ប្រទេសចិន ៖ កាលពីចុងខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ប្រទេសចិននឹងចាប់ផ្តើមនាំចូលអាហារសមុទ្រជប៉ុនឡើងវិញបន្តិចម្តងៗ ក្រោយពីចិនបានផ្អាកការនាំចូលអស់រយៈពេល១ឆ្នាំ ដោយសារបារម្ភថា អាហារសមុទ្រជប៉ុនគ្មានសុវត្ថិភាពសម្រាប់អ្នកបរិភោគ ។

រដ្ឋាភិបាលចិនលើកឡើងថា តាំងពីខែសីហា ឆ្នាំ២០២៣ មក រដ្ឋាភិបាលចិនបានចេញបញ្ជាហាមនាំចូលអាហារសមុទ្រពីជប៉ុនជាដាច់ខាត ហើយចិនក៏ចាប់ផ្តើមអនុវត្តបម្រាមនេះ នៅខែតុលា ឆ្នាំ២០២៣ ។ ការហាមឃាត់នាំចូលអាហារសមុទ្រជប៉ុន ដោយសារជប៉ុនបង្ហូរទឹកចេញពីរោងចក្រថាមពលនុយក្លេអ៊ែរ Fukushima ចូលក្នុងមហាសមុទ្រប៉ាស៊ីហ្វិក ។

ប៉ុន្តែរដ្ឋាភិបាលជប៉ុននិយាយថា ទឹកបង្ហូរចេញពីរោងចក្រថាមពលនុយក្លេអ៊ែររបស់ខ្លួនមានសុវត្ថិភាព និងទទួលការគាំទ្រពីទីភ្នាក់ងារនុយក្លេអ៊ែររបស់អង្គការសហប្រជាជាតិ ។ ការបង្ហូរទឹកកខ្វក់នេះបានធ្វើឱ្យចិនតវ៉ាយ៉ាងខ្លាំងថា គឺជាទង្វើមួយឃើញតែផលប្រយោជន៍ផ្ទាល់ខ្លួន ហើយចិនក៏បានហាមនាំចូលអាហារសមុទ្រជប៉ុនគ្រប់ប្រភេទ ។

នៅខែកញ្ញា ឆ្នាំ២០២៤នេះ ប្រទេសចិន និងជប៉ុនបានឯកភាពគ្នាពាក់ព័ន្ធនឹងការបង្ហូរទឹកចេញពីរោងចក្រនុយក្លេអ៊ែរ ទើបចិនសម្រេចចិត្តលុបចោលការផ្អាកនាំចូលអាហារសមុទ្រជប៉ុន ដែលចិនបានអនុវត្តអស់រយៈពេល១ឆ្នាំ ។

ក្រសួងការបរទេសរបស់ចិនឱ្យដឹងថា នឹងចាប់ផ្តើមកែតម្រូវវិធានការពាក់ព័ន្ធទាំងអស់ដោយផ្អែកលើកត្តាវិទ្យាសាស្ត្រ ហើយចិននឹងនាំចូលអាហារសមុទ្រជប៉ុនបន្តិចម្តងៗ ដើម្បីឱ្យស្របតាមបទប្បញ្ញត្តិ និងស្តង់ដារ ។

ចំណែកនាយករដ្ឋមន្ត្រីជប៉ុន លោក Fumio Kishida បានថ្លែងថា ជប៉ុនរីករាយណាស់ ដែលចិនសម្រេចចិត្តនាំចូលអាហារសមុទ្រជប៉ុនឡើងវិញ ក្រោយពីផ្អាកអស់រយៈពេលយ៉ាងយូរ ។ ជប៉ុននឹងត្រួតពិនិត្យគុណភាពទឹកដែលបង្ហូរពីរោងចក្រថាមពលនុយក្លេអ៊ែរបន្ថែមទៀត ដើម្បីផ្តល់ទំនុកចិត្តដល់អតិថិជនថា អាហារសមុទ្រជប៉ុនពុំប៉ះពាល់សុខភាពទេ ៕

ប្រទេសចិន ៖ រយៈពេលប៉ុន្មានឆ្នាំចុងក្រោយនេះ ការផលិតមនុស្សយន្តរបស់ចិនកាន់តែទំនើបខ្លាំងឡើងៗ ។ ក្នុងកិច្ចប្រជុំមនុស្សយន្តលំដាប់ពិភពលោក នៅទីក្រុងប៉េកាំង ប្រទេសចិន បានបង្ហាញមនុស្សយន្ត Humanoid ជាច្រើនប្រភេទ ក្នុងនោះមានមនុស្សយន្តកវីដ៏ល្បីល្បាញបំផុតរបស់ចិន ឈ្មោះ ស៊ូ ស៊ឺ ដែលរស់រវើកដូចមានជីវិតពិតៗ ។

EX Robots គឺជាក្រុមហ៊ុនល្បីល្បាញផ្នែកផលិតមនុស្សយន្ត Humanoid បានរៀបចំកម្មវិធីបង្ហាញមនុស្សយន្តថ្មីៗជាច្រើន ព្រមទាំងមនុស្សយន្តមានជំនាញធ្វើការងារផ្ទះផងដែរ ។ វាជាមនុស្សយន្តស្រី ដែលក្រុមហ៊ុន EX Robots បានផលិតសម្រាប់ឱ្យជួយធ្វើការងារផ្សេងៗក្នុងផ្ទះ ហើយវាអាចគ្រប់គ្រងឧបករណ៍បច្ចេកវិទ្យាទាំងអស់ក្នុងផ្ទះ និងធ្វើជាមិត្តភក្តិជាមួយសមាជិកគ្រួសារផងដែរ ។

លោក លី ប៉យ៉ាង ស្ថាបនិក និងជា CEO របស់ក្រុមហ៊ុន EX Robots នៅទីក្រុងតាលៀន និយាយថា ក្រុមហ៊ុនរបស់លោកបានរួមបញ្ចូល Hardware និងបច្ចេកវិទ្យា AI ជាមួយគ្នា ដើម្បីឱ្យមនុស្សយន្តអាចសម្របខ្លួនជាមួយស្ថានការណ៍ផ្សេងៗបែប Real Time ។ លោកបញ្ជាក់ថា ៖ «មនុស្សយន្តអាចបំពេញតួនាទីជាអ្នកថែទាំគ្រួសារដ៏សំខាន់ មិនថាមនុស្សចាស់រស់នៅផ្ទះម្នាក់ឯង ឬយុវជន ឬកុមារ ដែលអ្នកទាំងនេះចង់មានមិត្តភក្តិជាមនុស្សយន្ត» ។

លោកបន្តថា មនុស្សយន្តរាប់រយគ្រឿងរបស់ក្រុមហ៊ុន EX Robots ត្រូវបានយកទៅប្រើប្រាស់រួចហើយ ។ ក្រុមហ៊ុននឹងផលិតមនុស្សយន្តបន្ថែមទៀតចំនួន៥០០គ្រឿង នៅឆ្នាំ២០២៤ នេះ ។

ដោយឡែក ក្រុមហ៊ុន Astrobot ដែលមានទីតាំងនៅទីក្រុងសិនជិន ក៏បានបង្ហាញមនុស្សយន្តថ្មីផងដែរ គឺមនុស្សយន្តនេះអាចលេងតន្ត្រីចិនបុរាណឈ្មោះ «យាងឈីន» និងសរសេរអក្សរចិនបាន ។ ក្រៅពីនេះ វាក៏អាចបង្ហាញពីក្បាច់គុនចិន, ធ្វើការងារផ្ទះ និងរៀបចំម្ហូបអាហារទៀតផង ។

លោក ឡៃ ជី ស្ថាបនិក និងជា CEO របស់ក្រុមហ៊ុន Astrobot និយាយថា បច្ចេកវិទ្យា AI មានសារៈសំខាន់យ៉ាងខ្លាំងក្នុងការធ្វើឱ្យមនុស្សយន្តមានចលនាដូចមនុស្ស និងអាចរៀនសូត្រវិធីធ្វើការជាប្រព័ន្ធ ព្រមទាំងមានហេតុផលស្រដៀងមនុស្ស ។

ក្រុមហ៊ុន Astrobot បានផលិតមនុស្សយន្តប្រុស Humanoid មានលក្ខណៈស្រដៀងមនុស្ស ដើម្បីអាចប្រើប្រាស់សម្ភារៈផ្សេងៗដែលមនុស្សបង្កើតឡើង ព្រមទាំងដឹងពីអារម្មណ៍ផ្លាស់ប្តូររបស់មនុស្ស ។ ក្រុមហ៊ុនរំពឹងថា មនុស្សយន្តនឹងជំនួសកម្លាំងពលកម្មមនុស្សដែលកំពុងធ្លាក់ចុះ និងបំពេញការងារជាបុគ្គលិកថែទាំមនុស្សចាស់ ខណៈចិនកំពុងឈានទៅរកសង្គមមនុស្សចាស់យ៉ាងឆាប់រហ័ស និងមានកម្លាំងពលកម្មធ្លាក់ចុះ ។

ការផលិតមនុស្សយន្ត Humanoid របស់ចិនបានកើនឡើងយ៉ាងខ្លាំងកាលពីឆ្នាំ២០២៣ និងកើនឡើង៨៥.៧% បើធៀបនឹងឆ្នាំ២០២២ ។ ចិនរំពឹងថា ឧស្សាហកម្មមនុស្សយន្តនឹងកាន់តែរីកចម្រើនខ្លាំងបន្ថែមទៀត នាថ្ងៃអនាគត ៕

ប្រទេសជប៉ុន ៖ បើទោះជាភ្ញៀវទេសចរបរទេសមកកម្សាន្តនៅប្រទេសជប៉ុនកើនឡើងជាបន្តបន្ទាប់ក្តី ប៉ុន្តែពលរដ្ឋជប៉ុនបែរជានិយាយថា ពួកគេពុំចង់ដើរកម្សាន្តនៅក្រៅប្រទេសទេ និងចង់សម្រាកនៅផ្ទះ ឬដើរកម្សាន្តក្នុងប្រទេសច្រើនជាង ។ ហេតុអ្វីទើបពលរដ្ឋជប៉ុននិយាយបែបនេះ?

មូលហេតុចម្បងដែលធ្វើឱ្យពលរដ្ឋជប៉ុនបច្ចុប្បន្នពុំនិយមធ្វើដំណើរកម្សាន្តនៅក្រៅប្រទេស គឺបណ្តាលមកពីកត្តាច្រើនយ៉ាង ដូចជា ៖ ពួកគេពិបាកសុំច្បាប់ឈប់សម្រាកពីការងារ, គ្មានប្រាក់សម្រាប់ដើរកម្សាន្ត និងឧបសគ្គផ្នែកភាសាបរទេស ។

គេហទំព័រ Nikkei Asia ផ្សព្វផ្សាយថា ដំណើរកម្សាន្ត គឺជាការសម្រាកដ៏ពេញនិយមរបស់ពលរដ្ឋជប៉ុន តាំងពីសេដ្ឋកិច្ចជប៉ុនរីកចម្រើនខ្លាំងមកម៉្លេះ ។ កាលពីឆ្នាំ២០២៣ ពលរដ្ឋជប៉ុនបានដើរកម្សាន្តក្នុងប្រទេសច្រើនបំផុត ប៉ុន្តែការដើរកម្សាន្តទៅក្រៅប្រទេសរបស់ពួកគេ ស្មើត្រឹមតែ៦០% នៃអំឡុងពេលជំងឺកូវីដ-១៩ ឆ្លងរាតត្បាត ។ ជាមួយគ្នានេះ ដំណើរកម្សាន្តឆ្លងយប់ក្នុងប្រទេសបានធ្លាក់ចុះយ៉ាងខ្លាំង បើធៀបពីមួយឆ្នាំទៅមួយឆ្នាំ តាំងពីរដូវស្លឹកឈើជ្រុះ ។

បច្ចុប្បន្ន ពលរដ្ឋជប៉ុននិយមដើរកម្សាន្តតែម្នាក់ឯង ដោយសារប្រាក់យ៉េនធ្លាក់ថ្លៃ និងការចំណាយប្រាក់សម្រាប់ដំណើរកម្សាន្តកើនឡើង ។ ប៉ុន្តែឧបសគ្គធំបំផុតសម្រាប់ដំណើរកម្សាន្តក្រៅប្រទេស គឺពិបាកសុំច្បាប់សម្រាកពីការងារ ទើបពួកគេសម្រេចចិត្តដើរកម្សាន្តក្នុងប្រទេស និងស្នាក់នៅមិនលើស២យប់ ។ រីឯដំណើរកម្សាន្តក្រៅប្រទេស គឺតិចតួចប៉ុណ្ណោះក្នុង១ឆ្នាំ ដែលផ្ទុយគ្នាពីពលរដ្ឋអឺរ៉ុបអាចសុំច្បាប់ឈប់សម្រាកបានយូរថ្ងៃ ។

នាយក Hoshino Resorts និយាយថា ៖ «បើក្រុមហ៊ុនអនុញ្ញាតឱ្យបុគ្គលិកឈប់សម្រាកបានច្រើនថ្ងៃ នឹងធ្វើឱ្យពួកគេងាយស្រួលទៅលេងនៅក្រៅប្រទេស ហើយធ្វើឱ្យវិស័យទេសចរណ៍ជប៉ុនកើនឡើងផងដែរ» ។

លទ្ធផលស្ទង់មតិរបស់គណៈរដ្ឋមន្ត្រី ឆ្នាំ២០១៨ បង្ហាញថា អ្នកឆ្លើយតបចាប់ពីអាយុ១៣ឆ្នាំ ទៅ២៩ឆ្នាំ ស្មើរហូតដល់៥៣% មិនចង់ទៅសិក្សានៅក្រៅប្រទេសទេ ខណៈអ្នកឆ្លើយតបនៅកូរ៉េខាងត្បូង និងលោកខាងលិចពុំចង់ទៅសិក្សានៅក្រៅប្រទេស ស្មើពី២០% ទៅជាង៣០% ប៉ុណ្ណោះ ។ រីឯយុវជនលោកខាងលិចដែលនិយាយភាសាអង់គ្លេស ពួកគេបានទៅលេងក្រៅប្រទេសក្រោយបញ្ចប់ថ្នាក់មធ្យមសិក្សា ។

មន្ត្រីតំណាងអង្គការទេសចរណ៍ជាតិជប៉ុននិយាយថា ពលរដ្ឋជប៉ុនទៅលេងក្រៅប្រទេសធ្លាក់ចុះ នឹងធ្វើឱ្យប៉ះពាល់ដល់ការទាក់ទាញភ្ញៀវទេសចរបរេសមកលេងជប៉ុន ។ រដ្ឋាភិបាលជប៉ុនបានពិចារណាគោលនយោបាយជំរុញឱ្យយុវជនទៅដើរលេងក្រៅប្រទេសឱ្យបានច្រើន ដូចជា ៖ ឱ្យអាជ្ញាធរមូលដ្ឋានបង់ថ្លៃលិខិតឆ្លងដែន ជាដើម ។

រីឯលទ្ធផលស្ទង់មតិពលដ្ឋជប៉ុនចាប់ពីអាយុ១៥ឆ្នាំ ទៅ២៤ឆ្នាំ កាលពីឆ្នាំ២០២៣ ដោយក្រុមហ៊ុនស្រាវជ្រាវទីផ្សារ Shibuya 109 Lab ក្នុងទីក្រុងតូក្យូបង្ហាញថា មូលហេតុសំខាន់ចំនួន៣ ដែលធ្វើឱ្យយុវជនជប៉ុនពុំចង់ទៅក្រៅប្រទេស រួមមាន ៖ ប្រាក់, សុវត្ថិភាព និងជំនាញភាសា ៕