ប្រទេសសាឡូម៉ូន ៖ ក្រុមអ្នកស្រាវជ្រាវបានប្រទះឃើញផ្កាថ្មយក្សមានទំហំធំបំផុតលើពិភពលោក ក្នុងមហាសមុទ្រប៉ាស៊ីហ្វិកភាគនិរតី ហើយផ្កាថ្មនេះមានទំហំធំជាងត្រីបាឡែនពណ៌ខៀវទៅទៀត ។ អ្នកស្រាវជ្រាវសន្និដ្ឋានថា វាអាចមានអាយុរហូតដល់ជាង៣០០ឆ្នាំ ។

លោក Manu San Felix អ្នកថតវីដេអូដែលធ្វើការលើនាវារបស់ National Geographic បានប្រទះឃើញផ្កាយក្សមុនគេ ក្នុងអំឡុងពេលធ្វើដំណើររុករកផ្នែកដាច់ស្រយាលរបស់មហាសមុទ្រប៉ាស៊ីហ្វិក នៅត្រង់បរិវេណកោះរបស់ប្រទេសសាឡូម៉ូន ។ លោកមានគោលដៅសិក្សាពីផលប៉ះពាល់បណ្តាលមកពីបម្រែបម្រួលអាកាសធាតុ ។

លោក Manu បានជ្រមុជទឹកនៅបរិវេណដែលផែនទីបញ្ជាក់ថា មាននាវានៅបាតសមុទ្រ ហើយលោកបានឃើញអ្វីម្យ៉ាង ។ បន្ទាប់មក លោកក៏បានហៅកូនប្រុសមកជួយមើល និងជ្រមុជទឹកកាន់តែជ្រៅឃើញថា វាជាផ្កាថ្មយក្សមានរាងដូចប្រាសាទយ៉ាងធំនៅបាតសមុទ្រ ។ ផ្កាថ្មនេះមានបណ្តោយប្រវែង៣២ម៉ែត្រ និងកម្ពស់៥.៥ម៉ែត្រ ។

ផ្កាថ្មនេះស្ថិតនៅបាតសមុទ្រជ្រៅជាងផ្កាថ្មធម្មតា ហើយធ្វើឱ្យវារួចផុតពីសីតុណ្ហភាពកើនឡើងខ្ពស់ ។ អ្នកជំនាញផ្នែកផ្កាថ្ម ឈ្មោះ Eric Brown ដែលបានរួមដំណើរនិយាយថា ផ្កាថ្មមានសភាពល្អ បើទោះជាផ្កាថ្មផ្សេងៗនៅក្បែរវា ខូចទ្រង់ទ្រាយដោយសារទឹកសមុទ្រក្តៅក៏ដោយ ។ ការប្រទះឃើញផ្កាថ្មយក្សរឹងមាំក្នុងបាតសមុទ្រជ្រៅនេះ គឺជាក្តីសង្ឃឹមរបស់ពួកគេ ។

វាជាផ្កាថ្មប្រភេទ «Pavona Clavus» ជាជម្រករបស់បង្គា, ក្តាម, ត្រី និងសត្វសមុទ្រផ្សេងទៀត ។ អាយុរបស់ផ្កាថ្មជួយឱ្យអ្នកស្រាវជ្រាវអាចសិក្សាពីបាតសមុទ្រកាលពីអតីតកាល និងការធំធាត់របស់ផ្កាថ្ម ។ ការប្រទះឃើញផ្កាថ្មយក្ស គឺស្របគ្នានឹងកិច្ចប្រជុំផ្នែកអាកាសធាតុរបស់អង្គការសហប្រជាជាតិ នៅទីក្រុងបាគូ ប្រទេសអាស៊ែបៃហ្សង់ ដែលព្យាយាមដោះស្រាយបញ្ហាបម្រែបម្រួលអាកាសធាតុ ។

ផ្កាថ្ម៤៤% ក្នុងទឹកសមុទ្រមានសីតុណ្ហភាពកើនឡើង បានប្រឈមនឹងការគំរាមកំហែង និងឈានទៅរកការបាត់បង់ ។ នេះបើតាមឯកសាររបស់សហភាពអន្តរជាតិផ្នែកអភិរក្សធម្មជាតិ ដែលផ្សព្វផ្សាយកាលពីដើមខែវិច្ឆិកា ឆ្នាំ២០២៤ ។

លោក Trevor Manemahaka រដ្ឋមន្ត្រីទទួលបន្ទុកអាកាសធាតុរបស់ប្រទេសសាឡូម៉ូន (Solomon Islands) ថ្លែងថា លោកមានមោទនភាពក្នុងការរកឃើញផ្កាថ្មនៅប្រទេសរបស់លោក ហើយពិភពលោក នឹងដឹងថា បាតសមុទ្រនេះមានលក្ខណៈពិសេស និងគួរទទួលការការពារ ។ យើងពឹងផ្អែកលើធនធានក្នុងសមុទ្រភាគច្រើនដើម្បីជំរុញសេដ្ឋកិច្ច ហើយផ្កាថ្មសំខាន់ណាស់សម្រាប់សេដ្ឋកិច្ច ។

គួរបញ្ជាក់ថា សាឡូម៉ូន គឺជាប្រទេសកោះតូចៗដែលបានប្រឈមខ្ពស់នឹងការបម្រែបម្រួលអាកាសធាតុ ដូចជា ៖ អាកាសធាតុក្តៅ, ខ្យល់ព្យុះ និងការខូចខាតឆ្នេរសមុទ្រ ។ បច្ចុប្បន្ន ប្រទេសនេះកំពុងអំពាវនាវឱ្យប្រទេសអភិវឌ្ឍនានាជួយឧបត្ថម្ភប្រាក់ ដើម្បីអនុវត្តគម្រោងទប់ទល់នឹងបម្រែបម្រួលអាកាសធាតុ នាថ្ងៃអនាគត ៕

ដូចនៅកម្ពុជាដែរ ពិធីបុណ្យបណ្តែតប្រទីត ដែលតាមភាសាថៃហៅថា Loy Krathong តែងប្រារព្ធឡើងនៅជារៀងរាល់យប់ពេញបរមី ខែកត្តិក ហើយសម្រាប់ឆ្នាំ២០២៤នេះ វានឹងប្រព្រឹត្តិទៅនៅថ្ងៃទី ១៥ ខែវិច្ឆិកា។

ប្រជាជនថៃមានជំនឿថា ការបណ្តែតប្រទីតនឹងនាំមកនូវសេចក្តីសង្ឃឹម សេចក្តីសុខចម្រើន ជួយឲ្យពួកគេសម្រេចតាមប្រាថ្នាគ្រប់បែបយ៉ាង។ ម៉្យាងវិញទៀតនេះ វាក៏ជាពិធីបុណ្យសម្តែងនូវការគោរពចំពោះព្រះម៉ែគង្គា, ជាការដឹងគុណចំពោះទន្លេ ព្រែក បឹងបួរ ដែលជាប្រភពទឹកដ៏សំខាន់ក្នុងការទ្រទ្រងជីវិត ក៏ដូចជាការធ្វើពាណិជ្ជកម្មជាដើម។ ពិធីបុណ្យនេះគឺជាការរួមបញ្ចូលគ្នារវាងសាសនាហិណ្ឌូ និងសាសនាព្រះពុទ្ធ។

ពិធីបុណ្យ Loy Krathong នេះត្រូវបានជនជាតិថៃ ចងចាំគ្រប់ៗគ្នាតាមរយៈរឿងព្រេងនិទានថៃមួយ នាសម័យអាណាចក្រសុខោទ័យ សតវត្សទី១៤ ។ កាលគ្រានោះ ស្តេចសុខោទ័យ មានស្នំមួយអង្គ គឺនាងនង ណុបបាមា បានធ្វើប្រទីត(ដែលច្នៃចេញពីស្លឹកចេក ភ្ជាប់ជាមួយនឹងផ្កាឈូក ទៀន និងធូប) ហើយក៏ថ្វាយដល់ស្តេច។ ស្តេចក៏បានអុជទៀនធូប ហើយបណ្តែតប្រទីតនោះនៅទន្លេក្រុងសុខោទ័យ ហើយទំនៀមទំម្លាប់នេះក៏បានជាប់រហតមកដល់បច្ចុប្បន្ន។

សូមជម្រាបថា ពិធីបុណ្យ Loy Krathong ឆ្នាំ២០២៤ ត្រូវបានប្រារព្ធឡើងនៅតាមទន្លេសំខាន់ៗតាមបណ្តាខេត្តក្រុងជាច្រើនក្នុងប្រទេសថៃ ចាប់ពីចន្លោះថ្ងៃទី៨ ដល់ថ្ងៃទី១៧ ខែវិច្ឆិកានេះផងដែរ៕

ប្រធានាធិបតីអាមេរិកលោក ដូណាល់ ត្រាំ មានប្រពន្ធ ៣ និងកូន ៥ ដែលកូននីមួយៗរបស់លោកសុទ្ធតែជាមហាសេដ្ឋី មានមុខរបរផ្ទាល់ខ្លួន គ្មានរឿងអាស្រូវក្នុងជីវិតឯកជននោះទេ ធ្វើឱ្យមនុស្សគ្រប់គ្នាកោតសរសើរថា ប្រធានាធិបតីជាប់ឆ្នោតរូបនេះពិតជាពូកែចិញ្ចឹមកូនខ្លាំងណាស់។ ទោះជាយ៉ាងណាកូនប្រុសច្បងរបស់លោកគឺ Fred Trump Jrបានបាត់បង់ជីវិតហើយ ដោយសារគ្រោះ.ថ្នាក់ចរាចរណ៍។ ដូច្នេះបច្ចុប្បន្នប្រធានាធិបតីអាមេរិករូបនេះមានកូនត្រឹមតែ ៤ នាក់ប៉ុណ្ណោះ។

យោងតាមលោក Joshua Kendall អ្នកនិពន្ធសៀវភៅ First Dads ស្តីពីជីវប្រវត្តិរបស់បុគ្គលល្បីៗនៅអាមេរិកបាននិយាយថា លោក Trump មិនមានពេលច្រើនទេក្នុងការមើលថែកូនៗ ប៉ុន្តែការយកចិត្តទុកដាក់គឺចាំបាច់បំផុតដើម្បីបង្កើតឥទ្ធិពលវិជ្ជមានក្នុងគ្រួសារ។ លោកស្រី Ivanka Trump ដែលជាកូនស្រីទីពីររបស់ Trump បានផ្តល់បទសម្ភាសថា ទោះបីឪពុករបស់នាងរវល់នឹងការងារខ្លាំងយ៉ាងណា ក៏មិនដែលបដិសេធការហៅទូរស័ព្ទរបស់នាងឡើយ មានន័យថា លោកត្រាំតែងតែទទួលទូរស័ព្ទកូនៗរបស់លោកជានិច្ច និងតែងតែយកចិត្តទុកដាក់លើអ្វីដែលកូនគាត់និយាយ ទោះបីជារឿងនោះជារឿងតូចតាចក៏ដោយ។

លោកត្រាំមិនដែលប្រកាន់ និងមិនដែលស្តីថាឱ្យកូនៗរបស់លោកនោះទេ លោកតែងតែបើកចំហនូវអ្វីៗគ្រប់យ៉ាងដោយមិនលាក់បាំង ដើម្បីឱ្យកូនៗរបស់លោកដឹងគ្រប់គ្នា។ Ivanka បានបន្តថា ឪពុករបស់នាងមានសម្តីផ្អែមល្ហែមណាស់ មិនដែលគំរោះគំរើយជាមួយកូនៗនោះទេ ហើយតែងតែផ្តល់សេរីភាពឱ្យកូន ក៏ដូចជាយល់ស្របតាមសំណើររបស់កូនជានិច្ច។ ទោះបីជាមិនដែលនៅក្បែរកូនគ្រប់ពេលវេលាក៏ដោយ ក៏លោកតែងតែផ្តល់ភាពកក់ក្តៅឱ្យកូនស្មើៗគ្នា។ ដូច្នេះកូនស្រីទីពីរ និងកូនជាច្រើនទៀត គិតថាឪពុករបស់ខ្លួនខិតខំណាស់ដើម្បីសុភមង្គលគ្រួសារ និងអាជីវកម្ម ហេតុនេះពួកគេត្រូវតែខិតខំរៀនសូត្រ ក៏ដូចជាខិតខំធ្វើការងារឱ្យបានល្អ ដើម្បីសាងកិត្តិយសឱ្យគ្រួសារ និងលើកមុខមាត់ឪពុករបស់ពួកគេ។

ទោះជាយ៉ាងណាលោកត្រាំ បានប្រកាន់ខ្ជាប់នូវគោលការណ៍បីគឺ កុំពិសាគ្រឿងស្រវឹង កុំជក់បារី និងកុំប្រើប្រាស់គ្រឿងញៀន។ លោក Trump បានពន្យល់ថា កូនប្រុសទីមួយរបស់លោកបានស្លាប់ដោយសារការសេពគ្រឿងស្រវឹង ហើយមិត្តភក្តិរបស់លោកខ្លះបានក្លាយទៅជា “អ្នកញៀនថ្នាំ” បំផ្លាញអនាគត និងអាជីពរបស់ខ្លួនឯង ដូច្នេះហើយលោកបាននៅឱ្យឆ្ងាយពីរឿងទាំងបីនេះ ហើយតែងតែរំលឹកកូនៗរបស់លោកឱ្យជៀសវាងពីរបស់ទាំងនេះ។ លោក Trump ធ្លាប់បានអះអាងនៅលើ Fox News ថា “លោកមិនដែលផឹកស្រា ជក់បារី និងប្រើប្រាស់គ្រឿងញៀននោះទេ” នេះក៏ដោយសារលោកមានកូនដ៏អស្ចារ្យ ហើយសង្ឃឹមថាពួកគេនឹងយកគំរូតាមលោក ក្លាយជាមនុស្សរឹងមាំ៕

មហាសេដ្ឋី Jack Ma សហស្ថាបនិកនៃក្រុមហ៊ុនពាណិជ្ជកម្មអេឡិចត្រូនិកយក្ស Alibaba ធ្លាប់ជាបុរសមានបំផុតនៅក្នុងប្រទេសចិន និងជាពាណិជ្ជករជោគជ័យបំផុតម្នាក់នៅក្នុងពិភពលោក បានផ្តល់ដំបូន្មានថា ប្រសិនបើអ្នកចង់ក្លាយជាអ្នកមាន សូមកុំប្រើទម្លាប់ទាំងនេះឱ្យសោះ។

ទម្លាប់ទីមួយគឺការប្រើលេស ឬដោះសារ៖ មនុស្សប្រភេទនេះតែងតែរកលេសបន្ទាប់ពីបរាជ័យ។ ភាពបរាជ័យរបស់ពួកគេ គឺដោយសារទេវតា ព្រហ្មលិខិត និងកាលៈទេសៈ ប៉ុន្តែពួកគេមិនដែលគិតថាវាកើតឡើងដោយសារខ្លួនគេនោះទេ ដូច្នេះពេលជួបនឹងការលំបាក គេនឹងជ្រើសរើសយកការបោះបង់ ជាហេតុធ្វើឱ្យពួកគេក្រីក្ររហូត។

នេះបើតាមសម្តី Jack Ma មនុស្សមានទេពកោសល្យពិតប្រាកដមិនដែលរកលេសដោះសារនោះឡើយ។ ពួកគេតែងតែរិះគន់ខ្លួនឯង ហើយសង្ឃឹមថាពួកគេនឹងទទួលបាននូវបទពិសោធន៍ថ្មីទាំងស្រុង ហើយបន្ទាប់មកងើបឡើងវិញ។ ពួកគេហ៊ានសារភាពនូវអ្វីដែលខ្លួនបានធ្វើខុស ប៉ុន្តែមិនអាចបន្ទោសអ្នកដទៃបានទេ។

មហាសេដ្ឋីវ័យ ៦០ ឆ្នាំរូបនេះបានចែករំលែកទៀតថា ទម្លាប់ទីពីរដែលធ្វើឱ្យមនុស្សក្រីក្រគឺដោយសារភាពខ្ជិល និងការត្អូញត្អែរ ទួញសោក៖ មនុស្សជាច្រើនតែងតែត្អូញត្អែរ ស្តីបន្ទោស និងច្រណែនថាហេតុអ្វីបានជាពួកគេនៅតែក្រ ហើយមិនអាចជោគជ័យបាន។ ពួកគេតែងតែស្តីបន្ទោសគ្រប់បែបយ៉ាង សម្លឹងមើលអ្នកដទៃដោយចិត្តច្រណែនឈ្នានីស។ ទោះជាយ៉ាងណាក៏ដោយ នៅពេលដែលលែងមានអ្នកស្តាប់ភាពត្អូញត្អែរ ទួញសោករបស់គាត់ គាត់នឹងបាត់បង់ការទុកចិត្ត និងការអាណិតស្រឡាញ់ពីមនុស្សគ្រប់គ្នា ហើយនឹងបាត់បង់ឱកាសដើម្បីទទួលបានការគាំទ្រក្នុងអាជីពការងារផងដែរ។

ចំណុចទីបីគឺគ្មានគោលដៅជីវិតច្បាស់លាស់៖ Jack Ma បាននិយាយថា មនុស្សគ្មានគោលដៅជីវិតច្បាស់លាស់អាចធ្វើឱ្យពួកគេរស់នៅពិបាក និងក្រីក្រ ដោយសារតែពួកគេអាចជាមនុស្សខិតខំប្រឹងប្រែងដែរ ប៉ុន្តែខំដោយគ្មានហេតុផលច្បាស់លាស់ គិតតែពីខំធ្វើដោយពុំមានលទ្ធផលអ្វីសោះ ដូច្នេះដើម្បីឱ្យជីវិតយើងប្រសើរឡើងទៅមុខ អ្នកគួរមានគោលដៅក្នុងជីវិតឱ្យបានច្បាស់លាស់៕

ដើម្បីទាក់ទាញភ្ញៀវទេសចរក្នុងអំឡុងរដូវរងា ប្រទេសចិនថ្មីៗនេះបានបង្ហាញកន្លែងកម្សាន្តល្បីៗចំនួន ៥ ដែលភ្ញៀវទេសចរមិនគួរមើលរំលង។ ដូច្នេះខាងក្រោមនេះគឺជាទីតាំងធ្លាក់ព្រិលដ៏ស្រស់ស្អាតបំផុតក្នុងប្រទេសចិននៅដើមឆ្នាំ ២០២៥។

១.កង្ហារខ្យល់នៅឧទ្យាន Nvshan Lake៖ ឧទ្យាន Nvshan Lake ក្នុងទីក្រុង Mingguang ខេត្ត Anhui ភាគខាងកើតប្រទេសចិន គឺមានកង្ហារខ្យល់ខ្នាតតូចៗជាច្រើនសរុបប្រមាណ ៥០០,០០០ គ្រឿងដែលច្នៃជាពណ៌ចម្រុះ និងរចនាម៉ូដប្លែកៗ សម្រាប់អ្នកទស្សនាទៅកម្សាន្តនៅទីនោះ។

២.ប្រាសាទ Huayan៖ ភាពអស្ចារ្យរបស់ប្រាសាទ Huayan ដែលជាស្នាដៃស្ថាបត្យកម្មមានអាយុកាលតាំងពីឆ្នាំ ១០៣៨ នៃគ.ស បានបង្ហាញពីភាពទាក់ទាញដ៏យូរអង្វែងរបស់ខ្លួន នៅក្រោមផ្ទាំងទឹកកកក្នុងទីក្រុង Datong ខេត្ត Shanxi ភាគខាងជើងប្រទេសចិន។

៣.ទីក្រុង Harbin៖ ទីក្រុង Harbin ក្នុងខេត្ត Heilongjiang ភាគឦសាននៃប្រទេសចិនបានក្លាយជាទីតាំងកម្សាន្តដ៏ពេញនិយមមួយក្នុងរដូវរងារនេះ ដោយសារតែព្រិលសបានគ្រប់ដណ្តប់ពាសពេញទីកន្លែងក្នុងខេត្តនេះ។

៤.សួនផ្ការីកក្នុងខេត្ត Guizhou៖ សួនផ្ការីកក្នុងខេត្ត Guizhou ប្រទេសចិន បានទាក់ទាញភ្ញៀវទេសចររាប់ពាន់នាក ឱ្យមកទស្សនានូវទិដ្ឋភាពផ្ការីកលើដីរាប់ហិចតា ជាមួយនឹងទេសភាពស្រស់ស្អាតបំផុត។

៥.ហុងកុង Disneyland៖ សម្រាប់ការធ្វើដំណើរទៅកម្សាន្ត Disneyland គឺពេញនិយមបំផុតសម្រាប់កុមារគ្រប់រូប ដោយមិនខកបំណងឡើយ។ នៅរដូវរងារនេះតំបន់នេះ បានទាក់ទាញអ្នកទស្សនារាប់លាននាក់ក្នុងមួយឆ្នាំៗ។ វាគឺជាសួនកម្សាន្តធំបំផុតក្នុងទីក្រុងហុងកុង ដោយអ្នកមកទស្សនាទីនេះនឹងទទួលបានអ្វីដែលថ្មី ប្លែកភ្នែក ជាមួយបទពិសោធន៍ធ្លាក់ព្រិលដ៏សម្បូរបែប និងមានប្រជាប្រិយភាពខ្លាំង ដោយទទួលបានអារម្មណ៍ស្រស់ស្រាយនៅតំបន់កំសាន្តនោះ៕