ប្រទេសឥណ្ឌា ៖ បើនិយាយពីទន្លេនៅប្រទេសឥណ្ឌា មនុស្សគ្រប់គ្នានឹងគិតថា ទន្លេឥណ្ឌាមានភាពកខ្វ.ក់ ខ្លាំង មិនគួរឱ្យចុះលេងទេ ដោយសារសម្បូរទៅដោយកាកសំណល់ស្អុយរលួយ ឬជាកន្លែងធ្វើពិធីសាសនាផ្សេងៗតាមជំនឿរបស់ពលរដ្ឋឥណ្ឌា ។ ប៉ុន្តែមានទន្លេមួយនៅឥណ្ឌាមានទឹកស្អាតថ្លាឈ្វេងដូចកញ្ចក់ មើលឃើញដល់បាតទន្លេ ហើយបើភ្ញៀវទេសចរបានជិះទូកលេងនៅទីនេះ គឺដូចជាបានជិះទូកហោះ ឬជាឋានសួគ៌សម្រាប់អ្នកស្រឡាញ់ធម្មជាតិ ។

ទន្លេនេះមានឈ្មោះថា «ទន្លេ Umngot» ឬ «ទន្លេ Dawki» ស្ថិតនៅភូមិ Mawlynnong ក្នុងជ្រលងភ្នំក្នុងរដ្ឋមេខាឡៃ ភាគឦសានប្រទេសឥណ្ឌា និងនៅក្បែរព្រំដែនឥណ្ឌាជាមួយបង់ក្លាដែស ។ ទន្លេនេះមានពណ៌ដូចគ្រាប់ត្បូងមរកត ហើយភ្ញៀវទេសចរបរទេសតែងតែសរសើរថា វាមានទឹកស្អាត ថ្លាឈ្វេង ខុសពីទន្លេផ្សេងៗនៅឥណ្ឌា ។ អ្នកជិះទូកលេងក្នុងទន្លេនឹងអាចមើលឃើញដុំថ្មមានពណ៌ចម្រុះនៅបាតទន្លេ និងឃើញត្រីកំពុងហែលទឹកទៀតផង ។

ពលរដ្ឋឥណ្ឌាដែលរស់នៅក្បែរទន្លេ Umngot បានយកចិត្តទុកដាក់ថែរក្សាបរិស្ថាន និងគុណភាពទឹកទន្លេយ៉ាងខ្លាំង ហើយវាក៏ជាប្រពៃណីបុរាណរបស់ពួកគេផងដែរ ដែលមានតួនាទីថែរក្សាបរិស្ថានធម្មជាតិ ។ ហេតុនេះ ទើបធ្វើឱ្យទឹកទន្លេនេះមានសភាពស្អាត ថ្លាឈ្វេង ហើយវាពុំមែនជារូបភាពបំភាន់ភ្នែកទេ ។

រដ្ឋមេខាឡៃ គឺជាតំបន់ខ្ពង់រាបដែលសម្បូរទៅដោយធនធានធម្មជាតិ ដូចជា ៖ ទន្លេ, វាលខ្សាច់, ព្រៃឈើ, ខ្យល់អាកាសល្អបរិសុទ្ធ និងកំណប់រ៉ែជាច្រើនប្រភេទ ហើយគេអាចនិយាយបានថា រដ្ឋមេខាឡៃ គឺជាឋានសួគ៌សម្រាប់អ្នកស្រឡាញ់ធម្មជាតិ ។ រីឯភូមិ Mawlynnong ត្រូវបានគេដាក់ឈ្មោះថា «God’s Own Garden» មានន័យថា «សួនច្បាររបស់ទេវតា» ហើយភូមិនេះទទួលបានពានរង្វាន់ភូមិស្អាតបំផុតនៅតំបន់អាស៊ី កាលពីឆ្នាំ២០០៣ ។

ភូមិ Mawlynnong មានបរិស្ថានស្អាតយ៉ាងខ្លាំង ហើយសូម្បីតែស្លឹកឈើជ្រុះ ក៏ត្រូវបានអ្នកភូមិបោសសម្អាតដាក់ក្នុងមានធុងសំរាមធ្វើឱ្យដើមឫស្សីដែរ ។ ក្រៅពីនេះ ភ្ញៀវទេសចរមកកម្សាន្តក្នុងភូមិ ពុំអនុញ្ញាតឱ្យប្រើប្រាស់ថង់ផ្លាស្ទិក និងជក់បារីទេ ។

ភ្ញៀវទេសចរម្នាក់និយាយថា ពេលខ្លួនជិះទូកនៅទន្លេនេះមានអារម្មណ៍ថា វាពិតជាអស្ចារ្យខ្លាំងណាស់ គឺដូចគ្នាកំពុងអណ្តែតខ្លួនលើអាកាសដែរ ។ ភ្ញៀវទេសចរផ្សេងទៀតគួរតែមកលេងនៅទីនេះបានម្តងក្នុងមួយជីវិត ដើម្បីមើលឃើញទិដ្ឋភាពនេះដោយផ្ទាល់ភ្នែក ។

ចំណែកមូលហេតុធ្វើឱ្យទន្លេ Umngot មានទឹកស្អាតថ្លាឈ្វេងដូចកញ្ចក់ និងក្លាយជាគោលដៅទេសចរណ៍ ដោយសារវាជាតំបន់តែមួយគត់នៅប្រទេសឥណ្ឌា ដែលគ្មានការបំពុលបរិស្ថាន ។ ការបំពុលសូន្យ គឺជាមូលហេតុចម្បងនៅពីក្រោយទឹកស្អាតរបស់ទន្លេ ដោយសារភូមិនេះគ្មានរោងចក្រ ឬប្រភពបំពុលបរិស្ថានផ្សេងទៀត ។

កន្លងមក អ្នកភូមិរស់នៅតាមមាត់ទន្លេបាននាំគ្នាតវ៉ាសុំឱ្យអាជ្ញាធររដ្ឋមេខាឡៃ បញ្ឈប់គម្រោងសាងសង់ទំនប់ទឹក ពីព្រោះពួកគេជឿថា នឹងធ្វើឱ្យទឹកទន្លេ Umngot ដ៏ថ្លាឈ្វេង និងមានឈ្មោះល្បីល្បាញត្រូវបានបំផ្លាញ ។ នៅទីបំផុត ពេលទឹកទន្លេលែងស្អាតដូចមុន នឹងគ្មានភ្ញៀវទេសចរមកកម្សាន្តនៅទីនេះទៀតទេ ហើយធ្វើឱ្យអ្នកភូមិបាត់បង់ប្រាក់ចំណូលពីវិស័យទេសចរណ៍ ។

គួរបញ្ជាក់ថា ការដើរកម្សាន្ត និងការថតរូបភាពនៅទីនេះ គឺអាស្រ័យលើពន្លឺធម្មជាតិ ដោយសារអាកាសធាតុនៅរដ្ឋមេខាឡៃ មិនទៀងទាត់ ។ ហេតុនេះ ពេលវេលាល្អបំផុតសម្រាប់ការជិះទូកក្នុងទន្លេ គឺពេលមានពន្លឺថ្ងៃ និងគ្មានភ្លៀងធ្លាក់ ។ រីឯការធ្វើដំណើរទៅរដ្ឋមេខាឡៃ ភ្ញៀវទេសចរត្រូវជិះយន្តហោះចតនៅអាកាសយានដ្ឋានក្នុងទីក្រុង Guwahati រដ្ឋ Assam បន្ទាប់មក ជិះរថយន្តបន្តទៅរដ្ឋមេខាឡៃ ដោយចំណាយពេលចាប់ពី៦ម៉ោង ទៅ១០ម៉ោង ៕

អង់គ្លេសគឺជាប្រទេសមួយដែលមានវប្បធម៌ចំណាស់ និងមានរបៀបរស់នៅប្លែកៗខុសពីគេមួយចំនួន ដែលភ្ញៀវទេសចរមកដល់ទីនេះដំបូងៗគួរតែដឹង។ នេះបើយោងតាមអ្នកសរសេរប្លុកជនជាតិកាណាដាម្នាក់ឈ្មោះ Christina Ford បាននិយាយថា នៅពេលដែលនាងមកដល់ទីក្រុងឡុងដ៍ ប្រទេសអង់គ្លេសជាលើកដំបូង នាងពិតជាមានការភ្ញាក់ផ្អើលខ្លាំងណាស់ និងចំណាយពេលរៀងយូរដែរដើម្បីស៊ាំនឹងមូលដ្ឋានគ្រឹះទាំងនេះ ព្រោះប្រទេសនេះគឺមានរឿងមិនធម្មតា ៤ យ៉ាងដែលភ្ញៀវទេសចរគ្រប់រូបគួរតែដឹង៖

១.ផ្លូវបំបែកនៅប្រទេសអង់គ្លេសមិនមានភ្លើងស្តុបនោះទេ៖ គ្រប់ផ្លូវបំបែកទាំងអស់ក្នុងទីក្រុងឡុងដ៍មិនមានសញ្ញាឈប់ ឬភ្លើងស្តុបឡើយ។ ដូច្នេះរថយន្តទាំងអស់គ្រាន់តែបន្ថយល្បឿន ហើយមិនតម្រូវឱ្យឈប់នៅពេលជិតដល់ផ្លូវបំបែកនោះទេ។ ទោះបីជាយ៉ាងនេះក្តីនៅចក្រភពអង់គ្លេសក៏មានភ្លើងស្តុបនៅផ្លូវប្រសព្វដែរ ប៉ុន្តែវាមានតិចតួចណាស់។

២.របៀបដែលមនុស្សឆ្លងកាត់ផ្លូវ៖ ប្រជាជនក្នុងទីក្រុងឡុងដ៍នឹងរង់ចាំរហូតដល់ផ្លូវស្ងាត់មិនមានចរាចរណ៍ ទើបពួកគេអាចដើរឆ្លងកាត់ផ្លូវបាន នេះធ្វើឱ្យខាតពេលវេលាយូរខ្លាំងណាស់។ លើសពីនេះការដើរឆ្លងកាត់ផ្លូវនៅទីក្រុងឡុងដ៍ក៏មិនមានសុវត្ថិភាពដែរ ដូច្នេះមធ្យោបាយដ៏ល្អបំផុតដើម្បីផ្លាស់ទីជុំវិញទីក្រុងឡុងដ៍គឺត្រូវធ្វើដំណើរដោយជិះរថយន្តសាធារណៈព្រោះវាមានល្បឿនលឿន និងមានសុវត្ថិភាពជាជាងការដើរ។

៣.មនុស្សភាគច្រើននៅអង់គ្លេសមិនចូលចិត្តមើលបាល់ទាត់នោះទេ៖ ទោះបីជាប្រទេសអង់គ្លេសមានភាពល្បីល្បាញដោយសារកីឡាបាល់ទាត់ក៏ដោយ មិនមែនមានន័យថា មនុស្សនៅទីនេះសុទ្ធតែចូលចិត្តមើលបាល់ទាត់នោះទេ។ នេះមានន័យថា ជនជាតិអង់គ្លេសភាគច្រើនគឺមិនសូវចូលចិត្តមើលបាល់ទាត់ឡើយ។

៤.មានវប្បធម៌តម្រង់ជួរ៖ ប្រជាជនអង់គ្លេសគឺចូលចិត្តតម្រង់ជួរណាស់ មិនថាអ្នកទិញកាហ្វេ សម្លៀកបំពាក់ ឬទៅទស្សនាសារមន្ទីរ ឬទិញអ្វី មើលអ្វីនោះទេ ភាគច្រើនគឺតម្រូវឱ្យអ្នកឈរតម្រង់ជួរជាមុនសិន ប្រសិនបើអ្នកចង់បានរបស់ទាំងនោះ៕

ប្រទេសជប៉ុន ៖ Google Japan បានបង្ហាញក្តារចុច (Keyboard) វាយកុំព្យូទ័រប្រភេទថ្មី ដែលមានរូបរាងប្លែកបំផុតលើពិភពលោក ដើម្បីដោះស្រាយបញ្ហាក្តារចុចនាពេលបច្ចុប្បន្ន ដែលអាចវាយអក្សរតែម្ខាង ។ ក្តារចុចប្រភេទនេះឈ្មោះ «Gboard Double-Sided» អាចឱ្យអ្នកប្រើប្រាស់វាយអក្សរបានទាំងសងខាង, វាយអក្សរច្រើននាក់ក្នុងពេលតែមួយ និងអាចបត់ចុះ-ឡើងបាន ។

ក្តារចុចកុំព្យូទ័រប្រភេទ Gboard Double-Sided អាចប្រើប្រាស់បានជាច្រើនមុខងារ ហើយត្រូវបានគេចាត់ទុកថា វាជាក្តារចុចកុំព្យូទ័រប្រភេទ ៣៦០ដឺក្រេ ។ ប៊ូតុងនីមួយៗរបស់វាអាចប្រើប្រាស់បានជាច្រើនមុខងារ ដូចជា ៖ ប្រើប្រាស់ក្នុងការងារការិយាល័យ រហូតដល់ការងារផ្នែកលំហអវកាស ។

ក្តារចុចនេះមានប៊ូតុងចុចសរុបចំនួន២០៨ប៊ូតុង ហើយអ្នកប្រើប្រាស់អាចបត់វាចុះ-ឡើងបានដូចក្រដាស Mobius ដែរ ។ លើសពីនេះ ប៊ូតុងចុចទាំងអស់មានពន្លឺភ្លើងតភ្ជាប់គ្នា ហើយវាមានទម្ងន់ស្រាល ។ ប្រសិនបើក្តារចុចកុំព្យូទ័រប្រភេទ Gboard Double-Sided បានដាក់លក់ក្នុងទីផ្សារ នឹងមានអតិថិជនជាច្រើននាក់ចាប់អារម្មណ៍ចង់ប្រើប្រាស់ ។

វាសមស្របសម្រាប់អ្នកអភិវឌ្ឍន៍ Front-end យ៉ាងខ្លាំង ដោយសារវាអាចបង្កើតប្រសិទ្ធភាពក្នុងការបង្កើត Spreadsheet ព្រមទាំងងាយស្រួលដាក់តាមខ្លួន ។ យើងអាចប្រើប្រាស់វាជាមួយមិត្តរួមការងារក្នុងក្រុមហ៊ុនបាន, អាចប្រើប្រាស់លើអវកាស, សម្រាប់តុបតែងលំនៅឋាន ហើយនៅថ្ងៃអនាគត វានឹងកាន់តែទំនើបជាងនេះ ។

ក្តារចុច Gboard Double-Sided អាចឱ្យមនុស្សប្រើប្រាស់បានច្រើននាក់ក្នុងពេលតែមួយ ហើយវាស័ក្តិសមសម្រាប់អ្នកធ្វើការងារជាក្រុម ពីព្រោះគេអាចប្រើប្រាស់បានគ្រប់ជ្រុងទាំងអស់ ។ ក្រៅពីវាមានតួនាទីសម្រាប់វាយអក្សរហើយ ក្រុមហ៊ុនផលិតបញ្ជាក់ថា គេអាចប្រើប្រាស់ក្តារចុចក្នុងផ្នែកផ្សេងៗ ដូចជា ៖ សម្រាប់តភ្ជាប់ជាមួយពិភពលោកនាថ្ងៃអនាគត និងយកទៅតុបតែងទ្វារក្នុងពិធីបុណ្យគ្រិស្តម៉ាស់ ។

ប៉ុន្តែក្តារចុចនេះពុំបានដាក់លក់ជាសាធារណៈទេ គឺវាគ្រាន់តែជាក្តារចុចប្លែកៗដែលក្រុមហ៊ុនជប៉ុនយកមកបង្ហាញអ្នកប្រើប្រាស់ជារៀងរាល់ឆ្នាំប៉ុណ្ណោះ ។ ប៉ុន្តែបើអ្នកណាចាប់អារម្មណ៍ចង់សាកល្បងកែច្នៃវាដោយខ្លួនឯង Google បានបង្ហាញពីប្រភព Gboard Double-Sided Version នេះនៅលើ GitHub ដែលជាគេហទំព័រចែករំលែកព័ត៌មានរបស់អ្នកអភិវឌ្ឍន៍កម្មវិធី ៕

ប្រទេសក្រិក ៖ បើយើងធ្វើដំណើរឆ្លងកាត់តំបន់ Laconia ស្ថិតនៅភាគអាគ្នេយ៍នៃឧបទ្វីប Peloponnese ប្រទេសក្រិក យើងនឹងពុំដឹងថា នៅទីនេះ មានភូមិមួយលាក់ខ្លួននៅលើកោះទេ ។ ភូមិនេះឈ្មោះ Monemvasia បានអភិវឌ្ឍន៍យ៉ាងយឺតយ៉ាវ ពុំសូវមានអគារខ្ពស់ និងមានរបងខ្ពស់ការពារសុវត្ថិភាព ហើយមនុស្សគ្រប់គ្នាហៅភូមិនេះថា «ភូមិអាថ៌កំបាំង» ។

បើទោះជាភូមិ Monemvasia បានអភិវឌ្ឍយ៉ាងយឺតយ៉ាវក្តី ប៉ុន្តែអ្នកភូមិនេះបានប្រកាន់ខ្ជាប់នូវទំនៀមទម្លាប់ប្រពៃណី និងគោរពវប្បធម៌របស់ពួកគេជានិច្ច ។ ការរស់នៅទីនេះ មានខ្យល់អាកាសល្អបរិសុទ្ធ និងទេសភាពស្រស់ស្អាតយ៉ាងខ្លាំង ។ លើសពីនេះ អ្នកភូមិលើកោះអាចធ្វើដំណើរទៅកាន់ទីប្រជុំជនផងដែរ ដោយឆ្លងកាត់ស្ពានប្រវែង២០០ម៉ែត្រ ។

កាលពីមុន ផ្ទៃដីកោះនេះស្ថិតនៅជាប់គ្នាជាមួយទីប្រជុំជន ប៉ុន្តែផ្ទៃដីកោះត្រូវបានកាត់ផ្តាច់ពីទីប្រជុំជនដោយសារគ្រោះរញ្ជួយដីកាលពីឆ្នាំ៣៧៥ ។ ក្រោយមក ក្នុងអំឡុងសតវត្សទី១៦ ក៏ចាប់ផ្តើមមានមនុស្សម្នាមកតាំងទីលំនៅរស់នៅលើកោះជាបន្តបន្ទាប់ ។

ភូមិ Monemvasia ស្ថិតនៅលើកោះមានប្រវែងត្រឹមតែ១គីឡូម៉ែត្រប៉ុណ្ណោះ និងមានកម្ពស់ខ្ពស់ជាងទឹកសមុទ្រ ប្រមាណ១០០ម៉ែត្រ ។ លំនៅឋាន និងអគារនានាក្នុងភូមិត្រូវបានសាងបែរមុខទៅរកឆ្នេរសមុទ្រ ហើយទិដ្ឋភាពភូមិទាំងមូលមានលក្ខណៈស្រដៀងគ្នានឹងភ្នំថ្មនៅក្រោយភូមិ ទើបធ្វើឱ្យមនុស្សមើលពុំឃើញថា វាជាភូមិ ។

គួរបញ្ជាក់ថា ជនជាតិ Laconia បុរាណបានមកតាំងទីលំនៅក្នុងភូមិតាំងពីសតវត្សទី៦ មកម៉្លេះ ដើម្បីគេចខ្លួនពីការធ្វើបាបរបស់ជនជាតិ Slavic ដែលគ្រប់គ្រងប្រទេសក្រិក ចាប់ពីឆ្នាំ៥០០ ដល់ឆ្នាំ៧០០ ។

បច្ចុប្បន្ន ភូមិ Monemvasia បានក្លាយជាតំបន់ទេសចរណ៍ធម្មជាតិដ៏ពេញនិយមមួយ ដែលអាចទាក់ទាញភ្ញៀវទេសចរមកពីជុំវិញពិភពលោកយ៉ាងច្រើនមកកម្សាន្តក្នុងភូមិ នារដូវក្តៅ ។ រីឯអគារបុរាណជាច្រើនកន្លែងក្នុងភូមិត្រូវបានកែលម្អធ្វើជាសណ្ឋាគារ និងភោជនីយដ្ឋានសម្រាប់ទទួលភ្ញៀវទេសចរកើនឡើងជារៀងរាល់ឆ្នាំ ៕

បរទេស៖ ម៉ូដែលវ៉ែនតា Apple Vision Pro ជំនាន់ថ្មី ដែលរំពឹងថានឹងចេញលក់នៅឆ្នាំ ២០២៥ ត្រូវបានគេនិយាយថាមានតម្លៃទាបបំផុតប្រហែល ២,០០០ ដុល្លារអាមេរិកប៉ុណ្ណោះ ខណៈដែលតម្លៃនេះគឺថោកជាង Apple Vision Pro ជំនាន់មុនពាក់កណ្តាលឯណោះ។
យោងតាមអ្នកជំនាញរបស់ Bloomberg លោក Mark Gurman បាននិយាយថា ក្រុមហ៊ុន Apple បច្ចុប្បន្នកំពុងអភិវឌ្ឍយ៉ាងសកម្មនូវឧបករណ៍ថ្មីៗរបស់ខ្លួនដើម្បីប្រកួតប្រជែងជាមួយ Meta ។ ផលិតផលទាំងនេះរួមមានម៉ូដែល Vision Pro តម្លៃទាប វ៉ែនតាឆ្លាតវៃ និងកាស AirPods ដែលមានកាមេរ៉ាភ្ជាប់មកជាមួយ។

កំណែតម្លៃទាបរបស់ Vision Pro ប្រើប្រាស់វត្ថុធាតុដើមថោកជាង បន្ទះឈីបដំណើរការខ្សោយជាងជំនាន់ទីមួយ ហើយថែមទាំងត្រូវកាត់បន្ថយមុខងារ EyeSight វិញផងដែរ។ ទោះជាយ៉ាងណាក៏ដោយ ជាមួយនឹងតម្លៃទាបជាងពីមុន Apple រំពឹងថាការលក់ផលិតផលថ្មីរបស់ខ្លួននឹងកើនឡើងទ្វេដងបើធៀបនឹងផលិតផលបច្ចុប្បន្ន។ ក្រុមអភិវឌ្ឍន៍ Vision Pro ក៏កំពុងពិចារណាផងដែរក្នុងការដាក់ឱ្យដំណើរការវ៉ែនតាឆ្លាតវៃស្រដៀងទៅនឹង Meta Ray-Ban ក្នុងឆ្នាំ ២០២៧ ដោយប្រើប្រាស់បច្ចេកវិទ្យាឆ្លាតវៃដែលមើលឃើញដើម្បីស្កេន និងវិភាគបរិយាកាសជុំវិញ។

យោងតាមគេហទំព័របរទេស PhoneArena វ៉ែនតា Vision Pro គឺជាផលិតផលឈានមុខគេដំបូងរបស់ Apple នៅក្នុងទីផ្សារវ៉ែនតានិម្មិត ប៉ុន្តែក៏ត្រូវបានរិះគន់ចំពោះតម្លៃដ៏ថ្លៃរបស់វាគឺ ៣,៥០០ ដុល្លារ ជាមួយទម្ងន់ធ្ងន់ និងងាយឡើងកំដៅផងដែរ។ កត្តាទាំងនេះហើយ បានធ្វើឱ្យឧបករណ៍របស់ Apple ពិបាកទទួលបានប្រជាប្រិយភាព ជាពិសេសបើប្រៀបធៀបទៅនឹងផលិតផល Meta គឺវ៉ែនតានិម្មិត្ត Meta Quest 3 ដែលស្រាលជាង និងមានតម្លៃតិចជាង ១,០០០ ដុល្លារ។

Gurman បាននិយាយថា Apple កំពុងធ្វើការដើម្បីរក្សាការច្នៃប្រឌិតរបស់ខ្លួនជាពិសេសនៅក្នុងផ្នែកនៃបញ្ញាសិប្បនិម្មិត។ ទោះបីជាមានស្ថាបត្យកម្មនៃប្រាក់ចំណូលរាប់រយពាន់លានដុល្លារក្នុងមួយឆ្នាំក៏ដោយ Apple មិនអាចពឹងផ្អែកតែលើភាពជោគជ័យនៃស្មាតហ្វូនរបស់ខ្លួនរហូតនោះទេ។ ហេតុនេះក្រុមហ៊ុនត្រូវតែពន្លឿនវដ្តនៃការបង្កើតថ្មីរបស់ខ្លួន ដើម្បីរក្សាតំណែងដឹកនាំរបស់ខ្លួននៅក្នុងទិដ្ឋភាពបច្ចេកវិទ្យាដែលផ្លាស់ប្តូរឥតឈប់ឈរ៕

ប្រទេសស៊ុយអែត ៖ កាលពីថ្ងៃទី១៤ ខែតុលា ឆ្នាំ២០២៤ សារព័ត៌មានបរទេសរាយការណ៍ថា ប្រទេសស៊ុយអ៊ែតបានសាកល្បងប្រើប្រាស់សាឡាងអគ្គិសនីបើកបរដោយស្វ័យប្រវត្តិ ឬអាចបញ្ជាការបើកបរពីលើគោក សម្រាប់ដឹកអ្នកដំណើរឆ្លងទន្លេនៅទីក្រុង Stockholm ។ នេះជាជម្រើសការធ្វើដំណើរដ៏ល្អមួយ ដែលអាចជួយកាត់បន្ថយការបំពុលបរិស្ថានមួយបានកម្រិតធំ ។

វាធ្វើឱ្យ Stockholm ក្លាយជាទីក្រុងដំបូងគេនៅលើពិភពលោក ដែលបានប្រើប្រាស់បច្ចេកវិទ្យាសាឡាងបើកបរដោយស្វ័យប្រវត្តិសម្រាប់ផ្តល់សេវាកម្មដល់ពលរដ្ឋ ខណៈបច្ចុប្បន្ន ក្រុមហ៊ុនជាច្រើនបានផលិតរថយន្តអគ្គិសនីប្រកួតប្រជែងគ្នានៅលើទីផ្សារ ។

សាឡាងអគ្គិសនីមានឈ្មោះថា «MF Estelle» មានថ្មទំហំ១៨៨គីឡូវ៉ាត់ម៉ោង ដែលអាចប្រើប្រាស់បានរយៈពេលយូរបំផុតចំនួន១៥ម៉ោងក្នុង១ថ្ងៃ និងបើកបរក្នុងល្បឿន១២គីឡូម៉ែត្រក្នុង១ម៉ោង ។ សាឡាងអគ្គិសនីមានប្រវែងសរុប១២ម៉ែត្រ និងអាចផ្ទុកអ្នកដំណើរ ព្រមទាំងបុគ្គលិកសាឡាង ប្រមាណ២៥នាក់ ដោយសាឡាងពុំត្រូវការអ្នកបើកបរទេ ។ ប៉ុន្តែត្រូវមានភ្នាក់ងារមើលការខុសត្រូវ, រៀបចំសណ្តាប់ធ្នាប់ក្នុងសាឡាង និងគ្រប់គ្រងសាឡាងករណីកើតហេតុការណ៍អាសន្ន ។

ការដឹកអ្នកដំណើរឆ្លងទន្លេ គឺស្ថិតនៅក្រោមការបញ្ជាប្រព័ន្ធបើកបរពីបន្ទប់គ្រប់គ្រងនៅលើគោក ដោយប្រើប្រាស់បច្ចេកវិទ្យាបើកបរសាឡាងដោយស្វ័យប្រវត្តិរបស់ក្រុមហ៊ុនស៊ីប៉ាស់ ។ ក្រៅពីនេះ ក៏មានកាមេរ៉ាថតការបើកបរនៅជុំវិញសាឡាង ៣៦០ដឺក្រេ ដើម្បីឱ្យអ្នកបញ្ជាការបើកបរអាចត្រួតពិនិត្យសុវត្ថិភាពគ្រប់ពេលវេលា ។

ក្រុមហ៊ុនស៊ីប៉ាស់បានសាកល្បងប្រើប្រាស់សាឡាងអគ្គិសនីដឹកអ្នកដំណើរជាក់ស្តែងរវាងតំបន់ខុមហូលម៉េន និងតំបន់សូលឌឺ បេឡាសត្រេន នៅទីក្រុង Stockholm ។ បច្ចុប្បន្ន មានប្រទេសជាច្រើនចាប់អារម្មណ៍ចង់ប្រើប្រាស់សាឡាងអគ្គិសនី ជាពិសេស ប្រទេសស្ថិតនៅជាប់មាត់ទន្លេ ដោយសារការប្រើប្រាស់ពុំប៉ះពាល់បរិស្ថាន និងចំណាយដើមទុនតិច ។

ចំណែកអ្នកជំនាញលើកឡើងថា សាឡាងអគ្គិសនីនឹងជួយឱ្យពលរដ្ឋស៊ុយអែតងាកមកធ្វើដំណើរតាមសាឡាងកាន់តែច្រើន ដោយសារវាពុំប៉ះពាល់បរិស្ថាន ។ ក្រុមហ៊ុនគួរតែបង្កើនចំនួនសាឡាងបន្ថែមទៀតដើម្បីផ្តល់សេវាកម្មដឹកអ្នកដំណើរនៅទីក្រុង Stockholm និងទីក្រុងផ្សេងៗនៅទូទាំងពិភពលោក នាថ្ងៃអនាគត ៕

បរទេស៖ ក្រុមហ៊ុនជប៉ុន Honda ថ្មីៗនេះបានសម្ពោធរោងចក្រផលិតរថយន្តអគ្គិសនីដំបូងគេបង្អស់នៅក្នុងប្រទេសចិន ដោយមានសមត្ថភាពផលិតរថយន្តប្រចាំឆ្នាំចំនួន ១២០,០០០ គ្រឿង។
យោងតាមគេហទំព័របរទេស Yahoo finance រោងចក្រថ្មីនេះគឺមានឈ្មោះថា Dongfeng Honda ដែលជាក្រុមហ៊ុនបណ្តាក់ទុនរួមគ្នារវាងក្រុមហ៊ុន Honda របស់ជប៉ុន និងក្រុមហ៊ុន Dongfeng Motor របស់ប្រទេសចិន។ វាមានទីតាំងនៅទីក្រុង Wuhan ខេត្ត Hubei គឺជារោងចក្រផលិតរថយន្តថាមពលថ្មី (NEV) ដំបូងបង្អស់របស់ Honda នៅលើពិភពលោក។

នេះមានន័យថា ក្រុមហ៊ុន Honda បានបើករោងចក្រផលិតរថយន្តអគ្គិសនីដំបូងបង្អស់នៅលើពិភពលោកក្នុងប្រទេសចិន។ រោងចក្រនេះមានសមត្ថភាពផលិតម៉ូដែលរថយន្តអគ្គិសនីមួយចំនួនដូចជា Lingxi L និង Ye S7 ប្រចាំឆ្នាំប្រហែល ១២០,០០០ គ្រឿង ដោយបច្ចុប្បន្នមានបុគ្គលិកចំនួន ៨០០ នាក់ហើយ។ ការបើករោងចក្រថ្មីនេះគឺជាផ្នែកមួយនៃគោលដៅបរិស្ថានកាន់តែទូលំទូលាយរបស់ក្រុមហ៊ុន Honda ដើម្បីសម្រេចបាននូវអព្យាក្រឹតភាពកាបូនសម្រាប់ផលិតផលទាំងអស់ និងសកម្មភាពសាជីវកម្មរបស់ខ្លួននៅឆ្នាំ ២០៥០។

បច្ចុប្បន្នក្រុមហ៊ុន Honda កំពុងពន្លឿនកិច្ចខិតខំប្រឹងប្រែងផ្នែកអគ្គិសនីរបស់ខ្លួននៅក្នុងប្រទេសចិន ដោយគ្រោងនឹងដាក់បង្ហាញរថយន្តថ្មីៗរបស់ខ្លួនចំនួន ១០ ម៉ូដែលក្នុងប្រទេសចិននៅឆ្នាំ ២០២៧ រួមទាំង e:N Series ដែលដាក់លក់នៅឆ្នាំ ២០២២ និង Ye Series ដែលជាស៊េរី EV ជំនាន់ក្រោយ។ ជាមួយនឹងម៉ូដែលទាំងនេះ ក្រុមហ៊ុន Honda កំពុងកំណត់គោលដៅលក់រថយន្ត EV ១០០% នៅក្នុងទីផ្សារប្រទេសចិននៅឆ្នាំ ២០៣៥។ ទោះជាយ៉ាងណាក្នុងរយៈពេល ៩ ខែដំបូងនៃឆ្នាំនេះ ក្រុមហ៊ុនបានលក់រថយន្តចំនួន ៥៨៨,០១៨ គ្រឿងនៅក្នុងប្រទេសចិន ធ្លាក់ចុះ ២៩.២៧% បើធៀបនឹងរយៈពេលដូចគ្នាកាលពីឆ្នាំមុន។

ដូច្នេះការបើករោងចក្រថ្មីនៅទីនេះគឺបើកក្នុងបរិបទដែលក្រុមហ៊ុនផលិតរថយន្តជប៉ុន រួមទាំងក្រុមហ៊ុន Honda កំពុងមើលឃើញការធ្លាក់ចុះនៃការលក់យ៉ាងឆាប់រហ័សនៅក្នុងទីផ្សារប្រទេសចិន។ ទោះបីជាយ៉ាងនេះក្តី លោក Toshihiro Mibe នាយកប្រតិបត្តិក្រុមហ៊ុន Honda បាននិយាយថា “លោកនឹងដំណើរការរោងចក្រថ្មីនេះដោយរលូន និងស្ថិរភាព ក៏ដូចជាផ្តល់នូវម៉ូដែល EV ជាច្រើនដែលមានគុណភាពខ្ពស់បំផុតដល់អតិថិជននៅក្នុងប្រទេសចិន តាមរយៈការខិតខំប្រឹងប្រែងរបស់យើងដើម្បីពង្រីកភាពរីករាយសម្រាប់អតិថិជន និងសង្គមរបស់យើង៕