ប្រធាន ACU ចាត់ទុកការផ្ដល់ប្រាក់ឲ្យក្រៅផ្លូវការសម្រាប់សេវាសាធារណៈ គឺជាបទល្មើសពុករលួយ

លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) ពន្យល់ថា សកម្មភាពផ្ដល់ប្រាក់ក្រៅផ្លូវការដើម្បីស៊ីសូកក្នុងការផ្តល់សេវាសាធារណៈ គឺជាបទល្មើសពុករលួយ ហើយទាំងអ្នកទទួល និងអ្នកដែលផ្ដល់ឲ្យនឹងត្រូវមានទោសទណ្ឌដូចគ្នា។

ថ្លែងនៅក្នុងពិធីបើកសិក្ខាសាលាថ្នាក់ជាតិ ស្តីពី «គណនេយ្យភាព និងតម្លាភាព នៃប្រព័ន្ធគាំពារសង្គមកម្ពុជា» កាលពីថ្ងៃព្រហស្បត្តិ៍ ទី១៩ ខែមីនា លោក ឱម យ៉ិនទៀង បានលើកឡើងអំពីអកប្បកិរិយាមួយចំនួនរបស់មន្រ្តីដែលផ្ដល់សេវាសាធារណៈជូនប្រជាពលរដ្ឋថាជាការទាមទារការស៊ីសូកដោយប្រយោល បើទោះជាមិនបាននិយាយចេញមកដោយត្រង់ក៏ដោយ។

តាមប្រសាសន៍របស់លោក បើទោះជាការផ្ដល់ឲ្យខ្លះគឺជាផ្ដល់ឲ្យដោយមនោសញ្ចេតនា ឬស្ម័គ្រចិត្តពីប្រជាពលរដ្ឋ មិនមែនជាការទាមទាររបស់មន្រ្តីក៏ដោយ ប៉ុន្តែទង្វើបែបនេះនឹងបង្កើតទៅជាទម្លាប់មិនល្អនៅក្នុងការផ្ដល់សេវា។ មិនតែប៉ុណ្ណោះបើយោងទៅតាមផ្នែកច្បាប់ ការព្រឹត្តបែបនេះគឺស្មើទៅនឹងបទល្មើសពុករលួយ ដោយភាគីទាំងសងខាង ពោលគឺទាំងអ្នកឲ្យនិងអ្នកទទួលត្រូវប្រឈមមុខនឹងច្បាប់។

ទោះជាយ៉ាងណាក៏ដោយ នៅក្នុងករណីខ្លះបទល្មើសអំពើពុករលួយនេះនឹងត្រូវផ្តន្ទាទោសតែចំពោះអ្នកទទួលប៉ុណ្ណោះ ប្រសិនបើការស៊ើបអង្កេតរកឃើញថា ការផ្ដល់ឲ្យនោះគឺជាការផ្ដល់ឲ្យទាំងបង្ខំដោយសារមានការសម្លុត, ឬឲ្យដោយសារភាពភ័យខ្លាចណាមួយដែលមិនមានឆន្ទៈពិតប្រាកដក្នុងការឲ្យ នោះអ្នកដែលត្រូវទទួលទោសទណ្ឌនឹងត្រូវធ្លាក់ទៅលើតែអ្នកទទួលប៉ុណ្ណោះ។

ស្របពេលជាមួយគ្នានេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏បានគូសបញ្ជាក់ផងដែរថា ប្រសិនបើមន្រ្តីACUណាម្នាក់ប្រព្រឹត្តអំពើពុករលួយ នោះអង្គភាពនឹងចាប់ខ្លួនពួកគេដោយផ្ទាល់ ខណៈមកដល់ពេលនេះ អង្គភាពACU បានបញ្ជូនមន្រ្តីរបស់ខ្លួនដែលប្រព្រឹត្តអំពើពុករលួយជិត១០នាក់ទៅកាន់តុលាការ។ លោកបន្ថែមថា អង្គភាពACU ហាក់ដូចជា ផ្នែកស៊ើបអង្កេតផ្ទៃក្នុងជូនគ្រប់ក្រសួង-ស្ថាប័នទាំងអស់ និងជម្រាបជូនពីបញ្ហាផ្សេងៗរបស់អ្នកប្រព្រឹត្តមុនបញ្ជូនទៅកាន់តុលាការ៕