ព្រំដែនរបស់ប្រទេសនីមួយៗជុំវិញពិភពលោកសុទ្ធតែមានប្រវែងឆ្ងាយៗជាឧទាហរណ៍បើយើងគិតពីព្រំដែនរវាងកម្ពុជា-ថៃមានប្រវែងរហូតដល់ ៨១៧ គីឡូម៉ែត្រឯណោះ ដោយឡែកព្រំដែនរវាងប្រទេសអេស្ប៉ាញ និងប្រទេសម៉ារ៉ុកវិញមានប្រវែងត្រឹមតែ ៨៥ ម៉ែត្រប៉ុណ្ណោះ ត្រូវបានចាត់ទុកថាជាប្រទេសដែលមានព្រំដែនខ្លីបំផុតនៅលើពិភពលោក។
Peñón de Vélez គឺឧបទ្វីបដែលមានទីតាំងនៅភាគខាងជើងនៃទ្វីបអាហ្រ្វិក ជាកម្មសិទ្ធិរបស់ប្រទេសអេស្ប៉ាញ។ ឧបទ្វីបនេះក៏ត្រូវបានភ្ជាប់ទៅនឹងដីគោកនៃប្រទេសម៉ារ៉ុកដោយបន្ទះខ្សាច់តូចមួយដែលមានប្រវែង ៨៥ ម៉ែត្រ។ នេះគឺជាព្រំប្រទល់ដីតូចបំផុតនៅលើភពផែនដីដែលត្រូវបានសម្គាល់ដោយបំណែកតូចមួយនៃខ្សែពណ៌ខៀវលាតសន្ធឹង។

Peñón de Vélez គឺជាទឹកដីរបស់អេស្ប៉ាញតាំងពីឆ្នាំ ១៥៦៤ បន្ទាប់ពីត្រូវបានសញ្ជ័យដោយឧត្តមនាវីឯក Pedro de Estopiñán។ ទោះបីជាប្រទេសម៉ារ៉ុកបានស្នើសុំម្តងហើយម្តងទៀតដើម្បីទាមទារយកទឹកដីនេះមកវិញក៏ដោយ អេស្ប៉ាញមិនដែលយល់ព្រមប្រគល់វាមកវិញទេ ហើយបានបញ្ជូនកងទ័ពទៅឈរជើងដើម្បីអនុវត្តការគ្រប់គ្រងរបស់ខ្លួន។ មុនឆ្នាំ ១៩៣០ តំបន់នេះគឺជាកោះថ្ម ប៉ុន្តែការរញ្ជួយដីបានបង្កើតកោះតូចមួយដែលប្រែ Peñón de Vélez ទៅជាឧបទ្វីប។

ឧបទ្វីបនេះស្ថិតនៅលើឆ្នេរសមុទ្ររវាង Ceuta និង Melilla ដែលជាទឹកដីអេស្ប៉ាញពីរផ្សេងទៀតនៅអាហ្វ្រិក។ បច្ចុប្បន្ននេះមានតែយោធាប៉ុណ្ណោះដែលរស់នៅលើឧបទ្វីប Peñón de Vélez ។ គ្រឿងបរិក្ខារនៅទីនេះមានលក្ខណៈសាមញ្ញ ដោយគ្មានទឹក ឬអគ្គិសនី ហើយត្រូវតែពឹងផ្អែកលើនាវាកងទ័ពជើងទឹកអេស្ប៉ាញ ដើម្បីផ្តល់ការផ្គត់ផ្គង់ចាំបាច់។ នៅលើកោះនេះមិនមានដើមឈើទេ លើកលែងតែដើមឧទុម្ពរពីរបីដើមប៉ុណ្ណោះ។ Peñón de Vélez ក៏ជាតំបន់ដែលនៅជិតបំផុតរបស់អេស្ប៉ាញដែលមិនធ្លាប់ត្រូវបានឈ្លានពានឡើយ។

សព្វថ្ងៃនេះ តំបន់នេះគឺជាកន្លែងទាក់ទាញភ្ញៀវទេសចរ ដោយសារកេរ្តិ៍ឈ្មោះរបស់វាថាមានព្រំដែនខ្លីបំផុតរបស់ពិភពលោក និងប្រវត្តិសាស្រ្តគួរឱ្យចាប់អារម្មណ៍។ នៅលើបន្ទះខ្សាច់តូចមួយដែលតភ្ជាប់ប្រទេសទាំងពីរ អ្នកទេសចរតែងតែប្រមូលផ្តុំគ្នាទៅកាយ៉ាក ហាលថ្ងៃ និងហែលទឹក។ បើយោងតាម Tripadvisor អ្នកទស្សនាផ្តល់នូវបទពិសោធន៍នៃការទស្សនាកោះ ៤.៥ ក្នុងចំណោមផ្កាយ ៥។ អ្នកទេសចរម្នាក់ដែលបានទៅលេងបានបន្សល់ទុកការអត្ថាធិប្បាយថា៖ «ទឹកដីដ៏តូចមួយដ៏ស្រស់ស្អាតរបស់អេស្ប៉ាញ»៕

ប្រទេសសិង្ហបុរី ៖ នៅថ្ងៃទី១២ ខែមេសា ឆ្នាំ២០២៤ សារព័ត៌មានបរទេសរាយការណ៍ថា តួលេខផលិតផលក្នុងស្រុកសរុប (GDP) នៅត្រីមាសទី១ ឆ្នាំ២០២៤ របស់ប្រទេសសិង្ហបុរី បានកើនឡើងតិចជាងការរំពឹងទុក បើទោះជាសិង្ហបុរីបានជំរុញសេដ្ឋកិច្ចតាមរយៈការរៀបចំកម្មវិធីជាច្រើន រួមទាំងការប្រគំតន្ត្រីរបស់តារាចម្រៀងអាមេរិកដ៏ល្បីល្បាញលំដាប់ពិភពលោក ឈ្មោះ Taylor Swift ក្តី ។

សារព័ត៌មានបរទេសបានរាយការណ៍ពីប្រទេសសិង្ហបុរី នៅថ្ងៃទី១២ ខែមេសា ឆ្នាំ២០២៤ ថា ព័ត៌មានបឋមរបស់ក្រសួងពាណិជ្ជកម្មសិង្ហបុរីបង្ហាញថា ផលិតផលក្នុងស្រុកសរុប (GDP) នៅត្រីមាសទី១ ឆ្នាំ២០២៤ បានកើនឡើង២,៧% ។ ប៉ុន្តែវាបានកើនឡើងត្រឹមតែ០,១% ប៉ុណ្ណោះ បើធៀបនឹងត្រីមាសទី៤ ឆ្នាំ២០២៣ ហើយកំណើននេះទាបជាងការរំពឹងទុករបស់អ្នកវិភាគសិង្ហបុរី និងអ្នកវិភាគក្រៅប្រទេសថា សេដ្ឋកិច្ចសិង្ហបុរីនឹងកើនឡើងរហូតដល់៣% នៅត្រីមាសទី១ ឆ្នាំ២០២៤ ។

ទន្ទឹមនឹងនេះ វិស័យផលិតកម្មរបស់សិង្ហបុរីបានកើនឡើង០,៨% នៅត្រីមាសទី១ ឆ្នាំ២០២៤ ក្រោយពីវាធ្លាក់ចុះ២,៩% ចាប់ពីខែតុលា ដល់ខែធ្នូ ឆ្នាំ២០២៣ ឬនៅត្រីមាសទី៤ ឆ្នាំ២០២៣ ។ រីឯវិស័យសេវាកម្ម រួមទាំងកន្លែងស្នាក់នៅ និងម្ហូបអាហារ បានកើនឡើង២,៩% នៅត្រីមាសទី១ ឆ្នាំ២០២៤ ។

បណ្តាអ្នកវិភាគនិយាយថា ប្រទេសសិង្ហបុរីបានរៀបចំការប្រគំតន្ត្រីលំដាប់ពិភពលោក ដែលមានការចូលរួមពីតារាចម្រៀងដ៏ល្បីរបស់អាមេរិកឈ្មោះ Taylor Swift កាលពីដើមឆ្នាំ២០២៤ ព្រមទាំងកម្មវិធីមួយទៀតឈ្មោះ «Singapore Air Show» ដែលបានរៀបចំឡើងជារៀងរាល់ឆ្នាំ នឹងអាចជំរុញសេដ្ឋកិច្ចសិង្ហបុរីបាន ប៉ុន្តែពុំវាជំរុញពុំខ្លាំងក្លាដូចការរំពឹងទុករបស់រដ្ឋាភិបាលទេ ។

ទោះយ៉ាងណា គេចាត់ទុកថា ស្ថិតិដែលបានចេញផ្សាយនេះ គឺជាសញ្ញានៃការងើបឡើងវិញរបស់សេដ្ឋកិច្ចសិង្ហបុរីជាបន្តបន្ទាប់ ក្រោយពីសិង្ហបុរីបានឆ្លងកាត់វិបត្តិសេដ្ឋកិច្ច ដោយសារការឆ្លងរាតត្បាតនៃជំងឺកូវីដ-១៩ នាពេលកន្លងមក ៕

នៅពេលសម្អាតផ្ទះ មនុស្សភាគច្រើនតែងតែយកចិត្តទុកដាក់លើកន្លែងដូចជា បង្គន់ បន្ទប់ទឹក និងផ្ទះបាយប៉ុណ្ណោះ… ទោះជាយ៉ាងណាក៏ដោយ មានកន្លែងកខ្វក់ជាច្រើនទៀតដែលមនុស្សតិចណាស់នឹងដឹងអំពីការលាងសម្អាត ដោយកន្លែងទាំងនេះបានបង្កើតឱកាសសម្រាប់បាក់តេរី និងផ្សិតដើម្បីលូតលាស់។ នេះអាចបណ្តាលឱ្យមានជំងឺឆ្លង ដែលមានគ្រោះថ្នាក់ជាពិសេសចំពោះអ្នកដែលមានភាពស៊ាំទន់ខ្សោយ។

ដូច្នេះហើយបើយោងតាមលោកវេជ្ជបណ្ឌិត Neha Vyas នៃសកលវិទ្យាល័យ North Carolina បានឱ្យដឹងថា ផ្ទះបាយ និងបន្ទប់ទឹកគឺជាកន្លែងផ្ទុកបាក់តេរីជាច្រើន ប៉ុន្តែក្រៅពីកន្លែងទាំងពីរនេះ នៅមានកន្លែងផ្សេងទៀតក៏ផ្ទុកបាក់តេរីខ្លាំងដែរ ដោយអ្នកជំនាញបានចង្អុលបង្ហាញ ៨ កន្លែងដែលអ្នកត្រូវយកចិត្តទុកដាក់នៅពេលសម្អាតផ្ទះរបស់អ្នកក្នុងរដូវកាលនេះ៖

១.ផ្ទៃខាងលើចង្ក្រាន៖ ទឹកឆ្អិនឬចំហុយអាហារអាចនាំឱ្យមានជាតិសំណើមលើផ្ទៃខាងលើចង្ក្រាន នេះអាចជាកន្លែងបង្កាត់ពូជផ្សិត បង្កឱ្យមានអាឡែស៊ី ឬជំងឺហឺត ព្រមទាំងបញ្ហាសុខភាពផ្សេងទៀត ។

២.ផ្ទៃខាងក្នុងទូទឹកកក៖ បន្លែ ផ្លែឈើ សាច់ ឬភេសជ្ជៈផ្សេងៗ តែងតែមានសំណើមកកកុញ ដែលធ្វើឱ្យវាក្លាយជាបរិយាកាសទាក់ទាញសម្រាប់ផ្សិតដុះ ដូច្នេះអ្នកគួរតែសម្អាតកន្លែងទាំងនេះឱ្យបានស្អាត។

៣.ធុងសំរាមនៅក្នុងផ្ទះ៖ ធុងសំរាមក្នុងផ្ទះមានផ្ទុកមេរោគជាច្រើន ហេតុនេះធុងសំរាមនីមួយៗត្រូវតែសម្អាតឱ្យបានហ្មត់ចត់ទាំងខាងក្នុង និងខាងក្រៅ។

៤.ផ្នែកណាមួយនៅក្នុងបន្ទប់ទឹក ឬផ្ទះបាយ៖ ផ្នែកណាមួយនៅក្នុងបន្ទប់ទឹក ឬផ្ទះបាយដូចជាវាំងនន កម្រាលព្រំ ឬសាឡុង ក្រណាត់ជូនជើង និងផ្ទៃកៅអី…សុទ្ធតែអាចប្រមូលផ្តុំមេរោគគ្រប់ពេលវេលា ដូច្នេះអ្នកគប្បីជូនសម្អាតកន្លែងទាំងនេះជាប្រចាំ។

៥.ផ្ទៃដែលប៉ះញឹកញាប់៖ ផ្ទៃដែលប៉ះញឹកញាប់ដូចជាកុងតាក់ពន្លឺ កូនសោទ្វារ ឡាបូ ក្បាលម៉ាស៊ីនទឹកបង្គន់ និងផ្ទៃដែលប៉ះញឹកញាប់ជាច្រើនទៀត ចាំបាច់ត្រូវសម្អាតឱ្យបានហ្មត់ចត់។

៦.ជំហាននៃច្រកចូលទាំងអស់៖ ទ្វារនៅក្នុងបន្ទប់រួម បន្ទប់ទឹក ឬកន្លែងផ្សេងទៀតដែលមនុស្សចេញចូលច្រើននឹងពោរពេញទៅដោយមេរោគពីខាងក្រៅផ្ទះ ហេតុនេះគួរជូតសម្អាតឱ្យបានទៀងទាត់។

៧.លូ៖ មិនថានៅក្នុងផ្ទះបាយ ឬបន្ទប់ទឹក បំពង់បង្ហូរទឹកក្នុងផ្ទះត្រូវបានប៉ះពាល់នឹងបាក់តេរីជាច្រើន ដូចនេះគួរឧស្សាហ៍បូមលូ។

៨.ម៉ាស៊ីនបន្សុទ្ធខ្យល់៖ ម៉ាស៊ីនទាំងនេះអាចប្រមូលធូលី និងលំអង ជាពិសេសនៅនិទាឃរដូវ ហេតុនេះគួរតែសម្អាតឱ្យបានល្អ។

គួរបញ្ជាក់ដែរថា មុនសម្អាតអ្នកគួរតែពាក់ស្រោមដៃនៅពេលធ្វើការជាមួយសារធាតុគីមីខ្លាំង ដើម្បីជៀសវាងការជ្រាបចូលទៅក្នុងស្បែក និងបណ្តាលឱ្យរលាក។ ចំពោះកង្ហារបង្វិលមិនគួរបើកនៅជិតផ្ទៃដែលកំពុងសម្អាតឡើយ ដើម្បីជៀសវាងហានិភ័យនៃការរីករាលដាលមេរោគទៅកន្លែងផ្សេងទៀតនៃផ្ទះ។ ប្រសិនបើមានទារក ឬអ្នកដែលមានភាពស៊ាំទន់ខ្សោយ ឬមនុស្សចាស់រស់នៅក្នុងផ្ទះ សូមសម្អាតឱ្យបានស្អាតនៅពេលដែលពួកគាត់មិននៅ ព្រោះបាក់តេរី និងផ្សិតអាចបង្កគ្រោះថ្នាក់ ប្រសិនបើស្រូបចូល ឬលេបចូល៕

តើឪពុក-ម្តាយគួរធ្វើបែបណា ដើម្បីស្រឡាញ់កូនឱ្យបានស្មើៗគ្នា? ឪពុក-ម្តាយគួរតែចាប់ផ្តើមស្វែងរកគុណសម្បត្តិរបស់កូនជាមុន វាប្រសើរជាងការចាប់កំហុសកូន ពីព្រោះកូនម្នាក់ៗតែងមានគុណសម្បត្តិរៀងៗខ្លួន ប្រសិនបើឪពុក-ម្តាយសង្កេតឱ្យបានល្អិតល្អន់ តាមរយៈការជជែកលេង ឬអង្គុយជាមួយកូន ។ ជឿចុះ កូនៗនឹងមានអារម្មណ៍ល្អ បើបានឪពុក-ម្តាយមកអង្គុយក្បែរ ។

កូនៗខ្លះមានអារម្មណ៍ថា ឪពុក-ម្តាយរបស់ខ្លួនពុំបានស្រឡាញ់កូនស្មើគ្នាទេ ហើយឪពុក-ម្តាយតែងតែកាន់ជើងកូនសំណព្វជានិច្ច និងចូលចិត្តស្តីបន្ទោសកូនផ្សេងទៀត ។ ហេតុនេះ ពួកគេនឹងមានអារម្មណ៍មួយតូចចិត្ត ហើយចង់ឱ្យឪពុក-ម្តាយផ្តល់ភាពយុត្តិធម៌ចំពោះពួកគេ ។ បើតាមលទ្ធផលការស្រាវជ្រាវមួយចំនួន ក៏បានលើកឡើងដូចគ្នាដែរថា ឪពុក-ម្តាយភាគច្រើនស្រឡាញ់កូនពុំស្មើគ្នាទេ ហើយតែងលម្អៀងទៅរកកូនសំណព្វជានិច្ច ។

ខាងក្រោមនេះ គឺជាលទ្ធផលការស្រាវជ្រាវរបស់អ្នកស្រាវជ្រាវអាមេរិក និងអង់គ្លេស អំពីការស្រឡាញ់របស់ឪពុក-ម្តាយចំពោះកូនៗ ៖

១-ឪពុក-ម្តាយ ស្មើនឹង៧០% តែងតែមានកូនសំណព្វចិត្ត ៖
យោងតាមលទ្ធផលស្រាវជ្រាវរបស់អ្នកស្រាវជ្រាវអាមេរិកមកពីសាកលវិទ្យាល័យ California បង្ហាញថា ឪពុក-ម្តាយ ស្មើនឹង៧០% តែងតែស្រឡាញ់កូនណាម្នាក់ខ្លាំងជាងកូនផ្សេងទៀត ហើយអ្នកស្រាវជ្រវជឿថា ជាទូទៅ ឪពុក-ម្តាយភាគច្រើនបានស្រឡាញ់កូនរបស់ខ្លួនពុំស្មើគ្នាទេ ហើយការបង្ហាញក្តីស្រឡាញ់វិញ ក៏ខុសៗគ្នាដែរ ។

២-បើគ្រួសារមានកូន២នាក់ ឪពុក-ម្តាយនឹងស្រឡាញ់កូនច្បងច្រើនជាងកូនពៅ ៖
លទ្ធផលស្រាវជ្រាវរបស់អ្នកស្រាវជ្រាវអង់គ្លេសមកពីសាកលវិទ្យាល័យ Bristol ឱ្យដឹងថា គ្រួសារណាមានកូន២នាក់ គឺឪពុក-ម្តាយតែងស្រឡាញ់កូនច្បងច្រើនជាងកូនពៅ ដោយសង្កេតតាមរយៈទង្វើមួយចំនួន ដូចជា ៖ យកចិត្តទុកដាក់យ៉ាងខ្លាំងជាមួយកូនច្បង និងផ្តល់អំណោយផ្សេងៗឱ្យកូនច្បង ។ ហេតុនេះ កូនច្បងមាន IQ ខ្ពស់ជាងកូនពៅ ដោយសារកូនច្បងបានទទួលចំណីអាហារល្អៗជាញឹកញាប់ ។

៣-ឪពុក-ម្តាយនៅទូទាំងពិភពលោក ស្រឡាញ់កូនពុំស្មើគ្នា និងស្រឡាញ់កូនមានអត្តចរិតដូចខ្លួន ៖
យោងតាមសៀវភៅដែលបានលក់ដាច់ជាងគេ ស្មើនឹង៩៥% បង្ហាញថា ឪពុក-ម្តាយនៅទូទាំងពិភពលោក ស្រឡាញ់កូនពុំស្មើគ្នាទេ ហើយចាត់ទុកកូនណាម្នាក់ជាកូនសំណព្វចិត្ត ។ រីឯឪពុក-ម្តាយ៥% ទៀត តែងតែនិយាយកុហកខ្លួនឯង និងពុំព្រមទទួលស្គាល់ការពិតថា ស្រឡាញ់កូនពុំស្មើគ្នា ។

បើតាមការស្រាវជ្រាវទិន្នន័យស៊ីជម្រៅបង្ហាញថា កូនប្រុសច្បង នឹងក្លាយជាកូនសំណព្វចិត្តរបស់ម្តាយពីកំណើត រីឯកូនស្រីពៅ នឹងទទួលសេចក្តីស្រឡាញ់ពីឪពុក ។ ក្រៅពីនេះ ការស្រាវជ្រាវបង្ហាញទៀតថា ឪពុក-ម្តាយតែងស្រឡាញ់កូនដែលមានអត្តចរិតដូចខ្លួនច្រើនជាងកូនផ្សេងទៀត ដោយសារកូនមានចរិតដូចឪពុក-ម្តាយ នឹងធ្វើឱ្យពួកគាត់នឹកឃើញពីវ័យកុមារ ។

៤-ឪពុក-ម្តាយភាគច្រើនតែងស្រឡាញ់កូនច្បងច្រើនជាងកូនផ្សេងទៀត ៖
លទ្ធផលការស្រាវជ្រាវរបស់សាស្ត្រាចារ្យ Catherine Tu មកពីសាកលវិទ្យាល័យ California បង្ហាញថា ឪពុក-ម្តាយភាគច្រើននឹងផ្តល់ក្តីស្រឡាញ់ដល់កូនច្បងច្រើនជាងគេ ។ រីឯការស្ទង់មតិជាមួយយុវវ័យបង្ហាញថា ពួកគេមានអារម្មណ៍ថា ទទួលក្តីស្រឡាញ់ពីឪពុក-ម្តាយពុំស្មើគ្នា ហើយវាមិនយុត្តិធម៌ទេ ដែលឪពុក-ម្តាយស្រឡាញ់កូនលើសខ្វះគ្នាបែបនេះ ៕

Cruise គឺជាក្រុមហ៊ុនរថយន្តបើកបរដោយស្វ័យប្រវត្តិ បានប្រកាសសាកល្បងផ្តល់សេវាកម្មដល់អតិថិជនម្តងទៀត ក្រោយពីអាជ្ញាធរបញ្ជាឱ្យក្រុមហ៊ុននេះផ្អាកការផ្តល់សេវាកម្មទាំងអស់ ចាប់ពីខែតុលា ឆ្នាំ២០២៣ ដោយសាររថយន្តរបស់ក្រុមហ៊ុនបានបើកបុកមនុស្ស និងអូសតាមផ្លូវ ស្មើជាង៦ម៉ែត្រ ។ ហេតុការណ៍គ្រោះថ្នាក់ចរាចរណ៍នេះ បានធ្វើឱ្យ CEO របស់ក្រុមហ៊ុន Cruise សម្រេចចិត្តលាឈប់ពីតំណែង ព្រមទាំងបញ្ឈប់បុគ្គលិករាប់រយនាក់ពីការងារក្នុងពេលតែមួយ ។

អ្នកតំណាងក្រុមហ៊ុន Cruise និយាយថា ក្រុមហ៊ុននេះនៅតែមានគោលដៅដូចមុន គឺការផ្តល់សេវាកម្មរថយន្តបើកបរដោយស្វ័យប្រវត្តិ ប៉ុន្តែបច្ចុប្បន្ន ក្រុមហ៊ុនត្រូវតែព្យាយាមធ្វើឱ្យអតិថិជនមានទំនុកចិត្តឡើងវិញ ។ ក្រុមហ៊ុននឹងសាកល្បងរថយន្តបើកបរដោយស្វ័យប្រវត្តិនៅតាមទីក្រុងមួយចំនួន ហើយរថយន្តទាំងនេះនឹងបើកបរតាមផែនទី និងទិន្នន័យផ្លូវដែលបង្កើតឡើងដោយប្រព័ន្ធ ។

ក្រុមហ៊ុន Cruise បញ្ជាក់ថា នៅដំណាក់កាលដំបូង គឺរថយន្តរបស់ក្រុមហ៊ុននឹងបើកបរដោយស្វ័យប្រវត្តិផ្អែកតាមផែនទី និងទិន្នន័យផ្លូវធ្វើដំណើរ មុនពេលឈានទៅដល់ការបើកបរដោយស្វ័យប្រវត្តិទាំងស្រុង ។ ហេតុនេះ ក្រុមហ៊ុននឹងដំណើរការសាកល្បងរថយន្តបើកបរដោយស្វ័យប្រវត្តិ នៅទីក្រុង Phoenix រដ្ឋ Arizona មុនគេ ។

ក្នុងអំឡុងពេលផ្អាកសេវាកម្មរថយន្តបើកបរដោយស្វ័យប្រវត្តិនាពេលកន្លងមក ក្រុមហ៊ុន Cruise ប្រាប់ថា ក្រុមហ៊ុនបានសាកល្បងបើកបររថយន្តនៅទីកន្លែងស្មុគស្មាញ និងកែលម្អប្រព័ន្ធបើកបរបន្ថែមទៀត ហើយក្រុមហ៊ុនបានបង្កើតផែនទី និងទិន្នន័យផ្លូវធ្វើដំណើរយ៉ាងលម្អិត ដើម្បីឱ្យការផ្តល់សេវាកម្មដល់អតិថិជនកាន់តែមានសុវត្ថិភាពខ្លាំងឡើង ។

បច្ចុប្បន្ន ក្រុមហ៊ុនបានសាកល្បងប្រព័ន្ធបើកបរដោយស្វ័យប្រវត្តិមួយជំហានម្តងៗ ព្រមទាំងសាកល្បងនៅទីក្រុងមួយសិន រួចហើយ ទើបសាកល្បងនៅទីក្រុងមួយទៀត ដោយសារនៅទីក្រុងនីមួយៗមានស្ថានភាព និងបរិស្ថានខុសៗគ្នា ៕

បរទេស៖ ក្រុមហ៊ុន Apple បានផ្ញើការជូនដំណឹងដល់អ្នកប្រើប្រាស់ iPhone ក្នុងប្រទេសចំនួន ៩២ ដែលមានហានិភ័យក្លាយជាជនរងគ្រោះនៃ “ការវាយប្រហារចារកម្មស៊ីឈ្នួល” ទោះជាយ៉ាងណាក្រុមហ៊ុនមិនបានបញ្ជាក់ប្រទេសណាមួយច្បាស់លាស់នោះទេ។
យោងតាមខ្លឹមសារដែលបានបង្ហោះនៅលើគេហទំព័រ Reuters កាលពីថ្ងៃទី១០ ខែមេសា ឆ្នាំ២០២៤ថា Apple បានរកឃើញមនុស្សអាក្រក់កំពុងព្យាយាម “កេងប្រវ័ញ្ច iPhone ពីចម្ងាយតាមរយៈ spyware ស៊ីឈ្នួល” ។ ទោះជាយ៉ាងណាក៏ដោយ នេះមិនមែនសំដៅលើអ្នកប្រើប្រាស់ទាំងអស់នោះទេ ប៉ុន្តែមានតែគោលដៅជាក់លាក់ប៉ុណ្ណោះ ដូចជាអ្នកនយោបាយ អ្នកសារព័ត៌មាន អង្គការស៊ីវិល និងអាជីវកម្មជាដើម។

Apple បាននិយាយថា “ការវាយប្រហារបែបនេះគឺមានភាពស្មុគស្មាញជាងសកម្មភាពឧក្រិដ្ឋកម្មតាមអ៊ីនធឺណិតធម្មតាទៅទៀត”។ អ្នកវាយប្រហារប្រើប្រាស់ធនធានឯកទេស ដោយកំណត់គោលដៅបុគ្គលជាក់លាក់មួយចំនួនតូច ហើយការវាយប្រហារដោយ spyware ទាហានស៊ីឈ្នួលអាចចំណាយប្រាក់រាប់លានដុល្លារ ដូច្នេះមេរោគជាធម្មតាមានរយៈពេលខ្លី ហើយវាពិតជាពិបាកក្នុងការស្វែងរក និងការពារណាស់។ ហេតុនេះហើយទើបក្រុមហ៊ុន Apple បានផ្ញើការជូនដំណឹងអំពីការគំរាមកំហែងនេះតាមរយៈអ៊ីមែលចុះឈ្មោះ Apple ID ព្រមទាំង iMessage ដល់ជនរងគ្រោះដែលមានសក្តានុពលក្នុង ៩២ ប្រទេស។ ដោយក្រុមហ៊ុន Apple បាននិយាយថា ចាប់ពីឆ្នាំ ២០២១ រហូតមកដល់ពេលនេះ ក្រុមហ៊ុនបានផ្ញើការជូនដំណឹងទៅកាន់អ្នកប្រើប្រាស់ដែលមានហានិភ័យក្នុងប្រទេសចំនួន ១៥០ ប៉ុន្តែមិនបានបញ្ជាក់ប្រទេសណាមួយច្បាស់លាស់នោះទេ។

ក្នុងរយៈពេល ៣ ឆ្នាំកន្លងមកនេះ Apple បានចេញការព្រមានស្រដៀងគ្នាជាច្រើន ប៉ុន្តែនេះជាលើកទីមួយហើយដែលក្រុមហ៊ុនបានប្រើឃ្លាថា “Spyware for hire”។ ក្នុងឱកាសមុនៗ ក្រុមហ៊ុនបានហៅវាថា “អ្នកវាយប្រហារដែលឧបត្ថម្ភដោយរដ្ឋ”។ យោងតាមប្រភពដែលបាននិយាយទៅកាន់ Reuters ការផ្លាស់ប្តូរនេះកើតឡើងបន្ទាប់ពីក្រុមហ៊ុន Apple ប្រឈមមុខនឹងសម្ពាធជាបន្តបន្ទាប់ពីរដ្ឋាភិបាលឥណ្ឌាដើម្បីភ្ជាប់ការបំពានទៅនឹងតួអង្គរដ្ឋ។ ចំពោះអនុសាសន៍ខាងលើគឺទាក់ទងទៅនឹងមេរោគ Pegasus ពី NSO Group (អ៊ីស្រាអែល) ដែលត្រូវបានរកឃើញនៅលើ iPhone និង iPad ក្នុងឆ្នាំ ២០២១។ នៅពេលនោះ Amnesty International បាននិយាយថា ខ្លួនបានរកឃើញភស្តុតាងនៃ iPhone 12 ត្រូវបានវាយប្រហារ ដែលបណ្តាលឱ្យមានការបែកធ្លាយលេខទូរស័ព្ទចំនួន ៥០,០០០ ខ្សែ។

បន្ទាប់មកនៅខែកញ្ញាឆ្នាំដដែល Apple ក៏បានចេញបំណះសង្គ្រោះបន្ទាន់ បន្ទាប់ពី iPhone របស់សកម្មជនសង្គមនៅអារ៉ាប៊ីសាអូឌីតបានឆ្លងមេរោគ Pegasus ។ ជាមួយគ្នានេះ កម្មវិធីនេះក៏ត្រូវបានគេរកឃើញ នៅលើទូរស័ព្ទរបស់រដ្ឋមន្ត្រីបារាំងយ៉ាងតិច ៥ នាក់ផងដែរ។ នៅក្នុងខែវិច្ឆិកា ឆ្នាំ២០២១ Apple បានដាក់ពាក្យប្តឹង NSO Group ដោយស្នើឱ្យហាមឃាត់ក្រុមហ៊ុនជាអចិន្ត្រៃយ៍ពីការប្រើប្រាស់កម្មវិធី សេវាកម្ម ឬឧបករណ៍របស់ខ្លួន។ ទោះជាយ៉ាងណា NSO Group បានបញ្ជាក់ថា កម្មវិធីរបស់ខ្លួនត្រូវបានបង្កើតឡើងដើម្បីតាមដានភេរវករដែលមានសក្តានុពល និងប្រយុទ្ធប្រឆាំងនឹងឧក្រិដ្ឋកម្មដែលបានរៀបចំ ដោយមិនទទួលស្គាល់ចំពោះការ Hack អ្វីនោះទេ៕

ក្នុងឱកាសបុណ្យចូលឆ្នាំខាងមុខដែលនឹងប្រព្រឹត្តទៅនៅថ្ងៃទី១៣ ដល់ទី១៦ ខែមេសា ឆ្នាំ២០២៤ នេះក្រៅពីទៅវត្តធ្វើបុណ្យ និងលែងល្បែងប្រជាប្រិយ កូនចៅគ្រប់រូបប្រាកដជាធ្វើដំណើរកម្សាន្តទៅកាន់ស្រុកកំណើតរៀងៗខ្លួនដើម្បីជួបជុំបងប្អូនឪពុកម្តាយ ជីដូនជីតា និងអ្នកមានគុណទាំងឡាយ ក៏ដូចជាជូននូវសម្លៀកបំពាក់លុយកាក់សម្ភារៈផ្សេងៗដល់ពួកគាត់។ ទោះជាយ៉ាងណា កូនចៅមួយចំនួនប្រាកដជាមិនទាន់ដឹងទេថា ក្រៅពីសម្លៀកបំពាក់ថ្មីៗនិងលុយកាក់ តើមានអំណោយពិសេសអ្វីខ្លះទៀតដែលស័ក្តសមទិញជូនចាស់ទុំក្នុងឱកាសបុណ្យចូលឆ្នាំ? ដូច្នេះខាងក្រោមនេះគឺជាអំណោយដែលស័ក្តសមបំផុតសម្រាប់ទិញជូនចាស់ទុំ៖

១.កន្ត្រកផ្លែឈើ៖ វាជាអំណោយដ៏ងាយស្រួលបំផុតក្នុងការទិញ ដោយសារតែផ្សារទំនើប ឬហាងលក់ទំនិញផ្សេងៗសុទ្ធតែមាន ហើយវាក៏មានតម្លៃធូរថ្លៃផងដែរ ហេតុនេះការជ្រើសរើសផ្តល់កន្ត្រកផ្លែឈើគឺជាអំណោយដ៏សំខាន់មួយសម្រាប់សុខភាព។

២.ដើមឈើ៖ ការជ្រើសរើសដើមឈើ គឺជាអំណោយមួយដែលល្អបំផុតសម្រាប់មនុស្សចាស់ ព្រោះមនុស្សចាស់ភាគច្រើនចូលចិត្ត និងស្រលាញ់ធម្មជាតិ។ ដូច្នេះអំណោយដើមឈើគឺមានផាសុកភាពផ្លូវចិត្ត និងអាចធ្វើឱ្យមនុស្សចាស់មានអារម្មណ៍ល្អ។

៣. អំណោយសម្រាប់សុខភាព៖ សម្រាប់មនុស្សចាស់សុខភាពគឺជារឿងសំខាន់ដែលគួរយកចិត្តទុកដាក់។ ដូច្នេះហើយការជ្រើសរើសអំណោយសម្រាប់សុខភាព មិនថាជាអាហារបំប៉នផ្សេងៗ ថ្នាំដង្កូវ រួមទាំងឧបករណ៍ហាត់ប្រាណដែលសមស្របនឹងអាយុរបស់ពួកគាត់ ឬសូម្បីតែរបស់របរប្រើប្រាស់ប្រចាំថ្ងៃដូចជា ក្រែមបំប៉ន សាប៊ូដុសខ្លួន និងសាប៊ូកក់សក់ជាដើម ក៏ជារបស់ដែលធ្វើឱ្យញាតិសន្តានមានវ័យចំណាស់ពេញចិត្តផងដែរ។

៤.សម្លៀកបំពាក់ថ្មីៗ៖ មនុស្សចាស់ច្រើនតែចូលចិត្តទៅវត្ត ធ្វើបុណ្យ និងប្រតិបត្តិធម៌ ហេតុនេះការជ្រើសរើសសម្លៀកបំពាក់ថ្មីៗសម្រាប់ធ្វើបុណ្យគឺជាអំណោយពិសេសមួយ។

៥.សម្ភារៈធ្វើបុណ្យ៖ សម្ភារៈធ្វើបុណ្យដូចជាធូប ទានក្រអូប ស្លាដក ឬទឹកអប់គឺជាអំណោយមួយទៀតដែលមនុស្សចាស់ពេញចិត្ត។

៦.កញ្ចប់ធ្វើដំណើរ៖ ក្នុងអំឡុងពេលចូលនិវត្តន៍ មនុស្សចាស់ភាគច្រើននៅតែមានសុខភាពល្អអាចធ្វើដំណើរបាន។ ដូច្នេះការជ្រើសរើសទិញកញ្ចប់ធ្វើដំណើរដែលមានទាំងក្នុងប្រទេស និងក្រៅប្រទេសអាចបង្កើតសុភមង្គល ហើយវាក៏ជាការពេញចិត្តសម្រាប់មនុស្សចាស់ផងដែរ។

៧.ឧបករណ៍អគ្គិសនីក្នុងផ្ទះ៖ ការជ្រើសរើសអំណោយដូចជារបស់ប្រើប្រាស់ក្នុងផ្ទះគឺជាអំណោយដ៏មានប្រយោជន៍បំផុត ហើយបច្ចុប្បន្ននេះមានឧបករណ៍អគ្គិសនីក្នុងផ្ទះជាច្រើនប្រភេទសម្រាប់ជ្រើសរើស អ្នកអាចជ្រើសរើសតាមចំណូលចិត្តរបស់មនុស្សម្នាក់ៗបាន។

៨.ម៉ាស៊ីនបន្សុទ្ធខ្យល់៖ នាពេលបច្ចុប្បន្ននេះ វាហាក់បីដូចជាម៉ាស៊ីនបន្សុទ្ធខ្យល់គឺជាឧបករណ៍អគ្គិសនីដ៏សំខាន់មួយទៀតសម្រាប់គ្រប់គ្រួសារ ព្រោះផ្ទះរបស់យើងកំពុងប្រឈមមុខនឹងបញ្ហាធូលី PM 2.5។ ការផ្តល់ម៉ាស៊ីនបន្សុទ្ធខ្យល់ដល់មនុស្សចាស់ដែលយើងស្រលាញ់គឺដូចជាផ្តល់ខ្យល់អាកាសល្អដល់ពួកគាត់អញ្ចឹង។

៩.សាច់ប្រាក់៖ ការគិតអំពីអំណោយអ្វីដែលត្រូវផ្តល់ឱ្យជួនកាលពិបាកសម្រាប់មនុស្សពេញវ័យមួយចំនួន។ ប៉ុន្តែការផ្តល់ឱ្យអ្នកនូវសាច់ប្រាក់ហាក់ដូចជារឿងងាយស្រួលបំផុតដើម្បីធ្វើ ព្រោះលុយអាចប្រើដើម្បីទិញអ្វីដែលអ្នកចង់បាន៕

ប្រទេសវៀតណាម ៖ កាលពីថ្ងៃទី១១ ខែមេសា ឆ្នាំ២០២៤ តុលាការប្រជាជននៅទីក្រុងហូជីមិញ បាន កា.ត់ទោ.សប្រ.ហារជីវិ.ត អ្នកស្រី Truong My Lan អាយុ៦៧ឆ្នាំ ជាប្រធានក្រុមហ៊ុនអភិវឌ្ឍន៍អចលនទ្រព្យដ៏ធំនៅប្រទេសវៀតណាម ឈ្មោះ Van Thinh Phat ក្រោយពីរកឃើញថា អ្នកស្រី Truong My Lan បានឆបោកប្រាក់ពីធនាគារ Saigon Commercial Bank ចំនួនជាង១២.៥៣០លានដុល្លារអាមេរិក ក្នុងរយៈពេល១១ឆ្នាំ ។

គេចាត់ទុកថា វាជាករណីឆបោកប្រាក់ពីធនាគារដ៏ច្រើនបំផុតនៅប្រទេសវៀតណាម និងលើពិភពលោក ហើយតុលាការវៀតណាមបានសម្រេចកាត់ទោសប្រហារជីវិតមហាសេដ្ឋីអចលនទ្រព្យ ។ ក្រៅពីអ្នកស្រី Truong My Lan នៅមានជនជាប់ចោទផ្សេងទៀតចំនួន៨៥នាក់ ក៏ត្រូវបានតុលាការកាត់ទោសពីបទកេងបន្លំទ្រព្យសម្បត្តិ និងរំលោភច្បាប់ធនាគារផងដែរ ក្នុងនោះជនជាប់ចោទ៤នាក់ ត្រូវបានតុលាការកាត់ទោសឱ្យជាប់ពន្ធនាគារអស់មួយជីវិត ។

ចំណែកជនជាប់ចោទផ្សេងទៀតត្រូវបានតុលាការកាត់ទោសឱ្យជាប់ពន្ធនាគារជាមធ្យមរយៈពេល២០ឆ្នាំ ។ រីឯលោក Eric Chu Nap Kee ត្រូវជាស្វាមីរបស់អ្នកស្រី Truong My Lan តុលាការបានកាត់ទោសឱ្យជាប់ពន្ធនាគាររយៈពេល៩ឆ្នាំ ។

ការកេងបន្លំទ្រព្យសម្បត្តិពីធនាគារ Saigon Commercial Bank ស្មើជាង១២.៥៣០លានដុល្លារអាមេរិក ដែលស្មើនឹង៦% នៃផលិតផលក្នុងស្រុកសរុប (GDP) របស់វៀតណាម បានចាប់ផ្តើមតាំងពីឆ្នាំ២០១១ មកម៉្លេះ គឺក្នុងអំឡុងពេលអ្នកស្រី Truong My Lan ចាប់ផ្តើមទិញភាគហ៊ុនរបស់ធនាគារវៀតណាម ចំនួន៣ ។ អ្នកស្រីបានកាន់ភាគហ៊ុនដាក់ឈ្មោះរបស់ខ្លួន ត្រឹមតែ៤% ប៉ុណ្ណោះ ដោយសារច្បាប់វៀតណាមកំណត់ថា បុគ្គលធម្មតាអាចកាន់កាប់ភាគហ៊ុនរបស់ធនាគារ មិនលើសពី៥% ។

១ឆ្នាំក្រោយមក អ្នកស្រី Truong My Lan ជាសេដ្ឋីអចលនទ្រព្យរបស់វៀតណាម ក៏បានរួមភាគហ៊ុនរបស់ធនាគារទាំង៣ បញ្ចូលគ្នា នៅក្រោមឈ្មោះធនាគារ Saigon Commercial Bank ហើយអ្នកស្រីនៅបន្តកាន់កាប់ភាគហ៊ុនក្រោមឈ្មោះរបស់ខ្លួន ត្រឹមតែ៤% ។ បន្ទាប់មក អ្នកស្រី Truong My Lan បានបញ្ជូនមនុស្សជិតស្និទ្ធទៅកាន់តំណែងជានាយកគ្រប់គ្រងជាន់ខ្ពស់របស់ធនាគារ Saigon Commercial Bank ដើម្បីសម្រួលឱ្យក្រុមហ៊ុនរបស់ខ្លួន ឈ្មោះ Van Thinh Phat អាចខ្ចីប្រាក់ពីធនាគារដោយគ្មានដែនកំណត់ និងពុំចាំបាច់ត្រួតពិនិត្យឯកសារអ្វីទាំងអស់ ។

នៅទីបំផុត ការកេងបន្លំប្រាក់យ៉ាងច្រើនពីធនាគាររបស់អ្នកស្រី Truong My Lan ក៏ត្រូវបានគេលើកយកមកលាតត្រដាងបង្ហាញការពិត និងដាក់ពាក្យបណ្តឹងទៅតុលាការឱ្យកាត់ទោសអ្នកស្រី Truong My Lan តាមច្បាប់ ។ កន្លងមក រដ្ឋាភិបាលវៀតណាមបានបង្ក្រាបអំពើពុករលួយយ៉ាងខ្លាំងក្លា ហើយធ្វើឱ្យប្រធានាធិបតី២រូប និងឧបនាយករដ្ឋមន្ត្រី២រូប ត្រូវចុះចេញពីតំណែង ខណៈមន្ត្រីរដ្ឋាភិបាលពុករលួយរាប់រយនាក់ទៀតបានជាប់ពន្ធនាគារជាបន្តបន្ទាប់ ។

រយៈពេល១ខែកន្លងមកនេះ តុលាការវៀតណាមបានពិចារណាលើសំណុំរឿងក្តី ដោយផ្អែកលើភស្តុតាងសរុបចំនួន១០៤ប្រអប់ធំៗ មានទម្ងន់៦តោន និងមានជនជាប់ចោទ ចំនួន៨៥នាក់ ។ តុលាការវៀតណាមបានបង្ហាញព័ត៌មានលម្អិតឱ្យសាធារណជនបានជ្រាបដោយគ្មានការលាក់បាំង ហើយតុលាការបានកោះហៅមនុស្សចំនួន២.៧០០នាក់ មកធ្វើជាសាក្សី ព្រមទាំងមានមេធាវីពាក់ព័ន្ធនឹងរឿងក្តី ប្រមាណ២០០នាក់ ប៉ុន្តែជនជាប់ចោទគ្រប់រូបបានបដិសធរាល់ការចោទប្រកាន់ ។

ក្រោយពីតុលាការវៀតណាមកាត់ទោសប្រហារជីវិតមហាសេដ្ឋីអចលនទ្រព្យ បានធ្វើឱ្យមហាជនអបអរសាទរយ៉ាងខ្លាំង ហើយគេសង្ឃឹមថា មហាសេដ្ឋីអចលនទ្រព្យផ្សេងទៀតដែលចូលចិត្តរកស៊ីបោកប្រាស់ និងឆបោកប្រាក់ពីពលរដ្ឋ នឹងត្រូវតុលាការកាត់ទោសប្រហារជីវិតដូចគ្នាដែរ ៕