ព្រះសីហនុ, ក្រុងកោះរ៉ុង ៖ ដំណឹងពីការបាត់ខ្លួននារីជនជាតិអង់គ្លេសម្នាក់លើកោះរ៉ុង នៅតែជាប្រធានបទក្តៅ ដែលមហាជនចង់ដឹងពីជោគវាសនារបស់នាង ក្រោយបាត់ដំណឹងរយៈពេល៦ថ្ងៃមកហើយ បើគិតមកត្រឹមថ្ងៃត្រង់ទី៣០ ខែតុលា ឆ្នាំ២០១៩នេះ ។
សម្រាប់ប្រតិបត្តិការស្វែងរក មន្ត្រីក្រុងកោះរ៉ុងថ្លែងអោយដឹងថា នៅព្រឹកថ្ងៃ៣០តុលានេះ សមត្ថកិច្ចបានបញ្ជូនកម្លាំងអន្តរាគមន៍ពិសេសបន្ថែមទៀត ជាមួយសត្វសុនខ ហិតក្លិន បញ្ជូនទៅកាន់កោះរ៉ុង ដើម្បីបន្តស្វែងរកស្ត្រីជនជាតិអង់គ្លេសឈ្មោះ Amelia Bambridge អាយុ២១ឆ្នាំ ដែលបាត់ខ្លួន នៅលើកោះរ៉ុងតាំងពីម៉ោង៣និង៣០នាទីទៀបភ្លឺថ្ងៃទី២៤ តុលា មកម្ល៉េះ ។
លោក នួន ប៊ុនថុល អភិបាលក្រុងកោះរ៉ុង ក៏បានថ្លែងអោយដឹងផងដែរថា កាលពីម្សិលមិញនេះ មានព័ត៌មានមួយ បានចុះផ្សាយថា«ស្ត្រីជនជាតិអង់គ្លេសដែលបាត់ខ្លួន មានគេបានប្រទះឃើញសពអណ្ដែតទឹកនៅជិតកោះស្ដេច»នោះ គឺជាដំណឹងមិនពិតទេ ព្រោះថា កម្លាំងនគរបាលចរាចរណ៍ផ្លូវទឹក រួមជាមួយលោកឧកញ៉ាទៀ វិចិត្រ ក៍បានចុះផ្ទាល់ផងដែរ សហការជាមួយកម្លាំងចេញស្វែងរកនាង នៅលើលម្ហសមុទ្រ ដោយរកឆ្ងាយពីឆ្នេរកោះ ទៅកាន់តំបន់កោះស្តេច កោះស្មាច់ និងតំបន់ឆ្ងាយៗធ្លាយដល់ក្បែរកោះកុងថែមទៀត នៅតែមិនឃើញដដែលទេ ។
លោកអភិបាលក្រុងកោះរ៉ុង បន្ថែមថា ទោះជាយ៉ាងណានៅព្រឹកថ្ងៃនេះ ការស្វែងរកស្ត្រីជនជាតិអង់គ្លេសដែលបាត់ខ្លួន សមត្ថកិច្ចយើង និងក្រុមអ្នកស្ម័គ្រចិត្តនៅតែធ្វើបន្ត ហើយដំណឹងពីជោគវាសនារបស់ស្ត្រីជនជាតិអង់គ្លេសរូបនោះ មិនទាន់ទទួលបាននៅឡើយ ។ លោកបន្តថា ក្រៅពីការស្វែងរកមនុស្ស ការស្រាវជ្រាវផ្សេងៗ កម្លាំងក៍កំពុងធ្វើដែរពីសមត្ថកិច្ចជំនាញ ដើម្បីរកប្រភព និងដើមហេតុដែលនាំទៅដល់ការបាត់ខ្លួននេះ ។
សូមជម្រាបថា ឧកញ៉ាទៀ វិចិត្រ ស្ម័គ្រចិត្តចូលរួមស្វែងរកនារីអង់គ្លេសបាត់ខ្លួនលើកោះរ៉ុង
សូមរម្លឹកថា កាមេរ៉ាសុវត្ថិភាពថតបាន មុនពេលនារីជនជាតិអង់គ្លេសម្នាក់បាត់ខ្លួននៅលើកោះរ៉ុង ។
និង ឃើញតែកាបូបរបស់ស្ត្រីអង់គ្លេសលើផ្ទាំងថ្ម អាជ្ញាធរបន្តស្វែងរក ៤ថ្ងៃហើយគ្មានដំណឹង
