ប្រទេសឥណ្ឌា ៖ ពលរដ្ឋឥណ្ឌាដែលគោរពព្រហ្មញ្ញសាសនា តែងតែមានជំនឿទៅលើការងូតទឹកលាងជម្រះបាប ដោយពួកគេជឿថា ទន្លេគង្គាអាចលាងបាបទាំងអស់បាន ជាពិសេស ទន្លេគង្គានៅបរិវេណកំពង់ផែទីក្រុង Varanasi មានភាពស័ក្តិសិទ្ធិយ៉ាងខ្លាំង ។ ហេតុនេះ ពួកគេក៏នាំគ្នាចុះងូតទឹកលាងបាបក្នុងទន្លេនេះ យ៉ាងហោចណាស់ ចំនួន២លើកក្នុង១ថ្ងៃ គឺពេលព្រឹក និងពេលល្ងាច ។

គេចាត់ទុកថា អំពើបាបទាំងឡាយណាដែលមនុស្សបានប្រព្រឹត្តនៅពេលថ្ងៃ នឹងត្រូវជម្រះបាបវិញនៅពេលល្ងាច ។ រីឯអំពើបាបដែលប្រព្រឹត្តពេលយប់ គឺនឹងលាងជម្រះបាបនាពេលព្រឹកថ្ងៃបន្ទាប់ ។ ពលរដ្ឋឥណ្ឌាមានជំនឿថា ទឹកទន្លេគង្គាមានភាពស័ក្តិសិទ្ធិយ៉ាងខ្លាំង ដោយសារវាបានហូរឆ្លងកាត់ព្រះកេសរបស់ព្រះសិវៈ មកកាន់កំពង់ផែទីក្រុង Varanasi ដែលជាទីកន្លែងគោរពបូជារបស់ពលរដ្ឋឥណ្ឌានាសម័យបុរាណ ។

បច្ចុប្បន្ន ពលរដ្ឋឥណ្ឌានៅតែមានជំនឿថា បើបុគ្គលណាម្នាក់លាចាកលោក ហើយត្រូវគេយកសាកសពមកដុតនៅកំពង់ផែទីក្រុង Varanasi ព្រមទាំងប្រមូលធាតុបោះចូលក្នុងទឹកទន្លេគង្គា គឺបុគ្គលនោះនឹងបានឡើងទៅកាន់ឋានសួគ៌ ។

ហេតុនេះ ទើបពួកមហាសេដ្ឋីឥណ្ឌាជាច្រើននិយមសាងសង់ផ្ទះនៅមាត់ទន្លេគង្គា ដោយសារពួកគេគិតថា ពេលឈឺជិតដល់ថ្ងៃស្លាប់ សាច់ញាតិនឹងដឹកអ្នកជំងឺធ្ងន់មកដាក់ផ្ទះនៅមាត់ទន្លេគង្គ ។ ក្រោយពេលស្លាប់ សាច់ញាតិនឹងដុតសាកសពនៅមាត់ទន្លេគង្គា រួចហើយប្រមូលធាតុបោះចូលក្នុងទន្លេដើម្បីឡើងទៅឋានសួគ៌ ។

ប៉ុន្តែមតិខ្លះលើកឡើងថា នៅពេលព្រះពុទ្ធត្រាស់ដឹង ព្រះអង្គធ្លាប់ប្រាប់ទៅកាន់ពួកព្រាហ្មណ៍ ដែលងូតទឹកក្នុងទន្លេគង្គាដើម្បីលាងជម្រះបាបកម្មថា បើចង់លាងបាប មិនចាំបាច់ទៅងូតទឹកទន្លេគង្គាទេ គឺគ្រាន់តែសម្អាតកាយ វាចា និងធ្វើចិត្តឱ្យបរិសុទ្ធ ពោលគឺចៀសឱ្យឆ្ងាយពីការប្រព្រឹត្តខុសដោយវាចា ចិត្ត ហើយប្រព្រឹត្តខ្លួនជាមនុស្សទៀងត្រង់ នេះហើយហៅថា «ការងូតទឹកជម្រះបាប» ។

ហេតុនេះ បើអ្នកបានប្រកាន់យកភាពស្មោះត្រង់តាមចំណុចទាំងនេះ សូម្បីតែទឹកធម្មតាសម្រាប់ផឹក និងងូត ក៏វាអាចក្លាយជាទឹកស័ក្តិសិទ្ធិបានដែរ ។ ម្យ៉ាងទៀត បើទឹកក្នុងទន្លេគង្គាអាចលាងជម្រះបាប និងធ្វើឱ្យអ្នកងូតទឹកនេះបានកើតនៅលើឋានសួគ៌គ្រប់ៗគ្នាមែននោះ អីចឹង សត្វរស់នៅក្នុងទន្លេនេះ ដូចជា ៖ បង្គា, ខ្យង, ក្តាម និងត្រី នឹងមានឱកាសឡើងទៅឋានសួគ៌ច្រើនជាងមនុស្ស ពីព្រោះពួកវារស់នៅក្នុងទឹកនេះគ្រប់ពេលវេលា ៕

ប្រទេសកុងហ្គោ ៖ កន្លងមក ក្រុមអ្នកវិទ្យាសាស្ត្របានស្រាវជ្រាវពីទន្លេលើពិភពលោក រកឃើញថា ទន្លេរីអ៊ូណេគ្រូ ដែលជាដៃទន្លេខាងឆ្វេងដ៏ធំបំផុតរបស់ទន្លេអាម៉ាហ្សូននៅប្រទេសកូឡុំប៊ី ក្នុងទ្វីបអាមេរិកខាងត្បូង គឺជាទន្លេពណ៌ខ្មៅដ៏ធំបំផុតលើពិភពលោក ។ ប៉ុន្តែការស្រាវជ្រាវនាពេលបច្ចុប្បន្នរបស់អ្នកវិទ្យាសាស្ត្រមកពីសាកលវិទ្យាល័យ ETH Zurich ប្រទេសស្វីស បានរកឃើញទន្លេមួយទៀតមានទឹកពណ៌ខ្មៅខ្លាំងជាងទន្លេរីអ៊ូណេគ្រូ រហូតដល់១.៥ដង ។

ទន្លេនេះឈ្មោះថា «Ruki River» ដែលហូរកាត់ប្រទេសកុងហ្គោ ទ្វីបអាហ្វ្រិក គឺមានទឹកពណ៌ខ្មៅខ្លាំងបំផុតនៅលើពិភពលោក ។ បើតាមអ្នកវិទ្យាសាស្ត្រឱ្យដឹងថា គេពុំអាចមើលឃើញអ្វីនៅក្នុងទឹកទេ ដោយសារពណ៌ទឹកទន្លេនេះខ្មៅខ្លាំងពេក ហើយសូម្បីតែស្រមោលមនុស្ស ក៏មើលពុំឃើញដែរ ។

ក្រោយពីការយកទឹកទន្លេទៅត្រួតពិនិត្យតាមផ្នែកវិទ្យាសាស្ត្របង្ហាញថា មូលហេតុធ្វើឱ្យទឹកទន្លេពណ៌ខ្មៅបែបនេះ គឺបណ្តាលមកពីកាកសំណល់សរីរាង្គដែលសម្បូរដោយសារធាតុកាបូនរលាយនៅបាតទន្លេក្នុងកម្រិតខ្ពស់ ។ សារធាតុទាំងនេះកើតឡើងពីព្រៃទឹកភ្លៀងនៅបរិវេណជុំវិញ, សាកសពសត្វ និងកាកសំណល់រុក្ខជាតិស្អុយរលួយហូរចូលក្នុងទន្លេ តាមរយៈទឹកភ្លៀង និងទឹកជំនន់ ។

លោក ត្រាវីស រ៉េក ប្រធានដឹកនាំការស្រាវជ្រាវពីទឹកទន្លេពណ៌ខ្មៅ និយាយថា ទន្លេ Ruki ប្រៀបដូចជាទឹកតែធម្មជាតិ ដែលសម្បូរទៅដោយរុក្ខជាតិមានសារធាតុកាបូន ។ រីឯមូលហេតុធ្វើឱ្យទឹកទន្លេមានពណ៌ខ្មៅខ្លាំងជាងទន្លេរីអ៊ូណេគ្រូ គឺមកពីសារធាតុផ្សំសរីរាង្គចេញពីកាកសំណល់រុក្ខជាតិទាំងនេះស្រូបយកពន្លឺ ហើយវានឹងធ្វើឱ្យទឹកទន្លេកាន់តែខាប់ និងខ្មៅខ្លាំង ។

វាដូចគ្នានឹងការឆុងទឹកតែ ដោយការដាក់កាកតែយ៉ាងច្រើន គឺទឹកតែនឹងមានសភាពកាន់តែខាប់កាន់តែខ្លាំង ។ បើគេមើលទឹកទន្លេ Ruki ពីផ្នែកខាងលើនឹងឃើញថា ទឹកទន្លេមិនសូវខ្មៅខ្លាំងពេកទេ ដោយសារវាចាំងនឹងពន្លឺថ្ងៃ ប៉ុន្តែបើគេសម្លឹងមើលឱ្យកាន់តែជិតនឹងឃើញថា ទឹកទន្លេមានពណ៌ខ្មៅខ្លាំងកម្រិតណា ។

នៅពេលអ្នកវិទ្យាសាស្ត្រវាស់កម្រិតជាតិខ្មៅរបស់ទឹកទន្លេ Ruki ឃើញថា វាមានសារធាតុសរីរាង្គកាបូនរលាយក្នុងទឹកច្រើនបំផុតលើពិភពលោក និងច្រើនជាងទន្លេកុងហ្គោ រហូតដល់៤ដង ព្រមទាំងខ្មៅជាងទឹកទន្លេរីអ៊ូណេគ្រូ ចំនួន១.៥ដង ។ បើយើងយកម្រាមដៃជ្រលក់ក្នុងទឹកទន្លេនេះ គឺភាពខ្មៅរបស់វានឹងធ្វើឱ្យយើងស្ទើរតែមើលពុំឃើញម្រាមដៃក្នុងទឹកនេះឡើយ ។

ការស្រាវជ្រាវនេះបានផ្សព្វផ្សាយក្នុងទស្សនាវដ្តីឈ្មោះ «Limnology and Oceanography» ថា ទឹកពណ៌ខ្មៅរបស់ទន្លេ Ruki បានធ្វើឱ្យវាបង្កើតបានជាប្រព័ន្ធអេកូឡេស៊ីពិសេស និងជាជម្រករបស់សត្វក្នុងទឹកជាច្រើនប្រភេទ ដែលសត្វខ្លះពុំបានរស់នៅតំបន់ផ្សេងទេ ៕

ប្រទេសចិន៖ ប្រទេសចិនថ្មីៗនេះបានកំពុងអភិវឌ្ឍ ក៏ដូចជាផលិតរថយន្តគ្មានអ្នកបើកបរ ឬតាក់ស៊ីមនុស្សយន្តចំនួន ១ ពាន់គ្រឿងបន្ថែមទៀតទៅកាន់ទីក្រុង Wuhan ដែលជាទីក្រុងមួយនៅកណ្តាលប្រទេសចិនមានមនុស្សចំនួន ១១ លាននាក់រស់នៅ។ នៅក្នុងទីក្រុងនេះគឺមានផ្លូវហាយវេចំនួនប្រាំបី និងស្ពាន Towering ផ្សេងទៀតដែលលាតសន្ធឹងលើទន្លេ Yangtze ។

យោងតាម CNN ប្រជាជនក្នុងទីក្រុងនេះគឺមានរថយន្តសម្រាប់ប្រើប្រាស់ចំនួន ៤.៥ លានគ្រឿង ហើយតាក់ស៊ីគ្មានអ្នកបើកបរមានចំនួន ៥០០ គ្រឿង ជាញឹកញាប់តាក់ស៊ីនេះគឺមិនមានអ្នកបើកបរនៅខាងក្នុងទេ ពោលគឺវាជាតាក់ស៊ីបញ្ជាដោយមនុស្សយន្តបើកបរដោយស្វ័យប្រវត្តិ។ នៅទូទាំងប្រទេសចិននាពេលបច្ចុប្បន្ននេះគឺមានទីក្រុងជាង ១៦ បានអនុញ្ញាតឱ្យក្រុមហ៊ុនប្រតិបត្តិករបច្ចេកវិទ្យាយក្ស Baidu សាកល្បងរថយន្តគ្មានអ្នកបើកបរនៅលើផ្លូវសាធារណៈ ដោយក្រុមហ៊ុនចិនចំនួន ១៩ ផ្សេងទៀតបានកំពុងប្រកួតប្រជែងគ្នាដើម្បីបង្កើតភាពជាអ្នកដឹកនាំពិភពលោកនៅក្នុងវិស័យនេះ។

បើយោងតាម The New York Times វិស័យផលិតរថយន្តគ្មានអ្នកបើកបរគឺមិនសូវមានប្រទេសណាអភិវឌ្ឍច្រើនដូចប្រទេសចិននោះទេ ដូច្នេះចិនគឺជាប្រទេសតែមួយគត់ដែលផ្តោតលើវិស័យតាក់ស៊ីមនុស្សយន្តច្រើនជាងគេលើពិភពលោក។ យោងតាមប្រភពដដែលក៏បានឱ្យដឹងទៀតថា បច្ចុប្បន្នរដ្ឋាភិបាលចិនកំពុងធ្វើវិធានការជាច្រើនដើម្បីផ្តល់ការគាំទ្រយ៉ាងសំខាន់ដល់ក្រុមហ៊ុន។ បន្ថែមពីលើការបង្កើតតំបន់សាកល្បងនៅលើផ្លូវសាធារណៈសម្រាប់តាក់ស៊ីមនុស្សយន្ត តំបន់សាកល្បងឯកជនក៏ត្រូវបានបង្កើតឡើងនៅក្នុងទីក្រុងផងដែរ។

គួរបញ្ជាក់ដែរថា កាលពីដើមខែមិថុនាឆ្នាំនេះ ប្រទេសចិនបានអនុញ្ញាតឱ្យក្រុមហ៊ុនផលិតរថយន្តក្នុងស្រុកចំនួន ៩ រួមមាន Nio, BYD និង SAIC Motor… សាកល្បងប្រព័ន្ធជំនួយអ្នកបើកបរកម្រិតខ្ពស់ ដែលនេះត្រូវបានគេព្យាករណ៍ថា ២០% នៃយានយន្តដែលលក់ក្នុងប្រទេសចិននៅឆ្នាំ ២០៣០ នឹងគ្មានអ្នកបើកបរទាំងស្រុង ហើយ ៧០% នឹងមានបច្ចេកវិទ្យាជំនួយអ្នកបើកបរកម្រិតខ្ពស់បំផុតមិនធ្លាប់មាន។ ដូច្នេះហើយបច្ចុប្បន្ននេះរថយន្តអគ្គិសនីមានប្រហែល ២៥% នៃទីផ្សារប្រទេសចិន បើធៀបទៅនឹង ៧% នៅសហរដ្ឋអាមេរិក៕

ប្រទេសវៀតណាម ៖ វាជាព័ត៌មានមួយគួរឱ្យរីករាយយ៉ាងខ្លាំងសម្រាប់ពលរដ្ឋវៀតណាម ក្រោយពីរដ្ឋាភិបាលប្រកាសថា នឹងដំឡើងពន្ធគ្រឿងស្រវឹ.ង គ្រប់ប្រភេទ ស្មើនឹងអត្រា១០០% ។ ពលរដ្ឋនិយាយថា គ្រឿងស្រវឹង គឺជាឃាត.ករ លាក់មុខ ដែលបានសម្លា.ប់ ពលរដ្ឋយូរមកហើយ ហើយពួកគេគាំទ្រយ៉ាងខ្លាំងចំពោះការចាត់វិធានការលើគ្រឿងស្រវឹងរបស់រដ្ឋាភិបាល ។

កាលពីថ្ងៃទី១៤ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ក្រសួងហិរញ្ញវត្ថុវៀតណាមបានប្រកាសថា នឹងដំឡើងពន្ធគ្រឿងស្រវឹងគ្រប់ប្រភេទ មកស្មើនឹង១០០% នៅឆ្នាំ២០៣០ ដើម្បីកាត់បន្ថយចំនួនអ្នកផឹកស្រានៅប្រទេសវៀតណាម ។

សេចក្តីព្រាងសំណើនេះ ស្ថិតក្នុងដំណាក់កាលរង់ចាំការអនុម័តពីសមាជិកសភា ក្នុងនោះការដំឡើងពន្ធពិសេសសម្រាប់គ្រឿងស្រវឹងគ្រប់ប្រភេទនឹងកើនឡើង៧០% និង៨០% នៅឆ្នាំ២០២៦ ។ បន្ទាប់មក អត្រាពន្ធនឹងកើនឡើងជាបន្តបន្ទាប់ រហូតដល់៩០% និង១០០% នៅឆ្នាំ២០៣០ បើធៀបនឹងអត្រាពន្ធបច្ចុប្បន្ន គឺស្មើត្រឹមតែ៦៥% ។

ហេតុនេះ នៅពេលប្រទេសវៀតណាមដំឡើងពន្ធខ្ពស់ វានឹងធ្វើឱ្យតម្លៃគ្រឿងស្រវឹងកើនឡើង២០% បន្ថែមទៀត នៅឆ្នាំ២០២៦ ។ ក្រសួងហិរញ្ញវត្ថុបញ្ជាក់ថា អត្រាពន្ធស្រានឹងកើនឡើងជាបន្តបន្ទាប់ ចាប់ពី២% ទៅ៣% និងអាស្រ័យលើអត្រាអតិផរណាផងដែរ ។

ចំណែកគោលបំណងដែលវៀតណាមដំឡើងពន្ធខ្ពស់លើគ្រឿងស្រវឹងនេះ គឺដើម្បីកាត់បន្ថយចំនួនអ្នកផឹកស្រាគ្រប់ប្រភេទនៅវៀតណាម ។ កន្លងមក រដ្ឋាភិបាលវៀតណាមបានអនុម័តច្បាប់យ៉ាងតឹងរ៉ឹងពាក់ព័ន្ធនឹងគ្រឿងស្រវឹង ដូចជា ៖ ការដាក់ទោសពលរដ្ឋស្រវឹងក្នុងពេលបើកបរ តាំងពីឆ្នាំ២០១៩ ។

ក្រោយពីរដ្ឋាភិបាលវៀតណាមប្រកាសថា នឹងដំឡើងពន្ធគ្រឿងស្រវឹងរហូតដល់១០០% បានធ្វើឱ្យពលរដ្ឋជាច្រើនគាំទ្រនឹងវិធានការខាងលើ ដោយសារពួកគេយល់ឃើញថា គ្រឿងស្រវឹង គឺជាមូលហេតុចម្បងដែលបណ្តាលឱ្យពលរដ្ឋស្លាប់យ៉ាងច្រើន ។ ទោះយ៉ាងណា ការដំឡើងពន្ធរបស់រដ្ឋាភិបាលនេះ នឹងធ្វើឱ្យប៉ះពាល់ដល់ឧស្សាហកម្មផលិតគ្រឿងស្រវឹងនៅវៀតណាម ។

សមាគមស្រាបៀរ និងភេសជ្ជៈមានជាតិអាល់កុលរបស់វៀតណាមបញ្ជាក់ថា កាលពីឆ្នាំ២០២៣ ប្រាក់ចំណូលផ្នែកឧស្សាហកម្មផលិតស្រាបៀរបានធ្លាក់ចុះ១១% ហើយប្រាក់ចំណេញធ្លាក់ចុះ២៣% ។ ក្រៅពីនេះ ក្រសួងហិរញ្ញវត្ថុ ក៏បានស្នើឱ្យរដ្ឋាភិបាលដំឡើងពន្ធបារី និងភេសជ្ជៈមានជាតិហ្គាសផងដែរ ៕

ប្រទេសចិន ៖ កាលពីថ្ងៃទី១៥ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា រដ្ឋាភិបាលចិនបានបង្កើតច្បាប់ថ្មី គឺអនុញ្ញាតឱ្យឆ្មាំសមុទ្រអាចចាប់ខ្លួ.ន ជនបរទេសនៅតំបន់ជម្លោះសមុទ្រចិនខាងត្បូង ចំនួន៦០ថ្ងៃ ដោយពុំចាំបាច់សួរចម្លើយពីបទល្មើសណាមួយ ។

អាជ្ញាធរក្រុងប៉េកាំងបានអះអាងភាពជាម្ចាស់កម្មសិទ្ធិលើដែនទឹកសមុទ្រចិនខាងត្បូងស្ទើរទាំងស្រុង និងពុំអើពើនឹងការអះអាងរបស់ប្រទេសជិតខាងជាច្រើន រួមទាំងហ្វីលីពីនផងដែរ ខណៈហ្វីលីពីនធ្លាប់ប្តឹងទៅតុលាការអន្តរជាតិ រហូតដល់តុលាការចេញសាលក្រមថា ក្រុងប៉េកាំងគ្មានភស្តុតាងផ្លូវច្បាប់ទេ ។ លើសពីនេះ នាវាឆ្មាំសមុទ្រចិន និងហ្វីលីពីនធ្លាប់មានជម្លោះជាមួយគ្នាជាច្រើនលើកនៅតំបន់ជម្លោះ Second Thomas Shoal ហើយភាគីចិនអះអាងថា ហ្វីលីពីនបានយកនាវាចម្បាំងមកចតនៅតំបន់ជម្លោះដោយខុសច្បាប់ ។

បើតាមច្បាប់ថ្មីដែលរដ្ឋាភិបាលចិនផ្សព្វផ្សាយតាមបណ្តាញសង្គមបញ្ជាក់ថា ឆ្មាំសមុទ្រចិនអាចឃុំខ្លួនជនបរទេសដែលពួកគេសង្ស័យថារំលោភព្រំដែន ហើយច្បាប់ថ្មីនេះបានចាប់ផ្តើមអនុវត្តចាប់ពីថ្ងៃទី១៥ ខែមិថុនា ឆ្នាំ២០២៤ ។ រីឯការចាប់ខ្លួនជនបរទេស គឺមានរយៈពេល៦០ឆ្នាំ ករណីជនបរទេសគ្មានឯកសារបញ្ជាក់ច្បាស់លាស់ ។

ច្បាប់ថ្មីនេះចែងទៀតថា ៖ «នាវាឈ្លានពានចូលដែនទឹកនៅតំបន់ Territorial Waters និងតំបន់ Adjacent Waters នៅសមុទ្រចិនដោយខុសច្បាប់ នឹងត្រូវបានចាប់ខ្លួនតាមការបញ្ជារបស់មេបញ្ជាការឆ្មាំសមុទ្រ ឬការិយាល័យឆ្មាំសមុទ្រស្រុក» ។ ការអះអាងភាពជាម្ចាស់កម្មសិទ្ធិនៅសមុទ្រចិនខាងត្បូង បានធ្វើឱ្យអាជ្ញាធរក្រុងប៉េកាំងបញ្ជូននាវាជាច្រើនគ្រឿងមកឆ្នេរសមុទ្រដើម្បីយាមល្បាតក្នុងតំបន់ជម្លោះ និងផ្លាស់ប្តូរតំបន់ផ្កាថ្មជាច្រើនកន្លែងឱ្យក្លាយជាកោះសិប្បនិម្មិត ។

ចំណែករដ្ឋាភិបាលហ្វីលីពីនចោទប្រកាន់ឆ្មាំសមុទ្រចិនថា ប្រើប្រាស់វិធានការខុសច្បាប់ និងអមនុស្សធម៌ចំពោះនាវាហ្វីលីពីន ។ នៅខែមិថុនា ឆ្នាំ២០២៤ ប្រធានាធិបតីហ្វីលីពីន លោក Ferdinand Marcos Jr. បានចេញសេចក្តីថ្លែងការណ៍ថ្កោលទោសថា វាជាទង្វើខុសច្បាប់, គំរាមកំហែង និងការបញ្ឆោតរបស់ចិន ។ នាវាឆ្មាំសមុទ្រចិនបានបាញ់ទឹកបណ្តេញនាវាហ្វីលីពីននៅដែនទឹកជម្លោះជាច្រើនលើក និងមានហេតុការណ៍នាវាបុកគ្នា រហូតធ្វើឱ្យទាហានហ្វីលីពីនរងរបួសជាច្រើននាក់ ។

លោក Wang Wenbin មន្ត្រីនាំពាក្យក្រសួងការបរទេសចិនបានថ្លែង កាលពីខែឧសភា ឆ្នាំ២០២៤ ថា ច្បាប់ថ្មីរបស់ចិនមានគោលបំណងដើម្បីឱ្យឆ្មាំសមុទ្រអនុវត្តតាម និងរក្សាវិន័យនៅតំបន់សមុទ្រ ។ លោកបញ្ជាក់ថា បុគ្គល ឬស្ថាប័នផ្សេងៗពុំចាំបាច់ព្រួយបារម្ភពីបញ្ហានេះទេ បើពួកគេពុំបានធ្វើអ្វីខុសច្បាប់ ៕