ប្រទេសចិន ៖ ភេសជ្ជៈថ្មី និងប្លែក គឺ «តែទឹកដោះគោស្លឹកខ្ទឹម» កំពុងតែល្បីល្បាញក្នុងបណ្តាញសង្គមប្រទេសចិននាពេលបច្ចុប្បន្ន ដោយសារការបង្កើតភេសជ្ជៈនេះឡើង គឺដើម្បីផ្គាប់ចិត្តអ្នកចូលចិត្តបរិភោគបន្លែច្រើនៗ ។ ប៉ុន្តែមនុស្សខ្លះទៀតបែរជានិយាយថា ហេតុអ្វីមានភេសជ្ជៈប្លែកៗបែបនេះ?

កាលពីថ្ងៃទី២៦ ខែមេសា ឆ្នាំ២០២៤ សារព័ត៌មានបរទេសរាយការណ៍ថា វាបានល្បីល្បាញភ្លាមៗនៅប្រទេសចិន ក្រោយពេលបញ្ជី Instagram មួយឈ្មោះ «jintianchinatan» ដែលជាបញ្ជីបង្ហោះពីម្ហូបអាហារ និងភេសជ្ជៈនៅប្រទេសចិន បានបង្ហោះភេសជ្ជៈទឹកដោះគោ ប៉ុន្តែដឹកស្លឹកខ្ទឹម ។

ក្នុងវីដេអូនេះបានបង្ហាញឱ្យឃើញពីភេសជ្ជៈថ្មី «តែទឹកដោះគោស្លឹកខ្ទឹម» ព្រមទាំងវិធីធ្វើងាយៗ ដោយការហាន់ស្លឹមខ្ទឹមជាកង់តូចៗ និងយកវាមកដាក់ក្នុងកែវរហូតជិតពេញកែវ ។ បន្ទាប់មក ចាក់តែទឹកដោះគោចូលក្នុងកែវ និងពុំចាំបាច់ដាក់ទឹកកកទេ ហើយក្នុងវីដេអូនេះថែមទាំងបានបង្ហាញពីការផឹកតែទឹកដោះគោស្លឹកខ្ទឹមទៀតផង ។

ក្រោយពីវីដេអូនេះនបង្ហោះក្នុង Instagram នៅប្រទេសចិន បានធ្វើឱ្យមហាជនចាប់អារម្មណ៍យ៉ាងខ្លាំង ហើយមានចំនួនអ្នកចូលទស្សនារហូតដល់១១លានលើក ។ វាបានធ្វើឱ្យអ្នកលេងបណ្តាញសង្គមជាច្រើននាក់បញ្ចេញមតិផ្សេងៗគ្នាថា ៖ កុំភ្លេចដាក់ខ្ទឹមសផង, តើអ្នកណារកនឹកបង្កើតភេសជ្ជៈថ្មីនេះ, ខ្ញុំចូលចិត្តស្លឹកខ្ទឹម តែបើយកវាមកដាក់ក្នុងតែទឹកដោះគោ គឺផឹកពុំកើតទេ ។

ទោះយ៉ាងណា មានអ្នកលេងបណ្តាញសង្គមជាច្រើននាក់ចង់សាកល្បងផឹកភេសជ្ជៈថ្មីនេះ ដើម្បីចង់ដឹងថា វាមានរសជាតិបែបណា និងឆ្ងាញ់ឬអត់ ។ រីឯអ្នកលេងបណ្តាញសង្គមខ្លះទៀតនិយាយថា ពុំចាំបាច់ធ្វើដំណើរទៅឆ្ងាយដល់ប្រទេសចិនទេ គឺអាចធ្វើភេសជ្ជៈនេះផឹកដោយខ្លួនឯងនៅផ្ទះ ពីព្រោះវិធីធ្វើមិនពិបាក ៕

សារព័ត៌មានបរទេសបានរាយការណ៍កាលពីថ្ងៃទី២៥ ខែមេសា ឆ្នាំ២០២៤ ថា អង្គការ NASA បានសហការជាមួយក្រុមហ៊ុន Nokia ត្រៀមបញ្ជូនបណ្តាញអ៊ីនធើរណេត 4G ទៅដំឡើងលើឋានព្រះច័ន្ទ ដើម្បីឱ្យអាកាសយានិកអាចលេងអ៊ីនធើរណេតទាក់ទងមកកាន់ផែនដី និងងាយស្រួលបញ្ជូនទិន្នន័យវិទ្យាសាស្ត្រ បើទោះជាពួកគេស្ថិតនៅក្រៅផែនដីក៏ដោយ ។

បច្ចុប្បន្ន អ៊ីនធើរណេតបានក្លាយជាឧបករណ៍មួយដ៏សំខាន់សម្រាប់មនុស្សនៅជុំវិញពិភពលោក ស្វែងរកចំណេះដឹង និងការកម្សាន្តផ្សេងៗតាមតម្រូវការ ។ ប៉ុន្តែបើនៅថ្ងៃណាមួយក្នុងអនាគតឆាប់ៗនេះ ឬថ្ងៃដែលមនុស្សត្រូវផ្លាស់ទីលំនៅទៅរស់នៅលើឋានព្រះច័ន្ទ តើយើងនឹងអាចលេងអ៊ីនធើរណេតបានទៀតទេ?

ការលេងអ៊ីនធើរណេតបាន បើទោះជាយើងរស់នៅភពផ្សេងក្រៅពីលើផែនដី មិនមែនជារឿងថ្ងៃអនាគតទៀតទេ ពីព្រោះបច្ចុប្បន្ន អង្គការ NASA និង Nokia ជាក្រុមហ៊ុនបច្ចេកវិទ្យាព័ត៌មាន និងឧបករណ៍អេឡិចត្រូនិករបស់ប្រទេសហ្វាំងឡង់ បានសហការគ្នាដំឡើងអ៊ីនធើរណេតនៅលើឋានព្រះច័ន្ទ ។ គម្រោងនេះមានគោលបំណងសម្រាប់រយៈពេលវែង ដើម្បីជួយដល់ការរស់នៅរបស់មនុស្សនៅភពផ្សេងទៀតក្រៅពីផែនដី ។

រ៉ុក្កែត SpaceX មានគម្រោងធ្វើដំណើរនៅឆ្នាំ២០២៤នេះ ប៉ុន្តែពុំទាន់បញ្ជាក់ពីកាលបរិច្ឆេទជាក់លាក់ គ្រោងដឹកជញ្ជូនបណ្តាញអ៊ីនធើរណេត 4G ធម្មតាទៅកាន់ឋានព្រះច័ន្ទ ។ បន្ទាប់មក នឹងដំឡើងប្រព័ន្ធអ៊ីនធើរណេតនៅប៉ូលខាងត្បូងរបស់ព្រះច័ន្ទ ព្រមទាំងសាកល្បងគ្រប់គ្រងការបញ្ជាពីផែនដីក្នុងចម្ងាយឆ្ងាយ ។

Walt Engelund នាយករងផ្នែកបច្ចេកវិទ្យាអវកាសរបស់អង្គការ NASA និយាយថា ៖ «បញ្ហាប្រឈមដំបូងក្នុងការដំឡើង និងប្រើប្រាស់បណ្តាញអ៊ីនធើរណេត គឺការមានឧបករណ៍ Cellular ដែលតម្រូវឱ្យវាស្របនឹងការកំណត់ ដូចជា ៖ ទំហំ, ទម្ងន់ និងថាមពលសមស្រប រហូតដល់ការប្រើប្រាស់ដោយពុំចាំបាច់ត្រូវការជាងបច្ចេកទេស ។ រីឯបរិយាកាសលើឋានព្រះច័ន្ទបានធ្វើឱ្យមានបញ្ហាប្រឈមជាច្រើនទៀត ដូចជា ៖ លក្ខខណ្ឌសីតុណ្ហភាព និងវិទ្យុសកម្មខ្លាំង» ។

បណ្តាញអ៊ីនធើរណេត 4G ដែលនឹងត្រូវយកទៅដំឡើងនៅឋានព្រះច័ន្ទនេះ បានបង្កើតឡើងដោយ Bell Labs របស់ក្រុមហ៊ុន Nokia ដែលប្រើប្រាស់ឧបករណ៍ងាយស្រួលស្វែងរក ។ បន្ទាប់មក គេនឹងបញ្ជូនវាទៅកាន់យានអវកាសដែលផលិតដោយក្រុមហ៊ុន Intuitive Machines របស់អាមេរិក ។ ការតភ្ជាប់ប្រព័ន្ធទំនាក់ទំនងតាមអ៊ីនធើរណេតជាបញ្ហាដ៏សំខាន់សម្រាប់គម្រោង Artemis របស់អង្គការ NASA ខណៈអង្គការនេះមានគោលដៅបញ្ជូនអាកាសយានិកទៅឋានព្រះច័ន្ទក្នុងទសវត្សរ៍នេះ ។

Walt Engelund នាយករងផ្នែកបច្ចេកវិទ្យាអវកាសរបស់អង្គការ NASA ប្រាប់ថា អាកាសយានិកបានជជែកគ្នាតាមវិទ្យុ ប៉ុន្តែអង្គការ NASA ចង់ឱ្យការទំនាក់ទំនងនៅឋានព្រះច័ន្ទអាចទំនាក់ទំនងគ្នាជាវីដេអូ និងជ្រាបពីទិន្នន័យវិទ្យាសាស្ត្របានលម្អិត ជាពិសេសបំផុត ពេលការបំពេញភារកិច្ចរបស់ Artemis ជួបបញ្ហាប្រឈមខ្លាំង ។ Walt Engelund និយាយថា ៖ «សមត្ថភាពក្នុងការទំនាក់ទំនងនៅលើឋានព្រះច័ន្ទ គឺជាបញ្ហាសំខាន់សម្រាប់ Artemis ដូចគ្នានឹងភារកិច្ចផ្សេងទៀតដែរ ដូចជា ៖ ថាមពល, ទឹកផឹក និងខ្យល់ដកដង្ហើម» ។

នាយករងផ្នែកបច្ចេកវិទ្យាអវកាសរបស់អង្គការ NASA រូបនេះបន្តថា ៖ «នៅទីបំផុត ការព្យាយាមនេះនឹងអាចតភ្ជាប់ទំនាក់ទំនងលើឋានព្រះច័ន្ទ ដែលធ្វើឱ្យអ្នកស្រាវជ្រាវរបស់យើងអាចបញ្ជូនទិន្នន័យវិទ្យាសាស្ត្រមកកាន់ផែនដី ដើម្បីពិភាក្សាជាមួយផ្នែកគ្រប់គ្រងបេសកកម្មទៅឋានព្រះច័ន្ទ ។ ក្រៅពីនេះ អាកាសយានិកក៏អាចជជែកជាមួយក្រុមគ្រួសារពួកគេផងដែរ ដូចគ្នានឹងពួកគេកំពុងស្ថិតនៅលើផែនដី ឬកាន់ទូរស័ព្ទដៃដើរតាមផ្លូវ» ។

បើគម្រោងនេះទទួលបានជោគជ័យ គេនឹងអាចដំឡើងអ៊ីនធើរណេតនៅក្រៅផែនដី និងអាចទាក់ទងគ្នាមិនខុសពីអ៊ីនធើរណេតនៅលើផែនដី ហើយឧបករណ៍អេឡិចត្រូនិកបុគ្គលមនឹងអាចតភ្ជាប់ជាមួយបណ្តាញនេះផងដែរ ។ ដូច្នេះ វានឹងធ្វើឱ្យអាកាសយានិកអាចប្រើប្រាស់ទូរស័ព្ទស្មាតហ្វូន, App ផ្សេងៗ និងកម្មវីធីទាំងអស់មិនខុសគ្នាពីអ្នករស់នៅលើផែនដីទេ ៕

ប្រទេសឥណ្ឌា គឺជាប្រទេសដែលគួរឱ្យចាប់អារម្មណ៍បំផុតនៅក្នុងពិភពលោក ដោយសារទំនៀមទម្លាប់ របៀបរស់នៅ ការគោរពសាសនា និងប្រពៃណីវប្បធម៌ប្លែកៗខុសពីគេ ដែលប្រទេសជាច្រើនមិនមានដូច។ ទោះបីជាបច្ចុប្បន្នប្រទេសនេះមានបច្ចេកវិទ្យាទំនើបៗប៉ុណ្ណាក៏ដោយ ក៏ពួកគេនៅតែជឿលើជំនឿប្លែកៗរបស់ពួកគេ។ ដូច្នេះអត្ថបទនេះនឹងនាំលោកអ្នកមកដឹងពីទំនៀមទម្លាប់ និងរឿងរ៉ាវប្លែកៗរបស់ប្រទេសឥណ្ឌា ដែលប្រទេសជាច្រើនមិនមានដូច៖

១.ទំនៀមទម្លាប់បំពាក់ចិញ្ចៀនអាពាហ៍ពិពាហ៍នៅលើម្រាមជើង៖ នៅតំបន់ Tamil Nadu ចិញ្ចៀនអាពាហ៍ពិពាហ៍ត្រូវបានពាក់នៅលើម្រាមជើង ដោយតម្រូវឱ្យកូនកម្លោះបំពាក់ចិញ្ចៀនប្រាក់ ២ ទៅលើម្រាមជើងរបស់កូនក្រមុំ ដែលការធ្វើបែបនេះតំណាងឱ្យសុខភាពល្អ និងការពពោះ។

២.ទំនៀមទម្លាប់នៃការគោរពព្រះចំនួន ៣៣០ លាន៖ នៅប្រទេសឥណ្ឌាប្រជាជន ៨០% ជឿលើសាសនាហិណ្ឌូ ដោយហិណ្ឌូសាសនានេះមានព្រះរហូតដល់ ៣៣០ លានព្រះនិងអាទិទេព ប៉ុន្តែអាទិទេពខ្លះមិនត្រូវបានស្គាល់ឈ្មោះឡើយ។ ព្រះដែលប្រជាជនឥណ្ឌាគោរពបំផុតគឺព្រះត្រៃសរណៈគមន៍នៃសាសនាហិណ្ឌូមាន ព្រះវិស្ណុ ព្រះសិវៈ និងព្រះព្រហ្ម។

៣.ទំនៀមទម្លាប់ដេកឱ្យសត្វគោជាន់៖ សត្វគោនៅប្រទេសឥណ្ឌា ត្រូវបានគេចាត់ទុកជាសត្វដ៏ពិសិដ្ឋ ហើយដូច្នេះអ្នកគោរពជំនឿនោះ ជឿជាក់ថា ការដែលត្រូវបានគោជាន់ពីលើពួកគេ វានឹងធ្វើឱ្យពួកគេមានលាភសំណាងល្អ និងនាំមកនូវភាពរុងរឿងដល់ភូមិ។

៤.ទំនៀមទម្លាប់គប់អាចម៍គោ យកសិរីសួស្តី៖ Gorehabba គឺជាពិធីបុណ្យឬពិធីសាសនានៅប្រទេសឥណ្ឌានៃការគប់លាមកគោ ឬប៉ាតលាមកគោដាក់គ្នា។ ពិធីបុណ្យនេះត្រូវបានប្រារព្ធមួយថ្ងៃបន្ទាប់ពី Balipadyami នៃពិធីបុណ្យ Diwali នៅក្នុងភូមិតូចមួយនៃ Gummatapura ក្នុង Karnataka ប្រទេសឥណ្ឌា។ អ្នកភូមិឥណ្ឌាជឿថា ការប្រារព្ធបែបនេះ នឹងនាំមកនូវសុខភាពល្អវិបុលភាព និងមានភ្លៀងធ្លាក់ដល់ភូមិ។

សម្រាប់រឿងប្លែកៗវិញរួមមាន៖
១.នៅក្នុងប្រទេសឥណ្ឌាមាន ៦ រដូវ៖ ជាការពិតណាស់នៅលើពិភពលោកយើងមានរដូវទាំងអស់ចំនួន ៤ ហើយប្រទេសខ្លះទៀតមានត្រឹមតែ ២ រដូវប៉ុណ្ណោះ។ ទោះជាយ៉ាងណាសម្រាប់ប្រទេសឥណ្ឌាវិញមានរដូវរហូតដល់ ៦ ដូចជារដូវក្តៅ, រដូវស្លឹកឈើជ្រុះ, រដូវរងា, និទាឃរដូវ, រដូវខ្យល់មូសុង និងរដូវត្រជាក់ ។

២.សត្វគោមានអត្តសញ្ញាណប័ណ្ណ៖ នៅរដ្ឋ West Bengal ប្រទេសឥណ្ឌា គោនីមួយៗត្រូវបានគេផ្ដល់ឱ្យនូវអត្តសញ្ញាណប័ណ្ណដែលមានរូបថតរបស់វាជាប់ជាមួយ។

៣.ទិវាសិទ្ធិកុមារ៖ ទិវាកុមារនៅក្នុងប្រទេសឥណ្ឌាត្រូវបានប្រារព្ធនៅថ្ងៃទី ១៤ ខែវិច្ឆិកា ដែលមានរយៈពេល ៩ ខែបន្ទាប់ពីទិវានៃក្តីស្រឡាញ់ ខណៈដែលប្រទេសភាគច្រើនក្នុងពិភពលោកប្រារព្ធពិធីនេះនៅថ្ងៃទី ១ ខែមិថុនា។

៤.សាសនាសំខាន់ៗទាំងអស់របស់ពិភពលោកត្រូវបានរកឃើញនៅក្នុងប្រទេសឥណ្ឌា៖ ថ្វីបើ ៨០%នៃប្រជាជនឥណ្ឌាគឺជាអ្នកកាន់សាសនាហិណ្ឌូក៏ដោយ ក៏ប្រទេសនេះមានការរួមបញ្ចូលសាសនាទាំងអស់របស់ពិភពលោក។ ដូច្នេះ អ្នកអាចប្រទះឃើញអ្នកកាន់សាសនាគ្រីស្ទ, សាសនាយូដា, សាសនាព្រះពុទ្ធ, សាសនា Jainism, សាសនាស៊ីក និងសាសនាដទៃទៀតនៅក្នុងប្រទេសនេះ។

៥.ការគ្រវីក្បាលមានន័យថា “យល់ស្រប”៖ វាជារឿងចម្លែកខ្លាំងណាស់សម្រាប់ប្រទេសដទៃ ប៉ុន្តែនៅក្នុងប្រទេសឥណ្ឌាវិញ ការគ្រវីក្បាលមានន័យថា “យល់ស្រប” ខណៈនៅប្រទេសភាគច្រើន ការគ្រវីក្បាលមានន័យថា “មិនយល់ស្រប”៕

ប្រទេសចិន ៖ រីសតលំដាប់ផ្កាយ៥ មួយកន្លែងនៅខេត្ត Heilongjiang ប្រទេសចិន បានកែច្នៃអាងទឹកដ៏ធំមួយធ្វើជាឆ្នាំងភ្លើងទឹកស៊ុបក្តៅៗ ដោយការដាក់គ្រឿងផ្សំជាច្រើនមុខចូលក្នុងអាងទឹកនេះ ដូចជា ៖ ម្ទេសប្លោក, ក្រូចឆ្មា, ដំឡូងបារាំង និងក្តាមសមុទ្រ ដើម្បីឱ្យអ្នកមកងូតទឹកក្នុងអាងមានអារម្មណ៍ថា ពួកគេកំពុងស្ថិតនៅក្នុងឆ្នាំងភ្លើងពិតៗ ។

អាងទឹករៀបចំឡើងជាលក្ខណៈឆ្នាំងភ្លើងនេះ បានទាក់ទាញចំណាប់អារម្មណ៍ភ្ញៀវទេសចរចិន និងបរទេសជាច្រើននាក់ឱ្យមកកម្សាន្តនៅរីសតមួយកន្លែងនេះ ដែលគេដាក់ឈ្មោះថា «អាងទឹកក្តៅ» ។ បុគ្គលិកធ្វើការក្នុងរីសតលំដាប់ផ្កាយ៥ និយាយថា រីសតនេះឈ្មោះ «Maple Leaf Village Hot Spring Resort» ហើយដោយសារការច្នៃប្រឌិតអាងលទឹកឱ្យក្លាយជាឆ្នាំងភ្លើង បានធ្វើឱ្យរីសតទទួលបានភ្ញៀវមកកម្សាន្តយ៉ាងច្រើនក្នុង១ថ្ងៃៗ ។

Maple Leaf Village Hot Spring Resort គឺជារីសតអាងទឹកក្តៅ ដែលមានទីតាំងស្ថិតនៅទីក្រុង Harbin ខេត្ត Heilongjiang ប្រទេសចិន ។ រីសតនេះបានល្បីល្បាញយ៉ាងខ្លាំងនៅក្នុងបណ្តាញសង្គមចិន ដោយសារតែការកែច្នៃអាងទឹកឱ្យក្លាយជាឆ្នាំងភ្លើងធំមួយ ដែលពោរពេញទៅដោយបន្លែបង្ការជាច្រើនមុខ រួមទាំងគ្រឿងសមុទ្រផងដែរ ។ វាបានធ្វើឱ្យអ្នកមកងូតទឹកក្នុងអាងនេះមានអារម្មណ៍ថា ពួកគេកំពុងស្ថិតក្នុងទឹកស៊ុបក្តៅៗ និងធ្វើឱ្យរាងកាយស្រស់ស្រាយ ។

អាងងូតទឹកក្តៅក្នុងរីសតនេះបានរៀបចំឡើងជាលក្ខណៈឆ្នាំងភ្លើងចំនួន២ផ្នែក គឺនៅផ្នែកម្ខាងនៃអាង គេបានរៀបចំជាឆ្នាំងស៊ុបមានរសជាតិហឹរ និងក្តៅ ខណៈផ្នែកម្ខាងទៀតបានរៀបចំឡើងជាឆ្នាំងស៊ុបទឹកដោះគោ ។ លើសពីនេះ បុគ្គលិករីសតក៏បានយកគ្រឿងផ្សំ និងបន្លែផ្សេងៗមកដាក់ក្នុងឆ្នាំងស៊ុបដ៏ធំនេះផងដែរ ដូចជា ៖ ម្ទេសប្លោក, ដំឡូងបារាំង, ក្រូចឆ្មារ, ពុទ្រាចិន និងដាក់ក្តាមសមុទ្រទៀតផង ។

វីដេអូអាងលទឹករៀបចំឡើងជាលក្ខណៈឆ្នាំងភ្លើងនេះ បានល្បីល្បាញយ៉ាងខ្លាំងក្នុងបណ្តាញសង្គមប្រទេសចិន ហើយមានពលរដ្ឋចិនជាច្រើននាក់ចូលមកបញ្ចេញមតិ ក្នុងនោះពលរដ្ឋចិនម្នាក់និយាយថា ៖ «គ្រាន់តែឃើញទឹកស៊ុបមាន២រសជាតិ ខ្ញុំមានអារម្មណ៍ឆ្ងាញ់ណាស់» ។ ពលរដ្ឋចិនម្នាក់ទៀតនិយាយថា ៖ «អាងលទឹកនេះបានក្លាយជាឆ្នាំងភ្លើងដាក់ម្ទេសហឹរៗ» ។ រីឯពលរដ្ឋចិនម្នាក់ទៀតសួរថា ៖ «តើមានអ្នកសាកល្បងបរិភោគបន្លែ និងគ្រឿងសមុទ្រក្នុងឆ្នាំងភ្លើងនេះដែរឬទេ?» ៕

ដើមឈើ Baobab គឺជាដើមឈើតែមួយគត់ដែលដុះនៅទ្វីបអាហ្វ្រិក។ យោងតាមការប៉ាន់ស្មាន ដើមឈើនេះស្ថិតក្នុងចំណោមដើមឈើដែលចំណាស់ជាងគេបំផុតនៅលើផែនដី។ ជាការពិតណាស់ យើងគ្រប់គ្នាប្រាកដជាដឹងហើយថា នៅទ្វីបអាហ្វ្រិកគឺមានអាកាសធាតុស្ងួតខ្លាំង ហើយដើមឈើនីមួយៗគឺពិបាកក្នុងការថែរក្សាណាស់ ដោយសារទ្វីបនេះមិនសូវមានសំណើម ធ្វើឱ្យដើមឈើជាច្រើនឆាប់ងា.ប់ និងពិបាកក្នុងការលូតលាស់។ ទោះជាយ៉ាងណាដើមឈើ Baobab គឺជាដើមឈើតែមួយគត់ដែលដុះនៅទ្វីបអាហ្វ្រិក និងអាចស៊ូទ្រាំជាមួយអាកាសធាតុស្ងួតបំផុត ដោយអាចរស់នៅបានរហូតដល់ ៥,០០០ ឆ្នាំគឺពិតជាមិនធម្មតាឡើយ។

ដើមឈើនេះភាគច្រើនលូតលាស់នៅរដូវវស្សា ដើមបាបាបស្រូប និងស្តុកទឹកទុកក្នុងដើមធំ។ ហើយដើមឈើពេញមួយដើមរបស់វាអាចផ្ទុកទឹករាប់ពាន់លីត្រនៅក្នុងខ្លួន ដូច្នេះទឹកដែលទុកក្នុងដើមរបស់វាគឺមានច្រើនដែលនេះជាមូលហេតុដែលដើមឈើអាចរស់បានរាប់ឆ្នាំ ទោះបីជារស់នៅក្នុងគ្រោះរាំងស្ងួតក៏ដោយ។ ដើម baobab មានកម្ពស់រហូតដល់ ៣០ ម៉ែត្រអាចផ្តល់ជម្រក អាហារ និងទឹកសម្រាប់មនុស្ស និងសត្វបានយ៉ាងពេញលេញ។

ទន្ទឹមនឹងនេះ ដើមឈើ baobab ក៏ត្រូវបានគេចាត់ទុកថាជាដើមឈើនៃជីវិត ដោយសារផ្លែឈើរបស់វាគឺសម្បូរទៅដោយសារធាតុចិញ្ចឹម និងសារធាតុប្រឆាំងអុកស៊ីតកម្ម។ លើសពីនេះផ្លែ baobab ក៏ត្រូវបានគេយកទៅផលិតជាឱសថដើម្បីព្យាបាលភាពនឿយហត់ ការរំលាយអាហារ ការពារជំងឺ និងការឆ្លងមេរោគ ព្រមទាំងធ្វើឱ្យស្បែកស្រស់ស្អាតទៀតផង។ ដើមឈើមួយប្រភេទនេះគឺពិតជាមានអត្ថប្រយោជន៍ជាច្រើនសម្រាប់ប្រជាជនទាំងមូលនៅក្នុងសហគមន៍ savannah ដោយសារសំបកឈើត្រូវបានគេយកទៅផលិតជាខ្សែពួរ។ ខណៈពេលដែលស្លឹករបស់វាត្រូវបានស៊ីដោយគោក្របី ហើយទឹកថ្លានៅក្នុងដើមរបស់វាអាចផលិតជាស្រា ខណៈពេលដែលប្រេងដែលធ្វើពីគ្រាប់ផ្លែឈើរបស់វាត្រូវបានគេប្រើនៅក្នុងគ្រឿងសំអាង ហើយសម្រាប់តម្លៃរបស់វាគឺពិតជាខ្ពស់ខ្លាំងណាស់នៅលើទីផ្សារ។

យោងតាមរបាយការណ៍របស់ National Geographic តម្រូវការដើមឈើនេះកំពុងកើនឡើងដោយសារតែលក្ខណៈពិសេសរបស់វា។ ដើម Baobab ដុះលូតលាស់នៅតំបន់ស្ងួតបំផុត ដាច់ស្រយាល និងក្រីក្របំផុតនៃទ្វីបអាហ្វ្រិក។ គួរបញ្ជាក់ដែរថា ដើមឈើគឺពិតជាមានអត្ថប្រយោជន៍ខ្លាំងចំពោះធម្មជាតិដែលវានឹងជួយស្រូបយកកាបូនឌីអុកស៊ីតចេញពីបរិយាកាស ជំនួសមកវិញដោយអុកស៊ីសែន លើសពីនេះដើមឈើក៏ជាម្លប់ជ្រកយ៉ាងត្រជាក់សម្រាប់មនុស្សគ្រប់គ្នាផងដែរ។ ដើមឈើក៏ជាដំណោះស្រាយដ៏ល្អបំផុតសម្រាប់គ្រោះធម្មជាតិ ដែលបាននឹងកំពុងគំរាមកំហែងដល់មនុស្សជាតិនិងសត្វទាំងបច្ចុប្បន្ននិងអនាគតទៀតផង៕