ប្រទេសបារាំង ៖ វាបានធ្វើឱ្យមហាជនចាប់អារម្មណ៍យ៉ាងខ្លាំង ក្រោយពេលឃើញគូស្នេហ៍អាមេរិកវ័យចំណាស់១គូបានរៀបអាពាហ៍ពិពាហ៍ជាមួយគ្នា បន្ទាប់ពីពួកគេចូលរួមក្នុងពិធី D-Day នៅទីក្រុង Normandy ប្រទេសបារាំង កាលពីថ្ងៃទី៨ ខែមិថុនា ឆ្នាំ២០២៤ ។

លោក Harold Terence អាយុ១០០ឆ្នាំ ជាអតីតទាហានបានរៀបអាពាហ៍ពិពាហ៍ជាមួយអ្នកស្រី Jeanne Swerlin អាយុ៩៦ឆ្នាំ ដែលអាយុសរុបរបស់អ្នកទាំងពីរ គឺស្មើជិត២០០ឆ្នាំ ។ ពួកគេមកពីទីក្រុងញូវយ៉ក សហរដ្ឋអាមេរិក បានរៀបចំពិធីពិសេសនៅទីក្រុង Normandy ប្រទេសបារាំង ដោយសារទីក្រុងនេះធ្លាប់ជាសមរភូមិប្រយុទ្ធគ្នារវាងទាហានអាមេរិក និងទាហានណាស៊ីអាល្លឺម៉ង់ ក្នុងសម័យសង្គ្រាមលោកលើកទី២ ។

ឆ្នេរសមុទ្រជាច្រើនក្នុងទីក្រុង Normandy គឺជាកន្លែងដែលទាហានអាមេរិក, អង់គ្លេស និងកាណាដា ប្រមាណជិត១៦ម៉ឺននាក់ បណ្តេញពួកណាស៊ីអាល្លឺម៉ង់ឱ្យចាកចេញពីទឹកដីអឺរ៉ុប កាលពីថ្ងៃទី៦ ខែមិថុនា ឆ្នាំ១៩៤៤ ទើបគេដាក់ឈ្មោះថា វាជាថ្ងៃ «D-Day» ។ ពិធីរៀបអាពាហ៍ពិពាហ៍នេះធ្វើឡើងរយៈពេល២ថ្ងៃ ក្រោយការប្រារព្ធខួបលើកទី៨០ នៃការប្រមូលកងកម្លាំងទាហាន ប៉ុន្តែគ្មានការទទួលស្គាល់ពីអភិបាលក្រុង Normandy ទេ ដោយសារពួកគេជាជនជាតិអាមេរិក ។

លោក Harold និងអ្នកស្រី Jeanne ត្រូវបានគេផ្តល់កិត្តិយសធ្វើជាភ្ញៀវកិត្តិយសពិសារអាហារពេលល្ងាចនៅវិមានប្រធានាធិបតី រួមគ្នាជាមួយប្រធានាធិបតីបារាំង លោក Emmanuel Macron និងប្រធានាធិបតីអាមេរិក លោក ចូ បៃដិន ផងដែរ ។

គួរបញ្ជាក់ថា គូស្នេហ៍ទាំងពីរ គឺជាអតីតពោះម៉ាយ និងមេម៉ាយ ហើយពួកគេទើបតែសេពគប់ជាគូស្នេហ៍កាលពីឆ្នាំ២០២១ គឺកូនស្រីអ្នកស្រី Jeanne បានណែនាំឱ្យម្តាយស្គាល់គ្នាជាមួយលោក Harold ។ ក្រោយមក លោកក៏សុំគូស្នេហ៍រៀបការ និងបំពាក់ចិញ្ចៀនឱ្យអ្នកស្រី Jeanne នៅដើមឆ្នាំ២០២៤ ។

លោក Harold បានចូលបម្រើកងទ័ពនៅឆ្នាំ១៩៤២ និងត្រូវបានគេបញ្ជូនទៅអង់គ្លេសនៅឆ្នាំ១៩៤៣ ដោយលោកមានតួនាទីជាជាងជួសជុលវិទ្យុសម្រាប់ក្រុមប្រយុទ្ធ ។ នៅថ្ងៃ D-Day ពេលលោកកំពុងតែជួសជុលយន្តហោះដែលបានត្រឡប់ពីធ្វើប្រតិបត្តិការនៅបារាំង គឺអ្នកបើកយន្តហោះក្នុងអង្គភាពរបស់លោក ប្រមាណពាក់កណ្តាលបានស្លាប់នៅថ្ងៃនោះ ។

រយៈពេល១២ថ្ងៃក្រោយមក លោកក៏បានធ្វើដំណើរទៅបារាំង និងជួយដឹកជញ្ជូនទាហានអាល្លឺម៉ង់ដែលចាប់បាន រួមទាំងអ្នកទោសសង្គ្រាមអាមេរិកត្រូវបានដោះលែងបញ្ចូនទៅអង់គ្លេស ។ ក្រោយពីពួកណាស៊ីយល់ព្រមចុះចាញ់នៅខែឧសភា ឆ្នាំ១៩៤៥ លោកក៏បានជួយដឹកជញ្ជូនអ្នកទោសរបស់ប្រទេសជាមិត្តទៅអង់គ្លេស និងបញ្ជូនត្រឡប់ទៅអាមេរិកនាខែបន្ទាប់ ៕

កាលពីថ្ងៃទី៩ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា សណ្ឋាគារដំបូងគេនៅលើអវកាសគ្រោងនឹងទទួលភ្ញៀវស្នាក់នៅនាពេលឆាប់ៗខាងមុខ ។ អ្នកស្នាក់នៅក្នុងសណ្ឋាគារអវកាសនេះអាចចូលរួមកម្មវិធី ឬធ្វើសកម្មភាពផ្សេងៗ ដែលសកម្មភាពទាំងនេះ ពួកគេមិនអាចធ្វើបានទេនៅលើផែនដី ដូចជា ៖ ពួកគេអាចលើកសម្ភារៈធ្ងន់ធ្ងរ ឬលោតឡើងទៅលើយ៉ាងស្រួល ។

កាលពីឆ្នាំ២០១៩ Gateway Foundation ធ្លាប់បានបង្ហាញពីគម្រោងសាងសង់សណ្ឋាគារនៅលើអវកាស ដោយសង្ឃឹមថា សណ្ឋាគារនេះនឹងផ្តល់សេវាកម្មទទួលភ្ញៀវស្នាក់នៅក្នុងឆ្នាំ២០២៧ ។ ប្រសិនបើគម្រោងរបស់ពួកគេទទួលជោគជ័យមែននោះ គឺចាត់ទុកថា វាជាសណ្ឋាគារនៅលើអវកាសដំបូងគេរបស់ពិភពលោក ហើយគម្រោងនេះមានឈ្មោះថា «Bon Braun Station» ហើយសណ្ឋាគារនេះមានលក្ខណៈស្រដៀងគ្នានឹងកង់រថយន្តដែរ ។ ក្រោយមក គម្រោងនេះត្រូវបានគេប្តូរឈ្មោះមកជា «Voyager Station» ។

ធីមអាឡាតូរ៉េ ជាស្ថាបនិករចនាម៉ូដជាន់ខ្ពស់របស់ Gateway Foundation បានផ្តល់សម្ភាសន៍ជាមួយសារព័ត៌មាន CNN ថា សណ្ឋាគារនៅលើអវកាសអាចវិលទៅមកបាន និងទម្លាក់វត្ថុចេញក្រៅ គឺវាដូចគ្នានឹងយើងបង្វិលធុងទឹកឱ្យលឿន រហូតដល់ទឹកខ្ទាតចេញពីធុង ។ រីឯចំណុចគួរឱ្យចាប់អារម្មណ៍នោះ ការសាងសង់សណ្ឋាគារឱ្យមានរូបរាងមូលបែបនេះ គឺធ្វើតាមខ្សែភាពយន្តរឿង 2001: A Space Odyssey របស់ Stanley Kubrick ដែលចាក់បញ្ចាំងកាលពីឆ្នាំ១៩៦៨ ។

ក្រុមការងារបច្ចេកទេសបានលើកឡើងពីការស្នាក់នៅក្នុងសណ្ឋាគារអវកាសថា អ្នកមកស្នាក់នៅក្នុងសណ្ឋាគារនេះនឹងបានចូលរួមក្នុងកម្មវិធី និងការកម្សាន្តផ្សេងៗយ៉ាងច្រើន ។ វាបង្ហាញឱ្យឃើញថា អ្នកអាចធ្វើអ្វីៗបាននៅទីនេះ ដែលអ្នកពុំអាចធ្វើវាបានលើផែនដី ពីព្រោះការគ្មានទម្ងន់ខ្លួននឹងធ្វើឱ្យអ្នកអាចលោតកាន់តែខ្ពស់ជាងមុន, លើកសម្ភារៈផ្សេងៗយ៉ាងងាយស្រួល និងអាចរត់បានលឿន ដែលអ្នកពុំអាចរត់បែបនេះលើផែនដី ។

យើងបានព្យាយាមធ្វើឱ្យមហាជនមើលឃើញថា ការធ្វើដំណើរមកកាន់អវកាសស្ថិតនៅក្បែរខ្លួនប៉ុណ្ណោះ ហើយការធ្វើដំណើរទៅអវកាសនឹងមកដល់លើសពីការគិតទុក ។ ទោះយ៉ាងណា គេពុំទាន់ដឹងច្បាស់ថា ការស្នាក់នៅក្នុងសណ្ឋាគារអវកាសនេះនឹងចំណាយប្រាក់ប៉ុន្មានទេ ប៉ុន្តែគេសន្និដ្ឋានថា វានឹងមានតម្លៃខ្ពស់ខ្លាំង ហើយមានតែមហាសេដ្ឋីប៉ុណ្ណោះ ទើបអាចស្នាក់នៅក្នុងសណ្ឋាគារពិសេសបាន ។

ចុងក្រោយ Gateway Foundation បញ្ជាក់ថា ពួកគេចង់ឱ្យការស្នាក់នៅក្នុងសណ្ឋាគារនេះមានលក្ខណៈស្រដៀងគ្នានឹងការទៅកម្សាន្តនៅ Disneyland ដែរ មានន័យថា ពួកគេចង់ឱ្យមនុស្សគ្រប់គ្នាអាចមកស្នាក់នៅសណ្ឋាគារខាងលើ ៕

កូរ៉េខាងត្បូង៖ យោងតាមវេទិកាពាណិជ្ជកម្មអេឡិចត្រូនិក Gmarket កាលពីពេលថ្មីៗនេះបានឱ្យដឹងថា ចាប់ពីដើមឆ្នាំ២០២៤ រហូតមកដល់ពេលនេះ អាហារសត្វចិញ្ចឹមគឺមានចំនួនរហូតដល់ ៦៩% នៃការលក់សរុប ដែលតួលេខនេះគឺច្រើនជាងទ្វេដងនៃទឹកដោះគោ និងផលិតផលអាហារទារកទៅទៀត។ យោងតាមទិន្នន័យពីឧស្សាហកម្មវេជ្ជសាស្ត្រ និងពេទ្យសត្វ ចំនួនមន្ទីរពេទ្យសម្រាប់សត្វឆ្កែ និងឆ្មាក៏បានកើនឡើងទ្វេដងផងដែរ បើធៀបទៅនឹងកន្លែងពិនិត្យសុខភាព និងព្យាបាលកុមារ។

យោងតាមរបាយការណ៍ មូលហេតុដែលមានការផ្លាស់ប្តូរនេះគឺដោយសារអត្រាកំណើតនៅក្នុងប្រទេសកូរ៉េធ្លាក់ចុះខ្លាំង ដូច្នេះនិន្នាការកើនឡើងនៃភាពជាម្ចាស់សត្វចិញ្ចឹមបានបណ្តាលឱ្យការប្រើប្រាស់ផលិតផលសត្វឆ្កែ និងឆ្មាកើនឡើងខ្លាំងជាងទឹកដោះគោម្សៅរបស់ទារក។ ស្ថិតិផ្លូវការបង្ហាញថា អត្រាមានកូនសរុបនៅក្នុងប្រទេសបានថយចុះពី ០.៩២ ក្នុងឆ្នាំ ២០១៩ មកត្រឹម ០.៧២ ក្នុងឆ្នាំ ២០២៣ ហើយអាចធ្លាក់ចុះមកត្រឹម ០.៦៨ នៅឆ្នាំនេះ។

ដូច្នេះទីក្រុងទាំងមូលគឺមានទារកទើបនឹងកើតត្រឹមតែ ៥៩៤,០០០ នាក់ប៉ុណ្ណោះ។ ផ្ទុយទៅនឹងអត្រាកំណើត ជនជាតិកូរ៉េដែលចិញ្ចឹមឆ្កែបានកើនឡើងជាង ៤៤% ពី ២.០៩ លានក្បាលក្នុងឆ្នាំ ២០១៩ ដល់ ៣.០៣ លានក្បាលក្នុងឆ្នាំ ២០២២។ ហេតុនេះនៅទីក្រុងសេអ៊ូល គឺមានសត្វជាង ៦១០,០០០ ក្បាល ត្រូវបានចុះឈ្មោះដើម្បីចិញ្ចឹម។ នេះបើយោងតាមប្រភពឧស្សាហកម្មក៏ប៉ាន់ស្មានដែរថាទីផ្សារសត្វចិញ្ចឹមនឹងលើសពីទីផ្សារថែទាំកុមារនៅឆ្នាំក្រោយ។ ឧស្សាហកម្មសត្វចិញ្ចឹមអាចកើនឡើងដល់ ៦ ពាន់ពាន់លានវ៉ុននៅឆ្នាំ ២០២៧ បន្ទាប់ពីឈានដល់ ៤ ពាន់ពាន់លានវ៉ុនក្នុងឆ្នាំ ២០២៣។

គួរបញ្ជាក់ដែរថា ការថយចុះអត្រាកំណើតធ្វើឱ្យបុព្វលាភនៃផលិតផលរបស់កុមារកើនឡើង។ ការចំណាយជាមធ្យមរបស់អតិថិជនលើទឹកដោះគោ និងអាហារទារកបានកើនឡើង ៥៤% បើធៀបទៅនឹងឆ្នាំ ២០១៩ ក្នុងរយៈពេលត្រឹមតែ ៥ ខែដំបូងនៃឆ្នាំនេះ។ យោងតាម Gmarket បានឱ្យដឹងទៀតថា ការចំណាយរបស់អតិថិជននីមួយៗសម្រាប់ផលិតផលរបស់កុមារនាពេលបច្ចុប្បន្នគឺខ្ពស់ជាង ៣ ដង ហើយការចំណាយសម្រាប់អាហារសត្វចិញ្ចឹមក៏បន្តកើនឡើងជារៀងរាល់ឆ្នាំផងដែរ៕