ក្រសួងព័ត៌មាន បាននិងកំពុងរៀបចំសណ្តាប់ធ្នាប់ក្នុងវិស័យសារព័ត៌មាន គុណភាពព័ត៌មាន និងសុវត្ថិភាពព័ត៌មាន ដើម្បីទប់ស្កាត់និងប្រឆាំងព័ត៌មានក្លែងក្លាយ, ការអនុវត្តនិងគោរពក្រម សីលធម៌វិជ្ជាជីវៈ ឱ្យបានត្រឹមត្រូវក្នុងចំណោមអ្នកសារព័ត៌មាន។

ក្រសួងព័ត៌មាន ស្នើដល់អ្នកសារព័ត៌មាន អ្នកប្រើប្រាស់បណ្តាញសង្គម និង MMO សូមយកស្មារតីទទួលខុសត្រូវខ្ពស់ក្នុងការចែកចាយ ព័ត៌មានដោយសុចរិត ពិតប្រាកដ និងគោរពតាមក្រមសីលធម៌វិជ្ជាជីវៈ ដែលមាននៅក្នុងច្បាប់ ស្តីពីរបបសារព័ត៌មាន។

នៅក្នុងនោះ សម្តេចមហាបវរធិបតី ហ៊ុន ម៉ាណែត ក៏បានស្នើឱ្យឯកឧត្ដម នេត្រ ភក្រ្ដា រដ្ឋមន្ត្រីក្រសួងព័ត៌មានដកអាជ្ញាប័ណ្ណ និងដាក់ក្នុងបញ្ជីខ្មៅ ចំពោះអ្នកព័ត៌មានណាដែលផ្សាយព័ត៌មានមិនពិត តាមគៀបគេស៊ី និងបំពុលសង្គមដើម្បីកុំធ្វើឱ្យអ្នកព័ត៌មានបួនដប់នាក់នេះ ធ្វើឱ្យប៉ះពាល់ដល់អ្នកព័ត៌មានវិជ្ជាជីវៈ។

សម្ដេចធិបតី សង្កត់ធ្ងន់ថា៖” រាជរដ្ឋាភិបាលគ្មានការបិទសិទ្ធិសេរីភាពក្នុងការបញ្ចេញមតិនោះទេ ប៉ុន្ដែត្រូវគោរពសិទ្ធិអ្នកដ៏ទៃ ដោយត្រូវផ្សាយមានពិត ដើម្បីផ្តល់ប្រយោជន៍ដល់សង្គមជាតិ”៕

ក្រសួងបរិស្ថាន និងក្រសួងកសិកម្ម ព្រមទាំងអង្គការសត្វព្រៃ និងរុក្ខជាតិ បានប្រកាសរកឃើញសម្បុកក្រពើភ្នំចំនួន៥ នៅឧទ្យានជាតិជួរភ្នំក្រវាញ ដែលជាចំនួនសំបុកពងកូនច្រើនបំផុតមិនធ្លាប់មានក្នុងរយៈពេលជាង២០ឆ្នាំកន្លងមកនេះ។

សម្បុកក្រពើភ្នំចំនួន៥នេះ មានពងសរុប ១០៦គ្រាប់ នៅឧទ្យានជាតិជួរភ្នំក្រវាញ។ ក្នុងចំណោមពងក្រពើភ្នំដែលទើបរកឃើញជាង ១០០គ្រាប់នេះ គឺមាន៦០គ្រាប់បានញាស់ចេញពីសម្បុកដោយជោគជ័យក្នុងចន្លោះថ្ងៃទី២៧ដល់ថ្ងៃទី៣០មិថុនា ឆ្នាំ២០២៤។

ការរកឃើញសម្បុកក្រពើភ្នំនេះជាជោគជ័យថ្មីរបស់ខ្លួនចេញពីការខិតខំជ្រើសរើសពូជក្រពើភ្នំសុទ្ធមកបង្កាត់ដាក់ចូលក្នុងជម្រកធម្មជាតិវិញ ក្នុងដែនអភិរក្សបរិស្ថាន។

ក្រពើភ្នំ បានដើរតួនាទីសំខាន់ក្នុងប្រព័ន្ធអេកូឡូស៊ី ខណៈការរកឃើញសម្បុកពងកូនលើកនេះជាការឆ្លុះបញ្ចាំងឱ្យឃើញថាឧទ្យានជាតិជួរភ្នំក្រវាញជាទីជម្រកធម្មជាតិមានសុវត្ថិភាព និងសមស្របសម្រាប់ការរស់នៅរបស់ប្រភេទសត្វដ៏កម្រនេះ។

សត្វក្រពើភ្នំមានចំនួនប្រមាណជាង ១០០០ក្បាលប៉ុណ្ណោះនៅលើពិភពលោក ក្នុងនោះកម្ពុជាត្រូវបានគេចាត់ទុកថាមានវត្តមានសត្វក្រពើភ្នំច្រើនជាងគេប្រមាណជាង ៣០០ក្បាល៕

ដោយមានមានភ្លៀងធ្លាក់មកជាប់ៗគ្នាជាច្រើនថ្ងៃ បានបង្កឱ្យប្រជាពលរដ្ឋ ដែលមានលំនៅឋាននៅជាប់ដងស្ទឹងសង្កែ ហាក់មានការព្រួយបារម្ភខ្លាំង ក្រោយមានលំនៅឋាន៣ខ្នងបានបាក់ចូលស្ទឹងសង្កែ។

ការរអិលបាក់ស្រុតដីនេះបានកើតឡើងនៅវេលាម៉ោង២យប់ឈានចូលថ្ងៃទី១៨ ខែកក្កដា ឆ្នាំ២០២៤ ដែលស្ថិតនៅភូមិស្នាពីមុខ ឃុំព្រែកខ្ពប ស្រុកឯកភ្នំ ខេត្តបាត់ដំបង បណ្តាលឱ្យស្រុតផ្ទះបាយ និងរោងលក់គុយទាវរបស់ប្រជាពលរដ្ឋចំនួន៣គ្រួសា។

មូលហេតុនៃការបាក់ស្រុតនេះ ក៏ព្រោះតែប៉ុន្មានថ្ងៃកន្លងមកនេះ មានភ្លៀងធ្លាក់ខ្លាំងជាប់គ្នា ធ្វើឱ្យដីជ្រាបពីម្ខាងផ្លូវដែលមិនមានទឹកហូរ ត្រូវជ្រាបឆ្លងផ្លូវបាក់ផ្លូវចូលទៅស្ទឹង ធ្វើឱ្យទឹកហូរខាងក្រោម ដែលមានដីស្អុយ ហើយរអិលបាក់តែម្តង ហើយចំពោះអ្នកនៅសង្ខាងផ្ទះដែលបាក់ជាប់ៗគ្នាខាងមាត់ស្ទឹងនោះ ក៏កំពុងរងនូវហានិភ័យនេះផងដែរ ។

អភិបាលស្រុកឯកភ្នំ លោកម៉ិល សុផល បានស្នើឱ្យពលរដ្ឋប្រុងប្រយ័ត្ន និងប្រញ៉ាប់រាយការណ៍ទៅអាជ្ញាធរមូលដ្ឋាន ឬសមត្ថកិច្ចដែលនៅជិតបំផុត ចំពោះបាតុភូតធម្មជាតិណាមួយដែលកើតឡើង៕

ជឿជាក់ថាអ្នកលេងបណ្តាញសង្គមប្រាកដជាស្គាល់ ប៉ីប៉ីឌី មិនខានដែលធ្វើឱ្យទីផ្សារផ្លែ ផាសិន និង strawberry និងបុកល្ហុង ល្បីល្បាញខ្លាំងពាសពេញបណ្តាញសង្គម។ ជាមនុស្សដែលមានឥទ្ធិពលនិងផ្តល់ការកម្សាន្តដល់អ្នកគាំទ្រ ប៉ុន្តែជីវិតពិតរបស់ ប៉ីប៉ីឌី ជាមនុស្សដែលខ្វះភាពកក់ក្តៅតាំងពីតូចមិនស្គាល់សូម្បីមុខឪពុក ចំណែកឯជីវិតស្នេហាមិនសមប្រកបមានម្តងលោកសឹងតែបញ្ចប់ជីវិត។

ក្នុងបទសម្ភាសន៍ VTALK ដែលបានចាក់ផ្សាយកាលពីពេលថ្មីៗនេះ ប៉ីប៉ីឌី បានរៀបរាប់ថាលោកជាអ្នកខេត្តកណ្តាល ហើយពិធីការិនី ហេង កែវនីតា និងលោកជាបងប្អូនជីដូនមួយនឹងគ្នា។ កាលពីក្មេង ហេង កែវនីតា គឺជាអ្នកដឹក ប៉ីប៉ីឌី និងបងប្អូនម្នាក់ទៀតទៅរៀនជាមួយនឹងមធ្យោបាយកង់។ អ្នកមួយចំនួនធំអាចដឹងពីជីវិតរបស់ ប៉ីប៉ីឌី ជាបុគ្គលមានឥទ្ធិពលនៅលើប្រព័ន្ធផ្សព្វផ្សាយសង្គម ផ្តល់សំណើចដល់អ្នកគាំទ្រ បើកហាងផ្ទាល់ខ្លួនធ្វើឱ្យទីផ្សារផ្លែផាសិន និង strawberry ល្បីល្បាញខ្លាំងជួយសម្រួលដល់អ្នកលក់ដទៃទៀតឱ្យកាន់តែលក់ដាច់ ប៉ុន្តែមិនមែនជីវិតរបស់ ប៉ីប៉ីឌី ធ្វើអ្វីក៏ជោគជ័យទាំងអស់នោះទេ។

ប៉ីប៉ីឌី គឺជាក្មេងម្នាក់ដែលខ្វះភាពកក់ក្តៅតាំងពីក្មេង ឪពុកម្តាយចែកផ្លួវគ្នាលោកត្រូវទៅរស់នៅជាមួយអ៊ំ ជាមួយយាយ ឆ្ងាយពីម្តាយដែលគាត់ត្រូវឡើងមកធ្វើការដើម្បីរកលុយសូម្បីតែមុខឪពុកថាមានមុខមាត់ដូចម្តេច ឈ្មោះអ្វីលោកមិនស្គាល់ផង។ ទោះជាធំឡើងជាកូនកំព្រាឪពុក ប៉ុន្តែលោកមានការអាណិតម្តាយលោកច្រើនជាងដែលម្តាយខ្លួនជាស្រ្តីមេម៉ាយ តែតស៊ូរកលុយចិញ្ចឹមកូន។ កាលពីកាលដោយសារតែភាពឯកាពេក ប៉ីប៉ីឌី ស្រែកហៅ ឪពុកទាំងមិនស្គាល់។
ប៉ីប៉ីឌី ថាបើឱ្យនិយាយថាពិបាកខ្លាំងតែម្តងមិនមែននោះទេដោយសារតែជាមនុស្សម្នាក់ឆ្អឹងអណ្តែតទទួលបានការជ្រោមជ្រែងខ្លះដែរពីដៃគូ។

ងាកមកកាន់ជីវិតស្នេហាវិញ ប៉ីប៉ីឌី មិនទាន់សមប្រកបលើជីវិតគូនោះទេលោកបានសុំបែកដៃគូចំនួន៣នាក់ ប៉ុន្តែក្រោយមកត្រូវបានមនុស្សម្នាក់ធ្វើឱ្យលោកឈឺចាប់ខ្លាំង សឹងតែមិនអាចរស់នៅលើផែនដីបាន ទុកហាងបុកល្ហុងចោលមិននឹកនាជាង១ឆ្នាំគ្មានភ្ញៀវចូល បាយមិននឹកទឹកមិនស្រេកបោះបង់ខ្លួនឯងចោល។

បន្ទាប់ពីការឈឺចាប់បានរំលាយលោកក៏បានពង្រឹងហាងខ្លួនឯងមកវិញ ខណៈដៃគូដែលទើបតែបែកគ្នាប៉ុន្មានខែចុងក្រោយនេះក៏ទៅចោលលោកម្នាក់ទៀត ហើយលោកបានព្យាយាមអង្វរលន់តួគ្រប់យ៉ាងប៉ុន្តែចំណងស្នេហានៅតែមិនអាចផ្សះផ្សាបានរហូតលោកនិយាយថា «កម្មពៀរមិនចាំជាតិក្រោយ»។

គួរបញ្ជាក់ថា បន្ទាប់ពីមុខជំនួញកាន់តែកាក់កបទទួលបានផ្លែផ្កាបើកហាងបន្តពីមួយទៅមួយ ប៉ីប៉ីឌី ក៏សម្រេចចិត្តបើកផលិតកម្មផ្ទាល់ខ្លួនដោយជ្រើសរើសតួឯកស្រីដំបូងសម្រាប់ផលិតកម្មខ្លួនគឺជាតារាចម្រៀង វី ឌីណែត៕

កាលពីយប់ថ្ងៃទី១៧ ខែកក្កដា ឆ្នាំ២០២៤ នៅតាមបណ្ដោយផ្លូវសហព័ន្ធរុស្ស៉ី ស្ថិតក្នុងខណ្ឌសែនសុខ រាជធានីភ្នំពេញ មានករណីជនស្លៀកសុីវិលមួយក្រុម ដោយមាន២នាក់ពាក់កាតមានសញ្ញានគរបាលព្រហ្មទណ្ឌ ធ្វើការឃាត់មនុស្សមួយក្រុម។

ជុំវិញករណីនេះ នាយកដ្ឋាននគរបាលព្រហ្មទណ្ឌ បានធ្វើការស្រាវជ្រាវទៅឃើញថា៖”ក្នុងចំណោមជនសុីវិលទាំងនោះមានម្នាក់ ជាមន្ដ្រីនគរបាលរបស់នាយកដ្ឋាននគរបាលព្រហ្មទណ្ឌ (មិនមានក្នុងរូប) ដែលនៅពេលនេះនាយកដ្ឋានកំពុងធ្វើការសួរនាំតាមនីតិវិធីជំនាញ”។

ដោយឡែកមនុស្ស២នាក់ផ្សេងទៀត ដែលពាក់កាតមានសញ្ញានគរបាលព្រហ្មទណ្ឌ មិនមែនជាមន្ដ្រីនគរបាលបម្រើការងារនៅនាយកដ្ឋានឡើយ។

បច្ចុប្បន្ន នាយកដ្ឋាននគរបាលព្រហ្មទណ្ឌ កំពុងបន្ដស្រាវជ្រាវយ៉ាងយកចិត្តទុកដាក់ និងស្វែករកអ្នកពាក់ព័ន្ធ ព្រមទាំងដើមចមនៃហេតុការណ៍នេះ៕

ដោយមានភ្លៀងធ្លាក់ជាប់គ្នា៣-៤ថ្ងៃ នៅតំបន់ជាប់ព្រំដែនក្នុងស្រុកសំឡូត  និងស្ទឹងក្រញូងមានការហក់កើនឡើងលឿន ជន់លិចផ្លូវមួយចំនួននៅក្នុងភូមិសាស្ត្រ ភូមិអូរតាទៀក ឃុំតាតោក។https://blogger.googleusercontent.com/img/b/R29vZ2xl/AVvXsEhhSx_r7nxZTvxIBpUh165ivbPuzHP9dqqROYmWgnEZRFs7mPhUxLsSFiNckYusY4lCCyXQd6se7CqfrTrbuKlWYD0d5eC0DP8DxydibDe0edc23n-A_rhvb0wTy5YXZ3izUXf_Yq6s-4x5Wu7spQw4i0CZgLAArXLppz06GK19e9FVJ5qh6LKOArvCS4g/s1152/451549840_853397230178413_4739488702586699922_n.jpg

អាជ្ញាធរស្រុកសំឡូត បានអំពាវនាវទៅដល់បងប្អូនដែលរស់នៅផ្នែកខាងក្រោមតាមបណ្តាដងស្ទឹងគ្រញូង និងស្ទឹងសង្កែ ទាំងអស់ធ្វើការប្រុងប្រយ័ត្នអោយបានខ្ពស់ចំពោះស្ថានភាពទឹក បើសិនជាមេឃនៅតែបន្តធ្លាក់ភ្លៀង ហានិភ័យនឹងកាន់តែខ្ពស់។

ខណៈ មកដល់ថ្ងៃទី១៨ ខែកក្កដា ឆ្នាំ២០២៤ ស្រុកសំឡូតនៅតែបន្តមានភ្លៀងធ្លាក់ ដែលបានធ្វើឱ្យស្ពាននិងផ្លូវមួយចំនួនរងការខូចខាត ស្របពេលដែឡសមត្ថកិច្ចក៏បានចុះជួយសម្រួលដល់បងប្អូនប្រជាពលរដ្ឋដែលធ្វើដំណើរឆ្លងកាត់ផងដែរ។

ជុំវិញករណីនេះ អាជ្ញាធរស្រុកសំឡូត ក៏អំពាវនាវដល់ពលរដ្ឋ ប្រសិនបើមានគ្រោះថ្នាក់ទឹកជន់លិចណាមួយ សូមប្រញាប់ទាក់ទងបន្ទាន់ទៅផេករដ្ឋបាលស្រុក ឬទំនាក់ទំនងលេខទូរស័ព្ទ០៦៩ ៥៣ ៥៣ ៤៧ ឬ ០៩៨ ៥៦៤ ៤២២៕