរបស់គាត់ត្រូវបានត្រួតពិនិត្យដោយទាហានថៃ នៅពេលដែលនាងចូលទៅជិតតំបន់ព្រំដែន”។ ប្រទេសថៃមានព្រំដែនជាប់ប្រទេសមីយ៉ាន់ម៉ាប្រវែង ២៤០០ គីឡូម៉ែត្រ។ រដ្ឋមន្ត្រីការបរទេសថៃបាននិយាយថា ប្រទេសនេះត្រៀមខ្លួនជាស្រេចដើម្បីទទួលប្រជាជនមីយ៉ាន់ម៉ា ១០ ម៉ឺននាក់ដែលភៀសខ្លួនចេញពីការប្រយុទ្ធ។ កន្លងមកនាយករដ្ឋមន្ត្រីស្រីថា ថាវីស៊ីន និងមន្ត្រីជាន់ខ្ពស់ថៃបានជួបពិភាក្សាបញ្ហាព្រំដែនផងដែរ។

អ្នកស្រុកបាននិយាយថា “មនុស្សជាច្រើនបានមកពីប្រទេសមីយ៉ាន់ម៉ាទៅកាន់ Mae Sot ពួកគេក៏បានបង្ហោះនៅលើបណ្តាញសង្គមដែលកំពុងស្វែងរកកន្លែងស្នាក់នៅ” ។ ទោះជាយ៉ាងណា មន្ត្រីអន្តោប្រវេសន៍ម្នាក់បាននិយាយថាចំនួនអ្នកមកពីប្រទេសមីយ៉ាន់ម៉ាបានកើនឡើងដល់ប្រហែល ៤០០០ នាក់ក្នុងមួយថ្ងៃ ច្រើនជាងចំនួនធម្មតាទ្វេដង។ ដូច្នេះប្រទេសថៃបច្ចុប្បន្នកំពុងពង្រឹងកម្លាំងដំណើរការអន្តោប្រវេសន៍របស់ខ្លួនដើម្បីទប់ទល់នឹងស្ថានការណ៍៕