មកដឹងពីអត្ថប្រយោជន៍ និងតម្លៃរបស់ដើមក្រវាញ

ដើមក្រវាញ គឺជារុក្ខជាតិម្យ៉ាងដែលដុះតាមធម្មជាតិ មានឈ្មោះវិទ្យាសាស្ត្រថា Amomum Repens Sonner ត្រូវបានរកឃើញក្នុងប្រទេសកម្ពុជា វៀតណាម ថៃ ឡាវ…គឺជាគ្រឿងទេសថ្លៃជាងគេបំផុតទី ៣ នៅលើពិភពលោកបន្ទាប់ពី saffron និង vanilla។ គ្រឿងទេសនេះមានតម្លៃរហូតដល់ ៩០ ដុល្លារអាមេរិកក្នុងមួយគីឡូក្រាម ដោយសារវាត្រូវការច្រូតដោយដៃ គឺជាដំណើរការដ៏ស្មុគស្មាញ នឿយហត់ខ្លាំង។ ផ្លែក្រវាញពណ៌បៃតងនីមួយៗត្រូវរើសនៅពេលទុំប្រហែល ៧០% ដូច្នេះវាត្រូវការពេលវេលា និងការថែទាំយ៉ាងល្អិតល្អន់ដើម្បីប្រមូលផលគ្រឿងទេសនេះ។

ជាពិសេសផ្លែឈើត្រូវបានប្រមូលផលពីដើមឈើដែលមានអាយុយ៉ាងហោចណាស់ ៣ ឆ្នាំ ឬច្រើនជាងនេះនៅក្នុងដំណាក់កាលនៃការផ្លាស់ប្តូរពីពណ៌បៃតងទៅជាពណ៌លឿង ហើយពេលវេលាប្រមូលផលសមរម្យបំផុតគឺនៅរដូវស្លឹកឈើជ្រុះ។ ក្រោយពីប្រមូលផលរួច ត្រូវសម្ងួតក្នុងម្លប់ ហើយទុកក្នុងកន្លែងត្រជាក់ និងស្ងួត។ បើនិយាយពីការប្រើប្រាស់វិញ រុក្ខជាតិនេះគឺមានអត្ថប្រយោជន៍ជាច្រើន ដែលអាចយកធ្វើជាគ្រឿងទេសសម្រាប់ម្ហូបអាហារក៏បាន ធ្វើជាឱសថព្យាបាលជំងឺក៏បាន។

សម្រាប់គ្រឿងទេស ស្លឹកខ្ចីយកទៅធ្វើបន្លែសម្រាប់ស្ល រីឯផ្កា និងផ្លែក្រវាញវិញ គឺជាផ្នែកដែលគេប្រើជាឱសថព្យាបាលជំងឺដូចជា៖ ស្ពឹកស្រពន់, ហើមអញ្ចាញធ្មេញ, ជួយប្រឆាំងនឹងជំងឺមហារីក, ប្រឆាំងនឹងការរលាក, ជាថ្នាំបញ្ចុះទឹកនោម និងបញ្ចុះសម្ពាធឈាម។ ចំណែកមើមរបស់វាត្រូវបានគេយកធ្វើជាថ្នាំពៅកម្លាំង និងព្យាបាលការស្រវាំងភ្នែកជាដើម។ ដើមក្រវាញ មានលក្ខណៈស្រដៀងទៅនឹងរំដេង ដុះនៅក្នុងព្រៃតាមតំបន់ជើងភ្នំ និងសម្បូរមានជាងគេនៅខេត្តពោធិ៍សាត់ ជាពិសេសនៅក្នុងស្រុកវាលវែង។

រុក្ខជាតិនេះមានដុះនៅក្នុងព្រៃសហគមន៍ប្រមាណ ៤០០ ហិចតាក្នុងឃុំអូសោម ស្រុកវាលវែង ដោយដុះក្រោមដើមឈើធំៗ និងក្រោមដើមចេកព្រៃ ព្រមទាំងស្ថិតក្រោមការអភិរក្សរបស់មន្ត្រីឧទ្យានុរក្សក្នុងតំបន់ផងដែរ។ ដើមក្រវាញមានកម្ពស់ពី ៣ ទៅ ៤ ម៉ែត្រ ដុះបែកជាគុម្ពរស់បានយូរឆ្នាំ។ ដើមនីមួយៗមានស្លឹកពី ១៥ ទៅ ១៨ សន្លឹក។ ផ្លែក្រវាញមានគ្រាប់ ២០-៣០ គ្រាប់ មានក្លិនឈ្ងុយ រាងស្វ៊ែរ និងស្បែកជ្រីវជ្រួញ។ បច្ចុប្បន្នរុក្ខជាតិប្រភេទនេះមានដុះច្រើននៅខេត្តកំពង់ស្ពឺ បាត់ដំបង ពោធិ៍សាត់ ជាពិសេសនៅតំបន់ភ្នំក្រវាញតែម្តង៕