ប្រទេសថៃ ៖ វាបានធ្វើឱ្យមហាជននៅប្រទេសថៃមានចម្ងល់យ៉ាងខ្លាំងថា តើជាហេតុការណ៍ពិតប្រាកដ ឬការបង្កើតមាតិកា? នៅពេលឃើញរថយន្តទំនើប១គ្រឿងបើកបរតាមផ្លូវ ប៉ុន្តែដាក់ស្លាកនៅគូទរថយន្តថា «រថយន្តប្រមូលសំរាម» ថែមទាំងចងអំបោសតម្រៀបគ្នាចំនួន៤ នៅគូទរថយន្តទៀតផង ។ ចុងក្រោយ ម្ចាស់រថយន្តទំនើបបកស្រាយថា វាពុំមែនជាការបង្កើតមាតិកាទេ ប៉ុន្តែការធ្វើបែបនេះ គឺចង់ឱ្យបុគ្គលិកលក់រថយន្ត កុំមើលងា.យ មនុស្សតែសំបកខាងក្រៅ ។

បើតាមវីដេអូចែកចាយក្នុងបណ្តាញសង្គមថៃឃើញថា វាជារថយន្តទំនើបមានតម្លៃថ្លៃខ្លាំង ប៉ុន្តែបែរជាមានអំបោសបោសផ្ទះដាក់នៅគូទរថយន្ត ដែលធ្វើឱ្យអ្នកដំណើរតាមផ្លូវសួរថា ហេតុអ្វីទើបធ្វើបែបនេះ? ក្រោយពីវីដេអូនេះល្បីល្បាញក្នុងបណ្តាញសង្គម ម្ចាស់រថយន្តទំនើបក៏បកស្រាយពីមូលហេតុដែលខ្លួនធ្វើបែបនេះ ។

យុវជនជាម្ចាស់រថយន្តនិយាយថា កាលពីថ្ងៃទី២១ ខែកក្កដា ឆ្នាំ២០២៤ លោកបានចូលក្នុងហាងលក់រថយន្តទំនើបមួយកន្លែងនៅតំបន់ឡាតប្រាវ ទីក្រុងបាងកក ដោយសារលោកមានគម្រោងប្តូរមកប្រើប្រាស់រថយន្តអគ្គិសនី ។ ប៉ុន្តែពេលលោកដើរចូលក្នុងហាងនេះ គ្មានបុគ្គលិកលក់រថយន្តណាម្នាក់ចាប់អារម្មណ៍បង្ហាញរថយន្តថ្មីប្រាប់លោកឡើយ ហើយពួកគេបែរជាជជែកគ្នា បើទោះជាលោកស្រែកហៅក្តី ក៏ពួកគេមិនដើរមករកលោកឡើយ ។

ពេលនោះ លោកក៏មានអារម្មណ៍អន់ចិត្ត ហើយនិយាយថា ៖ «បើបុគ្គលិកផ្នែកលក់រថយន្តពុំមកនិយាយជាមួយខ្ញុំទេ ខ្ញុំមិនទិញរថយន្តនេះក៏បានដែរ» ។ ប៉ុន្តែបុគ្គលិកលក់រថយយន្តបែរជាសើចចំអកនឹងពាក្យសម្តីរបស់លោក ។ បន្ទាប់មក លោកនិយាយទៀតថា ៖ «ខ្ញុំជាអតិថិជន» ។

បន្តិចក្រោយមក ក៏មានបុគ្គលិកលក់រថយន្តម្នាក់ទៀតរត់មករកលោក និងរៀបចំឯកសារទិញ-លក់រថយន្តជូនលោក ។ លោកមានអារម្មណ៍ខឹងខ្លាំងណាស់ ហើយការធ្វើបែបនេះ ដោយសារចង់ឱ្យបុគ្គលិកទាំងនេះសូមទោសអតិថិជន ។ លោកចង់ប្រាប់ពួកគេថា ទោះជាអតិថិជនចូលក្នុងហាងលក់រថយន្តទំនើប ទិញរថយន្ត ឬពុំទិញក្តី អ្នកលក់ត្រូវមានតួនាទីបង្ហាញផលិតផលទៅអតិថិជន និងកុំមើលងាយការស្លៀកពាក់ ពីព្រោះអតិថិជនមានសិទ្ធិស្មើៗគ្នា គ្មានអ្នកណាខ្ពង់ខ្ពស់ជាងអ្នកណាទេ ។

ម្ចាស់រថយន្តទំនើបរៀបរាប់ថា ៖ «ខ្ញុំឈរនៅហាងរថយន្តអស់មួយសន្ទុះ ហើយមើលឆ្វេង-ស្តាំ គ្មានបុគ្គលិកមករាក់ទាក់អតិថិជនសោះ ។ ដូច្នេះ ខ្ញុំក៏សួរថា តើមានបុគ្គលិកផ្នែក Sell ទេ? ស្រាប់តែបុគ្គលិកលក់រថយន្តមើលមកខ្ញុំបែបមើលងាយ ហើយខ្ញុំក៏និយាយបន្តថា បើគ្មានផ្នែក Sell ទេ ខ្ញុំពុំទិញរថយន្តទេ» ។ ភ្លាមនោះ សង្សាររបស់ខ្ញុំបានឮបុគ្គលិកលក់រថយន្តនិយាយត្រាប់តាមពាក្យខ្ញុំទៀតផង ។ ខ្ញុំចង់ឱ្យពួកគេសូមទោស ខ្ញុំពុំត្រូវការអ្វីទេ ព្រោះពេលនោះ ខ្ញុំខ្មាស់គេខ្លាំងណាស់» ។

ចំណែកការយកអំបោសមកដាក់នៅគូទរថយន្តបែបនេះ ម្ចាស់រថយន្តប្រាប់ថា លោកធ្វើតាមព្រះមហាក្សត្រនៅប្រទេសឥណ្ឌា ដែលទ្រង់បានធ្វើដំណើរទៅទីក្រុងឡុងដ៍ ។ ពេលនោះ ព្រះមហាក្សត្រឥណ្ឌាតែងព្រះកាយជាពលរដ្ឋសាមញ្ញ ហើយក៏ដើរចូលក្នុងហាងលក់រថយន្តទំនើបមួយកន្លែងដើម្បីសួរព័ត៌មានលម្អិត ។ ប៉ុន្តែបុគ្គលិកលក់រថយន្តគិតថា ទ្រង់ជាជនជាតិឥណ្ឌាក្រីក្រគ្មានប្រាក់ ហើយពួកគេក៏បណ្តេញព្រះមហាក្សត្រឥណ្ឌាឱ្យចេញក្រៅហាង ៕

ប្រទេសបារាំង ៖ ក្នុងពិធីបើកការប្រកួតកីឡាអូឡាំពិក ឆ្នាំ២០២៤ នៅទីក្រុងប៉ារីស ប្រទេសបារាំង បានសម្តែងកម្មវិធីជាច្រើនទៅកាន់អ្នកចូលរួម ប៉ុន្តែការសម្តែងមួយបែរជាធ្វើឱ្យមហាជនផ្ទុះការរិះគ.ន់ ថា តើវាជាការធ្វើត្រាប់តាមរូបភាព «The Last Supper» របស់សាសនាគ្រិស្ត ឬយ៉ាងណា? ចុងក្រោយ ក្រុមហ៊ុនផ្សេងៗលើពិភពលោក បានសម្រេចចិត្តដកការផ្សាយពាណិជ្ជកម្មចេញពីពិធីប្រកួតកីឡាអូឡាំពិក ។

រូបភាព The Last Supper គឺជាការបង្ហាញពីម្ហូបអាហារចុងក្រោយរបស់ព្រះយេស៊ូ ប៉ុន្តែការសម្តែងមួយក្នុងពិធីបើកការប្រកួតកីឡាអូឡាំពិក បែរជាមានលក្ខណៈស្រដៀងគ្នានឹងរូបភាពម្ហូបអាហារចុងក្រោយរបស់ព្រះយេស៊ូ ។ ពីដំបូង ការបង្ហាញនេះធ្វើឱ្យមហាជនរីករាយ ប៉ុន្តែក្រោយមក វាបានក្លាយជាបញ្ហាធំ ពីព្រោះអ្នកគោរពសាសនាគ្រិស្តឃើញហើយគិតថា តើវាជាការធ្វើត្រាប់តាមសាសនារបស់ពួកគេដែរឬទេ?

វាធ្វើឱ្យពលរដ្ឋលើពិភពលោក រិះគន់ពិធីបើកការប្រកួតកីឡាអូឡាំពិកនៅប្រទេសបារាំងយ៉ាងខ្លាំង រហូតធ្វើឱ្យខាងកីឡាអូឡាំពិកលុបវីដេអូខាងលើចោលវិញ ។ លើសពីនេះ ក្រុមហ៊ុនឧបត្ថម្ភកម្មវិធីមួយចំនួន ក៏បានប្រកាសដកការផ្សព្វផ្សាយពាណិជ្ជកម្មទាំងអស់ចេញពីការប្រកួតអូឡាំពិក ។ តើការរិះគន់នេះចាប់ផ្តើមកើតឡើងយ៉ាងដូចម្តេច?

កាលពីថ្ងៃទី២៦ ខែកក្កដា ឆ្នាំ២០២៤ គឺជាថ្ងៃបើកការប្រកួតកីឡាអូឡាំពិក ឆ្នាំ២០២៤ នៅទីក្រុងប៉ារីស ហើយមានការសម្តែងជាច្រើនក្នុងកម្មវិធី ។ ប៉ុន្តែការសម្តែងមួយបានល្បីល្បាញ និងត្រូវមហាជនរិះគន់ច្រើនបំផុតនោះ គឺក្រោយពីលោក ឡេអូណាដូ ដាវីនឈី ជនជាតិអ៊ីតាលី បានសម្តែងធ្វើត្រាប់តាមរូបភាព The Last Supper ជាម្ហូបអាហារចុងក្រោយរបស់ព្រះយេស៊ូ ។ រូបភាពនេះមានន័យថា ជាការបរិភោគអាហារចុងក្រោយរបស់ព្រះយេស៊ូ មុនពេលព្រះអង្គត្រូវបានគេយកទៅចងឈើឆ្កាង ។

អ្នកទស្សនានិយាយថា គ្រប់កាយវិការរបស់តារាសម្តែងនេះ គឺបានធ្វើត្រាប់តាមសាសនាគ្រិស្ត ហើយវាដូចគ្នានឹងរូបភាព The Last Supper ខ្លាំងណាស់ ។ អ្នកគោរពសាសនាគ្រិស្តជាច្រើននាក់មិនពេញចិត្តនឹងការសម្តែងនេះឡើយ ។

ចំណែកលោក Elon Musk ជាម្ចាស់ក្រុមហ៊ុនរថយន្ត Tesla និងបណ្តាញសង្គម X ក៏បានរិះគន់ផងដែរ ។ លោកនិយាយថា ៖ «នេះជាបង្ហាញថា មិនគោរពអ្នកកាន់សាសនាគ្រិស្តយ៉ាងខ្លាំង ។ បើគ្មានសេចក្តីក្លាហានទទូចរកភាពយុត្តិធម៌ និងភាពត្រឹមត្រូវទេនោះ សាសនាគ្រិស្តនឹងបាត់បង់មិនខាន» ។

រីឯ C Spire ជាក្រុមហ៊ុនទំនាក់ទំនងគ្មានខ្សែរបស់អាមេរិកបានបង្ហោះក្នុងបណ្តាញសង្គមថា ក្រុមហ៊ុនមានអារម្មណ៍ហួសចិត្តយ៉ាងខ្លាំងនឹងការធ្វើត្រាប់តាមអាហារព្រះយេស៊ូ ក្នុងពិធីប្រកួតកីឡាអូឡាំពិកនៅទីក្រុងប៉ារីស ។ ហេតុនេះ ក្រុមហ៊ុនសម្រេចចិត្តដកការផ្សាយពាណិជ្ជកម្មទាំងអស់ចេញពីការប្រកួតកីឡាអូឡាំពិក ឆ្នាំ២០២៤ ។

ចុងក្រោយ ខាងរៀបចំកម្មវិធីប្រកួតកីឡាអូឡាំពិកបានលុបវីដេអូសម្តែងរបស់លោក ឡេអូណាដូ ដាវីនឈី ចេញពីយូធូប ។ បើទោះជាមានការរិះគន់យ៉ាងច្រើនក្តី ប៉ុន្តែក្រុមសម្តែងនិយាយថា វាគ្មានអ្វីគួរឱ្យរីករាយទេ បើគ្មានប្រធានបទប្រកែកគ្នាទេនោះ ។ វាគួរឱ្យធុញទ្រាន់ខ្លាំងណាស់ បើមនុស្សលើពិភពលោកនេះគិតដូចគ្នាទាំងអស់ ។

កាលពីថ្ងៃទី២៨ ខែកក្កដា គណៈកម្មការអូឡាំពិកនិយាយថា ពួកគេគ្មានចេតនាធ្វើត្រាប់តាម ឬមិនគោរពសាសនាណាមួយទេ ។ បើអ្នកណាមិនពេញចិត្តនឹងការសម្តែងនេះ ពួកគេសូមបង្ហាញការសោកស្តាយយ៉ាងខ្លាំង ។

លោក Thomas Jolly នាយកគ្រប់គ្រងការសម្តែងក្នុងពិធីបើកការប្រកួតកីឡាអូឡាំពិកនិយាយថា ការសម្តែងនេះពុំបានធ្វើត្រាប់តាម ឬមើលងាយអ្នកណាម្នាក់ឡើយ ពីព្រោះក្រុមការងារបានសហការគ្នាសម្តែងបើកកម្មវិធីដោយរីករាយ ដើម្បីបង្ហាញពីគុណតម្លៃសេរីភាពជាគោលការណ៍សំខាន់របស់ប្រទេសបារាំង ៕

ប្រទេសថៃ ៖ ក្រោយពីការបង្ហោះរូបភាពដុំពពកមានរូបរាងប្លែកៗនៅខេត្តស៊ីសាកេត ប្រទេសថៃ បានធ្វើឱ្យពលរដ្ឋថៃភ្ញាក់ផ្អើលយ៉ាងខ្លាំង និងបញ្ចេញមតិខុសៗគ្នាក្នុងបណ្តាញសង្គម ។ មតិភាគច្រើនលើកឡើងថា រូបភាពនេះស្រស់ស្អាត ប៉ុន្តែគួរឱ្យខ្លាចណាស់ ពីព្រោះវាដូចគ្នានឹងរលកយក្សស៊ូណាមិ ខណៈមតិខ្លះទៀតថា វាជាសញ្ញាបង្ហាញថា ថ្ងៃអវ.សាន្ត ពិភពលោក ជិតមកដល់ហើយ ។

កាលពីថ្ងៃទី២៩ ខែកក្កដា ឆ្នាំ២០២៤ សារព័ត៌មានថៃរាយការណ៍ថា អ្នកប្រើប្រាស់បណ្តាញសង្គមនៅប្រទេសថៃផ្ទុះការចាប់អារម្មណ៍ និងបារម្ភខ្លាចប្រទេសថៃកើតគ្រោះធម្មជាតិធ្ងន់ធ្ងរ ក្រោយពីអ្នកប្រើប្រាស់ហ្វេសប៊ុកម្នាក់ឈ្មោះ «Su Per Armer» បានបង្ហោះរូបភាពដុំពពកមានរូបរាងប្លែកៗស្រដៀងគ្នានឹងរលកយក្សស៊ូណាមិ និងសរសេរថា «អស្ចារ្យណាស់ ថ្ងៃនេះ» ។

បន្ទាប់ពីអ្នកប្រើប្រាស់ហ្វេសប៊ុករូបនេះបង្ហោះរូបភាពបានបន្តិច ក៏មានមនុស្សចូលមកបញ្ចេញមតិយ៉ាងច្រើន ហើយមតិភាគច្រើននិយាយថា វាដូចគ្នានឹងរលកយក្សស៊ូណាមិ, ស្រស់ស្អាត និងប្លែកភ្នែក, ស្រស់ស្អាតខ្លាំងណាស់ដូចក្នុងភាពយន្តអីចឹង, វាដូចគ្នានឹងជួរភ្នំនៅប្រទេសនេប៉ាល់ និងមើលទៅផ្ទៃមេឃ ដូចមានទឹកជ្រោះហូរធ្លាក់ចុះមក ជាដើម ។ ក្រៅពីនេះ ក៏មានអ្នកប្រើប្រាស់បណ្តាញសង្គមខ្លះទៀតសរសេរថា រូបភាពនេះស្ថិតនៅខេត្តស៊ីសាកេត ។

ក្រោយមក ក្រុមការងារសារព័ត៌មាន ក៏បានសាកសួរពីការបង្ហោះរូបភាពខាងលើ ហើយអ្នកប្រើប្រាស់ហ្វេសប៊ុកឈ្មោះ Su Per Armer និយាយថា ខ្លួនបានថតរូបភាពនេះ កាលពីថ្ងៃទី២៨ ខែកក្កដា កន្លងមក នៅបរិវេណខាងមុខហាងលក់ទំនិញ Big C ខេត្តស៊ីសាកេត ។ ម្ចាស់រូបភាពបញ្ជាក់ថា បន្ទាប់ពីបង្ហោះរូបភាពក្នុងបណ្តាញសង្គមបន្តិចឃើញថា មានអ្នកចាប់អារម្មណ៍ជាច្រើន ហើយខ្លួនពុំធ្លាប់ឃើញពពកមានរូបរាងប្លែកបែបនេះពីមុនមកទេ ។

ហេតុនេះ ក្រុមការងារសារព័ត៌មានបានធ្វើដំណើរទៅដល់បរិវេណផ្លូវឆាឡឺមព្រះកៀត ក្នុងឃុំញ៉ាប្លង ស្រុកមឿង ខេត្តស៊ីសាកេត ដែលជាចំណុចថតរូបពពកមានរូបរាងប្លែក និងបានសាកសួរស្ត្រីម្នាក់ឈ្មោះ តុក ជាអាជីវករលក់គ្រឿងសង្ហារិមនៅក្បែរនោះ ។ អ្នកស្រីរៀបរាប់ថា អ្នកស្រីបានលក់គ្រឿងសង្ហារិមនៅក្បែរនេះអស់រយៈពេលជាង១០ឆ្នាំហើយ រីឯពពកមានរូបរាងប្លែកបានកើតឡើងកាលពីថ្ងៃទី២៨ ខែកក្កដា ក្នុងអំឡុងពេលអ្នកស្រីកំពុងលក់ដូរ ។

អ្នកស្រី តុក បន្តថា មុនពេលពពកបង្ហាញរូបរាងប្លែកបែបនេះ គឺមានខ្យល់បក់យ៉ាងខ្លាំង ហើយផ្ទៃមេឃក៏ចាប់ផ្តើមងងឹតដូចចង់ភ្លៀង ។ បន្ទាប់មក ក៏មានដុំពពកយ៉ាងច្រើន មើលទៅដូចទឹកជ្រោះ ហើយពពកទាំងនេះចេះតែរសាត់បន្តិចម្តងៗ និងចុងក្រោយ វាទៅប្រមូលផ្តុំគ្នានៅមុខហាង Big C ខេត្តស៊ីសាកេត ។ បន្តិចក្រោយមក ភ្លៀងក៏ចាប់ផ្តើមធ្លាក់ ប៉ុន្តែពេលភ្លៀងកំពុងតែធ្លាក់នោះ ពពកនៅតែមានរាងចម្លែកដូចដើម ។ ពេលភ្លៀងធ្លាក់យូរបន្តិច ក៏មានពពកខ្មៅមកបាំងពពកចម្លែកនេះ ។

អ្នកស្រីបន្ថែមថា តាំងពីអ្នកស្រីលក់ដូរនៅក្បែរនេះអស់ជាង១០ឆ្នាំ អ្នកស្រីពុំធ្លាប់ឃើញដុំពពកបែបនេះឡើយ ។ វាដូចជារលកយក្ស ប៉ុន្តែស្រដៀងទឹកជ្រោះ ហើយហាក់មានមនុស្សឈរនៅខាងក្រោមទឹកជ្រោះទៀតផង ។ ដូច្នេះ អ្នកស្រីបារម្ភថា តើបាតុភូតដ៏ចម្លែកនេះនឹងធ្វើឱ្យកើតគ្រោះធម្មជាតិនៅខេត្តស៊ីសាកេត ដែរឬទេ?

ប្រទេសថៃ ៖ នៅឆ្នាំ២០២៤ រដ្ឋាភិបាលថៃបានដាក់ផែនការកម្ចា.ត់ ត្រីទីឡាបយ៉ាខ្មៅជាបន្ទាន់នៅគ្រប់តំបន់ទាំងអស់ ដោយសារត្រីប្រភេទនេះបង្កើតកូនយ៉ាងឆាប់រហ័ស ។ ប្រទេសថៃបារម្ភថា វានឹងបំផ្លាញប្រព័ន្ធអេកូឡូស៊ីទាំងស្រុង ដោយសារវាស៊ីបង្គា និងត្រីតូច-ធំគ្រប់ប្រភេទ ហើយបើពុំកម្ចា.ត់ ទេ ថៃអាចនឹងនាំចូលបង្គា, ក្តាម និងត្រីពីក្រៅប្រទេស ។

កាលពីថ្ងៃទី២៥ ខែកក្កដា ឆ្នាំ២០២៤ សារព័ត៌មានថៃផ្សាយថា រដ្ឋាភិបាលថៃបានដាក់វិធានការឱ្យអាជ្ញាធរគ្រប់តំបន់ប្រញាប់កម្ចាត់ត្រីទីឡាបយ៉ាខ្មៅជាបន្ទាន់ ដើម្បីកុំឱ្យថៃខ្វះខាតចំណីអាហារបរិភោគ និងបង្កាកុំឱ្យមានខ្យល់ព្យុះត្រីធ្លាក់ពីលើមេឃ ពីព្រោះខ្យល់ព្យុះត្រីបានកើតឡើងនៅប្រទេសជាច្រើនរួចមកហើយ ។

ប្រទេសថៃបារម្ភថា ក្រៅពីត្រីទីឡាបយ៉ាខ្មៅ បង្កើតកូនយ៉ាងច្រើនក្នុងទឹកហើយ វាក៏អាចបង្កើតជាខ្យល់ព្យុះត្រីនៅលើអាកាសដូចនៅក្រៅប្រទេស ។ ជាក់ស្តែង ប្រទេសហុងដូរ៉ាស់ បានកើតខ្យល់ព្យុះធ្លាក់ត្រីពីលើមេឃយ៉ាងច្រើន ។ ជារៀងរាល់ឆ្នាំ ទីក្រុងយូរ៉ូ ជាទីក្រុងតូចមួយស្ថិតនៅភាគខាងជើងប្រទេសហុងដូរ៉ាស់ តែងតែមានបាតុភូតធ្លាក់ត្រីពីលើមេឃ និងត្រូវបានពលរដ្ឋថតរូប ឬថតវីដេអូត្រីរាប់រយក្បាលធ្លាក់ពីលើមេឃ ក្រោយមានខ្យល់ព្យុះខ្លាំង ។

បាតុភូតខ្យល់ព្យុះត្រីដូចគ្នានេះ ក៏បានកើតឡើងនៅរដ្ឋតិចសាស់ សហរដ្ឋអាមេរិកដែរ កាលពីឆ្នាំ២០២១ ហើយអាជ្ញាធរបានដាស់តឿនឱ្យពលរដ្ឋប្រុងប្រយ័ត្នបញ្ហាភ្លៀងធ្លាក់មកជាមួយសត្វផ្សេងៗ ដូចជា ៖ ត្រី, ពស់ និងកង្កែប ។ វាកើតឡើងដោយសារខ្យល់ព្យុះស្រូបយកសត្វទាំងនេះពីក្នុងទឹក ឬក្នុងដី រួចហើយបក់ឡើងលើមេឃ បន្ទាប់មក សត្វក៏ធ្លាក់ចុះក្រោមវិញជាមួយទឹកភ្លៀង ។

ចំណែកនៅរដ្ឋតេឡាំងខាណា ប្រទេសឥណ្ឌា កាលពីខែកក្កដា ឆ្នាំ២០២២ ក៏មានបាតុភូតត្រីធ្លាក់ពីលើមេឃជាមួយទឹកភ្លៀងដែរ ហើយធ្វើឱ្យពលរដ្ឋឥណ្ឌាជាច្រើននាក់នាំគ្នាចាប់ត្រីនៅតាមផ្លូវយកទៅធ្វើម្ហូប ។ ពេលនោះ សារព័ត៌មានបរទេសរាយការណ៍ថា ពលរដ្ឋរស់នៅរដ្ឋតេឡាំងខាណា ភ្ញាក់ផ្អើលយ៉ាងខ្លាំងជាមួយត្រីធ្លាក់ពីលើមេឃ ដែលកើតឡើងដោយសារខ្យល់មូសុងបានបក់ត្រី, ក្តាម និងកង្កែបឡើងលើមេឃ រួចធ្លាក់មកក្រោមវិញ ។

រីឯនៅប្រទេសអ៊ីរ៉ង់ ក៏មានព្យុះភ្លៀងធ្លាក់ត្រីពីលើមេឃផងដែរ កាលពីខែឧសភា ឆ្នាំ២០២៤ គឺនៅទីក្រុងយ៉ាស៊ូត របស់អ៊ីរ៉ង់ ក្រោយពីមានខ្យល់ព្យុះខ្លាំង ។ ត្រីជាច្រើនក្បាលបានធ្លាក់នៅពាសពេញផ្លូវ ហើយគេជឿថា វាកើតឡើងដោយសារខ្យល់ព្យុះគួចត្រីពីក្នុងទន្លេឡើងលើមេឃ និងធ្លាក់ចុះក្រោមវិញដូចទឹកភ្លៀង ។

ហេតុនេះ មានមតិមួយចំនួននិយាយថា តើអាចមានខ្យល់ព្យុះថូណាដូកម្រិតខ្លាំងក្លា បក់ពីប្រទេសកាណា ក្នុងទ្វីបអាហ្វ្រិក (ជាកន្លែងកំណើតរបស់ត្រីទីឡាបយ៉ាខ្មៅ) មកដល់ប្រទេសថៃ និងនាំយកត្រីទីឡាបយ៉ាខ្មៅ មកជាមួយព្យុះដែរឬទេ? ខណៈចម្ងាយផ្លូវពីប្រទេសកាណា មកដល់ថៃ គឺស្មើនឹង១.៧៧៤១គីឡូម៉ែត្រ ។ អ្នកប្រើប្រាស់បណ្តាញសង្គមខ្លះទៀតសួរថា តើត្រីនេះអាចមកដល់ប្រទេសថៃតាមរយៈខ្យល់ព្យុះ ឬតាមសមុទ្រដែរឬទេ?

អាជ្ញាធរថៃពុំដឹងថា ការរាតត្បាតរបស់ត្រីទីឡាបយ៉ាខ្មៅយ៉ាងច្រើនសន្ធឹកសន្ធាប់នាពេលបច្ចុប្បន្ន កើតឡើងដោយសារអ្វីទេ ប៉ុន្តែបើតាមអ្នកជំនាញសន្និដ្ឋានថា បានជាត្រីនេះបង្កើតកូនយ៉ាងឆាប់រហ័សបែបនេះ ដោយសារបក្សីស៊ីត្រីនេះ រួចហើយវាក៏ទម្លាក់ពងត្រីដែលពុំទាន់ងាប់គ្រប់ទីកន្លែង ។ អាជ្ញាធរបានសហការជាមួយពលរដ្ឋចុះចាប់ត្រីប្រភេទនេះនៅគ្រប់តំបន់ទាំងអស់ និងជំរុញឱ្យពលរដ្ឋយកវាទៅធ្វើម្ហូប ៕