ថ្មីៗនេះ នៅឯប្រទេសវៀតណាម គឺបានលេចចេញនូវករណីកុមារអាយុ៣ខួប ម្នាក់បានបាត់.បង់.ជីវិត បន្ទាប់ពីរូបគេត្រូវបានឆ្មាខាំកាលពីមួយខែមុន ហើយបើតាមការបញ្ជាក់ពីមន្ត្រីសុខាភិបាលបានឲ្យដឹងថា កុមាររូបនេះ.ស្លា.ប់.ព្រោះតែឆ្លងជ.ម្ងឺឆ្កែឆ្កួ.ត។

កាលពីថ្ងៃទី ១៧ ខែកក្កដា ឆ្នាំ២០២៤ យោងតាមប្រភពសារព័ត៌មាន VN Express បានឲ្យដឹងងថា មានក្មេងប្រុសអាយុ៣ ខួប ដែលមានឈ្មោះថា K.K. រស់នៅក្នុងខេត្ត Gia Lai ប្រទេសវៀតណាម បានទទួលមរណៈភាព ដោយសារជំងឺឆ្កែឆ្កួតកាលពីថ្ងៃ១៥ ខែកក្កដា បន្ទាប់ពីក្មេងប្រុសម្នាក់នេះ ត្រូវបានសត្វឆ្មាខាំប្រហែលមួយខែមុន។

គ្រួសាររបស់ក្មេងប្រុសរូបនេះបានសម្តែងនូវការសោកស្តាយនិងមានវិប្បដិសារីជាខ្លាំង ដែលមិនបាននាំគាត់មកមន្ទីរពេទ្យ កាលពីអំឡុងពេលនោះ ព្រោះតែគិតថាមិនអី គ្រាន់តែសត្វឆ្មាខាំធម្មតាៗប៉ុណ្ណោះ។ ប៉ុន្តែលុះក្រោយៗមកទៀត ក្មេងប្រុសរូបនេះក៏បានបញ្ចេញអាការៈកាន់តែធ្ងន់ធ្ងរឡើងៗ គឺក្អួតមិនឈប់សោះរយៈពេលជាច្រើនថ្ងៃ។ លុះរហូតដល់ថ្ងៃទី ១៤ ខែកក្កដា ទើបក្រុមគ្រួសារបានបញ្ជូនគាត់មកកាន់មន្ទីរពេទ្យខេត្ត ដើម្បីទទួលការព្យាបាល។

ប៉ុន្តែ អ្វីៗវាបានហួសពេលទៅហើយ បន្ទាប់ពីវេជ្ជបណ្ឌិតជំនាញបានពិនិត្យ និងវិនិច្ឆ័យរួចមក ក៏បានរកឃើញថា ក្មេងប្រុសវ័យ ៣ឆ្នាំម្នាក់នេះបានកើតមានជំងឺឆ្កែឆ្កួតទៅហើយ ដែលឆ្លងមេរោគរីករាលដាលដល់ក្រពះពោះវៀន និងធ្វើឲ្យមានការខ្សោះជាតិទឹកខ្លាំង។ យ៉ាងណាមិញ លុះដឹងស្ថានភាពថាក្មេងប្រុសនេះមិនអាចព្យាបាលបាន គ្រួសារក៏សម្រេចចិត្តនាំគាត់ត្រឡប់ទៅផ្ទះវិញ ហើយគាត់គឺធ្វើទុក្ខខ្លាំងណាស់ ដូចជាស្រែកយំ ពិបាកបរិភោគឬផឹក; ស្រក់ទឹកមាត់ខ្លាំង; មានការភ័យខ្លាចជាមួយនឹងពន្លឺ ខ្យល់ និងទឹក; និងឈឺក្បាលខ្លាំងជាដើម។ ខណៈសេចក្តីរាយការណ៍ កាលពីថ្ងៃទី ១៥ ខែកក្កដានេះថា ក្មេងប្រុសរូបនេះបានទទួលមរណភាពហើយ។

គួរបញ្ជាក់ដែរថា មធ្យោបាយតែមួយគត់ដើម្បីការពារជំងឺឆ្កែឆ្កួត គឺត្រូវទទួលថ្នាំបង្ការឬវ៉ាក់សាំងភ្លាមៗ បន្ទាប់ពីត្រូវបានសត្វឆ្កែ ឆ្មា ឬសត្វព្រៃមួយចំនួនទៀតខាំ ក៏ដូចជាត្រូវទៅទទួលការពិគ្រោះជាមួយនឹងគ្រូពេទ្យឲ្យបានល្អិតល្អន់។ ខណៈប្រសិនបើរោគសញ្ញាជំងឺឆ្កែឆ្កួតលេចឡើង អត្រាមរណភាពគឺកើតមានរហូតដល់ទៅ ១០០% ។ ទោះជាយ៉ាងណា នេះគឺជាក្មេងប្រុសទី៤ ហើយដែលបានស្លាប់ ដោយសារតែជម្ងឺឆ្កែឆ្កួតនៅក្នុងខេត្ត Gia Lai ក្នុងឆ្នាំ ២០២៤នេះ៕

ទីក្រុង Hoi An របស់ប្រទេសវៀតណាមត្រូវបានគេហទំព័រទេសចរណ៍អាមេរិក Travel + Leisure ផ្តល់កិត្តិយសថាជាទីក្រុងស្អាតបំផុតនៅលើពិភពលោកក្នុងឆ្នាំ ២០២៤។
យោងតាមការគេហទំព័រនេះបានឱ្យដឹងថាទីក្រុង Hoi An ជាប់ចំណាត់ថ្នាក់លេខ ៤ ក្នុងចំណាត់ថ្នាក់ទីក្រុងស្អាតបំផុតទាំង ២៥ នៅលើពិភពលោកក្នុងឆ្នាំ ២០២៤ ដោយទទួលបាន ៩០.៦៧ ពិន្ទុក្នុងចំណោម ១០០ បន្ទាប់ពីទីក្រុង San Miguel de Allende នៃប្រទេសម៉ិកស៊ិក, ទីក្រុង Udaipur ប្រទេសឥណ្ឌា និងទីក្រុង Kyoto នៃប្រទេសជប៉ុន។

ទីក្រុងបុរាណ Hoi An គឺជាគោលដៅទេសចរណ៍ដ៏ល្អបំផុតសម្រាប់អ្នកដែលចូលចិត្តដើរញ៉ាំអាហារប្លែកៗមានរសជាតិឈ្ងុយឆ្ងាញ់ដូចជា កាវឡៅ បាញម៉ៃ និងអ្នកចូលចិត្តប្រវត្តិសាស្ត្រ។ ទីក្រុងនេះមានចម្ងាយ ៣០ គីឡូម៉ែត្រពីអាកាសយានដ្ឋានអន្តរជាតិ Da Nang ងាយស្រួលសម្រាប់ការធ្វើដំណើរ និងទស្សនា។ នៅក្នុងក្រសែភ្នែកភ្ញៀវទេសចរអន្តរជាតិ និងអ្នកជំនាញទេសចរណ៍ “វាមិនចម្លែកទេដែល Hoi An តែងតែលេចមុខក្នុងបញ្ជីទីក្រុងស្អាតបំផុតលើលោក” ។

បើយោងតាមគេហទំព័រ World’s Best ក៏មានគោលបំណងផ្តល់កិត្តិយសដល់គោលដៅ សណ្ឋាគារ ក្រុមហ៊ុនអាកាសចរណ៍ និងសេវាកម្មដ៏ល្អនៅក្នុងវិស័យទេសចរណ៍ក្នុងប្រទេសនេះផងដែរ។ ទីក្រុងត្រូវបានផ្តល់ពិន្ទុដោយផ្អែកលើលក្ខណៈវិនិច្ឆ័យដូចជាការទស្សនា វប្បធម៌ អាហារ ភាពរួសរាយរាក់ទាក់របស់មនុស្ស និងគោលដៅនានា ការដើរទិញឥវ៉ាន់ ក៏ដូចជាតម្លៃសមរម្យសម្រាប់ភ្ញៀវទេសចរ។ លក្ខណៈវិនិច្ឆ័យនីមួយៗមាន ៤ កម្រិតសម្រាប់អ្នកទេសចរដើម្បីវាយតម្លៃគឺ៖ ល្អណាស់ ល្អបង្គួរ មធ្យម និងមិនល្អ។ ពិន្ទុសរុបដែលទីក្រុងសម្រេចបានគឺជាពិន្ទុមធ្យមដែលអ្នកទស្សនាផ្តល់ដល់លក្ខណៈវិនិច្ឆ័យទាំង ៤ នេះ។

ដូច្នេះទីក្រុង Hoi An គឺបានទាក់ទាញសំឡេងឆ្នោតជាង ៧០០,០០០ ថាជាទីក្រុងស្អាតបំផុតប្រចាំឆ្នាំ។ ពានរង្វាន់នេះត្រូវបានចាត់ទុកថាជាមគ្គុទ្ទេសក៍សម្រាប់ណែនាំភ្ញៀវទេសចរទៅកាន់ទីកន្លែងដែលមានសេវាកម្មល្អដើម្បីបម្រើដល់ការធ្វើដំណើររបស់ពួកគេនាពេលអនាគត។ កន្លងមកកោះ Phu Quoc ក៏បានបង្ហាញខ្លួនក្នុងបញ្ជីរបស់ Travel & Leisure នៃកោះ និងប្រជុំកោះស្អាតបំផុតទាំង ២៥ នៅលើពិភពលោកផងដែរ៕

ប្រទេសចិន ៖ នៅខែកក្កដា ឆ្នាំ២០២៤ យុវជនចិនជាច្រើននាក់បាននាំគ្នាមកដាក់ពាក្យធ្វើការក្រៅម៉ោងជាបន្តបន្ទាប់ នៅតំបន់ទេសចរណ៍មួយកន្លែងក្នុងទីក្រុងបិនស៊ី ខេត្តលៀវនីង ។ ការងារនេះកំពុងតែពេញនិយមយ៉ាងខ្លាំងនៅប្រទេសចិន ហើយបុគ្គលិកធ្វើការត្រូវស្លៀកពាក់កខ្វក់ និងតុបតែងមុខមាត់ធ្វើជាមនុស្សព្រៃ ។ បន្ទាប់មក ពួកគេនឹងធ្វើសកម្មភាពផ្សេងៗ ដូចជា ៖ រាំ ឬលោត ដើម្បីឱ្យភ្ញៀវទេសចរចាប់អារម្មណ៍ ។

យុវជនទាំងនេះទទួលបានប្រាក់ចំនួន២០០យាន់ក្នុង១ថ្ងៃ (ឬស្មើជាង២៧ដុល្លារអាមេរិក) ពីការងារក្រៅម៉ោងរបស់ពួកគេ ។ លើសពីនេះ ក៏មានអ្នកប្រើប្រាស់បណ្តាញសង្គមផ្សេងទៀតសម្រុកមកដាក់ពាក្យធ្វើការដែរ ពីព្រោះមើលឃើញថា វាជាការងារសប្បាយរីករាយ ថែមទាំងទទួលបានប្រាក់ខែខ្ពស់ ។

បុគ្គលិកដែលស្ម័គ្រចិត្តចូលធ្វើការក្រៅម៉ោងនៅទីនេះ គឺត្រូវស្លៀកពាក់កខ្វក់ដើម្បីឱ្យមើលទៅដូចមនុស្សព្រៃ ព្រមទាំងស្រែកខ្លាំងៗពេញព្រៃ ។ ការងារនេះមានគោលបំណងទាក់ទាញចំណាប់អារម្មណ៍ពីភ្ញៀវទេសចរដែលមកកម្សាន្តនៅទីនេះ ។

ហេតុនេះ ភ្ញៀវទេសចរទាំងអស់នឹងទទួលបានបទពិសោធន៍ពីដំណើរកម្សាន្តប្រកបដោយក្តីរីករាយ តាមរយៈការមើលឃើញតំបន់ធម្មជាតិពិតៗ និងធម្មជាតិក្លែងក្លាយ ។ កន្លងមក បុគ្គលិកធ្លាប់ស្លៀកពាក់ធ្វើជាអ្នកសុំទាន និងស្លៀកពាក់តាមតារាភាពយន្តល្បីៗទៀតផង ។

កាលពីខែមេសា ឆ្នាំ២០២៤ ក្រោយពីការប្រកាសជ្រើសរើសបុគ្គលិកមកធ្វើការងារនេះត្រឹម១សប្តាហ៍ ស្រាប់តែមានបេក្ខជនមកដាក់ពាក្យរហូតដល់ជិត១០០នាក់ ។ ប៉ុន្តែតំបន់ទេសចរណ៍ទទួលបេក្ខជនតែ៤នាក់ប៉ុណ្ណោះមកធ្វើការ ដែលមានអាយុចាប់ពី១៩ឆ្នាំ ទៅ២៨ឆ្នាំ ។ ការងារនេះតម្រូវឱ្យបុគ្គលិកធ្វើយ៉ាងណា ឱ្យភ្ញៀវទេសចរមានអារម្មណ៍ធូរស្រាល និងសប្បាយរីករាយ ប៉ុន្តែពួកគេពុំអាចនិយាយផ្ទាល់ជាមួយភ្ញៀវទេសចរបានទេ ។

បុគ្គលិកតែងខ្លួនជាមនុស្សព្រៃ នឹងទទួលបានអាហារថ្ងៃត្រង់១ពេល ព្រមទាំងទទួលបានប្រាក់ខែ មិនក្រោម៥.០០០យាន់ក្នុង១ខែ (ឬស្មើជិត៧០០ដុល្លារអាមេរិក) ។ ហេតុនេះ អ្នកប្រើប្រាស់បណ្តាញសង្គមផ្សេងទៀត ក៏ចាប់អារម្មណ៍នឹងការងារនេះដែរ ក្នុងនោះជនជាតិចិនម្នាក់និយាយថា ៖ «នេះជាការងារក្នុងក្តីសុបិនរបស់ខ្ញុំ ព្រោះវាសប្បាយផង និងទទួលបានប្រាក់ខែផង» ។

ទោះយ៉ាងណា ការងារនេះពុំងាយស្រួលដូចមនុស្សគ្នាគិតនោះទេ ពីព្រោះអ្នកគ្រប់គ្រងតំបន់ទេសចរណ៍និយាយថា ៖ «បុគ្គលិកម្នាក់ៗត្រូវតែទទួលការហ្វឹកហាត់យ៉ាងល្អ ទើបអាចធ្វើការងារនេះបាន ។ រីឯពាក្យចចាមអារ៉ាមថា បុគ្គលិកតែងខ្លួនជាមនុស្សព្រៃ ត្រូវបានអនុញ្ញាតឱ្យលួចអាហារថ្ងៃត្រង់របស់ភ្ញៀវទេសចរនោះ មិនមែនជាការពិតឡើយ» ៕

ទីក្រុង Barcelona របស់ប្រទេសអេស្ប៉ាញ និងកោះបាលីនៅក្នុងប្រទេសឥណ្ឌូនេស៊ីបានតវ៉ាបណ្តេញភ្ញៀវទេសចរចេញពីតំបន់ ដោយសារកំណើនភ្ញៀវទេសចរលើសលប់ពេក ធ្វើឱ្យអ្នកស្រុកតានតឹង។

យោងតាមលោក Sandiaga Uno រដ្ឋមន្ត្រីក្រសួងទេសចរណ៍ និងសេដ្ឋកិច្ចច្នៃប្រឌិតរបស់ប្រទេសឥណ្ឌូណេស៊ី បាននិយាយនៅក្នុងសន្និសីទសារព័ត៌មានមួយកាលពីថ្ងៃទី ១៧ ខែកក្កដា ឆ្នាំ២០២៤ នេះថា ប្រជាជននៅលើកោះបាលីបានចាប់ផ្តើមតវ៉ាបណ្តេញអ្នកទេសចរចេញពីតំបន់ខ្លួន ដែលនេះមិនខុសគ្នាពីប្រជាជនក្នុងទីក្រុង Barcelona ប៉ុន្មានទេ ដោយពួកគេបានដើរតាមផ្លូវដើម្បីតវ៉ា បាញ់កាំភ្លើងទឹកដាក់អ្នកទេសចរ និងបានព្យួរបដាម្តងហើយម្តងទៀតជាមួយនឹងពាក្យបញ្ជូនអ្នកទេសចរទៅផ្ទះវិញ។

បញ្ហានេះត្រូវបានលើកឡើងក្នុងបរិបទដែលមេដឹកនាំឧស្សាហកម្មទេសចរណ៍ អ្នកនយោបាយ និងក្រុមសហគមន៍ជាច្រើននៅកោះបាលីបានដឹងថាកោះនេះមានមនុស្សចង្អៀត។ ប្រសិនបើបន្ថែមភ្ញៀវទេសចរទៀត នោះអ្នកស្រុកនឹងមានភាពតានតឹង ហើយអាចធ្វើសកម្មភាពអវិជ្ជមានណាមួយលេចឡើងទៅលើភ្ញៀវទេសចរ។ លោក Sandiaga Uno បាននិយាយថា បញ្ហានេះចាំបាច់ត្រូវបង្កើតតុល្យភាពរវាងតម្រូវការរបស់ប្រជាជនក្នុងតំបន់ និងបំណងប្រាថ្នារបស់ភ្ញៀវទេសចរ ដើម្បីជៀសវាងការចង្អៀតណែន និងអរិភាពចំពោះឧស្សាហកម្មទេសចរណ៍។

ដូច្នេះសកម្មភាពទេសចរណ៍ចាំបាច់ត្រូវចែកចាយឱ្យស្មើគ្នានៅទូទាំងកោះ។ លោក Sandiaga Uno បានបន្តទៀតថា យើងនឹងជំរុញការវិវឌ្ឍនៃការសាងសង់ផ្លូវធំតភ្ជាប់កោះបាលីខាងកើតជាមួយកោះបាលីខាងលិចឱ្យបានឆាប់តាមដែលអាចធ្វើទៅបាន ដោយហេតុនេះនឹងជួយឱ្យអ្នកទេសចរមិនទៅលេងកោះបាលីខាងត្បូងទៀតទេ។ ជាការពិតណាស់វិស័យទេសចរណ៍គឺជាកត្តាជំរុញសេដ្ឋកិច្ចជាតិយ៉ាងសំខាន់បំផុត ទោះជាយ៉ាងណារដ្ឋមន្ត្រីក្រសួងទេសចរណ៍ក៏មានបំណងចង់ពង្រឹងច្បាប់បន្ថែមទៀតទៅលើភ្ញៀវទេសចរណាដែលមានអាកប្បកិរិយាមិនល្អត្រូវតែទទួលទណ្ឌកម្ម។

គួរបញ្ជាក់ដែរថា នៅឆ្នាំ ២០២៣ កោះបាលីបាននិរទេសជនបរទេសចំនួន ៣៤០ នាក់ កើនឡើងពី ១៨៨ នាក់ក្នុងឆ្នាំ ២០២២ ភាគច្រើនមកពីសហរដ្ឋអាមេរិក រុស្ស៊ី ចក្រភពអង់គ្លេស និងនីហ្សេរីយ៉ា សម្រាប់ការរំលោភបំពានដូចជា ការស្នាក់នៅលើសម៉ោង ការងារខុសច្បាប់ និងការស្លៀកពាក់រសើបនៅកន្លែងពិសិដ្ឋ។ យោងតាមលោក Uno កោះបាលីត្រូវការតែអ្នកទេសចរដែលមានគុណភាពខ្ពស់ជំនួសឱ្យបុគ្គលដែលមិនគោរពច្បាប់ និងវប្បធម៌ក្នុងស្រុក៕

បរទេស៖ ជញ្ជាំងស្ទើរតែគ្រប់អគារទាំងអស់នៅទីក្រុង Nördlingen របស់ប្រទេសអាល្លឺម៉ង់សុទ្ធតែគ្របដណ្តប់ដោយត្បូងពេជ្យប្រហែល ៧២,០០០ តោន។ ក្នុងនោះព្រះវិហារ Georgie តែមួយប៉ុណ្ណោះមានពេជ្រសរុបស្មើនឹង ៥,០០០ ការ៉ាត់ឯណោះ នេះបើយោងតាមការចុះផ្សាយរបស់ CNN កាលពីថ្ងៃទី១៧ ខែកក្កដា ឆ្នាំ២០២៤។

Nördlingen គឺទីក្រុងដែលមានរាងជារង្វង់ដូចជារណ្តៅ និងមានសណ្ឋានដីល្អឥតខ្ចោះ ដោយអាគារធំៗជាច្រើននៅទីនេះសុទ្ធតែដាំពេជ្រ ដែលធ្វើឱ្យវាជាប់ឈ្មោះថាជាទីក្រុងពេជ្រ។ យោងតាមសារព័ត៌មានបរទេស រណ្តៅរបស់ទីក្រុងនេះត្រូវបានបង្កើតឡើងដោយអាចម៍ផ្កាយមួយបុកជាមួយផែនដីកាលពី ១៥ លានឆ្នាំមុន ហើយពេជ្រក៏បានធ្លាក់ចេញពីអាចម៍ផ្កាយនោះ ជាហេតុធ្វើឱ្យទីក្រុងនេះសម្បូរទៅដោយពេជ្រ។

វេជ្ជបណ្ឌិត Stefan Hölzl ក៏បានចែករំលែកថា “នៅកន្លែងខ្លះជុំវិញពិភពលោកក៏មានពេជ្រប្រភេទនេះផងដែរ ដោយមនុស្សបានយកពេជ្រនេះទៅប្រើប្រាស់សម្រាប់ការសាងសង់។ បើយោងតាមភូគព្ភវិទូ និងជានាយកសារមន្ទីរ Nördlingen RiesKrater ក៏បាននិយាយដែរថា នៅទីក្រុង Nördlingen ថ្មដែលធ្វើពីពេជ្រត្រូវបានប្រើប្រាស់សម្រាប់សាងសង់ទីក្រុងទាំងមូល។

ហេតុនេះព្រះវិហារ St. Georgie ក្នុងទីក្រុង Nördlingen តែម្នាក់ឯងមានពេជ្រសរុបស្មើនឹង ៥,០០០ ការ៉ាត់ឯណោះ។ យោងតាមលោក Hölzl អវកាសយានិករបស់ NASA មកពីបេសកកម្ម Apollo 14 និង Apollo 16 បានទៅទីក្រុង Nördlingen មុនពេលរុករកព្រះច័ន្ទ ដើម្បីស្វែងយល់អំពីថ្មដែលពួកគេអាចរកឃើញនៅក្នុងលំហ។ ទោះជាយ៉ាងណាក៏ដោយ ទោះបីជាពេជ្រជួយទីក្រុងឱ្យមានពន្លឺភ្លឺស្វាងក្នុងព្រះអាទិត្យក៏ដោយ ក៏ពេជ្យទាំងនេះមិនមានតម្លៃសម្រាប់សេដ្ឋកិច្ចដែរ៕