សហរដ្ឋអាមេរិក ៖ អគារដ៏ចម្លែកមួយនេះស្ថិតនៅតំបន់ជនបទក្នុងរដ្ឋ Kansas សហរដ្ឋអាមេរិក ដែលមានប្រវត្តិយ៉ាងអាថ៌កំបាំង និងគួរឱ្យចាប់អារម្មណ៍ ។ កាលពីឆ្នាំ២០២២ ក្រុមហ៊ុនអចលនទ្រព្យបានប្រកាសលក់អគារក្នុងតម្លៃជាង៣៦ម៉ឺនដុល្លារអាមេរិក សម្រាប់មហាសេដ្ឋីណាដែលមានប្រាក់ច្រើនអាចជួសជុលអគារឡើងវិញ ។

នៅផ្នែកខាងក្នុងអគារ គឺជាលេណដ្ឋានលាក់ខ្លួនរបស់កងទ័ពអាមេរិក និងធ្លាប់ជាកន្លែងដាក់មីស៊ីលបាញ់ឆ្លងទ្វីប កាលពីឆ្នាំ១៩៦០ ។ អគារនេះមានសុវត្ថិភាព និងអាចទប់ទល់ជាមួយការវាយប្រហារដោយអាវុធនុយក្លេអ៊ែរបាន ។ ប៉ុន្តែបច្ចុប្បន្ន អគារនៅក្រោមដីគ្មានភាពស្រស់ស្អាត និងមិនគួរឱ្យរស់នៅទេ លើកលែងតែអ្នកទិញអគារមានប្រាក់ជួសជុលឱ្យថ្មីឡើងវិញ ។

លេណដ្ឋានត្រូវបានសាងសង់ស្មើទំហំដីជាង៤ហិកតា ហើយនៅក្រោមអគារមានភ្លើងអគ្គិសនី, ទឹកស្អាត និងប្រព័ន្ធចម្រោះទឹកកខ្វក់ ។ អគារនេះត្រូវបានសាងសង់ជាច្រើនជាន់នៅក្រោមដី ហើយនៅជាន់ក្រោមបង្អស់ គឺជាបន្ទប់សម្រាប់បង្ហោះមីស៊ីល ។

កាលពីឆ្នាំ២០២២ ក្រុមហ៊ុនអចលនទ្រព្យ Hirsch Real Estate បានប្រកាសលក់អគារក្នុងតម្លៃជាង៣៦ម៉ឺនដុល្លារអាមេរិក ដោយក្រុមហ៊ុនផ្សព្វផ្សាយថា គេអាចយកអគារធ្វើជាការិយាល័យ ឬឃ្លាំងទុកសម្ភារៈ ។ វាជាកន្លែងមានសក្តានុពលយ៉ាងខ្លាំង ហើយអាចកែច្នៃអគារធ្វើជាលំនៅឋាន, អាផាតមិន និងកន្លែងស្នាក់នៅបណ្តោះអាសន្ន ។ បើអតិថិជនចង់បានទីកន្លែងមានសុវត្ថិភាព និងខុសប្លែកពីគេ គឺអគារនេះស័ក្តិសមយ៉ាងខ្លាំង ។

ចំណែកប្រវត្តិរបស់អគារវិញ គឺវាជាកន្លែងបង្ហោះមីស៊ីល Atlas F មួយកន្លែងក្នុងចំណោម១២កន្លែង ដែលស្ថិតនៅរដ្ឋ Kansas សហរដ្ឋអាមេរិក ប៉ុន្តែបច្ចុប្បន្ន អគារទាំងមូលត្រូវបានទុកចោល ។ កងទ័ពអាមេរិកបានយកអគារក្រោមដីធ្វើជាលេណដ្ឋានគេចពីគ្រោះថ្នាក់ ទើបអគារត្រូវបានសាងសង់ឱ្យក្លាយជាកន្លែងទប់ទល់នឹងការវាយប្រហារដោយអាវុធនុយក្លេអ៊ែរ ៕

ប្រទេសកូរ៉េខាងជើង ៖ កាលពីថ្ងៃទី២៧ ខែតុលា ឆ្នាំ២០២៤ សារព័ត៌មានបរទេសរាយការណ៍ថា កូរ៉េខាងជើងបានចាប់ផ្តើមសាងសង់របងនៅតាមព្រំដែនជាប់កូរ៉េខាងត្បូង ក្រោយពីកូរ៉េខាងជើងបានបំផ្ទុះគ្រាប់បែ.ក បំផ្លា.ញ ផ្លូវ កាលពីពាក់កណ្តាលខែតុលា ឆ្នាំ២០២៤ ។ ក្រៅពីនេះ មេដឹកនាំកំពូលកូរ៉េខាងជើងបានបញ្ជាឱ្យកែប្រែខ្លឹមសារក្នុងរដ្ឋធម្មនុញ្ញ និងចាត់ទុកថា កូរ៉េខាងត្បូងជាសត្រូវរបស់ខ្លួន ។

តាមរូបភាពថតពីផ្កាយរណបរបស់អាមេរិក និងបានផ្សព្វផ្សាយកាលពីថ្ងៃទី២៤ ខែតុលា កន្លងមកថា កូរ៉េខាងជើងបានសាងសង់របងនៅតាមព្រំដែនជាប់កូរ៉េខាងត្បូង ដែលមានប្រវែង៩៥ម៉ែត្រ ។ របងនេះស្ថិតនៅភាគខាងជើងនៃខ្សែបន្ទាត់ព្រំដែនយោធា ហើយកាលពីមុន នៅទីនេះ គឺជាទីតាំងតភ្ជាប់ទៅកាន់តំបន់ឧស្សាហកម្ម «គេស៊ុង» និងទីក្រុងប៉ាជូ ដែលជាទីក្រុងជាយដែនរបស់កូរ៉េខាងត្បូង ។

ក្រៅពីនេះ ផ្កាយរណបរបស់អាមេរិកក៏បានបង្ហាញពីរូបភាពការសាងសង់សំណង់ផ្សេងទៀតរបស់កូរ៉េខាងជើងផងដែរ ដែលមានប្រវែងប្រមាណ២០០ម៉ែត្រ ស្ថិតនៅទីតាំងក្បែរគ្នា ។

កាលពីពាក់កណ្តាលខែតុលា ឆ្នាំ២០២៤ កងទ័ពកូរ៉េខាងជើងបានបំផ្ទុះគ្រាប់បែកបំផ្លាញផ្លូវយ៉ុងគី និងផ្លូវដុងហ៊ែ ដោយអះអាងថា គឺជាវិធានការមួយពុំអាចចៀសបាន ប៉ុន្តែវាត្រឹមត្រូវតាមរដ្ឋធម្មនុញ្ញ និងជាការកាត់ផ្តាច់ទំនាក់ទំនងជាមួយកូរ៉េខាងត្បូង ។

សារព័ត៌មានកណ្តាលកូរ៉េ (KCNA) របស់រដ្ឋាភិបាលក្រុងព្យុងយ៉ាង រាយការណ៍ថា កូរ៉េខាងជើងបានកែប្រែខ្លឹមសារខ្លះក្នុងរដ្ឋធម្មនុញ្ញ និងបន្ថែមខ្លឹមសារថ្មី ដោយកំណត់ថា កូរ៉េខាងត្បូងជាសត្រូវរបស់កូរ៉េខាងជើង ។ ការកែប្រែខ្លឹមសាររដ្ឋធម្មនុញ្ញ គឺធ្វើឡើងតាមការបញ្ជារបស់មេដឹកនាំកំពូលកូរ៉េខាងជើង លោក គីម ជុងអ៊ុន កាលពីដើមឆ្នាំ២០២៤ គឺឱ្យសភាប្រជាជនកំពូលកែតម្រូវខ្លឹមសាររដ្ឋធម្មនុញ្ញ ។

គួរបញ្ជាក់ថា កាលពីឆ្នាំ២០២០ កូរ៉េខាងជើងបានបំផ្ទុះគ្រាប់បែកបំផ្លាញមជ្ឈមណ្ឌលសម្របសម្រួលរួមរវាងប្រទេសកូរ៉េទាំងពីរ ដែលមជ្ឈមណ្ឌលនេះស្ថិតនៅក្នុងតំបន់ឧស្សាហកម្ម «គេស៊ុង» របស់កូរ៉េខាងជើង ។ រីឯប្រាក់សម្រាប់ការចំណាយសាងសង់មជ្ឈមណ្ឌលនេះ គឺបានមកពីកូរ៉េខាងត្បូង ៕

នៅពេលបច្ចេកវិទ្យា AI កាន់តែរីកចម្រើនខ្លាំងឡើង បានធ្វើឱ្យយើងឃើញស្នាដៃជាច្រើនដែលបង្កើតឡើងដោយមនុស្សយន្ត ។ ជាក់ស្តែង ស្នាដៃសិល្បងៈដ៏ទំនើបនេះ គឺកើតឡើងដោយសារដៃមនុស្សយន្តប្រើប្រាស់បច្ចេកវិទ្យា AI រៀនសូត្រពីជំនាញគូរគំនូរតាមមនុស្ស បន្ទាប់មក ដៃមនុស្សយន្តនឹងគូរគំនូរជាថ្មីតាមរបៀបមនុស្សយន្ត ។

គំនូរគូរដោយដៃមនុស្សយន្តនេះ បានក្លាយជាការរួមបញ្ចូលគ្នារវាងស្នាដៃសិល្បៈរបស់មនុស្សជាមួយបច្ចេកវិទ្យា AI យ៉ាងស្រស់ស្អាត ។ មនុស្សយន្តអាចប្រើប្រាស់ដៃគូរគំនូរនេះ មានឈ្មោះថា D.O.U.G ដែលបង្កើតឡើងដោយអ្នកជំនាញដ៏ល្បីឈ្មោះម្នាក់ជាកូនកាត់ចិន និងកាណាដា គឺអ្នកស្រី Sougwen Chung ។

អ្នកស្រីរៀបរាប់ថា អ្នកស្រីបានចំណាយពេលពេលវេលាអស់ជាច្រើនឆ្នាំអភិវឌ្ឍន៍បច្ចេកវិទ្យា AI ដើម្បីជួយឱ្យមនុស្សយន្តអាចប្រើប្រាស់ដៃគូរគំនូរ ក្រោយពីវាបានរៀនសូត្រតាមផ្ទាំងគំនូរដែលគូរដោយមនុស្ស ។

អ្នកស្រី Sougwen Chung បានបង្កើតប្រព័ន្ធបណ្តាញសរសៃប្រសាទសិប្បនិម្មិត និងហ្វឹកហាត់មនុស្សយន្តឱ្យចេះវិភាគពីផ្ទាំងគំនូរដែលអ្នកស្រីបានគូរ ដើម្បីឱ្យវាអាចគូររូបតាមអ្នកស្រី ។ នេះជាផ្នែកមួយដើម្បីឱ្យយើងឈ្វេងយល់ថា តើមនុស្ស និងមនុស្សយន្តអាចធ្វើការរួមគ្នាបានដែរឬទេ ។

ក្រៅពីនេះ អ្នកស្រីត្រូវបានគេសរសើរថា គឺជាអ្នកចាប់ផ្តើមបង្កើតការសហការគ្នារវាងមនុស្សជាមួយមនុស្សយន្តទៀតផង ហើយអ្នកស្រីក៏ស្ថិតក្នុងចំណោមបុគ្គល១០០នាក់ ដែលមានឥទ្ធិពលបំផុតលើពិភពលោក ផ្នែកប្រើប្រាស់បច្ចេកវិទ្យា AI និងការច្នៃប្រឌិត ដែលចាត់ចំណាត់ថ្នាក់ដោយទស្សនាវដ្តី Time កាលពីឆ្នាំ២០២៣ ។

ការបង្ហាញស្នាដៃគូរគំនូរដោយដៃមនុស្សយន្តនេះ គឺបានធ្វើឡើងក្នុងកម្មវិធី «The House of Fine Art» នៅទីក្រុងឡុងដ៍ ប្រទេសអង់គ្លេស ។ រូបគំនូរគូរដោយដៃមនុស្សយន្តទទួលបានការចាប់អារម្មណ៍យ៉ាងខ្លាំងពីអ្នកចូលរួមកម្មវិធី ។

រូបគំនូរគូរដោយដៃមនុស្សយន្តខ្លះទៀត ត្រូវបានអ្នកចូលរួមកម្មវិធី «The House of Fine Art» ប្រមូលទិញយក ដោយសារពួកគេចាប់អារម្មណ៍នឹងស្នាដៃសិល្បៈដែលកើតឡើងពីការសហការរវាងមនុស្ស និងមនុស្សយន្ត ។ ស្នាដៃសិល្បៈទាំងនេះបានរំលេចរូបភាពយ៉ាងល្អឥតខ្ចោះនៅលើផ្ទាំងក្រណាត់ ៕

ថ្វីត្បិតតែរថយន្តបែបអឺរ៉ុបទំនើប និងទាន់សម័យ គឺជារថយន្តក្នុងក្តីស្រមៃរបស់មនុស្សជាច្រើនក៏ដោយ ប៉ុន្តែរថយន្តជប៉ុននៅតែត្រូវបានគេចាត់ទុកថា មានប្រជាប្រិយភាព និងពេញនិយមជាង ដោយសារគុណសម្បត្តិធំៗទាំងនេះ ទើបធ្វើឱ្យមនុស្សជាច្រើនមិនអាចប្តូរចិត្តពីរថយន្តជប៉ុន ទៅរថយន្តអឺរ៉ុបបានឡើយ។ ដូច្នេះហើយតើគុណសម្បត្តិអ្វីខ្លះ ដែលធ្វើឱ្យរថយន្តជប៉ុននៅតែមានភាពទាក់ទាញជាងរថយន្តអឺរ៉ុប? សម្រាប់មូលហេតុរួមមាន៖

១.រឹងមាំ និងធន់៖ រថយន្តជប៉ុនជាទូទៅមានភាពល្បីល្បាញដោយសារធន់ និងអាចប្រើប្រាស់បានច្រើនឆ្នាំ ដោយមិនចាំបាច់ត្រូវការថែទាំញឹកញាប់ពេកនោះទេ នេះគឺជាលទ្ធផលនៃការរចនា និងការផលិតដែលសង្កត់ធ្ងន់ទៅលើភាពរឹងមាំ និងធន់ ជាហេតុធ្វើឱ្យរថយន្តជប៉ុននៅតែមានប្រជាប្រិយភាពជាងរថយន្តដទៃ។

២.ការចំណាយលើការថែទាំទាប៖ តម្លៃនៃគ្រឿងបន្លាស់ និងកម្លាំងពលកម្មដើម្បីថែទាំរថយន្តជប៉ុនជាធម្មតាមានតម្លៃថោកជាងរថយន្តអឺរ៉ុប។ នេះអនុញ្ញាតឱ្យអ្នកប្រើប្រាស់អាចធ្វើជាម្ចាស់រថយន្តជប៉ុនបានរយៈពេលវែងដោយមិនខ្វល់ខ្វាយច្រើនអំពីថ្លៃថែទាំ។

៣.ប្រសិទ្ធភាពប្រេង៖ រថយន្តជប៉ុនជាច្រើនចាប់ពីប្រភេទ B-segment sedans ដល់ SUVs/PPVs ត្រូវបានរចនាឡើងដើម្បីសន្សំសំចៃប្រេង។ នេះគឺជាកត្តាចម្បងដែលមនុស្សជាច្រើនប្រើនៅពេលពិចារណាទិញរថយន្ត។

៤.ភាពជឿជាក់ខ្ពស់៖ ម៉ាករថយន្តជប៉ុនជាច្រើនត្រូវបានទទួលស្គាល់សម្រាប់ភាពជឿជាក់ និងស្តង់ដារគុណភាពខ្ពស់របស់ពួកគេ។ អ្នកអាចស្វែងរកគ្រឿងបន្លាស់បានយ៉ាងងាយស្រួល ទាំងគ្រឿងបន្លាស់ពិត និងគ្រឿងបន្លាស់ដែលអាចប្រៀបធៀបបាន ដូច្នេះវាអាចប្រើបានយូរឆ្នាំ។

៥.តម្លៃលក់បន្តល្អ៖ រថយន្តជប៉ុនមានតម្លៃលក់បន្តល្អបើធៀបទៅនឹងរថយន្តអឺរ៉ុប ដោយសារតែប្រជាប្រិយភាពខ្ពស់របស់វានៅលើទីផ្សារ ហើយតម្លៃថ្មីគឺទាបជាងរថយន្តអឺរ៉ុប។ ទោះបីជាអត្រានៃការរំលោះគឺដូចគ្នាក៏ដោយ ប៉ុន្តែបើគិតពីចំនួនលុយវិញក៏នៅតែចាត់ទុកថារថយន្តជប៉ុនមានតម្លៃថោកជាងរថយន្តអឺរ៉ុបផងដែរ។

ហេតុនេះហើយប្រសិនបើអ្នកចង់បានរថយន្ត ប្រើប្រាស់បានយូរ ស៊ីប្រេងតិច និងការថែទាំងាយស្រួល រថយន្តជប៉ុនអាចជាជម្រើសដ៏ល្អ។ ប៉ុន្តែប្រសិនបើអ្នកចង់បានរថយន្តដែលមានការរចនាស្រស់ស្អាត ដំណើរការខ្ពស់ និងបច្ចេកវិទ្យាទំនើបទាន់សម័យ រថយន្តអឺរ៉ុបគឺជាជម្រើសដ៏គួរឱ្យចាប់អារម្មណ៍មួយទៀតផងដែរ៕

ប្រទេសថៃ ៖ ពលរដ្ឋថៃលើកឡើងថា បច្ចុប្បន្ន មានពលករបរទេសជាច្រើននាក់ចូលមកធ្វើការនៅប្រទេសថៃទាំងស្របច្បាប់ និងខុសច្បាប់ ហើយពលករបរទេសទាំងនេះបានដណ្តើ.មការងាររបស់ពលរដ្ឋថៃ ។ ហេតុនេះ ពួកគេបានសំណូមពរឱ្យរដ្ឋាភិបាល និងស្ថាប័នពាក់ព័ន្ធជួយដោះស្រាយបញ្ហាពលករបរទេសខុសច្បាប់ដោយបញ្ជូនទៅស្រុកកំណើតវិញ ។

ពលរដ្ឋថៃនិយាយថា ពលករបរទេសមួយចំនួនដែលមកធ្វើការនៅប្រទេសថៃ បានទាមទារឱ្យរដ្ឋាភិបាលថៃលើកកម្ពស់ និងផ្តល់សិទ្ធស្មើគ្នាជាមួយពលរដ្ឋថៃ ជាពិសេស ពលករមីយ៉ាន់ម៉ា ។ ពលករបរទេសខ្លះទៀតមកបើកអាជីវកម្មខ្លួនឯងលើទឹកដីថៃ ហើយសមត្ថកិច្ចពុំដែលចាប់ខ្លួនបានទេ ដោយសារពួកគេដឹងខ្លួនមុន ពេលសមត្ថកិច្ចចុះត្រួតពិនិត្យទីតាំងអាជីវកម្ម ។

កាលពីថ្ងៃទី២១ ខែតុលា ឆ្នាំ២០២៤ សារព័ត៌មានថៃរាយការណ៍ថា រដ្ឋមន្ត្រីក្រសួងការងារថៃពុំបានផ្តល់ភាពសំខាន់លើពលករបរទេសទេ ហើយក្រសួងការងារនឹងចាត់វិធានការមិនឱ្យពលករបរទេសដណ្តើមការងារពលរដ្ឋថៃ ។ ពលករបរទេសគ្មានសិទ្ធបើកអាជីវកម្មទេ គឺពួកគេមានសិទ្ធត្រឹមតែលក់កម្លាំងពលកម្មប៉ុណ្ណោះ ។

រដ្ឋមន្ត្រីក្រសួងការងារ លោក ផិផាត់ រ៉ាជឆាកិច្ចប្រាកាន បានចេញមុខបកស្រាយករណីមតិនានាលើកឡើងថា ក្រសួងការងារផ្តល់ភាពសំខាន់លើពលករបរទេសខ្លាំងពេក ដោយលោកបញ្ជាក់ថា ក្រសួងការងារព្យាយាមធ្វើឱ្យពលករបរទេស និងថៃមានសិទ្ធិស្មើៗគ្នា ស្របតាមការកំណត់របស់អង្គការពលកម្មអន្តរជាតិ (ILO) ដោយសារថៃជាសមាជិករបស់អង្គការនេះ ។

លោករដ្ឋមន្ត្រីក្រសួងការងារបញ្ជាក់ថា លោកនឹងចាប់ផ្តើមអនុវត្តវិធានការចំនួន២ចំណុច ដើម្បីដោះស្រាយបញ្ហាពលករបរទេសដណ្តើមការងារពលរដ្ឋថៃ រួមមាន ៖ វិធានការការពារ និងការផាកពិន័យ តាមរយៈការបញ្ជូនសមត្ថកិច្ចចុះត្រួតពិនិត្យតាមទីតាំងធ្វើការរបស់ពលករបរទេស ។

លោក ផិផាត់ រ៉ាជឆាកិច្ចប្រាកាន រដ្ឋមន្ត្រីក្រសួងការងារនិយាយថា ៖ «វាជាការអនុវត្តតាមច្បាប់ថៃ គឺដាស់តឿន, ផាកពិន័យ និងបញ្ជូនពលករត្រឡប់ទៅប្រទេសកំណើតវិញ ហើយថៃពុំអនុញ្ញាតឱ្យពលករបរទេសប្រមូលផ្តុំគ្នាតវ៉ារឿងនយោបាយនៅលើទឹកដីថៃទេ» ៕

ប្រទេសឥណ្ឌា៖ រឿងរ៉ាវរបស់មហាសេដ្ឋីឥណ្ឌា Ratan Tata បានបង្កឱ្យមានការភ្ញាក់ផ្អើលយ៉ាងខ្លាំងពេញបណ្តាញសង្គមនាពេលថ្មីៗនេះ នៅពេលដែលលោកសម្រេចចិត្តទុកទ្រព្យសម្បត្តិភាគច្រើនរបស់លោកទៅឱ្យសត្វឆ្កែ ខណៈបងប្អូនរបស់មហាសេដ្ឋីរូបនេះទទួលបានទ្រពសម្បត្តិតិចជាងសត្វចិញ្ចឹមទៅទៀត។

យោងតាមគេហទំព័របរទេស The Sun មហាសេដ្ឋី Ratan Tata គឺជានាយកប្រតិបត្តិ Tata Group ដែលជាសាជីវកម្មដ៏ធំបំផុតមួយនៅក្នុងពិភពលោក មានទ្រពសម្បត្តិសរុបប្រមាណ ៤៥៦ លានដុល្លារអាមេរិក។

ប៉ុន្តែកាលពីដើមខែតុលា ឆ្នាំ២០២៤ នេះ មហាសេដ្ឋីឥណ្ឌារូបនេះ បានទទួលមរណភាព នៅមន្ទីរពេទ្យក្នុងទីក្រុង Mumbai ប្រទេសឥណ្ឌា ក្នុងជន្មាយុ ៨៦ ឆ្នាំ ដោយសាររោគគាពាធ។ អ្វីដែលគួរឱ្យភ្ញាក់ផ្អើលនោះគឺថា មុនលោកចែកឋានទៅ លោកបានសរសេរសំបុទ្រមួយដោយបន្សល់ទុកទ្រព្យសម្បត្តិចំនួនជាង ១០០ លានដុល្លារអាមេរិកទៅឱ្យសត្វឆ្កែ និងអ្នកបម្រើស្រី ២ នាក់ ខណៈបងប្អូនបង្កើតជាច្រើនទៀតរបស់លោកបានទទួលមរតកតែមួយចំណែកតូចប៉ុណ្ណោះ។

ការទុកលុយដ៏ច្រើនបែបនេះដល់សត្វចិញ្ចឹម និងអ្នកបម្រើគឺកម្រណាស់នៅក្នុងប្រទេសឥណ្ឌា ពីព្រោះជាធម្មតាទ្រព្យសម្បត្តិត្រូវបានប្រគល់ឱ្យក្នុងគ្រួសារប៉ុណ្ណោះ។ ទោះជាយ៉ាងណា នៅក្នុងសំបុត្ររបស់មហាសេដ្ឋី Ratan Tata បានសរសេរថា “ត្រូវតែថែទាំឆ្កែចិញ្ចឹមរបស់លោកឱ្យបានល្អបំផុត រហូតដល់ថ្ងៃចុងក្រោយនៃជីវិតរបស់ពួកវា”។ មហាសេដ្ឋីឥណ្ឌារូបនេះត្រូវបានគេស្គាល់ថា ជាបុរសឯកោមិនដែលធ្លាប់រៀបការ និងគ្មានប្រពន្ធកូនឡើយ ដូច្នេះលោកក៏ចាត់ទុកឆ្កែចិញ្ចឹមរបស់លោកជាមិត្តស្និតស្នាលបំផុត។

ការស្រលាញ់សត្វពេញមួយជីវិតរបស់លោក បានធ្វើឱ្យប្រជាជនឥណ្ឌាជាច្រើនភា្ញក់ផ្អើល ក៏ដូចជាកោតសរសើរនូវចិត្តដ៏សែនល្អប្រពៃរបស់លោកជាមួយសត្វចិញ្ចឹម។ មហាសេដ្ឋីរូបនេះកាលពីមុនគឺជាសប្បុរសជនដែលតែងតែជួយប្រជាជនស្លូតត្រង់ និងក្រីក្រជាច្រើននាក់ ដូច្នេះមរណភាពរបស់លោក Ratan Tata បានបន្សល់ទុកនូវភាពសោកសៅឥតឈប់ឈរក្នុងចិត្តប្រជាជនឥណ្ឌា៕

ប្រទេសស៊ុយអែត ៖ ទីក្រុង Stockholm ប្រទេសស៊ុយអែត បានអនុវត្តគម្រោងផ្លូវរូងក្រោមដីយ៉ាងពិសេស ដើម្បីជួយដល់ការបម្លាស់ទីរបស់ត្រីពីតំបន់មួយទៅតំបន់មួយ ពីព្រោះត្រីមួយចំនួនពិបាកបម្លាស់ទីពេលទឹកហូរខ្លាំង ។ ក្រៅពីជួយដល់ការបម្លាស់ទីរបស់ត្រី ស៊ុយអែតរំពឹងថា ផ្លូវរូងក្រោមដីនឹងអាចជួយស្តារប្រព័ន្ធអេកូឡូស៊ីក្នុងទឹកឡើងវិញ ។

អស់រយៈពេលជាង៤សតវត្សហើយ ដែលត្រីមួយចំនួនពិបាកបម្លាស់ទីនៅទីក្រុង Stockholm ប្រទេសស៊ុយអែត ដោយសារការបង្កើតប្រឡាយទឹក ឈ្មោះ «Sodertalje» ក្នុងទីក្រុង ។ បើទោះជាប្រឡាយទឹកនេះផ្តល់ផលប្រយោជន៍យ៉ាងច្រើនដល់មនុស្ស ប៉ុន្តែវាបានក្លាយជាឧបសគ្គដល់ត្រីក្នុងការបម្លាស់ទីពីតំបន់មួយទៅតំបន់មួយ ព្រមទាំងប៉ះពាល់ដល់ជីវៈចម្រុះក្នុងតំបន់ផងដែរ ។

ស៊ុយអែតបានយកថ្មពីទីតាំងស្រាវជ្រាវប្រវត្តិសាស្ត្រក្នុងតំបន់មកធ្វើផ្លូវរូងក្រោមដី ដើម្បីឱ្យវាមានលក្ខណៈដូចប្រឡាយទឹកធម្មជាតិពិតៗ ហើយត្រីនឹងអាចហែលតាមផ្លូវរូងក្រោមដីនេះ ដូចការហែលទឹកក្នុងប្រឡាយធម្មជាតិ ។ ក្រៅពីនេះ ក៏មានការបំពាក់ពន្លឺពិសេសក្នុងផ្លូវរូងក្រោមដីផងដែរ ដើម្បីជួយបំភ្លឺដល់ការបម្លាស់ទីរបស់ត្រី ។

ក្នុងផ្លូវរូងក្រោមដី ក៏មានបំពាក់កាមេរ៉ាដើម្បីត្រួតពិនិត្យការប្រើប្រាស់ និងប្រមូលព័ត៌មានទៅវិភាគអំពីសកម្មភាពត្រី និងវិធីបម្លាស់ទី ។ ក្រោយពីដំណើរការផ្លូវរូងក្រោមដី គេសង្កេតឃើញថា នៅបរិវេណម្ខាងទៀតរបស់ផ្លូវរូងក្រោមដី ឬបឹងម៉ាឡារ៉េន (Lake Malaren) ដែលជាបឹងមានទំហំធំលំដាប់ទី៣ នៅប្រទេសស៊ុយអែត មានត្រីជាច្រើនពូជ ។

ការបង្កើតផ្លូវរូងក្រោមដីសម្រាប់ជួយដល់ការបម្លាស់ទីរបស់ត្រីនៅទីក្រុង Stockholm ចាត់ទុកថា គឺជាគំនិតច្នៃប្រឌិតថ្មីសម្រាប់កាត់បន្ថយការប៉ះពាល់បរិស្ថាន នាថ្ងៃអនាគត ។ លើសពីនេះ វាជាការអភិរក្សប្រព័ន្ធអេកូឡូស៊ីដ៏មានតម្លៃឱ្យនៅស្ថិតស្ថេរជានិច្ច និងមិនរងផលប៉ះពាល់ដោយសារការបំផ្លាញរបស់មនុស្ស ៕