ទីបំផុតក្មេងស្រីអាយុទើប១៤ឆ្នាំ ដែលជាម្ចាស់គណនីមួយបានប្រើពាក្យប្រមាថជីវិត អ៊ែលលី ត្រូវសមត្ថកិច្ចហៅវាស់កម្ពស់បានសម្រេចចិត្តហើយ។ នេះបើតាមការឱ្យដឹងពីអ្នកនាង ផន សុផារី នៅល្ងាចថ្ងៃទី២ ខែមិថុនា ឆ្នាំ២០២៣។
អ្នកនាង ផន សុផារី បានភ្ជាប់រូបភាពក្មេងស្រីត្រូវវាស់កម្ពស់ព្រមទាំងសរសេរយ៉ាងដូច្នេះថា «បើខ្ញុំនិយាយហើយ ខ្ញុំត្រូវតែធ្វើឲ្យបាន !!! ផេកដទៃក៏ដូចគ្នា បើចង់សុខ កុំប៉ះពាល់គ្រួសារខ្ញុំ»។
គួរបញ្ជាក់ផងដែរថា កាលពីថ្ងៃទី១ ខែមិថុនា អ្នកនាង ផន សុផារី បានប្រកាសយ៉ាងដាច់អហង្ការថា មិនព្រមទទួលពាក្យសុំទោសពីជន បង្កើតពាក្យចចាមអារ៉ាមថា អ៊ែលលី ស្លាប់ហើយជាដាច់ខាត ខណៈអ្នកនាងបានចំណាយលុយរាប់ពាន់ដុល្លារដើម្បីស្រាវជ្រាវរកម្ចាស់គណនីក្លែងក្លាយដែលបង្កហេតុមកទទួលទោសតាមផ្លូវច្បាប់។ បើតាមវីដេអូដែល អ្នកនាង ផន សុផារី បានបង្ហោះ មូលហេតុដែលក្មេងស្រីនោះបង្កើតពាក្យចចាមអារ៉ាម ប្រមាថជីវិតអ្នកដទៃនោះដោយសារតែ «មិនចូលចិត្តមនុស្សម្នាក់» ទើបឈានដល់យករូប អ៊ែលលី ទៅពាក់ព័ន្ធ៕
