សហគ្រិនគ្រីបតូមួយរូបដែលបានទិញវត្ថុសិល្បៈជាមួយនឹងគំនិតសាមញ្ញមួយ ចេកមួយផ្លែបិទជាប់នឹងជញ្ជាំងក្នុងតម្លៃ ៦.២លានដុល្លារកាលពីសប្តាហ៍មុនបានញ៉ាំផ្លែចេកដែលបានពីការដេញថ្លៃនេះហើយកាលពីថ្ងៃទី២៩ វិច្ឆិកា នេះ។ សហគ្រិនជាជនជាតិចិន Justin Sun បានបកសំបកនិងរីករាយជាមួយចេកនៅក្នុងសន្និសិទសារព័ត៌មានដែលធ្វើឡើងនៅ The Peninsula Hong Kong ដែលជាសណ្ឋាគារដ៏មានតម្លៃបំផុតមួយរបស់ទីក្រុង។

មហាសេដ្ឋីគ្រីបតូរូបនេះបានញុំាផ្លែចេកនេះរួចហើយលាន់មាត់ថា «វាមានរសជាតិឆ្ងាញ់ជាងចេកដទៃ។ ពិតជាល្អណាស់»។ មានចំណងជើងថា Comedian ស្នាដៃគំនិតដែលបង្កើតឡើងដោយវិចិត្រករជនជាតិអ៊ីតាលី Maurizio Cattelan ត្រូវបានលក់នៅឯការដេញថ្លៃ Sotheby’s ក្នុងទីក្រុងញូវយ៉កកាលពីសប្តាហ៍មុន ដោយមានលោក Justin Sun ក្នុងចំណោមអ្នកដេញថ្លៃទាំង៧នាក់។ សហគ្រិនរូបនេះបាននិយាយថាលោកមានអារម្មណ៍ថា «មិនជឿ» ក្នុងរយៈពេល ១០ វិនាទីដំបូងបន្ទាប់ពីលោកបានឈ្នះការដេញថ្លៃ មុនពេលដឹងថា «នេះអាចក្លាយជារឿងធំ»។ ក្នុងរយៈពេល ១០ វិនាទីក្រោយមកលោកបានសម្រេចចិត្តថាលោកនឹងញ៉ាំចេក។

Justin Sun បាននិយាយកាលពីថ្ងៃសុក្រ ថា៖ «ការញ៉ាំវាក្នុងសន្និសីទសារព័ត៌មានក៏អាចក្លាយជាផ្នែកមួយនៃប្រវត្តិការងារសិល្បៈផងដែរ»។

ការបង្ហាញដំបូងនៃការបង្កើតដែលអាចបរិភោគបាននៅឯកម្មវិធី Art Basel ឆ្នាំ ២០១៩នៅ Miami Beach បានបង្កឱ្យមានភាពចម្រូងចម្រាស និងបានចោទជាសំណួរអំពីថាតើវាគួរត្រូវបានចាត់ទុកថាជាសិល្បៈដែរឬទេ។ មហាសេដ្ឋីគ្រីបតូបាននិយាយថា «វត្ថុ និងគំនិតភាគច្រើនរបស់វាមានដូចជា (កម្មសិទ្ធិបញ្ញា) និងនៅលើអ៊ីនធឺណិត ផ្ទុយពីអ្វីដែលមានរូបរាងកាយ» ។នៅពេលនោះលោក បាននិយាយនៅក្នុងសេចក្តីថ្លែងការណ៍មួយថា បំណែកនេះ «តំណាងឱ្យបាតុភូតវប្បធម៌ដែលភ្ជាប់ពិភពសិល្បៈ អនុស្សាវរីយ៍ និងសហគមន៍រូបិយប័ណ្ណ» ។

គួរបញ្ជាក់ថា ក្នុងឆ្នាំ២០២៣ អ្នកជំនួញគ្រីបតូរូបនេះត្រូវបានចោទប្រកាន់ដោយគណៈកម្មការមូលបត្រអាម៉េរិក ពីបទក្លែងបន្លំ និងការបំពានច្បាប់មូលបត្រផ្សេងទៀតទាក់ទងនឹងគម្រោងគ្រីបតូរបស់លោកឈ្មោះ Tron ៕

ប្រទេសជប៉ុន ៖ ផ្កាកុលាបនៅខេត្តយូណាន ប្រទេសចិន ដែលមានឈ្មោះល្បីល្បាញទាំងទំហំ និងក្លិនក្រអូបកំពុងតែពេញនិយមយ៉ាងខ្លាំងនៅប្រទេសជប៉ុន ។ អាជីវករលក់ផ្កាជប៉ុនជាច្រើននាក់បានមកទិញផ្កាកុលាបខេត្តយូណាន នៅផ្សារអូតាក់រៀងរាល់ថ្ងៃ ដែលជាផ្សារធំបំផុតក្នុងទីក្រុងតូក្យូ ដើម្បីយកទៅលក់បន្តឱ្យអតិថិជន ។

នៅរៀងរាល់សប្តាហ៍ ផ្សារអូតាក់ បាននាំចូលផ្សារកុលាបពីខេត្តយូណាន ចាប់ពី២លើក ទៅ៣លើក ហើយក្នុង១លើក ស្មើប្រមាណ១ម៉ឺនផ្កា ដើម្បីលក់ឱ្យអតិថិជនជប៉ុន ។ Jun Shishido នាយកគ្រប់គ្រងក្រុមហ៊ុនលក់ផ្កាបោះដុំនិយាយថា ផ្កាកុលាបដាំនៅខេត្តយូណាន មានដើមខ្ពស់ៗក្នុងរយៈពេលតែ១ឆ្នាំប៉ុណ្ណោះ ហើយផ្កាកុលាបចិនធំជាងផ្កាកុលាបជប៉ុនទៅទៀត ។

ក្រោយការដេញថ្លៃផ្កាកុលាបចិននៅផ្សារអូតាក់រួចហើយ អាជីវករជប៉ុននឹងបញ្ជូនផ្កាកុលាបទាំងនេះទៅហាងលក់ផ្កាផ្សេងៗក្នុងទីក្រុងតូក្យូ យ៉ាងឆាប់រហ័ស ។ Wang Zhenhua អាជីវករលក់ផ្កាកុលាបចិននិយាយថា បរិមាណការនាំចេញផ្កាកុលាបពីចិនទៅជប៉ុន បានកើនឡើងជាបន្តបន្ទាប់ គឺចាប់ពី៨,០០០ផ្កាក្នុង១ថ្ងៃ ទៅ១៥,០០០ផ្កាក្នុង១ថ្ងៃ ។ នៅខែធ្នូ ឆ្នាំ២០២៤ ហាងជប៉ុនកុម្ម៉ង់ផ្កាកុលាបចិន រហូតដល់៣០,០០០ផ្កាក្នុង១ថ្ងៃ ហើយនៅមានតម្រូវការផ្កាកុលាបជាង៩០,០០០ផ្កាក្នុង១ថ្ងៃ ។

ហាងលក់ផ្កាមួយកន្លែងនៅទីក្រុងតូក្យូ ដែលបានលក់ផ្កាអស់រយៈពេលជាង៦០ឆ្នាំ ទើបតែចាប់ផ្តើមលក់ផ្កាកុលាបចិននៅឆ្នាំ២០២៤នេះ ដោយសារមានអតិថិជនសួររកច្រើន ។ ចិនបានបញ្ជូនផ្កាកុលាបស្រស់ៗពីខេត្តយូណាន មកកាន់ទីក្រុងតូក្យូ ដោយចំណាយពេលតែ២៤ម៉ោងប៉ុណ្ណោះ ហើយហាងជប៉ុនលក់ផ្កាចិនក្នុងតម្លៃ៤០០យ៉េន (ឬស្មើជាង៨,០០០រៀល) ។

អតិថិជនម្នាក់ប្រាប់ថា ផ្កាកុលាបចិនពិតជាស្រស់ស្អាតខ្លាំងណាស់ ហើយថែមទាំងមានទំហំធំ ទើបពលរដ្ឋជប៉ុនចូលចិត្តទិញវា ។ ផ្កាកុលាប គឺជានិមិត្តសញ្ញាបេះដូងដែលពលរដ្ឋជប៉ុនបង្ហាញគ្នាទៅវិញទៅមក ។

ចំណែកផ្កាផ្សេងៗទៀតរបស់ចិន ដូចជា ៖ ផ្កាលីលី និងផ្កា Carnation ក៏ពេញនិយមនៅប្រទេសជប៉ុនដូចគ្នាដែរ ដោយសារល្បីល្បាញផ្នែកគុណភាព និងតម្លៃ ។ បើគិតចាប់ពីខែមករា រហូតដល់ខែកញ្ញា ឆ្នាំ២០២៤ ប្រទេសជប៉ុនបាននាំចូលផ្កាស្រស់ៗពីចិន ស្មើប្រមាណ ២៣៧លានផ្កា ៕

Starbucks នៅកូរ៉េខាងត្បូងនឹងបើកហាងថ្មីមួយនៅខែក្រោយ មានចម្ងាយត្រឹមតែ ១.៤ គីឡូម៉ែត្រពីកូរ៉េខាងជើងប៉ុណ្ណោះ ក្នុងគោលបំណងឱ្យភ្ញៀវទេសចរមើលឃើញប្រទេសកូរ៉េខាងជើងយ៉ាងពេញលេញពីលើភ្នំ។
ហាងនេះមានទីតាំងនៅជាន់ទី ២ នៃសួនអេកូឡូស៊ីសន្តិភាព Aegibong ក្នុងទីក្រុង Gimpo ខេត្ត Gyeonggi ប្រទេសកូរ៉េខាងត្បូង។ Aegibong ដែលជាកំពូលភ្នំកម្ពស់ ១៥៤ ម៉ែត្រ មានទេសភាពស្រស់ស្អាត អាចឱ្យអ្នកមើលឃើញស្រុក Kaepung និង Songaksan របស់ប្រទេសកូរ៉េខាងជើងយ៉ាងពេញលេញ។

ចាប់តាំងពីសួននេះបានបើកនៅឆ្នាំ ២០២១ មកកន្លែងនេះបានទាក់ទាញហ្វូងអ្នកទស្សនារាប់ពាន់នាក់។ កាលពីឆ្នាំមុន ភ្ញៀវទេសចរជិត ១៤០,០០០ នាក់បានទៅលេងឧទ្យាននេះដើម្បីមើលប្រទេសកូរ៉េខាងជើង។ ជាឱកាសល្អ Starbucks ក៏មានបំណងពង្រីកសាវាថ្មីរបស់ខ្លួននៅទីតាំងនេះ ដែលមានទំហំ ១៣៦ ម៉ែត្រការ៉េតូចជាងសាខាធម្មតា ទោះជាយ៉ាងណាវាត្រូវបានគេរំពឹងថានឹងក្លាយជាគោលដៅដ៏ទាក់ទាញបំផុតមួយ សម្រាប់ភ្ញៀវទេសចរជុំវិញពិភពលោក។

ដូច្នេះមុននឹងចូលទៅកាន់តំបន់ហាងកាហ្វេមួយនេះ អ្នកទស្សនាទាំងអស់ត្រូវតែឆ្លងកាត់ការត្រួតពិនិត្យដោយកងម៉ារីនកូរ៉េជាមុនសិន ទើបអាចទស្សនាបាន។ តំបន់នេះមានចម្ងាយជាង ៥០ គីឡូម៉ែត្រភាគខាងជើងទីក្រុងសេអ៊ូល គឺជាកន្លែងមួយដែលត្រូវបានការពារយ៉ាងតឹងរ៉ឹងបំផុតនៅក្នុងពិភពលោក។ គួរបញ្ជាក់ដែរថា ហាង Starbucks នៅប្រទេសកូរ៉េខាងត្បូងគឺមានច្រើនជាងគេលើពិភពលោក ដោយជាប់ចំណាត់ថ្នាក់លេខ ៤ បន្ទាប់ពីអាមេរិក ចិន និងជប៉ុន។

យោងតាមគេហទំព័រសកលរបស់ Starbucks ចំនួនហាងនៅក្នុងប្រទេសកូរ៉េនៅចុងឆ្នាំនេះគឺ ១,៨៩៣ កើនឡើងចំនួន ១១៦ ធៀបនឹងឆ្នាំមុន។ បច្ចុប្បន្នមានហាង Starbucks ចំនួន ៣៨,៥៨៧ នៅទូទាំងពិភពលោក ដោយសហរដ្ឋអាមេរិកមានចំនួនច្រើនជាងគេគឺ ១៦,៤៦៦ បន្ទាប់មកប្រទេសចិនមានហាងចំនួន ៦,៩៧៥ រួមបញ្ចូលគ្នាប្រទេសទាំងពីរនេះមាន ៦១% នៃហាង Starbucks ទាំងអស់នៅទូទាំងពិភពលោក៕

នៅល្ងាចថ្ងៃទី២៨ ខែវិច្ឆិកា សមាជិកទាំងប្រាំនាក់របស់ក្រុមចម្រៀង NewJeans បានធ្វើសន្និសីទសារព័ត៌មាននៅទីក្រុងសេអ៊ូលដោយប្រកាសថានៅថ្ងៃទី២៩ ខែវិច្ឆិកា ពួកគេមិនស្ថិតនៅក្រោមការគ្រប់គ្រងរបស់ ADOR ទៀតទេព្រោះក្រុមហ៊ុនបាន «រំលោភលើលក្ខខណ្ឌនៃកិច្ចព្រមព្រៀង» មិនអាចការពារសូម្បីតែសិទ្ធិរបស់ NewJeans។

សមាជិក Danielle បាននិយាយថា ទោះបីជាពួកគេចាកចេញពីក្រុមហ៊ុនក៏ដោយ ពួកគេនឹងបំពេញកាលវិភាគ និងកិច្ចសន្យាផ្សាយពាណិជ្ជកម្មតាមការគ្រោងទុក។ ការលំបាកនាពេលបច្ចុប្បន្នរបស់ពួកគេគឺថាពួកគេមិនត្រូវបានអនុញ្ញាតឱ្យប្រើឈ្មោះក្រុម NewJeans ដើម្បីប្រតិបត្តិការទេ ប៉ុន្តែអះអាងថានឹងមិនបោះបង់ឈ្មោះនេះចោលហើយនឹងព្យាយាមតស៊ូដោយសមាជិកប្រាំនាក់ចង់ទទួលបានសិទ្ធិប្រើប្រាស់ឈ្មោះក្រុម។

យោងតាម Koreaboo ប្រសិនបើពួកគេបញ្ចប់កិច្ចសន្យាដោយឯកតោភាគី NewJeans ប្រឈមនឹងសំណងយ៉ាងហោចណាស់ ៣០០ ពាន់លានវ៉ុន (ប្រមាណ២១៥ លានដុល្លារ) ដល់ក្រុមហ៊ុនគ្រប់គ្រង។ ទោះជាយ៉ាងណាក៏ដោយ សមាជិកជឿជាក់ថា ពួកគេមិនមានកាតព្វកិច្ចទូទាត់សំណងទេ ពីព្រោះពួកគេបានបំពេញកាតព្វកិច្ចទាំងអស់ និងបានចូលរួមចំណែកក្នុងគ្រប់សកម្មភាពទាំងអស់។ ពួកគេជឿជាក់ថា ADOR និង HYBE គួរតែផ្តល់សំណង។
បន្ទាប់ពីសន្និសីទសារព័ត៌មាន ADOR បាននិយាយថា ពួកគេសោកស្តាយចំពោះការសម្រេចចិត្តរបស់ NewJeans ប៉ុន្តែបានប្រកាសថាកិច្ចសន្យាផ្តាច់មុខជាមួយក្រុមនៅតែមានសុពលភាព។ ក្រុមហ៊ុនគ្រប់គ្រងចង់ជួបសមាជិកដោយផ្ទាល់ ដើម្បីពិភាក្សាអំពីអនាគតរបស់ក្រុម និងដោះស្រាយជម្លោះ។

ADOR គឺជាក្រុមហ៊ុនបុត្រសម្ព័ន្ធដែល HYBE វិនិយោគទុនដើម្បីបង្កើត ប្រតិបត្តិការ និងគ្រប់គ្រងដោយ CEO Min Hee Jin។ HYBE កាន់កាប់ ៨០% នៃភាគហ៊ុន ADOR, ២០% ជាកម្មសិទ្ធិរបស់ក្រុមប្រឹក្សាភិបាលរបស់ក្រុមហ៊ុន ហើយ Min Hee Jin កាន់កាប់ ១៨% ។ ចាប់តាំងពីដើមឆ្នាំមក មានជម្លោះផ្ទៃក្នុងរវាង HYBE និង ADOR ។ នៅក្នុងខែកញ្ញា Min Hee Jin ត្រូវបានដកចេញពីតំណែង CEO ហើយលោកស្រី Kim Joo Young បានចូលកាន់តំណែង។ Min Hee Jin បានចោទប្រកាន់ HYBE ពីបទរំលោភលើកិច្ចសន្យាម្ចាស់ហ៊ុន។

បន្ទាប់ពីនោះ NewJeans បានផ្សាយបន្តផ្ទាល់ម្តងហើយម្តងទៀត ដោយបង្ហាញពីការមិនពេញចិត្តនៅពេលដែល HYBE បណ្តេញ Min Hee Jin ។ សមាជិកក្រុមជឿថាពួកគេមិនត្រូវបានគេគោរព។ នាយកប្រតិបត្តិថ្មីមិនអើពើនៅពេលដែលសមាជិកក្រុមត្រូវបាន «មើលងាយ» នៅក្នុងក្រុមហ៊ុន។ NewJeans បានស្នើសុំ HYBE ដើម្បីស្តារមុខតំណែងរបស់ Min Hee Jin ។

NewJeans បង្ហាញខ្លួននៅឆ្នាំ ២០២២ ក្រោមការគ្រប់គ្រងរបស់ Min Hee Jin ដោយបានដឹកនាំដំណើរការទាំងមូលតាំងពីការសម្ដែង រហូតដល់ការរៀបចំផែនការ តន្ត្រី ផលិតកម្ម និងក្បាច់រាំ។ ចាប់តាំងពីការចាប់ផ្តើមរបស់ខ្លួន ក្រុមនេះបានសាងភាពល្បីល្បាញពេញអនឡាញ ។ ឥទ្ធិពលរបស់ក្រុមនេះបានជួយឱ្យតម្លៃភាគហ៊ុនរបស់ក្រុមហ៊ុនគ្រប់គ្រង HYBE កើនឡើងយ៉ាងខ្លាំង ដោយគេចផុតពីការធ្លាក់ចុះបន្ទាប់ពីមានព័ត៌មានជាបន្តបន្ទាប់អំពី ការចូលបម្រើយោធារបស់ BTS ៕

សហរដ្ឋអាមេរិក ៖ សារព័ត៌មានបរទេសរាយការណ៍ថា ការសាកល្បងបង្ហោះយានអវកាស Starship របស់ក្រុមហ៊ុន SpaceX ដែលលោក Elon Musk ជាស្ថាបនិក កាលពីខែតុលា ឆ្នាំ២០២៤ គឺជាព្រឹត្តិការណ៍ដ៏សំខាន់នៅលើពិភពលោក ។ វាបង្ហាញពីភាពរីកចម្រើនរបស់បច្ចេកវិទ្យានាពេលបច្ចុប្បន្ន និងថ្ងៃអនាគត ។

ក្រុមហ៊ុន SpaceX លើកឡើងថា នេះជាភាពជោគជ័យដ៏ធំដែលក្រុមហ៊ុនសម្រេចបាននៅឆ្នាំ២០២៤ ហើយវាបង្ហាញពីជោគជ័យនាថ្ងៃអនាគត ។ ក្រុមហ៊ុនរំពឹងថា នឹងធ្វើការសាកល្បងបង្ហោះយានអវកាស Starship រហូតដល់ជាង៤០០លើកក្នុងរយៈពេល៤ឆ្នាំមុខ ដើម្បីឱ្យការធ្វើដំណើរទៅអវកាសបានជោគជ័យ ។

ប៉ុន្តែការសាកល្បងបង្ហោះយានអវកាសរបស់ក្រុមហ៊ុននេះ នឹងបង្កគ្រោះថ្នាក់ដល់ជីវិតសត្វស្លា ឬប៉ះពាល់ដល់តំបន់នៅក្បែរនោះ ។ អ្នកស្រាវជ្រាវនិយាយថា គ្រឿងម៉ាស៊ីនចំនួន៣៣ របស់យានអវកាស Starship មានកម្រិតសំឡេងរំខាន ចាប់ពី១០៥ឌីស៊ីបែល ទៅ១២៥ឌីស៊ីបែល ក្នុងអំឡុងពេលវាហោះឡើង និងចុះចត ។

ចំណែកអាជ្ញាធរទីក្រុង Port Isabel ដែលស្ថិតនៅជិតរដ្ឋតិចសាស់ ឱ្យដឹងថា កម្រិតសំឡេងរំខានខ្ពស់ ស្មើនឹង១៤៤.៦ឌីស៊ីបែលរបស់យានអវកាស បានធ្វើឱ្យប៉ះពាល់ដល់អគារ ឬអគារបែកបាក់ ។ ក្រៅពីនេះ វាបានប៉ះពាល់ដល់សត្វព្រៃ ដែលរស់នៅក្បែរបរិវេណបង្ហោះយានអវកាសផងដែរ ដូចជា ៖ ប៉ះពាល់ពងសត្វស្លាបក្នុងសំបុក ហើយអាជ្ញាធរទីក្រុងនេះស្នើឱ្យ Federal Aviation Administration (FAA) ដោះស្រាយបញ្ហាសំឡេងរំខាន ដើម្បីសង្គ្រោះដល់ជីវិតសត្វស្លាប ។

គួរបញ្ជាក់ថា កាលពីថ្ងៃទី១៣ ខែតុលា ឆ្នាំ២០២៤ ក្រុមហ៊ុន SpaceX របស់លោក Elon Musk បានបង្ហោះយានអវកាស Starship នៅសហរដ្ឋអាមេរិក ក្នុងគោលបំណងសាកល្បងប្រព័ន្ធផ្សេងៗដែលចាំបាច់ដល់ដំណើរការយានអវកាស ៕