ស្របពេលបទ« សេកមន្ត» របស់តារាចម្រៀងឧកញ៉ា ព្រាប សុវត្ថិ និង តន់ ចន្ទសីម៉ា រងនូវការវែកញែកព្រោះតែចាប៉ីដងវែងលាយតុក្កតា ឡាប៊ូៗ ទស្សនិកជនមួយចំនួនបានប្រៀបធៀបទៅបទរបស់ វណ្ណដា និងព្រឹទ្ធាចារ្យ គង់ ណៃ ដែលមានចំណងជើងថា «Time To Rise » ប្រើចាប៉ីដងវែងតែមួយដើមល្បីទូទាំងពិភពលោក រហូតឃ្លាចម្រៀង «បុរាណលាយសម័យ លាយឱ្យចូល» បានផ្ទុះកក្រើកពេញបណ្តាញសង្គម។
ទស្សនិកជនអ្នកប្រើប្រាស់បណ្តាញសង្គមជ្រាបមកហើយថាថ្មីៗនេះបទរបស់តារាចម្រៀងឧកញ៉ា ព្រាប សុវត្ថិ និងកញ្ញា តន់ ចន្ទសីម៉ា ដែលបង្ហាញពីចាប៉ីដងវែងរហូតដល់ទៅជាង១០០ដើមនិងលាយតុក្កតា ឡាប៊ូៗ បានធ្វើឱ្យសាធារណជនបញ្ចេញមតិវែកញែកជាច្រើនត្រង់ចំណុចលាយ ឡាប៊ូៗ ថាភ្លាវខ្លាំង។ ជាមួយគ្នានេះទស្សនិកជនមួយផ្នែកទៀតលើកឡើងថាមានភាពលម្អៀងមិនឃើញពីការលើកតម្កើនសិល្បៈវប្បធម៌ខ្មែរដែលបង្ហាញពីចាប៉ីដងវែងដូចជាបទ Time To Rise របស់ វណ្ណដា និងព្រឹទ្ធាចារ្យ គង់ ណៃ ទទួលបានការសរសើរ ប៉ុន្តែនៅពេលផលិតកម្មរបស់ឧកញ៉ា ព្រាប សុវត្ថិ និង តន់ ចន្ទសីម៉ា បុរាណលាយសម័យបែរជាមានអ្នករិះគន់ច្រើនទៅវិញ។
ការប្រៀបធៀបរវាងបទ វណ្ណដា និងឧកញ៉ា ព្រាប សុវត្ថិ និង តន់ ចន្ទ សីម៉ា បង្ហាញពីចាប៉ីដងវែងដូចគ្នាតែទទួលវាសនាខុសគ្នានេះ អ្នកមួយចំនួនថាប្រៀបធៀបគ្នាមិនត្រូវនោះទេ។ អ្នកលេងហ្វេកប៊ុក បានបញ្ចេញមតិថា «បទ វណ្ណដា មានកម្មវិធីថ្នាក់ជាតិគេហ៊ានយកទៅលេងបង្ហាញបានវាជាមោទនភាពជាតិខ្មែរ ដូចជាព្រឹត្តិការណ៍បាល់ទាត់ sea games តែបទព្រាប សុវត្ថិ និង តន់ ចន្ទសីម៉ា មិនដឹងថាគេហ៊ានយកទៅប្រគំលេងនៅក្នុងកម្មវិធីធំៗកម្រិតថ្នាក់ជាតិដែរឬក៏អត់ទេព្រោះសុទ្ធតែឡាប៊ូៗ, លោកឯងមានឃើញ Labubu ទេ ហើយLabubu ស្អីហ្នឹងជារបស់ខ្មែរមែន, និយាយចេញមកលើកយកបទ វណ្ណដា មកច្រណែនគេ,អត់ភ្នែកមើលទេលោក?ចាប៉ី Labubu វាភ្លាវពេក , កុំយក វណ្ណដា មកប្រៀបធៀប អត់បាន1%វណ្ណដាទេ (បុរាណលាយសម័យ លាយឱ្យចូល)។ ទស្សនិកជនក៏បានបន្ថែមដែរថា ប្រសិនជាបទ សេកមន្ត នេះគ្មានលាយតុក្កតា ឡាប៊ូៗ ការរិះគន់នៃបទចម្រៀងនេះមិនដល់ថ្នាក់នេះនោះទេ។
ស្របពេលនិន្នាការនេះកើតឡើងនៅបណ្តាញសង្គមទៅលើបទចម្រៀង សេកមន្ត របស់តារាចម្រៀងឧកញ៉ា ព្រាប សុវត្ថិ និង តន់ ចន្ទសីម៉ា ឃ្លាចម្រៀងបទ Time To Rise របស់ វណ្ណដា ក៏បានផ្ទុះកក្រើកឡើងវិញមានការចែករំលែកជាបន្តបន្ទាប់ គឺឃ្លា «បុរាណលាយសម័យ លាយឱ្យចូល»៕
