Zhang Linghe បដិសេធមិនមានការបង់ប្រាក់ដើម្បីបានថតរូប

បណ្ដាញសង្គមមានការផ្សព្វផ្សាយយ៉ាងខ្លាំងក្នុងរយៈពេលប៉ុន្មានថ្ងៃថ្មីៗនេះដោយមានអះអាងថាជាអ្នកនៅក្នុងវិស័យសិល្បៈមានការរៀបចំឱ្យបានថតរូបជាមួយ Zhang Linghe ជាមួយនឹងតម្លៃ ៩៥,០០០ យ័នដែលស្មើនឹងប្រហែល ១៤,០០០ដុល្លារ។ តួលេខនេះបានបង្កឱ្យមានភាពចម្រូងចម្រាសយ៉ាងឆាប់រហ័សជាពិសេសក្នុងចំណោមអ្នកគាំទ្រ។

យោងតាមព័ត៌មានដែលចរាចរមុនពេលរឿងភាគ «Pursuit of Jade»ចាក់ផ្សាយ តម្លៃត្រូវបានគេរាយការណ៍ថាមានប្រហែល ៤០,០០០ យ័ន ស្មើនឹងជិត៦ ០០០ដុល្លារ។ ទោះជាយ៉ាងណាក៏ដោយ នេះគ្រាន់តែជាតម្លៃដែលបានលើកឡើងដោយភាគីទីបីមិនមានព័ត៌មានណាមួយដែលបង្ហាញថានេះជាបញ្ជីតម្លៃផ្លូវការពី Zhang Linghe ឬក្រុមហ៊ុនគ្រប់គ្រងរបស់លោកនោះទេ។ នេះជាតម្លៃដែលមនុស្សផ្សេងទៀតអះអាងថា អាចរៀបចំឱ្យមានឱកាសថតរូបជាមួយតារា។

គួរកត់សម្គាល់ថា អ្នកតំណាងរបស់ Zhang Linghe ត្រូវបានគេរាយការណ៍ថាមិនដែលរៀបចំការថតរូបបង់ប្រាក់ជាមួយតារាសម្តែងរូបនេះទេ។ ម្យ៉ាងវិញទៀត កិច្ចព្រមព្រៀងដែលបានផ្សព្វផ្សាយតាមអ៊ីនធឺណិតមិនមែនជាសកម្មភាពផ្លូវការរបស់ក្រុមនោះទេ។ ទោះបីជាអ្នកគាំទ្រចំណាយប្រាក់ច្រើនដល់ភាគីកណ្តាលក៏ដោយប្រាក់នោះមិនចាំបាច់មានន័យថាសិល្បករនឹងទទួលបានវានោះទេ។
ផ្ទុយទៅវិញ អ្នកទទួលផលអាចជាបុគ្គលដែលដើរតួជាអ្នកកណ្តាល និងកំណត់តម្លៃផ្ទាល់ខ្លួន។ នេះក៏ជាមូលហេតុដែលអ្នកគាំទ្រត្រូវបានណែនាំកុំឱ្យទទួលយកការផ្តល់ជូនថតរូបដែលមានថ្លៃសេវាខ្ពស់ហួសហេតុ។

ដើម្បីឆ្លើយតបទៅនឹងការជជែកដេញដោលតាមអ៊ីនធឺណិត អ្នកតំណាងបាននិយាយម្តងហើយម្តងទៀតថា មិនមានបទប្បញ្ញត្តិផ្លូវការណាមួយទាក់ទងនឹងការលក់រូបថត ឬការគិតថ្លៃសម្រាប់រូបថតដែលថតជាមួយសិល្បករនោះទេ។ ក្រុមការងារបានបញ្ជាក់ថា ពួកគេកំពុងតាមដានព័ត៌មានមិនពិត ខ្លឹមសារបរិហារកេរ្តិ៍ និងសកម្មភាពណាមួយដែលហាក់ដូចជារំលោភលើសិទ្ធិរបស់ Zhang Linghe។ បើចាំបាច់ ភាគីសិល្បករអាចចាត់វិធានការផ្លូវច្បាប់ដើម្បីការពារសិទ្ធិរបស់ពួកគេ។

ជាមួយគ្នានេះដែរអ្នកគាំទ្រដែលធ្លាប់ជួប Zhang Linghe ផ្ទាល់បានចែករំលែកថានៅពេលគេជួប Zhang Linghe ក្នុងកម្មវិធីសាធារណៈ ឬជួបដោយចៃដន្យ ប្រសិនបើស្ថានភាពអនុញ្ញាត ជាទូទៅតារាសម្តែងរូបនេះមានការសហការជាមួយអ្នកគាំទ្រក្នុងការថតរូប ហើយមិនមានការកំណត់ថាត្រូវបង់លុយទើបអាចថតរូបបានទេ៕