ពេជ្រ វត្តីសារ៉ាវឌ្ឍី Miss Grand Cambodia 2022 ដែលជាបវរកញ្ញាល្បីល្បាញប្រចាំប្រទេសកម្ពុជាមួយរូបធ្វើឱ្យអ្នកគាំទ្របង្ហាញការស្រលាញ់ទ្វេដងទោះបីជានាងប្រឈមនឹងរឿងអាស្រូវច្រើន។ ថ្មីៗនេះ ពេជ្រ វត្តីសារ៉ាវឌ្ឍី បានបង្ហាញពីការយកចិត្តទុកដាក់មនុស្សជុំវិញខ្លួនជាមួយកាយវិការទន់ភ្លន់សំពះសុំអនុញ្ញាតព្រះនាង នរោត្តម ជេនណា ជាមុនសិនមុននឹងជួយសម្រួលព្រះកេសារបស់ព្រះនាងតូច។
ទោះបីជាប្រឈមនឹងព្យុះភ្លៀងយ៉ាងណា ទីផ្សារការងាររបស់ ពេជ្រ វត្តីសារ៉ាវឌ្ឍី មិនស្រាកស្រាន្តនោះទេមានការងារហូរចូលជាបន្តបន្ទាប់ ហើយនាងនៅតែទទួលបានការស្រលាញ់យ៉ាងពិតប្រាកដពីអ្នកគាំទ្រនាងដដែល។ រាល់ពេលមានរឿងអាស្រូវពីវិស័យបវរកញ្ញាម្តងៗ ពេជ្រ វត្តីសារ៉ាវឌ្ឍី គឺទទួលបានការរិះគន់ច្រើនពីអ្នកលេងបណ្តាញសង្គម ខណៈរឿងមួយចំនួនដែលមិនជាប់ពាក់ព័ន្ធជាមួយនឹងនាង នាងក៏មានឈ្មោះត្រូវគេយកទៅធ្វើជាប្រធានបទមិនលើកឡើងសូម្បីតែការបង្ហោះអបអរបវរកញ្ញាដាណឺម៉ាកជាម្ចាស់មកុដបវរកញ្ញាចក្រវាល២០២៤ ហៅថាមិត្តភក្តិក៏ត្រូវបានគេរិះគន់ដែរ។
ទោះយ៉ាងណាសម្រាប់ហ្វេនៗរបស់ ពេជ្រ វត្តីសាវ៉ាវឌ្ឍី នៅតែមើលឃើញពីភាពល្អរបស់នាងដែលចេញពីចិត្តបរិសុទ្ធ ជាក់ស្តែងដូចជាករណីថ្មីៗនេះជាដើម។ វីដេអូមួយត្រូវបានចែករំលែកនៅលើផេក Beauty Pageant Reviewer បង្ហាញពីព្រះនាង នរោត្តម ជេនណា រួមទាំង ពេជ្រ វត្តីសារ៉ាវឌ្ឍី មានវត្តមានក្នុងកម្មវិធីជាមួយគ្នានិងអង្គុយជិតគ្នាផងដែរ។ ក្នុងវីដេអូគេបានឃើញពីភាពទន់ភ្លន់របស់ លំដាប់រងទី៥ Miss Grand International 2022 រូបនេះដោយភ្ជាប់មកជាមួយនឹងខ្លឹមសារថា
«ពេជ្រ វត្តីសារ៉ាវឌ្ឍី គឺជាមនុស្សបែបនេះ នាងតែងតែយកចិត្តទុកដាក់ចំពោះមនុស្សជុំវិញខ្លួនជានិច្ច។ ចំពោះព្រះនាងតូច ជេនណា នាងមានការសំពះសុំអនុញ្ញាតជាមុនសិនដើម្បីជួយសម្រួលព្រះកេសារបស់ព្រះនាងមុនទ្រង់ឡើងឆាក ទង្វើល្អៗគឺកើតចេញពីបេះដូងបរិសុទ្ធ»។

ក្រោយឃើញសកម្មភាពបែបនេះហើយហ្វេនៗបង្ហាញពីការស្រលាញ់របស់ខ្លួនទៅកាន់ ពេជ្រ វត្តីសារ៉វឌ្ឍី ថានាងជាមនុស្សបែបនេះហើយទើបពួកគេស្រលាញ់នាងខ្លាំងបែបនេះ។ គួរបញ្ជាក់ថា ជាការកត់សម្គាល់ហ្វេនក្លិបរបស់ ពេជ្រ វត្តីសារ៉ាវឌ្ឍី មិនត្រឹមតែបង្ហាញក្តីស្រលាញ់ ការពារនាងពេលមានរឿងអាស្រូវប៉ុណ្ណោះទេ រាល់ពេល ពេជ្រ វត្តីសារ៉ាវឌ្ឍី មានកម្មវិធីផ្សេងៗគឺបានផ្តល់បាច់ផ្កាជាទឹកប្រាក់ផងដែរ៕