ប្រទេសឥណ្ឌា ៖ ភ្ញៀវទេសចរភាគច្រើនបានស្គាល់យ៉ាងច្បាស់ពីមហាកំពែងនៅប្រទេសចិន ប៉ុន្តែនៅឥណ្ឌា ក៏មានមហាកំពែងយ៉ាងស្រស់ស្អាតផងដែរ ដែលបានជាប់ចំណាត់ថ្នាក់ទី២ លើពិភពលោក បន្ទាប់ពីមហាកំពែងចិន ។ មហាកំពែងនេះឈ្មោះ «Kumbhalgarh» ស្ថិតនៅភាគខាងជើងតំបន់ Udaipur រដ្ឋ Rajasthan និងស្ថិតនៅភាគខាងលិចប្រទេសឥណ្ឌាប្រមាណ៨៤គីឡូម៉ែត្រ ។

មហាកំពែង Kumbhalgarh មានឈ្មោះមួយទៀតថា «The Great Wall of India» និងត្រូវបានអង្គការយូណេស្កូប្រកាសថា ជាសម្បត្តិបេតិកភណ្ឌពិភពលោក កាលពីឆ្នាំ២០១៣ ។ មហាកំពែងនេះកសាងឡើងដោយព្រះមហាក្សត្រព្រះនាម Rana Kumbha ji កាលពីប្រមាណ៥០០ឆ្នាំមុន ដែលព្រះអង្គគ្រប់គ្រងព្រះនគរ Mewar ក្នុងគោលបំណងធ្វើជាជម្រកលាក់ខ្លួនគេចពីការឈ្លានពានរបស់ពួកម៉ូគុន ក្នុងសតវត្សរ៍ទី១៥ ។

មហាកំពែងនេះបានសាងសង់នៅលើកំពូលភ្នំ Aravalli ដែលខ្ពស់ជាងកម្រិតទឹកសមុទ្រចំនួន១.១០០ម៉ែត្រ និងមានប្រវែងសរុប៣៦គីឡូម៉ែត្រ ។ ចំណុចនីមួយៗមានភាពខុសប្លែកគ្នាទៅតាមផ្លូវបត់បែននៅលើភ្នំ និងព័ទ្ធជុំវិញដោយកំពូលភ្នំចំនួន១៣ ។ មហាកំពែងមានទ្វារធំៗចំនួន៧កន្លែង ដែលអាចមើលឃើញទេសភាពដ៏ស្រស់ស្អាតរបស់ជួរភ្នំ Aravalli ។

រីឯនៅបរិវេណជិតមហាកំពែង គឺមានព្រះរាជវាំងបាដាល ម៉ាហាល (ឬព្រះរាជវាំងពពក) ព្រមទាំងមានវត្តសាសនាហិណ្ឌូ និងសាសនាចេន សរុបចំនួន៣៦០កន្លែង រួមទាំងអណ្តូងទឹកមួយចំនួន ។ អ្នកបុរាណវិទ្យាឥណ្ឌានិយាយថា ការសាងសង់មហាកំពែងមានចំណាយពេលជាង១សតវត្សរ៍ ហើយត្រូវបានពង្រីកកាន់តែធំជាងមុននៅសតវត្សរ៍ទី១៩ ។ ការសាងសង់មហាកំពែងនៅលើកំពូលភ្នំ គឺដើម្បីឱ្យវាស្ថិតនៅលើទីខ្ពស់ និងអាចមើលឃើញទេសភាពឆ្ងាយៗ ។

មហាកំពែងឥណ្ឌាត្រូវបានរចនាម៉ូដដោយស្ថាបត្យករមានកេរ្តិ៍ឈ្មោះល្បីល្បាញបំផុតនាសម័យនោះ គឺ Mandan ព្រមទាំងជាអ្នកនិពន្ធក្នុងព្រះរាជវាំង ដោយការសាងសង់បានប្រើប្រាស់ដុំឥដ្ឋរាប់ពាន់ដុំ និងតុបតែងជារូបផ្កានៅផ្នែកខាងលើ ។ ហេតុនេះ វាបានក្លាយជាកន្លែងទាក់ទាញភ្ញៀវទេសចរយ៉ាងច្រើនមកពីជុំវិញពិភពលោក ។

តាមឯកសារបញ្ជាក់ថា ក្នុងអំឡុងពេលសាងសង់មហាកំពែងនេះមានឧបសគ្គជាច្រើន ព្រមទាំងមានអ្នកស្ម័គ្រចិត្តលះបង់អាយុជីវិតផងដែរ ដើម្បីឱ្យមហាកំពែងនេះលេចរូបរាងឡើង ។ ពលរដ្ឋឥណ្ឌាប្រាប់ថា នៅសម័យនោះ គេបានដុតគោមយ៉ាងធំដើម្បីបំភ្លឺសម្រាប់អ្នកសាងសង់មហាកំពែងពេលយប់ ។ ក្រោយមក ព្រះមហាក្សត្រឥណ្ឌាជាច្រើនសម័យកាលបានព្យាយាមសាងសង់មហាកំពែងឱ្យកាន់តែវែង ប៉ុន្តែបរាជ័យរហូត ។

លោក Narayan Vyas ជាអ្នកស្រាវជ្រាវមហាកំពែងនៅទីក្រុង Bhopal និងទីក្រុង Jabalpur ក្រោយពីលោកបានចូលនិវត្តន៍ បន្ទាប់ពីធ្វើការស្រាវជ្រាវនៅតំបន់បុរាណរបស់ឥណ្ឌាអស់រយៈពេល១០ឆ្នាំ បានផ្តល់សម្ភាសន៍ជាមួយប្រព័ន្ធផ្សព្វផ្សាយ Hindustan Times ថា វត្តនានានៅបរិវេណមហាកំពែងនេះ អាចមានអាយុកាលចំណាស់ជាងអ្នកប្រវតិ្តសាស្ត្រគិតទៅទៀត ៕

ប្រទេសចិន៖ យោងតាម CNBC ដែលបានរាយការណ៍កាលពីពេលថ្មីៗនេះថា ប្រទេសចិនបានលក់រថយន្តច្រើនជាងដៃគូប្រកួតប្រជែងរបស់ខ្លួនគឺអាមេរិកជាលើកដំបូងក្នុងប្រវត្តិសាស្ត្រ ដែលនេះបង្ហាញឱ្យឃើញថា ក្រុមហ៊ុន BYD គឺកំពុងរីកចម្រើនយ៉ាងឆាប់រហ័សបំផុតនៅក្នុងទីផ្សាររថយន្តពិភពលោក។ ដូច្នេះគិតត្រឹមពីឆ្នាំមុនរហូតមកដល់ពេលនេះប្រទេសចិននៅតែនាំមុខអាមេរិកក្នុងការលក់រថយន្ត នេះបើតាមសម្តីរបស់អ្នកស្រាវជ្រាវ Jato Dynamics ដែលបាននិយាយនៅក្នុងរបាយការណ៍មួយកាលពីថ្ងៃទី១៥ មិថុនា ២០២៤។

យោងតាមទិន្នន័យបង្ហាញថា ក្រុមហ៊ុន BYD ដែលមានមូលដ្ឋាននៅទីក្រុង Shenzhen បានលក់រថយន្តថ្មីចំនួន ១៣.៤ លានគ្រឿងកាលពីឆ្នាំមុន ខណៈដែលម៉ាកយីហោអាមេរិកបានលក់រថយន្តប្រហែល ១១.៩ លានគ្រឿងប៉ុណ្ណោះ។ ទោះជាយ៉ាងណាម៉ាកយីហោជប៉ុននៅតែនាំមុខចិននិងអាមេរិកជាមួយនឹងការលក់ ២៣.៥៩ លានគ្រឿង។ យោងតាមរបាយការណ៍ កំណើននៃការលក់របស់ប្រទេសចិនគឺបានវ៉ាដាច់សហរដ្ឋអាមេរិកជាលើកដំបូងក្នុងប្រវត្តិសាស្ត្រ ពោលគឺកើនឡើង ២៣% កាលពីឆ្នាំមុនរហូតមកដល់ពេលនេះ។

អ្នកវិភាគជាន់ខ្ពស់របស់ Jato លោក Felipe Munoz បាននិយាយនៅក្នុងរបាយការណ៍ថា មូលហេតុដែលចិនវ៉ាដាច់អាមេរិកក្នុងទីផ្សារលក់រថយន្តគឺដោយសារ ក្រុមហ៊ុនអាមេរិកនៅតែរក្សារថយន្តបែបប្រពៃណី ដែលមានតម្លៃខ្ពស់ ខណៈចិនបាន Update រថយន្តថ្មីៗជានិច្ច ក៏ដូចជាគុណភាពល្អ និងតម្លៃសមរម្យ ចំពេលមានការកើនឡើងនៃតម្រូវការទូទាំងពិភពលោក។ Munoz បានបន្តទៀតថា បច្ចុប្បន្នក្រុមហ៊ុនផលិតរថយន្តចិនទទួលបានចំណែកទីផ្សារដ៏ធំនៅទូទាំងមជ្ឈិមបូព៌ា អឺរ៉ាស៊ី និងអាហ្រ្វិក ខណៈពេលដែលសម្រេចបាននូវកំណើននៅអាមេរិកឡាទីន និងអាស៊ីអាគ្នេយ៍ផងដែរ។ ទន្ទឹមនឹងនោះ ម៉ាកយីហោចិនមួយចំនួនក៏ទទួលបានចំណែកទីផ្សារក្នុងប្រទេសដែលមានសេដ្ឋកិច្ចអភិវឌ្ឍន៍ផងដែរ រួមមានអឺរ៉ុប អូស្ត្រាលី នូវែលសេឡង់ និងអ៊ីស្រាអែល។

យោងតាមរបាយការណ៍ គិតមកដល់បច្ចុប្បន្ននេះការលក់គឺបានកើនឡើងនៅគ្រប់តំបន់ លើកលែងតែទ្វីបអាហ្រ្វិក ទោះជាយ៉ាងណាក៏ដោយ ឧស្សាហកម្មនេះគឺកំពុងប្រឈមមុខនឹងឧបសគ្គពាណិជ្ជកម្មកើនឡើងនៅឆ្នាំ ២០២៤ ដោយសារប្រទេសជាច្រើនបានអនុវត្តវិធានការដើម្បីការពារឧស្សាហកម្មក្នុងស្រុករបស់ពួកគេពីការនាំចេញរបស់ចិនដែលមានតំលៃថោក។ ដូច្នេះក្នុងសប្តាហ៍នេះ សហភាពអឺរ៉ុបបានប្រកាសដំឡើងពន្ធលើរថយន្តអគ្គិសនីរបស់ចិនរហូតដល់ ៣៨% ខណៈសហរដ្ឋអាមេរិកវិញគឺបានដំឡើងពន្ធបួនដងលើរថយន្តអគ្គិសនីរបស់ចិនរហូតដល់ ១០០% ៕

បរទេស៖ ចំនួនករណីនៃជំងឺ streptococcal toxic shock Syndrome (STSS) ឬហៅថាជាការឆ្លងមេរោគបាក់តេរី “ស៊ីសាច់” កំពុងកើនឡើងយ៉ាងឆាប់រហ័សបំផុតនៅក្នុងប្រទេសជប៉ុននាពេលបច្ចុប្បន្ននេះ ហើយក៏អាចរីករាលដាលនៅទូទាំងទ្វីបអាស៊ីទាំងមូលផងដែរ។

យោងតាម NHK បាក់តេរី “ស៊ីសាច់” គឺជាជំងឺដ៏កាចសា.ហាវមួយដែលអាចបណ្តាលឱ្យមនុស្សស្លា.ប់ ហើយភាគច្រើននៃអ្នកឆ្លងជំងឺនេះគឺមានអាយុចាប់ពី ៣០ ឆ្នាំឡើងទៅ។ ជំងឺប្រភេទថ្មីនេះអាចធ្វើឱ្យរាងកាយ និងសរីរាង្គជាច្រើនរបស់មនុស្សខូចខាតទាំងអស់ ហើយសម្រាប់អាការៈដំបូងគឺហើម គ្រុនក្តៅខ្លាំង និងភ្លេចភ្លាំង ទោះជាយ៉ាងណាមូលហេតុពិតប្រាកដនៃការឆ្លងគឺមិនអាចកំណត់បានឡើយ។

Ken Kikuchi អ្នកជំនាញនៃសាកលវិទ្យាល័យវេជ្ជសាស្ត្រស្ត្រីតូក្យូ បាននិយាយថា “ការហើមអាចលេចឡើងនៅជើងពេលព្រឹក និងរាលដាលដល់ជង្គង់នៅពេលថ្ងៃត្រង់ ហើយអ្នកជំងឺភាគច្រើនអាចស្លាប់ក្នុងរយៈពេល ៤៨ ម៉ោង”។ បើយោងតាមទីភ្នាក់ងារព័ត៌មាន Bloomberg កាលពីថ្ងៃទី ១៥ មិថុនា ក៏បានឱ្យដឹងដែរថា ចំនួនករណី STSS នៅក្នុងប្រទេសជប៉ុនក្នុងឆ្នាំ ២០២៤ នេះគឺបានកើនឡើងរហូតដល់ ៩៧៧ ករណីហើយ ដែលលើសពីកំណត់ត្រានៃ ៩៤១ ករណីក្នុងឆ្នាំ ២០២៣។

យោងតាមប្រភពដដែលបានឱ្យដឹងទៀតថា បាក់តេរី STSS ច្រើនតែត្រូវបានគេគិតថាចូលទៅក្នុងខ្លួនមនុស្សតាមរយៈរបួសជើង ប៉ុន្តែក្នុងករណីខ្លះមូលហេតុពិតប្រាកដនៃការឆ្លងគឺមិនអាចកំណត់បានឡើយ។ អ្នកជំនាញ Ken Kikuchi ជឿថាជាមួយនឹងការកើនឡើងនាពេលបច្ចុប្បន្ននេះ ចំនួននៃការឆ្លងមេរោគ STSS នៅក្នុងប្រទេសជប៉ុនអាចឈានដល់ ២,៥០០ ករណីនៅឆ្នាំនេះ ជាមួយនឹងអត្រាមរណភាពរហូតដល់ ៣០%។ អ្នកជំនាញរូបនេះបានជំរុញឱ្យប្រជាពលរដ្ឋរក្សាអនាម័យដៃ និងព្យាបាលរបួសដែលមានស្នាមរបួស។ លោកក៏បានកត់សម្គាល់ផងដែរថាបាក់តេរី “ស៊ីសាច់” អាចរីករាលដាលយ៉ាងងាយស្រួលតាមរយៈរបួសជើង។

គួរបញ្ជាក់ដែរថា ជំងឺនេះមិនមែនមានតែនៅក្នុងប្រទេសជប៉ុនទេ ប្រទេសផ្សេងទៀតក៏បានជួបប្រទះការផ្ទុះឡើងនៃ STSS នាពេលថ្មីៗនេះផងដែរ។ នៅចុងឆ្នាំ ២០២២ យ៉ាងហោចណាស់ប្រទេសចំនួនប្រាំនៅអឺរ៉ុបបានជូនដំណឹងដល់អង្គការសុខភាពពិភពលោក (WHO) អំពីនិន្នាការកើនឡើងនៃចំនួនមនុស្សដែលឆ្លងមេរោគក្រុមឈ្លានពាន A streptococcus (iGAS) រួមទាំង STSS ។ WHO ជឿជាក់ថានិន្នាការនេះបានកើតឡើងបន្ទាប់ពីការរឹតបន្តឹង COVID-19 ត្រូវបានដកចេញ៕

ថ្មីៗនេះ បន្ទាប់ពីមានការបង្ហោះចែកចាយនៅលើបណ្តាញសង្គម គឺបានបង្កឲ្យមានការរិះ.គន់យ៉ាងចាស់ដៃទៅលើនារីថៃម្នាក់ដែលបានគ្រោងឈុតប្រពៃណីខ្លួន តែបែរជាហាក់ដូចគ្នាបេះបិទទៅនឹងឈុតអប្សរាតំណាងជាតិខ្មែរ។

កាលពីថ្ងៃទី១៦ ខែមិថុនា ឆ្នាំ២០២៤នេះ យោងតាមគណនីជនជាតិថៃ ដែលមានឈ្មោះថា Watchara Kuawan បានធ្វើការដាក់បង្ហោះរូបថតប្រមាណ៥សន្លឹក បង្ហាញពីនារីថៃម្នាក់នៅក្នុងឈុតតំណាងអប្សរាយ៉ាងស្រស់ស្អាត។ អ្វីដែលគួរឲ្យចាប់អារម្មណ៍ រហូតបង្កឲ្យមានការវែកញែកកាន់តែខ្លាំងនោះ គឺនារីរូបនេះបានសម្លៀកបំពាក់ គ្រោងម្កុដអប្សរា ព្រមទាំងបំពាក់គ្រឿងអលង្ការ(កងដៃ កងជើង) នៅក្នុងរចនាបទជាខ្មែរស្ទើរតែទាំងស្រុង។

បន្ទាប់ពីមានការបង្ហោះចែកចាយខាងលើរួចមក មហាជនខ្មែរក៏បានចូលទៅបញ្ចេញមតិវែកញែកព្រោងព្រាត ដោយអ្នកខ្លះគឺបានលើកឡើងថា «Apsara Khmer ថ្លៃថ្នូរណាស់ ក្បាច់រាំនីមួយៗទន់ភ្លន់ សមជានារីខ្មែរអប្សរា។ រីឯផ្ទះលេខ២ រាំប្រហែលគ្រូចូលរូប រៀនធ្វើតាម តែរៀនអត់គ្រូ រៀងរឹងៗ ដូចសរសៃទាញបន្តិចហើយ»។ អ្នកខ្លះទៀតថា«មកុដដ៏ថ្លៃថ្លានេះមិនគួរស្ថិតក្នុងទម្រង់កាយវិការអប្បលាក គ្មានសណ្តាប់ធ្នាប់បែបនេះទេ!»។ អ្នកខ្លះថា«So កងជើង កងដៃ ម្កុដ ញ៉ាក់បែបខ្មែរ»។

អ្នកខ្លះថា«វាជាសម្លៀកបំពាក់របស់ខ្មែរទេ»។ អ្នកខ្លះថា«អរគុណដែលជួយលើកស្ទួយវប្បធម៌សិល្បៈបុរាណខ្មែរ»។ អ្នកខ្លះថា«កាន់តែស្រដៀងទៅស្រដៀងទៅហើយ update ម្តងតិចម្តងតិចហ្មងហើយនាង»។

គួរបញ្ជាក់ថា របាំអប្សរាខ្មែរគឺត្រូវបានគេចាត់ទុកថាជាអម្បូររបាំព្រះរាជទ្រព្យ ដែលពិបាកនៅក្នុងការហាត់រាំខ្លាំងណាស់ ព្រោះតែត្រូវហាត់រៀន ពត់ពេនច្រើន ទាំងដៃ ទាំងជើង និងតួខ្លួនទាំងមូល។ ខណៈដំណើរនៃការរាំរបាំនេះទៀតសោតគឺបានសបញ្ជាក់អំពីស្រ្តីខ្មែរដ៏មានឥទ្ធិពល សុភាពរាបសារ ទន់ភ្លន់ តែមិនទន់ជ្រាយ និងក្បូរក្បាច់នៃការរាំអប្សរាខ្មែរនីមួយៗសុទ្ធតែបង្កប់នូវអត្ថន័យដ៏ស៊ីជម្រៅនិងគួរជាទីចាប់អារម្មណ៍បំផុត៕

ប្រទេសក្រិក ៖ Delos គឺជាឈ្មោះកោះបេតិកភណ្ឌពិភពលោកដ៏ល្បីល្បាញមួយ និងត្រូវបានពលរដ្ឋក្រិកជឿថា គឺជាទីកន្លែងផ្តល់កំណើតព្រះអង្គម្ចាស់អាប៉ូឡូ និងព្រះនាង ដាយអាណា ។ ប៉ុន្តែទីតាំងស្ថាបត្យកម្មដែលមានអាយុកាល២.០០០ឆ្នាំ ស្ថិតនៅកណ្តាលទឹកសមុទ្រពណ៌ខៀវថ្លា និងត្រូវបានចាត់ទុកថា ជាសារមន្ទីរដ៏មានតម្លៃនោះ នឹងបាត់បង់រូបរាងជារៀងរហូត ដោយសារការឡើងកំដៅផែនដី ។

រយៈពេលពី២ ទៅ៣ទសវត្សរ៍ខាងមុខ កម្រិតទឹកសមុទ្រនឹងកើនឡើងជាបន្តបន្ទាប់ ដោយសារការរលាយទឹកកកនៅតំបន់ប៉ូល វានឹងធ្វើឱ្យកោះ Delos លិចទៅក្រោមបាតសមុទ្រ គឺដូចគ្នានឹងព្រះអាទិទេពកំពុងតែខ្ញាល់ និងដាក់ទោសកោះនេះ ។

វាជាគ្រោះមហន្តរាយធម្មជាតិដែលកំពុងតែបំផ្លាញកោះដ៏ស្រស់ស្អាត ខណៈកោះនេះស្ថិតនៅមិនឆ្ងាយពីកោះ Mykonos ព្រមទាំងមានភ្ញៀវទេសចររាប់សែននាក់មកកម្សាន្ត និងគយគន់ភាពស្រស់ស្អាតលើកោះនៅកណ្តាលសមុទ្រជារៀងរាល់ឆ្នាំ ។

លោក Jean Charles Moretti ដែលបានបំពេញភារកិច្ចស្រាវជ្រាវនៅលើកោះ Delos រៀបរាប់ថា ក្នុង១ឆ្នាំៗ ជញ្ជាំងបុរាណបានបាក់រលំជាបន្តបន្ទាប់ ហើយវាជារូបភាព មួយធ្វើឱ្យលោកធ្លាក់ទឹកចិត្តយ៉ាងខ្លាំង ពីព្រោះលោករស់នៅលើកោះនេះដើម្បីស្រាវជ្រាវពីវត្ថុបុរាណអស់រយៈពេលជាង៤០ឆ្នាំហើយ ។

លោកបន្តថា ក្នុងរយៈពេល១០កន្លងមក កម្រិតទឹកសមុទ្រនៅជុំវិញកោះបានកើនឡើងរហូតដល់២០សង់ទីម៉ែត្រនៅតំបន់ខ្លះ ។ ទឹកសមុទ្រកើនឡើងខ្ពស់បានធ្វើឱ្យមានសំណើមនៅលើបរិយាកាសកាន់តែខ្លាំង ហើយវាក៏ចាប់ផ្តើមប៉ះពាល់ដល់ភាពសម្បូរបែបរបស់តំបន់បុរាណមួយនេះ ។

លើសពីនេះ ភ្ញៀវទេសចរមកកម្សាន្តនៅកោះ Delos ក៏បានធ្វើឱ្យខូចខាតដល់ទីតាំងបុរាណមួយចំនួនផងដែរ ។ កាលពីសម័យរ៉ូម៉ាំង អ្នកកាន់ធម៌ និងពាណិជ្ជករមកពីជុំវិញពិភពលោក បានធ្វើដំណើរមកកោះនេះ ដែលមានពលរដ្ឋក្រិករស់នៅចំនួន៣ម៉ឺននាក់ ។ ក្រោយមក កោះ Delos ធ្លាប់បានឆ្លងកាត់សម័យកាលសង្គ្រាម, ការប្លន់យកទ្រព្យសម្បត្តិ ហើយទីបំផុត ត្រូវបានគេបោះបង់ចោល ។

បច្ចុប្បន្ន កោះនេះបានក្លាយជាកោះបេតិកភណ្ឌពិភពលោកដ៏ល្បីល្បាញមួយ ប៉ុន្តែមិនគួរឱ្យជឿថា ការគំរាមកំហែងកោះនេះលើសពីសង្គ្រាម និងជម្លោះ គឺការបម្រែបម្រួលអាកាសធាតុដែលកើតឡើងពីទង្វើរបស់មនុស្ស ។ ដូច្នេះ មនុស្សគ្រប់គ្នានឹងគ្មានឱកាសបានឃើញកោះនេះទៀតទេ ដោយសារវានឹងលិចទៅក្រោមបាតសមុទ្រជារៀងរហូត ក្នុងរយៈពេលពី២ ទៅ៣ទសវត្សរ៍ខាងមុខ ៕

ប្រទេសអេស្ប៉ាញ ៖ ភ្ញៀវទេសចរភាគច្រើនតែងតែទៅកម្សាន្តនៅឆ្នេរសមុទ្រស្អាតៗលើពិភពលោក ដែលឆ្នេរសមុទ្រទាំងនេះមានសភាពដូចៗគ្នា គឺមានគ្រាប់ខ្សាច់ពណ៌ស ។ ប៉ុន្តែឆ្នេរសមុទ្រនៅកោះមួយរបស់ប្រទេសអេស្ប៉ាញមានភាពខុសប្លែកពីនេះ ហើយភ្ញៀវទេសចរភាគច្រើនពុំសូវស្គាល់ទេ ។

ឆ្នេរសមុទ្រនៅកោះហ្វឺដឺវិនធួរ៉ា ប្រទេសអេស្ប៉ាញ សម្បូរទៅដោយគ្រាប់ខ្សាច់ពណ៌ស និងមានដើមដូងដុះនៅតាមឆ្នេរ ។ ប៉ុន្តែឆ្នេរសមុទ្រនេះមានសភាពខុសប្លែកយ៉ាងខ្លាំងពីឆ្នេរសមុទ្រផ្សេងទៀត ដោយសារអ្វីៗគ្រប់យ៉ាងនៅលើឆ្នេរមានលក្ខណៈដូចគ្នានឹងគ្រាប់ពោតផ្ទុះ (ឬ Popcorn) ទាំងអស់ ។

បើសម្លឹងមើលកាន់តែយូរទៅ វានឹងកាន់តែតែដូច Popcorn ខ្លាំងឡើង និងគួរឱ្យចង់បរិភោគទៀតផង ។ ហេតុនេះ ទើបឆ្នេរសមុទ្រនៅកោះហ្វឺដឺវិនធួរ៉ា (Fuerteventura) ត្រូវបានគេដាក់ឈ្មោះថា ឆ្នេរសមុទ្រ Popcorn (ឬ Popcorn Beach) ។ បើតាមការស្រាវជ្រាវបញ្ជាក់ថា ដុំថ្មតូចៗពណ៌សទាំងនេះបានកើតឡើងពីកំទេចផ្កាថ្មពណ៌ស ដែលមានរូបរាងខុសធម្មតា រួមផ្សំនឹងការផ្លាស់ប្តូរពណ៌ ទើបវាមានរូបរាងដូច Popcorn ។

បើទោះជាដុំថ្មទាំងនេះមើលទៅដូចគ្នានឹង Popcorn ក៏ពិតមែន ប៉ុន្តែវានៅតែជាថ្មមានសភាពរឹងខ្លាំង ។ រីឯភ្ញៀវទេសចរមកកម្សាន្តនៅឆ្នេរនេះនឹងមានអារម្មណ៍ថា ឈឺជើង ពេលពួកគេដើរដោះស្បែកជើងលើឆ្នេរ ហើយវាពុំដូចគ្នានឹងការដើរលើខ្សាច់របស់ឆ្នេរសមុទ្រទូទៅទេ ។ បច្ចុប្បន្ន ឆ្នេរសមុទ្រ Popcorn បានក្លាយទៅជាតំបន់ទេសចរណ៍ដ៏ទាក់ទាញមួយ ខណៈកាលពីមុន ភ្ញៀវទេសចរពុំសូវបានស្គាល់ ។

ការពិត ឆ្នេរសមុទ្រដែលមានគ្រាប់ថ្មដូច Popcorn នេះ បានកើតឡើងតាំងពីយូរណាស់មកហើយនៅប្រទេសអេស្ប៉ាញ ប៉ុន្តែវាទើបតែទទួលបានការពេញនិយមក្នុងរយៈពេលប៉ុន្មានឆ្នាំចុងក្រោយនេះ ក្រោយពីមានភ្ញៀវទេសចរបរទេសជាច្រើនមកកម្សាន្ត និងថតរូបបង្ហោះក្នុងបណ្តាញសង្គមផ្សេងៗ ។

គួរបញ្ជាក់ថា កោះហ្វឺដឺវិនធួរ៉ា ស្ថិតក្នុងប្រជុំកោះខាក់នែរី មហាសមុទ្រអាត្លង់ទិក និងស្ថិតនៅក្រៅឆ្នេរសមុទ្រអាហ្វ្រិក ។ គេបានដាក់ឈ្មោះកោះនេះថា គឺជាកោះមានឆ្នេរសមុទ្រស្រស់ស្អាតបំផុតលើពិភពលោក ប៉ុន្តែមានភ្ញៀវទេសចរតិចណាស់ដែលជ្រាបថា នៅលើកោះមានលាក់នូវរឿងរ៉ាវអាថ៌កំបាំង គឺវាសម្បូរទៅដោយ Popcorn ៕