ប្រទេសចិន ៖ អ្នកស្រាវជ្រាវនៅប្រទេសចិនបានសាកល្បងផលិតវត្ថុភ្លឺថ្លាពីដើមឫស្សី ដោយពួកគេបានប្រមូលដើមឫស្សីចាស់ៗមកផលិតជាវត្ថុភ្លឺថ្លាអាចធន់ជាមួយភ្លើង, ទឹក និងផ្សែងបានយ៉ាងល្អ ។ តើវត្ថុភ្លឺថ្លាដែលផលិតឡើងពីដើមឫស្សីចាស់ៗនេះ គឺជាអ្វី?

អ្នកស្រាវជ្រាវចិនបានប្រើប្រាស់សារធាតុសូដ្យូមស៊ីលីកេតរាវបញ្ចូលក្នុងដើមឫស្សី (សារធាតុសូដ្យូមស៊ីលីកេត គឺជាសមាសធាតុមួយដែលគេប្រើប្រាស់ទូទៅក្នុងផ្នែកឧស្សាហកម្មផ្សេងៗ ហើយគេអាចបង្កើតវត្ថុរឹង និងកែវ នៅពេលផ្សំបញ្ចូលវាក្នុងសារធាតុមួយចំនួន) ។ អ្នកស្រាវជ្រាវឱ្យដឹងថា វាអាចធន់នឹងទឹក និងសំណើមបានល្អ ។

ការសាកល្បងសមត្ថភាពរបស់វត្ថុផលិតឡើងពីដើមឫស្សីនេះបង្ហាញថា ពួកគេបានចំណាយពេលដុតភ្លើងចំនួន១១៦វិនាទី និងបញ្ចេញកំដៅបន្តិចបន្តួច ។ ហេតុនេះ វាមានប្រសិទ្ធភាពខ្ពស់អាចធន់ជាមួយភ្លើងក្តៅ, កាត់បន្ថយភ្លើងឆេះ ឬគ្រោះថ្នាក់ផ្សេងៗដោយសារកំដៅ និងផ្សែង ខណៈដើមឫស្សីងាយនឹងធ្វើឱ្យមានភ្លើងឆេះ ។

លើសពីនេះ ពេលអ្នកស្រាវជ្រាវយកវត្ថុនេះទៅបង្កើតបន្ទះសូឡាស្រូបពន្លឺព្រះអាទិត្យ ប្រភេទ Perovskite Solar Cells បង្ហាញថា វាបានបញ្ជូនពន្លឺរហូតដល់៧១,៦% ឯណោះ ហើយវាមានប្រសិទ្ធភាពបំលែងថាមពលរហូតដល់១៥,២៩% ។ ដូច្នេះ នៅថ្ងៃអនាគត ក្រុមអ្នកស្រាវជ្រាវនឹងផ្តោតលើការផលិតកញ្ចក់ធំៗពីដើមឫស្សី និងអាចប្រើប្រាស់កញ្ចក់នេះបានច្រើនផ្នែក ។

អ្នកស្រាវជ្រាវម្នាក់និយាយថា ៖ «យើងមានអារម្មណ៍រំភើបជាមួយការរកឃើញលើកនេះ ហើយវាជាការឈានទៅរកការប្រើប្រាស់កញ្ចក់ និងឧបករណ៍អុបទិកធន់ជាមួយភ្លើង ។ សម្រាប់ការស្រាវជ្រាវនៅថ្ងៃអនាគត យើងនឹងផ្តោតលើការផលិតកញ្ចក់មានទំហំធំៗ និងអាចប្រើប្រាស់បានច្រើនផ្នែក» ។

បច្ចុប្បន្ន កញ្ចក់ភាគច្រើនបានផលិតពី Silica និងមានតម្រូវខ្លាំងនៅតាមទីផ្សារពិភពលោក ជាពិសេស នៅឆ្នាំ២០២០ តម្រូវការកញ្ចក់បានកើនឡើងដល់ជាង១៣០លានតោន ។ បើទោះជាការផលិតកញ្ចក់បែបនេះងាយស្រួល និងមានតម្លៃថោក ប៉ុន្តែផ្ទៃកញ្ចក់មិនសូវក្រាស់ទេ ខណៈកញ្ចក់ខ្លះស្តើងខ្លាំង ។ ម្យ៉ាងទៀត ការផលិតកញ្ចក់ពី Silica បានបញ្ចេញឧស្ម័នធ្វើឱ្យពិភពលោកក្តៅ ដូច្នេះ ការផលិតកញ្ចក់ពីដើមឫស្សីនឹងអាចជួយដោះស្រាយបញ្ហានេះបាន ។

ទោះយ៉ាងណា វាគ្រាន់តែជាការស្រាវជ្រាវមួយនៅប្រទេសចិនប៉ុណ្ណោះ ហើយយើងត្រូវតាមដានបន្តថា នៅថ្ងៃអនាគត បើគេអាចផលិតកញ្ចក់ពីដើមឫស្សី និងលក់នៅលើទីផ្សារ តើវានឹងអាចជួយកាត់បន្ថយកំដៅលើពិភពលោកបានដែរឬទេ?

មាសគឺជាលោហៈធាតុម៉្យាងដែលមានតម្លៃ និងទាក់ទាញចំណាប់អារម្មណ៍បំផុតទៅកាន់មនុស្សទូទាំងពិភពលោក។ នៅក្នុងប្រទេសកម្ពុជាយើងតាំងពីបុរាណកាលបន្តរហូតមកដល់បច្ចុប្បន្ន មាសបាននឹងកំពុងស្ថិតនៅក្នុងដួងចិត្តរបស់ប្រជាជនខ្មែរស្ទើរគ្រប់ៗគ្នា ដោយអ្នកខ្លះបានទិញមាសដើម្បីធ្វើជាគ្រឿងអលង្ការពាក់លម្អកាយ ខ្លះទិញមាសទុកដើម្បីបម្រុងទុកក្នុងគ្រាមានអាសន្ន និងទិញមាសទុកសម្រាប់វិនិយោគបង្កើននូវប្រាក់ចំណេញជាដើម។

បើទោះជាបីជាមាសគឺជាវត្ថុមានតម្លៃស្រាប់ក៏ពិតមែន យ៉ាងណាមិញប្រសិនបើបងប្អូនមិនដឹងក្បួនក្នុងការទិញឬក៏លក់មាសឲ្យបានត្រឹមត្រូវតាមកាលទេសៈនោះទេ ប្រាកដណាស់ថាអាចនឹងឡុងចុងជាក់ជាមិនខាន មិនថាតិចក្តីឬច្រើនក្តី។ ដូច្នេះហើយ ខាងក្រោមនេះគឺជាវិធីសាស្រ្ត ៤យ៉ាង ក្នុងការទិញ-លក់មាសឲ្យចំណេញ បើយោងតាមការបញ្ជាក់ពីអ្នកជំនាញ៖

១ តាមដានហាងឆេងមាសជាប្រចាំ៖ ជារៀងរាល់ថ្ងៃ តម្លៃមាសគឺតែងតែមានការប្រែប្រួល ពិសេសគឺតម្លៃហាងឆេងមាសនៅក្នុងស្រុក ដូច្នេះអ្នកត្រូវតែកត់សម្គាល់ពីតម្លៃមាស បើថ្ងៃខ្លះហាងឆេងមាសឡើងថ្លៃខ្លាំងពេក គឺអ្នកមិនត្រូវទិញមាសចូលនោះទេ។ ដោយឡែកសម្រាប់ថ្ងៃខ្លះ មាសចុះថោកខ្លាំង នេះហើយជាឱកាសល្អដែលអ្នកត្រូវតែទិញមាសចូល ដើម្បីទុកលក់វិញ បង្កើនប្រាក់ចំណេញទ្វេដង។ បន្ថែមពីនេះ អ្នកត្រូវតែទិញនៅហាងណាដែលគួរឲ្យទុកចិត្តបានផងដែរ ដើម្បីជៀសវាងពីការកេងប្រវ័ញ្ចផ្សេងៗ។

២ តាមដានពីវិបត្តិសកលលោក៖ អ្នកត្រូវតែតាមដានស្ថានការណ៍ពិភពលោកជាប្រចាំ ជាពិសេសគឺទៅលើផ្នែកសេដ្ឋកិច្ច ភូមិសាស្រ្តនយោបាយ គ្រោះធម្មជាតិ សង្គ្រាម អតិផរណា និងយល់ដឹងពីចរារចរណ៍រូបីយប័ណ្ឌដុល្លារនៅលើទីផ្សារជាដើម ព្រោះថាទាំងនេះវានឹងជះឥទ្ធិពលទៅលើតម្លៃមាសសកល។

៣ ត្រូវប្រាកដថាលុយដែលយកទៅទិញមាសនោះ គឺជាលុយដែលមិនចាំបាច់ក្នុងការចាយវាយភ្លាមៗ៖ ជាការពិតណាស់ តម្លៃមាសគឺតែងមានការឡើងចុះ ប្រែប្រួលទៅវេលា ដូច្នេះហើយមិនប្រាកដថាមាសដែលទិញភ្លាម លក់វិញភ្លាមនឹងចំណេញភ្លាមៗនោះទេ។ ផ្ទុយទៅវិញ ពេលខ្លះ ដើម្បីឲ្យតម្លៃមាសកើនឡើង អ្នកគឺត្រូវតែរងចាំក្នុងរយៈពេលយូរឬឆាប់មិនទៀត។ អ៊ីចឹងហើយ ការដែលយកលុយចាំបាច់ប្រើប្រាស់ទៅទិញមាសទុកនោះ វាមិនមែនជាការបង្កើនប្រាក់ចំណេញទេ តែគឺជាការខាតទៅវិញផងក៏ថាបាន។

៤ ទិញមាសដែលមិនមានថ្លៃឈ្នួល៖ បើចង់ចំណេញខ្លាំងក្នុងការទិញមាសទុក អ្នកគឺត្រូវតែទិញមាសដុំនិងមាសសន្លឹក ដោយមិនគួរទិញមាសជាគ្រឿងអលង្ការទេ ព្រោះអាចនឹងអស់ថ្លៃឈ្នួលច្រើន ហើយឱកាសនូវក្នុងការចំណេញក៏មានកាន់តែតិច។ ប៉ុន្តែបើអ្នកទិញមាសដុំនិងមាសសន្លឹក វានឹងមិនគិតថ្លៃឈ្នួលទេ ដូច្នេះនៅពេលដែលអ្នកលក់វិញក្នុងកាលៈទេសៈមួយសមស្រប តម្លៃមាសអ្នកនឹងកើនឡើងទ្វេដង ឱកាសនៃការចំណេញក៏កប់ក្តោងផងដែរ៕

តារាចម្រៀង លីម តិចម៉េង បានបង្ហោះសំណេរមួយនៅលើបណ្តាញសង្គមទាក់ទងនឹងសកម្មភាពអវិជ្ជមានរបស់អ្នកប្រើប្រាស់បណ្តាញសង្គមមួយចំនួនដែលចូលចិត្តចែករំលែកតែរឿងបំពុលឬរឿងជប៉ុនកូនកាត់ចែករំលែកដាច់ដៃចោល ។ តារាចម្រៀងរូបនេះលើកឡើងទៀតថា រឿងណាល្អៗមិនសូវមានអ្នកចែករំលែកនោះទេដោយរូបគេបានស្នើឱ្យចូលរួមជាមួយខ្លួនចែករំលែករឿងណាល្អៗក្នុងសង្គមដើម្បីជាគំរូដល់អ្នកជំនាន់ក្រោយ។

នាពេលបច្ចុប្បន្នមនុស្សស្ទើរតែពេញមួយប្រទេសទៅហើយដែលមាន Smart Phone ប្រើនិងមានបណ្តាញទំនាក់ទំនងសង្គមដូចជា ហ្វេកប៊ុក និងទិកតុកជាដើម។ យ៉ាងណាមិញ អ្នកមួយចំនួនប្រើប្រាស់បណ្តាញសង្គមនៅមានកម្រិតមិនទាន់យល់ដឹងទៅលើផ្នែកនេះដែលភាសាអង់គ្លេសហៅថា « Media literacy » ចំណេះដឹងពីប្រព័ន្ធផ្សព្វផ្សាយ។ អ្នកប្រើប្រាស់មួយចំនួនមិនទាន់ស្វែងយល់ព័ត៌មានណាជាព័ត៌មានពិតឬក្លែងក្លាយនៅឡើយទេ ដោយសារតែមានជនដែលកើបចំណូលពីអនឡាញ ឬ MMO បានប្រើប្រាស់ព័ត៌មានក្លែងក្លាយ ហើយអ្នកមួយចំនួនមិនបានដឹងនិងបានចែករំលែកបន្តទៀត។

សកម្មភាពមួយចំនួនទៀតរបស់អ្នកប្រើប្រាស់បណ្តាញសង្គមនោះគឺបានចែករំលែករឿងអវិជ្ជមាននៅលើគណនីរបស់ខ្លួន និងបានបញ្ចេញមតិទៅលើរឿងទាំងនោះ ខណៈរឿងផ្សេងទៀតដែលជាភាពវិជ្ជមាន មិនបានចែករំលែកនោះទេដោយអូសរំលងទៅវិញ។

មានអ្នកចែកចាយរឿងអវិជ្ជមាននៅលើបណ្តាញសង្គមនេះដែរ តារាចម្រៀង លីម តិចម៉េង ម្ចាស់ពាន Cambodian Idol រដូវកាលទី៤ បានចេញមកបង្ហោះសំណេរមួយចំៗតែម្តងថារឿងល្អមិនសូវមានអ្នកចែករំលែកតែបើរឿងបំពុលវិញស៊ែរដាច់ដៃចោល។

ម្ចាស់បទ «អូន១៨» បានបង្ហោះថា «រឿងល្អៗគេមិនសូវមើលឃើញ មិនសូវចាប់អារម្មណ៍ទេ មិនសូវចែករំលែក(share)ទេ តែបើរឿងណាបំពុល រឺ រឿងជប៉ុនកូនកាត់វិញ ចែករំលែក(share) ដាច់ដៃចោល។ សូមបងប្អូនដែលប្រើប្រាស់បណ្តាញសង្គមទាំងឡាយហើយចែករំលែករឿងល្អៗដល់មនុស្សជំនាន់ក្រោយ កុំបាក់ទឹកចិត្តសូមបន្តដំណើរជាមួយខ្ញុំនេះគ្រាន់តែជាឧបសគ្គតូចមួយលើផ្លូវរបស់យើងតែប៉ុណ្ណោះ»។

គួរបញ្ជាក់ថា លីម តិចម៉េង ជាតារាចម្រៀងជើងថ្មីដែលជារឿយៗចេញមកនិយាយពីសង្គមដោយមិនខ្លាចបាត់បង់ប្រជាប្រិយភាពរបស់ខ្លួនឡើយ។ តារាចម្រៀងរូបនេះក៏ត្រូវបានទស្សនិកជនកោតសរសើរពីទឹកចិត្តរបស់គេដែលលះបង់ប្រាក់រាប់ពាន់ រាប់ម៉ឺនដុល្លារមិនផ្សព្វផ្សាយល្បែងអនឡាញ ខណៈតិចម៉េង បាននិយាយថាមិនដើម្បីអាហារ៣ពេលរូបគេក្បត់គុណធម៌ មនសិការខ្លួនឯងឡើយ៕

ប្រទេសចិន ៖ ចិនជាប្រទេសផលិតរថយន្តអគ្គិសនីដ៏ច្រើនបំផុតនៅលើពិភពលោក កំពុងតែធ្លាក់ចូលក្នុងវិបត្តិយ៉ាងធ្ងន់ធ្ងរ និងក្លាយជាឧបសគ្គដល់ការរីកចម្រើនផ្នែករថយន្តអគ្គិសនី ខណៈប្រទេសនេះបានផលិតរថយន្តអគ្គិសនីច្រើនសន្ធឹកសន្ធាប់លើសតម្រូវការ ។ ម្យ៉ាងទៀត ការប្រកួតប្រជែងតម្លៃរថយន្តអគ្គិសនីបានធ្វើឱ្យប៉ះពាល់ដល់ក្រុមហ៊ុនផលិតរថយន្តអគ្គិសនីខ្នាតតូច ហើយពួកគេត្រូវសម្របខ្លួនក្នុងទីផ្សារដែលផ្លាស់ប្តូរយ៉ាងឆាប់រហ័ស ។

រយៈពេលជាច្រើនឆ្នាំមកនេះ រដ្ឋាភិបាលចិនបានគាំទ្រឧស្សាហកម្មរថយន្តអគ្គិសនីជាបន្តបន្ទាប់ និងធ្វើឱ្យទីផ្សាររថយន្តអគ្គិសនីរីកចម្រើនយ៉ាងខ្លាំងនៅប្រទេសចិន ហើយធ្វើឱ្យក្រុមហ៊ុនចិនខ្លះឈានទៅពង្រីកទីផ្សារក្នុងពិភពលោកទៀតផង ដូចជា ៖ ក្រុមហ៊ុន BYD បានពង្រីកទីផ្សារពិភពលោក និងប្រកួតប្រជែងជាមួយក្រុមហ៊ុន Tesla ។

បើទោះជាទីផ្សាររថយន្តអគ្គិសនីចិនរីកចម្រើនខ្លាំងក្តី ប៉ុន្តែវាពុំបានរីកចម្រើនសម្រាប់រថយន្តគ្រប់ម៉ាកទេ ។ អ្នកជំនាញយល់ឃើញថា ក្រុមហ៊ុនតូចៗដែលផលិតរថយន្តអគ្គិសនី នឹងពុំអាចដំណើរការល្អទៅថ្ងៃមុខទេ ខណៈមានការប្រកួតប្រជែងតម្លៃខ្លាំងក្នុងទីផ្សារ ។

បច្ចុប្បន្ន ក្រុមហ៊ុនផលិតរថយន្តអគ្គិសនីជាង២០០ នៅប្រទេសចិន បានប្រឈមនឹងបញ្ហាការផ្គត់ផ្គង់រថយន្តអគ្គិសនីច្រើនលើសតម្រូវការ ដែលបណ្តាលមកពីការប្រកួតប្រជែងតម្លៃ និងការលក់ធ្លាក់ចុះ ។ លើសពីនេះ ពេលសេដ្ឋកិច្ចចិនធ្លាក់ចុះ វាបានជំរុញឱ្យក្រុមហ៊ុនផលិតរថយន្តលើពិភពលោកជាច្រើនដកថយពីទីផ្សារចិនផងដែរ ។

បើតាមទិន្នន័យរបស់សមាគមរថយន្តចិនបង្ហាញថា ក្រុមហ៊ុនផលិតរថយន្តជាង១២ម៉ាកបានបាត់ពីទីផ្សារចិនកាលពីឆ្នាំ២០២៣ រួមទាំងរថយន្តអគ្គិសនីមួយចំនួនដែលធ្លាប់ទទួលបានការពេញនិយម ដូចជា ៖ WM Motor, Byton, Aiways និង Levdeo ។

ក្រុមហ៊ុនផលិតរថយន្តលំដាប់ពិភពលោកជាច្រើនបានរៀបចំគម្រោងអាជីវកម្មជាថ្មី ឬបិទអាជីវកម្មតែម្តង ដូចជា ៖ កាលពីខែតុលា ឆ្នាំ២០២៣ ក្រុមហ៊ុន Mitsubishi Motors បានប្រកាសឈប់ផលិតរថយន្តនៅចិន ។ ក្រៅពីនេះ ក្រុមហ៊ុន Honda (HMC) Hyundai និង Ford បានបញ្ឈប់បុគ្គលិក និងលក់រោងចក្រដើម្បីកាត់បន្ថយការចំណាយដើមទុន ។ នេះបើតាមរបាយការណ៍របស់ប្រព័ន្ធផ្សព្វផ្សាយរដ្ឋ ។

កាលពីខែមិថុនា ឆ្នាំ២០២៣ លោក Richard Yu គឺជា CEO របស់ Consumer Business មកពីក្រុមហ៊ុន Huawei ប៉ាន់ស្មានថា នៅឆ្នាំ២០៣០ ប្រទេសចិនអាចនៅសល់ក្រុមហ៊ុនផលិតរថយន្តអគ្គិសនីខ្នាតធំ តិចជាង៥ក្រុមហ៊ុន ៕