ប្រទេសចិន ៖ កាលពីថ្ងៃទី១០ ខែតុលា ឆ្នាំ២០២៤ សារព័ត៌មានបរទេសរាយការណ៍ថា ប្រទេសចិននឹងចាប់ផ្តើមនាំចូលបង្កងពីអូស្ត្រាលីម្តងទៀតនៅចុងឆ្នាំ២០២៤ ។ នេះបញ្ជាក់ថា វាជាសញ្ញាល្អមួយសម្រាប់ទំនាក់ទំនងពាណិជ្ជកម្មទ្វេភាគី ក្រោយពីប្រទេសទាំងពីរនេះមានភាពតានតឹងជាមួយគ្នាអស់រយៈពេលជាច្រើនឆ្នាំកន្លងមក ។

នាយករដ្ឋមន្ត្រីអូស្ត្រាលី លោក Anthony Albanese ថ្លែងថា លោក និងនាយករដ្ឋមន្ត្រីចិន លោក Li Qiang បានចុះហត្ថលេខាលើកិច្ចព្រមព្រៀងរួមគ្នាពាក់ព័ន្ធនឹងពាណិជ្ជកម្មទ្វេភាគី កាលពីថ្ងៃទី១០ ខែតុលា កន្លងមក ក្នុងជំនួបក្រៅកិច្ចប្រជុំកំពូលអាស៊ាន លើកទី៤៤ នៅទីក្រុងវៀងចន្ទន៍ ប្រទេសឡាវ ។

កិច្ចព្រមព្រៀងខាងលើ គឺជាការបញ្ចប់ភាពតានតឹងផ្នែកការទូតរវាងប្រទេសអូស្ត្រាលី និងចិន ក្នុងរយៈពេល៤ឆ្នាំកន្លងមកនេះ ។ ភាពតានតឹងបានធ្វើឱ្យអូស្ត្រាលីបាត់បង់ប្រាក់ចំណូលផ្នែកនាំចេញបង្កងទៅកាន់ទីផ្សារចិន ដែលស្មើទឹកប្រាក់រាប់លានដុល្លារអាមេរិក ។

មុនពេលប្រកាសចុះកិច្ចព្រមព្រៀងជាមួយអូស្ត្រាលី ប្រទេសចិនបានលុបចោលការរឹតបន្តឹងផ្សេងៗពាក់ព័ន្ធនឹងការនាំចូលបង្កងពីអូស្ត្រាលី ។ ហេតុនេះ អ្នកជំនាញគិតថា វាជាសញ្ញាល្អមួយសម្រាប់ទំនាក់ទំនងល្អរវាងប្រទេសទាំងពីរ ។

ចំណែកក្រសួងការបរទេសចិនពុំបានធ្វើអត្ថាធិប្បាយពាក់ព័ន្ធនឹងការដកបម្រាមនាំចូលទំនិញពីអូស្ត្រាលីទេ ប៉ុន្តែមន្ត្រីនាំពាក្យក្រសួងការបរទេសចិននិយាយថា ចិននឹងចាប់ផ្តើមសហការជាមួយអូស្ត្រាលីឡើងវិញ ដើម្បីដោះស្រាយបញ្ហានានាដែលប្រទេសទាំងពីរបារម្ភតាមរយៈការចរចា ។

គួរបញ្ជាក់ថា ចិនបានចាប់ផ្តើមហាមនាំចូល និងដំឡើងពន្ធនាំចូលខ្ពស់សម្រាប់ទំនិញជាច្រើនប្រភេទមកពីអូស្ត្រាលី រួមមាន ៖ ធ្យូងថ្ម, ស្រាទំពាំងបាយជូរ និងបង្កង តាំងពីចុងឆ្នាំ២០២០ មកម៉្លេះ ។ ការប្រកាសហាមនាំចូលទំនិញពីអូស្ត្រាលី ក្រោយពីទំនាក់ទំនងរបស់ចិន និងអូស្ត្រាលីមានភាពតានតឹងអស់រយៈពេលជាច្រើនឆ្នាំ ហើយវាកាន់តែតានតឹងបំផុត ក្នុងអំឡុងពេលជំងឺកូវីដ-១៩ ឆ្លងរាតត្បាត ៕

ប្រទេសន័រវេស ៖ ជំងឺផ្សេងៗអាចកើតឡើងលើកុមារ និងមនុស្សចាស់គ្រប់ពេលវេលា ដោយសារស្ថានភាពរាងកាយ, ទម្លាប់នៃការរស់នៅ និងការបរិភោគចំណីអាហារខុសៗគ្នាក្នុងក្រុមគ្រួសារនីមួយៗ ។ លើសពីនេះ ការធ្វើដំណើរទៅសាលារៀនឆ្លងកាត់ខ្យល់, ទឹកភ្លៀង និងកំដៅថ្ងៃ បានធ្វើឱ្យកូនសិស្សមួយចំនួនឈឺថ្កាត់ញឹកញាប់ និងពុំបានទៅសាលារៀន ។

ហេតុនេះ មនុស្សយន្ត AV1 បានក្លាយភ្នាក់ងារជំនួយដ៏សំខាន់សម្រាប់អាណាព្យាបាលសិស្សទាំងអស់ ដែលពុំចង់ឱ្យកូនអវត្តមានក្នុងថ្នាក់ ឬខ្លាចកូនរៀនមិនទាន់មិត្តភក្តិ ។ មនុស្សយន្តប្រភេទនេះស័ក្តិសមបំផុតសម្រាប់អាណាព្យាបាលណាដែលកូនមានបញ្ហាសុខភាព គួរតែទិញវាមកប្រើប្រាស់ ។

ក្រុមហ៊ុនមួយនៅប្រទេសន័រវេសឈ្មោះ No Isolation បានផលិតមនុស្សយន្ត AV1 ដើម្បីជួយដោះស្រាយបញ្ហាកូនសិស្សអវត្តមាន រៀនទាន់មិត្តភក្តិ ដោយសារឈឺថ្កាត់ ។ អាណាព្យាបាលសិស្សអាចបញ្ជូនមនុស្សយន្តនេះទៅរៀនក្នុងថ្នាក់ជំនួសកូនរបស់ខ្លួនក្នុងពេលអវត្តមាន ដើម្បីឱ្យកូនអាចរៀនពីផ្ទះទៅ ។

ខាងក្រោមនេះ គឺជាលក្ខណៈពិសេសរបស់មនុស្សយន្ត AV1 ៖

-មានទំហំតូច និងរួសរាយរាក់ទាក់
-បំពាក់កាមេរ៉ា, មីក្រូហ្វូន និងឧបករណ៍បំពងសំឡេងសម្រាប់កុមារ
-អាចបញ្ជាមនុស្សយន្តពីផ្ទះ ឬមន្ទីរពេទ្យតាមរយៈកម្មវិធីបញ្ជា
-ជួយឱ្យសិស្សនៅផ្ទះអាចមើលឃើញថ្នាក់រៀន, ស្តាប់គ្រូពន្យល់ និងជជែកជាមួយមិត្តភក្តិដូចគ្នានឹងការរៀនក្នុងថ្នាក់ដែរ ។

ចំណែកតម្លៃមនុស្សយន្តវិញ គឺស្មើជិត៥.០០០ដុល្លារអាមេរិក ហើយនៅឆ្នាំ២០២៤ មានប្រទេសចំនួន១៧ បានប្រើប្រាស់មនុស្សយន្ត AV1 ។ ប្រទេសអាល្លឺម៉ង់បានប្រើប្រាស់មនុស្សយន្តនេះច្រើនជាងគេ គឺស្មើរហូតដល់ជាង១.០០០គ្រឿងឯណោះ ។

ហេតុនេះ សាលារៀននានាអាចជួលមនុស្សយន្ត AV1 ស្មើតម្លៃប្រមាណ២០០ដុល្លារអាមេរិកក្នុង១ខែ ដើម្បីជួយឱ្យកូនសិស្សអវត្តមានដោយសារក្តៅខ្លួន ឬមានបញ្ហាផ្សេងៗអាចរៀនពីចម្ងាយ និងទំនាក់ទំនងជាមួយមិត្តភក្តិបានដូចរៀនក្នុងថ្នាក់ ៕

ប្រទេសថៃ ៖ កាលពីថ្ងៃទី១៦ ខែតុលា ឆ្នាំ២០២៤ សារព័ត៌មានថៃរាយការណ៍ថា សមត្ថកិច្ចបានប្រមូលភស្តុតាងទាំងអស់ដើម្បីឱ្យតុលាការចេញដីកាចា.ប់ ខ្លួនលោក វ៉ារ៉ាត់ផុន វ៉ារ៉ាត់វរ៉ាគុន ជានាយកគ្រប់គ្រងក្រុមហ៊ុន The iCON GROUP ព្រមទាំងចា.ប់ ខ្លួនជនពាក់ព័ន្ធ និងតារាសម្តែងទាំងអស់ សរុបចំនួន១៨នាក់ ពីករណីឆបោ.ក ពលរដ្ឋ ដោយរួមគ្នាផ្សាយព័ត៌មានមិនពិតចូលក្នុងប្រព័ន្ធកុំព្យូទ័រ ។

មន្ត្រីស៊ើបអង្កេតនៃនាយកដ្ឋានប្រឆាំងបទល្មើសបានប្រមូលភស្តុតាង និងសាក្សី ដើម្បីសុំដីកាពីតុលាការចាប់ខ្លួនជនពាក់ព័ន្ធទាំងអស់ជាមួយក្រុមហ៊ុន The iCON GROUP ចំនួន១៨នាក់ រួមទាំងនាយកគ្រប់គ្រងក្រុមហ៊ុន The iCON GROUP ផងដែរ ក្រោយពីរកឃើញថា មានជនរងគ្រោះជាច្រើនបានចាញ់បោកក្រុមហ៊ុននេះ ។

សមត្ថកិច្ចបានចាប់ខ្លួនជនពាក់ព័ន្ធនឹងក្រុមហ៊ុន The iCON GROUP ចំនួន១៨នាក់ រួមមាន ៖ លោក វ៉ារ៉ាត់ផុន វ៉ារ៉ាត់វរ៉ាគុន ជានាយកគ្រប់គ្រងក្រុមហ៊ុន The iCON GROUP, អ្នកនាង ភីឆាយ៉ា វឌ្ឍនាមុនទ្រី (ជាតារាសម្តែង), លោក យូរ៉ាណាន់ ផាម៉ុនមុនទ្រី (ជាអតីតតារាសម្តែង ឬហៅលោក ប៉ាតាវី), លោក បូសាកាន់ កាន់ថាថាវ៉ន (ជាតារាសម្តែង និងជាពិធីករទូរទស្សន៍) ដែលតារាសម្តែងទាំង៣រូបនេះកាន់មុខតំណែងផ្នែកគ្រប់គ្រងរបស់ក្រុមហ៊ុន ព្រមទាំងចាប់ខ្លួនជនពាក់ព័ន្ធផ្សេងទៀតបញ្ជូនទៅកន្លែងសួរចម្លើយ ។

ក្រៅពីនេះ សមត្ថកិច្ចក៏បានរឹបអូសយកទ្រព្យសម្បត្តិទាំងអស់របស់ជនជាប់ចោទ រួមទាំងទ្រព្យសម្បត្តិរបស់តារាសម្តែងផងដែរ រួមមាន ៖ រថយន្តទំនើបៗ និងទ្រព្យសម្បត្តិជាច្រើន ។ សមត្ថកិច្ចបញ្ជាក់ថា វាជារឿងក្តីមួយដែលពលរដ្ឋថៃចាប់អារម្មណ៍យ៉ាងខ្លាំង ហើយជនជាប់ចោទទាំងនេះពុំអនុញ្ញាតឱ្យនៅក្រៅឃុំទេ ដោយសារវាជារឿងក្តីមានទោសធ្ងន់ និងពលរដ្ឋថៃជាច្រើននាក់រងគ្រោះ ។

កន្លងមក តារាសម្តែងលំដាប់ប្រទេសទាំង៣រូបបានបកស្រាយនៅចំពោះមុខសារព័ត៌មានថា ពួកខ្លួនគ្រាន់តែជាអ្នកតំណាងលក់ផលិតផលប៉ុណ្ណោះ និងគ្មានសិទ្ធិក្នុងក្រុមហ៊ុនទេ ។ ប៉ុន្តែជនរងគ្រោះលើកឡើងថា តារាសម្តែងទាំង៣រូបបានធ្វើសកម្មភាពយ៉ាងច្រើនជាមួយក្រុមហ៊ុន ។

គួរបញ្ជាក់ថា The iCON GROUP គឺជាក្រុមហ៊ុនប្រកបអាជីវកម្មផ្នែកផលិតផលអាហារបំប៉ន និងសម្រស់ ដែលអាជីវកម្មរបស់ក្រុមហ៊ុនផ្តោតលើទីផ្សារបណ្តាញ ហើយមានភាពចម្រូងចម្រាស់ខ្លាំងនៅប្រទេសថៃនាពេលបច្ចុប្បន្ន ។ ពលរដ្ឋថៃបានជឿទុកចិត្តក្រុមហ៊ុននេះ ដោយសារមានតារាល្បីៗលំដាប់ប្រទេសជាច្រើនរូបចូលរួមជាមួយក្រុមហ៊ុន ។

ជនរងគ្រោះជាច្រើននាក់និយាយថា ដោយសារតែតារាសម្តែងល្បីៗទាំងនេះហើយ ទើបធ្វើឱ្យពួកគេជឿទុកចិត្តរហូតដល់លង់ខ្លួន ។ ក្រុមហ៊ុនសន្យាថា នឹងផ្តល់ប្រាក់កម្រៃឱ្យពួកគេប្រចាំខែ និងផ្តល់នូវអត្ថប្រយោជន៍ជាច្រើនទៀត បើពួកគេអាចស្វែងរកសមាជិកបន្ថែមដើម្បីទិញផលិតផលក្រុមហ៊ុន ។

ក្រុមហ៊ុន The iCON GROUP រកចំណូលបានរាប់លានដុល្លារអាមេរិកក្នុងរយៈពេល៥ឆ្នាំមកនេះ ប៉ុន្តែអ្នកតំណាងចែកចាយផលិតផលជាច្រើននាក់និយាយថា ក្រុមហ៊ុននេះបោកប្រាស់ពួកគេ រហូតដល់អស់ទ្រព្យសម្បត្តិពីខ្លួន ។ លើសពីនេះ ក្រុមហ៊ុនក៏បានធ្វើប្រតិបត្តិការក្នុងប្រទេសផ្សេងៗផងដែរ រួមមាន ៖ កម្ពុជា, ឡាវ និងជប៉ុន ៕

បរទេស៖ មឹកយក្សដ៏ធំសម្បើមមួយក្បាលបានអណ្តែតនៅលើឆ្នេរសមុទ្រ El Sablón នៃទីក្រុង Llanes ភាគខាងជើងប្រទេសអេស្ប៉ាញ បានកំពុងបង្កឱ្យមានការចាប់អារម្មណ៍យ៉ាងខ្លាំងពីអ្នកវិទ្យាសាស្ត្រ។
មឹកយក្ស Architeuthis dux គឺជាសត្វសមុទ្រជម្រៅជ្រៅបំផុត ដែលកម្រនឹងបង្ហាញខ្លួនឱ្យមនុស្សយើងបានឃើញពួកវាណាស់ ដូច្នេះការប្រទះឃើញសាកសពរបស់វាអណ្តែតនៅលើឆ្នេរសមុទ្រ El Sablón នៃទីក្រុង Llanes ភាគខាងជើងប្រទេសអេស្ប៉ាញ គឺជាការរកឃើញដ៏គួរឱ្យចាប់អារម្មណ៍បំផុតមួយរបស់អ្នកវិទ្យសាស្ត្រ។

មឹកយក្សប្រវែង ១៧ ម៉ែត្រជាមួយទម្ងន់ ៣១២ គីឡូក្រាមនេះគឺមិនអាចបរិភោគបាននោះទេ ព្រោះម៉ាសសាច់ដុំរបស់វាគឺមានកម្រិតខ្ពស់នៃអាម៉ូញាក់ពុលខ្លាំង។ មឹកយក្សដែលរកឃើញនេះគឺជាសត្វឆ្អឹងខ្នងដ៏ធំបំផុត និងកម្របំផុតដែលមានវត្តមានលើផែនដី។ មឹកទាំងនេះច្រើនតែរស់នៅក្នុងជម្រៅដ៏អស្ចារ្យក្រោមផ្ទៃមហាសមុទ្រដល់រាប់រយម៉ែត្រឯណោះ ហើយជារឿយៗគឺមិនមានពន្លឺអាចទៅដល់បានឡើយ។ យោងតាម National Geographic បានឱ្យដឹងថា ពួកវាការពារខ្លួន ឬបរបាញ់សត្វផ្សេងទៀតដោយប្រើត្រែងវែងពីរដែលជួយឱ្យពួកវាចាប់ និងដាក់អាហារចូលទៅក្នុងមាត់បានយ៉ាងងាយស្រួល។

ដូច្នេះអាហាររបស់ពួកវារួមមានត្រី បង្គា និងមឹកប្រភេទផ្សេងៗទៀត។ អ្នកជំនាញខ្លះនិយាយថា ពួកវាថែមទាំងអាចសម្លាប់ និងស៊ីត្រីបាឡែនតូចៗបានទៀតផង។ យោងតាម Newsweek ភ្នែកមឹកយក្សស្ថិតក្នុងចំណោមសត្វធំបំផុតក្នុងនគរដែលមានអង្កត់ផ្ចិត ២៥ ស.ម. ដែលសរីរាង្គដ៏ធំនេះអនុញ្ញាតឱ្យពួកវារកឃើញវត្ថុ និងចាប់សត្វនៅក្នុងបរិយាកាសងងឹតបានយ៉ាងជោគជ័យបំផុត។

លោក Luis Laria ប្រធានក្រុមប្រឹក្សាសម្របសម្រួលស្រាវជ្រាវ និងការពារសត្វសមុទ្រ (CEPESMA) បាននិយាយថា សមុទ្រ El Sablón នៃទីក្រុង Llanes ភាគខាងជើងប្រទេសអេស្ប៉ាញ គឺជាតំបន់សមុទ្រដែលមានប្រភេទសត្វមឹកធំៗជាច្រើនរស់នៅ។ ហេតុនេះការប្រទះឃើញមឹកយក្សដ៏កម្រមួយក្បាលនេះអណ្តែតលើផ្ទៃសមុទ្រមិនមែនជាលើកទីមួយនោះទេ ប៉ុន្តែការរកឃើញនេះគឺកំពុងបង្កឱ្យមានការចាប់អារម្មណ៍យ៉ាងខ្លាំងពីអ្នកវិទ្យាសាស្ត្រដើម្បីស្រាវជ្រាវ។ ទោះជាយ៉ាងណា យើងមិនទាន់ដឹងពីមូលហេតុច្បាស់លាស់នៃការស្លាប់របស់មឹកយក្សដ៏កម្រនេះនោះទេ៕

ប្រទេសនីហ្សេរីយ៉ា ៖ កាលពីថ្ងៃទី១៦ ខែតុលា ឆ្នាំ២០២៤ សារព័ត៌មានបរទេសរាយការណ៍ថា រថយន្តដឹកប្រេងឥន្ធនៈ១គ្រឿងនៅប្រទេសនីហ្សេរីយ៉ា បានក្រឡាប់ហៀរប្រេងនៅតាមផ្លូវ ហើយមនុស្សម្នាក៏នាំគ្នាមកប្រមូលប្រេងទាំងនេះ ។ បន្តិចក្រោយមក រថយន្តនេះក៏ផ្ទុះឡើងបណ្តាលឱ្យភ្លើងឆេះរាលដាលពេញបរិវេណនេះ និងធ្វើឱ្យមនុស្ស១៤៧នាក់ស្លា.ប់ និងរងរបួសជាច្រើននាក់ទៀត ។

សារព័ត៌មានបរទេសរាយការណ៍ថា រថយន្តដឹកប្រេងបានក្រឡាប់នៅរដ្ឋជិកាវ៉ា ស្ថិតនៅភាគខាងជើងប្រទេសនីហ្សេរីយ៉ា កាលពីថ្ងៃទី១៦ ខែតុលា កន្លងមក ដែលធ្វើឱ្យអ្នកស្រុកនាំគ្នាមកប្រមូលប្រេងយកទៅផ្ទះ ប៉ុន្តែពេលនោះ ស្រាប់តែរថយន្តផ្ទុះបណ្តាលឱ្យមានភ្លើងឆេះរាលដាលយ៉ាងឆាប់រហ័ស ។ អ្នកស្រុកដែលកំពុងប្រមូលប្រេងរត់គេចពុំទាន់ ហើយក៏បានស្លាប់ក្នុងភ្លើង ។

ហេតុការណ៍នេះបានកើតឡើងនៅទីក្រុងម៉ាជៀ រដ្ឋជិកាវ៉ា ដោយសារអ្នកបើកបររថយន្តដឹកប្រេងពុំអាចបញ្ជារថយន្តបាន ហើយក៏បណ្តាលឱ្យរថយន្តក្រឡាប់នៅកន្លែងកើតហេតុ ។ រថយន្តនេះបានធ្វើដំណើរមកពីទីក្រុងខាណូ ទៅកាន់ទីក្រុងអេនគូរូ រដ្ឋយ៉ូបេ ។

សមត្ថកិច្ចនីហ្សេរីយ៉ានិយាយថា ក្រោយពីរថយន្តដឹកប្រេងក្រឡាប់ សមត្ថកិច្ចក៏បានបិទរបាំងការពារកុំឱ្យពលរដ្ឋចូលមកជិត ប៉ុន្តែសមត្ថកិច្ចពុំអាចហាមឃាត់ពលរដ្ឋបានទេ ហើយពលរដ្ឋនាំគ្នាមកប្រមូលប្រេងកាន់តែច្រើនឡើងៗ ។

សមត្ថកិច្ចបាននិយាយមកកាន់សារព័ត៌មាន BBC ថា ៖ «យើងបានព្យាយាមបំផុតហើយដើម្បីហាមឃាត់ពលរដ្ឋកុំឱ្យមកក្បែរកន្លែងកើតហេតុ ដោយធ្វើការបិទរបាំងការពារ ។ ប៉ុន្តែមានពលរដ្ឋមកប្រមូលប្រេងកាន់តែច្រើន រហូតដល់សមត្ថកិច្ចឃាត់ឃាំងលែងបាន ហើយពេលនោះ ស្រាប់តែភ្លើងឆេះរាលដាលតែម្តង» ។

ហេតុការណ៍នេះបណ្តាលឱ្យមនុស្សស្លាប់ចំនួន១៤៧នាក់ និងរងរបួសជាង១០០នាក់ ហើយអាជ្ញាធរបានបញ្ជូនអ្នករងរបួសទៅកាន់មន្ទីរពេទ្យនៅទីក្រុងក្បែរៗ ។ មនុស្សភាគច្រើនរងរបួសធ្ងន់ធ្ងរ រីឯសាកសពវិញ អាជ្ញាធរនឹងរៀបចំពិធីកប់សាកសពរួមគ្នានាពេលបន្ទាប់ ។

អ្នកបើកបររថយន្តដឹកប្រេងពុំរងរបួសទេ ប៉ុន្តែសមត្ថកិច្ចបានចាប់ខ្លួនអ្នកបើកបររថយន្តដើម្បីស៊ើបអង្កេតរកមូលហេតុពិតប្រាកដ ដែលបណ្តាលឱ្យរថយន្តក្រឡាប់ផ្ទុះឆេះ ។ សមត្ថកិច្ចនិយាយថា នេះជាហេតុការណ៍គំរូមួយសម្រាប់មនុស្សផ្សេងទៀត ប្រសិនបើជួបហេតុការណ៍រថយន្តដឹកប្រេងក្រឡាប់បែបនេះ សូមកុំទៅក្បែរឱ្យសោះ ពីព្រោះគ្រោះថ្នាក់អាចកើតឡើងគ្រប់ពេលវេលា ៕

ព្រះច័ន្ទពេញវង់នៅថ្ងៃទី ១៧ ខែតុលា ឆ្នាំ២០២៤ ល្ងាចនេះ នឹងក្លាយជាព្រះច័ន្ទដ៏ធំបំផុតប្រចាំឆ្នាំលំដាប់ទី ៣ ដោយសារតែវារះនៅជិតផែនដីបំផុត។
យោងតាមវេជ្ជបណ្ឌិត Fred Espenak អ្នកជំនាញខាងរូបវិទ្យា និងសូរ្យគ្រាស ដែលធ្វើការនៅ NASA បាននិយាយថា នៅឆ្នាំ ២០២៤ នេះព្រះច័ន្ទដ៏ធំបំផុត ឬហៅថា Super Moons នឹងរះនៅជិតផែនដីរបស់យើងចំនួន ៤ ដងគឺក្នុងអំឡុងខែសីហា កញ្ញា តុលា និងវិច្ឆិកា។

ដូច្នេះ Super Moons ដែលរះថ្ងៃទី ១៧ ខែតុលានេះ នឹងជាព្រះច័ន្ទដ៏អស្ចារ្យបំផុតលំដាប់ទី ៣ ប្រចាំឆ្នាំ ហើយក៏ជាព្រះច័ន្ទពេញលេញជាងគេបំផុតផងដែរ។ នៅថ្ងៃនេះ ព្រះច័ន្ទនឹងពេញបូណ៌មីនៅម៉ោង ៦:៣០ នាទីល្ងាចដែលជាម៉ោងនៅក្នុងប្រទេសកម្ពុជា ដោយឥឡូវនេះវាបាននឹងទៅដល់ perigee ដែលជាចំណុចជិតបំផុតរបស់ផែនដីនៅចម្ងាយ ៣៥៧.១៧៤ គីឡូម៉ែត្រហើយ នេះបើយោងតាម Space ។

Super Moons កើតឡើងដោយសារតែគន្លងរាងអេលីបរបស់ព្រះច័ន្ទ នៅពេលដែលព្រះច័ន្ទស្ថិតនៅជួរជាមួយផែនដី ហើយព្រះអាទិត្យស្ថិតនៅជិតផែនដីបំផុត (perigee) ដូច្នេះព្រះច័ន្ទនឹងមានទំហំធំជាង ១៤% ក៏ដូចជាភ្លឺជាងព្រះច័ន្ទពេញវង់ធម្មតារហូតដល់ ៣០% ។ ហេតុនេះព្រះច័ន្ទដែលរះនៅថ្ងៃនេះត្រូវបានគេចាត់ទុកថា ជាព្រះច័ន្ទដ៏អស្ចារ្យបំផុតប្រចាំឆ្នាំលំដាប់ទី ៣ ដែលនឹងរះនៅជិតផែនដីបំផុត។

ដូច្នេះហើយកុំភ្លេចចូលរួមទស្សនាទាំងអស់គ្នា។ ទោះជាយ៉ាងណាប្រសិនបើអ្នកខកខានមើលព្រះដ៏អស្ចារ្យនៅថ្ងៃនេះ អ្នកក៏មានឱកាសទស្សនាវាម្តងទៀតនៅខែក្រោយ ដែលវានឹងរះនៅជិតផែនដីបំផុតនៅថ្ងៃ ១៥ ខែវិច្ឆិកា ឆ្នាំ២០២៤ ហើយវាក៏ជាព្រះច័ន្ទធំបំផុតចុងក្រោយនៃឆ្នាំផងដែរ៕