ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ បានឧបត្ថម្ភម៉ូតូ ១គ្រឿង និងថវិកាមួយចំនួន ជូននិស្សិតម្នាក់ ដែលបាត់ម៉ូតូអំឡុងពេលទទួលសញ្ញាបត្រ។
និស្សិតម្នាក់នោះមានឈ្មោះថា ហេង គឹមហុង ជានិស្សិតសាកលវិទ្យាល័យភូមិន្ទភ្នំពេញ បានបាត់ម៉ូតូ ១គ្រឿង ក្នុងឱកាសចូលរួមពិធីប្រគល់សញ្ញាបត្រថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ កាលពីថ្ងៃទី២១ ខែវិច្ឆិកា ឆ្នាំ២០២៤ នៅមុខសាលមហោស្រពកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ក្រោយពីទទួលបានដំណឹងនេះ ឯកឧត្តមអភិសន្តិបណ្ឌិត ស សុខា និងលោកជំទាវ កែ សួនសុភី ក៏បានឧបត្ថម្ភម៉ូតូ ចំនួន ១គ្រឿង ដើម្បីជួយសម្របសម្រួលដល់ការធ្វើដំណើររបស់និស្សិត និងថវិកាមួយចំនួន ជូនដល់ប្អូនប្រុស និងក្រុមគ្រួសារផងដែរ៕
