ប្រទេសចិន ៖ យោងតាមរបាយការណ៍ថ្មីមួយរបស់ក្រុមហ៊ុនចិនធ្វើការពាក់ព័ន្ធនឹងការផ្លាស់ប្តូរទីលំនៅ និងវិនិយោគ បញ្ជាក់ថា នៅឆមាសទី១ ឆ្នាំ២០២៤ ប្រទេសចិនបានបាត់បង់សេដ្ឋីរហូតដល់១៥.២០០នាក់ ។ រីឯនៅឆ្នាំ២០២៣ ចិនបាត់បង់សេដ្ឋីអស់ចំនួន១៣.៨០០នាក់ ដែលចំនួននេះច្រើនទៀតប្រទេសផ្សេងទៀត ។

របាយការណ៍នេះបញ្ជាក់ថា សហរដ្ឋអាមេរិក គឺជាគោលដៅផ្លាស់ប្តូរទីលំនៅរបស់សេដ្ឋីចិន បន្ទាប់មក គឺប្រទេសកាណាដា និងសិង្ហបុរី ។ ប៉ុន្តែគេពុំទាន់ដឹងច្បាស់ថា តើសេដ្ឋីចិនទាំងនេះបានយកប្រាក់ចេញពីប្រទេសអស់ប៉ុន្មានទេ ។

បើតាមក្រុមហ៊ុនចិនធ្វើការពាក់ព័ន្ធនឹងការផ្លាស់ប្តូរទីលំនៅបញ្ជាក់ថា សេដ្ឋីចិនដែលសម្រេចចិត្តចាកចេញពីចិន គឺពួកគេមានប្រាក់ចាប់ពី៣០លានដុល្លារ ទៅ១ពាន់លានដុល្លារអាមេរិក ។ ការចាកចេញរបស់សេដ្ឋីចិនទាំងនេះបានធ្វើឱ្យប៉ះពាល់ដល់សេដ្ឋកិច្ចចិននាពេលបច្ចុប្បន្នយ៉ាងខ្លាំង ដែលសេដ្ឋកិច្ចចិនកំពុងប្រឈមនឹងការលំបាក ។

ចំណែកមូលហេតុធ្វើឱ្យសេដ្ឋីចិនចាកចេញពីប្រទេសរបស់ខ្លួន គឺដោយសារសេដ្ឋកិច្ចចិននៅឆ្នាំ២០២៤ ធ្លាក់ចុះ ហើយវិស័យអចលនទ្រព្យចិនជួបនឹងវិបត្តិ ។ ហេតុនេះ ក្រុមហ៊ុនចិន និងក្រុមហ៊ុនបរទេសជាច្រើនបានបិទដំណើរការជាបន្តបន្ទាប់ ។

កាលពីមុន ផ្នែកអចលនទ្រព្យចិនធ្លាប់ជួយជំរុញផលិតផលក្នុងស្រុកសរុប (GDP) របស់ចិន ស្មើ១ផ្នែកក្នុងចំណោម៤ផ្នែក ប៉ុន្តែនៅឆ្នាំ២០២៤ វិស័យអចលនទ្រព្យចិនជួបនឹងវិបត្តិ ។ ក្រុមហ៊ុនអភិវឌ្ឍន៍អចលនទ្រព្យចិនជាច្រើនជំពាក់បំណុល ខណៈអាជ្ញាធរក្នុងតំបន់ស្ថិតដែលនៅក្រោមការគ្រប់គ្រងរបស់គណបក្សកុម្មុយនិស្តចិន ក៏ជំពាក់បំណុលដូចគ្នាដែរ ។

របាយការណ៍នេះសន្និដ្ឋានថា ខេត្តរបស់ចិនដែលមានពលរដ្ឋរស់នៅច្រើនបំផុតនឹងឈប់ជួលបុគ្គលិករដ្ឋ យ៉ាងហោចណាស់ ស្មើពាក់កណ្តាលនៅតាមស្ថាប័នមួយចំនួន ។ រីឯការិយាល័យច្បាប់ជាច្រើនកន្លែងរបស់អាមេរិកក៏បានបិទ ឬគ្រោងបិទដំណើរការនៅទីក្រុងសៀងហៃដូចគ្នា ដោយសារពួកគេប្រឈមនឹងបញ្ហាការងារ ហើយអាជីវកម្មរបស់ក្រុមហ៊ុនផ្សេងទៀតបានបិទដំណើរការដែរ ។

សេដ្ឋីចិនធ្លាប់បានផ្អាស់ប្តូរទីលំនៅទៅក្រៅប្រទេស កាលពីអំឡុងពេលជំងឺកូវីដ-១៩ ឆ្លងរាតត្បាត ហើយពួកគេបានផ្លាស់ប្តូរទីលំនៅជាថ្មី ក្រោយពីអាជ្ញាធរក្រុងប៉េកាំងប្រកាសលុបចោលវិធានការបិទប្រទេស ។

បច្ចុប្បន្ន ប្រទេសសិង្ហបុរីជាគោលដៅពេញនិយមរបស់សេដ្ឋីចិន ពីព្រោះកាលពីពេលថ្មីៗនេះ សិង្ហបុរីគាំទ្រការវិនិយោគរបស់ចិន ។ រីឯសហព័ន្ធអារ៉ាប់រួមបានទាក់ទាញអ្នកមានទ្រព្យសម្បត្តិមករស់នៅ ដោយសារពួកគេពុំចាំបាច់បង់ពន្ធប្រាក់ចំណូល ៕

នារីអាកាសចរណ៍ម្នាក់បានបង្ហោះវីដេអូមួយក្នុងបណ្តាញសង្គម TikTok ដើម្បីផ្តាំផ្ញើទៅអ្នកដំណើរគ្រប់រូបថា គួរតែចៀសវាងការផឹកភេសជ្ជៈប្រភេទនេះមុនពេលឡើងយន្តហោះ ពីព្រោះវានឹងផ្តល់ផលប៉ះពាល់ដល់អ្នកដំណើរ ។ លើសពីនេះ នាងបានណែនាំឱ្យអ្នកដំណើរទិញកៅអីនៅជួរមុខ ព្រោះវានឹងមានគ្រោះថ្នា.ក់ តិចតួច ពេលយន្តហោះមានបញ្ហា ។

នារីអាកាសចរណ៍រូបនេះមានឈ្មោះក្នុង TikTok ថា «mrsmiva» បានបង្ហោះវីដេអូមួយបង្ហាញពីវិធីកាត់បន្ថយអាការៈថប់អារម្មណ៍សម្រាប់អ្នកមិនចូលចិត្ត ឬខ្លាចការធ្វើដំណើរតាមយន្តហោះ ហើយការណែនាំសំខាន់របស់នាង គឺកុំផឹកកាហ្វេមុនពេលឡើងយន្តហោះ និងអំឡុងពេលជិះយន្តហោះ ។

នាងពន្យល់ថា ជាតិកាហ្វេអ៊ីននៅក្នុងកាហ្វេនឹងបង្កើនកម្រិតស្ត្រេស ឬការបារម្ភក្នុងខ្លួន ហើយវាធ្វើឱ្យយើងសម្រាកពុំលក់ក្នុងពេលធ្វើដំណើរ និងមានអារម្មណ៍តានតឹងផងដែរ ។ លើសពីនេះ ជាតិកាហ្វេអ៊ីនបានជំរុញឱ្យប្រព័ន្ធប្រសាទបញ្ចេញសារធាតុ Adrenaline ហើយយើងនឹងថប់អារម្មណ៍កាន់តែខ្លាំងជាងមុន ។

ក្រៅពីការចៀសវាងផឹកកាហ្វេ អ្នកដំណើរគួរតែចៀសវាងផឹកភេសជ្ជៈផ្សេងទៀត ដែលផ្សំពីជាតិកាហ្វេអ៊ីន ដូចជា ៖ ភេសជ្ជៈប៉ូវកម្លាំង និងទឹកតែ ។ ជាទូទៅ ទឹកតែ មានជាតិកាហ្វេអ៊ីនតិចជាងកាហ្វេ ហើយវានឹងធ្វើឱ្យអ្នកដំណើរមានអារម្មណ៍ស្ត្រេសតិចជាងកាហ្វេ ។

នាងបន្ថែមថា អ្នកដំណើរគួរតែចំណាយប្រាក់ទិញកៅអីអង្គុយឱ្យស្រួលខ្លួន គឺពុំចាំបាច់កក់សំបុត្រយន្តហោះលំដាប់ទី១ ទេ ប៉ុន្តែគួរទិញកៅអីណាមានកន្លែងធំទូលាយសម្រាប់ដាក់ជើង ព្រមទាំងពាក់ខោអាវណាងាយស្រួលធ្វើដំណើរ ។ ក្រៅពីនេះ អ្នកដំណើរគួរយកសម្ភារៈផ្ទាល់ខ្លួន ដូចជា ៖ ខ្នើយកល់ជុំវិញក និងកន្សែងបិទភ្នែក ដើម្បីឱ្យឆាប់សម្រាកលក់ពេលធ្វើដំណើរ ។

ប្រសិនបើអ្នកដំណើរបារម្ភ ឬពុំសប្បាយចិត្តមុនពេលឡើងយន្តហោះ គួរតែប្រាប់បុគ្គលិកអាកាសចរណ៍ឱ្យជ្រាបថា អ្នកដំណើរមានបញ្ហានេះ ដើម្បីឱ្យពួកគេជួយថែទាំ ។ ម្យ៉ាងទៀត បើពុំយល់ ឬមានបញ្ហាអ្វីមួយ អ្នកដំណើរអាចសាកសួរទៅភ្នាក់ងារអាកាសចរណ៍គ្រប់ពេលវេលា ។ ក្រៅពីនេះ នាងបានណែនាំឱ្យអ្នកដំណើរកក់កៅអីយន្តហោះនៅផ្នែកខាងមុខ ពីព្រោះពេលយន្តហោះធ្លាក់ពីលើអាកាស កៅអីផ្នែកមុខនឹងទទួលផលប៉ះពាល់តិចបំផុត ។

ក្រោយពីនារីអាកាសចរណ៍បង្ហោះវីដេអូក្នុង TikTok អ្នកមើលវីដេអូនាងជាច្រើនបានបញ្ចេញមតិ និងអរគុណការណែនាំរបស់នាង ។ ពួកគេនិយាយថា វីដេអូណែនាំនេះធ្វើឱ្យពួកគេបារម្ភតិចជាងមុនពេលធ្វើដំណើរតាមយន្តហោះ ជាពិសេស ពេលយន្តហោះធ្លាក់ពីលើអាកាស ៕

ប្រទេសចិន៖ យានជំនិះសម្រាប់គេហដ្ឋានចល័តកំពុងលេចឡើងកាន់តែច្រើននៅតាមដងផ្លូវ និងភូមិនានាក្នុងប្រទេសចិន ដោយសារតែវាមានសេរីភាព មិនចាំបាច់បង់ថ្លៃជួល និងងាយស្រួលនៅពេលធ្វើដំណើរ ឬបោះជំរុំ។
យោងតាម CNN ការធ្វើជាម្ចាស់យានដ្ឋានគឺជានិន្នាការថ្មីនៅក្នុងប្រទេសចិន ខណៈអ្នកមានជាច្រើនបានកំពុងប្រកួតប្រជែងគ្នាដើម្បីបង្ហាញរថយន្តទំនើបៗ និងអាផាតមិនផ្សេងៗ។ ប៉ុន្តែនៅពេលដែលកំណើនសេដ្ឋកិច្ចចិនធ្លាក់ចុះ ប្រជាជនដីគោកហាក់មិនចាប់អារម្មណ៍នឹងការទិញរថយន្តទំនើបៗ ឬអាផាតមិនោះទេ ដោយពួកគេបែរទៅជាចាប់អារម្មណ៍ទិញផ្ទះក្នុងឡានទៅវិញ ព្រោះវាជួយម្ចាស់រថយន្តកាត់បន្ថយតម្លៃផ្ទះ និងងាយស្រួលធ្វើដំណើរគ្រប់ទីកន្លែង។

ក្នុងរយៈពេលប៉ុន្មានខែកន្លងមកនេះ និន្នាការនៃការបោះជំរុំជុំវិញយានដ្ឋានកំពុងមានការកើនឡើងយ៉ាងខ្លាំងគួរឱ្យកត់សម្គាល់នៅក្នុងប្រទេសចិន។ យោងតាមសមាគមអ្នកចែកចាយរថយន្តរបស់ប្រទេសនេះ ចំនួនរថយន្ត RV ដែលជាផ្ទះក្នុងឡាន គឺបានកើនឡើងដល់ទៅ ១៣,០០០ គ្រឿងនៅឆ្នាំ ២០២៣ នៃការលក់។ ដូច្នេះទីផ្សារយានជំនិះសម្រាប់គេហដ្ឋានចល័ត ត្រូវបានគេរំពឹងថានឹងអាចឈានដល់ ៨.៨ ពាន់លានដុល្លារនៅឆ្នាំ ២០៣០ ជាមួយនឹងអត្រាកំណើនជាមធ្យមច្រើនជាង ៥% ក្នុងមួយឆ្នាំ។ ទោះជាយ៉ាងណាក៏ដោយ យោងតាមវិទ្យាស្ថានស្រាវជ្រាវ LeadLeo អត្រាកម្មសិទ្ធិ RV នៅក្នុងប្រទេសចិនគឺនៅតែទាបជាងសហរដ្ឋអាមេរិក និងជប៉ុន។

គួរបញ្ជាក់ដែរថា នៅខាងក្នុងរថយន្ត RV គឺមានបន្ទប់គេង ផ្ទះបាយ បន្ទប់ទឹក ព្រមទាំងមានសម្ភារៈជាច្រើនទៀតដូចជា ទូទឹកកក ម៉ាស៊ីនបោកខោអាវ ម៉ាស៊ីនចាក់ខារ៉ាអូខេ ទូរទស្សន៍ ថែមទាំងមានរុក្ខជាតិឈើដើម្បីលម្អ និងឧបករណ៍កម្សាន្តផ្សេងទៀតនៅពេលធ្វើដំណើរ ដូចជាស្ថានីយ៍ដ្រូន ឬស្ទូចត្រីជាដើម។ បច្ចុប្បន្នផ្ទះចល័តត្រូវបានរកឃើញយ៉ាងងាយស្រួលនៅតាមដងផ្លូវ និងភូមិនានាក្នុងប្រទេសចិន ខណៈដែលមនុស្សកាន់តែច្រើនឡើងទាំងក្មេងទាំងចាស់ស្រឡាញ់សេរីភាព និងភាពងាយស្រួលនៃការរស់នៅបែបពនេចរ៕

យោងតាមកាសែតថៃ The Nation បានចុះផ្សាយថា អាជីវកម្មនៅក្នុងប្រទេសថៃកំពុងតែមានភាពមិនប្រាកដប្រជា ដោយសារតែការទិញរបស់អតិថិជនបានធ្លាក់ចុះជាលំដាប់។ ជាមួយគ្នានោះ ទាំងអាជីវកម្មលក់រាយ និងលក់ដុំ ក៏ដូចជាភោជនីយដ្ឋាននៅតាមបណ្តាខេត្តកំពុងជួបប្រទះការធ្លាក់ចុះនៃការលក់ពី ៣០-៤០% ដែលជាហេតុបណ្តាលឲ្យមានការព្រួយបារម្ភយ៉ាងខ្លាំងនៅក្នុងចំណោមជនជាតិថៃ។

ប្រតិបត្តិករអាជីវកម្មជាច្រើនកំពុងស្នើឱ្យរដ្ឋាភិបាលជំរុញវិធានការឬក៏គ្រោងការណ៍នានា ដើម្បីជួយសម្រួលដល់ការរស់នៅប្រចាំថ្ងៃរបស់ពួកគេ ជាពិសេសគឺទាក់ទងនឹងការចំណាយខ្ពស់ទៅលើរបររបស់ប្រើប្រាស់និងសេវាផ្សេងៗ។ ជនជាតិថៃភាគច្រើនបានចាត់ទុកគំនិតផ្តួចផ្តើមកាបូបឌីជីថលរបស់លោកសេដ្ឋា ថាវីស៊ីន គឺគ្មានប្រសិទ្ធភាពសម្រាប់អាជីវកម្មខ្នាតតូចនោះ ដោយសារលក្ខខណ្ឌស្មុគស្មាញ និងការផ្ទេរប្រាក់យឺតជាដើម។

យ៉ាងណាមិញ អំណាចនៃការទិញបានបន្តធ្លាក់ចុះគួរឲ្យកត់សម្គាល់ ជាពិសេសក្នុងចំណោមក្រុមមនុស្សដែលមានចំណូលទាប។ អាជីវកម្មខ្នាតតូចទាំងក្នុងទីក្រុងបាងកក និងតាមបណ្តាខេត្តនានា ត្រូវបានរងផលប៉ះពាល់ដោយការថយចុះនៃការចំណាយរបស់អ្នកប្រើប្រាស់ ដែលឆ្លុះបញ្ចាំងពីការថមថយនៃការលក់ បង្កហានិភ័យដល់សេដ្ឋកិច្ចថៃនៅក្នុងឆមាសទីពីរនៃឆ្នាំនេះ។

បើយោងតាមការបញ្ជាក់ពីអ្នកជំនាញបានឲ្យដឹងថា ការលក់ធ្លាក់ចុះជាគំហុកបែបនេះ ដោយហេតុថា អតិថិជនភាគច្រើនបានកាត់បន្ថយការចំណាយរបស់ពួកគេលើផលិតផលទាំងអស់ប្រមាណពី១៥-៣០% ដោយផ្តោតជាចម្បងលើការចំណាយដែលចំបាច់ៗប៉ុណ្ណោះ។ ដូច្នេះហើយ វាបានជះឥទ្ធិពលដល់ហាងតូចៗជាង ៤០០,០០០ នៅទូទាំងប្រទេស ទាំងអ្នកលក់ដុំ និងអ្នកលក់រាយ ដែលជំរុញឲ្យមានការបិទហាងនានាជាបន្តបន្ទាប់ ស្របពេលដែលមានការប្រកួតប្រជែងខ្លាំងកាន់តែខ្លាំង និងការចំណាយកើនឡើងខ្ពស់។

មិនត្រឹមតែប៉ុណ្ណោះ អាជីវកម្មភោជនីយដ្ឋាននៅតាមខេត្តក៏ជួបការលំបាកដែរ។ ប្រធានសមាគមភោជនីយដ្ឋានថៃបានអះអាងថា អាជីវកម្មភោជនីយដ្ឋានក្នុងឆមាសទីមួយនៃឆ្នាំនេះមានភាពអន់ថយ ដោយការលក់ខែឧសភាធ្លាក់ចុះដល់ទៅ ៤០%។

បន្ថែមពីនេះក៏នៅមានវិស័យមួយចំនួនទៀតក្នុងប្រទេសថៃក៏រងនូវផលប៉ះពាល់ ដោយសារធ្លាក់ចុះអំណាចនៃការទិញផងដែរ ក្នុងនោះគឺរួមមានបំណុលគ្រួសារ ការបិទរោងចក្រជាបន្តបន្ទាប់ និងវិស័យសណ្ឋាគារ ដោយសារតែទេសចរណ៍ក្នុងស្រុកធ្លាក់ចុះជាដើម៕

វៀតណាម៖ យោងតាម Vnexpress ដែលបានចុះផ្សាយកាលពីពេលថ្មីៗនេះថា VinFast គឺបានក្លាយជាក្រុមហ៊ុនដែលលក់រថយន្តអគ្គិសនីច្រើនជាងគេទីពីរនៅអាស៊ីអាគ្នេយ៍ក្នុងត្រីមាសទីមួយឆ្នាំ២០២៤ បន្ទាប់ពីក្រុមហ៊ុនចិន BYD។
បើតាមក្រុមហ៊ុនស្រាវជ្រាវទីផ្សារ Counterpoint បាននិយាយថា “ប្រទេសវៀតណាមបានឃើញកំណើនគួរឱ្យចាប់អារម្មណ៍ ដោយការលក់រថយន្តអគ្គិសនីគឺបានកើនឡើងរហូតដល់ជាង ៤០០% ឯណោះ ដោយរួមចំណែកជិត ១៧% នៃការលក់ក្នុងតំបន់”។

យោងតាមរបាយការណ៍ នៅក្នុងត្រីមាសទី ១ ការលក់រថយន្តអគ្គិសនីនៅអាស៊ីអាគ្នេយ៍គឺបានកើនឡើងទ្វេដងបើធៀបនឹងរយៈពេលដូចគ្នាក្នុងឆ្នាំ ២០២៣។ ទន្ទឹមនឹងនោះ ការលក់រថយន្តម៉ាស៊ីនចំហេះខាងក្នុងក៏បានថយចុះ ៧% ផងដែរ។ ដូច្នេះក្រុមហ៊ុនចិន BYD បានឈរចំណាត់ថ្នាក់ទីមួយ និងក្រុមហ៊ុនវៀតណាម VinFast ឈរនៅចំណាត់ថ្នាក់ទីពីរ នៃការលក់រថយន្តអគ្គិសនីច្រើនជាងគេក្នុងតំបន់អាស៊ីអាគ្នេយ៍នៅត្រីមាសទីមួយនៃឆ្នាំនេះ។

យោងតាមអ្នកវិភាគ Counterpoint លោក Abhik Mukherjee បាននិយាយថា “ដោយសារតែក្រុមហ៊ុនផលិតរថយន្តជប៉ុន និងកូរ៉េ ដែលជាប្រទេសគ្រប់គ្រងការលក់រថយន្ត មានភាពយឺតយ៉ាវក្នុងការផ្លាស់ប្តូរទៅរករថយន្តអគ្គិសនី ក្រុមហ៊ុនផលិតឧបករណ៍ដើមរបស់ចិន (OEM) និងវៀតណាម ក៏បានលោតចូលដើម្បីបំពេញចន្លោះទាំងនេះតែម្តង”។ លោក Mukherjee បានបន្តទៀតថា “អាស៊ីអាគ្នេយ៍កំពុងក្លាយជាតំបន់ពង្រីកដ៏សំខាន់សម្រាប់ OEMs របស់ចិន និងវៀតណាម” ។

នៅក្នុងប្រទេសវៀតណាម ការលក់ VinFast បានជាប់ចំណាត់ថ្នាក់កំពូលនៅក្នុងទីផ្សាររបស់ខ្លួនក្នុងត្រីមាសទីមួយ ជាមួយនឹងរថយន្តប្រហែល ៨,២០០ គ្រឿង ដែលស្មើនឹងម៉ាកយីហោលក់ដាច់បំផុតនៅក្នុងទីផ្សារវៀតណាមដូចជា Hyundai , Toyota , និង Ford ។ នៅថ្ងៃទី ១៧ ខែមេសា ក្រុមហ៊ុនរថយន្តវៀតណាមក៏បានប្រកាសផងដែរថា ការលក់រថយន្តទូទាំងពិភពលោករបស់ខ្លួនគឺបានឈានដល់ ៩,៦៨៩ គ្រឿងហើយក្នុងត្រីមាសទី ១ ឆ្នាំ ២០២៤ កើនឡើង ៤៤៤% បើធៀបនឹងរយៈពេលដូចគ្នាក្នុងឆ្នាំ ២០២៣។ ទោះជាយ៉ាងណាក្រុមហ៊ុនមិនបានប្រកាសអំពីទិន្នន័យជាក់លាក់សម្រាប់ទីផ្សារនីមួយៗនោះទេ៕

តើអ្នកធ្លាប់ស្រមៃថាអ្នកអាចគ្រប់គ្រង iPhone របស់អ្នកដោយគ្រាន់តែបញ្ជាភ្នែករបស់អ្នកដែរឬទេ? ជាការពិតណាស់ ប្រព័ន្ធប្រតិបត្តិការ iOS 18 ថ្មីនេះគឺមានមុខងារងាយស្រួលប្រើប្រាស់ជាច្រើនសម្រាប់ iPhone ជាមួយនឹងមុខងារលេចធ្លោបំផុតមួយគឺសមត្ថភាពក្នុងការគ្រប់គ្រងស្មាតហ្វូនរបស់អ្នកដោយគ្រាន់តែភ្នែករបស់អ្នកប៉ុណ្ណោះ មានន័យថា iPhone អនុញ្ញាតឱ្យអ្នកប្រើប្រាស់ជ្រើសរើសមាតិកានៅលើអេក្រង់ដោយមិនប្រើម្រាមដៃរបស់ពួកគេឡើយ។ មិនថាអ្នកមានតម្រូវការភាពងាយស្រួល ឬគ្រាន់តែចង់ប្រើប្រាស់មុខងារថ្មីនោះទេ គឺអ្នកអាចអនុវត្តតាមវិធីដូចខាងក្រោម៖

១.ត្រូវប្រាកដថាអ្នកកំពុងដំណើរការ iOS 18 beta នៅលើ iPhone របស់អ្នក។
២.ត្រូវដំឡើងកម្មវិធី Eye Tracking ជាមួយ iPhone លើផ្ទៃដែលមានស្ថេរភាពប្រហែល ប្រហែល ៤៥ សង់ទីម៉ែត្រពីមុខរបស់អ្នក។ បន្ទាប់មកត្រូវចូល Settings ហើយចុចលើ Accessibility រួចជ្រើសរើសការតាមដានភ្នែក Eye Tracking។
៣.ចុចប៊ូតុងបើកទាំងអស់ដើម្បីបើកការតាមដានភ្នែក។
៤.ធ្វើតាមការណែនាំដើម្បីឱ្យ iPhone អាចស្គាល់ការសម្លឹងរបស់អ្នក។ បន្ទាប់ពីបញ្ចប់ការកំណត់អត្តសញ្ញាណ អ្នកអាចធ្វើប្រតិបត្តិការដោយភ្នែករបស់អ្នកនៅលើទូរស័ព្ទបានហើយ។

គួរបញ្ជាក់ដែរថា ប្រព័ន្ធប្រតិបត្តិការ iOS 18 នឹងត្រូវបានដាក់ឱ្យប្រើប្រាស់ជាផ្លូវការទូទាំងពិភពលោកសម្រាប់អ្នកប្រើប្រាស់ទូទៅនៅក្នុងខែកញ្ញានៃឆ្នាំ ២០២៤ ខាងមុខនេះ។ ទោះជាយ៉ាងណា ស្មាតហ្វូនដែលអាចអាប់ដេតទៅ iOS 18 បានគឺមានតែ iPhone 11, 12, 13, 14 និង 15 រួមជាមួយនឹង iPhone XS និង XS Max ក៏ដូចជាទូរស័ព្ទ iPhone XR, iPhone SE ជំនាន់ទីពីរ និងទីបីប៉ុណ្ណោះ។ ចំពោះ iPhone 8, 8 Plus iPhone X និង iPhone ជំនាន់មុនផ្សេងទៀតគឺមិនអាចអាប់ដេតទៅ iOS 18 បានឡើយ៕

ប្រទេសវៀតណាម ៖ នៅថ្ងៃទី២៥ ខែមិថុនា ឆ្នាំ២០២៤ ការិយាល័យគយវៀតណាមប្រកាសថា នៅឆមាសទី១ ឆ្នាំ២០២៤ ប្រទេសវៀតណាមបាននាំចេញបន្លែ និងផ្លែឈើទៅប្រទេសចិន, ថៃ និងកូរ៉េខាងត្បូង កើនឡើងរហូតដល់២៨% ស្មើទឹកប្រាក់៣ពាន់៤រយលានដុល្លារអាមេរិក ក្នុងនោះមានដូចជា ៖ ផ្លែទុរេន, ស្រកានាគ, ចេក និងមៀន ។

យោងតាមទិន្នន័យខាងលើ ប្រទេសវៀតណាមរំពឹងថា ការនាំចេញបន្លែ និងផ្លែឈើសរុបនៅឆ្នាំ២០២៤ នឹងស្មើទឹកប្រាក់៧ពាន់៥រយលានដុល្លារអាមេរិក ។ មន្ត្រីគយវៀតណាមនិយាយថា បើទោះជាការនាំចេញបន្លែ និងផ្លែឈើទៅកាន់ទីផ្សារសំខាន់ៗកើនឡើងចាប់ពី១០% ទៅ៥០% ក្តី ប៉ុន្តែការនាំចេញទៅប្រទេសហូឡង់ នឹងធ្លាក់ចុះ ។

ប្រទេសធំៗដែលបានទិញបន្លែ និងផ្លែឈើវៀតណាមច្រើនជាងគេ រួមមាន ៖ ចិន, ថៃ និងកូរ៉េខាងត្បូង ។ ប្រទេសទាំងនេះបាននាំចូលទិន្នផលកសិកម្មវៀតណាមយ៉ាងច្រើន ចាប់ពី៣០% ទៅ៦០% នៅខែមករា ឆ្នាំ២០២៤ ហើយប្រទេសថៃ និងកូរ៉េខាងត្បូង បាននាំចូលទិន្នផលកសិកម្មវៀតណាម ស្មើទឹកប្រាក់៧៤លាន៥សែនដុល្លារអាមេរិក និង១៣៦លានដុល្លារអាមេរិក តាមលំដាប់ ។

ចំណែកប្រទេសចិនបាននាំចូលទិន្នផលកសិកម្មវៀតណាម កើនឡើង៣៣% នៅខែមករា ឆ្នាំ២០២៤ បើធៀបនឹងរយៈពេលដូចគ្នាឆ្នាំ២០២៣ ឬកើនឡើងចំនួន១ពាន់៧រយលានដុល្លារអាមេរិក ។

លោក Dang Phuc Nguyen លេខាធិការសមាគមបន្លែ និងផ្លែឈើវៀតណាមបាននិយាយសង្កត់ធ្ងន់លើគុណសម្បត្តិយុទ្ធសាស្ត្ររបស់វៀតណាម គឺដោយសារវៀតណាមមានទីតាំងភូមិសាស្ត្រអំណោយផល និងមានទំនាក់ទំនងផ្នែកម្ហូបអាហារជាមួយចិន ទើបធ្វើឱ្យការនាំចេញទិន្នផលកសិកម្មវៀតណាមកើនឡើងជាបន្តបន្ទាប់ ។ លោករំពឹងថា នៅឆ្នាំ២០២៤ ទាំងមូល ការនាំចេញបន្លែ និងផ្លែឈើវៀតណាម នឹងកើនឡើងស្មើទឹកប្រាក់៧ពាន់៥រយលានដុល្លារអាមេរិក កើនឡើង៣៥% បើធៀបនឹងឆ្នាំ២០២៣ ។

ចំណែកការនាំចេញបន្លែ និងផ្លែឈើវៀតណាមនៅឆ្នាំ២០២៣ ស្មើទឹកប្រាក់៥.៦៩០លានដុល្លារអាមេរិក និងខ្ពស់ជាងឆ្នាំ២០២២ ប្រមាណ៧០% ។ រីឯចិន គឺជាទីផ្សារធំបំផុតដែលបានទិញទិន្នផលកសិកម្មវៀតណាមនៅឆ្នាំ២០២៣ ស្មើទឹកប្រាក់ជាង៣ពាន់៧រយលានដុល្លារអាមេរិក កើនឡើង១៤៩% បើធៀបនឹងឆ្នាំ២០២២ ៕