រដ្ឋមន្រ្តីក្រសួងសុខាភិបាលស្នើក្រសួងប្រៃសណីយ៍ទប់ស្កាត់ការផ្សាយផលិតផលជំនួយផ្លូវភេទបុរស-នារី តាមប្រព័ន្ធអនឡាញ

ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាលបានស្នើរដ្ឋមន្ត្រីក្រសួងប្រៃសណីយ៍ និងទូរគមនាគមន៍ទប់ស្កាត់ការផ្សព្វផ្សាយលក់ផលិតជំនួយផ្លូវភេទបុរស និងផលិតផលជំនួយអារម្មណ៍ផ្លូវភេទនារីតាមប្រព័ន្ធអនឡាញ។ នេះបើតាមលិខិតរបស់ក្រសួងសុខាភិបាលដែល KBN News ទទួលបាននាយប់ថ្ងៃទី៥ ខែកក្កដា ឆ្នាំ២០២៣។

សំណើរស្នើសុំរបស់ក្រសួងសុខាភិបាលធ្វើឡើងបន្ទាប់ពីសង្កេតឃើញថាបច្ចុប្បន្ននេះមានការផ្សព្វផ្សាយលក់ផលិតផលជំនួយផ្លូវភេទបុរស និងផលិតផល ជំនួយអារម្មណ៍ផ្លូវភេទនារី តាមប្រព័ន្ធអនឡាញ មានដូចជានៅលើ៖ Facebook, TikTok, Telegram, Instagram, YouTube, Website…យ៉ាងអនាធិបតេយ្យ ខណៈដែលក្រសួងសុខាភិបាលមានការលំបាកក្នុងការស្វែងរកជនល្មើសដើម្បីមកផ្តន្ទាទោសតាមច្បាប់។

ប្រភពដដែលបានបញ្ជាក់ទៀតថា អនុលោមតាមច្បាប់ស្តីពីការគ្រប់គ្រងឱសថ រាល់ការចរាចរឱសថ ឬផលិតផលដែលមានគុណភាពក្នុងការ បង្ការ ឬព្យាបាលជំងឺគ្រប់ប្រភេទក្នុងប្រទេសកម្ពុជា ត្រូវមានលេខទិដ្ឋាការ ឬបញ្ជីកាពីក្រសួងសុខាភិបាល ហើយការផ្សព្វផ្សាយផលិតផលទាំងនេះតាមគ្រប់រូបភាពត្រូវមានការអនុញ្ញាតពីក្រសួងសុខាភិបាល ដោយឡែកគ្រប់ ផលិតផលជំនួយផ្លូវភេទបុរស និងផលិតផលជំនួយអារម្មណ៍ផ្លូវភេទនារី ក្រសួងសុខាភិបាលមិនអនុញ្ញាតឱ្យមានការផ្សព្វផ្សាយជាសាធារណៈឡើយ។

ហេតុនេះហើយក្រសួងសុខាភិបាលស្នើសុំខាងក្រសួងប្រៃសណីយ៍សហការទប់ស្កាត់ បញ្ឈប់ការផ្សព្វផ្សាយលក់ផលិតផលខាងលើ ដើម្បីបង្ការកុំឱ្យកើតមានគ្រោះថ្នាក់ពីការប្រើប្រាស់ផលិតផលទាំងនេះ ក៏ដូចជាការបង្ការមិនឱ្យមានបទល្មើសឧក្រិដ្ឋជាយថាហេតុផ្សេងៗទៀតផងដែរ៕