យោងតាមក្រុមហ៊ុនស្រាវជ្រាវ IDC ដែលរាយការណ៍កាលពីថ្ងៃទី១៦ ខែកក្កដាថា ទីផ្សារស្មាតហ្វូនរបស់ពិភពលោកនាពេលបច្ចុប្បន្ននេះគឺបានកើនឡើងរហូតដល់ ៦.៥% ដល់ ២៨៥.៤ លាននៅក្នុងត្រីមាសទី ២ នៃឆ្នាំ ២០២៤ បើធៀបនឹងរយៈពេលដូចគ្នាកាលពីឆ្នាំមុន។ ដោយចំនួនទូរស័ព្ទដែលបានដឹកជញ្ជូនចេញរបស់ក្រុមហ៊ុនធំៗទាំង ៥ ក៏មានចំនួនច្រើនជាងមុនផងដែរ។

ហេតុនេះបើតាមរបាយការណ៍ Counterpoint Research បានកត់ត្រាតួលេខ ៦% ហើយបានវាយតម្លៃថានេះគឺជាការកើនឡើងប្រចាំឆ្នាំដ៏ល្អបំផុតចាប់តាំងពីត្រីមាសទីពីរនៃឆ្នាំ ២០២១ មក។ លោក Tarun Pathak នាយកក្រុមហ៊ុន Counterpoint បានមានប្រសាសន៍ថា “ការផលិតស្មាតហ្វូនគឺមានកម្រិតទាបបំផុតក្នុងរយៈពេលមួយទសវត្សរ៍ជាពិសេសគឺក្នុងឆ្នាំ២០២៣ ប៉ុន្តែនៅឆ្នាំនេះទីផ្សារកំពុងងើបឡើងវិញដោយសារការកែលម្អអារម្មណ៍អ្នកប្រើប្រាស់ និងស្ថានភាពសារពើភ័ណ្ឌ”។

ទន្ទឹមនឹងនេះ លោក Nabila Popal នាយកស្រាវជ្រាវនៃក្រុមអ្នកតាមដានទូទាំងពិភពលោករបស់ IDC បានអត្ថាធិប្បាយថាទីផ្សារមាននិន្នាការនៃបុព្វលាភដោយ Apple និង Samsung កំពុងទទួលបានអត្ថប្រយោជន៍ច្រើនបំផុត។ លើសពីនេះ ស្មាតហ្វូនដែលមាន AI ជំនាន់ថ្មី ក៏ត្រូវបានគេរំពឹងថានឹងដណ្តើមបាន ១៩% នៃទីផ្សារនៅឆ្នាំនេះ ដែលជាការកើនឡើងលឿនបំផុតសម្រាប់ការច្នៃប្រឌិតទូរស័ព្ទដែល IDC មិនធ្លាប់មាន។ ខណៈពេលដែល Apple និង Samsung ផ្តោតលើផ្នែកដែលមានតម្លៃខ្ពស់ ក្រុមហ៊ុនផលិតស្មាតហ្វូនឈានមុខគេជាច្រើនរបស់ចិនក៏បានបង្កើនចំនួនផលិតផលនៅក្នុងផ្នែកដែលមានតម្លៃទាបផងដែរ ដើម្បីចាប់យកចំណែកទីផ្សារនៅក្នុងបរិបទនៃអ្នកប្រើប្រាស់កំណត់ការចំណាយ។

ដូច្នេះ Xiaomi គឺជាក្រុមហ៊ុនដែលរីកលូតលាស់លឿនបំផុតក្នុងចំណាត់ថ្នាក់កំពូលទាំង ៥ ជាមួយនឹង ២៧.៤% និងមានចំណែកទីផ្សារ ១៤.៨% នៅក្នុងត្រីមាសចុងក្រោយនេះ ដោយជាប់ចំណាត់ថ្នាក់លេខ ៣ នៅលើពិភពលោក ដោយសារភាពពេញនិយមនៃស៊េរី Redmi 13 និង Note 13 ។ ហើយក្រុមហ៊ុន Huawei ក៏ជាក្រុមហ៊ុនដែលមានការងើបឡើងវិញខ្លាំងបំផុតក្នុងចំណោមម៉ាកយីហោរបស់ចិនផងដែរ ដែលឈានដល់ ៦៩.៧% ធៀបនឹងរយៈពេលដូចគ្នាកាលពីឆ្នាំមុន។ ទោះជាយ៉ាងណាក៏ដោយ ទិន្នផលទូរស័ព្ទរបស់ក្រុមហ៊ុននេះគឺមិនមានទំហំធំល្មមនឹងស្ថិតក្នុងម៉ាកយីហោកំពូលទាំង ៥ នោះទេ៕

ប្រទេសវៀតណាម ៖ សារព័ត៌មានបរទេសបានរាយការណ៍កាលពីថ្ងៃទី១៥ ខែកក្កដា ឆ្នាំ២០២៤ ថា ក្រុមហ៊ុនផលិតរថយន្តអគ្គិសនីវៀតណាមឈ្មោះ VinFast ប្រកាសថា នឹងពន្យារពេលបើកដំណើរការរោងចក្រនៅសហរដ្ឋអាមេរិក រយៈពេល៣ឆ្នាំទៀត ព្រមទាំងកាត់បន្ថយគោលដៅលក់រថយន្តប្រចាំឆ្នាំផងដែរ ។

ក្រុមហ៊ុន VinFast បានប្រកាសថា នឹងពន្យារពេលបើកដំណើរការរោងចក្រផលិតរថយន្តអគ្គិសនីនៅរដ្ឋ North Carolina សហរដ្ឋអាមេរិក រយៈពេល៣ឆ្នាំទៀត គឺរហូតដល់ឆ្នាំ២០២៨ ។ ការសម្រេចចិត្តពន្យារពេលនេះឆ្លុះបញ្ចាំងពីបញ្ហាប្រឈមរបស់ក្រុមហ៊ុនវៀតណាម ក្នុងការក្លាយជាក្រុមហ៊ុនប្រេនលំដាប់ពិភពលោក ។

ក្រុមហ៊ុនបញ្ជាក់ថា ការពន្យារពេលបើកដំណើរការរោងចក្រនឹងជួយក្រុមហ៊ុនអាចគ្រប់គ្រងការចំណាយថវិការយៈពេលខ្លីឱ្យកាន់តែមានប្រសិទ្ធភាព និងផ្តោតទៅលើធនធានសម្រាប់គោលដៅរីកចម្រើនរបស់ក្រុមហ៊ុននាថ្ងៃអនាគត ។ ក្រៅពីនេះ ក្រុមហ៊ុនក៏បានកាត់បន្ថយគោលដៅលក់រថយន្តប្រចាំឆ្នាំផងដែរ គឺពីចំនួន១សែនគ្រឿង មកស្មើត្រឹម៨ម៉ឺនគ្រឿងប៉ុណ្ណោះ ។

Le Thi Thu Thuy ជានាយកគ្រប់គ្រងក្រុមហ៊ុន VinFast និយាយថា ក្រុមហ៊ុនបានកែសម្រួលទស្សនវិស័យដើម្បីសម្របតាមការប្រែប្រួលទីផ្សារ និងបញ្ហាប្រឈមដែលអាចកើតឡើង ។ ការពន្យារពេលបើកដំណើរការរោងចក្រនេះបង្ហាញថា VinFast កំពុងប្រឈមនឹងឧបសគ្គដើម្បីក្លាយជាក្រុមហ៊ុនផលិតរថយន្តអគ្គិសនីវាយលុកទីផ្សាររថយន្តអគ្គិសនីលើពិភពលោក ដែលបានធ្លាក់ចុះកាលពីឆ្នាំ២០២៣ ។

របាយការណ៍ Electric Vehicle Outlook របស់ BloombergNEF បានកាត់បន្ថយបរិមាណការលក់រថយន្តអគ្គិសនីលើពិភពលោក មកស្មើត្រឹមតែ៦លាន៧សែនគ្រឿង នៅត្រឹមឆ្នាំ២០២៦ ។ រីឯក្រុមហ៊ុនផលិតរថយន្តធំៗជាច្រើន ដូចជា ៖ Ford, General Motors, Volkswagen និង Tesla ក៏បានកាត់បន្ថយគោលដៅផលិតរថយន្តដូចគ្នាដែរ ។

ក្រោយពីបានចាប់ផ្តើមលក់រថយន្តអគ្គិសនីយ៉ាងលេចធ្លោនៅអាមេរិកកាលពីសីហា ឆ្នាំ២០២៣ តម្លៃភាគហ៊ុនរបស់ក្រុមហ៊ុន VinFast បានកើនឡើងខ្ពស់រហូតដល់ជាង+៧០០% ត្រឹមតែរយៈពេល២សប្តាហ៍ប៉ុណ្ណោះ ។ ប៉ុន្តែបច្ចុប្បន្ន តម្លៃភាគហ៊ុនរបស់ក្រុមហ៊ុនដែលពុំអាចស្វែងរកប្រាក់ចំណេញនោះ បានធ្លាក់ចុះរហូតដល់ -៩០% ពីចំណុចខ្ពស់បំផុត ។

ទោះយ៉ាងណា ក្រុមហ៊ុន VinFast បានរៀបចំគម្រោងផ្តោតទៅលើការចាប់យកឱកាសរយៈពេលខ្លីក្នុងទីផ្សារដ៏មានសក្តានុពល ដើម្បីគ្រប់គ្រងការចំណាយដើមទុន និងធនធានឱ្យបានត្រឹមត្រូវ ព្រមទាំងកាត់បន្ថយហានិភ័យយ៉ាងមានប្រសិទ្ធភាពផងដែរ ៕

ប្រទេសថៃ ៖ កាលពីថ្ងៃទី១៦ ខែកក្កដា ឆ្នាំ២០២៤ សារព័ត៌មានថៃរាយការណ៍ថា មានហេតុការណ៍មួយកើតឡើងបណ្តាលឱ្យភ្ញាក់ផ្អើលនៅកណ្តាលទីក្រុងបាងកក គឺបុគ្គលិកសណ្ឋាគារបានឃើញជនជាតិវៀតណាមចំនួន៦នាក់ ដេកស្លាប់ក្នុងបន្ទប់សណ្ឋាគារប្រណីតនៅតំបន់រ៉ាជប្រាស៊ុង ហើយក្នុងចំណោមនេះ សាកស.ព ២នាក់ មានសញ្ជាតិអាមេរិក ។ ជុំវិញហេតុការណ៍នេះ លោកនាយករដ្ឋមន្ត្រីថៃថ្លែងថា វានឹងពុំប៉ះពាល់ដល់វិស័យទេសចរណ៍ទេ ដោយសារមិនមែនជាករណីប្ល.ន់ ទ្រព្យសម្បត្តិ ។

នៅក្នុងបន្ទប់កើតហេតុ សាកសពជនជាតិវៀតណាមចំនួន៤នាក់ បានស្លាប់នៅបរិវេណតុអាហារ រីឯសាកសព២នាក់ទៀតស្លាប់ក្នុងបន្ទប់សម្រាក ។ ជំហានដំបូង សមត្ថកិច្ចថៃសន្និដ្ឋានថា មូលហេតុនៃការស្លាប់ គឺមានបុគ្គលផ្សេងទៀតលួចដាក់ថ្នាំបំពុលពួកគេក្នុងភេសជ្ជៈ ពីព្រោះគ្មានស្លាកស្នាមការវាយតប់គ្នា ឬអំពើហិង្សាក្នុងបន្ទប់ស្នាក់នៅទេ ។

សមត្ថកិច្ចបានបង្ហាញអត្តសញ្ញាណសាកសពជនជាតិវៀតណាមទាំង៦នាក់ រួមមាន ៖
១-អ្នកស្រី SHERINE CHONG អាយុ៥៦ឆ្នាំ សញ្ជាតិអាមេរិក
២-លោក HUNG DANG VAN អាយុ៥៥ឆ្នាំ សញ្ជាតិអាមេរិក
៣-អ្នកស្រី THI NGUYEN PHUONG LAN អាយុ៤៧ឆ្នាំ សញ្ជាតិវៀតណាម
៤-លោក HONG PHAM THANH អាយុ៤៩ឆ្នាំ សញ្ជាតិវៀតណាម
៥-លោក DINH TRAN PHU អាយុ៣៧ឆ្នាំ សញ្ជាតិវៀតណាម និង
៦-អ្នកស្រី THI NGUYEN PHUONG សញ្ជាតិវៀតណាម ។

លោកឧត្តមសេនីយ៍ឯក ធិទិ ស៊ែងសាវ៉ាង ស្នងការនគរបាលប្រចាំក្រុងបាងកក និយាយថា តាមរយៈការត្រួតពិនិត្យនៅកន្លែងកើតហេតុឃើញថា គ្មានស្លាកស្នាមការវាយតប់គ្នាទេ ហើយជនជាតិវៀតណាមទាំងនេះបានស្លាប់ក្នុងបន្ទប់តែមួយ ។ ពួកគេមានគម្រោង Check out ចេញពីបន្ទប់សណ្ឋាគារ នៅថ្ងៃទី១៦ ខែកក្កដា ឆ្នាំ២០២៤ ព្រមទាំងបានរៀបចំអីវ៉ាន់ដាក់វ៉ាលិសរួចរាល់ហើយ ។ ជំហានបន្ទាប់ សមត្ថកិច្ចនឹងធ្វើការពិសោធន៍សាកសពឱ្យបានលម្អិត និងត្រួតពិនិត្យភស្តុតាងពាក់ព័ន្ធទាំងអស់ ។

ចំណែកលោកឧត្តមសេនីយ៍ទោ ធីរ៉ាឌេត ថាំសុធី មេបញ្ជាការផ្នែកស៊ើបអង្កេតប្រចាំក្រុងបាងកក និយាយថា សាកសពក្នុងបន្ទប់សណ្ឋាគារនៅទីក្រុងបាងកក គឺមានបុរស៣នាក់ និងស្ត្រី៣នាក់ ដែលពួកគេជាជនជាតិវៀតណាមទាំងអស់ ក្នុងនោះសាកសព២នាក់ មានសញ្ជាតិអាមេរិក ។ តាមការស៊ើបអង្កេតជំហានដំបូងឃើញថា ពួកគេអាចត្រូវគេលួចដាក់ថ្នាំបំពុលក្នុងទឹកតែ និងកាហ្វេ ។

បើតាមបុគ្គលិកផ្នែកបោសសម្អាតសណ្ឋាគារខាងលើនិយាយថា ដោយសារសង្ស័យ ខ្លួនក៏មកពិនិត្យនៅបន្ទប់កើតហេតុ ពីព្រោះជនជាតិវៀតណាមទាំងនេះដល់ពេលវេលា Check out ចេញពីបន្ទប់សណ្ឋាគារហើយ ប៉ុន្តែខ្លួនពុំឃើញពួកគេចាកចេញសោះ ។

បន្ទាប់មក នាយករដ្ឋមន្ត្រីថៃ លោក ស្រេតថា ថាវីស៊ីន ក៏បានធ្វើដំណើរមកកាន់សណ្ឋាគារកើតហេតុនៅតំបន់រ៉ាជប្រាស៊ុង ព្រមជាមួយមន្ត្រីរដ្ឋាភិបាលមួយចំនួនទៀត ហើយលោកថ្លែងថា បើពិនិត្យនៅទីតាំងកើតហេតុនេះ គឺគ្មានអំពើប្លន់ទ្រព្យសម្បត្តិ ឬអំពើហិង្សាកើតឡើងទេ ។ ការសន្និដ្ឋានជំហានដំបូង គឺអាស្រ័យលើការពិនិត្យសាកសពទាំងអស់ ព្រមទាំងពិនិត្យភស្តុតាងផ្សេងៗដើម្បីសន្និដ្ឋានថា តើពួកគេបានបរិភោគអ្វីដែរឬទេ? ទោះយ៉ាងណា យើងសូមបញ្ជាក់ថា ហេតុការណ៍នេះពុំពាក់ព័ន្ធនឹងអំពើប្លន់ធ្វើបាបរាងកាយទេ ។

លោកនាយករដ្ឋមន្ត្រីថៃបន្តថា បើតាមសន្និដ្ឋានរបស់សមត្ថកិច្ចថា គឺអាចមានជនជាតិវៀតណាមម្នាក់ទៀតពាក់ព័ន្ធនឹងហេតុការណ៍នេះ ហើយសមត្ថកិច្ចពុំទាន់រកឃើញនៅឡើយ ។ ដូច្នេះ វានឹងពុំប៉ះពាល់ដល់វិស័យទេសចរណ៍ប្រទេសថៃទេ ហើយមុននេះ លោកក៏បានជជែកជាមួយមន្ត្រីទូតវៀតណាមរួចហើយ និងបានជម្រាបព័ត៌មាននេះទៅមន្ត្រីទូតវៀតណាម ។

ក្រោយមក សមត្ថកិច្ចក៏បានរកឃើញភស្តុតាងបន្ថែមទៀត និងបង្ហាញម្ហូបអាហារនៅលើតុក្នុងបន្ទប់សណ្ឋាគារដែលជនជាតិវៀតណាមទាំងនេះកុម្ម៉ង់មកបរិភោគ ប៉ុន្តែពួកគេពុំទាន់បានបរិភោគអាហារនៅឡើយទេ មុនពេលស្លាប់ ៕

សម្រាប់អ្នកដែលចូលចិត្តការផ្សងព្រេង ឬចូលចិត្តធ្វើការនៅកន្លែងឆ្ងាយ ស្ងប់ស្ងាត់អាចមកធ្វើការនៅ Port Lockroy បានដែលវាមានទីតាំងស្ថិតនៅលើកោះ Goudier ភាគខាងលិចនៃឧបទ្វីបអង់តាក់ទិករបស់ចក្រភពអង់គ្លេស។ Port Lockroy ត្រូវបានគេស្គាល់ថាជា “ការិយាល័យប្រៃសណីយ៍ដាច់ស្រយាលបំផុតនៅលើពិភពលោក” ។ ដំបូងឡើយកន្លែងនេះត្រូវបានសាងសង់ឡើងក្នុងគោលបំណងគាំទ្រការស្រាវជ្រាវវិទ្យាសាស្ត្រ បន្ទាប់មកត្រូវបិទទ្វារ ហើយនៅឆ្នាំ ១៩៩៦ វាក៏ត្រូវបានស្ដារឡើងវិញជាការិយាល័យប្រៃសណីយ៍ និងសារមន្ទីរតែម្តង។

ការិយាល័យប្រៃសណីយ៍ និងជាសារមន្ទីរនេះបានប្រកាសជ្រើសរើសបុគ្គលិកគ្រប់ជាតិសាសន៍ចំនួន ៤ នាក់ជារៀងរាល់ឆ្នាំ ដែលអាចរស់នៅនិងធ្វើការនៅទីនេះបានជាមួយនឹងភារកិច្ចដូចជា៖ លក់កាតប៉ុស្តាល់ ត្រា និងលក់វត្ថុអនុស្សាវរីយ៍សម្រាប់ភ្ញៀវទេសចរ។ តាមដានចំនួនសត្វភេនឃ្វីននៅក្នុងតំបន់; ប្រមូលទិន្នន័យអាកាសធាតុ និងលក្ខខណ្ឌបរិស្ថានផ្សេងទៀត ហើយរក្សា ក៏ដូចជាជួយសម្អាតការិយាល័យប្រៃសណីយ៍ផងដែរ។ លើសពីនេះតម្រូវការសម្រាប់និយោជិតគឺត្រូវមានសុខភាពល្អ ក្លាហាន និងអាចសម្របខ្លួនបានយ៉ាងងាយស្រួលនៅតំបន់ត្រជាក់ និងដាច់ស្រយាល។

ពួកគេនឹងរស់នៅជាមួយគ្នាក្នុងផ្ទះ Nissen នៅលើច្រាំងថ្មចោទគ្មានទឹកប្រើប្រាស់ គ្មានអ៊ីនធឺណិត ឬទូរស័ព្ទដៃឡើយ។ ក្រៅពីនេះពួកគេក៏ប្រហែលជាត្រូវធ្វើការ ១២ ម៉ោងក្នុងមួយថ្ងៃក្នុងសីតុណ្ហភាពជាមធ្យមពី -15°C ដល់ 5°C ហើយមិនមានពេលសម្រាកច្រើននោះទេ។ ជីវិតហាក់ដូចជាដាច់ដោយឡែកពីពិភពលោកទាំងស្រុង ដោយសារនៅទីនេះគឺកង្វះគ្រឿងបរិក្ខារ អាកាសធាតុដ៏អាក្រក់ និងសូម្បីតែការប្រឈមមុខនឹងសត្វព្រៃក៏មិនមែនជាបញ្ហាប្រឈមតូចតាចដែរ។ ប៉ុន្តែប្រាក់ខែសម្រាប់ការងារនេះក៏មានភាពទាក់ទាញខ្លាំងផងដែរគឺមួយខែចាប់ពី ១,៦០០ ទៅ ២,៣០០ ដុល្លារអាមេរិកឡើងទៅ។

គួរបញ្ជាក់ដែរថា Port Lockroy មានទីតាំងស្ថិតនៅក្នុងភូមិសាស្ត្រពិសេសមួយ ដែលមានចម្ងាយរាប់ពាន់គីឡូម៉ែត្រពីដីគោក ហើយអាចទៅដល់បានដោយកប៉ាល់ក្នុងរយៈពេលដ៏ខ្លីចាប់ពីខែវិច្ឆិកា ដល់ខែមីនា ជារៀងរាល់ឆ្នាំ។ ការិយាល័យប្រៃសណីយ៍ទទួលភ្ញៀវប្រហែល ១៨,០០០ នាក់ ដែលមាននាវាចំនួន ២ ទស្សនាជារៀងរាល់ថ្ងៃ និងទំនិញ ៧០,០០០ ផ្ញើតាមប្រៃសណីយ៍។ ដូច្នេះប្រសិនបើអ្នកចូលចិត្តរុករក និងបទពិសោធន៍ទឹកដីថ្មី ហើយចង់បង្កើតអ្វីដែលមានន័យ ការងារនៅ Port Lockroy គឺជាការផ្តល់យោបល់ដ៏ល្អបំផុតមួយ។ ប្រសិនបើអ្នកមានបំណងចង់ដាក់ពាក្យអាចចូលរកមើលគេហទំព័រ UK Antarctic Heritage Trust (UKAHT)៕