បរទេស៖ ទោះបីជាកូរ៉េខាងត្បូងបច្ចុប្បន្នក្លាយជាប្រទេសអភិវឌ្ឍជឿនលឿនខ្លាំងក៏ដោយ ក៏ប្រជាជនវ័យចំណាស់រាប់រយពាន់នាក់នៅក្នុងប្រទេសនេះកំពុងប្រមូលដប និងក្រដាសដើម្បីរកប្រាក់ចំណូលបន្ថែម ក៏ដូចជាជួយកាត់បន្ថយបន្ទុកលើកូនចៅរបស់ពួកគេ។
ជាការពិតណាស់ ការប្រកបរបររើសអេតចាយគឺកំពុងទទួលបានការចាប់អារម្មណ៍ខ្លាំងពីសំណាក់មនុស្សចាស់ជនជាតិកូរ៉េ នេះបើយោងតាមស្ថិតិដែលចេញផ្សាយដោយក្រសួងសុខាភិបាល និងសុខុមាលភាពកូរ៉េ កាលពីពេលថ្មីៗនេះបានឱ្យដឹងថា ចាប់ពីខែកុម្ភៈ ដល់ខែឧសភា ឆ្នាំ ២០២៤ មានមនុស្សចាស់ជិត ១៥,០០០ នាក់បានប្រមូលដបសំរាម និងក្រដាសសំណល់នៅទូទាំងប្រទេសកូរ៉េ។

ដូច្នេះក្នុងចំណោមមនុស្សចាស់ ៦៥០ នាក់ដែលមានអាយុពី ៦៥ ឆ្នាំឡើងទៅគឺមានមនុស្សច្រើនជាងម្នាក់រើសអេតចាយ។ បើយោងតាមរបាយការណ៍ ទីក្រុងសេអ៊ូលគឺមានចំនួនមនុស្សចាស់ច្រើនជាងគេដែលកំពុងប្រកបរបររើសអេតចាយ ដែលមានចំនួន ២,៥០០ នាក់បន្ទាប់មកគឺខេត្ត Gyeonggi, South Gyeongsang និង Busan។ ហេតុនេះប្រាក់ចំណូលប្រចាំខែជាមធ្យមរបស់ពួកគេ រួមទាំងអត្ថប្រយោជន៍ និងប្រាក់សោធននិវត្តន៍គឺ ៧៦៦,០០០ វ៉ុន (ប្រមាណជាង ៥៥០ ដុល្លារអាមេរិក)។

ទោះយ៉ាងណា របាយការណ៍មិនបានបង្ហាញថាចំណូលនេះបានមកពីការរើសសំរាម ឬយ៉ាងណានោះទេ។ នៅឆ្នាំ ២០២៣ វិទ្យាស្ថានអភិវឌ្ឍន៍កម្លាំងពលកម្មកូរ៉េសម្រាប់មនុស្សចាស់ ដែលជាក្រុមហ៊ុនបុត្រសម្ព័ន្ធរបស់ក្រសួងសុខាភិបាល និងសុខុមាលភាព ក៏បានធ្វើការស្ទង់មតិចំនួន ១០៥ ក្នុងចំណោមហាងប្រមូលសំរាមជិត ៤,៣០០ នៅទូទាំងប្រទេស ដើម្បីប៉ាន់ប្រមាណចំនួនមនុស្សចាស់សរុបដែលចូលរួមក្នុងការប្រមូលសំរាម។

ការសិក្សាបានបង្ហាញថាអាយុជាមធ្យមនៃអ្នករើសអេតចាយគឺ ៧៦ ឆ្នាំ។ ក្នុងចំណោមពួកគេ សមាមាត្រនៃមនុស្សដែលរស់នៅតែម្នាក់ឯងមានច្រើនជាង ៣៦% ។ ជាមធ្យម អ្នកប្រមូលទាំងនេះធ្វើការ ៥.៤ ម៉ោងក្នុងមួយថ្ងៃ និង ៦ ថ្ងៃក្នុងមួយសប្តាហ៍ ហើយក្នុងមួយខែពួកគេរកបាន ១៥៩,០០០ វ៉ុន (ប្រមាណ ១១៤ ដុល្លារអាមេរិក) ដែលប្រាក់ចំណូលនេះគឺត្រឹមតែ ១២% នៃប្រាក់ឈ្នួលអប្បបរមាបច្ចុប្បន្នប៉ុណ្ណោះ។

សព្វថ្ងៃភាពក្រីក្រគឺកំពុងប៉ះពាល់ដល់ប្រជាជនវ័យចំណាស់នៅក្នុងប្រទេសកូរ៉េខាងត្បូង បើទោះបីជាប្រទេសនេះមានសេដ្ឋកិច្ចធំជាងគេទី ១៣ នៅលើពិភពលោក និងប្រាក់ចំណូលសម្រាប់មនុស្សម្នាក់ជិត ៣៣,៨០០ ដុល្លារដែលជាប់ចំណាត់ថ្នាក់ទី ២២ នៅទូទាំងពិភពលោកក៏ដោយ ក៏មនុស្សចាស់ជិត ៥៤% បាននិយាយថាពួកគេប្រមូលសំណល់អេតចាយដើម្បីចិញ្ចឹមជីវិត និងជាង ២៩% បាននិយាយថាពួកគេត្រូវការប្រាក់ក្នុងហោប៉ៅ។

យោងតាមអង្គការសហប្រតិបត្តិការសេដ្ឋកិច្ច និងអភិវឌ្ឍន៍ អត្រានៃភាពក្រីក្ររបស់កូរ៉េខាងត្បូងមានកម្រិត ៤០.៤% ក្នុងឆ្នាំ ២០២០។ តួលេខនេះគឺខ្ពស់បំផុតក្នុងចំណោមសមាជិក OECD ចំនួន ៣៧ និងខ្ពស់ជាង ២.៨ ដងបើធៀបជាមធ្យម ១៤.៤% សម្រាប់ប្រទេសដែលមានសេដ្ឋកិច្ចជឿនលឿនដូចជាសហរដ្ឋអាមេរិក ជប៉ុន អង់គ្លេស បារាំង និងអាល្លឺម៉ង់ផងដែរ៕

ប្រទេសថៃ ៖ សារព័ត៌មានថៃរាយការណ៍ថា មានការចែកចាយវីដេអូមួយក្នុងបណ្តាញសង្គម ដែលមានក្រុមអ្នករត់ម៉ូតូឌុបនៅឃុំប៉ាតង ស្រុកកាធូ ខេត្តភូកេត ប្រទេសថៃ បានព្រួតគ្នាវាយត.ប់ ភ្ញៀវទេសចរបរទេសម្នាក់ រហូតដល់សន្លប់នៅលើផ្លូវមុខហាងល្បីមួយកន្លែង ។ ហេតុការណ៍នេះបានកើតឡើងកាលពីវេលាម៉ោង៣ភ្លឺ ថ្ងៃទី១៥ ខែកក្កដា ឆ្នាំ២០២៤ ។

សមត្ថកិច្ចប្រចាំឃុំប៉ាតង និយាយថា សមត្ថកិច្ចបានទទួលសេចក្តីរាយការណ៍ពីពលរដ្ឋថា មានករណីឈ្លោះប្រកែកគ្នា និងធ្វើបាបរាងកាយនៅមុខហាង CENTRAL នៅផ្លូវរ៉ាជអុថីត ស្ថិតក្នុងឃុំប៉ាតង ដែលបណ្តាលឱ្យបុរសជនបរទេសរងរបួស ។ ហេតុនេះ សមត្ថកិច្ចក៏បញ្ជូនកងកម្លាំងចុះទៅត្រួតពិនិត្យនៅកន្លែងកើតហេតុ ប៉ុន្តែពុំឃើញជនរងគ្រោះទេ ពីព្រោះភ្នាក់ងារសង្គ្រោះបន្ទាន់បានបញ្ជូនទៅកាន់មន្ទីរពេទ្យប៉ាតង រួចរាល់ហើយ ។ រីឯជនរងគ្រោះឈ្មោះ លោក Turky Alazemi អាយុ៣០ឆ្នាំ សញ្ជាតិគុយវ៉ែត ។

ចំណែកជនល្មើសនៅចំណុចកើតហេតុមានគ្នាចំនួន៣នាក់ រួមមាន ៖
១-ឈ្មោះ ចតុផល ភេទប្រុស អាយុ៣៧ឆ្នាំ
២-ឈ្មោះ សៈយ៉ុមភូ ភេទប្រុស អាយុ២៥ឆ្នាំ និង
៣-ឈ្មោះ ថៈណាកន ភេទប្រុស អាយុ២៥ឆ្នាំ ។

សមត្ថកិច្ចក៏បានកត់ត្រាឈ្មោះ និងអាសយដ្ឋានរបស់ពួកគេទុកជាភស្តុតាង ប៉ុន្តែសមត្ថកិច្ចពុំទាន់ចាប់ខ្លួនជនល្មើសទាំង៣នាក់មកសាកសួរភ្លាមៗទេ ដោយរង់ចាំសាកសួរជនរងគ្រោះសិន មុនពេលហៅជនល្មើសមកសាកសួរតាមក្រោយ និងចោទប្រកាន់ពួកគេតាមផ្លូវច្បាប់បន្តទៀត ។ ជនបរទេសដែលត្រូវបានក្រុមម៉ូតូឌុបថៃព្រួតគ្នាវាយនេះ បានចេញពីមន្ទីរពេទ្យមកស្នាក់នៅក្នុងសណ្ឋាគារ និងពុំទាន់មកបង្ហាញខ្លួននៅស្ថានីយប៉ូលិសទេ ។

ក្រោយមក សមត្ថកិច្ចក៏បានហៅជនរងគ្រោះមកសួរនាំ ហើយជនរងគ្រោះនិយាយថា មុនកើតហេតុ ខ្លួនបានបើករថយន្តទៅចតនៅត្រង់ចំណតម៉ូតូឌុប ។ ពេលនោះ អ្នករត់ម៉ូតូហាមមិនឱ្យខ្លួនចតទេ ទើបខ្លួនថតវីដេអូពួកគេ ។ ប៉ុន្តែស្រាប់តែអ្នករត់ម៉ូតូឌុបទាំង៣នាក់ពុំពេញចិត្តនឹងខ្លួនថតវីដេអូ ទើបនាំគ្នាវាយខ្លួនតែម្តង ។

ហេតុនេះ សមត្ថកិច្ចក៏បានហៅជនល្មើសទាំង៣នាក់មកសាកសួរតាមក្រោយ ព្រមទាំងយកភស្តុតាងពីកាមេរ៉ាសុវត្ថិភាពមកឱ្យជនល្មើសមើលផងដែរ ។ សមត្ថកិច្ចបានចោទប្រកាន់ពីបទព្រួតគ្នាធ្វើបាបរាងកាយអ្នកដទៃរហូតរងរបួស ព្រមទាំងបញ្ជូនខ្លួនជនល្មើសទាំង៣នាក់ ទៅកាន់តុលាការខេត្តភូកេត នៅថ្ងៃទី១៦ ខែកក្កដា ។ ជនល្មើសសារភាពថា ដោយសារពួកគេខឹងនឹងភ្ញៀវទេសចររូបនេះចតរថយន្តនៅចំណតរបស់ម៉ូតូឌុប ថែមទាំងថតវីដេអូពួកគេទៀត ។

ហេតុការណ៍នេះធ្វើឱ្យមហាជនជាច្រើននាក់រិះគន់យ៉ាងខ្លាំងពីទង្វើពុំសមរម្យជាមួយភ្ញៀវទេសចរបរទេស ក្នុងនោះពលរដ្ឋថៃម្នាក់និយាយថា ៖ «ពិតជាលក់មុខមាត់ប្រទេសជាតិខ្លាំងណាស់! សមត្ថកិច្ចត្រូវចាប់ជនល្មើសដាក់ទោសដើម្បីកុំឱ្យប្រកបមុខរបរនេះទៀត ពីព្រោះវាធ្វើឱ្យអ្នកប្រកបរបរដូចគ្នាអាម៉ាស់មុខ» ។ រីឯពលរដ្ឋថៃម្នាក់ទៀតថា ៖ «ភ្ញៀវទេសចរបរទេសរូបនេះប្រហែលជារងរបួសមិនស្រាលទេ» ៕

ប្រទេសជប៉ុន ៖ កាលពីថ្ងៃទី១៥ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា អាជ្ញាធរបានប្រទះឃើញសាកស.ព ភ្ញៀវទេសចរចំនួន៤នាក់ ក្រោយពីប្រទេសជប៉ុនអនុញ្ញាតឱ្យពលរដ្ឋ និងភ្ញៀវទេសចរបរទេសមកកម្សាន្តនៅលើភ្នំហ្វូជិ (Fuji) ត្រឹមតែ៦ថ្ងៃប៉ុណ្ណោះ ។ សមត្ថកិច្ចសន្និដ្ឋានថា សាកស.ព ភាគច្រើន គឺបានឡើងលើភ្នំតែម្នាក់ឯង ។

វាជាព័ត៌មានគួរឱ្យរន្ធត់មួយសម្រាប់ភ្ញៀវទេសចរ ដែលមានគម្រោងទៅកម្សាន្តនៅប្រទេសជប៉ុន នៅឆ្នាំ២០២៤ ។ អាជ្ញាធរខេត្តស៊ីហ្ស៊ូអូកា បានអនុញ្ញាតឱ្យភ្ញៀវទេសចរឡើងទៅលើភ្នំហ្វូជិ ចាប់ពីថ្ងៃទី១០ ខែកក្កដា ឆ្នាំ២០២៤ ហើយមានភ្ញៀវទេសចរ និងអ្នកឡើងភ្នំជាច្រើននាក់ចាប់អារម្មណ៍ឡើងភ្នំនេះ ។

នារសៀលថ្ងៃទី១៤ ខែកក្កដា កន្លងមក អាជ្ញាធរបានប្រទះឃើញបុរសម្នាក់អាយុ៦០ឆ្នាំ ដួលក្នុងអំឡុងពេលឡើងលើភ្នំហ្វូជិ ប៉ុន្តែបន្ទាប់មក អាជ្ញាធរបញ្ជាក់ថា បុរសរូបនេះស្លាប់ហើយក្នុងពេលឡើងភ្នំម្នាក់ឯង ។ លោកជាមនុស្សទី៤ ដែលបានស្លាប់ពេលឡើងភ្នំហ្វូជិ ខណៈមុននេះ មានភ្ញៀវទេសចរចំនួន៣នាក់ បានស្លាប់ដោយសារឡើងភ្នំ ។

កាលពីថ្ងៃទី១០ ខែកក្កដា គេបានឃើញសាកសពបុរសម្នាក់អាយុប្រមាណ៧០ឆ្នាំ នៅក្បែរតំបន់ខ្ពស់បំផុតរបស់ភ្នំហ្វូជិ ហើយសមត្ថកិច្ចសន្និដ្ឋានថា រាងកាយសាកសពបានធ្លាក់ពីកម្ពស់៥ម៉ែត្រ ។ នៅថ្ងៃដដែល ក៏មានសាកសពបុរសម្នាក់ទៀតនៅលើផ្លូវ Gotemba មានអាយុ៧៧ឆ្នាំ ដែលមានអាសយដ្ឋាននៅទីក្រុងតូក្យូ ។ រីឯសាកសាកភ្ញៀវទេសចរម្នាក់ទៀត អាជ្ញាធរពុំបានបញ្ជាក់អត្តសញ្ញាណទេ ។

សមត្ថកិច្ចប្រចាំខេត្តស៊ីហ្ស៊ូអូកា និយាយថា កត្តាអាកាសធាតុជាមូលហេតុសំខាន់បណ្តាលឱ្យភ្ញៀវទេសចរស្លាប់ជាបន្តបន្ទាប់ ពីព្រោះអាកាសធាតុនៅលើភ្នំហ្វូជិ បានផ្លាស់ប្តូរគ្រប់ពេលវេលា ។ នៅខែកក្កដា ឆ្នាំ២០២៤ ប្រទេសជប៉ុនប្រឈមនឹងអាកាសធាតុក្តៅខ្លាំង ហើយសមត្ថកិច្ចបានសំណូមពរឱ្យពលរដ្ឋផ្អាកការឡើងភ្នំជាបណ្តោះអាសន្ន ពីព្រោះការឡើងភ្នំត្រូវចំណាយកម្លាំងច្រើន ។

កាលពីសប្តាហ៍ទី២ ខែកក្កដា ឆ្នាំ២០២៤ សីតុណ្ហភាពពេលថ្ងៃនៅលើភ្នំហ្វូជិ ស្មើនឹង៣៣.៦អង្សារសេ ព្រមទាំងមានភ្លៀងធ្លាក់ និងរន្ទះបាញ់ផងដែរ ។ ហេតុនេះ ភ្ញៀវទេសចរពុំគួរចំណាយកម្លាំងឡើងភ្នំខ្ពស់ទេ ដោយសារអាកាសធាតុពុំអំណោយផល ហើយសីតុណ្ហភាពកាន់តែធ្លាក់ចុះ ពេលឡើងជិតដល់កំពូលភ្នំហ្វូជិ ។

សមត្ថកិច្ចបានស្នើឱ្យភ្ញៀវទេសចរពិចារណាពីកត្តាផ្សេងៗឱ្យបានគ្រប់ជ្រុងជ្រោយ ដូចជា ៖ អាកាសធាតុ, សុខភាពរាងកាយ និងសមត្ថភាពដើរក្នុងព្រៃ មុនពេលព្យាយាមឡើងភ្នំ ហើយសូមឱ្យភ្ញៀវទេសចរចាំថា អាកាសធាតុអាចផ្លាស់ប្តូរជានិច្ច ។ ម្យ៉ាងទៀត អ្នកឡើងភ្នំគួរតែធ្វើដំណើរជាមួយមិត្តភក្តិ សម្រាប់ករណីកើតហេតុបន្ទាន់ នឹងអាចជួយគ្នាទាន់ពេលវេលា ៕

តារារ៉េបនិងសម្តែង សញ្ជាតិអាមេរិក លោក Wiz Khalifa ម្ចាស់បទ «See You Again» ត្រូវបានគេរាយការណ៍ថា ត្រូវបានប៉ូ.លីសឃាត់ខ្លួនថ្មីៗនេះ នៅឯប្រទេសរ៉ូម៉ានី ដោយចោទប្រកាន់ថា លោកបានជ.ក់ក.ញ្ឆាអំឡុងពេលការសម្តែងក្នុងមហោស្រពតន្ត្រីនៅទីនោះ។ ស្របពេលដែលច្បាប់ក្នុងប្រទេសរ៉ូម៉ានីបានចែងថា ការប្រើប្រាស់ក.ញ្ឆាគឺជាការខុសច្បាប់ធ្ងន់ធ្ងរ។

កាលពីថ្ងៃទី ១៤ ខែកក្កដា នៅក្នុងសេចក្តីថ្លែងការណ៍ អង្គការរដ្ឋអាជ្ញាប្រឆាំងឧក្រិដ្ឋកម្មរបស់ប្រទេសរ៉ូម៉ានី បានឲ្យដឹងថា តារាចម្រៀងរ៉េបរូបនេះ បានជក់កញ្ឆានៅលើឆាកក្នុងអំឡុងពេលសម្តែងរបស់គាត់។

អាជ្ញាធរបានឲ្យដឹងទៀតថា “ក្នុងអំឡុងពេលសម្តែងនៅឯមហោស្រពតន្ត្រីនោះ ជនជាប់ចោទត្រូវបានគេរកឃើញថាមានថ្នាំញៀនជាង ១៨ ក្រាម និងបារីមូរមួយចំនួនទៀតផងដែរ។ ហើយបើយោងតាមច្បាប់របស់ប្រទេសរ៉ូម៉ានី កញ្ឆាត្រូវបានចាត់ទុកថាជា “ថ្នាំបង្កហានីភ័យខ្ពស់” ហើយប្រសិនបើ Khalifa ត្រូវបានកាត់ទោស គាត់អាចប្រឈមមុខនឹងការជាប់ពន្ធនាគាររហូតដល់ ១០ ឆ្នាំ។

នៅថ្ងៃបន្ទាប់ Wiz បានបង្ហោះនៅលើបណ្តាញសង្គម X ដើម្បីសុំទោសអ្នកគាំទ្ររបស់គាត់ ដោយបានគូសបញ្ជាក់ថា«កម្មវិធីយប់មិញពិតជាអស្ចារ្យខ្លាំងណាស់។ ខ្ញុំមិនមានន័យថាមិនគោរពប្រទេសរ៉ូម៉ានីនៅលើឆាកនោះទេ។ ពួកគេគោរពខ្លាំងណាស់ ហើយអនុញ្ញាតឱ្យខ្ញុំទៅ។ ខ្ញុំនឹងត្រលប់មកវិញឆាប់ៗនេះ»។

ទោះបីគាត់ត្រូវបានចោទប្រកាន់ក៏ដោយ ក៏គាត់ត្រូវបានដោះលែងភ្លាមៗដែរ។ យ៉ាងណាមិញ អាជ្ញាធរកំពុងតែបើកការស៊ើបអង្កេតទៅលើរឿងនេះបន្ថែមទៀត ខណៈដែលរូបភាពជាច្រើនរបស់លោកត្រូវបានផ្តោតលើកញ្ឆាផងដែរ៕

កូរ៉េខាងត្បូង៖ ភូមិបុរាណ Bukchon Hanok គឺជាកន្លែងទេសចរណ៍ដ៏ពេញនិយមបំផុតមួយរបស់ទីក្រុងសេអ៊ូល ដែលទាក់ទាញអ្នកទស្សនារាប់ពាន់នាក់ជារៀងរាល់ថ្ងៃ។ ទោះជាយ៉ាងណា ថ្មីៗនេះអាជ្ញាធរមូលដ្ឋានក្នុងភូមិនេះស្រាប់តែសម្រេចដាក់បម្រាមគោចរភ្លាមៗ ដោយស្វាគមន៍ភ្ញៀវទេសចរមានកំណត់។

យោងតាម CNN មូលហេតុដែលអាជ្ញាធរមូលដ្ឋានភូមិ Bukchon Hanok ដាក់បម្រាមគឺដោយសារបញ្ហាទេសចរណ៍ហួសប្រមាណបានរីករាលដាលពាសពេញទីក្រុង ទើបអាជ្ញាធរកូរ៉េខាងត្បូងបានប្រកាសការគ្រប់គ្រងយ៉ាងតឹងរ៉ឹងដើម្បីការពារភូមិប្រពៃណីប្រវត្តិសាស្ត្រនៅកណ្តាលទីក្រុងសេអ៊ូលឱ្យឆ្ងាយពីហ្វូងភ្ញៀវទេសចរ។ ដូច្នេះភូមិនេះត្រូវបានកំណត់ថាជា “តំបន់គ្រប់គ្រងពិសេស” ដំបូងបង្អស់របស់ប្រទេសក្រោមច្បាប់ផ្សព្វផ្សាយទេសចរណ៍របស់ប្រទេសកូរ៉េខាងត្បូង។

អាស្រ័យហេតុនេះ បម្រាមគោចរនឹងត្រូវអនុវត្តតែលើអ្នកទេសចរប៉ុណ្ណោះ ដោយស្វាគមន៍អ្នកទេសចរមានកំណត់ មានន័យថា ប្រសិនបើភ្ញៀវទេសចរចង់មកទីនេះ ភ្ញៀវត្រូវគោរពពេលវេលាចេញចូលតាមច្បាប់ ដោយបើកឱ្យភ្ញៀវចូលចាប់ពីម៉ោង ១០ ព្រឹកដល់ ៥ ល្ងាចប៉ុណ្ណោះ។ ហើយរថយន្តក្រុងទេសចរណ៍ក៏ត្រូវបានដាក់កម្រិតនៅក្នុងតំបន់មួយចំនួនផងដែរ ដើម្បីកាត់បន្ថយចរាចរណ៍ និងបង្វែរ Bukchon ទៅជាកន្លែងដើរ។ តំបន់ដែលមានកូដពណ៌ចំនួនបី គឺក្រហម ទឹកក្រូច និងលឿង ក៏នឹងត្រូវបានកំណត់ផងដែរ ដើម្បីអនុញ្ញាតឱ្យអាជ្ញាធរមូលដ្ឋានគ្រប់គ្រង ងាយស្រួលតាមដានហ្វូងមនុស្សនៅក្នុងតំបន់ដែលមានប្រជាជនច្រើនបំផុត។

ក្រុមមន្ត្រីបាននិយាយថា អ្នកបំពានក៏នឹងត្រូវពិន័យផងដែរ។ វិធានការរឹតត្បិតទេសចរណ៍ទាំងនេះនឹងត្រូវបានអនុវត្តនៅដើមខែតុលាឆ្នាំនេះ។ យោងតាមទិន្នន័យរបស់រដ្ឋាភិបាលកូរ៉េ ភ្ញៀវទេសចរក្នុងស្រុក និងបរទេសប្រមាណ ៦.៦ លាននាក់បានទៅទស្សនា Bukchon ក្នុងឆ្នាំ ២០២៣។ អស់រយៈពេលជាច្រើនឆ្នាំ ភ្ញៀវទេសចរតែងមកទីនេះច្រើនលើសលប់ និងបង្កបញ្ហាជាមួយប្រជាជនក្នុងតំបន់។ ការត្អូញត្អែរអំពីសំលេងរំខាន ការទុកដាក់សំរាម និងបញ្ហាឯកជនភាពនៅក្នុងសង្កាត់ក៏បានកើនឡើង ដែលនេះបណ្តាលឱ្យអាជ្ញាធរចាប់ផ្តើមចេញបម្រាមហាមឃាត់ភ្ញៀវទេសចរតែម្តង។

នៅក្នុងសង្កាត់ Jongno ក្នុងទីប្រជុំជនទីក្រុងសេអ៊ូល Bukchon នៅជិតកន្លែងសម្គាល់វប្បធម៌ផ្សេងទៀតដូចជាប្រាសាទបុព្វបុរសរាជវង្ស Jongmyo និងវិមានដ៏ធំ Gyeongbokgung និង Changdeokgung ។ តំបន់នេះធ្លាប់ជាកន្លែងសម្រាប់មន្ត្រីជាន់ខ្ពស់ និងពួកអភិជនក្នុងសម័យស្តេច Joseon ដែលគ្រប់គ្រងប្រទេសកូរ៉េពីទសវត្សរ៍ឆ្នាំ ១៣០០ ដល់ឆ្នាំ ១៩១០។ សព្វថ្ងៃនេះ តំបន់នេះមានប្រជាជនរស់នៅប្រហែល ៦,០០០ នាក់ ក៏ដូចជាអាជីវកម្ម ផ្ទះសំណាក់ ហាងសិប្បកម្ម និងហាងកាហ្វេ រួមទាំងទីតាំងថតរូបលេចធ្លោមួយចំនួន៕

ប្រទេសជប៉ុន ៖ នេះជាបន្ទប់ស្នាក់នៅក្នុងសណ្ឋាគារមានតម្លៃថោកបំផុតនៅប្រទេសជប៉ុន ដែលមានតម្លៃត្រឹមតែ១៣០យេនប៉ុណ្ណោះក្នុង១យប់ (ឬស្មើប្រមាណ៣.០០០រៀល) ប៉ុន្តែភ្ញៀវស្នាក់នៅត្រូវតែអនុញ្ញាតឱ្យសណ្ឋាគារផ្សាយផ្ទាល់ (Live) គ្រប់សកម្មភាពទាំងអស់របស់ភ្ញៀវពេលស្នាក់នៅក្នុងបន្ទប់ ។

សណ្ឋាគារនេះឈ្មោះ Business Ryokan Asahi ស្ថិតនៅពុំឆ្ងាយពីតំបន់កម្សាន្ត Tenjin, Fukuoka ហើយភ្ញៀវទេសចរនឹងចំណាយពេលធ្វើដំណើរត្រឹមតែ១៥នាទីប៉ុណ្ណោះ ។ ការស្នាក់នៅក្នុងសណ្ឋាគារនេះមានតម្លៃថោកបំផុត បើធៀបនឹងសណ្ឋាគារផ្សេងទៀតនៅប្រទេសជប៉ុន ប៉ុន្តែអ្វីដែលភ្ញៀវត្រូវយល់ព្រមមុនពេលចូលស្នាក់នៅនោះ គឺអនុញ្ញាតឱ្យសណ្ឋាគារផ្សាយផ្ទាល់ក្នុងបន្ទប់ស្នាក់នៅរបស់ភ្ញៀវគ្រប់ពេលវេលាក្នុងប្រព័ន្ធយូធូបរបស់សណ្ឋាគារ ។

ភ្ញៀវមកស្នាក់នៅក្នុងសណ្ឋាគារនេះ ពុំចាំបាច់ជាបុគ្គលល្បីល្បាញក្នុងសង្គម ឬ Influencer ឡើយ គឺភ្ញៀវគ្រាន់តែចូលស្នាក់នៅក្នុងបន្ទប់សណ្ឋាគារតាមធម្មតា និងកុំភ្លេចថា សណ្ឋាគារកំពុងតែផ្សាយផ្ទាល់ពីបន្ទប់របស់ពួកគេ ។ សណ្ឋាគារបញ្ជាក់ថា វាមិនពិបាកទេ សម្រាប់ភ្ញៀវដែលចង់ស្នាក់នៅក្នុងបន្ទប់តម្លៃថោកបែបនេះ ។

ពេលភ្ញៀវមកដល់បន្ទប់ បុគ្គលិកសណ្ឋាគារនឹងប្រគល់កូនសោរបន្ទប់ និងប្រាប់ថា ក្នុងបន្ទប់មានបំពាក់កាមេរ៉ាសម្រាប់ផ្សាយផ្ទាល់ពីសកម្មភាពភ្ញៀវគ្រប់ពេលវេលា ។ ចំណុចសំខាន់មួយដែលភ្ញៀវគួរតែចងចាំនោះ គឺហាមដោះសម្លៀកបំពាក់ក្នុងបន្ទប់ដាច់ខាត ។

បន្ទប់នេះមានលក្ខណៈស្រដៀងគ្នានឹងបន្ទប់ទទួលភ្ញៀវធម្មតារបស់ជប៉ុន ក្នុងនោះមានសម្លៀកបំពាក់, កម្រាលពូក, តុតូច, ទូរទស្សន៍, កាំសៀវដាំទឹក និងសម្ភារៈផ្សេងទៀត ។ វាជាបន្ទប់ស្អាត និងទទួលបានការថែទាំយ៉ាងល្អ ហើយវត្ថុប្លែកក្នុងបន្ទប់នេះ គឺភ្ញៀវអាចបោះលុយកាក់ក្នុងប្រឡោះម៉ាស៊ីនត្រជាក់ ដែលមានតម្លៃ៣.០០០រៀល ។

ចំណែកកាមេរ៉ាសម្រាប់ផ្សាយផ្ទាល់បានបែរមុខមកចំណុចកណ្តាលបន្ទប់សណ្ឋាគារ ប៉ុន្តែនៅទីនេះ គ្មានបន្ទប់ទឹកដូចបន្ទប់ស្នាក់នៅផ្សេងទៀតទេ គឺភ្ញៀវអាចទៅប្រើប្រាស់បន្ទប់ទឹករួមគ្នាជាមួយភ្ញៀវផ្សេងទៀត ។ បើទោះជាសណ្ឋាគារផ្សាយផ្ទាល់ពីសកម្មភាពរបស់ភ្ញៀវក្តី ប៉ុន្តែគ្មានការថតសំឡេងទេ ដើម្បីចៀសវាងការបើកចម្រៀងខុសកម្មសិទ្ធិបញ្ញា ។

សរុបមក តម្លៃស្នាក់នៅក្នុងបន្ទប់សណ្ឋាគារនេះ ស្មើត្រឹមតែ១៣០យេនប៉ុណ្ណោះក្នុង១យប់ (ឬស្មើប្រមាណ៣.០០០រៀល) ។ ចុះលោកអ្នកវិញ តើហ៊ានស្នាក់នៅក្នុងបន្ទប់សណ្ឋាគារនេះទេ ដើម្បីទទួលបានតម្លៃថោក?