ចាប់ពីខែតុលា ដល់ដើមខែវិច្ឆិកា គឺជាពេលវេលាដ៏ល្អបំផុតដើម្បីមើលស្លឹកឈើពណ៌លឿង និងក្រហមនៅក្នុងប្រទេសកូរ៉េខាងត្បូង។ សម្រាប់ភ្ញៀវទេសចរដែលចូលចិត្តរុករកកន្លែងថ្មីៗ បទពិសោធន៍ប្លែកៗ មិនសូវមានមនុស្សច្រើន តម្លៃសមរម្យ និងនៅជិតរដ្ឋធានីសេអ៊ូល។ ខាងក្រោមនេះគឺជាគោលដៅសម្ងាត់ចំនួន ៥ ដើម្បីទស្សនាស្លឹកឈើជ្រុះដ៏ស្រស់ស្អាតបំផុតដែលបង្ហាញដោយអង្គការទេសចរណ៍កូរ៉េ (KTO)។

១.សួនរុក្ខសាស្ត្រ Hwadam៖ Hwadam គឺជាថ្នាលអេកូឡូស៊ីដែលមានចម្ងាយប្រហែល ១ ម៉ោងកន្លះពីទីក្រុងសេអ៊ូលដោយការដឹកជញ្ជូនសាធារណៈ។ អ្នកទស្សនាអាចដើរយ៉ាងស្រួល និងគយគន់រុក្ខជាតិចម្រុះចំនួន ៤,៣០០ ប្រភេទនៅក្នុងខ្យល់អាកាសបរិសុទ្ធ ហើយអាចជួបសត្វព្រៃតូចៗមួយចំនួនដូចជា កាំប្រម៉ា និងកំប្រុកទៀតផង។ នៅទីនេះ ភ្ញៀវទេសចរអាចជិះរថភ្លើងទៅជុំវិញសួនច្បារ ដើម្បីមើលទេសភាពដ៏ស្រស់ស្អាតនៃរដូវស្លឹកឈើជ្រុះពណ៌មាសរបស់ប្រទេសកូរ៉េយ៉ាងត្រជាក់ភ្នែក។

២.ព្រៃ Ginkgo biloba៖ នៅរដូវស្លឹកឈើជ្រុះព្រៃ ginkgo biloba ដែលមានដើមឈើចំនួន ២,០០០ នៅទីក្រុង Hongcheon បានប្រែទៅជាពណ៌លឿងយ៉ាងស្រស់ស្អាតបំផុត។ ព្រៃនេះដ៏ស្ងប់ស្ងាត់មិនសូវមានអ្នកស្គាល់នេះស្ថិតនៅទីក្រុង Hongcheon ខេត្ត Gangwon ប្រទេសកូរ៉េខាងត្បូង។

៣.ប្រាសាទ Seonunsa៖ ស្ថិតនៅលើភ្នំ Dosol នៃតំបន់ Gochang ប្រាសាទ Seonunsa គឺជាប្រាសាទពុទ្ធសាសនាដែលមានប្រវត្តិជាង ១,៤៦០ ឆ្នាំមកហើយ និងជាកន្លែងដែលល្បីល្បាញសម្រាប់ព្រៃឈើ camellia ពណ៌ក្រហមល្អឥតខ្ចោះ។ ប្រាសាទនេះគឺជាគោលដៅសម្ងាត់ដែលត្រូវបានវាយតម្លៃខ្ពស់ដោយអង្គការទេសចរណ៍កូរ៉េ KTO សម្រាប់រដូវស្លឹកឈើជ្រុះជាមួយនឹងទេសភាពដ៏ស្រស់ស្អាតបំផុតមិនធ្លាប់មាន។ ដូច្នេះភ្ញៀវទេសចរអាចដើរទស្សនាថតរូប និងអាចស្នាក់នៅពេញមួយយប់នៅប្រាសាទ Seonunsa បានផងដែរ។

៤.ព្រៃ Gwanbangjerim៖ គឺជាទំនប់ទឹកប្រវែង ៦ គីឡូម៉ែត្រ ដែលសាងសង់តាមដងទន្លេ Gwanbangcheon ។ នៅតាមបណ្តោយមាត់ទន្លេមានព្រៃប្រវែង ២ គីឡូម៉ែត្រ ដែលនៅរដូវស្លឹកឈើជ្រុះ ព្រៃឈើទីនេះគឺបានទាក់ទាញអ្នកទេសចររាប់ពាន់នាក់ជារៀងរាល់ឆ្នាំដោយសារពណ៌លឿងនៃស្លឹក និងអ័ព្ទពណ៌សនៅពេលព្រឹក ហើយនៅពេលយប់វិញ ព្រៃគឺជាកន្លែងដ៏រ៉ូមេទិកមួយសម្រាប់គូស្នេហ៍។

៥.សួនសម្ងាត់ Wondae-ri Birch៖ កន្លែងនេះមិនអនុញ្ញាតឱ្យភ្ញៀវទេសចរចូលទស្សនាកម្សាន្តទេ ព្រោះវាស្ថិតនៅក្នុងតំបន់ប្រតិបត្តិការយោធា ទោះជាយ៉ាងណាភ្ញៀវត្រូវបានអនុញ្ញាតឱ្យថតរូបតែនៅតាមដងផ្លូវប៉ុណ្ណោះ។ នៅតាមដងផ្លូវនៃសួនច្បារនេះគឺមានទេសភាពស្រស់ស្អាតបំផុត ដូច្នេះវានៅតែជាគោលដៅពេញនិយមសម្រាប់អ្នកថតរូប។ តំបន់នេះមានភាពល្បីល្បាញដោយសារទេសភាពអាថ៌កំបាំងដែលបង្កើតឡើងដោយផ្លូវដីរាងអក្សរ S និងអ័ព្ទពេលព្រឹក៕

ប្រទេសឥណ្ឌូណេស៊ី ៖ ​កាលពីដើមខែតុលា ឆ្នាំ២០២៤ ​មន្ត្រីឥណ្ឌូណេស៊ីបានហាមឃាត់ការធ្វើអាជីវកម្មអនឡាញ Temu របស់ប្រទេសចិន ដោយសារបារម្ភថា អាជីវកម្មនេះនឹងប៉ះពាល់ដល់សហគ្រាសធុនតូច និងមធ្យម (SMEs) របស់ឥណ្ឌូណេស៊ី ។ ម្យ៉ាងទៀត ឥណ្ឌូណេស៊ីពុំទទួលបានប្រយោជន៍ ដោយសារ Temu លក់ផលិតផលពីរោងចក្រចិនមកអតិថិជនដោយផ្ទាល់ ។

មន្ត្រីនាយកដ្ឋានពាណិជ្ជកម្មឥណ្ឌូណេស៊ីឈ្មោះ Isy Karim និយាយថា ការធ្វើអាជីវកម្មអនឡាញ Temu ដែលលក់ផលិតផលពីរោងចក្រចិនមកកាន់អតិថិជនឥណ្ឌូណេស៊ីដោយផ្ទាល់ គឺផ្ទុយនឹងបទប្បញ្ញត្តិពាណិជ្ជកម្មរបស់ឥណ្ឌូណេស៊ី ដែលកំណត់ឱ្យមានឈ្មួញកណ្តាល ឬអ្នកចែកចាយផលិតផលក្នុងស្រុក ។

រីឯលោក Budi Arie Setiadi រដ្ឋមន្ត្រីក្រសួងព័ត៌មាន និងទំនាក់ទំនងឥណ្ឌូណេស៊ី បានថ្លែងកាលពីថ្ងៃទី១ ខែតុលា ឆ្នាំ២០២៤ ថា ការអនុញ្ញាតឱ្យអាជីវកម្មអនឡាញ Temu ចូលមកឥណ្ឌូណេស៊ីនឹងធ្វើឱ្យប៉ះពាល់ដល់សេដ្ឋកិច្ច និងសង្គម ជាពិសេស គឺសហគ្រាសធុនតូច និងមធ្យមរបស់ឥណ្ឌូណេស៊ី ។

លោករដ្ឋមន្ត្រីថ្លែងថា ៖ «យើងត្រូវការឱ្យឌីជីថលមានអ្វីៗគ្រប់បែបយ៉ាង ដែលធ្វើឱ្យសង្គមអាចផលិតទំនិញ និងមានប្រាក់ចំណូលច្រើន ។ បើអាជីវកម្មអនឡាញចិនមានផលប៉ះពាល់ដល់អាជីវកម្មក្នុងស្រុក និងគ្មានប្រយោជន៍ដល់ឥណ្ឌូណេស៊ីទេនោះ យើងនឹងហាមឃាត់» ។

ក្រសួងពាណិជ្ជកម្ម និងសហគ្រាសធុនតូច និងមធ្យមឱ្យដឹងថា ចាប់ពីខែកញ្ញា ឆ្នាំ២០២២ អាជីវកម្មអនឡាញចិន Temu បានព្យាយាមសុំចុះបញ្ជីពាណិជ្ជកម្មនៅឥណ្ឌូណេស៊ី ចំនួន៣លើក ប៉ុន្តែពុំទទួលការអនុម័ត ។

អាជីវកម្មអនឡាញចិន Temu បានក្លាយជាប្រធានបទមានការជជែកគ្នាយ៉ាងច្រើននៅឥណ្ឌូណេស៊ី ក្រោយពីក្រុមហ៊ុននេះបង្ហាញខ្លួនក្នុងកម្មវិធី «2024 E-commerce Expo» ដែលរៀបចំចាប់ពីថ្ងៃទី២៤ ដល់ថ្ងៃទី២៥ ខែកញ្ញា ឆ្នាំ២០២៤ នៅទីក្រុងហ្សារកាតា ។ បច្ចុប្បន្ន Temu បានដំណើរការនៅប្រទេសចំនួន៦០ និងចូលមកទីផ្សារអាស៊ីអាគ្នេយ៍កាលពីឆ្នាំ២០២៣ គឺចូលមកហ្វីលីពីន នៅខែសីហា, ម៉ាឡេស៊ី ខែកញ្ញា និងពង្រីកទីផ្សារនៅថៃ ខែកក្កដា ឆ្នាំ២០២៤ ។

គួរបញ្ជាក់ថា កាលពីខែតុលា ឆ្នាំ២០២៣ ឥណ្ឌូណេស៊ីបានហាមឃាត់ TikTok Shop ដើម្បីការពារអាជីវកម្មតូចតាច និងទិន្នន័យរបស់អ្នកប្រើប្រាស់ ។ ប៉ុន្តែនៅខែមករា ឆ្នាំ២០២៤ TikTok បានទិញភាគហ៊ុន ៧៥% ពី Tokopedia ជាអាជីវកម្មអនឡាញឥណ្ឌូណេស៊ី ដើម្បីត្រឡប់មកកាន់ទីផ្សារឥណ្ឌូណេស៊ីម្តងទៀត ៕

្រទេសថៃ ៖ កាលពីថ្ងៃទី៥ ខែតុលា ឆ្នាំ២០២៤ សារព័ត៌មានថៃរាយការណ៍ថា ដំរីនៅខេត្តឈៀងម៉ៃ ប្រទេសថៃ បានងា.ប់ និងអណ្តែតទឹកអស់ជាច្រើនក្បាលដោយសារទឹកជំនន់ហូរខ្លាំង ។ បើទោះជាអាជ្ញាធរបានប្រើប្រាស់ដ្រូនតាមស្វែងរកដំរីអណ្តែតទឹកក្តី ប៉ុន្តែដោយសារភ្លៀងធ្លាក់ជាបន្តបន្ទាប់ ទើបក្លាយជាឧបសគ្គក្នុងការតាមរក ។

លោកស្រី Zoraida Salvala មន្ត្រីមូលនិធិមិត្តសត្វដំរី បាននិយាយមកកាន់សារព័ត៌មានថា ទឹកជំនន់បានលិចខ្លាំងនៅស្រុកមេទែង និងស្រុកមេវ៉ាង ខេត្តឈៀងម៉ៃ ដែលនៅស្រុកទាំងពីរនេះមានកន្លែងចិញ្ចឹមដំរី ជាង២០កន្លែង និងមានដំរីជិត៥០០ក្បាល ។ បច្ចុប្បន្ន អាជ្ញាធរបានជម្លៀសដំរីទាំងនេះទៅកាន់ទីទួលខ្ពស់អស់ហើយ ប៉ុន្តែអ្វីគួរឱ្យសោកស្តាយ គឺមានដំរីអណ្តែតតាមទឹក ចំនួន២ក្បាល ។

លោកស្រីបន្តថា អាជ្ញាធរបានព្យាយាមជួយដំរីអណ្តែតទឹកបាន១ក្បាល ប៉ុន្តែដំរី១ក្បាលទៀតជាប់នឹងមែកឈើ ទើបអាជ្ញាធរពុំអាចជួយសង្គ្រោះបាន ។ ក្រោយមក ដំរី១ក្បាលនេះក៏បានងាប់ និងធ្វើឱ្យអ្នកឃើញហេតុការណ៍សោកសៅយ៉ាងខ្លាំង ហើយពុំដឹងថា វាអណ្តែតមកពីស្រុកណាទេ ។

លោកស្រីបន្ថែមថា នៅមានដំរីចំនួន៣០ក្បាលទៀតបានអណ្តែតក្នុងទន្លេមេទែង ដែលមានកម្រិតទឹកហូរខ្លាំង ។ បើទោះជាដំរីចេះហែលទឹកក្តី ប៉ុន្តែពេលទឹកហូរខ្លាំងបែបនេះ វាពុំអាចហែលទឹកបានទេ ហើយក៏អណ្តែតទៅតាមខ្សែទឹកពេលវាអស់កម្លាំង ។ លោកស្រីថា ៖ «អាជ្ញាធរបានសហការគ្នាជាមួយយោធា ដោយបង្ហោះដ្រូនស្វែងរកដំរី ។ ប៉ុន្តែឧបសគ្គខ្លាំង គឺភ្លៀងបានធ្លាក់ជាបន្តបន្ទាប់ ទើបអាជ្ញាធរផ្អាកការស្វែងរក» ។

រីឯលោក Wirot Supachoksahakul ទីប្រឹក្សាមូលនិធិមិត្តសត្វដំរី និយាយថា បញ្ហាប្រឈមខ្លាំង គឺដំរីជិត៥០០ក្បាលដែលជម្លៀសពីស្រុកមេទែង និងស្រុកមេវ៉ាង ទៅកាន់ទីទួលខ្ពស់នោះ គ្មានចំណីស៊ីទេ ។ បើទោះជាមានអ្នកយកស្មៅឱ្យវាស៊ីក្តី ក៏មិនគ្រប់គ្រាន់ដែរ ហើយមិនដឹងថា ទឹកស្រកពេលណាទេ ។ អាជ្ញាធរបានចាត់កម្លាំងយាមកាមដំរីទាំងនេះមិនឱ្យវាដើរពាសវាលពាសកាលលើទីទួល ។

អាជ្ញាធរនិយាយថា បើទោះជាដំរីជាសត្វពូកែហែលទឹកក្តី ប៉ុន្តែដោយសារទឹកលិចជ្រៅពេកធ្វើឱ្យដំរីអណ្តែតទឹក និងយមិនដឹងថា ពួកវាមានជោគវាសនាបែបណាទេ ។ រីឯកងទ័ពអាកាសបានព្យាយាមជួយសង្គ្រោះជីវិតដំរីអណ្តែតទឹកនៅស្រុកមេទែង ដោយប្រើប្រាស់យន្តហោះប្រភេទ Air Force តាមស្វែងរក ៕

សហរដ្ឋអាមេរិក៖ នេះជាលើកដំបូងហើយដែលនាយកប្រតិបត្តិ Meta លោក Mark Zuckerberg បានក្លាយជាអ្នកមានបំផុតទីពីរលើពិភពលោក ជាមួយទ្រពសម្បត្តិសុទ្ធជាង ២០៦ ពាន់លានដុល្លារអាមេរិក បន្ទាប់ពី Elon Musk ដែលជាមហាសេដ្ឋីមានជាងគេទីមួយក្នុងលោក។

យោងតាមស្ថិតិរបស់ Bloomberg Billionaires Index ថៅកែ Facebook និង Instagram រូបនេះ បានទម្លាក់ដំណែងលោក Jeff Bezos ឱ្យមកត្រឹមលេខរៀងទីបីវិញ ខណៈស្ថាបនិក Amazon ពីមុនមកគឺជាអ្នកមានបំផុតទីពីរលើលោក។

កន្លងទៅអស់រយៈពេលជាយូរមកហើយ Mark Zuckerberg គឺបានកាន់ដំណែងជាអ្នកមានបំផុតទីបួនលើពិភពលោក ប៉ុន្តែនេះជាលើកដំបូងហើយដែលនាយកប្រតិបត្តិ Meta បានកាន់ដំណែងជាមហាសេដ្ឋីមានជាងគេលំដាប់ទីពីរក្នុងលោកវិញ។ ដូច្នេះបច្ចុប្បន្ន Mark Zuckerberg វ៉ាដាច់ Jeff Bezos ក្លាយជាអ្នកមានបំផុតទីពីរលើពិភពលោកជាមួយទ្រពសម្បត្តិសុទ្ធជាង ២០៦ ពាន់លានដុល្លារអាមេរិក ខ្ពស់ជាង Bezos ១ ពាន់លានដុល្លារ។

មូលហេតុគឺដោយសារភាគហ៊ុនមេតាបានកើនឡើង ១.៧% នៅកំណត់ត្រា ៥៨២.៧០ ដុល្លារដែលលេខកូដនេះបានកើនឡើងរហូតដល់ ២៣% ចាប់តាំងពីដើមខែសីហាមក នៅពេលដែល Meta បង្ហោះលទ្ធផលត្រីមាសទីពីរដែលប្រសើរជាងការរំពឹងទុក និងបង្ហាញពីផែនការសម្រាប់ AI chatbots ។ ដូច្នោះហើយ ប្រាក់ចំណូលរបស់ក្រុមហ៊ុនឈានដល់ជាង ៣៩ ពាន់លានដុល្លារអាមេរិក កើនឡើង ២២% ធៀបនឹងរយៈពេលដូចគ្នាកាលពីឆ្នាំមុន ដែលនេះគឺជាត្រីមាសទីបួនជាប់គ្នាហើយដែលមានការកើនឡើងលើសពី ២០% ។

លើសពីនេះប្រាក់ចំណេញសុទ្ធបានកើនឡើង ៧៣% ដល់ ១៣.៤៧ ពាន់លានដុល្លារទៀតផង។ ហេតុនេះបច្ចុប្បន្ន Zuckerberg មាន ១៣% នៃភាគហ៊ុន Meta ។ គួរបញ្ជាក់ដែរថា ចាប់តាំងពីដើមឆ្នាំមក ទ្រព្យសកម្មរបស់មេតាបានកើនឡើង ៧៨ ពាន់លានដុល្លារ ដែលជាចំនួនខ្លាំងបំផុតក្នុងចំណោមក្រុមមហាសេដ្ឋីដែលមានជាងគេបំផុតចំនួន ៥០០ នៅលើពិភពលោកដែលតាមដានដោយ Bloomberg៕