ព្រះសីហនុ, ក្រុងកោះរ៉ុង ៖ រយៈពេល៥ថ្ងៃហើយ ប្រតិបត្តិការស្វែងរកស្ត្រីជនជាតិអង់គ្លេសឈ្មោះ AMELIA LOUISE អាយុ២១ឆ្នាំ ដែលបាត់ខ្លួននៅកោះរ៉ុង គិតមកត្រឹមម៉ោង៧ព្រឹកថ្ងៃទី២៩ ខែតុលា ឆ្នាំ២០១៩នេះ នៅមិនទាន់រកឃើញនៅឡើយទេ ។
អាជ្ញាធរក្រុងកោះរ៉ុង និងសមត្ថកិច្ចបានរួមគ្នាប្រើប្រាស់កម្លាំងជាង២០០នាក់ រហូតប្រើសុនខទៀត តាមរកនៅតាមទីតាំងផ្សេងៗ តាមដងព្រៃភ្នំ ដងព្រែក តាមឆ្នេរខ្សាច់ ឆ្នេរថ្ម នៅតាមកន្លែងស្នាក់នៅនានា នៅលើកោះរ៉ុង ក្នុងនោះមានការប្រើប្រាស់កាមេរ៉ាថតពីលើអាកាស និងកន្លែងដែលនារីនោះបានទៅលេងរួមទាំងក្រុមមុជទឹក (diving) អមជាមួយឧបករណ៍ និងទូកនេសាទផង ធ្វើយ៉ាងណារកនាងអោយអស់លទ្ធភាព ។
បើតាមមន្ត្រីម្នាក់ ដែលស្ថិតក្នុងកម្លាំងចម្រុះចូលរួមប្រតិបត្តិការស្វែងរងនារីរងគ្រោះ បានប្រាប់អ្នកសារព័ត៌មានយើងអោយដឹងថា នារីដែលបាត់ខ្លួនមានឈ្មោះ AMELIA LOUISE កើតថ្ងៃទី១៤ ខែកក្កដា ឆ្នាំ១៩៩៨ សញ្ជាតិអង់គ្លេស កាន់លិខិតឆ្លងដែនលេខ ៥៣១៨៩០៨៣៣ ។ បានចូលមកប្រទេសកម្ពុជា តាមច្រកបាវិត ខេត្តស្វាយរៀង អំឡុងថ្ងៃទី១៥ រឺក៏ទី១៦ ខែតុលា ដោយធ្វើដំណើរចេញពីវៀតណាម ដោយសារឪពុករបស់នាងធ្វើការនៅទីនោះ។
ពេលមកដល់ភ្នំពេញ នាងបានសម្រាកនៅសណ្ឋាគារជាមួយមិត្តស្រីម្នាក់ទៀត ដែលចេញពីវៀតណាម ហើយថ្ងៃទី១៩ បានធ្វើដំណើរមកដល់ខេត្តព្រះសីហនុ លុះល្ងាចឡើងពួកគេទាំងពីរនាក់ បានធ្វើដំណើរទៅកោះរ៉ុង ពេលឡើងលើទូកបានស្គាល់មិត្តភក្តិស្រីប្រុសថ្មី ៦នាក់ផ្សេងទៀត ក្នុងនោះប្រុស៣នាក់ រួចពួកគេពេលទៅដល់កោះរ៉ុង បានរៀបចំពិធីជប់លៀងមួយ ដែលមានឈ្មោះថា «ចាំមើល ថ្ងៃរះ» ដោយចាប់ពីម៉ោង៥ល្ងាច ដល់ម៉ោង៩ព្រឹក លើកោះរ៉ុងសន្លឹម ។
ពេលចេញពីក្រុងព្រះសីហនុ ឆ្ពោះទៅគោលដៅក្រុងកោះរ៉ុង នៅម៉ោង៥ល្ងាចថ្ងៃទី១៩ ខែតុលា ឆ្នាំ២០១៩ មកដល់កោះរ៉ុងនៅម៉ោង៦ល្ងាច ។ នាងបានចូលស្នាក់នៅផ្ទះសំណាក់ Ness Beach បន្ទប់លេខ១ គ្រែលេខ៥ មានទីតាំងស្ថិតនៅភូមិកោះតូច សង្កាត់កោះរ៉ុងសន្លឹម នៅម៉ោង៨ និង១៥នាទីយប់ថ្ងៃខែឆ្នាំដដែល ។ មុនបាត់ខ្លូន គេបានប្រទះឃើញនារីនោះលើកចុងក្រោយ ដែលថតបានដោយកាម៉េរ៉ាសុវត្ថិភាពពីហាងមួយ នៅម៉ោង៣និង៣០ទៀបភ្លឺឈានចូលថ្ងៃទី២៤ ខែតុលា ឆ្នាំ២០១៩ ។
ស្របគ្នាទៅហ្នឹង វីដេអូនៅក្នុងទូរស័ព្ទដៃរបស់នាង ដែលថតពីពិធីជប់លៀងនោះនៅម៉ោង០៣និង២៣នាទី ដែលអាជ្ញាធររកឃើញជាមួយកាបូបស្ពាយតូចមួយ នៅលើថ្ម ជាប់ឆ្នេរ កន្លែងដែលនាងអង្គុយកំឡុងពេលនៃពិធីជប់លៀងនៅឆ្នេរកោះរ៉ុងនោះ Police Beach ។ ប៉ុន្តែកាបូបដៃដែលត្រូវបានគេរកឃើញនោះ ខាងក្នុងមានកាបូបលុយ ទូរស័ព្ទ និងកាតធនាគារ ខណៈលិខិតឆ្លងដែនរបស់នាង ស្ថិតនៅក្នុងកន្លែងស្នាក់នៅ ។ សូមជម្រាបថា ភោជនីយដ្ឋានឈ្មោះ Police Beach និងកន្លែងស្នាក់នៅរបស់នាង មានចម្ងាយពីគ្នាប្រហែល១គីឡូម៉ែត្រ ។ ក្រោយពេលធ្វើដំណើរតែម្នាក់ឯងចាកចេញពីពិធីជប់លៀងត្រឡប់ទៅកាន់កន្លែងនៅរបស់នាងវិញ ក៏បាត់ដំណឹងតែម្តង ។
ចំណែកឯយុវជនជនជាតិបរទេសម្នាក់ឈ្មោះ Ryan Harris អាយុ១៨ឆ្នាំ ដែលអះអាងប្រាប់សមត្ថកិច្ចថា រូបគេបានស្គាល់គ្នា ជាមួយនារីរងគ្រោះ រូបគេធ្លាប់បានជួបគ្នានៅទីក្រុងភ្នំពេញ និងបានធ្វើដំណើរតាមទូករួមគ្នាទៅលេងកោះរ៉ុង ពេលធ្វើដំណើរមកជាមួយគ្នា រូបគេបានជួបជាមួយមនុស្ស២-៣នាក់ផ្សេងទៀត ប៉ុន្តែ រូបគេបានធ្វើដំណើរទៅស្នាក់នៅ លើកោះផ្សេងទៀត នៅជាប់គ្នាជាមួយកោះរ៉ុងដែរ រីឯនាង AMELIA បានស្នាក់នៅជាមួយក្មេងស្រីម្នាក់ ដែលបានស្គាល់នៅពេលធ្វើដំណើរតាមទូកជាមួយគ្នា លុះក្រោយមករូបគេក៏ទទួលបានដំណឹងថា នាងបាត់ខ្លួនទៅវិញ ។
ដោយឡែក តាមរយៈសារព័ត៌មានបរទេស “Sky News” បានបង្ហាញនៅវីដេអូមួយ មុនពេល AMELIA LOUISE បានបាត់ខ្លួន ។ បើតាមរយៈវីដេអូបានបង្ហាញថា AMELIA LOUISE មានស្នាមញញឹមធម្មតាជាមួយមិត្តភក្តិ នៅពេលដែលនាងបានដើរជាមួយមិត្តភក្តិ ទៅចូលរួមក្នុងកម្មវិធីជំលៀងនៅម៉ោង២ រំលងអាធាត្រ ក្រោយមកនាងក៏បាត់ដំណឹងទៅ ។
ឪពុករបស់នាង AMELIA ជឿថា នាងប្រាកដជាវង្វេងនៅក្នុងព្រៃនេះឯង បើមិនចឹងទេ ប្រាកដជាត្រូវគេចាប់ជំរិតហើយ ឪពុកនាង AMELIA អះអាងថា បើសិនជាមានគ្រោះថ្នាក់មែន នៅពេលនេះ ច្បាស់ណាស់សមត្ថកិច្ចប្រាកដជារកនាងឃើញហើយ ។
ប្អូនស្រីរបស់ Amelia ឈ្មោះ Georgie Bambridge បានថ្លែងប្រាប់សារព័ត៌មាន BBC ថា បងស្រីរបស់នាង គឺជាមនុស្សម្នាក់ដែលមានស្មារតីរឹងមាំ ហើយនាងតែងផ្ញើសារគ្រប់ពេលទៅគ្រួសារ នៅពេលដែលទូរសព្ទ័នាងមានអ៊ីនធើណេត Wifi ។ នាង Georgie ក៏បានសរសេរបង្ហោះតាម Twitter ដោយបង្ហាញក្តីព្រួយបារម្ភយ៉ាងខ្លាំងអំពីការបាត់ខ្លួនបងស្រីរបស់នាង និងបានអះអាងថា Amelia គឺមានស្នាមសាក់រូបសត្វគោ នៅកំភួនដៃ និងមានស្នាមសាក់រូបសត្វឆ្មា នៅលើជើង ។
បើតាមការអះអាងរបស់ក្រុមរុករក ដែលបែងចែកជា២ក្រុមធំៗ គឺតាមគោក និងតាមទឹក បានដាក់ការសង្ស័យអំពីការបាត់ខ្លួនរបស់នារីរងគ្រោះជាជំហានដំបូងថា អាចដោយសារនាងដើរវង្វេងផ្លូវក្នុងព្រៃនៅលើកោះ ឬក៏អាចលង់ទឹកសមុទ្រ ព្រោះនាឡិកានិងកាបូបដៃ គឺត្រូវបានរកឃើញនៅលើថ្មមាត់ឆ្នេរ ៕
សូមរម្លឹកថា ឃើញតែកាបូបរបស់ស្ត្រីអង់គ្លេសលើផ្ទាំងថ្ម អាជ្ញាធរបន្តស្វែងរក ៤ថ្ងៃហើយគ្មានដំណឹង
