បន្ទាប់ពីDJ Soda បង្ហាញខ្លួនឈុតប្រពៃណីខ្មែរក្នុងបទថ្មីសហការជាមួយតារាចម្រៀងជួរមុខ ជី ដេវីត ធ្វើឱ្យសាធារណជនចាប់អារម្មណ៍ភ្លូកទឹកដីភ្លូកដី ជាពិសេសឈុតប្រពៃណីដែល DJ ដ៏ល្បីល្បាញរូបនេះស្លៀកនេះគឺបានបំផុសគំនិតចេញពីព្រះពស្ត្រាសម្តេចព្រះមហាក្សត្រី កាលពីទសវត្សរ៍ទី៦០។ ប្រការនេះបានធ្វើឱ្យអ្នកជិតខាងឆេះឆួលយ៉ាងខ្លាំងកើតទុក្ខមិនសុខចិត្តដល់ថ្នាក់ថានេះជាសំលៀកបំពាក់របស់ថៃ។ដូចមហាជនជ្រាបមកហើយថា កាលពីថ្ងៃទី៨ មិថុនា ជី ដេវីត បានទម្លាក់ Teaser ថ្មីសហការជាមួយ DJ Soda ចេញបទមួយមានចំណងជើងថា « WE MADE IT»។ នៅក្នុងវីដេអូខ្លីនេះគេបានឃើញ DJ Soda បានរំលេចខ្លួនជាមួយឈុតប្រពៃណីខ្មែរយ៉ាងស្រស់ស្អាតនៅក្នុង MV ដែលនេះជាកត្តាមួយជំរុញការផ្សព្វផ្សាយពីវប្បធម៌ខ្មែរទៅកាន់ពិភពលោកតាមរយៈស្នាដៃមួយនេះ។ មិនត្រឹមតែប៉ុណ្ណោះវីដេអូខ្លីនេះគេបានឮDJ ដ៏ស្រស់សោភារូបនេះច្រៀងភាសាខ្មែរថា «ជម្រាបសួរចាស ខ្ញុំ Soda ហេ ជី ដេវីត WE MADE IT »។ នេះជាជំហានថ្មីមួយសម្រាប់តារាចម្រៀងទាំងពីររូបបំរើអារម្មណ៍ទស្សនិកជន ខណៈ ជី ដេវីត ជាតារាចម្រៀងខ្មែរដំបូងជំរុញចិត្តឱ្យដៃគូសហការស្លៀកឈុតប្រពៃណីខ្មែរថត MV បាន។

អ្វីដែលកាន់តែចាប់អារម្មណ៍នោះឈុតប្រពៃណីដែល DJ Soda ស្លៀកនេះបានបំផុសគំនិតចេញពីឈុតស្បៃធំហ្លូងយាយកាលពីទសវត្សរ៍ទី៦០។ នេះបើតាមការបញ្ជាក់ពីម្ចាស់សំអាង រ័ត្នមង្គល ដែលជាអ្នករៀបចំឈុតប្រពៃណីនេះជូន DJ Soda។

នៅពេលដែល DJ Soda មកពីកូរ៉េខាងត្បូង ជាDJ ដ៏ស្រស់សោភា មានអ្នកតាមដានរាប់លាននាក់ជុំវិញពិភពលោក ស្លៀកឈុតប្រពៃណីខ្មែរ ថតMV ដែលជំរុញការផ្សព្វផ្សាយពីវប្បធម៌ខ្មែរនេះបានធ្វើឱ្យអ្នកជិតខាងកើតទុក្ខមិនសុខចិត្តឆេះឆួលក្នុងឱរ៉ាយ៉ាងខ្លាំងដោយបានយករូបថតហ្លូងយាយ និងរូបថត DJ Soda បង្ហោះចូលក្នុងក្រុមមួយដោយដាក់ថាជាសំលៀកបំពាក់របស់ថៃ។ នៅក្នុងអត្ថន័យនោះជនជាតិសៀមថា Sabai THAI SIAM គឺជាសម្លៀកបំពាក់ និងសម្លៀកបំពាក់របស់ប្រទេសថៃ ឬនគរសៀម។ វាជាសម្លៀកបំពាក់ដែលគេប្រើក្នុងរាជវង្សសៀម ដោយសៀមធ្លាប់គ្រប់គ្រងប្រទេសកម្ពុជា ហើយរាជវង្សខ្មែរត្រូវស្ថិតក្រោមការគ្រប់គ្រងរបស់សៀម។ ដូច្នេះ រាជវង្សខ្មែរបានយករចនាបថសៀម ហើយប្រើតែក្នុងបច្ចុប្បន្ន និងបានថាប្រជាជនកម្ពុជាមិនមានចំណេះដឹងរំលោភកម្មសិទ្ធិរបស់គេ។

គួរបញ្ជាក់ថា នេះមិនមែនជាលើកទី១នោះទេដែល DJ Soda ជូនផ្សព្វផ្សាយពីវប្បធម៌ខ្មែរកាលពីមុននាងក៏បានទៅប្រាសាទអង្គរវត្ត បង្ហោះនៅលើបណ្តាញសង្គមដូចគ្នា ខណៈកាលពីថ្ងៃសម្ពោធ MV ទេវរាជ DJ Soda បានគ្រងឈុតអប្សរាក៏បានចូលរួមផ្សព្វផ្សាយផងដែរ។ លើសពីការងារក្នុងប្រទេសកម្ពុជា DJ រូបនេះក៏បានចែករំលែកក្តីស្រលាញ់ក្នុងកិច្ចការសប្បុរសធម៌ឧបត្ថម្ភ៦០០០ដុល្លារដល់អង្គការអាហ្វេស៊ីបកម្ពុជា។ ដូច្នេះហើយបានជាអ្នកជិតខាងឈឺចិត្តស្អិតទ្រូងបែបនេះ៕

ប្រទេសឥណ្ឌូណេស៊ី ៖ លំនៅឋានជាច្រើនខ្នង និងច្រើនជាន់ក្នុងភូមិមួយដែលលោកអ្នកបានឃើញនេះ មិនមែនជាភូមិធម្មតាៗនោះទេ ពីព្រោះភូមិនេះមានទីតាំងស្ថិតនៅលើដំបូលផ្សារទំនើបមួយកន្លែងក្នុងទីក្រុងហ្សាកាតា ប្រទេសឥណ្ឌូណេស៊ី ។

នេះបង្ហាញថា ផ្សារទំនើបនៅផ្នែកខាងក្រោមពិតជាមានសភាពរឹងមាំខ្លាំងហើយ ទើបអាចទ្រភូមិដ៏ធំមួយបាន ហើយអ្នករស់នៅភូមិនេះថែមទាំងអាចបើករថយន្តពីខាងក្រោមឡើងទៅលើ និងចតរថយន្តមុខផ្ទះពួកគេផងដែរ ។

ហេតុអ្វីទើបគេបង្កើតភូមិនៅលើដំបូលផ្សារទំនើបបែបនេះ ឬក៏ខ្វះដីសាងសង់? ភូមិនេះបង្កើតឡើងក្រោមគម្រោងអភិវឌ្ឍន៍លំនៅឋានឈ្មោះ «Cosmo Park» ដែលមានលំនៅឋាន២ជាន់ សរុបចំនួន៧៨ខ្នង ។ លើសពីនេះ ក្នុងភូមិនៅមានទីកន្លែងផ្តល់សេវាកម្មយ៉ាងច្រើនសន្ធឹកសន្ធាប់ទៀត ដូចជា ៖ កន្លែងហាត់ប្រាណ, អាងហែលទឹក, ទីលានវាយកូនបាល់ និងមានផ្លូវខ្វាត់ខ្វែងសម្រាប់អ្នកភូមិបើកបររថយន្ត ។

ភ្នាក់ងារអភិវឌ្ឍផ្នែកអចលនទ្រព្យនៅទីក្រុងហ្សាកាតា មានគំនិតបង្កើតគម្រោងលំនៅឋានលើដំបូលផ្សារទំនើបនេះ គឺដើម្បីបង្កើនកន្លែងស្នាក់នៅដល់ពលរដ្ឋក្នុងក្រុងហ្សាកាតា ខណៈវាជាទីក្រុងធំ និងមានមនុស្សរស់នៅច្រើនបំផុតនៅឥណ្ឌូណេស៊ី ។ ម្យ៉ាងទៀត គម្រោងបង្កើតភូមិលើដំបូលផ្សារទំនើប គឺអាចបណ្តាលមកពីដីធ្លីនៅក្រុងហ្សាកាតា មានតម្លៃខ្ពស់ជាងទីក្រុងផ្សេងៗ ប្រមាណពី១០% ទៅ២០% ។

បើតាមការិយាល័យផ្សព្វផ្សាយពាណិជ្ជកម្មក្រៅប្រទេស ដែលមានទីតាំងនៅក្រុងហ្សាកាតា និងស្ថិតក្រោមក្រសួងពាណិជ្ជកម្ម បានបង្ហាញរបាយការណ៍មួយរបស់ Cushman & Wakefield ជាក្រុមហ៊ុនអចលនទ្រព្យលំដាប់ពិភពលោក បញ្ជាក់ថា តម្លៃលំនៅឋាននៅតំបន់ពាណិជ្ជកម្មក្នុងក្រុងហ្សាកាតា កាលពីចុងឆ្នាំ២០១៤ គឺតម្លៃជាមធ្យម ស្មើនឹង៣.៤៧៩ដុល្លារអាមេរិកក្នុង១ម៉ែត្រការ៉េ និងកើនឡើង៣៨,៩% បើធៀបនឹងឆ្នាំ២០១៣ ។

ភូមិស្ថិតក្រោមគម្រោងអភិវឌ្ឍន៍លំនៅឋានឈ្មោះ «Cosmo Park» បានបង្កើតឡើងនៅលើដំបូលផ្សារទំនើបមួយឈ្មោះ «Thamrin City» ដែលមានលំនៅឋានសរុបចំនួន៧៨ខ្នង ហើយលំនៅឋាននីមួយៗមានចំនួន២ជាន់ ។ អ្នករស់នៅទីនេះពុំចាំបាច់បារម្ភពីគ្រោះថ្នាក់ទេ ពីព្រោះភ្នាក់ងារជំនាញបានរៀបចំប្រព័ន្ធសុវត្ថិភាពសម្រាប់អ្នកភូមិ គឺសាងសង់របងបាំងកុំឱ្យមនុស្សធ្លាក់ចុះក្រោម ៕

សហរដ្ឋអាមេរិក៖ ថ្មីៗនេះមហាសេដ្ឋីរបស់ពិភពលោក Elon Musk បាននិយាយថា ខ្លួននឹងសហការជាមួយ Samsung ដើម្បីផលិតទូរស័ព្ទដំបូងបង្អស់របស់ខ្លួនដែលមានឈ្មោះថា X” ក្នុងពេលឆាប់ៗនេះ។
យោងតាម Business Insider ការគ្រោងបង្កើតស្មាតហ្វូនដំបូងរបស់ខ្លួនភា្លមៗបែបនេះ គឺបានកើតឡើងនៅពេល Musk បានរិះគន់ Apple ចំពោះការនាំយកគំរូ AI របស់ OpenAI ទៅកាន់ iPhones, iPads, និង Macs… ដោយមហាសេដ្ឋីរូបនេះបាននិយាយថា Apple នឹង “មិនដឹងថាមានអ្វីកើតឡើងនៅពេលដែលប្រគល់ទិន្នន័យឱ្យទៅ OpenAI” កាន់កាប់នោះទេ។

Musk បាននិយាយថា “ប្រសិនបើ OpenAI ត្រូវបានរួមបញ្ចូលនៅកម្រិតប្រព័ន្ធប្រតិបត្តិការរបស់ឧបករណ៍ Apple នោះផលិតទាំងអស់របស់ក្រុមហ៊ុននេះនឹងត្រូវបានហាមឃាត់នៅក្នុងក្រុមហ៊ុនរបស់លោក ដោយសារវាគឺជាការរំលោភលើសុវត្ថិភាពរបស់ក្រុមហ៊ុនលោកដែលមិនអាចទទួលយកបាន។ នេះមិនមែនជាលើកទីមួយទេដែល Musk បានលើកឡើងអំពីការបង្កើតទូរស័ព្ទថ្មីនេះ។ នៅឆ្នាំ ២០២២ នៅពេលដែល Apple គំរាមដកកម្មវិធី Twitter ចេញពី App Store លោកក៏បាននិយាយផងដែរថា លោកនឹងបង្កើតគំរូស្មាតហ្វូនដើម្បីប្រកួតប្រជែងជាមួយ iPhone ។

យោងតាម Business Insider ប្រសិនបើ Musk ផលិតស្មាតហ្វូនថ្មីរបស់ខ្លួនដោយដាក់ឈ្មោះឧបករណ៍ថា X គឺមិនគួរឱ្យភ្ញាក់ផ្អើល និងមិនគួរឱ្យចាប់អារម្មណ៍ឡើយ។ ទោះជាយ៉ាងណាមហាសេដ្ឋីរូបនេះគឺមានចំណង់ចំណូលចិត្តយ៉ាងខ្លាំងចំពោះអក្សរ X។ នៅឆ្នាំ ១៩៩៩ លោកបានបង្កើតក្រុមហ៊ុនសេវាកម្មហិរញ្ញវត្ថុនិងការទូទាត់ X.com ហើយបន្ទាប់មកនៅឆ្នាំ ២០០២ លោកក៏បានបន្តបើកក្រុមហ៊ុនអវកាស SpaceX ។

នៅចុងឆ្នាំ ២០២២ បន្ទាប់ពីបានកាន់កាប់ Twitter នៅពេលនោះលោកក៏បានបើកដំណើរការ X Corp ហើយបន្ទាប់មកបានប្តូរឈ្មោះបណ្តាញសង្គម Twitter ទៅជា X។ ហើយនៅដើមខែកក្កដា ឆ្នាំ ២០២៣ Musk ក៏បានប្រកាសក្រុមហ៊ុន xAI ជាមួយនឹងមហិច្ឆតាក្នុងការអភិវឌ្ឍន៍ជម្រើសជំនួស ChatGPT ទៀតផង៕

ប្រទេសវៀតណាម ៖ កាលពីថ្ងៃទី១៣ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា នាពេលថ្មីៗនេះ នាយករដ្ឋមន្ត្រីវៀតណាម លោក Pham Minh Chinh បានបញ្ជាទៅកាន់ក្រសួងហិរញ្ញវត្ថុឱ្យធ្វើការរឹតបន្តឹង និងតាមដានអ្នកមានឥទ្ធិពលទាំងអស់នៅក្នុងប្រទេស ។

ក្រៅពីនេះ ក្រសួងហិរញ្ញវត្ថុ ក៏ត្រូវតាមដាន និងប្រមូលពន្ធពីអ្នកលក់ផលិតផលអនឡាញតាមបណ្តាញសង្គមផ្សេងៗផងដែរ ជាពិសេស ផ្តោតលើអ្នកមានប្រាក់ចំណូលស្មើនឹង១០០លានដុងក្នុង១ឆ្នាំ (ឬស្មើជិត៤ពាន់ដុល្លារអាមេរិក) ។

លោក Pham Minh Chinh នាយករដ្ឋមន្ត្រីវៀតណាមបញ្ជាក់ថា អ្នកលក់ផលិតផលអនឡាញទាំងអស់ ដែលរកប្រាក់ចំណូលបានជិត៤ពាន់ដុល្លារអាមេរិកក្នុង១ឆ្នាំ ពួកគេនឹងត្រូវបង់ពន្ធឱ្យរដ្ឋ ស្របតាមច្បាប់ប្រាក់ចំណូលផ្ទាល់ខ្លួនរបស់ប្រទេសវៀតណាម ។

លើសពីនេះ ក្រៅពីតម្រូវឱ្យអ្នកលក់ផលិតផលអនឡាញទាំងអស់បង់ពន្ធឱ្យរដ្ឋហើយ អ្នកផលិតមាតិកាយ៉ាងច្រើននៅប្រទេសវៀតណាម ក៏ត្រូវបានរដ្ឋាភិបាលស្នើឱ្យពួកគេបង់ពន្ធឱ្យរដ្ឋដូចគ្នាដែរ ។

នាយករដ្ឋមន្ត្រីវៀតណាមថ្លែងថា រដ្ឋាភិបាលនឹងប្រមូលពន្ធពីអ្នកបង្កើតមាតិការទាំងអស់នៅប្រទេសវៀតណាម (គឺរួមទាំងការប្រមូលពន្ធក្នុងរយៈពេលកន្លងមក) ដោយសារពួកគេពុំបានជូនដំណឹងអំពីប្រាក់ចំណូលផ្ទាល់ខ្លួនទៅមន្ត្រីរដ្ឋាភិបាល ។

ការប្រកាសប្រមូលពន្ធពីអ្នកលក់ផលិតផលអនឡាញនេះ គឺក្រោយពីរដ្ឋាភិបាលវៀតណាមរកឃើញថា បច្ចុប្បន្ន ការលក់ផលិតផលតាមអនឡាញនៅវៀតណាមបានកើនឡើងរហូតដល់២៥% ក្នុង១ឆ្នាំ និងដើរតួនាទីយ៉ាងសំខាន់ក្នុងការផ្លាស់ប្តូរឌីជីថល ។ ប៉ុន្តែការបង់ពន្ធឱ្យរដ្ឋាភិបាលផ្នែកពាណិជ្ជកម្មអេឡិចត្រូនិក បែរជាពុំកើនឡើងតាមភាគរយនេះទេ ៕

ប្រទេសតួកគី ៖ កាលពីថ្ងៃទី១២ ខែមិថុនា ឆ្នាំ២០២៤ គេហទំព័រ dailymail.co.uk រាយការណ៍ថា យន្តហោះក្រុមហ៊ុនអាកាសចរណ៍ Mavi Gok Airlines ជើងហោះហើរ 4M413 របស់ប្រទេសតួកគី រៀបនឹងចេញដំណើរទៅហើយ ស្រាប់តែអ្នកដំណើរសុំចុះវិញអស់ដោយសារអាកាសធាតុក្តៅខ្លាំងពេក និងរអ៊ូរទាំថា ក្រុមហ៊ុនអាកាសចរណ៍ពុំបានជួយអ្វីពួកគេទេ ។

ក្នុងយន្តហោះមានអាកាសធាតុខ្លាំងបែបនេះ ដោយសារខូចម៉ាស៊ីនត្រជាក់ក្នុងអំឡុងពេលយន្តហោះត្រៀមធ្វើដំណើរចាកចេញពីប្រទេសតួកគី ទៅអាល្លឺម៉ង់ ។ ហេតុនេះ ធ្វើឱ្យអ្នកដំណើរអង្គុយក្នុងយន្តហោះក្តៅខ្លាំងអស់ជាង១ម៉ោង ទម្រាំអាកាសយានិកសម្រេចចិត្តបើកយន្តហោះត្រឡប់ទៅកាន់អគារអ្នកដំណើរវិញ ។

សារព័ត៌មានរាយការណ៍ថា ហេតុការណ៍នេះបានកើតឡើងកាលពីថ្ងៃទី៦ ខែមិថុនា កន្លងមក ពេលនោះ យន្តហោះ Boeing 737-800 របស់ក្រុមហ៊ុនអាកាសចរណ៍ Mavi Gok Airlines កំពុងត្រៀមហោះហើរចេញពីអាកាសយានដ្ឋាននៅទីក្រុង Antalya ប្រទេសតួកគី ទៅអាល្លឺម៉ង់ ។ ប៉ុន្តែស្រាប់តែម៉ាស៊ីនត្រជាក់ខូច និងធ្វើឱ្យសីតុណ្ហភាពក្នុងយន្តហោះកើនឡើងរហូតដល់៥២អង្សារសេ ។

លោក Dominic Janssen ជនជាតិអាល្លឺម៉ង់ ដែលបានធ្វើដំណើរក្នុងយន្តហោះនេះ បានផ្តល់សម្ភាសន៍ជាមួយសារព័ត៌មានអាល្លឺម៉ង់ក្រោយកើតហេតុថា ពេលលោកដើរចូលក្នុងយន្តហោះឃើញថា អាកាសធាតុក្តៅខ្លាំងខុសពីធម្មតា ហើយភរិយារបស់លោកបានយកកង្ហារឡើងយន្តហោះមកបក់ឱ្យកូនអាយុ៥ខែ ។ លោកថា ៖ «កូនលោកនៅតែយំខ្លាំងៗឥតឈប់ ហើយពេលអាកាសធាតុក្តៅខ្លាំង ទឹកបរិសុទ្ធសម្រាប់អ្នកដំណើរ ក៏អស់ទៀត ។ វាគ្រោះថ្នាក់ខ្លាំងណាស់សម្រាប់អ្នកដំណើរគ្រប់រូប» ។

ចំណែកអ្នកដំណើរផ្សេងទៀតនិយាយថា ពួកគេទទួលបានការសង្គ្រោះតែបន្តិចបន្តួចប៉ុណ្ណោះពីបុគ្គលិកអាកាសចរណ៍ ខណៈអាកាសយានិកនៅតែចង់បើកយន្តហោះទៅកាន់ Runway ដើម្បីត្រៀមហោះហើរ ។

ក្រោយមក គ្រូពេទ្យម្នាក់បាននិយាយភាសាតួកគីជាមួយបុគ្គលិកអាកាសចរណ៍ថា ៖ «សូមកុំឱ្យយន្តហោះចាកចេញឱ្យសោះ ពីព្រោះខ្លាចក្មេងៗស្លាប់» ទើបអាកាសយានិកបើកយន្តហោះមកកាន់អគារអ្នកដំណើរក្នុងអាកាសយានដ្ឋានវិញ ។ ប៉ុន្តែស្ថានការណ៍នៅតែយ៉ាប់ដដែល ដោយសារក្រុមហ៊ុនអាកាសចរណ៍ពុំបានជួយអ្វីអ្នកដំណើរឡើយក្រោយចុះពីយន្តហោះ សូម្បីតែទឹកបរិសុទ្ធ១ដប ក៏គ្មានដែរ ។

ចំណែកក្រុមហ៊ុនអាកាសចរណ៍តួកគីឈ្មោះ Mavi Gok Airlines លើកឡើងថា ក្រុមហ៊ុនយកចិត្តទុកដាក់លើសុវត្ថិភាពរបស់អ្នកដំណើរ និងបុគ្គលិកអាកាសចរណ៍ខ្លាំងបំផុត ។ រីឯខាង Boeing ពុំបាននិយាយអ្វីទេ ពាក់ព័ន្ធនឹងហេតុការណ៍ខូចម៉ាស៊ីនត្រជាក់ក្នុងយន្តហោះនេះ ៕