ប្រទេសចិន៖ កាលពីពេលថ្មីៗនេះប្រជាជននៅតំបន់លំនៅដ្ឋានមួយក្នុងទីក្រុង Dongguan ខេត្ត Guangdong ប្រទេសចិន មានការភ្ញាក់ផ្អើលយ៉ាងខ្លាំង ដោយសារបានឃើញត្រីចម្លែកមួយក្បាលលេចឡើងក្នុងបឹងសិប្បនិម្មិតនៃកន្លែងនេះ។

យោងតាមខ្លឹមសារនៃវីដេអូដែលបានចែករំលែកនៅលើ Weibo បានឱ្យដឹងថា នៅក្នុងបឹងសិប្បនិម្មិតនៃតំបន់លំនៅដ្ឋាន Dongguan ខេត្ត Guangdong ប្រទេសចិន គឺជាតំបន់មួយដែលមានត្រីទឹកសាបរស់នៅជាច្រើនប្រភេទ។ ជារៀងរាល់ថ្ងៃ មានមនុស្សជាច្រើនតែងតែមកឱ្យចំណីត្រី។

ទោះជាយ៉ាងណាក្នុងប៉ុន្មានថ្ងៃថ្មីៗនេះ គេសង្កេតឃើញថា ហ្វូងត្រីហាក់ដូចជាថយចុះ ដោយសារចំនួនត្រីមកបរិភោគចំណីមានតិចខុសធម្មតា។ ក្រោយមកអ្នកភូមិម្នាក់ក៏បានប្រទះឃើញសត្វចម្លែកមួយ ត្រូវបានគេស្គាល់ថាជាត្រីយក្ស Lepisosteus osseus ឬ billy gar ដែលត្រីនេះភាគច្រើនរកឃើញមានតែក្នុងអាមេរិកខាងជើងប៉ុណ្ណោះ។ billy gar ត្រូវបានអ្នកភូមិជនជាតិចិនចាប់បានចំនួន ៣ ក្បាលជាមួយទម្ងន់ជាង ១០០ គីឡូក្រាម និងប្រវែងជាង១ ម៉ែត្រ ដោយពួកវាមានមាត់វែង ធ្មេញមុតស្រួច និងរាងមូល។

ពួកវាត្រូវបានគេហៅថាជា “ឃាតករក្រោមទឹក” ដោយសារវាតែងតែសម្លា.ប់ និងបរបាញ់សត្វក្នុងទឹកជាច្រើនប្រភេទ។ ត្រីយក្ស billy gar មានសមត្ថភាពបំផ្លាញបរិស្ថានធម្មជាតិដោយបំផ្លាញត្រីតូចៗ និងសារពាង្គកាយផ្សេងៗទៀត។ ត្រីនេះច្រើនតែរស់នៅក្នុងភាពឯកោ ចូលចិត្តស្ងប់ស្ងាត់ ហើយជារឿយៗអសកម្ម ប៉ុន្តែនៅពេលឃ្លាន ពួកវាឈ្លានពានខ្លាំង។ មូលហេតុដែលត្រីនេះអាចលុកលុយចូលមកក្នុងទឹកដីប្រទេសចិនបានគឺដោយសារបរិយាកាសធម្មជាតិ។

គួរបញ្ជាក់ដែរថា ត្រីយក្ស Lepisosteus osseus ឬ billy gar មិនមែនជាត្រីចម្លែកនោះទេ ដោយសារត្រីនេះមានវត្តមាននៅអាមេរិកខាងជើងប្រហែល ១០០ លានឆ្នាំមកហើយ គឺជាប្រភេទត្រីចំណាស់ជាងគេបំផុតមួយ នេះបើយោងតាមកំណត់ត្រាវិទ្យាសាស្ត្រ។ billy gar គឺជាត្រីបុរាណ ដែលត្រូវបានគេស្គាល់ថាជាត្រីហ្វូស៊ីលមានជីវិត ឬត្រីបុព្វកាល ព្រោះវារក្សានូវលក្ខណៈរូបវន្តពីបុព្វបុរសបុរាណ។ ដូច្នេះហេតុផលដែលពួកវាអាចរស់បានក្នុងរយៈពេលដ៏យូរបែបនេះ មិនផុតពូជគឺដោយសាររចនាសម្ព័ន្ធរាងកាយពិសេសរបស់ពួកវា៕

ប្រទេសឥណ្ឌា៖ ប្រជាជននៅភាគខាងត្បូងប្រទេសឥណ្ឌាបានទៅព្រះវិហារបរិសុទ្ធ ដើម្បីថ្វាយបង្គំ និងបួងសួងឱ្យលោកស្រី ហារីស ជាប់ឆ្នោតក្លាយជាប្រធានាធិបតីដើមកំណើតឥណ្ឌាដំបូងគេរបស់សហរដ្ឋអាមេរិក។
យោងតាមគេហទំព័របរទេស Time បេក្ខជនប្រធានាធិបតីអាមេរិក Kamala Harris អាយុ ៥៩ឆ្នាំ មានដើមកំណើតអាស៊ី ដោយសារម្តាយរបស់នាងគឺជាជនអន្តោប្រវេសន៍មកពីប្រទេសឥណ្ឌា ហើយឪពុករបស់នាងបានកើតក្នុងគ្រួសារអាហ្វ្រិក-ហ្សាម៉ាអ៊ីក។

អស់រយៈពេលជាយូរមកហើយ អនុប្រធានាធិបតីអាមេរិករូបនេះ បាននិយាយថាខ្លួននាងជាជនជាតិស្បែកខ្មៅ និងអាស៊ី។ ដូច្នេះអ្នកភូមិ Thulasendrapuram ក្នុងរដ្ឋ Tamil Nadu ភាគខាងត្បូងប្រទេសឥណ្ឌា ដែលជាស្រុកកំណើតរបស់ម្តាយ Harris បានទៅព្រះវិហារហិណ្ឌូក្នុងតំបន់ដើម្បីថ្វាយផ្កា និងបួងសួងឱ្យលោកស្រី Harris ឈ្នះការបោះឆ្នោត ក្លាយជាប្រធានាធិបតីដើមកំណើតឥណ្ឌាដំបូងគេរបស់សហរដ្ឋអាមេរិក។

បច្ចុប្បន្នផ្ទាំងបដាដែលមានរូបភាពរបស់លោកស្រី Harris បានលេចឡើងនៅគ្រប់ទីកន្លែងនៅក្នុងភូមិ Thulasendrapuram ប្រទេសឥណ្ឌា។ លោក G. Manikandan ម្ចាស់ហាងតូចមួយបាននិយាយថា “យើងនឹងធ្វើពិធីបួងសួងពិសេសក្នុងព្រះវិហារនៅថ្ងៃនេះ ហើយនឹងប្រារព្ធពិធីមួយប្រសិនបើលោកស្រី Harris ឈ្នះឆ្នោត”។ នៅឯព្រះវិហារនោះ ឈ្មោះរបស់លោកស្រី Harris ត្រូវបានចារនៅលើផ្ទាំងថ្មធំៗ រួមជាមួយឈ្មោះម្តាយ និងជីតារបស់នាង។ នៅខាងក្រៅ អ្នកភូមិបានលើកបដាដ៏ធំមួយសរសេរថា៖ «ជូនពរកូនស្រីនៃស្រុកនេះឈ្នះឆ្នោត»។

លោកតា M. Natarajan ដែលជាបូជាចារ្យបាននិយាយថា “ចៅស្រីនៃភូមិនេះកំពុងឈរឈ្មោះជាប្រធានាធិបតីសហរដ្ឋអាមេរិក។ ព្រះនៅក្នុងព្រះវិហារបរិសុទ្ធមានថាមពលខ្លាំងណាស់ ប្រសិនបើអ្នកអធិស្ឋានដោយស្មោះព្រះនឹងជួយ Harris ឈ្នះឆ្នោតដោយនាំមកនូវដំណឹងល្អដល់ភូមិ” ។ គួររំលឹកដែរថា កាលពីឆ្នាំ ២០២០ អ្នកភូមិ Thulasendrapuram ក៏ទាក់ទាញការចាប់អារម្មណ៍ជាសកលផងដែរ នៅពេលដែលពួកគេបានរៀបចំការអធិស្ឋាន និងប្រារព្ធពិធីមួយ នៅពេលដែលលោកស្រី Harris ត្រូវបានជ្រើសរើសជាអនុប្រធានាធិបតីសហរដ្ឋអាមេរិក៕

សហរដ្ឋអាមេរិក ៖ កាលពីថ្ងៃទី៥ ខែវិច្ឆិកា ឆ្នាំ២០២៤ ពលរដ្ឋអាមេរិកបានបោះឆ្នោតជ្រើសរើសប្រធានាធិបតីរបស់ខ្លួន ដែលជាការប្រកួតប្រជែងរបស់បេក្ខជនមកពីគណបក្សធំៗ គឺលោក Donald Trump គណបក្ស Republican និងលោកស្រី Kamala Harris គណបក្ស Democrat ។ តើបេក្ខជនរូបណានឹងក្លាយជាប្រធានាធិបតីថ្មីរបស់ប្រទេសមហាអំណាច ទី១ លើពិភពលោក?

ការបោះឆ្នោតជ្រើសរើសប្រធានាធិបតីអាមេរិក ពុំមែនពលរដ្ឋបោះឆ្នោតដោយផ្ទាល់ទេ គឺតាមរយៈតំណាងបោះឆ្នោតក្នុងរដ្ឋនីមួយៗ ។ នៅថ្ងៃទី៦ ខែវិច្ឆិកា រដ្ឋជាច្រើនរបស់អាមេរិកចាប់ផ្តើមបើកហិបឆ្នោត ដូចជា ៖ រដ្ឋ Kentucky, រដ្ឋ Indiana, រដ្ឋ South Carolina, រដ្ឋ Vermont, រដ្ឋ Virginia និងរដ្ឋ Swing ហើយលោក Donald Trump និងលោកស្រី Kamala Harris ទទួលបានសំឡេងនាំមុខ ។

លទ្ធផលបោះឆ្នោតបឋម គឺពលរដ្ឋរស់នៅរដ្ឋ Indiana និងរដ្ឋ Kentucky បានបោះឆ្នោតគាំទ្រលោក Trump ។ រីឯពលរដ្ឋរស់នៅរដ្ឋ Vermont បានបោះឆ្នោតគាំទ្រលោកស្រី Harris ហើយលទ្ធផលបោះឆ្នោតឆ្នាំ២០២៤នេះ គឺដូចគ្នានឹងលទ្ធផលបោះឆ្នោតនាពេលកន្លងមក ។

ការរាប់សន្លឹកឆ្នោតរបស់អាមេរិក នៅថ្ងៃទី៦ ខែវិច្ឆិកា (ពេលវេលាប្រទេសកម្ពុជា) គឺលោក Trump ទទួលបានសំឡេងឆ្នោតខ្ពស់ជាងលោកស្រី Harris ។ ហេតុនេះ អ្នកទទួលបានសំឡេងឆ្នោតរហូតដល់២៧០សំឡេង នឹងក្លាយជាប្រធានាធិបតីថ្មីអាមេរិក ។

លោក Trump ធ្លាប់បាននិយាយវាយប្រហារលោកស្រី Harris ខ្លាំងៗ ហើយលោកនិយាយទៅកាន់ក្រុមអ្នកគាំទ្រថា លោកនឹងឈ្នះឆ្នោតលើកនេះ ។ ក្រោយជាប់ឆ្នោត លោកនឹងអនុវត្តទោសប្រហារជីវិតជនអន្តោប្រវេសន៍ ដែលសម្លាប់សមត្ថកិច្ច និងពលរដ្ឋអាមេរិក ។ លើសពីនេះ លោកនឹងជួយកាត់បន្ថយពន្ធនៅអាមេរិក និងអត្រាអតិផរណា, បញ្ចុះតម្លៃទំនិញ, ដំឡើងប្រាក់ខែពលរដ្ឋ និងទាក់ទាញឱ្យមានការសាងសង់រោងចក្ររាប់ពាន់បន្ថែមទៀត ។

នៅថ្ងៃរកសំឡេងឆ្នោតចុងក្រោយ លោកស្រី Harris ពុំបាននិយាយប្រហារគូប្រជែងមកពីគណបក្ស Republican ទេ ហើយលោកស្រីមានទំនុកចិត្តថា នឹងក្លាយជាប្រធានាធិបតីថ្មីរបស់អាមេរិក ។ លោកស្រីបានព្យាយាមប្រមូលសំឡេងគាំទ្រពីក្រុមយុវជន ដោយចុះទៅតាមគោលដៅនានា នាចុងសប្តាហ៍ ។

គួរបញ្ជាក់ថា ការបោះឆ្នោតជ្រើសរើសប្រធានាធិបតី ឆ្នាំ២០២៤ មានពលរដ្ឋអាមេរិកចូលរួមបោះឆ្នោតចំនួន២៤០លាននាក់ ហើយប្រធានាធិបតីថ្មីអាមេរិក ទី៦០ នឹងចូលកាន់តំណែងនៅថ្ងៃទី២០ ខែមករា ឆ្នាំ២០២៥ ៕

ប្រទេសវៀតណាម ៖ រយៈពេល៩ខែដំបូងក្នុងឆ្នាំ២០២៤ ខេត្ត Bac Ninh បានក្លាយជាគោលដៅទាក់ទាញការវិនិយោគផ្ទាល់ពីក្រៅប្រទេស (Foreign Direct Investmen) ច្រើនបំផុតនៅប្រទេសវៀតណាម ដែលទទួលបានទឹកប្រាក់វិនិយោគរហូតដល់ជាង៤ពាន់២រយលានដុល្លារអាមេរិក ។

កត្តាអំណោយផលដល់ការវិនិយោគនៅប្រទេសវៀតណាម រួមមាន ៖ ហេដ្ឋារចនាសម្ព័ន្ធគ្រប់គ្រាន់ និងពលរដ្ឋវៀតណាមមានជំនាញ គឺជាមូលហេតុចម្បងធ្វើឱ្យខេត្ត Bac Ninh ទទួលបានការចាប់អារម្មណ៍យ៉ាងខ្លាំងពីវិនិយោគិនបរទេស ។

នាយកដ្ឋានផែនការ និងវិនិយោគនៅខេត្ត Bac Ninh ឱ្យដឹងថា បណ្តាវិនិយោគិនបរទេសបានវិនិយោគស្មើទឹកប្រាក់១.៥៦០លានដុល្លារអាមេរិកសម្រាប់គម្រោងចំនួន៣៣៩ កើនឡើង៨២,២% ហើយចំនួនគម្រោងបានកើនឡើង២៨,៤% បើប្រៀបធៀបប្រចាំឆ្នាំ ។

បច្ចុប្បន្ន ខេត្ត Bac Ninh ទទួលបានការវិនិយោគពីក្រៅប្រទេស ជាង២.៤០០គម្រោង ស្មើទឹកប្រាក់សរុប២៩.៣០០លានដុល្លារអាមេរិក ។ កំណើនការវិនិយោគពីក្រៅប្រទេសបង្ហាញឱ្យឃើញពីយុទ្ធសាស្ត្រជោគជ័យក្នុងការទាក់ទាញវិនិយោគិនបរទេស ដោយមន្ត្រីរដ្ឋាភិបាលក្នុងតំបន់បានសហការយ៉ាងជិតស្និទ្ធជាមួយក្រុមហ៊ុនបរទេស ដូចជា ៖ Samsung និង Canon ដើម្បីកាត់បន្ថយឧបសគ្គវិនិយោគ និងលើកទឹកចិត្តក្រុមហ៊ុនក្រៅស្រុក ។

ក្រុមហ៊ុន Samsung Display មានគម្រោងវិនិយោគទឹកប្រាក់ចំនួន១ពាន់៨រយលានដុល្លារអាមេរិក ដើម្បីសាងសង់រោងចក្រផលិតកញ្ចក់កុំព្យូទ័រ OLED ទំនើប ។ ដូច្នេះ វានឹងធ្វើឱ្យទឹកប្រាក់វិនិយោគសរុបរបស់ក្រុមហ៊ុននេះនៅខេត្ត Bac Ninh កើនឡើងរហូតដល់៨ពាន់៣រយលានដុល្លារអាមេរិក ។

គួរបញ្ជាក់ថា ខេត្ត Bac Ninh ស្ថិតនៅតំបន់ដីសណ្តទន្លេក្រហម និងមានប្រព័ន្ធដឹកជញ្ជូនផ្លូវគោក-ផ្លូវទឹកខ្វាត់ខ្វែង ដែលជាកត្តាជួយពង្រឹងហេដ្ឋារចនាសម្ព័ន្ធសេដ្ឋកិច្ចរបស់ខេត្ត ។ លើសពីនេះ ខេត្តក៏ស្ថិតនៅមិនឆ្ងាយពីអាកាសយានដ្ឋាន Noi Bai International Airport អាចជួយកាត់បន្ថយការចំណាយថ្លៃដឹកជញ្ជូនផ្សេងៗ និងជំរុញឱ្យសេដ្ឋកិច្ចខេត្តរីកចម្រើនកាន់តែខ្លាំង នាថ្ងៃអនាគត ៕

ប្រទេសចិន ៖ អ្នកស្រាវជ្រាវចិនបានទទួលជោគជ័យក្នុងការដាំពូជស្រូវនៅលើអវកាស គឺទិន្នផលស្រូវមានគុណភាពល្អ បើធៀបនឹងពូជស្រូវដែលដាំនៅលើផែនដី ហើយវាក៏ជាជោគជ័យយ៉ាងធំធេងសម្រាប់ការស្រាវជ្រាវពីការផលិតស្បៀងលើអវកាសផងដែរ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣ ខែវិច្ឆិកា ឆ្នាំ២០២៤ ។

ស្ថានីយទូរទស្សន៍ CCTV របស់ចិនរាយការណ៍ថា ពូជស្រូវ 59 ដាំនៅស្ថានីយអវកាសជាតិរបស់ចិន គឺជាពូជស្រូវដំបូងគេដែលបានដាំក្នុងបន្ទប់គ្រប់គ្រងអាកាសធាតុយ៉ាងល្អ ។ បើប្រៀបធៀបរវាងពូជស្រូវដាំលើអវកាសជាមួយពូជស្រូវលើផែនដីឃើញថា ពូជស្រូវលើអវកាសមានភាពរឹងមាំល្អជាងស្រូវលើដី ។

អ្នកស្រាវជ្រាវចិនអាចកែប្រែហ្សែនរុក្ខជាតិលើអវកាសតាមរយៈម៉ូលេគុល ដើម្បីឱ្យវាមានលក្ខណៈស្រដៀងនឹងស្រូវដាំនៅលើដី ហើយអាហារូបត្ថម្ភរបស់ស្រូវលើអវកាសបានផ្លាស់ប្តូរ ។ ស្រូវលើអវកាសមានរសជាតិផ្អែម និងផ្តល់នូវបរិមាណប្រូតេអ៊ីនខ្ពស់ជាងស្រូវលើដី ហើយសាច់ម្សៅក្នុងគ្រាប់ស្រូវក៏ខុសប្លែកគ្នាដែរ ។

គួរបញ្ជាក់ថា ការសាកល្បងដាំស្រូវចំនួន១២០ថ្ងៃ នៅលើស្ថានីយអវកាសរបស់ចិនកាលពីឆ្នាំ២០២២ គឺជាភាពជោគជ័យដំបូងគេលើពិភពលោក ពីព្រោះកន្លងមក ការសាកល្បងលើស្ថានីយអវកាសធ្វើបានត្រឹមតែការដាំគ្រាប់សណ្តែក, ស្រូវសាឡី និងរុក្ខជាតិខ្លះៗ ។ ការសាកល្បងដាំរុក្ខជាតិលើអវកាសរបស់ចិនបានជួបបញ្ហាជាច្រើន ដូចជា ៖ ចេញផ្កាយឺតយ៉ាវ, ផ្លែនៅជាប់ដើមតិច និងគុណភាពគ្រាប់ធ្លាក់ចុះ ហើយចិនទទួលបានគ្រាប់ពូជរុក្ខជាតិលើអវកាសតិចតួចប៉ុណ្ណោះ ។

រហូតមកដល់ឆ្នាំ២០២៤នេះ អ្នកស្រាវជ្រាវចិនទទួលបានជោគជ័យក្នុងការដាំស្រូវលើអវកាស ហើយលទ្ធផលការសាកល្បងលើកនេះ គឺអ្នកជំនាញអាចយកគ្រាប់ស្រូវលើអាកាសមកដាំលើផែនដីបាន ។ ដូច្នេះ វាជាជោគជ័យយ៉ាងខ្លាំងក្នុងការស្រាវជ្រាវពាក់ព័ន្ធនឹងការផលិតស្បៀងក្រៅផែនដី ។

នៅថ្ងៃទី១៥ ខែវិច្ឆិកា ឆ្នាំ២០២២ អង្គការសហប្រជាជាតិបានប្រកាសជាផ្លូវការថា ពលរដ្ឋលើពិភពលោក មានចំនួនរហូតដល់៨ពាន់លាននាក់ ហើយនឹងកើនឡើងដល់១ម៉ឺនលាននាក់ នារយៈពេល៦០ឆ្នាំទៀត ។ ថ្ងៃអនាគត មនុស្សនឹងធ្វើសង្គ្រាមដណ្តើមធនធានធម្មជាតិ ដើម្បីឱ្យពូជពង្សរបស់ខ្លួនអាចរស់នៅបន្តទៀតបាន ។

ហេតុនេះ អាមេរិក រុស្ស៊ី និងចិនបានព្យាយាមស្វែងរកវិធីផលិតស្បៀងនៅក្រៅផែនដី ដោយសារមានសារធាតុរ៉ែជាច្រើននៅតាមភពផ្សេងៗសម្រាប់ឱ្យមនុស្សប្រើប្រាស់ជាប្រយោជន៍ ។ មនុស្សនឹងមានឱកាសប្រើប្រាស់ធនធានធម្មជាតិលើអវកាសនារយៈពេល១០០ឆ្នាំខាងមុខ បើវិទ្យាសាស្ត្រ, បច្ចេកវិទ្យា និងចំណេះដឹងពីអវកាសរីកចម្រើនជាងនេះ ៕

ប្រទេសជប៉ុន ៖ កាលពីថ្ងៃទី៥ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ផ្កាយរណបផលិតពីឈើដំបូងគេរបស់អ្នកស្រាវជ្រាវជប៉ុន ត្រូវបានបង្ហោះទៅលើអវកាសហើយ ។ វាជាការសាកល្បងជំហានដំបូងពាក់ព័ន្ធនឹងការប្រើប្រាស់ឈើក្នុងភារកិច្ចស្រាវជ្រាវនៅឋានព្រះច័ន្ទ និងភពអង្គារ ។

ផ្កាយរណបឈើនេះឈ្មោះ «LignoSat» ផលិតដោយអ្នកជំនាញមកពីសាកលវិទ្យាល័យតូក្យូ សហការជាមួយក្រុមហ៊ុនកែច្នៃឈើ និងសាងសង់លំនៅឋាន Sumitomo Forestry ព្រមទាំងបញ្ជូនទៅស្ថានីយអវកាសសម្រាប់ការងាររបស់ក្រុមហ៊ុន Space X ។ បន្ទាប់មក ផ្កាយរណបឈើក៏ត្រូវបង្ហោះទៅលើគន្លងអវកាស ដែលមានកម្ពស់៤០០គីឡូម៉ែត្រពីផែនដី ។ ផ្កាយរណប LignoSat គឺដាក់ឈ្មោះតាមភាសាឡាតាំង ដែលបានយកឈើទៅសាកល្បងប្រើប្រាស់លើអវកាស ខណៈមនុស្សកំពុងស្រាវជ្រាវពីការរស់នៅទីនោះ ។

លោក ថាខាអុ ដូអិ អាកាសយានិកធ្លាប់ធ្វើដំណើរតាមយានអវកាសដើម្បីស្រាវជ្រាវពីសកម្មភាពមនុស្សក្នុងលំហ មកពីសាកលវិទ្យាល័យតូក្យូ បញ្ជាក់ថា ឈើជាវត្ថុដែលមនុស្សអាចផលិតបាន និងយកទៅប្រើប្រាស់សម្រាប់សាងសង់លំនៅឋានរស់នៅ និងអគារធ្វើការលើអវកាស ។

ក្រុមអ្នកស្រាវជ្រាវមានគម្រោង៥០ឆ្នាំ ក្នុងការដាំដើមឈើ និងសាងសង់លំនៅឋានលើឋានព្រះច័ន្ទ និងភពអង្គារ ។ ដូច្នេះ ក្រុមអ្នកស្រាវជ្រាវបានសម្រេចចិត្តផលិតផ្កាយរណបឈើដោយមានការទទួលស្គាល់ពីអង្គការអាកាសចរណ៍ជាតិ និងអវកាសអាមេរិក (NASA) ដើម្បីពិសោធន៍ពីវត្ថុអាចប្រើប្រាស់នៅលើអវកាសបានពិតប្រាកដ ។

ចំណែកលោក ខូជិ មុរ៉ាតាក់ សាស្ត្រាចារ្យផ្នែកវិទ្យាសាស្ត្រព្រៃឈើនៅសាកលវិទ្យាល័យតូក្យូ និយាយថា កាលពីឆ្នាំ១៩០០ មានយន្តហោះផលិតពីឈើ ហេតុនេះ ផ្កាយរណបក៏អាចផលិតពីឈើបានដែរ ។ ឈើនៅលើអវកាសរឹងមាំជាងឈើលើផែនដី ពីព្រោះអវកាសគ្មានទឹក ឬអុកស៊ីសែន ដែលធ្វើឱ្យឈើខូចគុណភាពទេ ហើយផ្កាយរណបឈើអាចជួយកាត់បន្ថយផលប៉ះពាល់បរិស្ថាន ។

រីឯផ្កាយរណបលោហៈបានបង្កើតភាគល្អិតអុកស៊ីតអាលុយមីញ៉ូមលើអវកាស ហើយគេអាចឈប់ប្រើប្រាស់វានាថ្ងៃអនាគត បើពិសោធន៍ឃើញថា ផ្កាយរណបឈើអាចដំណើរការបាន ។ ផ្កាយរណប LignoSat ផលិតពីឈើហូណូគិ មានដើមកំណើតនៅជប៉ុន ដែលអាចប្រើប្រាស់លើអវកាសបានក្រោយការសាកល្បងនៅស្ថានីយអវកាសរយៈពេល១០ខែ ។ ផ្កាយរណបនឹងហោះជុំវិញផែនដី៦ខែ ដើម្បីសាកល្បងភាពរឹងមាំរបស់ឈើលើអវកាសដែលមានសីតុណ្ហភាព -១០០អង្សារសេ ទៅ១០០អង្សារសេ នៅរៀងរាល់៤៥នាទី ៕