ខេត្តព្រះសីហនុ,ក្រុងកោះរ៉ុង ៖ ករណីស្ត្រីជនជាតិអង់គ្លេសម្នាក់ ដែលបាត់ខ្លួនដោយមិនដឹងពីមូលហេតុ លើក្រុងកោះរ៉ុងរយៈពេល៤ថ្ងៃមកហើយនោះ គិតមកត្រឹមម៉ោង៥ល្ងាច ថ្ងៃទី២៨ តុលា ២០១៩នេះ ការស្វែងរករូបនាង នៅមិនទាន់ប្រទះឃើញនៅឡើយទេ ហើយកម្លាំងសមត្ថកិច្ចចម្រុះគ្រប់ផ្នែក រួមជាមួយក្រុមអ្នកស្ម័គ្រចិត្តផង កំពុងធ្វើប្រតិបត្តិការស្វែងរកបន្ត ដោយថ្មើរជើង នៅលើដីគោក ក្នុងតំបន់ព្រៃភ្នំផង ក្នុងនោះមានការប្រើប្រាស់កាមេរ៉ាថតពីលើអាកាស ហើយនៅក្នុងទឹកក្បែរឆ្នេរសមុទ្រ ក៍មានក្រុមអ្នកមុជទឹកស្វែងរកផងដែរ ។
ប្រភពពីមន្ត្រីរដ្ឋបាលក្រុងកោះរ៉ុង បានប្រាប់អោយដឹងថា អាជ្ញាធរក្រុងកោះរ៉ុង បានព្យាយាមស្វែងរកនារីរងគ្រោះភ្លាមៗ ក្រោយទទួលដំណឹងពីការបាត់ខ្លួននេះ នៅតែរករូបនាងមិនឃើញ ប៉ុន្តែគេបានឃើញកាបូបរបស់នាង នៅលើផ្ទាំងថ្មជាប់ឆ្នេរ ក្បែរកន្លែងធ្វើពិធីជប់លៀងមួយដែលនាងទៅលេងកម្សាន្តនៅកោះរ៉ុង ។
រហូតមកដល់ពេលនេះ អាជ្ញាធរនៅមិនទាន់អាចបញ្ជាក់បានទេថា ជាការវង្វេងបាត់ក្នុងព្រៃលើកោះ ឬដោយហេតុការណ៍អ្វីមួយនៅឡើយទេ ដោយហេតុថា កន្លងមកក៍ធ្លាប់មានភ្ញៀវបរទេសខ្លះ ក្រោយពីទុកឥវ៉ាន់នៅកន្លែងស្នាក់នៅហើយ ពួកគេដើរលេងតាមព្រៃ៤,៥ថ្ងៃក្រោយទើបត្រឡប់មកវិញក៏មាន ។
យ៉ាងណាបញ្ហាចំពោះមុខនេះ អភិបាលខេត្តព្រះសីហនុ បានដាក់បទបញ្ជាយ៉ាងម៉ឺងម៉ាត់ ឲ្យកម្លាំងគ្រប់ផ្នែកតាមរកនៅតាមទីតាំងផ្សេងៗ តាមដងព្រៃភ្នំ ដងព្រែក តាមឆ្នេរខ្សាច់ឆ្នេរថ្ម នៅតាមកន្លែងស្នាក់នៅនានា លើកោះរុង និងកន្លែងដែលនារីនោះបានទៅលេង រួមទាំងក្រុមមុជទឹកផង ធ្វើយ៉ាងណារកឲ្យអស់លទ្ធភាព ។
សូមជម្រាបថា នារីដែលបាត់ខ្លួនមានឈ្មោះ AMELIA LOISE អាយុ២១ឆ្នាំ ជនជាតិអង់គ្លេស មានកាន់ passport ត្រឹមត្រូវតាមច្បាប់ បានចេញពីក្រុងព្រះសីហនុ ឆ្ពោះទៅកាន់ក្រុងកោះរ៉ុង នាវេលាម៉ោង៥ល្ងាចថ្ងៃទី១៩ ខែតុលា ឆ្នាំ២០១៩ ហើយពេលមកគោលដៅលើកោះរ៉ុងនៅម៉ោង៦ល្ងាច ។នាងបានចូលស្នាក់នៅក្នុងផ្ទះសំណាក់ឈ្មោះ Ness Beach នៅម៉ោង៨និង១៥នាទីយប់ ថ្ងៃដដែល ក្នុងគោលបំណងទេសចរណ៍ ។ មុនបាត់ខ្លូន គេបានប្រទះឃើញនារីនោះលើកចុងក្រោយ នៅម៉ោង៣និង៣០ទៀបភ្លឺ ឈានចូលថ្ងៃទី២៤ ខែតុលា ឆ្នាំ២០១៩ ក្នុងពិធីជប់លៀង មួយនៅឆ្នេរកោះរ៉ុង (police beach) ក្រោយមកក៏បាត់ដំណឹង មិនដឹងពីមូលហេតុ តែម្តង ៕