តារាចម្រៀងរ៉េបល្បីឈ្មោះប្រចាំប្រទេសកម្ពុជា ម៉ាន់ វណ្ណដា និងគូស្នេហ៍ ស្រីស្អាត ឡូរីន កាន់តែមានសុភមង្គលក្នុងដំណើរជីវិតជាសង្សារដោយបង្កើតពេលវេលាផ្អែមល្អែមជាមួយគ្នាជាច្រើន។ ទោះយ៉ាងណា នៅពេលនេះអ្នកទាំងពីរមិនទាន់លេចឮដំណឹងមង្គលឡើយ។

ថ្មីៗនេះគូស្នេហ៍របស់តារាចម្រៀងរ៉េប វណ្ណដា បានបង្ហាញរូបភាពផ្អែមល្អែមរបស់អ្នកទាំងពីរដោយបានទៅញុំាអាហារ ធ្វើដំណើរតាមដងផ្លូវជាមួយគ្នាយ៉ាងរីករាយដោយមិនភ្លេចចែករំលែកពីជីវិតរីករាយរបស់ពួកគេជូនអ្នកគាំទ្រ។ ការបង្ហាញជីវិតផ្អែមល្អែមនេះបានធ្វើឱ្យអ្នកគាំទ្របញ្ចេញមតិថាមើលហើយពួកគេញញឹមម្នាក់ឯង។

នៅក្នុងStory របស់ ឡូរីន ទៀតសោតគឺបានឃើញនាងកំពុងរុំជើង វណ្ណដា ដែលទំនងមានបញ្ហារបួស។ នេះបង្ហាញឱ្យឃើញពីការមើលថែរបស់ ឡូរីន ទៅកាន់ វណ្ណដា បានយ៉ាងល្អជាមួយមនុស្សជាទីស្រលាញ់។ ទោះបីកន្លងមក ឡូរីន ជួយប្រទះនូវមតិរិះគន់ពីអ្នកលេងបណ្តាញសង្គមមួយចំនួនក្តីទៅលើភាពស៊ិចស៊ីបង្ហាញដើមទ្រូង ប៉ុន្តែចំណងស្នេហាអ្នកទាំងពីរនៅតែបន្តយ៉ាងរលូន គាំទ្រមើលថែគ្នាទៅវិញទៅមក។

ភាពផ្អែមល្អែមរបស់តារាចម្រៀងរ៉េបល្បីឈ្មោះលំដាប់ប្រទេស វណ្ណដា និងស្រីស្អាត ឡូរីន គឺទទួលបានការសាទរច្រើនជាងមិនយល់ស្របពោលគឺអ្នកគាំទ្រគោរពតាមការសម្រេចចិត្តរបស់អាយដលរបស់ពួកគេ។ ទោះយ៉ាងណា ស្នេហារបស់ វណ្ណដា និង ឡូរីន មិនទាន់លេចឮដំណឹងមង្គលឡើយខណៈអ្នកនៅក្នុងចង្កោមសិល្បៈសម្រេចចិត្តរៀបការជាបន្តបន្ទាប់។

គួរបញ្ជាក់ថា វណ្ណដា និង ឡូរីន មានទំនាក់ទំនងជាសាធារណៈរយៈពេលជាង១ឆ្នាំហើយ៕

ឧកញ៉ា ទុំ សារុត ហៅនាយឃ្លោក ដែលជាតារាកំប្លែងដ៏មានឈ្មោះបោះសំឡេងប្រចាំប្រទេសបានទម្លាក់បទចម្រៀងមួយបទមានចំណងជើងថា «ចង់ល្បី» ធ្វើឱ្យសាធារណជនមានការចាប់អារម្មណ៍យ៉ាងខ្លាំង។ បទនេះគឺចាក់ដោតខ្លាំង ដាក់ចំកណ្តាលមុខអ្នកចង់ល្បីមួយចំនួនមិនគិតពីកិត្តិយស ភាពអៀនខ្មាសសុខចិត្តធ្វើគ្រប់បែបយ៉ាងដើម្បីតែភាពល្បីល្បាញតែមួយមុខ។

នៅថ្ងៃទី២០ ខែវិច្ឆិកា នៅលើបណ្តាញសង្គមតារាកំប្លែង នាយឃ្លោក ដែលមានងារជាឧកញ៉ា បានទម្លាក់បទចម្រៀង«ចង់ល្បី»និពន្ធនិងបកស្រាយដោយខ្លួនឯងផ្ទាល់។ មិនមែនជាប្រភេទបទស្នេហា ឬបទប្រភេទរ៉េប ប៉ុន្តែមួយបទនេះបានទាក់ទាញការចាប់អារម្មណ៍ពីសាធារណជនមិនធម្មតាដោយតែអត្ថន័យស៊ីជម្រៅមួយបទនេះទៅលើស្ថានភាពសង្គមសព្វថ្ងៃ។

«ចង់ល្បី» បាននិយាយអំពីអ្នកមួយចំនួនធ្វើឆ្កួត ធ្វើជា ស៊ីស្មៅ ស៊ីដង្កូវ ព្រោះតែមានពាក្យថាចង់ល្បី មិនស្តាប់បង្គាប់ឪពុកម្តាយ ចំណែកអ្នកខ្លះទៀតធ្វើលែងលះប្តីប្រពន្ធ ដៀមដាមជេរធ្ងន់ៗមានអ្នកចូលមើលចូលស្តាប់ មិនខំប្រឹងរកស៊ីគិតតែមើលទូរសព្ទ អាណិតអ្នកមានទ្រព្យទាំងខ្លួនឯងស្ទើរតែដាច់បាយ។ ក្នុងអត្ថន័យបទនេះក៏បានលើកឡើងអំពីការចង់ដឹងរឿងគេ និយាយល្អមិនមានអ្នកស្តាប់ ប៉ុន្តែអាក្រក់ប្រឹងឈោងចាប់ធ្វើត្រាប់តាមគេធ្វើខុសអាងសូមទោសចង់ល្បីដោយការជេរគេ។

មួយបទនេះរបស់ឧកញ៉ា ឃ្លោក បានទាក់ទាញអារម្មណ៍មហាជនយ៉ាងច្រើនមានការស្តាប់ជាង១.៤លានដង និងការចុចLike រាប់ម៉ឺននាក់។ អ្នកលេងបណ្តាញសង្គមបានបញ្ចេញមតិស្រដៀងៗគ្នាថា បទនេះត្រូវនឹងសង្គមសព្វថ្ងៃ៕

ក្នុងដំណើរស្វាគមន៍អ្នកនាង ប្រាសាទ ដាវីន វិលត្រឡប់មកមាតុភូមិវិញអ្នកគាំទ្រជាច្រើនបានទៅទទួលស្វាគមន៍យ៉ាងកក់ក្តៅជាមួយនឹងរបាំឆៃយុំា។ TOP30 Miss Universe 2024 រូបនេះបាននិយាយគាំទ្រនាដការី សុគា គីមលាង ហៅ កូនអាន ដែលមានវត្តមាននៅទីនោះចូលរួមប្រកួតស្នងតំណែងពីខ្លួន។ ទទួលបានការលើកទឹកចិត្តបែបនេះ កូនអាន បានបេ្តជ្ញាយកបទពិសោធន៍របស់ខ្លួនធ្វើឱ្យ Universe ស្គាល់កូនខ្មែរប្រទេសតូចបេះដូងធំ។

នៅល្ងាចថ្ងៃទី២១ វិច្ឆិកា អ្នកនាង ប្រាសាទ ដាវីន និងស្វាមីរួមទាំងកូនស្រីបានធ្វើដំណើរមកដល់ទឹកដីកម្ពុជាក្រោមការស្វាគមន៍យ៉ាងកក់ក្តៅពីបណ្តាហ្វេនៗ ជាមួយនឹងរបាំឆៃយុំា ។ ការទៅទទួលស្វាគមន៍ បវរកញ្ញាចក្រវាលកម្ពុជាដែលបានបំបែកប្រវត្តិសាស្រ្តបើកទ្វារឱ្យកម្ពុជាចូល TOPលើកដំបូងនៅលើឆាកMiss Universe នេះនាដការី ដ៏ល្បីល្បាញប្រចាំប្រទេសកម្ពុជា សុគា គីមលាង ហៅកូនអាន ក៏បានទៅចូលរួមទទួលស្វាគមន៍ដោយផ្ទាល់ផងដែរ។

ក្នុងពេលផ្តល់កិច្ចសម្ភាសន៍ជាមួយអ្នកសារព័ត៌មាន អ្នកនាង ប្រាសាទ ដាវីន បាននិយាយគាំទ្រ ចំពោះកូនអាន ចំពោះការស្នងតំណែងរបស់ខ្លួននៅក្នុងការប្រកួត Miss Universe ។TOP30 Miss Universe 2024 រូបនេះបាននិយាយាថាខ្លួនគាំទ្រឱ្យ កូនអាន ស្នងដំណែងរបស់ខ្លួន ខណៈ កូនអាន បានឆ្លើយតបវិញដែរថាខ្លួននាងមានបំណងចង់ឱ្យប្រាសាទ ដាវីន ជួយបង្ហាត់បង្រៀនដូចគ្នា។

ជាមួយនឹងសំឡេងគាំទ្រច្រើនចូលរួមប្រកួតបវរកញ្ញាចក្រវាល កូនអាន ក៏បានបង្ហោះសំណេរទាំងយប់បញ្ជាក់ថានឹងចូលប្រកួតកម្មវិធីបវរកញ្ញានេះ។ តួឯកស្រីក្នុង MV អាមុំបងអើយ របស់ វណ្ណដា បានបង្ហោះថា«

រាល់ការប្រឹងប្រែងខិតខំ និងបទពិសោធន៍របស់ខ្ញុំ នឹងធ្វើឱ្យ Universe ទទួលស្គាល់កូនខ្មែរកាន់តែច្បាស់ថា ប្រទេសតូចតែបេះដូងធំ គឺ Kon Ant Cambodia»។ សំណេរនៃការតាំងចិត្តរបស់ កូនអាន នេះបានធ្វើឱ្យហ្វេនៗអ្នកនៅក្នុងចង្កោមសិល្បៈមួយចំនួនបង្ហាញការគាំទ្រលើកទឹកចិត្តនាងឱ្យចូលរួមប្រកួត។

ជាមួយនឹងដំរួយរបស់នាដការិនីដែលតែងតែលើកស្ទួយវប្បធម៌ខ្មែររូបនេះចូលរួមប្រកួត Miss Universe អ្នកមួយចំនួនក៏បង្ហាញពីក្តីបារម្ភចំពោះការប្រើប្រាស់ភាសាបរទេសរបស់នាងដោយចង់ឱ្យ កូនអាន ពង្រឹងភាសាឱ្យកាន់តែខ្លាំង។ ទោះយ៉ាងណា ឆ្នាំនៃការចូលប្រកួតរបស់កូនអាន លើឆាក Miss Universe Cambodia មិនទាន់បានដឹងជាក់លាក់នោះទេ។

សុគា គីមលាង គឺជានាដការីដែលទទួលបានការបណ្តុះបណ្តាលតាមក្បួនច្បាប់តាំងពីក្មេង និងជាសិល្បការិនីមួយរូបថែមទាំងជាអតីតទេពធីតាសង្រ្កាន្តឆ្នាំ ២០១៨ ។ សម្រស់របស់ កូនអាន តែងតែទទួលបានការសរសើរពីមហាជនថាស្រស់សោភា ទន់ភ្លន់ សមជាកុលស្រ្តីខ្មែរ គយគន់មិនចេះជិនណាយ។ ជាពិសេស កូនអាន តែងតែជួយលើកស្ទួយវប្បធម៌បុរាណដោយបានរំលេចខ្លួនជាមួយសិល្បៈច្រើនទម្រង់ដើម្បីឱ្យអ្នកជំនាន់ក្រោយបានស្គាល់អ្វីដែលជារបស់ខ្មែរ។ ភាពល្បីល្បាញបំផុតដែលនាំឱ្យមហាជនស្គាល់នាងកាន់តែច្រើនគឺនៅពេលនាងបានរាំរបាំអប្សរាលើភ្នំទឹកកកនៅNew Zealand៕