ប្រទេសអ៊ីរ៉ង់ ៖ មេដឹកនាំកំពូលអ៊ីរ៉ង់ លោក Ayatollah Ali Khamenei បានព្រមានសង្គ្រា.មនឹងរាលដាលពេញតំបន់ ប្រសិនបើអាមេរិកបើកការវាយប្រ.ហារអ៊ីរ៉ង់ ហើយអ៊ីរ៉ង់មិនខ្លាចកងទ័ពជើងទឹកដ៏ច្រើនរបស់អាមេរិកទេ ហើយមេដឹកនាំអ៊ីរ៉ង់បានថ្កោលទោសអាមេរិកដណ្តើមធនធានធម្មជាតិជាច្រើនរបស់ខ្លួន ដូចជា ៖ ប្រេងឥន្ធនៈ និងឧស្ម័នធម្មជាតិ ។ ការព្រមាននេះស្របពេលស្ថានការណ៍តានតឹងរវាងប្រទេសទាំងពីរ បន្ទាប់ពីប្រធានាធិបតីអាមេរិក លោក Donald Trump បញ្ជាឱ្យកងទ័ពជើងទឹកបង្កើនកម្លាំងឆ្ពោះទៅមជ្ឈិមបូព៌ា ។

តាមការចុះផ្សាយរបស់សារព័ត៌មានបរទេសនៅថ្ងៃទី២ ខែកុម្ភៈ ឆ្នាំ២០២៦ មេដឹកនាំកំពូលអ៊ីរ៉ង់ លោក Khamenei ក៏បានចោទប្រកាន់អាមេរិកដណ្តើមធនធានធម្មជាតិជាច្រើន ដូចជា ៖ ប្រេងឥន្ធនៈ និងឧស្ម័នធម្មជាតិ ។ លោកក៏បាននិយាយពីពលរដ្ឋអ៊ីរ៉ង់ធ្វើបាតុកម្មប្រឆាំងរដ្ឋាភិបាល គឺស្រដៀងនឹងរដ្ឋប្រហារ ដោយសារការវាយកំទេចអគាររដ្ឋាភិបាល ធនាគារ វិហារអ៊ីស្លាម វាយសមត្ថកិច្ច កំទេចទីតាំងកងកម្លាំងបដិវត្តអ៊ីស្លាម (IRGC) និងដុតគម្ពី ប៉ុន្តែការធ្វើបាតុកម្មនេះត្រូវបានបង្ក្រាបហើយ ។

លោកបានហៅការធ្វើបាតុកម្មប្រឆាំងរដ្ឋាភិបាល រួមទាំងហេតុការណ៍អសន្តិសុខកើតឡើងនៅប្រទេសអ៊ីរ៉ង់រហូតបណ្តាលឱ្យមនុស្សស្លាប់យ៉ាងច្រើនសន្ធឹកសន្ធាប់ ថាជាការបំផ្លាញ ដែលលោកធ្លាប់និយាយពាក្យនេះថ្កោលទោសក្រុមចលនាបះបោរ Green Movement កាលពីឆ្នាំ២០០៩ និងការធ្វើបាតុកម្មកន្លងមក ។

មេដឹកនាំកំពូលអ៊ីរ៉ង់និយាយទៅកាន់អ្នកគាំទ្រជាច្រើននៅទីក្រុងតេហេរ៉ង់ កាលពីថ្ងៃទី១ ខែកុម្ភៈ ឆ្នាំ២០២៦ ក្នុងឱកាសគម្រប់ខួបការវិលត្រឡប់មកប្រទេសវិញរបស់លោក បន្ទាប់ពីស្វែងរកសិទ្ធិជ្រកកោននៅប្រទេសបារាំង កាលពីឆ្នាំ១៩៧៩ ថា អ៊ីរ៉ង់មិនខ្លាចនាវាដឹកយន្តហោះចម្បាំងរបស់អាមេរិកឈ្មោះ USS Abraham Lincoln ទេ ។

ការព្រមានរបស់មេដឹកនាំអ៊ីរ៉ង់ បន្ទាប់ពីលោកប្រធានាធិបតី Trump ពិចារណាវាយប្រហារអ៊ីរ៉ង់ទ្រង់ទ្រាយធំ ដោយសារការពិភាក្សារវាងអាមេរិក និងអ៊ីរ៉ង់ អំពីការកំណត់កម្មវិធីនុយក្លេអ៊ែរ និងផលិតមីស៊ីលផ្លោងគ្មានលទ្ធផល ។ លោកប្រធានាធិបតី Trump សង្ឃឹមថា អ៊ីរ៉ង់នឹងយល់ព្រមធ្វើកិច្ចព្រមព្រៀងនុយក្លេអ៊ែរជាមួយអាមេរិក ប្រសិនបើអ៊ីរ៉ង់មិនធ្វើកិច្ចព្រមព្រៀងទេ នឹងមានសង្គ្រាមកើតឡើងដូចការលើកឡើងរបស់មេដឹកនាំអ៊ីរ៉ង់មិនខាន ។

ចំណែករដ្ឋមន្ត្រីការបរទេសអ៊ីរ៉ង់ លោក Abbas Araghchi បានផ្តល់សម្ភាសន៍ពិសេសជាមួយសារព័ត៌មាន CNN ថា លោកមានទំនុកចិត្តអ៊ីរ៉ង់នឹងអាចធ្វើកិច្ចព្រមព្រៀងជាមួយអាមេរិក ស្តីពីគម្រោងនុយក្លេអ៊ែរ ។ ការលើកឡើងបែបនេះស្របគ្នានឹងមន្ត្រីសន្តិសុខជាន់ខ្ពស់អ៊ីរង់និយាយកន្លងមកថា ការចរចាជាមួយអាមេរិកកំពុងដំណើរការទៅមុខ ។

គួរបញ្ជាក់ថា អាមេរិកបានបញ្ជូននាវា USS Abraham Lincoln សម្រាប់ដឹកយន្តហោះចម្បាំងចូលមកកាន់តែកៀកប្រទេសអ៊ីរ៉ង់ ដើម្បីឱ្យកងទ័ពជើងទឹកអាមេរិកត្រៀមខ្លួនវាយប្រហារអ៊ីរ៉ង់ ៕

អានហ៊ួយ៖ តើអ្នកធ្លាប់ស្រមៃទេថា ខ្យល់អាកាសដ៏ត្រជាក់ដែលបក់កាត់ពីលើយើងរាល់ថ្ងៃ អាចក្លាយជា ថាមពល ដ៏មហាសាលដែលមិនចេះរីងស្ងួត? ជាទូទៅ នៅពេលយើងនិយាយពីថាមពលខ្យល់ យើងតែងតែនឹកឃើញដល់ទួរប៊ីនខ្យល់យក្សដែលមានស្លាបចក្រធំៗ ឈរយ៉ាងស្វាហាប់នៅលើដី ឬកណ្តាលសមុទ្រ។ ប៉ុន្តែពេលនេះ ក្រុមហ៊ុន Energy China បានធ្វើឱ្យពិភពលោកភ្ញាក់ផ្អើល តាមរយៈការផ្លាស់ប្តូរការគិតបែបបុរាណនេះ ដោយការបង្ហោះ ស្ថានីយថាមពលហោះទៅលើមេឃ ហើយភ្ជាប់វាចូលទៅក្នុងបណ្តាញអគ្គិសនីជាតិបានសម្រេចជាស្ថាពរ។

មូលហេតុដែលនាំឱ្យបច្ចេកវិទ្យានេះមានភាពអស្ចារ្យ គឺដោយសារវាស្ថិតនៅកម្ពស់ខ្ពស់ រហូតដល់ទៅ ២០០០ ម៉េត្រ។ នៅលើដីដែលយើងរស់នៅ ខ្យល់ជារឿយៗត្រូវបានរារាំងដោយដើមឈើ អគារ និងភ្នំ ដែលធ្វើឱ្យវាមិនសូវមានកម្លាំងខ្លាំង។ ប៉ុន្តែនៅកម្ពស់រាប់រយម៉ែត្រលើអាកាស មានចរន្តខ្យល់ ដែលបក់បោកយ៉ាងខ្លាំងក្លា និងមានស្ថិរភាពបំផុត។ ប្រព័ន្ធទួរប៊ីនហោះនេះ មានរូបរាងដូចជាយន្តហោះគ្មានមនុស្សបើក និងមានខ្សែរដូចជាខ្លែង ដែលត្រូវបានគេបង្ហោះឱ្យទៅស្ទូចយកថាមពលពីចរន្តខ្យល់កម្រិតខ្ពស់ទាំងនោះមកប្រើប្រាស់។

នៅពេលខ្លែងបច្ចេកវិទ្យា នេះហោះហើរតាមគន្លងជារង្វង់ ឬរាងលេខប្រាំបី វានឹងបង្កើតកម្លាំងទាញដ៏មហាសាល។ កម្លាំងនេះនឹងអូសទាញខ្សែកាបដែលមានកម្លាំងខ្ពស់ ដែលភ្ជាប់ពីលើអាកាសចុះមកក្រោមដី ដើម្បីបង្វិលម៉ាស៊ីនបង្កើតថាមពល (Generator) យ៉ាងលឿនស្លេវ។ វាគឺមានចលនាដែលមិនចេះឈប់ឈរ ដោយហោះឡើងបង្កើតកម្លាំងទាញ និងទម្លាក់ខ្លួនបន្តិចដើម្បីប្រមូលកម្លាំងហោះបន្តទៀត បង្កើតបានជាចរន្តអគ្គិសនីបានដល់ទៅ ២.៥ មេហ្គាវ៉ាត់ ដែលផ្គត់ផ្គង់ផ្ទះពលរដ្ឋបានរាប់ពាន់ខ្នង។

វាសាមញ្ញតែមានប្រសិទ្ធភាពខ្ពស់ បើប្រៀបធៀបទៅនឹងទួរប៊ីនខ្យល់បុរាណ បច្ចេកវិទ្យាហោះហើរនេះមិនត្រូវការប្រើប្រាស់បេតុង ឬដែករាប់ម៉ឺនតោនដើម្បីសាងសង់បង្គោលខ្ពស់ៗនោះទេ។ នេះមានន័យថា វាមានតម្លៃដើមទាបជាងមុន និងមានផលប៉ះពាល់ដល់បរិស្ថានតិចតួចបំផុត។ លើសពីនេះទៅទៀត វាមានភាពបត់បែនខ្ពស់បំផុត ដែលគេអាចយកទៅប្រើប្រាស់បានគ្រប់ទីកន្លែង មិនថាជាតំបន់ភ្នំដាច់ស្រយាល កោះតូចៗ ឬសូម្បីតែនៅកណ្តាលសមុទ្រជ្រៅ ដែលបច្ចេកវិទ្យាចាស់ៗមិនអាចទៅដល់។

ការជោគជ័យនៃការតភ្ជាប់ចរន្តអគ្គិសនីនៅខេត្តអានហ៊ួយ គឺជាសក្ខីភាពមួយបង្ហាញថា ចិនកំពុងតែបោះជំហានយ៉ាងលឿនក្នុងការនាំមុខលើ ” Frontier Technology” ឬបច្ចេកវិទ្យាជួរមុខ។ ការផ្លាស់ប្តូរពីការសាកល្បងនៅក្នុងមន្ទីរពិសោធន៍ មកជាការផ្តល់អគ្គិសនីប្រើប្រាស់ជាក់ស្តែងក្នុងផ្ទះសម្បែង គឺជាសមិទ្ធផលដែលនឹងផ្លាស់ប្តូរមុខមាត់នៃវិស័យថាមពលស្អាតជារៀងរហូត។ ពិភពលោកកំពុងតាមដានមើលដោយក្តីសង្ឃឹមថា នៅថ្ងៃអនាគតដ៏ខ្លី យើងនឹងឃើញ ខ្លែងអគ្គិសនីទាំងនេះ ហោះហើរពាសពេញផ្ទៃមេឃ ដើម្បីផ្ដល់ពន្លឺ និងជីវិតដល់មនុស្សជាតិដោយមិនបំផ្លាញផែនដី៕

ប្រទេសចិន ៖ យោងតាមរបាយការណ៍ប្រព័ន្ធផ្សព្វផ្សាយរដ្ឋ តុលាការចិនមួយបានកាត់ទោ.សប្រហារជីវិតអតីតអភិបាលក្រុងហៃគូ បន្ទាប់ពីការស៊ើបអង្កេតបានបង្ហាញថាគាត់មានជាប់ពាក់ព័ន្ធនៅក្នុងសំណុំរឿងពុករ.លួយដ៏ធំមួយមិនដែលមានក្នុងប្រវត្តិសាស្ត្រ ជាមួយនឹងការរឹបអូសបានមាសចំនួន ១៣តោនកន្លះ និងលុយសុទ្ធដ៏ច្រើនមហាសាលនៅក្នុងឃ្លាំងស្តុកទ្រព្យរបស់គាត់។

លោក Zhang Qi អតីតមន្ត្រីជាន់ខ្ពស់ និងជាអតីតអភិបាលក្រុងហៃគូ រដ្ឋធានីនៃខេត្តហៃណាន ត្រូវបានតុលាការចិនបានកាត់ទោ.សប្រ.ហារជីវិត បន្ទាប់ពីរកឃើញថាគាត់មានទោសពីបទសូកប៉ាន់ និងរំលោ.ភអំណាច។ តុលាការបានសម្រេចថា បទឧក្រិដ្ឋរបស់លោក Zhang ពាក់ព័ន្ធនឹងចំនួនទឹកប្រាក់ដ៏ច្រើនលើសលប់ និងបង្កការខូចខាតយ៉ាងធ្ងន់ធ្ងរដល់ផលប្រយោជន៍សាធារណៈ ដែលឈានដល់កម្រិតនៃការផ្តន្ទាទោសដ៏ធ្ងន់ធ្ងរបំផុតក្រោមច្បាប់ចិន។

ក្រុមអ្នកស៊ើបអង្កេតបាននិយាយថា លោក Zhang បានប្រមូលទ្រព្យសម្បត្តិខុសច្បាប់យ៉ាងច្រើនតាមរយៈប្រាក់សំណូកដែលទាក់ទងនឹងកិច្ចព្រមព្រៀងដីធ្លី និងកិច្ចសន្យារដ្ឋាភិបាល ដោយអាជ្ញាធរបានរឹបអូសប្រាក់សុទ្ធ មាស និងទ្រព្យសម្បត្តិប្រណីតយ៉ាងច្រើនពីឃ្លាំងទ្រព្យសម្បត្តិរបស់មន្ត្រីរូបនេះ។

គួរជម្រាបថា កាលពីអំឡុងពេលកាន់តំណែងជាអភិបាលក្រុងហៃគូពីឆ្នាំ ២០០៩ ដល់ ២០១៩ លោក Zhang ជាអ្នកចេញច្បាប់សាងសង់ និង គម្រោងសំណង់ហេដ្ឋារចនាសម័ន្ធនានា ដែលធ្វើអោយលោកប្រមូលទ្រព្យសម្បត្តិដ៏សន្ធឹកសន្ធាប់រាប់ពាន់លានដុល្លារ ។

ករណីនេះបានទាក់ទាញការចាប់អារម្មណ៍យ៉ាងទូលំទូលាយ បន្ទាប់ពីរបាយការណ៍មួយចំនួនបានលេចធ្លាយអំពីទ្រព្យសម្បត្តិខុសច្បាប់យ៉ាងច្រើនដែលជាប់ទាក់ទងនឹងលោក Zhang។ ការផ្តន្ទាទោសលោក Zhang គឺជាផ្នែកមួយនៃយុទ្ធនាការប្រឆាំងអំពើពុករលួយដែលកំពុងបន្តរបស់ប្រទេសចិន ដែលបានកំណត់គោលដៅមន្ត្រីនៅថ្នាក់ជាន់ខ្ពស់ និងថ្នាក់មូលដ្ឋានក្នុងប៉ុន្មានឆ្នាំចុងក្រោយនេះ៕

ប្រទេសកុងហ្គោ ៖ អណ្តូងរ៉ែជាច្រើនកន្លែងនៅតំបន់ Rubaya ភាគខាងកើតសាធារណរដ្ឋប្រជាធិបតេយ្យកុងហ្គោ បានបាក់ដោយសារភ្លៀងធ្លាក់ខ្លាំងកាលពីថ្ងៃទី២៨ និង២៩ ខែមករា ឆ្នាំ២០២៦ បណ្តាលឱ្យមនុស្សស្លា.ប់កើនឡើងរហូតដល់ជាង២០០នាក់ ក្នុងនោះសាកស.ពកប់ក្នុងអណ្តូងរ៉ែ ក៏មានស្ត្រី និងកុមារផងដែរ ដែលក្រុមហ៊ុនអណ្តូងរ៉ែមិនបានជួលមកធ្វើការជាផ្លូវការ ហើយមានមនុស្សតែ២០នាក់ប៉ុណ្ណោះត្រូវបានបញ្ជូនទៅមន្ទីរពេទ្យ ។ តាមការសន្និដ្ឋាន ចំនួនមនុស្សស្លា.ប់ដោយសារការបាក់អណ្តូងរ៉ែនឹងកើនឡើងបន្ថែមទៀត ។

រហូតមកដល់ថ្ងៃទី១ ខែកុម្ភៈ អណ្តូងរ៉ែទាំងនេះនៅតែមានភ្លៀងធ្លាក់ជាបន្តបន្ទាប់ ហើយភ្នាក់ងារសង្គ្រោះមិនដឹងពីចំនួនមនុស្សស្លាប់ពិតប្រាកដទេ ។ អតីតអ្នកមើលការខុសត្រូវអណ្តូងរ៉ែប្រាប់ថា អណ្តូងរ៉ែនៅតំបន់ Rubaya មិនទទួលបានការថែទាំត្រឹមត្រូវទើបងាយកើតគ្រោះថ្នាក់ និងពិបាកជួយសង្គ្រោះជនរងគ្រោះពេលបាក់អណ្តូងរ៉ែម្តងៗ ។ ក្រៅពីនេះ ដីនៅអណ្តូងរ៉ែងាយនឹងបាក់បន្ថែមទៀតកាន់តែធ្វើឱ្យស្ថានការណ៍អាក្រក់ខ្លាំងឡើង ។

អណ្តូងរ៉ែជាច្រើនកន្លែងនៅជាតំបន់ Rubaya ភាគខាងកើតប្រទេសកុងហ្គោ គឺជាកន្លែងរុករករ៉ែ Coltan ឬរ៉ែ Columbite-tantalite ជារ៉ែដ៏សំខាន់របស់រ៉ែ Tantalum ដែលជាលោហៈដ៏កម្រសម្រាប់ប្រើប្រាស់ក្នុងការផលិតឧបករណ៍អេឡិចត្រូនិកទំនើប ដូចជា ៖ ស្មាតហ្វូន និងកុំព្យូទ័រ ។ បើតាមការវាយតម្លៃរបស់អង្គការសហប្រជាជាតិ (UN) អណ្តូងរ៉ែនៅតំបន់ Rubaya តែមួយអាចផលិតរ៉ែ Tantalum រហូតដល់១៥% នៃការផលិតរ៉ែសម្រាប់លក់ទីផ្សារពិភពលោកទាំងអស់ ។

ទោះជាអណ្តូងរ៉ែជាច្រើននៅតំបន់ Rubaya គឺជាឧស្សាហកម្មដែលផ្តល់ប្រាក់ចំណូលចូលប្រទេសកុងហ្គោ ប៉ុន្តែអណ្តូងរ៉ែភាគច្រើនគ្មានប្រព័ន្ធការពារស្តង់ដារសម្រាប់ការជីកយករ៉ែប្រកបដោយសុវត្ថិភាពនោះទេ ទើបធ្វើឱ្យអណ្តូងរ៉ែជាច្រើនកន្លែងបាក់រលំមានមនុស្សស្លាប់ជាញឹកញាប់ ។

អណ្តូងរ៉ែទាំងនេះស្ថិតក្រោមការគ្រប់គ្រងរបស់ក្រុមឧទ្ទាម AFC/M23 តាំងពីពាក់កណ្តាលឆ្នាំ២០២៤ ទើបធ្វើឱ្យរដ្ឋាភិបាលពិបាកត្រួតពិនិត្យ និងជួយសង្គ្រោះមនុស្សក្នុងអណ្តូងរ៉ែ ។ បើតាមការសន្និដ្ឋាន ចំនួនមនុស្សស្លាប់នឹងកើនឡើងបន្ថែមទៀត ពីព្រោះមានមនុស្សជាច្រើននាក់កប់ក្រោមដីនៅឡើយ ៕