បរទេស៖ ប្រទេសម៉ាឡេស៊ីបានវ៉ាដាច់ប្រទេសថៃ ដើម្បីក្លាយជាទីផ្សាររថយន្តធំជាងគេទីពីរនៅអាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ី។
យោងតាមទិន្នន័យដែលបានចងក្រងពីសមាគមរថយន្តនៃប្រទេសអាស៊ីអាគ្នេយ៍ចំនួន ៥ ប្រទេសថៃដែលធ្លាប់កាន់តំណែងជាទីផ្សាររថយន្តធំជាងគេទីពីរនៅអាស៊ីអាគ្នេយ៍អស់រយៈពេលជាច្រើនឆ្នាំ ស្រាប់តែបាត់បង់តំណែងនេះទៅឱ្យប្រទេសម៉ាឡេស៊ីវិញ ដោយសារការលក់រថយន្តនៅឆ្នាំនេះធ្លាក់ចុះខ្លាំងពេក ខណៈដែលការលក់រថយន្តនៅប្រទេសម៉ាឡេស៊ីក្នុងត្រីមាសទីមួយនៃឆ្នាំ ២០២៤ ទទួលបានលទ្ធផលល្អបំផុត ធ្វើឱ្យម៉ាឡេស៊ីវ៉ាដាច់ប្រទេសថៃដើម្បីក្លាយជាទីផ្សាររថយន្តធំជាងគេទីពីរនៅអាស៊ីអាគ្នេយ៍បន្ទាប់ពីប្រទេសឥណ្ឌូនេស៊ី។

យោងតាមសមាគមយានយន្តម៉ាឡេស៊ី (MMA) ការលក់រថយន្តបានកើនឡើង ៥% នៅក្នុងត្រីមាសទីមួយធៀបនឹងឆ្នាំមុនដល់ ២០២,២៤៥ គ្រឿង។ នៅឆ្នាំ ២០២៣ ការលក់រថយន្តនៅក្នុងប្រទេសនេះបានកើនឡើង ១១% ដល់កម្រិតកំណត់ត្រា ៧៩៩,៧៣១ គ្រឿង។ ការកើនឡើងរបស់ប្រទេសម៉ាឡេស៊ីគឺដោយសារការសម្រេចចិត្តរបស់រដ្ឋាភិបាលក្នុងការលើកលែងរថយន្តដែលផលិតក្នុងស្រុកពីពន្ធលើការលក់។ នេះផ្តល់នូវការជំរុញដល់ម៉ាករថយន្តក្នុងស្រុកដូចជា Perodua និង Proton ដែលរួមគ្នាមានប្រហែល ៦០% នៃចំណែកទីផ្សារ។ Ivan Khoo ភ្នាក់ងារលក់របស់ Toyota នៅទីក្រុង Kuala Lumpur បានប្រាប់ Nikkei Asia ថាការលក់ក្នុងរយៈពេលពីរខែដំបូងនៃឆ្នាំ ២០២៤ គឺប្រសើរជាងការរំពឹងទុក។Ivan Khoo បានបន្តថាម៉ូដែលរថយន្ត Vio គឺជាម៉ូដែលពេញនិយមបំផុតព្រោះវាមានតម្លៃមិនដល់ ២១,០០០ ដុល្លារនោះទេ។

ផ្ទុយទៅវិញ ការលក់នៅប្រទេសថៃបានធ្លាក់ចុះយ៉ាងខ្លាំងនៅឆ្នាំនេះ ដោយសារតែប្រាក់កម្ចីរថយន្តកាន់តែគ្មានប្រសិទ្ធភាព និងការប្រើប្រាស់ធ្លាក់ចុះ។ យោងតាមទិន្នន័យពីសហព័ន្ធថៃបានឱ្យដឹងថា ការលក់រថយន្តប្រចាំខែរបស់ប្រទេសថៃបានធ្លាក់ចុះពីមួយឆ្នាំទៅមួយឆ្នាំដោយចាប់ផ្តើមនៅក្នុងខែមិថុនា ឆ្នាំ ២០២៣។ ដូច្នេះគិតត្រីមាសទីមួយនៃឆ្នាំនេះ ការលក់នៅក្នុងប្រទេសថៃធ្លាក់ចុះ ២៥% ធៀបនឹងឆ្នាំមុនមកត្រឹម ១៦៣,៧៥៦ គ្រឿងប៉ុណ្ណោះ។ រីឯនៅក្នុងប្រទេសឥណ្ឌូនេស៊ីវិញ ការលក់រថយន្តក្នុងត្រីមាសទីមួយក៏បានធ្លាក់ចុះ ២៤% ផងដែរធៀបនឹងឆ្នាំមុនមកត្រឹម ២១៥,០៦៩ គ្រឿង ដោយសារការកើនឡើងអត្រាការប្រាក់បានកាត់បន្ថយអំណាចទិញរបស់អតិថិជន៕

ប្រទេសម៉ិកស៊ិក ៖ ក្រោយថ្ងៃលិច កោះតុក្កតាខ្មោ.ច ក្នុងប្រទេសម៉ិកស៊ិកមានសភាពងងឹត ហើយតុក្កតាទាំងនេះបានបញ្ចេញស្រមោលព្រោងព្រាតនៅតាមដើមឈើតូច-ធំ ខណៈពន្លឺព្រះអាទិត្យចាប់ផ្តើមបាត់បន្តិចម្តងៗ ។ វាធ្វើឱ្យបរិយាកាសនៅលើកោះទាំងមូលកាន់តែគួរឱ្យភ័យខ្លាចខ្លាំងឡើង ដូចជា ៖ កោះមានសភាពស្ងាត់ជ្រងំ, ការលងបន្លាចពីតុក្កតាដែលមានសម្លៀកបំពាក់ចាស់ៗ ដាច់រហែក, សំបុកពីងពាង និងសត្វល្អិតតូចៗ ។

បើគេបានស្តាប់ពីប្រវត្តិរបស់កោះតុក្កតាខ្មោចហើយនឹងព្រឺសម្បុរជាមិនខាន ហើយអ្នកខ្លះជឿថា កោះនេះបានទទួលបណ្តាសាពីខ្មោចក្មេងស្រីម្នាក់ដែលបានស្លាប់កាលពីប្រមាណ៥០ឆ្នាំមុន ហើយវិញ្ញាណរបស់នាងបានសណ្ឋិតក្នុងតុក្កតា ។ ដូច្នេះ វាធ្វើឱ្យកោះនេះជាប់ចំណាត់ថ្នាក់ជាកោះគួរឱ្យខ្លាចបំផុតលើពិភពលោក និងក្លាយជាកន្លែងសម្រាប់សាកល្បងសេចក្តីក្លាហានរបស់ភ្ញៀវទេសចរផងដែរ ។

កោះតុក្កតាខ្មោច ស្ថិតនៅឆ្ងាយពីតំបន់ទេសចរណ៍ឈ្មោះ Xochimilco ប្រទេសម៉ិកស៊ិក ទៅកាន់ទិសខាងត្បូង ។ វាជាកោះមានទំហំតូច និងគ្មានមនុស្សរស់នៅទេ ។ បើតាមការរៀបរាប់ឱ្យដឹងថា បុរសម្នាក់ឈ្មោះ Julian Santana Barrera បានមករស់នៅលើកោះនេះ ហើយមានក្មេងស្រី៣នាក់ មកពីភូមិនៅក្បែរនេះនាំគ្នាលេងទឹកនៅលើកោះ ប៉ុន្តែក្មេងស្រីម្នាក់ក្នុងចំណោមក្មេងស្រីទាំង៣ បានលង់ទឹកស្លាប់ ហើយលោក Julian ពុំអាចជួយជីវិតនាងបានទេ ។

លោក Julian មានអារម្មណ៍ថា មានកំហុស និងសោកស្តាយយ៉ាងខ្លាំងចំពោះហេតុការណ៍ដែលបានកើតឡើង ទើបលោកព្យួរតុក្កតាមួយនៅក្បែរកន្លែងក្មេងស្រីស្លាប់ ។ ប៉ុន្តែលោកពុំអាចបំភ្លេចនូវហេតុការណ៍នេះបានទេ ហើយហេតុការណ៍នេះចេះតែតាមលងបន្លាចលោកគ្រប់ពេលវេលា ។ នៅពេលយប់ លោកបានឮសូរសំឡេងទួញសោក និងសំឡេងប្លែកៗរំខានជានិច្ច ។ ដូច្នេះ លោកក៏ចាប់ផ្តើមយកតុក្កតាជាច្រើនមកព្យួរនៅតាមដើមឈើ រហូតដល់កោះនេះមានតុក្កតាយ៉ាងច្រើនសន្ធឹកសន្ធាប់ ។

នៅឆ្នាំ២០០១ គេបានប្រទះឃើញសាកសពរបស់លោក Julian ស្លាប់ដោយសារលង់ទឹកនៅកន្លែងតែមួយដែលក្មេងស្រីនោះបានស្លាប់ ។ រីឯលោក Don Julian ជាចៅប្រុសរបស់លោក Julian និយាយថា លោកតាធ្លាប់ប្រាប់ថា មានសំឡេងចម្លែកបបួលឱ្យចុះក្នុងទឹករៀងរាល់យប់ ហើយនៅទីបំផុត លោកតាក៏បានចុះក្នុងទឹកតាមសំឡេងនោះ ។

បច្ចុប្បន្ន លោក Don Julian គឺជាអ្នកថែរក្សាកោះតុក្កតាខ្មោច និងជាមនុស្សតែម្នាក់គត់ដែលរស់នៅលើកោះ ។ កោះនេះបានក្លាយជាតំបន់ទាក់ទាញភ្ញៀវទេសចរ ដែលចង់សាកល្បងភាពក្លាហានក្នុងថ្ងៃ Halloween ឬចង់ពិសោធន៍ថា តើកោះនេះពិតជាមានខ្មោចដូចការរៀបរាប់ដែរឬទេ ៕

ប្រទេសប៊ូគីណាហ្វាសូ ៖ Bazoule គឺជាភូមិមួយមានទីតាំងនៅជិតមាត់បឹងក្នុងប្រទេសប៊ូគីណាហ្វាសូ (Burkina Faso ជាប្រទេសស្ថិតក្នុងទ្វីបអាហ្វ្រិក) ហើយអ្នកភូមិនេះបានរស់នៅរួមគ្នាជាមួយក្រពើរាប់រយក្បាល និងក្លាយជារឿងធម្មតាសម្រាប់ពួកគេ ខណៈក្រពើជាសត្វកាចសាហាវ និងសម្លា.ប់ ជីវិតមនុស្សលើពិភពលោក ។

សត្វក្រពើនៅភូមិ Bazoule គឺជាពូជ Crocodylus Suchus (ឬជាក្រពើអាហ្វ្រិកខាងលិច) ហើយគេនឹងបានឃើញពួកវារស់នៅតំបន់ព្រៃ និងតំបន់ដីសើម ហៅថា Guelta ។ ក្រពើទាំងនេះអាចសម្របខ្លួនយ៉ាងល្អនឹងបរិស្ថានជុំវិញ និងអាកាសធាតុផ្លាស់ប្តូរ ។ វាស្រដៀងគ្នានឹងក្រពើទន្លេនីល (ជាទន្លេវែងបំផុតក្នុងទ្វីបអាហ្វ្រិក) ប៉ុន្តែក្រពើពូជ Crocodylus Suchus មិនកាចសាហាវខ្លាំង ឬមិនវាយប្រហារមនុស្សដូចក្រពើនៅទន្លេនីលទេ ។

បើទោះជាបឹងមួយនេះពោរពេញទៅដោយក្រពើជាច្រើនក្បាលក្តី ប៉ុន្តែក្មេងៗក្នុងភូមិនៅតែហែលទឹកលេង និងងូតទឹកយ៉ាងសប្បាយរីករាយ គ្មានបារម្ភអ្វីទាំងអស់ ។ រីឯស្រីៗក្នុងភូមិនាំគ្នាចុះទៅដងទឹកបឹងមកប្រើប្រាស់តាមធម្មតា ។

អ្នកភូមិម្នាក់និយាយថា ៖ «យើងមានភាពស្និទ្ធស្នាលជាមួយក្រពើតាំងពីយើងនៅតូចៗម៉្លេះ ហើយយើងបានហែលទឹកជាមួយពួកវាទៀតផង ។ យើងអាចចូលទៅជិត និងអង្គុយលើខ្នងវាជានិច្ច ខណៈអ្នកខ្លះទៀតដេកលើខ្នងក្រពើទៀតផង គ្មានបញ្ហាអ្វីទេ» ។

ពលរដ្ឋនៅតំបន់ជាច្រើនក្នុងទ្វីបអាហ្វ្រិកខាងលិចអាចរស់នៅក្បែរក្រពើបាន ហើយអ្នករស់នៅភូមិ Bazoule ជឿថា ក្រពើ គឺជាសត្វដ៏សាកសិទ្ធិ ទើបពួកគេនាំគ្នាគោរពបូជា និងការពារក្រពើកុំឱ្យកើតគ្រោះថ្នាក់ផ្សេងៗ ។ ក្រៅពីនេះ គេក៏បានឃើញក្រពើពូជ Crocodylus Suchus រស់នៅទីក្រុង Paga ប្រទេសហ្គាណាផងដែរ ។

ចំណែកភ្ញៀវទេសចរមកកម្សាន្តនៅភូមិ Bazoule ប្រទេសប៊ូគីណាហ្វាសូ អាចថតរូប និងស្ទាបអង្អែលក្រពើជាច្រើនក្បាលបាន ដោយគ្រាន់តែពួកគេត្រូវមានមាន់១ក្បាលសម្រាប់ធ្វើនុយឱ្យក្រពើឡើងពីទឹក ។ រីឯតម្លៃចូលកម្សាន្តក្នុងតំបន់នេះ ចាប់ពី២០៣ដុល្លារអាមេរិកឡើងទៅ (សម្រាប់រយៈពេលពី៤ម៉ោង ទៅ៥ម៉ោង) គឺរួមទាំងការបរិភោគអាហារនៅហាងក្បែរភូមិផងដែរ ៕

ប្រទេសឥណ្ឌា ៖ វាបានធ្វើឱ្យអ្នកជំនាញជាច្រើនរូបគ្មានពាក្យបកស្រាយ ហេតុអ្វីភូមិមួយនៅប្រទេសឥណ្ឌាមានកូនភ្លោះរហូតដល់ជាង២០០គូ? គេបានសន្និដ្ឋានខុសៗគ្នាពាក់ព័ន្ធនឹងចំនួនកូនភ្លោះដ៏ច្រើនសន្ធឹកសន្ធាប់នេះ ។ រីឯមូលហេតុពិតប្រាកដនោះ គេពុំទាន់ដឹងច្បាស់ថា តើវាបណ្តាលមកពីមូលហេតុអ្វីទេ ។

ភូមិមួយឈ្មោះ Kodinhi ស្ថិតក្នុងរដ្ឋ Kerala នៅភាគខាងត្បូងប្រទេសឥណ្ឌា មានកូនភ្លោះរហូតដល់២៣០គូ ខណៈភូមិនេះមានពលរដ្ឋរស់នៅត្រឹមតែ១៥.០០០នាក់ប៉ុណ្ណោះ ។ ចំនួននេះខ្ពស់ជាងអត្រាកំណើតកូនភ្លោះជាមធ្យមនៅទូទាំងពិភពលោកជិត៤ដង ហើយវាធ្វើឱ្យផ្នែកវេជ្ជសាស្ត្រងឿងឆ្ងល់ ។ គ្រូពេទ្យម្នាក់ក្នុងភូមិ ក៏ពុំអាចបកស្រាយបានដែរ និងសន្និដ្ឋានថា អាចបណ្តាលមកពីការប្រើប្រាស់ទឹក និងការបរិភោគចំណីអាហារ ។

តាមតួលេខកាលពីដើមឆ្នាំ២០០៩ របស់សមាគមកូនភ្លោះ ដែលបានចុះឈ្មោះកូនភ្លោះ និងជួយឧបត្ថម្ភគ្រួសារកូនភ្លោះក្នុងភូមិ Kodinhi បង្ហាញថា ភូមិនេះមានកូនភ្លោះចំនួន២០៤គូ ហើយចំនួននេះបានកើនឡើងជាបន្តបន្ទាប់រហូតដល់២៣០គូ ។

លោក Krishnan Sribiju ជាអ្នកស្រាវជ្រាវនិយាយថា ៖ «វាជាបាតុភូតធម្មជាតិដ៏អស្ចារ្យដែលបានកើតឡើងនៅភូមិជនបទមួយនេះ ខណៈអ្នករស់នៅជនបទពុំទទួលថ្នាំ និងសារធាតុគីមីគ្រោះថ្នាក់ផ្សេងៗ ទើបវាក្លាយជាភូមិបរិសុទ្ធ ។ បើតាមវិទ្យាសាស្ត្រ យើងគិតថា បរិស្ថានជុំវិញអាចជាមូលហេតុធ្វើឱ្យមានកូនភ្លោះកើតច្រើនបែបនេះ ហើយអាចមានអ្វីម្យ៉ាងនៅក្នុងទឹក» ។

អ្នកជំនាញរូបនេះសន្និដ្ឋានថា មូលហេតុចម្បង គឺដោយសារការប្រើប្រាស់ថ្នាំមានផ្ទៃពោះ, ទម្លាប់នៃការបរិភោគអាហារ និងរៀបការនៅពេលអាយុច្រើន ទើបធ្វើឱ្យពួកគេមានកូនភ្លោះ ។ ប៉ុន្តែនៅភូមិ Kodinhi ប្តី-ប្រពន្ធភាគច្រើនបានរៀបការក្នុងចន្លោះចាប់ពីអាយុ១៨ឆ្នាំ ដល់២០ឆ្នាំ ទើបយើងពុំអាចបកស្រាយពីមូលហេតុពិតប្រាកដ ។

លោកជំនាញបញ្ជាក់ថា កូនភ្លោះទាំងនេះគ្មានអ្វីខុសប្រក្រតីទេ ហើយមានសុខភាពល្អគ្រប់ៗគ្នា ។ ប៉ុន្តែមូលហេតុធ្វើឱ្យភូមិនេះមានកូនភ្លោះច្រើនអាចបណ្តាលមកពីការបរិភោគចំណីអាហារ និងថ្នាំ ហើយត្រូវការពេលវេលាស្រាវជ្រាវបន្ថែមទៀត ។

ចំណែកអ្នកភូមិជឿថា វាបណ្តាលមកពីការប្រើប្រាស់ទឹក ពីព្រោះភូមិ Kodinhi ព័ទ្ធជុំវិញទៅដោយទឹក ។ នៅពេលភ្លៀងធ្លាក់ខ្លាំងម្តងៗ អ្នកភូមិពុំអាចធ្វើដំណើរទៅកាន់ភូមិផ្សេងទៀតបានទេ ដោយសារទឹកជំនន់ ៕

ជឿថាប្រិយមិត្តមួយចំនួនប្រហែលជាមិនសូវស្គាល់ និងមិនសូវចាប់អារម្មណ៍ម្តាយបង្កើតរបស់ Elon Musk ទេដោយសារតែគាត់មិនសូវបញ្ចេញមុខ។ ទោះជាយ៉ាងណាក៏ដោយ កាលពីពេលថ្មីៗនេះ ម្តាយរបស់មហាសេដ្ឋីរូបនេះបានធ្វើឱ្យទស្សនិកជនជាច្រើនចាប់អារម្មណ៍យ៉ាងខ្លាំង ជាមួយសម្រស់ដ៏ទាក់ទាញរបស់គាត់នៅពេលដែលគាត់បានលេចមុខនៅក្នុងគម្រប់ខួប ៦០ ឆ្នាំនៃទស្សនាវដ្ដីឈុតហែលទឹកដ៏ល្បីមួយរបស់ពិភពលោក។

Maye Musk អាយុ ៧៦ ឆ្នាំដែលជាម្តាយបង្កើតរបស់មហាសេដ្ឋីពិភពលោក Elon Musk បានបង្ហាញខ្លួនជាមួយរូបរាងដ៏លេចធ្លោរបំផុតក្នុងឈុតសម្លៀកបំពាក់ដ៏ប្រណិត ដែលដេរប៉ាក់ដោយ Naeem Khan ស្បែកជើងកែង Aquazzura និងគ្រឿងអលង្ការ Charlie Lapson ធ្វើឱ្យទស្សនិកជនលាន់មាត់ថា ទោះវ័យជ្រេបន្តិចមែនតែសម្រស់វិញញាក់មិនធម្មតាឡើយ។

Maye Musk កើតនៅឆ្នាំ ១៩៤៨ គឺជាតារាម៉ូដែល និងជាអ្នកជំនាញអាហារូបត្ថម្ភជនជាតិកាណាដា-អាហ្វ្រិកខាងត្បូង។ ក្នុងប៉ុន្មានឆ្នាំចុងក្រោយនេះ គាត់បានបង្ហាញខ្លួនជាប្រចាំនៅក្នុង Vogue Korea, Elle Canada, Time Health ឬ New York Times ។ ហើយគាត់ក៏បានធ្វើជាគំរូសម្រាប់ម៉ាកល្បីៗជាច្រើនដូចជា Rag & Bone, La Ligne, James Perse, CoverGirl ទៀតផង។ នៅអាយុ ៧០ ឆ្នាំតារាម៉ូដែលរូបនេះបានដើរសម្រាប់កម្មវិធីដោយ Zero + Maria Cornejo, Dolce & Gabbana ។

ជាមួយនឹងការបង្ហាញខ្លួនដ៏ទាក់ទាញនេះ ម្តាយរបស់ Elon Musk ក៏ត្រូវបានមនុស្សជាច្រើនសួរនាំអំពីរបៀបថែរក្សាសម្រស់របស់គាត់ ដោយគាត់បានបង្ហើបថា ដើម្បីថែរក្សាសម្រស់ឱ្យនៅតែស្រស់ស្អាត និងមានសុខភាពល្អ គឺយើងត្រូវតែយកចិត្តទុកដាក់លើបញ្ហាសុខភាពផ្លូវចិត្តជាមុនសិន ប្រសិនបើយើងគិតច្រើនវាអាចធ្វើឱ្យយើងគេងមិនលក់ ញ៉ាំមិនបាន ហើយសម្រស់ក៏ធ្លាក់ចុះតាមនឹងដែរ៕

កាលពីពេលថ្មីៗនេះ គឺមានការបង្ហោះចែកចាយផ្អើលពេញបណ្តាញសង្គមប្រទេសថៃទាក់ទងនឹងការប្រទះឃើញរូបចម្លាក់ស្រីនៅឯខេត្តបុរីរ៉ាម ដែលបានបង្កឲ្យមានភ្ញាក់ផ្អើលនិងសាទរយ៉ាងខ្លាំងក្នុងចំណោមជនជាតិថៃ។

អ្នករកផ្សិតជនជាតិថៃគឺបានប្រទះឃើញរូបចម្លាក់ស្រីឆ្លាក់ជាប់នឹងថ្មនៅឯដែនជម្រកសត្វព្រៃ Dong Yai ក្នុងខេត្ត Buri Ram ភាគឦសានប្រទេសថៃ ក៏បានក្លាយជាប្រធានបទគួរជាទីចាប់អារម្មណ៍បំផុតនៅក្នុងបណ្តាញសង្គម។

ស្របពេលមនុស្សម្នានៅក្នុងសង្គមថៃបាននឹងកំពុងវែកញែកយ៉ាងខ្លាំងទាក់ទងនឹងរបកគំហើញថ្មីនៅក្នុងខេត្តបុរីរ៉ាមនេះ ដែលភាគច្រើនបានប៉ាន់ស្មានថា នេះទំនងជារូបចម្លាក់របស់ព្រះនាងម៉ាយ៉ាទេវី ក្នុងសម័យថ្វារ៉ាវ៉ាឌី ចន្លោះសតវត្សទី៦ – ទី១១។

ទោះជាយ៉ាងណា យោងតាមប្រភពសារព័ត៌មានថៃ The Nation បានដឹងថា សាស្ត្រាចារ្យប្រវត្តិសាស្ត្រសិល្បៈម្នាក់ មកពីមហាវិទ្យាល័យបុរាណវិទ្យានៃសាកលវិទ្យាល័យ Silpakorn គឺលោក Chedha Tingsanchali បាននិយាយថា ការរកឃើញនៅក្នុងខេត្តបុរីរ៉ាមនេះ ប្រហែលមិនមែនជារូបចម្លាក់បុរាណដូចមនុស្សភាគច្រើនគិតនោះទេ។

លោកបន្តថា «ជាងចម្លាក់ដែលបានឆ្លាក់រូបនេះ គឺបានយកគំរូតាមសិល្បៈបុរាណឥណ្ឌា ទើបបានចេញជារូបរាងបែបនេះ។ ចំណែកឯលក្ខណៈសម្បត្តិនិងរូបរាង គឺមិនត្រូវនឹងសម័យកាលថ្វារ៉ាវ៉ាឌីនេះទេ ជាពិសេសបើសង្កេតទៅលើចិញ្ចើម បបូរមាត់ និងលក្ខណៈដទៃទៀតរបស់រូបចម្លាក់នេះ។

បើយោងតាមការបញ្ជាក់ពីចាស់ៗបុរាណនៅទីនោះក៏បានលើកឡើងថា តាមពិតរូបចម្លាក់នេះគឺទើបតែសាងសង់ឡើងថ្មីថ្មោងតែប៉ុណ្ណោះ និងមិនជារបស់បុរាណអ្វីនោះទេ ព្រោះតែប្រមាណ៣០ទៅ៥០ឆ្នាំមុន គឺមានព្រះសង្ឃបានតាំងអាស្រមនៅលើភ្នំនេះ ហើយព្រះសង្ឃក៏បានឆ្លាក់រូបព្រះម៉ែធរណី ប៉ុន្តែឆ្លាក់មិនហើយក៏ទុកចោលមកដល់សព្វថ្ងៃនេះទៅ។

ចំណែកការលើកឡើងពីអ្នកជំនាញខ្លះទៀតក៏បានឲ្យដឹងថា ចម្លាក់ដែលរកឃើញថ្មីៗនេះ គឺជារបស់ Sirimahamaya ដែលជាមាតារបស់ព្រះពុទ្ធ។ ទោះជាយ៉ាងណា អត្តសញ្ញាណពិតប្រាកដនៃចម្លាក់នេះគឺមិនច្បាស់លាស់នៅឡើយនោះទេ ដោយនាយកដ្ឋានវិចិត្រសិល្បៈកំពុងតែបញ្ជូនក្រុមបុរាណវិទូជាច្រើនដើម្បីសិក្សាបន្ថែម ដើម្បីស្រាយបំភ្លឺអំពីចម្លាក់នេះឲ្យបានច្បាស់លាស់។

គួរបញ្ជាក់ថា ខេត្ត Buri Ram ភាគឦសាន ប្រទេសថៃ ត្រូវបានគេស្គាល់ថាជាទីតាំងបុរាណវិទ្យា ដែលមានទំនាក់ទំនងយ៉ាងស៊ីជម្រៅជាមួយនឹងសម័យអាណាចក្រខ្មែរ។ ប្រាសាទបុរាណជាច្រើនដែលត្រូវបានរកឃើញនៅក្នុងខេត្តនេះមានតាំងពីសម័យអាណាចក្រថ្វារ៉ាវ៉ាឌី (សតវត្សទី៦ ដល់ទី១១) រួមមាន មឿងទុំ ប្រាសាទហិនខៅផានមរុង និងប្រាសាទហិនផានមរុងផងដែរ៕